1. ¿Toni motajtaniaj miakej itekitikauan Dios akin amo keman kikauanij?

SE TOKNIUJ siuat akin miak xiujmejya kitekitiliani Jiova uan amo keman kikauani maski kipiani miak kuejmolmej, tajtanik ika yolyemanilis: “¿Niyoltosok keman ejkos tamilis uan uelis nikitas?”. Miakej tokniuan akin miak xiuit kitekitilianij Jiova no mochiuiliaj nejin netajtanil. Uan taixejekol maj motajtanikan porin tinochin tiknejnekij tikitaskej tonal keman Jiova ‘kiyankuikatalis nochi tein ongak’, uan kiixpolos nochi ouijkayomej tein tikpanouaj (Apoc. 21:5). Moajsi miak taman tein kinextia ke tonal keman ixpoliuis nochi tein iaxka Satanás amo uejka yetok. Maski ijkon, uelis techouijmakas timochiaskej.

2. ¿Toni netajtanilmej tiknankiliskej itech nejin tamachtilis?

² Biblia kinextia keniuj amo tiyolijsiuiskej. Komo tiknekij tikitaskej maj mochiua tein Dios motenkaujtok, moneki maj chikauak totakuaujtamatilis uan maj amo tiyolijsiuikan, ijkon kemej kichiujkej itekitikauan Dios tein nenkej ne uejkauj (xikonixtajtolti Hebreos 6:11, 12). Maj titanemilikan itech neskayot tein techkauilia Jiova. Yejuatsin ne uejkaujya ueliskia kiixpolos tein amo kuali tein onkak itech nejin taltikpak, sayoj ke kichixtok tonal keman uelis kichiuas (Rom. 9:20-24). ¿Keyej amo yolijsiui? ¿Keniuj kitojtoka Jesús nejin ikualneskayo Dios, uan keniuj techpaleuis komo no ijkon tikchiuaj? Maj tikitakan tanankililmej uan nejin techpaleuis maj tikpiakan takuaujtamatilis uan maj amo tiyolijsiuikan, maski uelis tikitaskej ke Jiova amo niman kichiua tein motenkaujtok.

3, 4. 1) ¿Keyej Jiova ayamo kichiuani itanejnekilis nikan taltikpak? 2) ¿Toni kichiuak Jiova keman kiixnamikkej itech xochital Edén?

³ Maski Jiova kipia okachi ueyi tanauatil, yejuatsin kimati keyej amo yolijsiui. Ika taixnamikilis tein mochiuak Edén  monekik monankilis seki netajtanilmej tein motelnekij tein kinpaleuiskiaj akin nemij iluikak uan taltikpak. Jiova kimatia ke monekia maj pano miak tonalmej uan ijkon senkis ueliskia kinankiliskia nejon netajtanilmej. Kemej kuali kiixmati inintachiualis uan inintanemilil akin nemij iluikak uan taltikpak, kichiua tein kimati ke okachi kinpaleuis (Heb. 4:13).

⁴ Jiova kiixtalijka maj ininkoneuan Adán uan Eva kipexontianij taltikpak. Uan keman Adán amo tatakamatik satepan ke Satanás kikajkayauak Eva, Dios amo kikauak tein kiixtalijka kichiuas. Amo kinemilij amo teyi kichiuasok oso kinsenkauas taltikpakneminij, ta okachi kuali kichiuak tein tapaleuiskia maj mochiua itanejnekilis itech taltikpak uan taltikpakneminij (Is. 55:11). Kemej kineki maj mochiua tein kiixtalijtok uan maj monexti ke kinamiki taixyekanas, Jiova tel miak xiujmej mochiani uan amo kinextiani ke yolijsiui, uan ijkon okachi kuali mochiuas seki taman tein kiixtalijtok.

