Katak Kijenmej jãn Jeova im Jijej

“Kom̦win watõk kijenmej an ad Irooj ãinwõt . . . ej lewõj bwe kom̦win bõk lo̦mo̦o̦r.”​​—2 PITER 3:​15, UBS.

EWI WÃWEEN KWÕNAAJ UWAAK?

Ewi wãween Jeova ear kwal̦o̦k an kijenmej?

Etke Jijej ear aikuj in kijenmej im kõttar wõt?

Ta ko jej aikuj kõm̦m̦ani ñan ad l̦oore joñak eo an Anij kõn kijenmej?

1. Ta kajjitõk eo me ro jet jeid im jatid retiljek rej kwal̦o̦ke?

 JUON jeid im jatid kõrã me eto an tiljek im karejar ñan Jeova ear kijenmej ium̦win elõñ menin mãlejjoñ ko. Kõrã in ear kwal̦o̦k kajjitõk in, “Inaaj ke lo an jem̦l̦o̦k jukjuk in pãd in m̦okta jãn aõ mej?” Ebar wõr ro im eto aer karejar ñan Jeova rej kwal̦o̦k ejja kajjitõk in wõt. El̦ap ad kijoororetok raan eo me Anij enaaj jol̦o̦k aolep apañ ko jej iiooni kiiõ im kõkããl men otemjej. (Revelesõn 21:⁠5) Meñe elukkuun lõñ un ko unin jej tõmak bwe jem̦l̦o̦kin jukjuk im pãd in an Setan el̦ap an epaak, bõtab jet iien jemaroñ m̦õk in kijenmej im kõttare an wal̦o̦k iien in.

2. Ta kajjitõk ko kõn kijenmej me jenaaj etale uwaakier?

² Baibõl̦ ej ba bwe jen kijenmej. Ãinwõt ri karejar ro etto an Anij, jenaaj lo an jejjet kallim̦ur eo an Anij el̦aññe ekajoor tõmak eo ad im jej kijenmej im kõttar iien eo ear karõke ñan kõm̦m̦ane men in. (Riit Hibru 6:​11, 12.) Jeova ej bar kijenmej im kõttar. Ewõr an maroñ ñan kajem̦l̦o̦k aolep nana ko jabdewõt iien ekõn̦aan ak ej kõttare wõt iien eo ejejjet. (Rom 9:​20-24) Etke Jeova ej kijenmej im kõttar wõt? Ewi wãween Jijej ej l̦oore joñak in an Jemen im likũt juon joñak ñan kõj kõn men in? Etke em̦m̦an bwe jen katak kijenmej jãn Jeova? Uwaak ko ñan kajjitõk kein remaroñ jipañ kõj ñan kõttar wõt im kijenmej. Renaaj bar kakajoor tõmak eo ad meñe jemaroñ l̦õmn̦ak bwe elukkuun to an Jeova kajejjet kallim̦ur eo an.

ETKE JEOVA EJ KIJENMEJ IM KÕTTAR?

3, 4. (1) Etke Jeova ear kijenmej im kõttar? (2) Ta eo Jeova ear kõm̦m̦ane ke Adam im Iv rar jab pokake?

³ Jeova wõt ewõr an maroñ ioon aolep men ko ilañ im ioon lal̦ im ejjel̦o̦k bar juon. Kõn men in, ejjab aikuj kõttar ñan jol̦o̦k aolep apañ ko. Bõtab, ewõr unin an kijenmej im kõttar. Kõn kar jum̦ae eo ear wal̦o̦k ilo jikin  kallib in Iden, ear wõr kajjitõk ko raorõk me ej aikuj wal̦o̦k uwaakier. Aolep ro ilañ im ro ijin ioon lal̦ rej bõk tokjãn jãn aer jel̦ã uwaak ko. Jeova ear jel̦ã bwe ebõk iien bwe en wal̦o̦k uwaak in kajjitõk kein im eñin unin ej kijenmej im kõttar wõt. Kõnke Jeova elukkuun jel̦ã kõm̦m̦an im l̦õmn̦ak ko an ro rej pãd ilañ im ro ijin ioon lal̦, men ko ej kõm̦m̦ani rej em̦m̦an ñan kõj aolep.​​—Hibru 4:​13, UBS.

