Faata‘ita‘i i le Onosa‘i o Ieova ma Iesu
Faataʻitaʻi i le Onosaʻi o Ieova ma Iesu
“Ia manatunatu foʻi i le onosaʻi o lo tatou Alii ua maua ai le faaolataga.”—2 PETE. 3:15.
O LE Ā LAU TALI?
Ua faapefea ona faaalia e Ieova le onosaʻi?
Aiseā na onosaʻi ai Iesu mo se taimi umi?
E faapefea ona tatou faataʻitaʻi i le onosaʻi o Ieova?
1. O le ā le faanaunauga o nisi ua loa o auauna faamaoni iā Ieova?
SA MOOMOO se tuafafine ua loa ona auauna ma le faamaoni iā Ieova e ui i faigatā, e fia vaai i le iʻuga o lenei faiga o mea a o leʻi maliu. O le faanaunauga foʻi lenā o le toʻatele ua loa tausaga o auauna iā Ieova. E tatou te moomoo i le taimi o le a faafouina ai e Ieova mea uma, ma aveesea mea o loo tatou mafatia ai. (Faaa. 21:5) E ui e anoanoaʻi māfuaaga e tatou te talitonu ai ua i faitotoʻa le iʻuga, ae e iai lava taimi e faigatā ai ona tatou onosaia le oo mai o lenā aso.
2. O ā fesili o le a tatou iloiloina?
2 Ua faalaeiauina e le Tusi Paia i tatou ina ia faaalia le onosaʻi. E pei o auauna a Ieova anamua, e tatou te maua faamanuiaga a Ieova i le lumanaʻi pe a faatuatua, ma faatalitali ma le onosaʻi i lana taimi atofaina. (Faitau le Eperu 6:11, 12.) Ua faaalia foʻi e Ieova le onosaʻi, auā e mafai ona ia faaoo mai le iʻuga o lenei faiga o mea i so o se taimi. Peitaʻi, ua ia faatali mo lana taimi atofaina. (Roma 9:20-24) Aiseā ua onosaʻi ai pea Ieova? O le ā e tatou te aʻoaʻoina mai i le faataʻitaʻi o Iesu i le onosaʻi o lona Tamā? O ā aogā e maua mai le faaalia o le onosaʻi e pei o Ieova? O le malamalama i tali o na fesili, e faamalosia ai lo tatou faatuatua, ma atiaʻe ai le onosaʻi, e ui e iai taimi e tatou te manatu ai ua faatuai mai Ieova.
AISEĀ UA ONOSAʻI AI IEOVA?
3, 4. (a) Aiseā ua onosaʻi ai Ieova e tusa ma lana fuafuaga mo le lalolagi? (e) Na faapefea ona tali Ieova i le fouvalega i Etena?
3 E pule Ieova i le aoao o mea, ma e mafai ona ia faaiʻuina mea leaga uma i so o se taimi. Peitaʻi, e iai māfuaaga lelei ua onosaʻi ai Ieova. I le fouvalega i Etena, na lāgā ai se finauga e aafia ai olaga o auauna a Ieova i le lagi ma le lalolagi. E onosaʻi Ieova ona ua ia silafia lelei, e umi se taimi e manaʻomia e foʻia ai lea finauga. E silafia lelei e Ieova faanaunauga ma gaoioiga a i latou i le lagi ma le lalolagi, ma e gaoioi foʻi o ia mo lo tatou lelei.—Epe. 4:13.
4 O le fuafuaga a Ieova i le amataga ia faatumulia le lalolagi i fanau a Atamu ma Eva. O lea, e ui ina faasesēina e Satani Eva ma lē usiusitaʻi ai Atamu, ae e leʻi suia ai le fuafuaga a le Atua. E leʻi fiugofie Ieova ma faia ai se gaoioiga e aunoa ma le muaʻi fuafuaina. Ae na ia amata ona faatulaga se auala e mafai ai ona faataunuu lana fuafuaga mo tagata ma le lalolagi. (Isa. 55:11) Ina ia faataunuu lana fuafuaga, ma faamaonia le tonu o lana Pule Silisili ese, na pulea ai e Ieova o ia lava ma onosaʻi mo le faitau afe o tausaga, a o galueaʻiina ma faataunuuina lana fuafuaga.
