Rɩk-y-yã a Zeova ne a Zezi togs-n-taare, n tall sũ-mare
Rɩk-y-yã a Zeova ne a Zezi togs-n-taare, n tall sũ-mare
“Bɩ y bãng tɩ Zusoabã sẽn maand sũ-marã yaa yãmb fãagr yĩnga.”—2 PƖƐ. 3:15.
Y NA N LEOKAME TƖ BÕE?
Wãn to la a Zeova maand sũ-mare?
Bõe yĩng tɩ yɩ tɩlae t’a Zezi maan sũ-mare?
Bõe la d tõe n maan n tall sũ-mare?
1. Sok-bʋg la neb kẽer sẽn sɩng n tũud a Zeova sokda?
SAAM-BI-POAK a ye sẽn tũud a Zeova na maan yʋʋm wʋsgo, la sẽn seg zu-loees soka woto: “Rẽ yĩnga mam na n paam n yãa dũniyã saab sɩda?” Neb a taab me sẽn sɩng n tũud a Zeova sokda b mens woto. D miime tɩ ka la bilfu, Wẽnnaam na n maana bũmb fãa paalse, n menes d zu-loeesã, tɩ d gũud rẽ ne d sũur fãa. (Wil. 21:5) Baa bũmb toor-toor sẽn wilgd t’a Sʋɩtãan dũniyã saab ta n saame wã, yɩl n tall sũ-mar tõe n yɩɩ toogo.
2. Sogs-bʋs la d na n leok sũ-marã wɛɛngẽ?
2 Biiblã yaool n yetame tɩ d segd n talla sũ-mare. Pĩnd wẽn-tũudbã talla tẽeb sẽn tar pãnga, n gũ wakat ning Wẽnnaam sẽn da yãk n na n pids bũmb nins a sẽn pʋlem-bã. D sã n dɩk b naoore, d na n wa paama d keoorã. (Karm-y Hebre dãmb 6:11, 12.) A Zeova maanda sũ-mare. A ra tõe n kɩtame tɩ wẽnemã sa hal daar zãra, la a basame n gũud wakat ning a sẽn na n maan dẽ tɩ yɩ sõma n yɩɩdã. (Rom 9:20-24) La bõe yĩng t’a maand sũ-mare? Wãn to la a Zezi rɩk a Ba wã togs-n-taare? D sã n tall sũ-mare, bark bʋs la d na n paame? Sogs-kãensã leoorã na n sõng-d lame tɩ d tall sũ-mar la tẽeb sẽn tar pãnga, baa sã n wõnda a Zeova pʋlemsã kaoosda pidsgu.
BÕE YĨNG T’A ZEOVA MAAND SŨ-MARE?
3, 4. a) Bõe yĩng t’a Zeova maand sũ-mare? b) A Ãdem ne a Hawa sẽn kɩɩs a Zeova wã poore, a manesem yɩɩ wãna?
3 A Zeova n yaa ãndũniyã Zusoaba. Sẽn paase, pa tɩlae t’a bas tɩ kaoos t’a yaool n kɩt tɩ zu-loeesã sa ye. La a sẽn maand sũ-marã tara võore. Yell ning sẽn zĩnd Edɛnnã waa ne no-koeemde, t’a welgrã na n naf malɛgsã la ninsaalbã. A Zeova maanda sũ-mare, bala a miime tɩ sẽn na yɩl n welg no-koeemdã tɩ zemse, yaa tɩlae tɩ rɩk sẽka. A sẽn mi malɛgsã la ninsaalbã tagsa la b manesmã, yaa vẽeneg t’a sẽn maand woto wã yaa tõnd neer yĩnga.—Heb. 4:13.
4 A Zeova sɩng n datame tɩ tẽngã pid ne a Ãdem la a Hawa kamb la b yagense. A Sʋɩtãan sẽn wa n belg a Hawa tɩ yɩ sabab t’a Ãdem me kɩɩs Wẽnnaamã, Wẽnnaam pa toeem a raabã ye. A pa tags t’a sẽn datã pa na n tõoge, wall a yik a sũur n daag ninsaalbã n bas ye. A pʋd n yãka a sẽn na n pids rẽ to-to. (Ezai 55:11) A Zeova sẽn maand sũ-marã yaa sẽn na yɩl n pids a raabã la a wilg tɩ yẽ n sɩd segd n yɩ yĩngr la tẽng naaba. Sẽn na yɩl n pids a raabã nens kẽer tɩ zemse, a basame tɩ kaoos yʋʋm tusa menga.
