1. ¿Imatam tapukunku Diosta tukuy sonqonkuwan serviqkunaqa?

SASACHAKUYKUNA kachkaptinpas unay wataña Diosta tukuy sonqonwan serviq huk cristianam kaynata tapukurqa: “¿Kawsasaqraqchu puchukay punchawta qawanaypaq?”, nispa. Chaynatam tapukunku achka wataña tukuy sonqonkuwan Diosta serviq achka iñiqmasinchikkunapas. Arí, llapallanchikmi munanchik Jehová Diospa piñakuynin punchaw chayamuspan tukuy imata mosoqyachinanta chaynataq tukuy mana allinkunata chinkachinantapas (Apoc. 21:5). Tukuy ima pasakusqanmi qawachin Satanaspa munaychakusqan mana allinkuna chinkachisqaña kananmanta, chaywanpas pacienciakuyqa sasam wakinpiqa.

2. ¿Ima tapukuykunatam kutichisun kay yachachikuypi?

² Pacienciayoq kanapaqmi Bibliaqa niwanchik. Diospa prometewasqanchikkunata qawanapaqqa, ñawpaq tiempopi Diospa serviqninkuna hinam iñiyninchikpi allin takyasqa kaspa pacienciawan suyananchik (leey Hebreos 6:11, 12). Piensasun kikin Jehová Diospi, payqa unayñam kay Pachapi mana allinkunataqa chinkarachinman karqa, ichaqa tanteasqan punchawtaraqmi suyachkan (Rom. 9:20-24). ¿Imanasqataq payqa ancha pacienciayoq? ¿Imaynatam Jesusqa Diospa chayna kasqanta qatipakurqa, hinaspa imaynatam yanapawasun chayta rurayninchikqa? Kaykunamanta yachayqa anchatam yanapawasun iñiyniyoq hinaspa pacienciayoq kanapaq, promesankunata Jehová Dios mana chaylla cumplinanpaq hina rikchakuwaptinchikpas.

3, 4. a) ¿Imanasqataq Jehová Diosqa pacienciayoq karqa kay Pachapi munaynin rurakunanpaq? b) ¿Imatam Jehová Diosqa rurarqa Adanwan Eva huchallikurusqanku qepata?

³ Jehová Dios llapallan kamachiq kaspanpas achka kutipim  pacienciayoq kasqanta qawachirqa. Eden huertapi Adanpawan Evapa huchallikurusqankum Diospa llapallan kamachiq kasqanta iskayrayachirqa, Diosqa yacharqam chay tapukuy kutichisqa kananpaq tiempo pasananta. Payqa allintam reqsin hanaq pachapi angelkunapa hinaspa runakuna imayna kasqankutaqa, chaymi imatapas ruranman allinninchikpaq munaspa (Heb. 4:13).

⁴ Adanpawan Evapa mirayninkuna kay Pachaman huntanankutam Jehová Diosqa munarqa. Adanwan Eva mana kasukuptinkupas, Diosqa hinallam munayninta ruranan karqa. Paciencian tukurunanmantaqa otaq runakunata qepancharunanmantaqa, tukuytam rurarqa runakunapaq hinaspa kay Pachapaq ima munasqan rurakunanpaq (Is. 55:11). Munaynin rurakunanpaq hinaspa llapallan kamachiq kasqanta chuyanchananpaqmi Jehová Diosqa waranqantin watakuna pacienciawan suyarqa, chaynapi munayninmanta wakinkuna munasqanman hina rurakunanpaq.

5. ¿Imatam chaskinchik Jehová Dios pacienciayoq kasqanrayku?

⁵ Chaymantapas, achka runakuna wiñay kawsayta haypanankupaqmi Jehová Diosqa pacienciawan suyarqa. Chayraykum kunanpas tukuyta rurachkan ‘achkallaña runakuna’ salvakunankupaq (Apoc. 7:9, 14; 14:6). Predicasqanchikwanmi Diosqa runakunata nichkan kamachikuyninkunamanta yachanankupaq hinaspa Gobiernon imakuna rurananmantapas. Arí, Diospa Gobiernonmanta willakuyqa llapallan runakunapaq ‘allin noticiakunam’ (Mat. 24:14). Jehová Diosqa allin rurayta kuyaq runakunatam huñun llaqtanpi kanankupaq (Juan 6:44-47). Kuyakuq Diosninchikqa lliwtam yanapawanchik kasukuq kananchikpaq. Chaymantapas lliw runakunamantam 144.000 runakunata akllarun, paykunam hanaq pachamanta kamachimunqaku. Kay Diosman sonqo cristianokunam kasukuq runakunata yanapanqaku mana pantaq kanankupaq hinaspa wiñay kawsayta haypanankupaqpas. Chaynaqa, pacienciawan suyaspanpas Jehová Diosqa hinallam promesankuna rurasqa kananpaq tukuyta rurarqa. Kaykuna rurasqanqa allinninchikpaqmi.

