1. Ki pregunta algun fiel sirbidó di Yehova sa hasi?

UN RUMAN muhé ku durante vários dékada a perseverá fielmente bou di prueba a yega di puntra: “Lo mi ta na bida ora e fin bini?” Tin mas ruman ku tin hopi tempu ta sirbi Yehova ku tambe sa puntra nan mes esei. Sí, nos ta anhelá pa e tempu yega ora ku Dios lo hasi tur kos nobo i kita tur nos problemanan. (Rev. 21:5) I aunke nos tin hopi motibu pa kere ku e fin di e mundu di Satanas ta masha serka, tin biaha por ta difísil pa warda ku pasenshi riba e dia ei.

2. Ki preguntanan relashoná ku pasenshi nos lo trata den e artíkulo akí?

² No opstante, Beibel ta mustra ku nos mester tin pasenshi. Meskos ku e sirbidónan di Dios ku a biba promé ku nos, nos lo risibí loke Dios a primintí basta nos tin un fe fuerte i ta warda ku pasenshi riba e tempu ku é a stipulá pa kumpli ku su promesanan. (Lesa Hebreonan 6:11, 12.) Yehova tambe tin pasenshi. Si e tabata ke, e por a pone un fin na maldat kaba, pero e ta warda pa e tempu oportuno yega. (Rom. 9:20-24) Dikon e tin asina tantu pasenshi? Kon Hesus a imitá e pasenshi di su Tata, poniendo asina un ehèmpel pa nos? Dikon ta bon pa nos siña warda ku pasenshi i asina imitá Yehova? E kontestanan pa e preguntanan akí por yuda nos kultivá pasenshi i un fe fuerte aunke den nos bista por parse ku Yehova ta tardando.

3, 4. (a) Dikon Yehova ta demostrá pasenshi? (b) Kon Yehova a reakshoná riba e rebelion den Edén?

³ Den henter universo, no tin ningun persona ku tin mas outoridat ku Yehova. Pues, e no tin nodi di warda pa kaba ku e problemanan ku nos ta konfrontá. Pero  e tin bon motibu pa demostrá pasenshi. Kon asina? Wèl, e rebelion ku a tuma lugá den hòfi di Edén a lanta preguntanan ku ta di interes pa tantu kriaturanan selestial komo pa hende riba tera. Pa e preguntanan akí por ser kontestá debidamente mester a laga tempu pasa. Anto Yehova sa esei; ta p’esei e ta demostrá pasenshi. Nos por ta sigur ku esaki ta pa nos mes bon pasobra Yehova sa bon kiko tur persona riba tera i den shelu ta pensa i hasi.—Heb. 4:13.

⁴ Yehova su propósito tabata pa tera yena ku desendientenan di Adam ku Eva. Ora Satanas a gaña Eva i Adam a desobedesé Yehova Dios, E no a kambia su propósito. E no a drenta pániko, kore tuma desishon purá i deshasí di e propósito ku e tabatin pa hende. Al kontrario, el a bini ku un otro manera pa e kumpli ku su propósito pa hende i pa planeta Tera. (Isa. 55:11) Pa kumpli ku su propósito i proba ku su gobernashon ta esun mihó, Yehova a demostrá dominio propio i pasenshi ekstraordinario. Sí, el a warda asta míles di aña pa kumpli ku algun aspekto di su propósito na e mihó manera.

5. Kon Yehova su pasenshi ta benefisiá hende?

⁵ Un otro motibu pakiko Yehova ta warda ku pasenshi ta pa mas hende haña bida eterno. Aktualmente, Yehova ta hasiendo preparashon pa salba “un multitut grandi.” (Rev. 7:9, 14; 14:6) Mediante e trabou di prediká, e ta invitá hende pa siña tokante su Reino i Su normanan hustu. E mensahe di Reino ta “bon notisia” pa hende. (Mat. 24:14) De echo, no tin mihó notisia ku esei! Tur persona ku Yehova hala na su organisashon ta bira parti di un kongregashon mundial di berdadero amigu ku ta stima loke ta bon. (Huan 6:44-47) Yehova ta yuda e personanan akí pa nan por haña su aprobashon. Ademas, Yehova a skohe algun hende pa forma parti di su gobièrnu selestial. Anto ora e personanan deboto akí risibí nan posishon den shelu, nan lo yuda hende obediente alkansá perfekshon i haña bida eterno. Ta klaru anto ku aunke Yehova ta wardando ku pasenshi, e ta trahando pa kumpli ku su promesanan. I tur esaki ta pa nos benefisio.

