1. ¿Imatataq tapukuyan Diosta mëtsikaq sirweqkuna?

TUKÏ problëmakunata pasëkarpis, atska chunka watakunapana Jehoväta sirweq chakwanyashqa panim kënö tapukurqan: “¿Rikäshaqraqtsuraq mana alli nunakunapa ushakëninta?”. Mëtsika watakunapana Jehoväta sirweq cristiänokunapis tsënöllam tapukuyan. Y tsëqa manam mana allitsu, llapantsikmi ‘llapantapis mushoqmanna’ tikratsinan y tukï sasa o aja kawakïkunata ushakätsinan junaq chämunanta munantsik (Apoc. 21:5). Tukïmi rikätsimantsik Diablupa mundon ushakärinampaq ichikllana pishinqanta, pero manam fäciltsu tsëta pacienciawan shuyarëqa.

2. ¿Ima tapukïkunapa respuestantataq kë yachatsikïchö rikäshun?

² Bibliaqa tsë junaqta pacienciawan shuyänapaq kaqtam rikätsimantsik. Dios awnikunqankunata cumplikaqta rikänapaqqa, Diosta unë tiempochö sirweqkunapanömi markäkïnintsik o yärakuynintsik alli sinchi kanan y pacienciayoqmi kanantsik (lei Hebreus 6:11, 12 *). Jehová pacienciakoq kanqanman pensarishun. Pëqa unënam kë mana alli mundota ushakätsinman karqan, pero más alli kaq tiempotam shuyarëkan (Rom. 9:20-24). ¿Imanirtaq alläpa pacienciayoq? ¿Imanötaq Diospa pacienciakoq këninta Jesus qatirqan y tsënölla ruranqantsik imanötaq yanapamäshun? Tsë tapukïkunapa respuestampita yachakïqa markäkïnintsiktam más sinchiyätsinqa y awnikunqankunata cumplimunampaq Jehová tardeyämoqtanö rikashqapis, pacienciakoq kanantsikpaqmi yanapamäshun.

3, 4. a) ¿Imanirtaq Jehová pacienciawan shuyarashqa Patsapaq munënin cumplikänampaq? b) ¿Imatataq Jehová rurarqan Edén huertachö contran churakäriyaptin?

³ Jehovälla llapan autoridadyoq karpis, musyanmi imanir pacienciayoq kanqanta. Edén huertachö contran churakäyanqanmi alläpa precisaq tapukïkunata yuritsirqan, y pëqa musyarqanmi tsë llapan musyakänampaqqa atska tiemporaq pasanan precisanqanta. Ciëlochö espïritukuna y nunakuna imanö kayanqanta chipyëpa reqirninmi, noqantsikpaq más alli kaqman yarparnin imatapis ruran (Heb. 4:13).

⁴ Jehoväqa munarqan Adanpawan Ëvapa tsurinkuna mirarnin Patsaman juntayänantam. Y Ëvata Satanás engañanqanchö Diospa contran Adan churakäriptimpis, Diosqa manam munënin rurakänampaq kaqta dejarirqantsu. Piñakunampa y nunakunata munëninchö dejarinampa rantinmi o trukanmi, tukïta rurarqan nunakunapaq y Patsapaq munënin cumplikänampaq (Is. 55:11). Munënin rurakänampaq y pëlla ciëlochö y Patsachöpis mandakoq kanqan rikakänampaqmi, Jehoväqa ushakëta apamushqaraqtsu y munënin munanqannö cumplikänampaqmi atska waranqa watakunapa pacienciawan tsëta shuyarashqa.

5. ¿Ima bendiciontataq chaskintsik Jehová pacienciayoq kanqampita?