5. Wãn to la a Zeova sũ-marã nafd tõndo?
5 Bʋʋm a to sẽn kɩt t’a Zeova maand sũ-marã yaa t’a ratame tɩ neb wʋsg wa paam vɩɩm sẽn pa satã. Masã menga, a maanda bũmb toor-toor tɩ kʋʋn-kãseng na n wa paam fãagre. (Wil. 7:9, 14; 14:6) Ne tõnd koe-moonegã maasem, a Zeova kõta nebã weer tɩ b tõe n bãng a Rĩungã la a noyã. Rĩungã koɛɛgã yaa ‘koe-noog’ d sẽn taasd ãdem-biisã. Sɩd me, koɛɛg kae t’a yõodã ta-a ye. (Mat. 24:14) Ned ning fãa sẽn sak Rĩungã koɛɛgã lebgda a Zeova siglgã neda. Sigl-kãng nebã yaa zo-rãmb hakɩk sẽn nong tɩrlem la sẽn be dũniyã gill zugu. (Zã 6:44-47) Tõnd Wẽnnaamã sõngda neb nins sẽn sakd koɛɛgã tɩ b tat a yam. Sẽn paase, a yãkda neb tɩ b na n wa tɩ rɩ naam saasẽ. Nin-kãens sã n wa kẽng saasẽ, b na n sõnga sakdb nins sẽn be tẽngã zugã tɩ b zems zãnga, la b paam vɩɩm sẽn pa satã. Dẽnd vẽenega, baa a Zeova sẽn maand sũ-marã, a tʋmdame n na n pids a pʋlemsã tõnd neer yĩnga.
6. a) Wãn to la a Zeova maan sũ-mar a Nowe wakatã? b) Wãn to la a Zeova maand sũ-mar rũndã-rũndã?
6 Baa nebã sã n wa maand yɛl sẽn paoogd a Zeova wʋsgo, a maanda sũ-mare. Tẽeg-y-yã a manesem sẽn yɩ to-to nand tɩ sa-kãsengã ni wã. Nebã sẽn da yood la b tʋmd nen-kɛglem tɩ b yamã fãa yaa wẽnsã, a ‘sũur sãamame.’ (Sɩng. 6:2-8) A ra pa tõe n bas tɩ wẽnemã kell n pa wakat fãa ye. Rẽ n so t’a yãk yam n na n kɩt tɩ sa-kãseng ni n menes kɩɩsdbã fãa. La Wẽnnaam sẽn wa n ‘maand sũ-mar n kaoosdẽ’ wã, a sõnga a Nowe ne a zakã rãmb tɩ b wa paam n põse. (1 Pɩɛ. 3:20) A Zeova wa n togsa a Nowe t’a na n kɩtame tɩ sa-kãseng ni n sãam nin-wẽnsã, la a yeel-a t’a ka koom koglgo. (Sɩng. 6:14-22) A Zeova ra ratame me t’a wilg nebã tɩ sãoong n wate. Bala Biiblã yeelame t’a Nowe yɩɩ “tɩrlem koe-moonda.” (2 Pɩɛ. 2:5) A Zezi maka tõnd wakatã ne a Nowe wakatã. A Zeova zoe n yãka wakat ning a sẽn na n sãam dũni-kãngã wã, la “ned baa a yembr ka mi da-kãnga, la wakat kãng ye.” (Mat. 24:36) Wẽnnaam tʋma tõnd me tɩ d moon n keoog nebã, la d sõng-b tɩ b bãng b sẽn tõe n wa paam n põs to-to.
7. Rẽ yĩnga a Zeova kaoosda a pʋlemsã pidsg bɩ? Wilg-y y leoorã võore.
7 Yaa vẽeneg t’a Zeova sẽn maand sũ-marã pa rat n yeel t’a zĩ n gũudame bal ye. D pa segd n tags me t’a pa ne tõnd yɛlã, wall t’a toog kae ne-d ye. La d yʋʋmã sã n vẽsgdẽ wall d segda zu-loeese, d tõe n wa yĩma rẽ. D tõe n wa komsa raoodo, wall d wa tagsdẽ tɩ Wẽnnaam kaoosda a pʋlemsã pidsgu. (Heb. 10:36) Ra tol-y n yĩm-y t’a sẽn maand sũ-marã tara võore, la t’a ket n tʋmda a nin-buiidã neer yĩng ye. (2 Pɩɛ. 2:3; 3:9) La wãn to la a Zezi rɩk a Ba wã togs-n-taare?