6. a) ¿Imaynatam Diosqa pacienciayoq kasqanta qawachirqa Noeypa tiemponpi? b) ¿Imaynatam Diosqa pacienciayoq kasqanta kunanpas qawachichkan?

⁶ Jehová Diosta mana allin ruraq runakuna piñarachiptinkupas payqa hinallam pacienciakuchkan, ñawpaq tiempopi Sinchi Para manaraq kachkaptinpas chayqa qawakurqam. Chay tiempopiqa huchapakuywan maqanakuymi llumpayta kay Pachapi mirarurqa, chaymi Jehová Diosqa ‘sonqonpi llakikurqa’ chay runakunapa mana allin rurasqankumanta (Gen. 6:2-8). Diosqa manamá chay rurasqankutaqa wiñaypaqchu saqenan karqa, aswanmi tantearurqa chay mana allin runakunata Sinchi Parawan chinkarachinanpaq. Ichaqa, Noeytawan familianta imayna salvananpaq piensaspanqa pacienciawanmi suyarqa (1 Ped. 3:20). Ima rurananmanta tantearuspanmi Noeyta kamachirqa hatu-hatun wasi kaqlla buqueta rurananpaq (Gen. 6:14-22). Chaymantapas Noeyqa ‘salvacionmanta willakuqmi’ karqa, payqa willakurqam sinchi para chayamunanmanta (2 Ped. 2:5). Chayraykum Jesusqa nirqa kay tiemponchik Noeypa tiemponwan tupasqanta. Jehová Diosqa tantearunñam kay tiempopi mana allinkuna chinkachiytaqa, ichaqa manam pipas yachanchu “ima punchawmi otaq imay horam” kanantaqa (Mat. 24:36). Chaymi runakuna imayna salvakunankupaq Diospa kamachiwasqanchikta willakunanchik kachkan.

7. ¿Llumpaytachu Diosqa unamuchkan promesankunata cumplinanpaq? Willamuy.

⁷ Chaynaqa, ¿tiempo pasanallantachu Jehová Diosqa saqechkan? Manam. Chaymantapas manam piensanachu ñoqanchikmanta Dios mana nanachikusqantaqa. Chayna piensayqa manam yanapawachwanchu  yuyaqyaptinchik otaq ñakariptinchikpas. Yaqapaschá hukmanyachwan otaq piensachwanpas Diosqa promesankunata cumplinanpaq unamuq kasqanta (Heb. 10:36). Amataq haykapipas qonqasunchu Dios pacienciayoq kasqantaqa hinaspa tiempo pasananta saqesqanqa tukuy sonqowan serviqninkunata favorecenanpaq kasqantapas (2 Ped. 2:3; 3:9). Kunanñataq qawasun Taytanpa pacienciakuq kasqanta Jesus imayna qatipakusqanmanta.

8. ¿Imakunapim Jesusqa pacienciayoq kasqanta qawachirqa?

⁸ Jesusqa waranqantin watakunañam Taytanpa munaynintaqa kusikuywan rurachkan. Diospa contranpi Satanas rikuriruptinmi, Diosqa munarqa sapallan Churin kay Pachaman hamuspan Mesias rikurinanta. Piensasun Jesuspaq chay imayna kasqanmanta: Payqa waranqantin watakunam pacienciawan suyanan karqa chay punchaw chayamunankama (leey Galatas 4:4). Manam payqa makinkunata chupqakuykuspanchu tiempo pasananta suyarqa. Aswanqa, Taytanpa kamachisqanta ruraypim afanakurqa. Kay Pachaman hamuspanqa Bibliapa willakusqanman hinam yacharqaña wañuchisqa kananmanta (Gen. 3:15; Mat. 16:21). Pacienciawan Diospa munayninta ruraspanmi tukuy ima ñakarisqankunawan Diosman sonqo kasqanta qawachirqa. Manam kikillanpichu nitaq Diospa churin kasqallanpichu piensarqa. ¡Chayna rurasqanqa qatipakunapaqmá! (Heb. 5:8, 9.)

9, 10. a) ¿Imatam Jesusqa rurarqa Taytan tanteasqanta ruranankama pacienciawan suyaspan? b) ¿Imaynam kananchik Diospa tanteasqan punchawta suyaspanchik?

⁹ Kawsariramuspanmi Jesusqa hanaq pachapipas chaynataq kay Pachapipas tukuy atiyta chaskirqa (Mat. 28:18). Chaymi hinalla llamkachkan Taytanpa munaynin tanteasqan punchawpi rurakunanpaq. Jesusqa 1914 watakamam Taytanpa alleqninpi pacienciawan suyarqa, chay watapim ‘enemigonkunata saruchirqa’ (Sal. 110:1, 2; Heb. 10:12, 13). Jesusqa ñamá Satanaspa munaychakusqan mana allinkunataqa chinkachinqaña, chaykamam ichaqa pacienciakuspan allin ruraq runakunata ‘kawsachikuq yakukunaman pusachkan’ (Apoc. 7:17).