⁴ Kõn̦aan eo an kar Jeova ej bwe lal̦ in en obrak kõn ro ineen Adam im Iv. Anij ear jab wiwijet im jaje ta eo en kõm̦m̦ane ke Setan ear m̦on̦e Iv im tokãlik Adam ear jab pokake. Ear jab jako kõn̦aan eo an Anij ñan armej. Innem, ear pepel̦o̦k im̦aan kõn wãween eo enaaj katõprak kõn̦aan eo an ñan armej ro im kõn lal̦ in. (Aiseia 55:​11) Kõn an kar Jeova kijenmej im kõttar, emaroñ kajejjet kõn̦aan eo an im kam̦oole bwe em̦m̦anl̦o̦k an irooj im tõl aolep armej ro. Im ñan katõprak men in im kũrm̦ool jet iaan karõk ko an ilo wãween eo elukkuun jejjet im em̦m̦an, ear aikuj kõttar ium̦win elõñ to̦ujin iiõ.

5. Etke ewõr unin ad kijenmej im kõttare Jeova?

⁵ Unin an bar Jeova kijenmej im kõttar wõt ej bwe en maroñ lõñl̦o̦k armej ro rej bõk lo̦mo̦o̦r im mour ñan indeeo. Ilo tõre in, ej kõm̦m̦ani men ko me renaaj lo̦mo̦o̦ren ‘jar eo el̦ap.’ (Revelesõn 7:​9, 14; 14:⁠6) Ikijjeen jerbal in kwal̦o̦k naan eo jej kõm̦m̦ane, Jeova ej kũrtok armej ro ñan katak kõn Aelõñ eo an im kien ko an. Ennaan eo kõn Aelõñ eo ej juon “Naan Em̦m̦an” ñan armej ro. (Matu 24:​14, UBS) Kajjojo armej me Jeova ej kũrtok er rej erom ro uwaan doulul eo an ipel̦aakin lal̦ me eobrak kõn armej ro rem̦ool im rej yokwe jim̦we. (Jon 6:​45-47, 65, UBS) Anij eo ad el̦ap yokwe ippãn ej kõm̦m̦ani aolep men kein ñan armej rein bwe ren maroñ kõm̦m̦an bwe en m̦õn̦õn̦õ ippãer. Ear bareinwõt kããlõt jet armej bwe ren erom ro uwaan kien eo an ilañ. Ñe rej pãd ilañ renaaj jipañ armej ro ijin ioon lal̦ me rej pokake ñan aer weeppãn im mour ñan indeeo. Im ke Jeova ej kijenmej im kõttar wõt, ej jerbal bwe en jejjet kallim̦ur ko an im rem̦m̦an ñan kõj aolep.

6. (1) Ewi wãween an kar Jeova kõttar wõt im kijenmej ilo raan ko an Noa? (2) Ewi wãween ej kõm̦m̦ane men in ilo raan kein ad?

⁶ Jeova ej kijenmej im meanwõd wõt meñe ro jet rej kõm̦m̦ani men ko me rej kõmetake. Ñan waanjoñak, l̦õmn̦ak m̦õk kõn ta eo ear kõm̦m̦ane m̦okta jãn Ibwijleplep eo kõn men ko renana rar wal̦o̦k. Jeova ear lukkuun “bũrom̦õj” kõnke lal̦ in ear obrak kõn mour ettoon im lãj im armej ro rar kõn̦aan kõm̦m̦ani wõt men ko renana. (Jenesis 6:​2-8) Em̦ool bwe Jeova ear jab kõtl̦o̦k an men kein wõnm̦aanl̦o̦k wõt. Ear pepe ñan bõktok Ibwijleplep eo ñan jol̦o̦k aolep armej ro me rejjab pokake. Im ke ear kõttare iien eo me enaaj wal̦o̦k men in, ewõr men ko Jeova ear kõm̦m̦ani ñan an Noa im baam̦le eo an bõk lo̦mo̦o̦r. (1 Piter 3:​20) Ilo iien eo ear jejjet, Jeova ear jiroñ Noa kõn Ibwijleplep eo im ear ba ñan e bwe en kalõk juon wa kileplep. (Jenesis 6:​14-22) Bareinwõt, Jeova ear kõn̦aan bwe Noa en “ri kwal̦o̦k kõn wãnõk” im karoñ ro jet kõn jorrããn eo me m̦õttan jidik enaaj wal̦o̦k. (2 Piter 2:⁠5) Jijej ear ba bwe raan kein ad rej ãinwõt raan ko an Noa. Em̦õj an Jeova pepe ñããt eo enaaj jol̦o̦k jukjuk im pãd in enana ak ejjel̦o̦k juon armej ioon lal̦ in ejel̦ã “raan eo im awa eo” men in enaaj wal̦o̦k. (Matu 24:​36) Rainin, Jeova ear letok ñan kõj jerbal eo ñan kakkõl armej ro im karoñ er ewi wãween remaroñ bõk lo̦mo̦o̦r.

