Lilongesila Koumphua-lundo wa Jeova Nowa Jesus

“Talei oumphua-lundo wa Tatekulu yetu ngeyovo.”—2 PEDRO 3:15.

OÑGENI MOKUMBULULA?

Oñgeni Jeova alekesa okuti wapua elundo?

Omokonda yatyi Jesus akalele noumphua lundo omuvo omunyingi?

Oityi tupondola okulinga opo tuhetekele oumphua-lundo wa Huku?

1. Oityi ovaumbili vamwe vekolelo velipula?

 O MPHANGE umwe wakoleleya movitateka ovinyingi mokueenda kuomanima omanyingi, wapula: “Okuti mandyinkhi, onthyulilo aneheimono?” Vamwe vaumbila Jeova mokueenda kuomanima omanyingi, tupu vehole okulipula ngotyo. Tuhanda unene okumona onthiki Huku makalinga ovipuka aviho ovipe, nokumanako ovitateka tuna hono. (Revelação 21:5) Namphila tuna omahunga omanyingi okutavela okuti onthyulilo youye wa Satanasi ikahi unene popepi, katyapepukile okukevela onthiki oyo noumphua-lundo.

2. Omapulo patyi konthele youmphua-lundo wa Huku matulilongesa?

² Mahi, Ombimbiliya ilekesa okuti tuna okukala noumphua-lundo. Ngovaumbili va Huku kohale, matukapewa etyi Huku alaa inkha tukala nekolelo liapama, nokukevela noumphua-lundo omuvo makafuisapo omilao ovio. (Tanga Hebreus 6:11, 12.) Jeova nae wapua elundo. Ñgeno wamanakoale ovivi, mahi ukahi nokukevela omuvo waviuka. (Romanos 9:20-24) Omokonda yatyi Jeova apuila unene elundo? Oñgeni Jesus ahetekela oumphua-lundo wa Tate yae, nokutuavela ongeleka? Ouwa patyi matukala nao inkha tukala noumphua-lundo ngo wa Huku? Omakumbululo omapulo oo maetukuatesako okukala noumphua-lundo nokupameka ekolelo, namphila tutala okuti Jeova ngoti ukahi nokuseta.

OITYI JEOVA ALEKESILA OUMPHUA-LUNDO?

3, 4. (a) Omokonda yatyi Jeova apuila elundo? (b) Oityi Jeova alinga etyi Andau na Eva vakala onomphuki?

³ Jeova una ehunga ewa liokulekesa oumphua-lundo. Otyili okuti oe vala una epondolo liokutumina ovipuka aviho, mahi, oumphuki walingilue mo Endene  wakatulile omapulo amwe akolela unene kuaveho keulu no pohi. Jeova wapua elundo mokonda utyii okuti tyesukisa omuvo opo omapulo oo akumbululwe nawa. Iya mokonda wii nawa oityi kese munthu keulu no pohi alinga, nokusoka, tyotyili etyi ekahi nokulinga opala ouwa wetu.—Hebreus 4:13.

⁴ Jeova ankho uhanda ovana va Andau na Eva veyulise oohi. Etyi Satanasi ayondya Eva na Andau opo vehetavele, Huku katumphulukile akala tyehetyii etyi malingi, ine okuyekapo ovanthu. Anthi, waovola ondyila onkhuavo opo afuisepo evangelo liae novanthu Noohi. (Isaías 55:11) Opo afuisepo evangelo liae nokuamena Ouhamba wae, Jeova ukahi nokulikondola unene omutima, nokupua elundo, alo umwe ukahi nokukevela omanima omanyingi opo ononthele mbumwe mbevangelo liae mbufuiswepo nawa.

5. Oumphua–lundo wa Jeova waeta ouwa patyi?

⁵ Ehunga ekuavo liomokonda yatyi Jeova ekahi nokukevela noumphua-lundo, omokonda uhanda ovanthu ovanyingi vakamone omuenyo wahapu. Hono, ukahi nokulinga etyi tyesukisa opo ayovole “otyinyingi otyinene tyovanthu.” (Revelação 7:9, 14; 14:6) Novilinga vietu viokuivisa, Jeova ukahi nokukonga ovanthu opo velilongesa konthele Youhamba wae, novitumino viae viaviuka. Onondaka Mbouhamba, “onondaka onongwa” pala ovanthu. Tyotyili, onondaka onongwa unene! (Mateus 24:14) Kese munthu ufuena ku Jeova, ulinga onthele yeongano liomapanga otyotyili ehole etyi tyaviuka. (João 6:44-47) Huku yetu woluembia, ukuatesako kese munthu opo apandwe nae. Tupu, ukahi nokuholovona ovanthu vamwe opo vakakale moutumini wae wokeulu. Tyina vamaende keulu, mavakakuatesako ovanthu ovataveli okukala tyehena onkhali, nokukalako apeho. Tyimoneka nawa okuti, namphila Jeova ekahi nokukevela, oe ukahi nokuundapa opo afuisepo omilao viae, pala ouwa wetu.

