1. Eaa ta tetai aronga akarongo mou e akamanako ana?

KUA ui tetai tuaine akarongo mou tei akakoromaki i te au akaaoanga e manganui no te au raungauru mataiti e, “Ka kite ainei au i te openga i mua ake ka mate ei au?” E akamanako ana tetai pae kua roa te tavinianga ia Iehova i taua uianga ra. Te tapapa nei tatou i te tuatau me akaou te Atua i te au mea ravarai, te takoreanga i te au manamanata ta tatou e aro atu ana. (Apo. 21:5) I te mea e tumuanga tau to tatou kia irinaki e te vaitata maira te openga o te akatereanga o Satani, e mea ngata ia tatou kia tapapa marie no taua ra ra.

2. Eaa te au uianga no runga i te tu akakoromaki o te Atua ta tatou ka uriuri?

² Inara, te akaari maira te Pipiria e kia akakoromaki tatou. Mei te au tavini rai o te Atua i mua ana, ka kite tatou i ta te Atua i taputou mai me e akarongo ketaketa to tatou e me tapapa marie tatou i tona tuatau kia akatupuia taua au taputou ra. (E tatau ia Ebera 6:11, 12.) Kua akakoromaki ana a Iehova. Ka rauka iaia i te takore i te kino i tetai ua atu taime, inara te tiaki ra aia i te tuatau tau. (Roma 9:20-24) Eaa ra aia i akakoromaki ei? Akapeea ra a Iesu i riro ei ei akaraanga no te tu akakoromaki o te Atua? Akapeea tatou me puapingaia me akatupu tatou i te tu akakoromaki o te Atua? Ka riro te au pauanga ki teia au uianga i te tauturu ia tatou kia akatupu i te tu akakoromaki e te akarongo ketaketa, noatu te akara anga e te taroaroa ra a Iehova i te reira.

3, 4. (a) Eaa ra a Iehova i akaari mai ei i te tu akakoromaki te akatupu anga aia i tona akakoroanga no te enua nei? (e) Eaa ta Iehova i rave no te tu meameaau i Edene?

³ E tumuanga meitaki to Iehova i te akaari mai i te tu akakoromaki. Tika rai e tei iaia te mana teitei rava atu i te ao katoa i te au taime ravarai; inara, no te meameaau i Edene, kua anoanoia tetai au uianga kia pauia ei puapinga no te katoatoa i runga i te rangi e te enua nei. Kua akakoromaki ana a Iehova, te kiteanga e ka roa te tuatau e pau meitakiia ai taua au uianga ra. No te mea kua kite meitaki aia i te au angaanga e te au tu o te au tangata i te rangi e i te enua nei, e te rave ra aia i te au mea kia puapingaia tatou.​—Ebe. 4:13.

⁴ To Iehova akakoroanga no te uanga a Adamu raua ko Eva kia akaki i te enua. Te akavare anga a Satani ia Eva e oti kua akarongo kore a Adamu, kare rava te Atua i akangaropoina ana i tona akakoroanga. Kare aia i taitaia ana, kare i rave viviki ana i te au ikianga, me kore i riri ana e i akaruke ana i te au tangata. Inara, kua iki aia i tetai ravenga kia akatupu i tana i taputou mai no te au tangata e no te enua nei. (Isa. 55:11) Kia akatupuia tona akakoroanga e kia akatika i tona turanga ngateitei, kua akaari mai a Iehova i te tu maru e te tu akakoromaki, te tiaki katoa anga no tetai au tauatini mataiti kia akatupu meitakiia tetai au tuanga o tona akakoroanga.

