1. San son sma di dini Yehovah furu yari langa kaba, e aksi densrefi?

WAN sisa di dini Yehovah furu yari langa aladi a kisi furu tesi, aksi wan leisi: „Mi o si a kaba fosi mi dede?” Son sma di dini Yehovah bun langa kaba aksi densrefi a srefi sani disi. Wi e angri fu si a dei te Gado o puru ala problema di wi abi now, so taki ala sani kon nyun (Openb. 21:5). Aladi furu sani e sori taki a kaba fu a grontapu fu Satan de krosibei, toku a kan muilek fu wakti nanga pasensi teleki a dei kon.

2. Sortu aksi di abi fu du nanga pasensi wi o luku?

² Ma toku Bijbel e sori taki wi musu abi pasensi. Neleki den owruten futuboi fu Gado, wi o kisi san Gado pramisi wi efu wi abi wan tranga bribi èn efu wi e wakti nanga pasensi teleki a du san a pramisi. (Leisi Hebrewsma 6:11, 12.) Yehovah srefi abi pasensi. A ben kan puru ogridu na iniwan ten, ma a e wakti fu du dati na a reti ten (Rom. 9:20-24). Fu san ede a abi so furu pasensi? Fa Yesus de wan eksempre gi wi na ini a fasi fa a sori pasensi neleki en Papa? Fu san ede a bun taki wi leri fu wakti nanga pasensi neleki Yehovah? Den piki tapu den aksi disi kan yepi wi fu abi moro pasensi nanga bribi, awinsi a gersi leki Yehovah e draidrai fu tyari wan kenki kon.

3, 4. (a) Fu san ede Yehovah wakti èn sori pasensi? (b) San Yehovah du di Adam nanga Eva trangayesi en?

³ Nowan sma abi moro makti na hemel nanga grontapu leki Yehovah èn a no abi fu wakti fu tyari wan kaba kon na ala problema. Ma a sabi fu san ede a e wakti. Di libisma trangayesi Gado na ini Eden, son prenspari aksi opo kon èn ala sma na hemel nanga  grontapu ben o kisi wini te den aksi disi ben o kisi piki. Ma Yehovah ben sabi taki a ben o teki ten fu gi wan bun piki tapu den aksi disi. Dati meki a wakti èn a sori pasensi. A sabi heri bun san ibri sma na hemel nanga grontapu e denki èn e du. Sobun, wi kan de seiker taki a o du san bun gi wi trutru.​—Hebr. 4:13.

⁴ Yehovah ben wani taki den bakapikin fu Adam nanga Eva furu grontapu. Gado no kenki prakseri. Di Satan kori Eva èn di Adam trangayesi Gado, Gado no bruya. A no teki wan bosroiti sondro fu denki fosi èn a no drai baka gi libisma. Na presi fu dati a feni wan tra fasi fa a ben o meki libisma nanga grontapu kon de soleki fa a ben wani dati biginbigin (Yes. 55:11). Yehovah o du san a abi na prakseri èn a o sori taki en na a moro bun tiriman, fu di a man dwengi ensrefi trutru èn a abi pasensi. Fu di a wani du sani na a moro bun fasi, meki a wakti dusundusun yari srefi, fosi a du son sani di a ben abi na prakseri.

5. Fu san ede a bun fu wakti Yehovah?

⁵ Wan tra sani di meki taki Yehovah wakti nanga pasensi, na taki a wani taki moro sma kisi têgo libi. Now a e seti sani fu frulusu „wan bigi ipi sma” (Openb. 7:9, 14; 14:6). Yehovah e meki wi du a preikiwroko, so taki sma kan kon sabi sani fu a Kownukondre fu en èn so taki den kan sabi fa a wani den fu libi. A Kownukondre boskopu na „bun nyunsu” trutru. Fu taki en leti, a de a moro bun nyunsu di de! (Mat. 24:14) Ibri sma di Yehovah e hari kon, e tron wan memre fu wan organisâsi di de na heri grontapu. Den sma fu na organisâsi disi de trutru mati fu makandra èn den lobi san tru (Yoh. 6:44-47). Wi lobi-ati Gado e yepi den sma disi fu tyari densrefi na wan fasi di a feni bun. A teki son libisma tu fu tron memre fu a hemel Kownukondre fu en. Te den sma disi go na hemel, den o yepi den libisma na grontapu di gi yesi na Gado, so taki den kon de sondro sondu èn so taki den kisi têgo libi. Sobun, Yehovah tan du sani fu meki en prakseri kon tru aladi a e wakti. A du ala den sani disi fu meki wi kisi wini.