7. Eto ke an Jeova kajejjet kallim̦ur ko an? Jouj im kõmel̦el̦e.

⁷ An Jeova kijenmej im kõttar ejjab mel̦el̦ein bwe ej kõmatte ãinwõt an jet armej ro kõm̦m̦ane. Im jen jab l̦õmn̦ak bwe ejjab kea kõn kõj. Em̦ool bwe emaroñ pidodo ad bõk l̦õmn̦ak in ke jej rũttol̦o̦k ak eñtaan ilo jukjuk im pãd in enana. Jemaroñ jino ebbeer ak l̦õmn̦ak bwe eto an Anij kajejjeti kallim̦ur ko an. (Hibru 10:​36) Bõtab,  jen jab mel̦o̦kl̦o̦k bwe ewõr unin an Jeova kijenmej im kõttar im ej kõjerbal iien in bwe ro rej tiljek ñan e ren bõk tokjãn jãne. (2 Piter 2:3; 3:⁠9) Jen lale wãween an kar Jijej l̦oore joñak eo an Jemen kõn kijenmej.

ETKE JIJEJ EJ JUON JOÑAK EM̦M̦AN KÕN KIJENMEJ?

8. Ta ko Jijej ear kijenmej kaki?

⁸ Jijej ej kõm̦anm̦an ankilaan Anij im ear m̦õn̦õn̦õ in kõm̦m̦ane men in ium̦win elõñ to̦ujin iiõ. Ke Setan ear jum̦ae, Jeova ear pepe bwe Nejin en itok ñan ijin ioon lal̦ im erom Messaia eo. Baj l̦õmn̦ak m̦õk kõn an kar Jijej kijenmej im kõttar ium̦win elõñ iiõ ko ñan an naaj men in wal̦o̦k. (Riit Galetia 4:⁠4.) Ke ear kõttar, ear jab baj pãd bajjek ak ear poub kõn jerbal eo an jãn Jemen. Im ke ear wanlal̦tak ñan lal̦ in, ear jel̦ã bwe Setan enaaj kõm̦m̦an bwe en mej ãinwõt kar kanaan kake. (Jenesis 3:15; Matu 16:​21) Jijej ear kijenmej wõt meñe ear mej ilo juon wãween ekanooj pen im kõmetak. Etke? Kõnke ear jel̦ã bwe ear ankilaan Anij bwe en mej ilo wãween in. Meñe Jijej ej Nejin Anij ak ear jab l̦õmn̦ak wõt kõn e make ak ear kõttãik e im kõtl̦o̦k an iioon eñtaan. Jijej ej juon joñak ekanooj em̦m̦an kõn tiljek ñan Anij im jej aikuj l̦oore joñak in an.​​—Hibru 5:​8, 9.

9, 10. (1) Ta eo Jijej ear kõm̦m̦ane ke ear kõttare wõt Jeova? (2) Ewi wãween jemaroñ l̦oore joñak eo an Jijej?

⁹ Ãlikin an Jijej jerkakpeje, kar lel̦o̦k ñan e maroñ ilañ im ioon lal̦. (Matu 28:​18) Aolep iien ear kõjerbale maroñ in an ñan katõprak karõk eo an Jeova im ear kõm̦m̦ane men in ilo iien ko Jeova ear karõke. Jijej ear kijenmej im kõttar ituanbijmaroñ in Jeova m̦ae iiõ eo 1914 ke Jeova ear lel̦o̦k an maroñ ioon ri kõjdat ro. (Sam 110:​1, 2; Hibru 10:​12, 13) M̦õttan jidik Jijej enaaj jol̦o̦k jukjuk im pãd in an Setan. Im ke ej kõttar wõt iien eo enaaj kõm̦m̦ane men in, ej kijenmej ilo an jipañe armej ro bwe Anij en buñbũruon ippãer im tõl er ñan “dãn in mour.”​​—Revelesõn 7:⁠17.