5. Kemej Jiova amo yolijsiui, ¿toni tatiochiualis onkak?

⁵ Okse taman, Jiova kineki maj okachi taltikpakneminij kiselikan nemilis nochipaya uan yejua ika amo yolijsiui. Axkan, Jiova kichiujtok tein moneki uan ijkon uelis momakixtiskej “uel miak tagayot” (Apoc. 7:9, 14; 14:6). Ika tanojnotsalis, yejuatsin kinyoleua taltikpakneminij maj momachtikan itanauatiluan tein melaujkej uan maj kimatikan toni kichiuas iTekiuajyo. Tein melauj, tanojnotsalis ika iTekiuajyo Dios kitemaka “yankuik Tajtoltsin”, yejua okachi kuali tanauatilmej tein taltikpakneminij uelis kiseliskej (Mat. 24:14). Nochin akin Jiova kinyoleua maj iuan motokikan, pouij itech se nechikol tein moajsi noyampa taltikpak kampa moajsij yekmelauj tasojiknimej akin kitasojtaj tein melauak (Juan 6:44-47). ToDios tetasojtakej kinpaleuia maj kipiakan se kuali uikalis iuan. Yejuatsin no kinixpejpenani taltikpakneminij akin pouiskej itech iTekiuajyo ompa iluikak. Keman yetoskejya iluikak, nejin tokniuan akin kichiuaj kemej Cristo, kinpaleuiskej taltikpakneminij akin tatakamatij maj amo kipiakanok tajtakol uan maj kiselikan nemilis nochipaya. Ijkon, maski Jiova amo yolijsiui ta kichia tonal tein kiixtalijtok, kichiujtok tein tapaleuis maj mochiua kemej motenkauak uan ijkon uelis tikseliskej tatiochiualismej.

6. 1) Itech itonaluan Noé, ¿keniuj kinextij Jiova ke amo yolijsiuia? 2) Itech totonaluan, ¿keniuj kinextia Jiova ke amo yolijsiui?

⁶ Jiova amo yolijsiui maski taltikpakneminij akin amo yolkualmej kitelkualantiaj, kemej moita ika tein panok achto ke ualaskia Tetsaujkakiouit. Itech nejon tonalmej, taltikpakneminij auilnemiaj uan tateuiayaj, uan Jiova semi “moteltayokoltij” porin kichiuayaj tein tel amo kuali (Gén. 6:2-8). Amo kikauaskia maj nejon tachiualis kisentokani, yejua ika kiixtalij kinixpolos taltikpakneminij taixnamikinij ika se tetsaujkakiouit. Sayoj ke, keman itech itonaluan Noé “Totajtsin Dios kiyolikachixtoya” tonal, kichiuak tein monekia uan ijkon kimakixtiskia yejua uan ichankauan (1 Ped. 3:20). Keman monekia, Jiova kiiluij tein kiixtalijtoya kichiuas uan kinauatij maj kichijchiua se arca (Gén. 6:14-22). Uan no, Noé “tanojnotstinemia ika ten melauak tajtoltsin” uan ijkon kinnauatij taltikpakneminij toni panoskia (2 Ped. 2:5). Uan Jesús kijtoj ke totonaluan no ijkon yeskia kemej itonaluan Noé. Jiova kiixtalijya tonal keman kiixpolos tein amo kuali tein onkak nikan taltikpak, sayoj ke, nion se taltikpaknenkej kimati “tonal” (Mat. 24:36). Axkan moneki tikchiuaskej tekit tein Dios techmakatok, maj tikinnejmachtikan taltikpakneminij uan maj tikiniluikan keniuj uelis momakixtiskej.

7. Kemej Jiova ayamo kichiua tein motenkauak, ¿kijtosneki ke moteluejkaua? Xikonmelaua motanankilil.

⁷ Komo ijkon, ¿kijtosneki ke sayoj kikaujtok maj panokan tonalmej? Amo. Keman moijtoua ke amo yolijsiui amo kijtosneki ke amo kitekipachoua tein techpanoua. Sayoj ke, uelis techouijmakas titanemiliskej ijkon porin titajyouiaj uan tiueuentsintiaj itech nejin taltikpak kampa mochiua tein amo kuali. Uelis  timotekipachoskej oso titanemiliskej ke Dios amo niman kichiua tein motenkauak (Heb. 10:36). Sayoj ke, maj amo keman tikelkauakan ke yejuatsin kimati keyej moneki maj amo yolijsiui, uan tonalmej tein poliuiok ika kinpaleuijtok itekitikauan akin amo kikauaj (2 Ped. 2:3; 3:9). Maj tikitakan keniuj Jesús amo yolijsiuik ijkon kemej Dios amo yolijsiui.