6. (a) Kon Yehova a demostrá pasenshi den tempu di Noe? (b) Kon Yehova ta demostrá pasenshi den nos tempu?

⁶ Yehova tin pasenshi asta ora otronan ta hasi kosnan teribel ku ta ofend’é. Tuma por ehèmpel e manera ku el a trata ku e maldat ku tabata reina promé ku Diluvio. Tera tabata yen di inmoralidat i violensia, i Yehova “tabata tristu den su kurason” debí ku hende a degenerá asina tantu. (Gén. 6:2-8) I komo ku e no tabata bai tolerá e situashon ei pa semper, el a tuma e desishon pa trese un diluvio pa destruí hende desobediente. Anto miéntras ku Yehova “tabata warda ku pasenshi den e dianan di Noe,” E tabata hasi e preparashonnan nesesario pa skapa Noe i su famia. (1 Ped. 3:20) Na e debido tempu, Yehova a bisa Noe loke el a disidí i a duna Noe instrukshon pa konstruí un arka. (Gén. 6:14-22) Ademas, Noe mester a spièrta e otro hendenan ku un destrukshon tabata na kaminda; e tabata “un predikadó di hustisia.” (2 Ped. 2:5) Hesus a bisa ku nos tempu ta similar na esun di Noe. I Yehova a disidí ki dia lo e pone un fin na e mundu malbado akí tambe. Pero niun hende no sa “e dia i ora” ku esei lo sosodé. (Mat. 24:36) Dios a duna nos tambe e asignashon pa spièrta hende i mustra nan kon nan por skapa.

7. Yehova ta tardando pa kumpli ku su promesanan? Splika.

⁷ E echo ku Yehova tin pasenshi no ta nifiká ku e ta djis sinta warda tempu pasa. Nunka nos mester pensa ku e no tin atenshon pa nos òf ku e no ta interesá den  nos. Pero tin biaha, ta fásil pa pensa asina ora nos ta birando grandi òf ta sufri den e sistema malbado akí. Nos por bira desanimá òf kuminsá pensa ku Dios ta tarda pa kumpli ku su promesanan. (Heb. 10:36) Nunka lubidá ku e tin bon motibu pa demostrá pasenshi i ku e ta usa e tempu akí na benefisio di su sirbidónan leal. (2 Ped. 2:3; 3:9) Laga nos wak awor kon Hesus a imitá e pasenshi di su Tata.

8. Bou di ki sirkunstansia Hesus a demostrá pasenshi?

⁸ Hesus tin míles di aña ta hasi e boluntat di Dios ku goso. Ora Satanas a rebeldiá den hòfi di Edén, Yehova a tuma e desishon pa manda su Yu unigénito na tera komo e Mesías. Pensa riba loke esaki a nifiká pa Hesus: Ku pasenshi, e mester a warda míles di aña promé ku e por a bini na tera. (Lesa Galationan 4:4.) Pero, e no a sinta warda man krusá; mas bien, e tabata okupá ku e trabou ku su Tata a dun’é. I ora el a bini na tera, e tabata sa ku Satanas lo a kousa su morto manera Yehova a profetisá. (Gén. 3:15; Mat. 16:21) Ku pasenshi, el a someté su mes na e boluntat di Dios aunke esaki a nifiká ku e mester a muri un morto masha doloroso. Sí, Hesus tabata dispuesto pa sufri aunke e tabata Yu di Dios. Asina el a demostrá lealtat perfekto i no a enfoká riba su mes. Esei ta un bon ehèmpel pa nos imitá!—Heb. 5:8, 9.

9, 10. (a) Kiko Hesus ta hasi segun ku e ta warda ku pasenshi riba Yehova? (b) Kon nos por imitá Hesus?

⁹ Despues ku Hesus a haña resurekshon, el a risibí outoridat tantu den shelu komo riba tera. (Mat. 28:18) E ta usa e outoridat ei pa kumpli ku e propósito di Yehova segun e orario ku Yehova a establesé. P’esei, el a warda ku pasenshi na man drechi di Yehova te na 1914 ora Dios a pone su enemigunan komo banki pa su pia. (Sal. 110:1, 2; Heb. 10:12, 13) I pronto lo e destruí e mundu malbado di Satanas. Mientrastantu, ku pasenshi e ta yuda hende i guia nan na e “awa di bida.”—Rev. 7:17.