¹⁰ Kwõj ke kile ta eo kwõmaroñ kõm̦m̦ane ñan anõk joñak eo an Jijej? Jijej ear jel̦ã bwe Jeova ear karõke iien eo ej aikuj kõm̦m̦ane jerbal eo an jãn E. Em̦ool bwe el̦ap an kar Jijej kõn̦aan jino kõm̦m̦ane kõn̦aan eo an Jeova. Ak ear m̦õn̦õn̦õ in kõttar wõt iien eo Jeova ear karõke. Jen aolep kijenmej ke jej kõttare jem̦l̦o̦kin jukjuk im pãd in an Setan. Im jen kõttar wõt Anij im jab ebbeer ñe jej iiooni men ko rej kabũrom̦õj kõj. Ta eo emaroñ jipañ kõj ñan kõm̦m̦ane men in?

EWI WÃWEEN IMAROÑ KATAK KIJENMEJ JÃN JEOVA?

11. (1) Etke kijenmej ej ekkejell̦o̦k ippãn tõmak? (2) Etke ej aikuj in pen tõmak eo ad rainin?

¹¹ M̦okta jãn an kar Jijej wanlal̦tak ñan lal̦ in, ri kanaan ro im ro jet me rar tiljek rar kaalikkar bwe meñe armej rejjab weeppãn ak remaroñ kijenmej wõt. Rar kaalikkar men in ikijjeen kõm̦m̦an ko aer. Aer kijenmej ear ekkejell̦o̦k ippãn tõmak ko aer. (Riit Jemes 5:​10, 11.) Etke jejaam̦ ba men in? Eokwe, el̦aññe ear ejjel̦o̦k aer tõmak ak rar jab lukkuun tõmak ilo kallim̦ur ko an Jeova, innem reban kar kijenmej im kõttar an jejjet kallim̦ur ko an. Ekkã aer kar kijenmej ium̦win wãween ko reppen im ilo iien ko ear kaamijak ñan er. Etke? Ej kõnke rar tõmak bwe Anij enaaj kõm̦m̦ane men eo ear kallim̦ur kake ñan er. (Hibru 11:​13, 35-40) Baibõl̦ ej kwal̦o̦k bwe elõñl̦o̦k un ko unin ej aikuj pen tõmak eo ad rainin kõnke Jijej ej “Ri koweeppãn tõmak eo ad.” (Hibru 12:⁠2) Bareinwõt, Jijej ear kajejjet elõñ kanaan ko bwe jen mel̦el̦el̦o̦k kõn karõk eo an Anij.

12. Ta eo jemaroñ kõm̦m̦ane ñan kapen tõmak eo ad?

¹² Ta eo jemaroñ kõm̦m̦ane ñan kapen tõmak eo ad bwe jen maroñ kijenmej? Juon men eaorõk ej ñan l̦oore naan in tõl ko jãn Anij. Ñan waanjoñak, naan in tõl eo ilo Matu 6:33 ej rõjañ kõj ñan likũt Aelõñ eo m̦oktata ilo mour ko ad. Etke kwõj aikuj  l̦oore men in? Kwõmaroñ ke kate eok ñan l̦oore naan in jiroñ in? Bõlen men eo kwõmaroñ kõm̦m̦ane ej kal̦apl̦o̦k am̦ iien ilo kwal̦o̦k naan. Im kõm̦m̦an oktak ilo mour eo am̦ bwe kwõn jab m̦ad kõn men ko ejjel̦o̦k tokjãer me renaaj kapañ am̦ jerbal ñan Jeova. Jab mel̦o̦kl̦o̦k wãween an kar Jeova kajeraam̦m̦an eok kõn am̦ kar kate eok ñan l̦oore naan in tõl ko an. Bõlen ear kajeraam̦m̦an eok bwe en wõr juon am̦ ri katak kããl ak ear kõm̦m̦an bwe kwõn bõk ‘aenõm̦m̦an jãn E, eo ej el̦l̦ã jãn jel̦ã otemjej.’ (Riit Pilippai 4:⁠7.) L̦õmn̦ak kõn jeraam̦m̦an ko kwaar iiooni, innem kwõnaaj kile bwe elukkuun aorõk bwe kwõn kijenmej.​​—Sam 34:⁠8.