5. O le ā le faamanuiaga ua tatou maua ona o le onosaʻi o Ieova?
5 O le isi māfuaaga ua umi ai ona onosaʻi Ieova, ina ia mafai ai e le toʻatele o tagata ona maua le ola e faavavau. Ua faia e Ieova ana sauniuniga i le taimi lenei e faasaoina ai le “motu o tagata e toʻatele.” (Faaa. 7:9, 14; 14:6) Ua faaaogā e Ieova le galuega talaʻi, e valaaulia ai tagata ina ia aʻoaʻoina i latou e faatatau i le Malo ma ana tapulaa amiotonu. O le “tala lelei” o le Malo o se feʻau e sili ona lelei mo tagata. (Mata. 24:14) Ua avea i latou ua tosina mai e Ieova ma vaega o lana faalapotopotoga. (Ioa. 6:44-47) Ua fesoasoani Ieova i tagata ina ia mafai ona latou maua lona finagalo malie, ma ua ia filifilia foʻi nisi e faia aʻe ai lana pulega i le lagi. Pe a maua o latou faaeaga i le lagi, ona latou fesoasoani lea i tagata ina ia maua le tulaga lelei atoatoa ma le ola e faavavau. E ui ua onosaʻi Ieova mo se taimi umi, ae o loo ia galue pea mo le faataunuuina o lana fuafuaga.
6. (a) O le ā le auala na faaalia ai e Ieova lona onosaʻi i aso o Noa? (e) Ua faapefea ona faaalia e Ieova le onosaʻi i o tatou aso?
6 Na onosaʻi mai pea Ieova e ui ina faatigā e tagata lona finagalo. O se faataʻitaʻiga, o le auala na ia feutagaʻi ai ma tagata i le taimi a o leʻi oo mai le Lolo. Sa tumu le lalolagi i faiga lē mamā ma faiga sauā, ma na ʻtigā ai le finagalo’ o Ieova. (Kene. 6:2-8) E lē faavavau ona faapalepale Ieova, o lea na ia fuafua ai loa e faaumatia tagata lē usiusitaʻi e ala i se lolo. ʻA o faatalitali ma le onosaʻi le Atua,’ na ia faia sauniuniga e faasaoina ai Noa ma lona aiga. (1 Pete. 3:20) Na faailoa atu e Ieova iā Noa le lolo ma le faatonuga e fausiaina le vaa i Lana taimi atofaina. (Kene. 6:14-22) Na avea Noa “o lē e talaʻi le amiotonu,” e ala i lona lapataʻia o ona tuaoi e faatatau i le faaumatiaga na faaloloʻi ane. (2 Pete. 2:5) Na faatusatusa e Iesu o tatou taimi i aso o Noa. Ua iai le taimi atofa a Ieova e faaoo mai ai le iʻuga o lenei faiga o mea, peitaʻi e leai se tagata e iloa le ʻaso ma le itula’ e oo mai ai. (Mata. 24:36) Ua tuuina mai e Ieova iā i tatou le galuega e lapataʻia ai tagata, ma faailoa atu le auala e faasaoina ai i latou.
7. Pe ua faatuai Ieova i le faataunuuina o lana fuafuaga? Faamatala.
7 Atonu e avea le umi o tatou faatali i le iʻuga ma mafatia i lenei faiga o mea, ma māfuaaga e tatou te lotovaivai ma manatu ai ua faatuai mai Ieova. (Epe. 10:36) Peitaʻi, e lē uiga atu le onosaʻi o Ieova i le tau ina nofonofo ma faatalitali, ma e lē tatau ona tatou manatu e lē o ano pe e lē o manatu mamafa mai o ia. Aua neʻi galo, e iai māfuaaga lelei ua onosaʻi mai ai Ieova, ma e iai aogā o lona onosaʻi. (2 Pete. 2:3; 3:9) O lea, seʻi o tatou iloilo le faaaʻoaʻoga a Iesu i le faaalia o le onosaʻi.