⁵ Jina Jehoväqa pacienciawan shuyarashqa más atskaq nunakuna mana wanushpa kawëta tariyänampaqmi. Kanan höram tukïta rurëkan “mana yupetapis puedipaq” mëtsikaq nunakuna salvakuyänampaq (Apoc. 7:9, 14; 14:6). Yachatsikur purinqantsikwanmi pëqa nunakunata invitëkan leyninkunapita y Gobiernon ruramunampaq kaqpita yachakuyänampaq. Rasumpa kaqchöqa, Diospa Gobiernompita yachatsikïqa nunakunapaq imapitapis más ‘alli caq willaquicunam’ kayan (Mat. 24:14). Jehová pë kaqman llapanta wititseq kaqkunaqa, alli kaqta kuyaq entero Patsachö juk kastanölla këmanmi chäyan (Juan 6:44-47). Kuyakoq Diosnintsikqa pëpa kuyëninchö kayänampaqmi yanapan. Jina pëqa Patsapitam nunakunata akrëkashqa Gobiernonchö ciëlopita patsë nunakunata gobernayänampaq. Tsë akrashqa nunakuna cargonkunata ciëlochö chaskirirqa, Diosta kuyaq y wiyakoq nunakunatam jutsannaq këman chäyänampaq y mana wanushpa kawëman chäyänampaq yanapayanqa. Awmi, piñakïnin junaqta apamunampaq kaqta shuyarëkarpis, Jehoväqa tukïtam rurashqa awnikunqankunata cumplir bendecimänantsikpaq.

6. a) ¿Imanötaq Noëpa tiemponchö Jehová rikätsikurqan pacienciayoq kanqanta? b) ¿Imanötaq kanan witsankuna Jehová pacienciayoq kanqanta rikätsikun?

⁶ Apäkï tamya manaraq shamuptin mana alli nunakunanö kanan witsan chikeqninkuna Jehoväta chipyëpa piñatsiyashqa kayaptimpis, pëqa alläpa pacienciayoqmi. Tsëwitsanqa, Patsaqa juntam këkarqan mana alli ruraq nunakunawan, maqakoqkunawan y wanutsikoqkunawan, tsëmi Jehoväqa ‘shonqunchö nanatsikurqan’ (Gén. 6:2-8). Tsënö pasakunantaqa manam imëyaqpis rikaräkunantsu karqan, tsëmi juk junaqta churarqan nunakunaman apäkï tamyata apamunampaq. Tsënö kaptimpis, “Diosnintsicqa allapa pasensiacurmi, tse mana alli ruraq nunacuna jutsancunata jaqiyänanpaq shuyararqan” y tukïta alistapakurqan Noëta y familianta salvanampaq (1 Ped. 3:20). Churanqan tiempochömi apäkï tamyata apamunampaq kaqta willarqan y mandarqan arcata ruranampaq (Gén. 6:14-22). Jinamampis Noëqa nunakunatam willaparqan “allicunata rurar cawayänanpaq” y ushakë junaq shamunampaq kaqta (2 Ped. 2:5). Awmi, Noëpa tiemponnö tiempontsik kanampaq kaqtam Jesusqa willakurqan. Jehoväqa musyannam kë mana alli mundota imë ushakätsinampaq kaqta, pero pëpita jukqa, manam “ime öra o ime junaq cumplicänanpaq caqtaqa” musyantsu (Mat. 24:36). Tsë junaq chämunqanyaqqa, nunakuna salvakuyänampaq imakunata rurayänampaq Diosnintsik mandamanqantsiktam willakïkänantsik.

7. ¿Alläpatsuraq Jehová qepëkan awnikunqankunata cumplimunampaq? Willakaramï.

⁷ Tsëqa, ¿más tiempo pasakunantaku Jehová  dejëkan? Manam. Pacienciayoq këtaqa manam imatapis rikaräkïtawan igualatsishwantsu. Tsënö kaptimpis, rasumpa kaqchöqa más edäyarnin o kë mundochö imëkatapis sufrirnin tsëta yarpëqa ichik sasam o ajam kanman. Quizaschi qelanärishwan o awnikunqankunata cumplimunanta Diosnintsik qepëkanqanta nishwan (Heb. 10:36). Ama imëpis qonqashuntsu imanir pacienciakoq kanqanta y ushakë junaq chämunampaq pishinqan tiempota sirweqninkunata yanapanampaq utilicëkanqanta (2 Ped. 2:3; 3:9). Kananqa rikärishun Diospa pacienciakoq këninta Jesus imanö qatinqanta.