13. Kwal̦o̦k waanjoñak eo ej kaalikkar bwe tõmak eo ad emaroñ kal̦apl̦o̦k ad kijenmej.

¹³ Jen lale juon waanjoñak me enaaj jipañ kõj ñan mel̦el̦e ewi wãween tõmak ej kal̦apl̦o̦k ad kijenmej. Juon ri kallib ej kallib, kaddek im m̦adm̦õd. Kajjojo iien ke ej lukkuun l̦ap an atake eo an kalle, ej l̦apl̦o̦k wõt an lõke im tõmak bwe ñe enaaj bar kallib, atake eo an enaaj bar l̦ap an kalle. Kõn men in, emaroñ kõn̦aan kalõñl̦o̦k men ko ej kõtaki. Jekdo̦o̦n ke ejel̦ã bwe eto iien m̦adm̦õd im enaaj aikuj kijenmej im kõttar ak ej wõnm̦aanl̦o̦k wõt im ekkat. Ej tõmak bwe enaaj bõk leen. Ãindein, ñe jej katak naan in tõl ko an Jeova im jerbali im bõk tokjãn ko rem̦m̦an jãn men in, enaaj l̦apl̦o̦k ad lõke im tõmak Jeova. Im ñe enaaj l̦apl̦o̦k, innem enaaj pidodol̦o̦k ad kijenmej im kõttar jeraam̦m̦an ko jejel̦ã bwe renaaj wal̦o̦k ilju im jekl̦aj.​​—Riit Jemes 5:​7, 8, UBS.

14, 15. En ewi l̦õmn̦ak eo ad kõn eñtaan ko armej rej iiooni?

¹⁴ Ebar wõr juon men me enaaj kal̦apl̦o̦k ad kijenmej. Ta in? Ej ñe jej l̦õmn̦ak ãinwõt Jeova kõn jukjuk im pãd in im men ko jej iiooni ilo mour ko ad. Ñan waanjoñak, l̦õmn̦ak m̦õk kõn eñjake ko an Jeova ke ej lo an armej eñtaan. Eto an Jeova loe  an armej eñtaan im men in el̦ap an kabũrom̦õje. Ak men in ear jab bõbrae e jãn an kõm̦m̦an em̦m̦an. Jeova ear jilkintok Nejin ñan “ko̦kkure jerbal ko an tepil̦” eo im jol̦o̦k aolep eñtaan ko Setan ear kõm̦m̦ani im armej rej iiooni. (1 Jon 3:⁠8) Ilo m̦ool, m̦õttan wõt jidik Anij enaaj kajem̦l̦o̦k aolep eñtaan ko im renaaj jako ñan indeeo. Kõn men in, jen jab kõtl̦o̦k an menin kaeñtaan ko an lal̦ in kam̦õjn̦o̦ik tõmak eo ad. Jen jab ñate ad kõttar Jeova ak jen tõmak ilo kallim̦ur ko an. Em̦õj an Jeova kããlõt ñããt eo enaaj kajem̦l̦o̦k nana otemjej im eban rum̦wij.​​—Aiseia 46:​13, UBS; Nahum 1:⁠9.

¹⁵ Ilo raan kein ãliktata im rekanooj pen, ewõr men ko remaroñ mãlejjoñe tõmak eo ad. Kõn men in, jej aikuj in kijenmej. Jemaroñ iioon eñtaan jãn kowadoñ ko rej wal̦o̦k ak jãn men ko jet, ak bõlen ro me rejitõnbõro ippãd rej iioone men kein. Ñe ewal̦o̦k men in, jen jab illu ak jen lukkuun lõke im atartar ioon Jeova. Emaroñ pen ad kõm̦m̦ane men in kõnke jejjab weeppãn. Bõtab, jej aikuj keememeje men eo Jijej ear kõm̦m̦ane ñe jej riiti Matu 26:​39, UBS.​​​—Riit.