¹⁰ Jesuspa imayna rurasqankunam yachachiwanchik Jehová Diospa tanteasqan punchawta imayna qawanapaq. Jesusqa Taytanpa kamachisqanta rurananpaqmi haykapipas kusikuywan kasukuq, hinaspapas pacienciawanmi suyarqa Taytanpa tanteasqan punchaw chayamunanta. Mana allinkunapa puchukaynin punchaw chayamunankamaqa, llapallanchikmi munanchik mana hukmanyaspa pacienciayoq kayta, manam kikinchikpa piensasqanchikman hinachu imatapas rurananchik. Chaynaqa, ¿imaynatam pacienciayoq kayta atichwan?

11. a) ¿Imanasqataq iñiyniyoq hinaspa pacienciayoq kayqa ancha allin? b) ¿Imataq yanapawanchik iñiyninchikpi allin takyasqa kanapaq?

¹¹ Pantaq kaspanchikpas, ¿atichwanchu mana hukmanyaspa aguantayta? Arí, atichwanmi. Chayna kasqankutam qawachirqaku Jesus kay Pachaman manaraq hamuchkaptin ñawpaq tiempopi Diosmanta willakuqkuna hinaspa Diosman sonqo runakunapas. Paykunapa iñiyninkuwan pacienciankuqa hukllawasqa hinam karqa (leey Santiago 5:10, 11). Jehová Diospa nisqankunapi mana iñispankuqa, ¿yaqachu pacienciawan suyanmanku karqa Diospa promesankuna cumplikunanta? Wakinpiqa imapas sasachakuykunapim tarikurqaku, ichaqa chay sasachakuykunatam aguantarqaku Dios haykapipas yanapananmanta mana iskayrayaspanku (Heb. 11:13, 35-40). Kunanpas iñiyninchikqa allin takyasqam “iñichiwaqninchik hinaspa qespichiwaqninchik” Jesus yanapawasqanchikrayku (Heb. 12:2). Arí, willakuykuna cumplisqanmi  hinaspa Diospa munayninmanta willakusqanmi sutillata qawachiwanchik mana iskayrayaspa Jehová Diospi hapipakunapaq.

12. ¿Imakunatam rurananchik iñiyninchik allin takyasqa kananpaq?

¹² ¿Imakunatam rurachwan iñiyninchik allin takyasqa kananpaq hinaspa pacienciayoq kanapaqpas? Chaypaqqa Diospa niwasqanchikkunatam kasukunanchik. Yuyaymanananchikmi Diospa munaychakusqanta puntapi imanasqa churananchikmanta. ¿Atichwanchu Mateo 6:33 nisqanta astawan kasukunapaq kallpanchakuyta? Chayta ruranapaqqa astawanchá tiempochakuna kanqa Diosmanta willakunapaq. Amataq qonqasunchu Diosta servinapaq kallpanchakuptinchik yanapawasqanchikta. Ichapas yanapawarqanchik Bibliamanta pitapas yachachinanchikpaq otaq qowarqanchik ‘runakunapa mana entiendey atinan hawkayayta’ (leey Filipenses 4:7). Chaynaqa, Diospa kamachiwasqanchik allinninchikpaq kasqanpi astawan reparaspaqa, pacienciayoq kaytam astawan chaninchasun (Sal. 34:8).

13. ¿Imatam rurachwan iñiyniyoq hinaspa pacienciayoq kanapaq? Huk rikchanachiywan willamuy.

¹³ Chayqa tupanmi tarpuywan hinaspa cosechaywan. Tarpusqan allin qespiptinqa, tarpuqqa manam iskayrayanchu kaqmanta tarpunanpaqqa. Payqa yachantaqmi mana hukmanyaspan cosecha tiempokama pacienciawan suyananta. Chaymantapas cosecha allin qespinanta yachaspanqa, yaqapaschá ñawpaq tarpusqanmantaqa astawanraq tarpunqa. Yaqa chaynam pasan Diospa consejonkunawanpas. Sapa kuti yachaptinchik, kasukuptinchik hinaspa yanapawaptinchikmi, Jehová Diospi hapipakusqanchikqa astawan wiñan, manataqmi llumpaytaqa sasachakunchikchu Diospa bendicionninkunata chaskinapaq suyaytapas (leey Santiago 5:7, 8).

14, 15. ¿Imaynatam qawananchik hukkunapa ñakarisqankuta?