6. (a) Fa Yehovah sori taki a ben abi pasensi na ini a ten fu Noa? (b) Fa Yehovah e sori taki a abi pasensi na ini a ten fu wi?

⁶ Yehovah abi pasensi awinsi sma e du wan lo ogri fu wisiwasi en. Luku fu eksempre san a du di someni ogri ben de na grontapu fosi a Frudu kon. Yehovah „ben e sari srefisrefi” fu di furu libisma na grontapu ben e du hurudu nanga ogridu. Soso ogri ben de na ini den prakseri (Gen. 6:2-8). Ma Yehovah no ben o gi pasi taki ogridu tan fu ala ten. Dati meki a tyari wan frudu kon fu kiri ala den sma di ben e trangayesi en. A heri pisi ten di Yehovah „ben e wakti nanga pasensi na ini a ten fu Noa”, a ben seti sani fu frulusu Noa nanga en osofamiri (1 Petr. 3:20). Na a reti ten Yehovah fruteri Noa san a ben o du èn a taigi en fu bow wan ark (Gen. 6:14-22). Noa ben de „wan preikiman fu retidu” fu di a ben e fruteri den sma fu a pori di ben o kon (2 Petr. 2:5). Yesus taki dati a ten fu wi de leki a ten fu Noa. Yehovah bosroiti o ten a o tyari wan kaba kon na a ogri grontapu disi. Ma nowan libisma sabi „a dei nanga a yuru” o ten dati o kon (Mat. 24:36). Na ini a ten disi Gado gi wi a wroko fu warskow sma èn fu fruteri den fa den kan kisi frulusu.

7. Yu denki taki Yehovah e wakti tumusi langa fu du san a pramisi? Fruklari dati.

⁷ A krin taki a pasensi di Yehovah e sori no wani taki dati a e sidon nomo e du noti. Noiti wi musu denki taki a no e poti prakseri na wi èn taki a no e span nanga den sani di e pasa na grontapu! Wi kan kisi a denki disi makriki te wi kon moro owru  noso te wi e pina na ini na ogri grontapu disi. Wi kan lasi-ati noso wi kan firi leki Gado e wakti tumusi langa fu du san a pramisi (Hebr. 10:36). No frigiti noiti taki a pasensi fu en e tyari bun kon èn taki a e gebroiki a ten disi fu du bun gi den futuboi fu en (2 Petr. 2:3; 3:9). Meki wi luku now fa Yesus sori pasensi neleki en Papa.

8. Na ini sortu situwâsi Yesus sori taki a abi pasensi?

⁸ Yesus e du a wani fu Gado. Someni dusundusun yari a du dati nanga en heri ati. Di Satan opo ensrefi teige Yehovah, Yehovah bosroiti taki en wan-enkri manpikin ben o kon na grontapu leki a Mesias. Prakseri nomo san disi ben wani taki gi Yesus. Dusundusun yari langa a ben musu wakti teleki a ten dati doro. (Leisi Galasiasma 4:4.) Ma a no ben e sidon e wakti nomo teleki a ten dati doro. Na presi fu dati a ben e du a wroko di en Papa ben gi en. Di a kon na grontapu te fu kaba, a ben sabi taki Satan ben o meki sma kiri en soleki fa profeititori ben sori (Gen. 3:15; Mat. 16:21). Nanga pasensi Yesus du san Gado wani aladi a ben sabi taki a ben o nyan hebi pen. A no ben e denki ensrefi nomo. A ben abi sakafasi èn a ben de klariklari fu nyan pina aladi a ben de Gado Manpikin. Yesus ben de a moro bun eksempre fu wan sma di gi yesi na Gado ala ten èn wi musu teki na eksempre fu en.​—Hebr. 5:8, 9.