8. ¿Itech toni tachiualismej kinextij Jesús ke amo yolijsiuia?

⁸ Tel miak xiujmejya Jesús kichiujtok itanejnekilis Dios ika yolpakilis. Keman Satanás taixnamikik, Jiova kiixtalij maj iyoj Konetsin ualaskia nikan taltikpak uan maj mochiuani Mesías. Maj titanemilikan toni monekia kichiuas Jesús: mochiaskia ika nejmachkayot tel miak xiujmej hasta keman ejkoskia nejon tonal (xikonixtajtolti Gálatas 4:4). Nejon amo kijtosneki ke amo teyi kichiujtoya. Ta kichiujtoya tekit tein iTajtsin kinauatijka. Keman ejkok tonal ijkuak ualaskia nikan taltikpak, kimattoyaya ke monekia mikis imako Satanás, kemej achtook moijtojka ke mochiuaskia (Gén. 3:15; Mat. 16:21). Jesús amo yolijsiuik, ta maski tel tajyouiskia, kichiuak tein Jiova kinekia, uan ijkon kinextij ke nochipa kitakamatia. Amo keman kitayekanaltij itanejnekilis nion tanauatil tein kipiaya. ¡Se tel kuali neskayot techkauilij! (Heb. 5:8, 9.)

9, 10. 1) Kemej Jesús amo yolijsiui, ta kichia maj ejko tonal tein Jiova kiixtalijtok, ¿toni kichiujtoni? 2) ¿Keniuj moneki tikitaskej tonal keman Jiova kiixtalia kichiuas teisa?

⁹ Satepan ke moajokuik, Jesús kiselij tanauatil iluikak uan taltikpak (Mat. 28:18). Uan nochipa kikui nejon tanauatil uan ika kichiua itanejnekilis Dios keman yejuatsin kiixtalia. IKonetsin Dios amo yolijsiuik, ta mochiak iyekmakopaka iTajtsin hasta xiuit 1914, keman kintalijkej akin kiixnamikij ‘kemej yeskia imetstapech’ (Sal. 110:1, 2; Heb. 10:12, 13). Amo uejkaua kichiuas tein monekis uan ijkon kiixpolos tein Satanás kiixyekana. Sayoj ke amo yolijsiui, ta kinchia taltikpakneminij uan kinyekana kampa moajsi “atsin ten kitemaka in yek nemilis” (Apoc. 7:17).

¹⁰ Neskayot tein Jesús kikauak techmachtia keniuj moneki tikitaskej tonal keman Jiova kiixtalia kichiuas teisa. Amo tiomeyolouaj ke Jesús kitelnekia kichiuas nochi tein Jiova kitajtaniskia, maski ijkon, kichiak maj ejko tonal tein yejuatsin kiixtalijka. Axkan ke tikchiaj maj ixpoliui tein Satanás kiixyekana, moneki maj amo tiyolijsiuikan uan ijkon tikchiaskej maj Jiova techixyekana uan amo keman timosenkauaskej. Yejua ika, ¿toni techpaleuis maj amo tiyolijsiuikan?

11. 1) ¿Keniuj techpaleuia takuaujtamatilis maj amo tiyolijsiuikan? 2) ¿Keyej onkak miak taman tein techpaleuia maj mochikaua totakuaujtamatilis?

¹¹ ¿Uelis taxikoskej taltikpakneminij uan amo keman mosenkauaskej, maski tajtakouanij? Kemaj, porin ijkon kinextijkej tanauatianij uan okseki itekitikauan Dios akin amo keman kikaujkej, tein nenkej achto ke Jesús ualaskia nikan taltikpak. Takuaujtamatilis tein kipiayaj kinpaleuij maj amo yolijsiuikan (xikonixtajtolti Santiago 5:10, 11). Komo amo senkis takuaujtamatiskiaj itech nochi tein Jiova motenkaujka, yolijsiuiskiaj uan amo kichiaskiaj maj mochiua. Kemansa kijyouijkej amo kuali tachiualismej uan kipanokej ouijkayomej, sayoj ke takuaujtamatiaj ke Jiova kichiuaskia kemej motenkaujka (Heb. 11:13, 35-40). Axkan onkak miak taman tein techpaleuia maj mochikaua totakuaujtamatilis, porin Jesús “techyekyolmajxitijtiu ika totakuautamatilis” (Heb. 12:2). Yejua kichiuak miak taman tein achtook moijtojka uan techmatiltij itanejnekilis Dios, nejon techpaleuia maj okachi titakuaujtamatikan iuan Jiova.