IESU—FAAAʻOAʻOGA LELEI O LE ONOSAʻI
8. O ā tulaga na faaalia ai e Iesu le onosaʻi?
8 Na fiafia Iesu e faia le finagalo o lona Tamā mo le faitau afe o tausaga. Ina ua fouvale Satani, ona filifilia lea e Ieova lona Alo e afio mai i le lalolagi e avea ma Mesia. Na onosaʻi Iesu mo le faitau afe o tausaga i le lagi e faatali le taimi e afio mai ai. (Faitau le Kalatia 4:4.) E leʻi tau ina nofonofo Iesu ma faatalitali le taimi e afio mai ai. Nai lo o lea, na ia faatinoina le tele o galuega na tuuina atu e lona Tamā iā te ia. Na malamalama lelei foʻi Iesu, o le a faapogaia e Satani lona maliu i le taimi e afio mai ai i le lalolagi. (Kene. 3:15; Mata. 16:21) Na onosaia e Iesu le maliu tigā ona sa ia silafia, e tatau ona faataunuu le finagalo o lona Tamā. E leʻi faatāua e Iesu o ia lava, e ui o ia o le Alo o le Atua ae sa ia lotomaulalo ma onosaia mafatiaga. O lea, e tatau ona tatou faataʻitaʻi i le onosaʻi ma le faamaoni o Iesu.—Epe. 5:8, 9.
9, 10. (a) O le ā o loo faia e Iesu a o faatalitali i le taimi atofaina a Ieova? (e) E faapefea ona tatou faataʻitaʻi i le faaaʻoaʻoga a Iesu?
9 Na maua e Iesu le pule uma i le lagi ma le lalolagi ina ua mavae lona toetū. (Mata. 28:18) Ona ia faaaogā lea o lenā pule e faataunuu ai le finagalo o lona Tamā i lana taimi atofaina. Na faatali ma le onosaʻi Iesu i le lagi, seʻia oo ina fai ona fili ma mea e tū ai ona aao i le 1914. (Sala. 110:1, 2; Epe. 10:12, 13) Ua toe o se aga ona aumaia lea e Iesu le iʻuga o lenei faiga o mea a Satani. A o ia faatali mo lenā taimi, o loo ia galue ma le onosaʻi e fesoasoani i tagata e maua le finagalo malie o Ieova, ma taʻitaʻia i latou i “vai o le ola.”—Faaa. 7:17.
10 Pe mafai ona e faataʻitaʻi i le faaaʻoaʻoga a Iesu i le auala na ia galue ai e tusa ma le taimi atofaina a Ieova? Sa naunau Iesu e fai so o se mea na finagalo i ai lona Tamā, peitaʻi, na ia lotomalie e faatali mo Lana taimi atofaina. A o tatou tatalia le iʻuga o lenei faiga o mea a Satani, e tatau ona tatou onosaʻi, ma gauaʻi iā Ieova. E lē tatau foʻi ona tatou faavaivai pe a siliga tali i seu a tatou taumafaiga i le auaunaga. O lea, o le ā e fesoasoani iā i tatou e atiaʻe ai le onosaʻi?
FAATAʻITAʻI I LE ONOSAʻI O LE ATUA
11. (a) E faapefea ona fesootaʻi le faatuatua ma le onosaʻi? (e) O ā māfuaaga ua tatau ai ona malosi lo tatou faatuatua?