9, 10. (a) San Yesus du aladi a ben e wakti nanga pasensi teleki Yehovah du wan sani? (b) Fa wi kan de leki Yesus?

⁹ Baka di Yesus kisi wan opobaka, a kisi makti na hemel èn na grontapu (Mat. 28:18). A e gebroiki a makti fu en fu du san Yehovah wani, na a ten di Yehovah poti. Nanga pasensi Yesus wakti na Gado reti-anusei teleki 1914, di Gado poti den feanti leki wan bangi gi Yesus futu (Ps. 110:1, 2; Hebr. 10:12, 13). Heri esi a o tyari wan kaba kon na a grontapu fu Satan. Now a e yepi sma nanga pasensi, so taki Gado kan feni den bun èn a e tyari den go na „den peti di abi watra di e gi libi”.​—Openb. 7:17.

¹⁰ Yu e si san yu kan leri fu Yesus? A ben sabi taki Yehovah ben poti wan spesrutu ten fu du wan sani. A no de fu taki dati Yesus ben angri fu du san en Papa wani. Ma toku a ben abi a pasensi fu wakti teleki a ten di en Papa poti, doro. Wi musu abi pasensi tu aladi wi e wakti a kaba fu a grontapu fu Satan. Wi musu wakti teleki Gado sori wi san fu du èn wi no musu tapu fu du en wani te wi lasi-ati. San wi kan du fu abi pasensi tu?

11. (a) Fa bribi e yepi wi fu abi pasensi? (b) Fu san ede wi kan abi wan tranga bribi?

¹¹ Fosi Yesus kon na grontapu, den profeiti nanga den tra futuboi di tan dini Gado, sori taki libisma man wakti nanga pasensi. Den ben abi pasensi fu di den ben abi bribi. (Leisi Yakobus 5:10, 11.) Efu den no ben e bribi trutru san Yehovah taigi den, den no ben o wakti nanga pasensi teleki den pramisi fu en kon tru. Furu tron den ben e kisi hebi tesi nanga bigi problema. Ma den ben man horidoro fu di den ben abi a bribi taki Gado ben o du san a pramisi (Hebr. 11:13, 35-40). Wi abi moro buweisi di e meki taki wi man abi wan tranga bribi, bika Yesus na „a sma di meki a bribi fu wi kon bun dorodoro” (Hebr. 12:2). A meki taki furu profeititori kon tru èn a yepi wi fu frustan moro bun san Gado abi na prakseri fu du.

12. San wi kan du fu kisi wan moro tranga bribi?

¹² San wi kan du fu kisi wan moro tranga  bribi èn fu kisi moro pasensi? Wan prenspari sani di wi musu du, na fu teki den rai fu Gado. Fu eksempre, prakseri fu san ede yu musu poti a Kownukondre na a fosi presi na ini yu libi. Yu kan du moro muiti fu gi yesi na san skrifi na Mateyus 6:33? Kande yu o abi fu gebroiki moro ten fu du a preikiwroko noso kande yu o abi fu kenki son sani na ini yu libi. No frigiti fa Yehovah blesi den muiti di yu du teleki now. Kande a yepi yu fu feni wan nyun Bijbelstudie, noso kande a gi yu „a freide fu Gado di bigi moro iniwan sani di libisma man frustan”. (Leisi Filipisma 4:7.) Te yu e hori na prakseri fa yu kisi wini fu di yu du san Yehovah taki, dan yu o frustan taki a bun fu abi pasensi.​—Ps. 34:8.

13. Fruteri wan agersitori di e sori fa bribi e meki wi kisi moro pasensi.

¹³ Wan agersitori kan yepi wi fu frustan fa bribi kan meki wi abi moro pasensi. Wan gronman e sai siri, a e kweki den sani di a prani èn bakaten a e koti nyanyan. Ibri tron te a e koti bun furu nyanyan, a e kisi deki-ati fu prani baka. Kande a o wani sai siri na moro gron srefi. Te a e sai siri, a sabi taki a o abi fu wakti nanga pasensi teleki kotiten doro. Ma a sabi tu taki a o koti furu nyanyan. Na so a de tu nanga a bribi fu wi. Te wi e leri san Yehovah wani, te wi e du san wi leri èn te wi e si taki dati e tyari bun bakapisi kon, dan wi e kisi moro bribi na ini Yehovah. Disi o meki en moro makriki gi wi fu abi pasensi èn fu wakti den blesi di wi sabi taki wi o kisi.​—Leisi Yakobus 5:7, 8.