12. ¿Toni uelis tikchiuaskej tein techpaleuis maj mochikaua totakuaujtamatilis?

¹² ¿Toni uelis tikchiuaskej tein techpaleuis maj mochikaua totakuaujtamatilis uan maj  amo tiyolijsiuikan? Moneki maj tiktakamatikan tein Dios techyolmajxitia. Kemej neskayot, maj titanemilikan keyej moneki maj iTekiuajyo Dios tayekanto itech tonemilis. ¿Uelis timochikauaskej maj okachi tikchiuakan tein kijtoua Mateo 6:33, itech Traducción del Nuevo Mundo de las Santas Escrituras? Xa monekis maj okachi tonalmej titanojnotsakan oso maj tikpatakan seki taman itech tonemilis. Maj amo tikelkauakan ke Jiova techtatiochiuiani porin timochikauaj tiktekitiliskej. Yejuatsin xa techpaleuiani maj titemakakan se nemachtil ika Biblia oso xa techmakani yolseuilis tein “kachi kuika uelilis hasta amo uelis se kajsikamatis ok de keniu” (xikonixtajtolti Filipenses 4:7). Yejua ika, komo titanemiliaj itech nochi tein tikselianij porin tiktakamatij itanauatiluan Jiova, tikitaskej ke semi kuali maj amo tiyolijsiuikan uan okachi tiktasojtaskej (Sal. 34:8).

13. Xikonmelaua ika se neskayot keniuj uelis tikpiaskej takuaujtamatilis uan amo tiyolijsiuiskej.

¹³ Uelis tikixnextiskej nejin tachiualis kemej ijkuak se aksa tatoka, kimeua itatok uan kiteki takilot. Keman tel miak takilot kiteki, okachi takuaujtamati ke uelis kisentokas tatokas. Maski kimati ke moneki mochias maj ejko tonal keman kitekis takilot, amo motekipachoua. Uan xa uelis tatokas itech okachi talmej porin kimati ke itatok kitemakas takilot. No ijkon panoua ika tayolmajxitilis tein techmaka Dios. Keman tikixmatij tein techyolmajxitia uan tiktakamatij, nejon techualkuilia tein kuali uan totakuaujtamatilis iuan Jiova moskaltia uan amo techouijmaka tikchiaskej tatiochiualismej tein tikmatij ke tikseliskej (xikonixtajtolti Santiago 5:7, 8).

14, 15. ¿Keniuj moneki tikitaskej tajyouilis tein kipanouaj nochin taltikpakneminij?

¹⁴ Komo tikitaj tein panoua itech taltikpak uan tein tipanouaj, ijkon kemej kiita Jiova, yejua okse taman tein uelis techpaleuis maj amo tiyolijsuikan. Kemej neskayot, maski tel miak xiujmejya kiyolkokouani kiitas ke  taltikpakneminij tajyouiaj, Dios amo kikauani maj nejon kitsakuili maj kichiua tein kuali, ta kiualtitanik iyoj Konetsin “para kinuejuelos in chikaualisme den amokuali Satanás” uan maj kijkuani nochi tajyouilis tein Satanás kinualkuiliani taltikpakneminij (1 Juan 3:8). Satepan nochi tajyouilis senkis ixpoliuis, uan tikpiaskej yolseuilis. Yejua ika, maj amo tikauakan maj tein amo kuali tein onkak itech nejin taltikpak kitami totakuaujtamatilis oso maj tiyolijsiuikan porin tiknekij maj ixpoliuiya, ta okachi kuali maj titakuaujtamatikan itech tachiualismej tein amo tikitaj uan tein uejkauas nochipaya. Jiova kiixtalijya kemanian kiixpolos tein amo kuali tein onkak itech taltikpak uan tikyekmatij ke kichiuas (Is. 46:13; Nah. 1:9).