WÃN TO LA A ZEZI MAAN SŨ-MARE?
8. Wãn to la a Zezi maan sũ-mare?
8 A Zezi sɩng n maanda Wẽnnaam daabã hal yʋʋm kõn bãng n sõde, n ket n maandẽ. A Sʋɩtãan sẽn wa n kɩɩs a Zeova wã, a Zeova yãka yam n na n tʋm a Bi-riblã tẽngã zug t’a wa yɩ Mesi wã. La yɩɩ yʋʋm tusa poor la a maan dẽ. Ad a Zezi sɩd maana sũ-mare! (Karm-y Galat dãmb 4:4.) La a pa zĩnd n gũ bal ye. A ra tʋmda tʋʋm a Ba wã sẽn da kõt-a. A sẽn wa n wa tẽngã zugã, a ra miime t’a Sʋɩtãan na n kɩtame tɩ b kʋ-a wa bãngr-goamã sẽn togsã. (Sɩng. 3:15; Mat. 16:21) A Zezi saka nams-toaaga, bala a ra miime tɩ Wẽnnaam daabã la rẽ. A pa tags a mengã yell ye. Baa a sẽn yaa Wẽnnaam Biigã, a yɩɩ sik-m-meng soab n sak namsg n kõ tõnd mak-sõngo.—Heb. 5:8, 9.
9, 10. a) Bõe la a Zezi maand n gũud wakat ning a Zeova sẽn na n kõ sor t’a sãam nin-wẽnsã? b) Wãn to la d tõe n dɩk a Zezi togs-n-taare?
9 A Zezi vʋʋgrã poore, a Zeova kõ-a-la pãng fãa saasẽ la tẽngã zugu. (Mat. 28:18) La a ket n maanda a Zeova raabã wakat ning a Zeova sẽn yãke. Wala makre, a Zezi maana sũ-mar n zĩnd Wẽnnaam dɩtg n tãag yʋʋmd 1914 soabã, sasa ning Wẽnnaam sẽn kɩt t’a bɛɛbã lebg a nao-roagendgã. (Yɩɩl 110:1, 2; Heb. 10:12, 13) Ka la bilfu, a na n yik n sãama a Sʋɩtãan dũniyã. La nand tɩ wakat kãng ta, a maanda sũ-mar n sõngd nebã tɩ b tat Wẽnnaam yam, la a wilgd-b “vɩɩm ko-bunds zĩisi.”—Wil. 7:17.
10 Yãmb nee tõnd sẽn tõe n dɩk a Zezi togs-n-taar to-to bɩ? A ra miime tɩ bũmb fãa a Zeova sẽn dat n maan tara a wakate. Baa a Zezi sẽn maand a Ba wã raab ne yẽesmã, a sakd n gũuda wakat ning a sẽn yãkã. Tõnd me sẽn gũud a Sʋɩtãan dũniyã sãoongã, d segd n talla sũ-mare, n gũud Wẽnnaam sor-wilgri, la d ra wa koms raood n bas a tũub ye. Wãn to la d tõe n paam sũ-mar a woto?
WÃN TO LA M TÕE N DƖK WẼNNAAM TOGS-N-TAARE?
11. a) Bõe yĩng tɩ d tõe n yeel tɩ sũ-mar ne tẽeb tũuda taaba? b) Bõe yĩng tɩ tõnd tar bʋʋm n na n tall tẽeb n yɩɩda?