6. (a) Kononthiki mba Noe oñgeni Jeova alekesile oumphua-lundo? (b) Oñgeni Jeova ekahi nokulekesa oumphua-lundo hono?

⁶ Jeova wapua elundo, namphila vakuavo valinga ovipuka ovivi vimunumanesa. Mongeleka soka kuetyi alingile konthele yovivi ankho vilingwa etyi eheneeteko Ombila Onene. Oohi ankho yeyula oundalelapo noungangala, iya Jeova “eihamenua komutima” mokonda ovanthu ankho vahanda vala okulinga ovivi. (Gênesis 6:2-8) Mahi, kayekele ovipuka vitualeko ngotyo, waetako Ombila Onene ihanyeko ovanthu vehetavela. Putyina “Huku ankho akevela tyehena elundo kononthiki mba Noe,” welipongiya opo ayovole Noe nombunga yae. (1 Pedro 3:20) Momuvo waviuka, Jeova apopila Noe etokolo liae, nokumutuma atunge owato. (Gênesis 6:14-22) Tupu, Noe wali “omuivisi wouviuki,” okupopila vakuavo ehanyauno ankho likahi nokuya. (2 Pedro 2:5) Jesus wapopile okuti omuvo wetu welifua nononthiki mba Noe. Jeova watokolale onalupi mahanyeko ouye uno wovivi. Nawike wii “onthiki, no ola” meketyilinga. (Mateus 24:36) Hono, tuna otyilinga tuapewa na Huku tyokulondola ovanthu, nokuvepopila oñgeni vapondola okuyovolwa.

7. Okuti Jeova ukahi nokuseta okufuisapo omilao viae? Hangununa.

⁷ Tyimoneka nawa okuti, oumphua-lundo wa Jeova, kaulekesa okuti ukahi vala nokukevela opo omuvo ulambe. Onthue katupondola okusoka okuti oe ketuete ine kesukile nonthue! Mahi, tyapepuka okusoka ngotyo, tyina tukulupa ine tumona ononkhumbi mouye uno wovivi. Tupondola okusoya ine okusoka okuti Huku ukahi nokuseta okufuisapo  omilao viae. (Hebreus 10:36) Wahalimbueko okuti Huku una omahunga omawa okupwa elundo, iya ukahi nokuundapesa omuvo oo opo aetele ouwa ovaumbili vae vekolelo. (2 Pedro 2:3; 3:9) Pahe, tutalei oñgeni Jesus ahetekelele oumphua-lundo wa Tate yae.

OÑGENI JESUS AAVA ONGELEKA ONGWA YOUMPHUA-LUNDO?

8. Omononkhalelo patyi Jesus alekesa oumphua-lundo?

⁸ Jesus ukahi nokulinga ehando lia Huku, iya ukahiale nokutyilinga nehambu omanima omanyingi. Etyi Satanasi akala omphuki, Jeova watokola okuti Omona wae meya pano pohi opo akale Mesiya. Soka koumphua-lundo Jesus akala nao puetyi ankho ekahi nokukevela omanima omanyingi opo alinge otyilinga otyo. (Tanga Gálatas 4:4.) Oe kakevelele vala otyo ahalingi natyike, anthi ankho wasukalala unene novilinga apewa na Tate yae. Iya etyi eya pano pohi, ankho utyii okuti maipawa na Satanasi, ngetyi tyaulilwe. (Gênesis 3:15; Mateus 16:21) Nokuapwa elundo, walinga ehando lia Huku, namphila otyo ankho tyakutikinya okupita mononkhumbi ononene. Jesus wali omukuatyili monkhalelo yavilapo. Ankho kasoko vala kwe muene no konkhalelo yae, iya tupondola okupolako ouwa kongeleka oyo.—Hebreus 5:8, 9.

9, 10. (a) Oityi Jesus alingile puetyi ankho akevela noumphua-lundo omuvo wa Jeova? (b) Oñgeni tupondola okuhetekela ongeleka ya Jeova?