8. ¿Imakunachötaq pacienciayoq kanqanta Jesus rikätsikurqan?

⁸ Jesusqa mana yupëtapis puëdepaq atska waranqa watakunapanam Diospa munëninta kushishqa rurar këkan. Diospa contran Satanás churakäriptinmi, Japallan punta kaq Tsurin Patsata shamunampaq y Mesïasman tikranampaq Jehová nirqan. Tsëkunata ruranampaqqa Jesusqa atska waranqa watakunam shuyaränan karqan (lei Galatas 4:4). Y tsëkamayaqqa manam imatapis mana rurashpatsu këkarqan. Tsëpa rantinqa o trukanqa, Teytan mandanqan obra rurëchömi tukï rurapakïyoq këkarqan (Gén. 3:15; Mat. 16:21). Y Patsaman shamunampaq hora chäriptinnam, profecïakuna ninqannö, Satanaspa makinchö wanunampaq kaqta musyarqan (Gén. 3:15; Mat. 16:21). Alläpa sufrinan kaptimpis tukïpaq mana yarpachakurllam Diospa munëninta ruranampaq churapakarqan, tsënöpam Jehovällapaq chipyëpa kanqanta rikätsikurqan. Pëqa Diospa tsurin këkarpis humilde karmi, kikinllaman pensarqantsu. ¡Noqantsikpaqqa alläpa alli ejemplom! (Heb. 5:8, 9.)

9, 10. a) ¿Dios disponishqan horata shuyaranqanyaqqa, ¿imatataq Jesus rurëkashqa? b) ¿Imanötaq Diosnintsik disponishqan hörata rikashwan?

⁹ Jesusqa kawariramurmi ciëlochö y Patsachö autoridadta chaskirqan (Mat. 28:18). Y tsë autoridadnintam utilicëkan Jehoväpa munëninta patsätsinqan höranchö ruranampaq. Diospa tsurinqa pacienciawanmi Teytampa derecha kaq lädonchö shuyararqan 1914 watayaq, tsëchömi ‘chikeqninkunata chaki jarunanman’ Dios churarqan (Sal. 110:1, 2; Heb. 10:12, 13). Ichikllachönam Satanaspa mundonta ushakäratsinqa, pero tsëkamayaqqa pacienciawanmi nunakunata yanapëkan “cawatsicoq yacuman” pusharnin (Apoc. 7:17).

¹⁰ Jesus imanö kanqanmi rikätsimantsik Diosnintsik disponishqankunata shumaqpa rikänapaq. Teytampa munënintaqa chipyëpam rurëta munarqan, tsënö kaptimpis mana ajayashpam Dios disponishqan hörachö ruranampaq shuyararqan. Satanaspa mundon ushakänampaq hora chämunanta shuyanqantsikyaqqa, Diosnintsik qepëkanqantanö mana rikänapaq y mana qelanärinapaqmi Jesusnö pacienciakoq këta necesitantsik. Tsëqa, ¿imanöraq pacienciakoq kashwan?

11. a) ¿Imanötaq markäkïyoq kë y pacienciayoq kë yanapamantsik? b) ¿Imanirtaq markäkïyoq kanantsikpaqqa tukï yanapakïkuna kanqanta nintsik?

¹¹ ¿Jutsasapa këkarnimpis mana qelanärishpa nunakuna aguantëta puëdeyanku? Awmi, tsëtam profëtakuna y Diosta sirweq wakin nunakuna Jesus Patsaman manaraq shamuptimpis rikätsikuyarqan. Diosman markäkïninkuna o yärakuyninkuna y pacienciakoq kayanqanmi alläpa yanaparqan (lei Santiagu 5:10, 11). Jehová ninqankunaman chipyëpa mana markäkushqa karqa, ¿pacienciakurtsuraq shuyaräyanman karqan awnikunqankunata cumplinanta? Hora höraqa tukï peligrokunata y sasa o aja kawëkunatam pasayarqan, tsënö kaptimpis tsë witsan o shamoq tiempochö awnikunqankunata Dios qonampaq kaqman markäkurmi tsë llapanta aguantayarqan (Heb. 11:13, 35-40). Kanan witsankunaqa, masran markäkïnintsik o yärakuynintsik más sinchi kanampaq tukï yanapamantsik, kikin Jesusmi  ‘yanapecamantsic alli marcäquiyoq canantsicpaq’ (Heb. 12:2). Awmi, profecïakunata cumplirnin y Diospa munëninta rikätsikurninmi, Jehoväman markäkunapaq yanapamarquntsik.