5. Eaa te au akameitakianga ka tupu mai no to Iehova tu akakoromaki?

⁵ Tetai atu tumu i akakoromaki marie ei a Iehova, koia oki kia rauka i te maataanga o te au tangata te ora mutu kore. Teianei, te akapapa nei aia e kia ora mai te “aronga maata rava.” (Apo. 7:9, 14; 14:6) Te pati ra a Iehova i te au tangata na roto i ta tatou angaanga tutuanga kia apii no runga i tona Patireia e tona au turanga tuatua tika. E ko te “tuatua meitaki” o te Patireia te nuti meitaki rava atuia no te au tangata. (Mata. 24:14, NW) Te riro ra te au tangata ta Iehova i akavaitata atu kiaia ei tuanga no te putuputuanga i te ao katoa e ei au oa mou te inangaro ra i te mea tika. (Ioa. 6:44-47) E te rave ra to tatou Atua aroa i te au mea ravarai i te tauturu i te au tangata kia rauka mai tana akaperepereanga. Kua iki katoa aia mei roto i te au tangata i tetai au mema tau no tona kavamani i runga i te rangi. E ia ratou i runga i te rangi, ka tauturu mai teia aronga tiratiratu i te aronga akarongo kia rauka ia ratou te oraanga apa kore e te mutu kore. Taka ua ra e ia Iehova e tapapa marie maira, te angaanga ra aia i te akatupu i tana au taputou​—kia puapingaia tatou.

6. (a) Na roto i teea tu i akaari mai ei a Iehova i te tu akakoromaki i to Noa tuatau? (e) Akapeea a Iehova i te akaari anga i te tu akakoromaki i to tatou tuatau?

⁶ Kua akakoromaki a Iehova noatu kua akariri maataia aia, mei ta tatou rai i kite ana mei tana i rave no runga i te au tu kino i mua ake i te Vaipuke. Kua ki te enua i te tu tau kore e te kino, e kua ‘ongoongo rava akera to Iehova ngakau’ no te tu viivii o te au tangata. (Gene. 6:2-8) Kare aia i akatika ana i taua turanga ra kia tupu ua atu, no reira kua tuku mai aia i tetai vaipuke ei takore i te aronga akarongo kore. I te ‘Atua e akakoromaki ra, te tatari anga i to Noa tuatau,’ kua akateateamamao a Iehova i te akaora ia Noa e tona pamiri. (1 Pete. 3:20) Tae anga te tuatau tau, kua akakite a Iehova kia Noa i tana ka rave e kua akaue iaia kia maani i tetai araka. (Gene. 6:14-22) Pera katoa, ‘e tangata ako i te tuatua-tika’ a Noa, e kua akakite aia ki tona au tangata tupu i te takoreanga e aere maira. (2 Pete. 2:5) Kua akakite mai a Iesu e aiteite rai to tatou tuatau ki to Noa tuatau. Kua iki takere ana a Iehova aea aia e takore ei i teia akatereanga kino. Kare tetai ua atu tangata i kite e aea “te reira rā e te reira ora” e tae mai ei. (Mata. 24:36) I teia tuatau, kua oronga mai te Atua i tetai angaanga kia tatou kia akamatakite e kia akakite ki te au tangata e akapeea ratou e akaoraia ai.

7. E marie ainei a Iehova i te akatupu i tana au taputou? Akamarama mai.

⁷ Taka ua ra e, kare te aiteanga o to Iehova tu akakoromaki e te tiaki ra aia kia pou tetai tuatau. Kare, kare tatou e manako tarevake i tona tu akakoromaki ki te tu manako kore e te tu inangaro kore! Inara, e mea mama ua ia tatou i te akamanako i te reira ia tatou e pakari atura me kore e mamae ra i roto i teia akatereanga kino. Penei ka taitaia tatou me kore ka manako e e marie te Atua i te akatupu i tana taputou. (Ebe. 10:36) Auraka e ngaropoina ia tatou e e au tumuanga meitaki tona kia akakoromaki e te rave ra aia i teia kia puapingaia tona au tavini tiratiratu. (2 Pete. 2:3; 3:9) Akamanako katoa e akapeea a Iesu te akaari anga i te tu akakoromaki o te Atua.