11 A o leʻi afio mai Iesu i le lalolagi, na faataatia e perofeta ma isi auauna faamaoni se faaaʻoaʻoga, i le auala e mafai ai e tagata lē lelei atoatoa ona tumau i le onosaʻi. Sa mafai ona latou onosaʻi ona sa latou faaalia le faatuatua. (Faitau le Iakopo 5:10, 11.) O le faatuatua i folafolaga a Ieova, na mafai ai ona latou faatali ma le onosaʻi i le faataunuuga o na folafolaga. O lenā foʻi faatuatua, sa mafai ai ona latou tutumau i faigatā ma tofotofoga. (Epe. 11:13, 35-40) Ua anoanoaʻi faamaoniga e tatau ona faamalosia ai lo tatou faatuatua, auā ua avea Iesu ma “Lē e faaatoatoaina lo tatou faatuatua.” (Epe. 12:2) Ua faataunuuina e Iesu le tele o valoaga, ma ua ia fesoasoani iā i tatou e malamalama atili i fuafuaga a le Atua.
12. E faapefea ona faamalosia lo tatou faatuatua?
12 E fesoasoani le faatuatua i le atiaʻeina o le onosaʻi. O lea, e mafai ona faamalosia le faatuatua, e ala i le faatatauina o fautuaga o le Tusi Paia. O se faataʻitaʻiga, ia mafaufau i le māfuaaga e tatou te faamuamua ai le Malo i o tatou olaga. Pe e mafai ona faaleleia atili le auala e tatou te faatatauina ai le fautuaga o loo i le Mataio 6:33? Atonu e manaʻomia ona faateleina le sao i le faiva, ma faafaigofie le auala e tatou te ola ai. Ia manatunatu i faamanuiaga a Ieova i la tatou auaunaga. O se faataʻitaʻiga, atonu na fesoasoani Ieova iā i tatou e amata se suʻesuʻega faale-Tusi Paia, pe maua foʻi ʻle filemu mai iā te ia.’ (Faitau le Filipi 4:7.) O le uaʻi atu i faamanuiaga a Ieova, e fesoasoani iā i tatou e onosaʻi ai.—Sala. 34:8.
13. O le ā le fesootaʻiga o le faatuatua ma le onosaʻi? Ia faataʻitaʻi.
13 E fesoasoani le faataʻitaʻiga a se faifaatoʻaga iā i tatou, e malamalama ai i le auala e saosaolaumea ai le faatuatua, i le faatupuina o le onosaʻi. E masani le faifaatoʻaga i le galue, totō, ma le taimi e selesele ai. O le fua tele mai o le faatoʻaga, o le faatupuina foʻi lenā o le naunau o le faifaatoʻaga e fai lana atinaʻe. Ona ua ia mautinoa o le a fua mai, o le a ia naunau ai e totō le faatoʻaga, e ui e umi le taimi o le a faatali ai mo le seleselega. I se tulaga talitutusa, o iʻuga lelei o le aʻoaʻoina ma faatatauina o taʻiala a Ieova, e faatupuina ai lo tatou faatuatua ma le maufaatuatuaina o ia. O le a faigofie ai ona tatou faaalia le onosaʻi, ma faatali i faamanuiaga a Ieova.—Faitau le Iakopo 5:7, 8.
14, 15. O le ā la tatou vaaiga i mafatiaga o tagata?
14 O se tasi o auala e atiaʻe ai le onosaʻi, o le vaai lea i le tulaga o mea e pei ona silasila i ai Ieova. O se faataʻitaʻiga, seʻi mafaufau i le silafaga a Ieova e faatatau i mafatiaga o tagata. Ua umi se taimi o silasila Ieova i mafatiaga o tagata ma tigā ai lona finagalo. E ui i lea, e leʻi taofia ai o ia mai le faia o mea lelei mo le fanau a tagata. Na ia auina mai lona Alo e ʻfaalēaogāina galuega a le Tiapolo,’ ma aveesea mafatiaga uma na ia faapogaia. (1 Ioa. 3:8) Ua toe o se aga ona faaiʻu lea e Ieova o mafatiaga uma. O lea, ia aua lava neʻi faatagaina lenei faiga o mea e faavaivaia lo tatou faatuatua. Ia faatuatuaina folafolaga a Ieova ma aua le manatu ua tuai ona ia faalaa mai. Ua iai lana taimi atofaina e aumaia ai le iʻuga o lenei faiga leaga o mea.—Isa. 46:13; Nau. 1:9.