11 Nand t’a Zezi wa tẽngã zugu, no-rɛɛsdb la wẽn-tũudb a taab talla sũ-mare, tɩ wilgdẽ tɩ baa neb sẽn pa zems zãng tõe n talla sũ-mare. Yaa b tẽebã n sõng-b tɩ b tall sũ-marã. (Karm-y Zak 5:10, 11.) B sã n da pa tar tẽebo, rat n yeel tɩ b sã n da pa kɩs sɩd tɩ b na n paama bũmb nins a Zeova sẽn pʋlem-bã, b ra pa na n tõog n tall sũ-mar n gũ ye. Sɩd me, b tõoga toog zu-loees pʋsẽ b sẽn da kɩs sɩd tɩ Wẽnnaam na n pidsa a sẽn pʋlem bũmb ningã. (Heb. 11:13, 35-40) Tõnd n tar bʋʋm n na n tall tẽeb n yɩɩda, bala a Zezi yaa tõnd ‘tẽebã taasda.’ (Heb. 12:2) A pidsa bãngr-goama, la a sõng tõnd tɩ d bãng Wẽnnaam daabã sõma.
12. Bõe la d tõe n maan n paas d tẽebã pãnga?
12 Bõe la d tõe n maan n paas d tẽebã pãnga, n maneg n tall sũ-mare? Bũmb sẽn tõe n sõng-do, yaa d sẽn na n tũud Wẽnnaam saglsã. Wala makre, tẽeg-y bũmb ning sẽn kɩt tɩ y segd n lʋɩɩs Wẽnnaam Rĩungã taoorã. Tõe tɩ y tog n maneg n tũu saglg ning sẽn be Matɩe 6:33 wã. Tõe tɩ y segd n paasa y koe-moonegã, wall y boog y teed nins sẽn pa tɩlae ne-yã. Sãmbg sẽn ka be, a Zeova zoe n ning-y-la bark y sẽn modgd n maand a raabã yĩnga. Tõe t’a sõng-y lame tɩ y paam ned n sɩng Biibl zãmsgo, wall y sega zu-loɛɛg t’a kõ-y a ‘laafɩ wã sẽn yɩɩd nebã bãngr fãa’ wã. (Karm-y Filip rãmb 4:7.) Y sã n tagsd bark kãens yelle, y na n maneg n kɩsa sɩd tɩ sũ-mar yaa sõma.—Yɩɩl 34:9.
13. Mak-bʋg n wilgd tɩ tẽeb tõe n sõng-d lame tɩ d tall sũ-mare?
13 D rɩk makr ne koaad sẽn tʋmd to-to wã tɩ na n sõng-d lame tɩ d bãng tɩ tẽeb tõe n paasa ned sũ-mare. Koaad bʋtame, n ko, la a yaool n tigsi. A sã n ko n paam wʋsgo, kengda a raood t’a le gũud sẽoog ne yãgbo. Tõe t’a na n bʋda wʋsg meng n yɩɩg pĩndã, baa a sẽn mi tɩ yaa tɩlae t’a tall sũ-mar n gũ tigsgã. A kɩsa sɩd t’a na n tigsame. Tõnd me sã n tũud a Zeova saglsã n yãt rẽ sẽn nafd tõnd to-to wã, d na n maneg n kɩsa a Zeova sɩda. Woto, d tẽebã pãng na n paasame, tɩ d tõog n tall sũ-mar n gũ bark nins sẽn watã.—Karm-y Zak 5:7, 8.
14, 15. D tagsg segd n yɩɩ wãn ne namsgã?
14 Bũmb a to sẽn tõe n sõng-d tɩ d tall sũ-mar yaa d sẽn na n get dũniyã la d mensã yɛl wa a Zeova sẽn get-b to-to wã. Wala makre, tẽeg-y tɩ hal n tãag masã, ãdem-biisã sẽn namsdã pa noom a Zeova ye. La rẽ pa kɩt t’a pa le maand sẽn yaa tɩrg ye. A tʋma a Bi-riblã sẽn na yɩl t’a wa “sãam Sʋɩtãanã tʋʋmã,” n maneg yɛl nins fãa a Sʋɩtãan sẽn da sãamã. (1 Zã 3:8) Ka la bilfu, Wẽnnaam na n kɩtame tɩ namsgã sa wakat fãa yĩnga. Rẽnd d pa na n bas tɩ wẽnemã sẽn pid dũniyã boog d tẽebã pãnga, wall d yãgd n dat t’a Zeova wa menes wẽng buud fãa ye. D na n ket n tẽeda a Zeova pʋlemsã. A yãka wakat n na n kɩt tɩ wẽnemã sa, tɩ pa na n vaal ye.—Ezai 46:13; Nah. 1:9.