8. I raro ake i teea au turanga i akaari ei a Iesu i te tu akakoromaki?

⁸ Te rave ra a Iesu i te anoano o te Atua e kua rave aia i te reira no tetai au tauatini mataiti. Te meameaau anga a Satani, kua iki a Iehova e kia aere mai tana Tamaiti anau tai ki te enua nei ei Mesia. E akamanako ana i te aiteanga o te reira kia Iesu​—te tiaki marie anga no tetai au tauatini mataiti kia tae mai taua tuatau ra. (E tatau ia Galatia 4:4.) Kare aia i noo ua ana i te tiaki no taua au tuatau ra; mari ra, kua rave aia i te angaanga ta tona Metua i akaue mai kiaia. Tona aere mai anga ki te enua nei, kua kite aia e ka akatupu a Satani i tona mate, mei tei taputouia mai. (Gene. 3:15; Mata. 16:21) Kua ariki puareinga aia i te rave i to te Atua anoano, noatu e ka tamamae kinoia aia. E tu tiratiratu maata tikai tona. Kare aia i manako ana iaia uaorai e tona turanga, e no reira ka puapingaia tatou no tana i rave.​—Ebe. 5:8, 9.

9, 10. (a) Eaa ta Iesu i rave ana iaia e tiaki marie ra no ta Iehova ka akatupu? (e) Akapeea tatou me akamanako i ta Iehova akanoo anga i te tuatau?

⁹ Muri ake i tona akatuakaouanga, kua orongaia kia Iesu te mana i te rangi e i te enua nei. (Mata. 28:18) E taangaanga ana aia i taua mana ra i te akatupu i to Iehova akakoroanga kia tau ki te tuatau ta te Atua i akanoo. Kua tiaki marie a Iesu i te rima katau o te Atua e tae ua atu ki te mataiti 1914 e akariroia ai tona au enemi ei pange vaevae nona. (Sala. 110:1, 2; Ebe. 10:12, 13) Kare e roa atu ana ka takore aia i te akatereanga o Satani. Ia Iesu e tiaki ra, te tauturu ra aia i te au tangata ma te akakoromaki e te arataki anga ia ratou ki te “vai ora.”​—Apo. 7:17.

¹⁰ Te kite ra ainei koe i roto i te akaraanga o Iesu e akapeea koe me akamanako i ta Iehova akanoo anga i te tuatau? Te inangaro ra a Iesu i te rave i ta tona Metua i pati mai; inara te inangaro ra aia i te tiaki i to te Atua tuatau. Ia tatou e tiaki ra i te openga o te akatereanga kino o Satani, ka anoanoia tatou katoatoa kia akaari i te tu akakoromaki o te Atua, na te tiaki anga i ta te Atua aratakianga e kia kore e tuku i te au mea kia akataitaia ia tatou. Eaa ta tatou ka rave kia rauka mai taua tu akakoromaki ra o te Atua?

11. (a) Akapeea te akarongo te rotai anga ki te tu akakoromaki? (e) Eaa ra te tumuanga tau kia ketaketa to tatou akarongo?

¹¹ Mua ake ka aere mai ei a Iesu ki te enua nei, kua akanoo te au peroveta e tetai au tavini akarongo mou i tetai akaraanga e akapeea te au tangata apa me akakoromaki marie. Te rotai meitaki ra to ratou akarongo ki to ratou tu akakoromaki. (E tatau ia Iakobo 5:10, 11.) Me kare ratou e irinaki tikai ana i ta Iehova i akakite kia ratou​—e kare o ratou akarongo​—ka tapapa marie ainei ratou kia akatupuia tana au taputou? E aro putuputu atu ana ratou i te au timataanga kino me kore te au timataanga ngata no te akarongo, e kua papu ia ratou e ka rave te Atua i tana i taputou mai. (Ebe. 11:13, 35-40) E tumuanga tau kia ketaketa to tatou akarongo, no te mea kua riro a Iesu i teianei ei ‘Akaoti meitaki i to tatou akarongo.’ (Ebe. 12:2) Kua akatupu aia i te au totou e kua akakite mai i to te Atua akakoroanga na roto i te tu te ka oronga mai kia tatou i te tumuanga tau no te akarongo.