¹⁰ Bo ta mira kon bo por imitá e pasenshi di Hesus? Sin duda, Hesus tabata ansioso pa hasi loke su Tata a pidié; no opstante, el a warda te ora e tempu ku Yehova a stipulá a yega. Segun ku nos ta spera riba e destrukshon di Satanas su mundu malbado, nos tambe mester tin pasenshi. Sí, nos mester warda ku pasenshi riba Dios i no stòp di warda pasobra nos a desanimá. Awor, kon nos por kultivá e klase di pasenshi ei?

11. (a) Ki relashon tin entre fe i pasenshi? (b) Dikon nos tin motibu bálido pa tin un fe fuerte?

¹¹ Promé ku Hesus a bini na tera, e profetanan i otro sirbidónan fiel di Dios a pone un bon ehèmpel pa nos: Nan a demostrá kon asta hende imperfekto por perseverá ku pasenshi. Tabatin un relashon estrecho entre nan fe i nan pasenshi. (Lesa Santiago 5:10, 11.) Si nan no tabatin fe, esta, a kere di bèrdat den Yehova su promesanan, nan lo no a warda ku pasenshi riba kumplimentu di esakinan. Bes tras bes, nan a enfrentá pruebanan di fe difísil i spantoso, ku e konfiansa ku Dios lo a kumpli ku loke el a primintí. (Heb. 11:13, 35-40) Awe, nos tin mas motibu ainda pa tin un fe sólido, pasobra Hesus ta sirbi komo “e Representante Prinsipal di nos fe.” (Heb. 12:2) Kon asina? El a kumpli ku hopi profesia i a yuda nos komprondé Dios su propósito mihó.

12. Kiko nos tin ku hasi pa fortalesé nos fe?

¹² Kiko nos por hasi pa fortalesé nos fe i, di e manera ei, haña mas pasenshi? Ta masha importante pa nos sigui e konsehonan di Dios. Por ehèmpel, meditá riba  e konseho ku nos ta haña na Mateo 6:33. Dikon bo mester pone e Reino na promé lugá den bo bida? Bo por hasi mas esfuerso pa sigui e konseho akí? Kisas esaki ta enserá ku bo tin ku dediká mas tempu den sirbishi òf hasi algun kambio den bo estilo di bida. Kòrda kon Yehova a bendishoná bo esfuersonan te ku awor. Podisé el a yuda bo haña un estudio di Beibel nobo òf a yuda bo haña “e pas di Dios ku ta surpasá tur komprondementu.” (Lesa Filipensenan 4:7.) Ora bo enfoká riba e benefisionan ku bo a risibí debí ku bo a sigui Yehova su instrukshonnan, bo ta komprondé mihó dikon ta bon pa bo tin pasenshi.—Sal. 34:8.

13. Ilustrá kon fe ta yuda nos haña mas pasenshi.

¹³ E relashon entre edifiká fe i haña pasenshi ta similar na e siklo natural di sembra, kultivá i kosechá. Kada bes ku un kunukero haña un bon kosecha, e ta haña mas konfiansa pa sembra e siguiente temporada. Ta klaru ku e sa ku e tin ku warda ku pasenshi pa e por kosechá. Pero esei no ta strob’é di planta; kisas e ta planta un tereno asta mas grandi ku e temporada anterior. I e tin konfiansa ku lo e haña kosecha. Di mes manera, si nos ta sigui siña di Yehova su instrukshonnan, ta kumpli ku nan i saka benefisio, nos lo haña mas fe i konfiansa den Yehova. Asina ta bira mas fásil pa nos warda ku pasenshi riba e bendishonnan ku lo bini sigur.—Lesa Santiago 5:7, 8.

14, 15. Ki punto di bista nos mester tin di sufrimentu humano?