⁹ Etyi Jesus atutiliswa, wapeua outumini keulu no pohi. (Mateus 28:18) Waundapesa outumini oo opo afuisepo evangelo lia Jeova, momuvo Huku aholovona. Jesus wakala kokulio kwa Huku nokukevela alo menima 1914, etyi onondyale mbae mbapakwa mombuelo yonomphai mbae. (Salmo 110:1, 2; Hebreus 10:12, 13) Apa katutu, makamanako ouye wa Satanasi. Putyina nkhele akevela, nokuapwa elundo, Jesus ukuatesako ovanthu nokuvehongolela “komeva omuenyo.”—Revelação 7:17.

¹⁰ Wamona oñgeni upondola okuhetekela Jesus? Oe ankho utyii okuti Jeova waholovona omuvo opo alinge ehando liae. Tyotyili Jesus ankho uhanda unene okulinga etyi Tate yae emuita. Mahi, wakevela omuvo wa Jeova. Putyina tukevela onthyulilo youye wovivi wa Satanasi, atuho tuesukisa okupua elundo. Tuesukisa okukevela ehongolelo lia Huku, atuehemusipo tyina tuasoya. Oityi tupondola okulinga opo tukale noumphua-lundo ngo wa Huku?

OÑGENI MANDYIHETEKELA OUMPHUA-LUNDO WA HUKU?

11. (a) Oñgeni oumphua-lundo welikuata nekolelo? (b) Omokonda yatyi tuna omahunga omawa okukala nekolelo liapama?

¹¹ Etyi Jesus eheneye pano pohi, ovauli novaumbili ovakuavo vekolelo, vaavele ongeleka yoñgeni ovanthu ovakuankhali vapondola okukoleleya noumphua-lundo. Oumphua-lundo wavo ankho welikuata nekolelo liavo. (Tanga Tiago 5:10, 11.) Inkha kavakalele nekolelo ine okutavela kuetyi Jeova evelaa, ñgeno kavakevelele noumphua-lundo okufuiswapo kuomaulo ae. Mahi, ovo apeho vakoleleya movitateka ovinene mokonda ankho vena onthumbi yokuti Huku malingi etyi alaa. (Hebreus 11:13, 35-40) Nonthue tuna omahunga omanyingi okukala nekolelo liapama, mokonda Jesus pahe “Omuoyesi wekolelo lietu.” (Hebreus 12:2) Oe wafuisilepo omaulo omanyingi, nokutukuatesako okunoñgonoka nawa omavangelo a Huku.

12. Oityi tupondola okulinga opo tupameke ekolelo lietu?

¹² Oityi tupondola okulinga opo tupameke ekolelo lietu, noumphua-lundo  wetu? Tyakolela okulandula onondonga mba Huku. Mongeleka, soka omokonda yatyi wesukisila okupaka Ouhamba wa Huku tete momuenyo. Okuti upondola okulinga ononkhono mbokulandula vali nawa elondolo mu Mateus 6:33? Hamwe upondola okuundapa vali omuvo omunyingi movilinga viokuivisa, nokulitepulula ovipuka vimwe. Jeova wayambale ononkhono walinga mbokutavela ovitumino viae. Hamwe wekukuatesako okulongesa omunthu Ombimbiliya ine wekuavela “ombembwa ya Huku, ipona omalusoke aeho.” (Tanga Filipenses 4:7.) Putyina usoka kouwa wapola kokulandula onondonga mba Jeova, moimbuka okuti otyiwa okukala noumphua-lundo.—Salmo 34:8.

13. Ongeleka patyi itukuatesako okunoñgonoka oñgeni ekolelo lietu lipameka oumphua-ludo wetu?

¹³ Ongeleka ei ipondola okutukuatesako okunoñgonoka oñgeni ekolelo lietu lipameka oumphua-lundo. Omulimi ukuna, nokuhondyuela, nokuteya. Tyina ateya ovilia ovinyingi, ukala vali nonthumbi yokulima enima ekuavo. Alo umwe upondola okulima vali unene. Oe ulima namphila etyii okuti makevela noumphua-lundo omuvo wokuteya. Una onthumbi yokuti mateye ovilia ovinyingi. Nonthue, tyina tulilongesa onondonga mba Jeova, nokumbulandula, tupolako ouwa, iya onthumbi yetu nekolelo mu Jeova viliyawisa. Tupu, tyitupepukila vali okukala noumphua-lundo, nokukevela ononkhano onongwa tutyii okuti mambuya.—Tanga Tiago 5:7, 8.

14, 15. Oityi tuesukisa okusoka konthele yononkhumbi mbovanthu?