12. Eaa ta tatou ka rave ei akaketaketa i to tatou akarongo?

¹² Eaa te au takainga meitaki ta tatou ka rave kia akaketaketa i to tatou akarongo e to tatou tu akakoromaki? Kia taangaanga i te akoanga a te Atua. Ei akatauanga, e akamanako i te au tumu i tuku ei koe i te Patireia na mua i roto i toou oraanga. Ka rauka ainei ia koe i te taangaanga maata i te akoanga i roto ia Mataio 6:33? Penei ka anoanoia koe kia akapou i toou taime i roto i te angaanga orometua me kore i te akatanotanoanga i tetai au turanga o toou oraanga. Auraka e ngaropoina e kua akameitaki mai a Iehova i taau au tautaanga e tae ua mai ki teia ra. Penei kua tauturu mai ana aia ia koe kia rave i tetai apii Pipiria ou me kore kua tauturu mai ia koe kia akatupu i “te au o te Atua, ko tei maata ua atu i te kite tangata.” (E tatau ia Philipi 4:7.) Ia koe e akamanako ra i te au mea puapinga tei rauka mai ia koe mei te aru anga i te au ikuikuanga a Iehova, ka maata atu toou ariki rekareka no te tu akakoromaki.​—Sala. 34:8.

13. Akapeea tatou me akatutu i te akatupuanga i te akarongo e te tu akakoromaki?

¹³ Ka riro tetai akatutuanga ei tauturu ia tatou kia marama e akapeea to tatou akarongo me akatupu i te tu akakoromaki. Ka tanu, ka akatupu, e ka kokoti te tangata tanu i tana au kai. I te au taime ravarai me kokoti maata te tangata tanu i tana au kai, ka maata atu tona irinaki no te tanu akaou anga i te au kai. E tika, ka tiaki marie ua aia no te tuatau kokoti anga, inara kare te reira e tapu iaia i te tanu i te au kai, penei te tanu anga i te au kai ki runga i te au enua e manganui i to te tuatau i topa. Kua irinaki aia e ka kokoti aia i tana au kai i tanu. Pera katoa, me aru putuputu tatou i teia ravenga no te apiianga i ta Iehova akoanga, te aru anga i te reira, e te puapinga anga mei te reira, ka maata atu to tatou irinaki ia Iehova. Ka tupu atu to tatou akarongo, e ka mama ua ia tatou i te tiaki i te au akameitakianga kua kite tatou e ka tupu mai.​—E tatau ia Iakobo 5:7, 8.

14, 15. Eaa to tatou manako no runga i te aronga e mamae ra?

¹⁴ Tetai mataara ke kia akatupu i te tu akakoromaki koia oki na te akamanako anga no runga i teianei ao e to tatou uaorai au turanga. Kia akamanako i te au mea mei ta Iehova rai e akamanako ra. Ei akaraanga, akamanako ana i tona manako no runga i te mamae kino o te au tangata. Kua roa to Iehova kite anga i te tangata i te mamae anga; inara, kare te reira i akataitaia ana iaia e kare i tapu ana iaia kia rave i te au mea meitaki. Kua tono mai aia i tana Tamaiti anau tai “kia akakore aia i te angaanga a te diabolo ra” e kia akakore atu i te au kino ta Satani i tuku mai ki runga i te au tangata. (1 Ioa. 3:8) Te ka tupu mai, kare e roa atu ka takore atu te Atua i te mamae e tuatau ua atu. Pera katoa, eiaa tatou e taitaia maata no te au kino o ta Satani tutara anga me kore kia manako rapurapu e aea te reira e ope ei, mari ra kia irinaki tatou i te au mea akara koreia te ka vai e tuatau ua atu. Kua kite a Iehova e aea aia e takore ei i te kino, e ka rave aia i te reira i te tuatau i akanoo ei aia.​—Isa. 46:13; Nahu. 1:9.