¹⁴ Kiko otro por yuda nos haña mas pasenshi? Nos mester hasi esfuerso pa mira mundu i nos sirkunstansianan personal desde e punto di bista di Yehova. Por ehèmpel, pensa riba e manera ku e ta mira sufrimentu humano. E tin hopi tempu ta mira hende sufri, i esaki ta hasié doló. Pero e no ta laga e doló ei strob’é di hasi  loke ta bon. El a manda su yu unigénito “pa destruí e obranan di Diabel” i pa den futuro eliminá tur daño ku Satanas a kousa hende. (1 Huan 3:8) Pues pa Yehova, hende su sufrimentu ta algu temporal, miéntras ku e solushon ku e ta trese ta pa semper. Pues, si nos ke imitá Yehova, nos no mester permití e kosnan malu ku ta tuma lugá bou di e gobernashon di Satanas debilitá nos fe ni pone nos pèrdè pasenshi pasobra e fin no a yega ainda. Mas bien, laga nos sigui pone fe den e kosnan ku lo dura pa semper. Yehova a stipulá e tempu ku lo e kaba ku maldat, i lo e tuma akshon na su debido tempu.—Isa. 46:13; Nah. 1:9.

¹⁵ Durante e último dianan difísil di e era akí, nos por haña nos ku situashonnan difísil ku por pone nos fe na prueba. Podisé nos òf nos sernan kerí por bira víktima di violensia òf sufri pa un òf otro motibu. E kosnan akí no mester pone nos reakshoná rabiá; en bes di esei, nos mester ta desididu pa konfia kompletamente den Yehova. Pero komo ku nos ta imperfekto, esei no ta fásil. No opstante, nos mester kòrda kon Hesus a reakshoná ora e tabata bou di prueba.—Lesa Mateo 26:39.

16. Kiko nos no mester hasi durante e último dianan akí?

¹⁶ Algu ku por stroba nos di imitá e pasenshi di Yehova ta e aktitut di ‘ban wak kiko ta bai pasa.’ Dikon? Pasobra un hende ku tin e aktitut ei no tin masha konfiansa ku e fin ta serka, i kisas e ta prepará su mes pa por si akaso kosnan no sosodé manera Yehova a primintí. Kisas e ta pensa: ‘Mi ta bai wak si Yehova ta kumpli ku su palabra.’ I e por kuminsá buska prominensia òf siguridat ekonómiko den e mundu akí en bes di pone e Reino di Dios na promé lugá den su bida. Òf, e por kuminsá konfia den edukashon avansá pa por logra un bida kómodo awor. Esei no ta un muestra di falta di fe? Kòrda ku Pablo a urgi nos pa imitá hendenan fiel ku “pa medio di fe i pasenshi” a risibí e promesanan di Dios. (Heb. 6:12) Yehova lo no permití e era malbado akí dura mas di loke ta nesesario. Sí, lo e no tarda. (Hab. 2:3) Mientrastantu, nos mester keda alerta, partisipá diligentemente den e trabou di prediká e bon notisia i no djis sirbi Yehova pa obligashon. Di e manera ei, nos por haña satisfakshon inkomparabel for di awor.—Luk. 21:36.

17, 18. (a) Ki oportunidat nos tin awor miéntras nos ta warda ku pasenshi? (b) Kon nos pasenshi ta ser rekompensá?

¹⁷ Sea ku nos tin un par di luna òf vários dékada ta sirbi Yehova, nos ke sirbié pa semper. I si nos tin pasenshi, nos lo perseverá te na fin di e era akí, sin importá kuantu nos tin ku warda. Yehova ta dunando nos awe e oportunidat di demostrá ku nos ta konfia plenamente den su desishonnan i ku nos lo keda fiel na dje maske nos tin ku soportá maldat pa kousa di su nòmber. (1 Ped. 4:13, 14) Ademas, e ta duna nos e formashon ku por yuda nos warda ku pasenshi te na fin i ser salbá.—1 Ped. 5:10.

¹⁸ Hesus tin outoridat tantu den shelu komo riba tera. Ta p’esei, nada no por strob’é di protehá bo. Ta abo so por strob’é. (Huan 10:28, 29) Nos no tin ningun motibu pa tin miedu di futuro ni di morto. Ken ku perseverá te na fin lo ser salbá. P’esei, nos mester tene kuidou pa e mundu no influensiá nos i pone nos stòp di konfia den Yehova. En bes di esei, miéntras ku Yehova ta demostrá pasenshi, nos mester ta determiná pa fortalesé nos fe i usa nos tempu na un manera sabí.—Mat. 24:13; lesa 2 Pedro 3:17, 18.