16. Ta eo jen jab kõm̦m̦ane ke jej kijenmej im kõttare jem̦l̦o̦kin jukjuk im pãd in?

¹⁶ Ñe juon ej pere bwe epaaktok jem̦l̦o̦kin jukjuk im pãd in, emaroñ jino m̦õk in kijenmej im kõttar Jeova. Armej in emaroñ l̦õmn̦ak bwe ej aikuj kõm̦m̦an an make pepe kõn ilju im jekl̦aj eo an ñe ejab baj jejjet kitien kallim̦ur ko an Jeova. Emaroñ ba, ‘Ijja lale ñe Jeova enaaj kam̦oole an kõnnaan.’ L̦õmn̦ak in ebõd enaaj kõm̦m̦an bwe en pen an armej in kijenmej im kõttar. Kõn men in, emaroñ make kõm̦m̦an bwe en buñbuñ ilo lal̦ in ak jino l̦õmn̦ak wõt in koorl̦o̦k an jããn im bõjrak jãn an likũt Aelõñ eo an Anij bwe en men eo eaorõktata ilo mour eo an. Ak emaroñ l̦õmn̦ak in etal ñan jikuul̦ ko reutiej bwe en em̦m̦an jerbal ko an im m̦weiie ilo mour in. Men in ej kaalikkar an dik tõmak eo an armej in. Keememej bwe Paul ear rõjañe kõj ñan l̦oore joñak ko an ro Jeova ear kõm̦m̦an kallim̦ur ko ñan er kõn aer kar “tõmak im kijenmej.” (Hibru 6:​12) Em̦õj an Jeova pepe bwe enaaj ko̦kkure jukjuk im pãd in im eban rum̦wij in kõm̦m̦ane men in. (Habakkuk 2:​3, UBS) M̦ae iien eo enaaj jejjet men in, jen jab aepedped ak kadikl̦o̦k ad bõk kun̦aad ilo jerbal eo an Jeova. Jej aikuj keememej bwe jej mour ilo raan ko ãliktata. Kõn men in, jen lukkuun kate kõj ilo jerbal in kwal̦o̦k naan. Jerbal in ej kõm̦m̦an ad lañlõñ kiiõ.​​—Luk 21:⁠36.

TA JERAAM̦M̦AN KO REJ WAL̦O̦K JÃN AD KIJENMEJ?

17, 18. (1) Ta eo jej aikuj kam̦oole ke jej kijenmej im kõttar Jeova? (2) Ta jeraam̦m̦an ko jenaaj iiooni el̦aññe jej kijenmej im kõttar wõt?

¹⁷ Meñe jaar karejar ñan Anij ium̦win elõñ iiõ ak ium̦win jet allõñ, kõj aolep jekõn̦aan wõnm̦aanl̦o̦k im karejar ñan e ñan indeeo. Jen wõnm̦aanl̦o̦k wõt im jerbal ñan Jeova im lõke bwe enaaj kajejjet kallim̦ur ko an. Men in enaaj jipañ kõj ñan kijenmej m̦ae iien jem̦l̦o̦kin jukjuk im pãd in jekdo̦o̦n ewi toõn ad aikuj kõttar. Jeova ej letok juon iien em̦m̦an kiiõ ñan ad kam̦oole bwe el̦ap ad lõke pepe ko an im jenaaj tiljek wõt ñan e meñe jenaaj iioon eñtaan. (1 Piter 4:​13, 14) Bareinwõt, Anij ej kakajoore kõj im kammineneik kõj bwe jen jel̦ã kijenmej ñan jem̦l̦o̦kin bwe jen bõk lo̦mo̦o̦r.​​—1 Piter 5:⁠10.

¹⁸ Kõnke ewõr an Jijej maroñ ilañ im ioon lal̦ ejjel̦o̦k juon emaroñ kabõjrak an kõjparok eok el̦aññe kwõj dãpij wõt am̦ tiljek. (Jon 10:​28, 29, UBS) Jejjab aikuj mijak mej ak mijak ta eo enaaj wal̦o̦k ilju im jekl̦aj. Ro rej kõttar wõt im kijenmej ñan jem̦l̦o̦kin renaaj bõk lo̦mo̦o̦r. Kõn men in, jej aikuj kõjparok bwe jen jab kõtl̦o̦k an l̦õmn̦ak ko rebõd an armej ro ilo lal̦ in jelõt ad l̦õmn̦ak im kabõjrake ad lõke Jeova. Ke Anij ej kijenmej im kõttar, jen kate kõj ñan kakajoore tõmak eo ad im kõjerbal iien ko ad ilo jim̦we.​​​—Matu 24:13; riit 2 Piter 3:​17, 18.

[Kajitõk ko ñan katak]

[Pija ilo peij 21]

Am̦ kijenmej enaaj jipañ eok ñan likũt Aelõñ eo an Anij m̦oktata im ñan bõk jeraam̦m̦an ko