15 E tofotofoina lo tatou faatuatua a o tatou ola ma soifua i le taufaaiʻuiʻuga o lenei faiga o mea. E iai taimi e tatou te afātia ai ma ē e pele iā i tatou i mafatiaga. E lē tatau ona tatou feita ai, ae ia faatuatua atoatoa iā Ieova, e ui e lē faigofie ona o lo tatou tulaga lē lelei atoatoa. O lea, ia manatua le faanaunauga sa iā Iesu o loo i le Mataio 26:39.—Faitau.
16. O le ā e tatau ona ʻalofia, a o tatou faatali i le iʻuga?
16 E lē fesoasoani le iai o se vaaiga sesē e faatatau i le lata mai o le iʻuga, i le atiaʻeina o le onosaʻi. O le ā le uiga o lenā manatu? Atonu o le a fai e se tasi ana lava fuafuaga, ona e manatu neʻi teʻi ua lē oo mai le aso o Ieova. O le a ia taumafai e saʻilia le ʻoa nai lo o le faamuamua o le Malo i lona olaga, po o le saʻilia foʻi o aʻoaʻoga maualuluga mo se lumanaʻi manuia. O le faia faapea, e atagia mai ai le itiiti o le faatuatua. Ia manatua le faalaeiauga a Paulo, ina ia faataʻitaʻi iā i latou na mauaina folafolaga mai iā Ieova, ona o lo latou “faatuatua ma le onosaʻi.” (Epe. 6:12) Ua māeʻa ona faatulaga e Ieova le taimi e faaumatia ai lenei faiga o mea, ma e lē faatuai mai. (Sapa. 2:3) I le taimi lenei seʻia oo i le iʻuga, e lē tatau ona tatou faia le auaunaga iā Ieova o se mea e tau ina fai. Nai lo o lea, e tatau ona tatou mataala ma filigā i le galuega talaʻi, o le faia faapea, e maua ai le faamalieina i le taimi lenei.—Luka 21:36.
FAAMANUIAGA O LE ONOSAʻI
17, 18. (a) O le ā le avanoa ua tatou maua a o tatou faatali ma le onosaʻi? (e) O ā faamanuiaga o le tumau ma le onosaʻi?
17 E tatou te faanaunau e auauna iā Ieova seʻia oo i le faavavau. O le onosaʻi o le a tatou tumau ai seʻia oo ina maua le faaolataga, e tusa po o le ā le umi o loo totoe o lenei faiga o mea. Ua tuu mai e Ieova iā i tatou le avanoa e faamaonia ai lo tatou faatuatuaina o ana faaiʻuga, ma faamaoni pea e ui i faigatā. (1 Pete. 4:13, 14) Ua aʻoaʻoina i tatou e Ieova ina ia tumau ma le faamaoni seʻia oo i le iʻuga ma faasaoina ai.—1 Pete. 5:10.
18 Ua maua e Iesu le pule uma i le lagi ma le lalolagi, ma e leai se mea e mafai ona taofia o ia mai le puipuia o oe pe a e faamaoni pea. (Ioa. 10:28, 29) E lē tatau ona tatou fefefe i se mea e oo lava i le oti, ma e faasaoina i latou e tutumau faamaoni. O lea, e lē tatau ona faasesēina i tatou i mafaufauga o lenei lalolagi, ma taofia ai i tatou mai le faatuatuaina o Ieova. Seʻi o tatou maumauaʻi nei e faamalosia lo tatou faatuatua ma faaaogā tatau le taimi, a o onosaʻi mai pea Ieova.—Mata. 24:13; faitau le 2 Peteru 3:17, 18.
[Fesili mo le Suʻesuʻega]
[Ata i le itulau 21]
E fesoasoani le onosaʻi iā i tatou e faamuamua ai manaʻoga o le Malo ma maua ai faamanuiaga