12. ¿Imakunatataq ruranantsik markäkïnintsikta más sinchiyätsinapaq?

¹² ¿Imakunatataq ruranantsik markäkïnintsik sinchi kanampaq y pacienciayoq kanantsikpaq? Alläpam precisan Dios consejamanqantsiknölla ruranantsik. Diospa Gobiernonta kawënintsikchö imanir puntaman churanantsikpaq kaqman pensarishun. ¿Mateo 6:33 mandakunqanta ruranapaq más kallpachakïta puëdentsikku? Tsënö rurëqa quizaschi Diospita yachatsikurnin más tiempo kanata o kawënintsik más sencillolla kananta mañamäshun. Ama qonqashuntsu sirwinqantsikrëkur Jehová bendecimanqantsikta. Quizaschi juk nunata Bibliapita yachatsinapaq yanapamarquntsik o “allapa espantepaq juclaya shonquta, y yarpeta” qomarnintsik yanapamarquntsik (lei Filipenses 4:7). Jehová mandakunqankunata wiyakï tukï bendicionkunata apamunqanman yarparqa, masran pacienciakoq këta kuyashun (Sal. 34:8).

13. Juk igualatsikïwan willakaramï markäkïta y pacienciayoq këta imanö miratsinantsikpaq kaqta.

¹³ Tsëqa igualan chakrachö murukïwan, plantata winatsïwan y cosechëwanmi. Chakrankuna atskata wayïkuptinqa más segürom tsë murukoq nuna sientekun tsë chakrakunata murunampaq. Awmi, cosecha tiempo chämunantaqa pacienciawanmi shuyaran, pero tsëqa manam llakitsintsu. Rasumpam, alli wayunampaq kaqman markäkurmi punta murunqan chakrakunapitapis más chakrakunata alistan. Tsë cuentallam Diospa consëjonkunata wiyakïqa. Imëpis yachakurnin, yachakunqantsikmannö rurarnin y tsënö ruranqantsikpita bendicionkunata tarirmi, Jehoväman más markäkuntsik y pacienciawanmi shuyarantsik shamoq tiempochö bendicionkuna kanampaq kaqta (lei Santiagu 5:7, 8).

14, 15. ¿Imanötaq rikashwan nunakuna sufriyanqanta?

¹⁴ Pacienciayoq kanapaqqa, mundo imanö  kanqanta y imanö këkanqantsiktam Jehová rikanqannö rikänantsik. Këllaman pensarishun, atska waranqa watapa nunakuna sufreqta rikashqa karpis, Diosnintsikqa manam dejashqatsu tsëkuna llakishqallata katsinanta. Imatapis rurëta mana puëdeqnö quedakunampaq rantinmi o trukanmi, “diablupa rureninta ushacäratsinanpaq” y nunakunata sufritsinqanta altsanampaq, japallan punta kaq Tsurinta Patsaman mandamurqan (1 Juan 3:8). Mana allikuna ushakäriptinqa tsë llapan sufrimientokunaqa imëka raslla pasareq cuentam kayanqa, pero Jehoväpa yanapakïninwan alli kawakïqa manam imëpis ushakanqatsu. Tsënö kaptinmi, Satanaspa mundonchö imëka mana allikunata rikarnin llakikunapa rantin o mëna ushakärinampaq kaqman yarpachakurnin kanapa trukanqa, mana rikakoq kaptimpis mana ushakaq cösaskunaman markäkushun. Jehoväqa musyanmi kë mundota imë ushakäratsinampaq kaqta y tsëtaqa disponishqan höram ruranqa (Is. 46:13; Nah. 1:9).