¹⁵ Keman tein amo kuali itech nejin taltikpak ixpoliujtiyasya, uelis timoixnamikiskej ika uejueyi ouijkayomej tein kiyejyekoskej totakuaujtamatilis. Komo tikijyouiaj tein amo kuali oso tikitaj tajyouia akin tiktasojtaj, maj amo tikualanikan. Maski techouijmakas porin titajtakouanij, moneki timochikauaskej titakuaujtamatiskej iuan Jiova uan tiktojtokaskej ineskayo Jesús, akin motemakak kichiuas tein kinauatiayaj, kemej moita itech Mateo 26:39 (xikonixtajtolti).

16. ¿Toni moneki maj amo tikchiuakan itech tonalmej tein mokauajok?

¹⁶ Komo tiknekij amo tiyolijsiuiskej ijkon kemej Dios amo yolijsiui, moneki maj amo tiomeyolouakan ox melauak tein kijtoua Jiova. ¿Toni kijtosneki nejin? Keman aksa amo senkis kiyekneltoka ke amo uejkaua ixpoliuis tein amo kuali, uelis kiixtalis kichiuas okseki taman komo amo mochiua tein Jiova motenkauak. Kemej neskayot, uelis kitemos keniuj moueyitalis itech nejin taltikpak oso kitemos kipias miak tomin uan amo kitayekanaltisok iTekiuajyo Dios. Oso xa kiselis okachi ueyi tamachtilis porin kinemilis ke nejon kipaleuis maj kipia se kuali nemilis. Akin tanemilia ijkon, kinextia ke kipoloua takuaujtamatilis. Maj tikelnamikikan ke Pablo techyolmajxitij maj tiktojtokakan ininneskayo akin kiselijkej tein Jiova motenkauak, porin ‘takuautamatinenkej uan kiyolikaxikojtinenkej’ (Heb. 6:12). Jiova amo kikauas maj kisentoka tein amo kuali itech nejin taltikpak, porin kiixtalijya kemanian ixpoliuis uan ijkon mochiuas (Hab. 2:3). Yejua ika, maj amo sayoj tepitsin tikchiuakan itekiyo Dios, okachi kuali maj titachixtokan uan maj tikteixmatiltikan ika yolpakilis kuali tanauatilmej. Nejin se tekit tein semi techualkuilis yolpakilis itech nejin tonalmej tein semi ouijkej (Luc. 21:36).

17, 18. 1) Kemej Jiova amo yolijsiui, ¿toni ueli tikchiuajok? 2) ¿Toni tein kuali techualkuilis komo amo tiyolijsiuij axkan?

¹⁷ Komo uejkaujya tikixmatij Jiova oso amo semi, tinochin tiknekij tiktekitiliskej nochipaya. Komo amo tiyolijsiuij uelis titaxikoskej uan ijkon tikseliskej nemakixtilis maski amo tikmatij kemanian ixpoliuis tein amo kuali. Itech nejin tonalmej Jiova techkaujtokok maj tiknextikan ke senkis titakuaujtamatij itech nochi tein kiixtalia kichiuas uan amo tikauaskej maski monekis titajyouiskej (1 Ped. 4:13, 14). Uan no, techpaleuijtok maj tiuelikan timochiakan uan maj amo tiyolijsiuikan, porin nejon techpaleuis maj timomakixtikan (1 Ped. 5:10).

¹⁸ Jesús kiselij nochi tanauatil itech iluikak uan taltikpak, yejua ika sayoj tejuan uelis timoxeloskej komo amo timelaujkayetokej (Juan 10:28, 29). Amo moneki tikmouiliskej tein panos satepan nion mikilis. Akin amo yolijsiuiskej uan taxikoskej hasta tonal keman ejkos ixpoliuilis kiseliskej nemakixtilis. Yejua ika, moneki timopiaskej maj nejin taltikpak amo techkajkayaua nion kiuejuelo totakuaujtamatilis iuan Jiova. Uan kemej yejuatsin mochiaok, moneki maj tikchikauakan totakuaujtamatilis uan maj timonejnemiltikan ika tamatilis (Mat. 24:13; xikonixtajtolti 2 Pedro 3:17, 18).