¹⁴ Pacienciayoq kanapaqqa, Jehová Diospa  qawasqanman hinam qawananchik kay Pachapi kaqkunata hinaspa imayna tarikusqanchiktapas. Payqa runakunapa ñakarisqanta waranqantin watakuna qawaspanmi llakikurqa, ichaqa manam chaywanqa atipachikurqachu. Mana imatapas rurananmantaqa, sapallan Churintam kachamurqa ‘Diablopa rurasqankunamanta libraykuwananchikpaq’ hinaspa Diablopa tukuy imapas rurasqanta allichananpaq (1 Juan 3:8). Chaymantaqa manañam imapas ñakariyqa kanqachu, Diospa allichasqanqa wiñaypaqmi kanqa. Chaynaqa, Satanaspa munaychakusqan mana allinkunata qawaspa hukmanyanamantaqa otaq chinkachisqaña kananta munanamantaqa, mana rikusqanchik kaqkunapi iñisun, chaykunaqa wiñaypaqmi. Jehová Diosqa tantearunñam kay Pachapi mana allinkunata haykapi chinkachinanpaq, chaytaqa ruranqa tanteasqan punchawpipunim (Is. 46:13; Nah. 1:9).

¹⁵ Kay tukupay punchawkunapiqa yaqapaschá llumpay sasachakuykunata atipananchik kanqa iñiyninchikpi. Pipas maqawaptinchik otaq familianchik ñakarisqanta qawaspanchikqa, ama piñakusunchu. Pantaq kasqanchikrayku sasachakuspanchikpas, kallpanchakusun Jehová Diospi hapipakunapaq hinaspa Mateo 26:39 (leey) nisqanpi Jesuspa ima rurasqanta qatipakunapaq.

16. ¿Imatam mana ruranachu kay tukupay tiempokunapiqa?

¹⁶ Diospa pacienciayoq kasqanta qatipakuyta munaspaqa, manam iskayrayachwanchu Diospa Palabranmantaqa. ¿Ima niytam kaywanqa munachkanchik? Puchukay punchaw kayllapiña kasqanmanta pipas iskayrayaspanqa, yaqapaschá imatapas rurananpaqraq tanteanman Jehová Diospa nisqankunaqa manam cumplikunraqchu nispan. Ichapas munanman kay pachapi ancha reqsisqa kayta hinaspa tukuy imayoq kayta Diospa munayninta puntapi churananmantaqa, otaq ancha educacionniyoq kaytapas maskanman aswan allin kawsakuyta piensaspan. Chaynata piensaspanqa mana iñiyniyoq kasqantam qawachichkanman. Yuyarisun Pablopa niwasqanchikta, payqa kallpanchawarqanchikmi ‘iñiywan hinaspa pacienciawan Diospa promesan chaskiqkunata’ qatipakunanchikpaq (Heb. 6:12). Munayninta rurananpaqqa, Diosqa manam unaytachu saqenqa kay Pachapi mana allinkuna kanantaqa (Hab. 2:3). Chaykamaqa kallpanchakusunyá Jehová Diosta tukuy sonqonchikwan servinapaq. Rikchan-rikchanlla kasun hinaspa ganaswan Diosmanta willakusun, chay rurayqa kusisqatam tarichiwasun kay sasallaña tiempokunapipas (Luc. 21:36).

17, 18. a) ¿Ima ruraytam atichwan pacienciayoq Dios kasqanrayku? b) ¿Imapim yanapawansunchik kunan pacienciayoq kasqanchikqa?

¹⁷ Unayña otaq qaynakunallaraq Jehová Diosta reqsispanchikpas, llapanchikmi munanchik Diosta wiñaypaq serviyta. Puchukay chayamunanpaq hayka tiemporaq faltaptinpas, pacienciayoq kasqanchikmi yanapawasun salvakunanchikkama aguantanapaq. Kunanmi Jehová Diosqa saqewachkanchik tanteasqankunapi tukuy sonqowan hapipakusqanchikta qawachinapaq, atikuptinqa sutinrayku ñakariytapas (1 Ped. 4:13, 14). Chaymantapas pacienciakuq kanapaqmi yachachiwachkanchik, chayqa ancha allinmi salvakunapaq (1 Ped. 5:10).

¹⁸ Jesusqa atiytam chaskirun hanaq pachapipas hinaspa kay Pachapipas, paymantaqa manam pipas karunchawachwanchu aswanqa kikillanchikmi (Juan 10:28, 29). Manam manchakunanchikchu hamuq tiempotaqa nitaq wañuytapas. Tukupaykama pacienciawan aguantaqkunam salvasqaqa kanqaku. Chaymi mana saqekunanchikchu kay Pachapi kaqkuna iñiyninchikta iskayrayachinantaqa. Iñiyninchikta kallpanchasun hinaspa allinta servichikusun Diospa paciencianta (Mat. 24:13; leey 2 Pedro 3:17, 18).