¹⁵ I roto i teia au tuatau openga o teia akatereanga, penei ka aro atu tatou i te au akaaoanga te ka timata i to tatou akarongo. Eiaa tatou e riri atu me takinoia mai tatou me kore me tamamaeia to tatou au akaperepere, mari ra kia irinaki pu tikai tatou ia Iehova. E aronga apa tatou, no reira kare i te mea mama ua i te rave i te reira. Akara ana i ta Iesu i rave mei tei rekotiia i roto ia Mataio 26:39.​—E tatau.

16. Eaa ta tatou ka kopae i te rave i te toenga o te tuatau e vai nei?

¹⁶ Tetai mea e tamanamanata ana i to tatou tu akakoromaki mei to te Atua rai, te tiaki anga e eaa te ka tupu mai. Eaa te aiteanga o te reira? Ko tetai tangata kare e irinaki ana e te vaitata maira te openga, penei ka rave aia i tana uaorai au akanoonooanga e ua ake kare e tupu mai te au mea ta Iehova i taputou mai. Penei ka manako aia e, ‘Ka tiaki au e me e tika rai ta Iehova i tuatua mai.’ Penei ka tauta aia kia rongonui tona ingoa i roto i teianei ao, kia kimi i te oraanga tinamou i te pae moni e kare e tuku i te Patireia o te Atua na mua, me kore ka tuku aia i tona irinaki ki roto i tetai apii teitei kia rauka mai tetai oraanga meitaki i teianei. Inara, kare ainei te reira e akapapu maira e kare e maata ana tona akarongo? Akamaara e kua raurau mai a Paulo e kia aru tatou i te aronga akarongo mou ta Iehova i oronga mai i te au taputou anga na roto “i te akarongo e te akakoromaki.” (Ebe. 6:12) Kua iki takere a Iehova i te takore i teia ao kino, e kare aia e taroaroa. (Haba. 2:3) No reira, ka kopae tatou i te manako e te rava ua nei ta tatou e rave ra no te tavini anga ia Iehova. Inara, kia vai ara ua tatou e kia angaanga pakari i te tutuanga i te tuatua meitaki no te mea ko te tumu ia e rekareka ai tatou i teia tuatau.​—Luka 21:36.

17, 18. (a) Eaa to tatou tikaanga ngateitei i teianei no te tu akakoromaki? (e) Eaa te au akameitakianga ka rauka ia tatou me aru tatou i te tu akakoromaki i teianei?

¹⁷ Me kua tavini ana tatou i te Atua no tetai au marama ua me kore no te au mataiti, ka inangaro tatou kia tavini iaia e tuatau ua atu. Ka tauturu mai te tu akakoromaki ia tatou kia rauka te ora, noatu eaa te toenga o te tuatau e vai nei no teia akatereanga. Te oronga maira a Iehova i te atianga kia tatou kia akapapu mai e ka irinaki pu tikai tatou i tana au ikianga, e ka vai tiratiratu tatou kiaia noatu ka tamamae ia tatou no tona ingoa. (1 Pete. 4:13, 14) Te tereni katoa maira a Iehova ia tatou kia rauka ia tatou te tu akakoromaki te ka anoanoia no te ora.​—1 Pete. 5:10.

¹⁸ Kua rauka ia Iesu te mana i runga i te rangi e i te enua nei, e kare e apinga e rauka i te tapu iaia mei te paruru anga ia koe me vai akarongo mou koe. (Ioa. 10:28, 29) Kare tatou e anoanoia kia mataku no runga i te tuatau ki mua pera katoa i te mate. Ka akaoraia te aronga tei akakoromaki e tae ua atu ki te openga. No reira, kia akapapu tatou e kare tatou e akatika i teia ao kia akavare mai ia tatou e kia akamutu tatou i te irinaki kia Iehova. Mari ra, ka tauta tatou i te akaketaketa i to tatou akarongo e kia taangaanga meitaki i te tuatau o to te Atua tu akakoromaki.​—Mata. 24:13; e tatau ia 2 Petero 3:17, 18.