¹⁴ Otyikuavo tupondola okulinga opo tukale noumphua-lundo, okuovola okutala ouye, nonkhalelo yetu ngetyi Jeova evitala. Mongeleka, soka oñgeni Jeova elitehelela konthele yononkhumbi  mbovanthu. Jeova weete ononkhumbi mbovanthu tunde kohale, iya otyo tyimuihama unene, mahi kayekele otyo tyimusoyese, ahalingi natyike. Oe watuma Omona wae “opo ahanyauneko ovilinga vie Liapu.” (1 João 3:8) Tyotyili, apa katutu Huku makamanako ovivi aviho. Moluotyo, tuhayekei ovivi viouye uno wa Satanasi visoyese ekolelo lietu. Katuhande okunkhia elundo konthele yonalupi Jeova metyilingi. Tukalei nekolelo momilao via Huku. Jeova watokolale omuvo wokumanako ovivi, iya metyilingi momuvo watyo.—Isaías 46:13; Naum 1:9.

¹⁵ Mokueenda kuononthiki mbuno mbokuepuiya mbonthyulilo, tupondola okukala novitateka mavilolo ekolelo lietu. Inkha onthue, navana tuhole tumona emone mokonda youngangala ine otyikuavo, tuahanumanei, anthi, tuesukisa okuyumba onthumbi yetu aiho mu Jeova. Mokonda tuvakuankhali, katyapepukile okulinga ngotyo. Mahi, hinangela etyi Jesus alingile, tyikahi mu Mateus 26:39.—Tanga.

16. Putyina tukevela onthyulilo, oityi tuesukisa okulityilika?

¹⁶ Omunthu uhetavela okuti onthyulilo ikahi popepi, upondola okukala nolusoke luahaviukile. Upondola okusoka okuti wesukisa okulinga ovipuka monkhalelo yae muene, inkha Jeova kafuisapo omilao viae. Upondola okusoka: ‘Mandyikevela ndyitale inkha Jeova malingi etyi alaa.’ Olusoke olo lupondola okulingisa omunthu okuhakala noumphua-lundo. Otyo atyimutuala kokuovola ounene wouye ine okuyumba onthumbi monombongo, ayekepo okupaka tete momuenyo Ouhamba wa Huku. Ine upondola okutokola okulilongesa monosikola ononene opo akakale nomuenyo omuwa. Tyotyili, omunthu ulinga ngotyo ukahi nokulekesa okuti utupu ekolelo. Hinangela okuti Paulu wetupopila opo tuhetekele vana vali “nekolelo noumphua-lundo,” moluotyo avapewa ononkhano onongwa Jeova evelaele. (Hebreus 6:12) Jeova watokolale okuhanyako ouye uno wovivi, iya kamasete. (Habacuque 2:3) Putyina tukevela, tuesukisa okulityilika okuundapa vala katutu movilinga via Jeova. Anthi tuesukisa okutualako tyalunguka, nokuundapa nombili movilinga viokuivisa onondaka onongwa, mokonda ovilinga ovio vitukalesa nehambu enene hono.—Lucas 21:36.

OUMPHUA-LUNDO WEETA OUWA PATYI?

17, 18. (a) Omphitilo patyi tuna putyina tukevela noumphua-lundo? (b) Inkha tukala noumphua-lundo, ononkhano patyi onongwa matupewa?

¹⁷ Tyilinge tuumbilale Huku omanima omanyingi ine onohanyi mbumwe, tuhanda okumuumbila apeho. Oumphua-lundo mautukuatesako okukoleleya alo konthyulilo youye uno, namphila tuehei omuvo ulifuepi matukevela. Jeova pahe ukahi nokutuavela omphitilo yokulekesa okuti tuna onthumbi yafuapo momatokolo ae, nokuti matutualako nekolelo mwe namphila tumoneswa ononkhumbi. (1 Pedro 4:13, 14) Tupu, Huku ukahi nokutulongesa opo etukuateseko okukala noumphua-lundo wesukisa pala eyovo.—1 Pedro 5:10.

¹⁸ Jesus una epondolo aliho, keulu no pohi, iya natyike tyipondola okumutyilika okukuamena inkha utualako nekolelo. (João 10:28, 29) Katuesukisile okukala nowoma netyi matyiya komutwe alo umwe ononkhia. Aveho vakoleleya noumphua-lundo mavakayovolwa. Moluotyo, tuna okulinga ononkhono opo tuhayeke ouye uno utuyondye, atuyekepo okuyumba onthumbi mu Jeova. Anthi, tuna okutokola okupameka ekolelo lietu nokuundapesa nonondunge omuvo woumphua-lundo wa Huku.—Mateus 24:13; tanga 2 Pedro 3:17, 18.

[Omapuko Elongeso]

[Omalutalatu pefo 21]

Oumphua-lundo maukukuatesako okupaka tete momuenyo Ouhamba wa Huku, nokupewa ononkhano onongwa!