¹⁵ Kë mana alli mundo ushakänanna këkanqan junaqkunaqa, quizaschi markäkïnintsikta o yärakuynintsikta pruëbaman churaq alläpa sasa o aja kawëkunapa pasashun. Mana alli tratamashqa o kuyashqa kastantsikta sufreqta rikarninqa, ama piñakushuntsu. Jutsasapa kashqa tsëkunata rurë sasa kaptimpis kallpachakushun Jehoväman markäkunapaq y Mateo 26:39 (lei) textochö Jesus ninqannölla ruranapaq.

16. ¿Imapitataq cuidakunantsik kë ushanan junaqkunachö?

¹⁶ Jehovänö pacienciayoq këta munarqa, pëpa Palabran rasumpa kanqanmanmi markäkunantsik. ¿Imapaqtaq parlëkantsik? Kë mundopa ushakënin këllachöna kanqanman llapan shonqunwan mana markäkoqqa o yärakoqqa, quizaschi juk cösaskunata ruranampaq churapakanman Jehová ninqankuna mana cumplikänampaqtanö pensar. Këllaman pensarishun, capazchi kë mundochö reqishqa këta munarnin y atska qellëyoq këta munarnin Diospa Gobiernonta kawëninchö mana precisaqpaq churarinman, o quizaschi jatun estudiokunata estudiar qallëkunman alli kawëyoq kanampaq. Tsënö pensaqqa Diosman markäkïnin pishinqantam rikätsikun. Yarpäshun, apóstol Pabluqa “marcäcur” y pacienciakur Jehoväpa awnikïninkunata chaskishqa kaqkunata qatinapaqmi consejamantsik (Heb. 6:12). Munënin cumplikänampaq tiempopita kë mana alli mundo más duranantaqa Jehová manam dejanqatsu (Hab. 2:3). Tsëkamayaqqa, Diospita yachatsikïchö ama qelanäshuntsu. Tsëpa rantinqa, mäkoqlla o mayaqlla këkäshun y alli willakïkunapita kushishqa yachatsikur kashun, tsëta rurëqa kanan witsankunapis kushishqa kanapaqmi yanapamäshun (Luc. 21:36).

17, 18. a) ¿Ima rurëtataq puëdentsik Jehová pacienciakoq kanqampita? b) ¿Imanötaq shamoq tiempochö yanapamäshun kanankuna pacienciakoq kanqantsik?

¹⁷ Jehoväta juk o ishkë killakunallaparaq o atska chunka watakunapana reqirpis, llapantsikmi imëyaqpis sirwita munantsik. Kë mundo ushakänampaq ëka tiempo pishiptimpis, pacienciayoq këmi yanapamäshun salvacionta tarinapaq. Kanan witsankunaqa, disponenqankunaman llapan shonquntsikwan markäkunqantsikta rikätsikunapaq y precisaptinqa pëpa jutinrëkur sufrinantsikpaq kaqtam Jehoväqa shuyarëkan (1 Ped. 4:13, 14). Jinamampis, salvakunantsikrëkur pacienciayoq kanapaqmi yanapëkämantsik (1 Ped. 5:10).

¹⁸ Jesusqa ciëlochö y Patsachömi llapan autoridadta chaskishqa, tsëmi lädompita rakimënintsiktaqa imapis puëdentsu (Juan 10:28, 29). Manam shamoq tiempota ni wanïta imanirpis mantsashwantsu. Ushanankamayaq pacienciakur aguantaqkunaqa, salvaciontam chaskiyanqa. Tsënö kaptinqa, ama dejashuntsu kë mundo engañamänantsikta ni Jehoväman markäkunqantsikta wallkätsinanta. Markäkïnintsikta sinchiyätsishun y alleq pensëkur Diospa paciencianta provechashun (Mat. 24:13; lei 2 Pedru 3:17, 18).