15 D sẽn be yaoolem wakatã, zu-loees kẽer tõe n booga d tẽebã. B sã n wa maand tõnd wall d ned pãnga, d pa segd n maan n lebs ye. D segd n teega a Zeova ne d sũur fãa. Woto yaool n pa nana ne tõnd sẽn pa zems zãngã ye. La tẽeg-y-yã a Zezi sẽn maan bũmb ning tɩ b gom dẽ yell Matɩe 26:39 pʋgẽ wã.—Karm-y-yã.
16. D sẽn vɩ yaoolem dayã sasa wã, bõe la d pa segd n maane?
16 Ned sã n sãmbdẽ tɩ dũniyã saab ket n zãrame, a tõe n wa tara tags-kɛga. A tõe n wa tagsdame t’a Zeova pʋlemsã tõeeme n pa pidsi, n getẽ t’a segd n baoa a yɛlã tɩɩm, bɩ n yetẽ t’a na n gũu bilf n ges a Zeova pʋlemsã sã n na n pidsame. Woto tõe n kɩtame t’a wa sɩng yʋʋr baoobo, wall a kẽ laog baoob n lebs Wẽnnaam Rĩungã poorẽ. A tõeeme me n wa rat n karem n zãag n bao naar vɩɩm. La ned a woto wilgdame t’a tẽebã ka pãng ye. Tẽeg-y t’a Poll sagl-d lame tɩ d rɩk neb nins sẽn tall “tẽeb ne sũ-marã” togs-n-taare, bala Wẽnnaam pʋlm-b-la keoore. (Heb. 6:12) A Zeova pa na n bas dũni-kãngã t’a kaoos n loog wakat ning a sẽn yãk n na n sãam-a wã ye. (Hab. 2:3) La nananda, d pa segd n bas tɩ d sẽn tʋmd a Zeova tʋʋmdã ne yẽesem ningã boog ye. D tog n tẽegdame tɩ d vɩɩ yaoolem dayã sasa, la d maand d sẽn tõe fãa koe-moonegã pʋgẽ. Tʋʋm-kãng tõe n kõ-d-la sũ-no-kãseng masã menga.—Luk 21:36.
D SÃ N TALL SŨ-MARE, BARK BƲS LA D NA N PAAME?
17, 18. a) Wẽnnaam sũ-marã kõo tõnd weer tɩ d tõe n maan bõe? b) D sã n maand sũ-mare, bark bʋs la d paamda?
17 D nan sɩnga Wẽnnaam tũub wall d sɩng n tũud-a-la hal sẽn kaoos me, d tʋll n tũ-a-la wakat fãa. D sã n tall sũ-mare, baa dũni-kãngã sẽn na n kaoos to-to, d na n tõog n gũu d fãagrã. A Zeova kõo tõnd ned kam fãa weer t’a tõe n wilg a sã n teeg-a-la ne a sũur fãa, la a sã n na n kell n sak-a-la baa namsg pʋgẽ. (1 Pɩɛ. 4:13, 14) Sẽn paase, Wẽnnaam kõt-d-la sagls tɩ d tõe n maan sũ-mar n wa paam fãagre.—1 Pɩɛ. 5:10.
18 Wẽnnaam kõ a Zezi pãng fãa saasẽ la tẽngã zugu. Y sã n ket n sakd Wẽnnaam, baa fʋɩ pa tõe n gɩdg a Zezi t’a pa kogl-y ye. (Zã 10:28, 29) Y pa segd n maan dabeem ne yɛl sẽn wate, la baa kũum meng ye. Yaa neb nins sẽn na n tõog n tall sũ-mar hal tɩ saabã ta wã n na n paam fãagre. Woto yĩnga, bɩ d gũus n da wa bas tɩ dũniyã nebã sẽn get yɛlã to-to wã kɩt tɩ d bas a Zeova teegr ye. D tũnug ne Wẽnnaam sũ-marã n paas d tẽebã pãnga.—Mat. 24:13; karm-y 2 Pɩɛɛr 3:17, 18.
[Zãmsgã sogsgã]
[Foto seb-neng 21]
Y sã n tar sũ-mare, y tõogd n lʋɩɩsa Rĩungã yɛl taoore, n paam barka