14, 15. Fa wi musu si a pina di libisma e pina?

¹⁴ Wan tra sani di wi kan du fu abi moro pasensi, na fu si grontapu nanga a situwâsi fu wi leki fa Yehovah e si dati. Fu eksempre, prakseri fa Yehovah e denki fu a pina di libisma e pina. Bun langa kaba Yehovah e si fa libisma e pina èn  disi e hati en trutru. Ma a no e sari so te, taki a no man du bun. A seni en wan-enkri Manpikin kon „fu tyari wan kaba kon na den wroko fu Didibri” èn fu puru ala ogri di Satan tyari kon gi libisma (1 Yoh. 3:8). A pina di libisma e pina na fu wan pisi ten nomo, ma Gado o tyari wan kaba kon na dati fu têgo. Sobun, wi no wani taki den ogri di e pasa na ini a grontapu disi swaki a bribi fu wi. Wi no wani abi a denki taki Gado e draidrai fu du wan sani. Meki wi abi a bribi taki Gado o du san a pramisi. Yehovah bosroiti kaba o ten a o tyari wan kaba kon na ogridu èn a o du dati na a reti ten.​—Yes. 46:13; Nah. 1:9.

¹⁵ Na ini den muilek lasti dei fu a grontapu disi, wi kan kisi hebi tesi tapu a bribi fu wi. Efu sma e du ogri nanga wi noso efu den lobiwan fu wi e pina, wi no musu kisi bita-ati, ma wi musu abi a fasti bosroiti fu frutrow dorodoro tapu Yehovah. Wi na sondu sma, sobun a no makriki fu du disi. Ma a o de wan yepi gi wi te wi abi a srefi denki fu Yesus soleki fa skrifi na Mateyus 26:39.​—Leisi en.

16. San wi no musu du aladi wi e wakti a kaba?

¹⁶ Wan sma di e tweifri taki a kaba de krosibei, kan bigin denki na wan fasi di no bun. A kan denki taki a musu seti en eigi libi, fu di kande den pramisi fu Yehovah no o kon tru. Kande a e denki: ’Mi o luku efu Yehovah o du trutru san a pramisi.’ Efu wan sma abi a denki disi di no bun, a o muilek gi en fu abi pasensi. Disi kan meki tu taki a go suku biginen na ini a grontapu disi. Kande a o feti baka gudu na presi fu poti Gado Kownukondre na a fosi presi. Noso kande a o bosroiti fu go na wan moro hei skoro, so taki a kan abi wan switi libi bakaten. Ma wan sma di e du den sani disi e sori taki en bribi swaki, a no so? Memre taki Paulus gi wi a deki-ati fu teki na eksempre fu den owruten futuboi fu Yehovah di kisi san Yehovah pramisi den „fu di den ben abi bribi èn fu di den ben abi pasensi” (Hebr. 6:12). Yehovah bosroiti kaba taki a o pori na ogri grontapu disi èn a o du dati na a reti ten (Hab. 2:3). Solanga a ten dati no doro, wi musu luku bun taki wi no go du a wroko fu Yehovah moro safri. Na presi fu dati wi musu tan na ai èn wi musu du a preikiwroko fayafaya. A wroko disi kan gi wi bigi prisiri nownow kaba.​—Luk. 21:36.

17, 18. (a) Sortu okasi wi abi aladi wi e wakti nanga pasensi? (b) Sortu blesi wi o kisi te wi abi pasensi?

¹⁷ Sonwan fu wi e dini Gado wan tu mun nomo èn trawan e du dati furu yari kaba. Ma wi alamala wani tan dini en fu têgo. Pasensi e yepi wi fu horidoro teleki wi kisi frulusu. A no abi trobi o langa wi abi fu wakti. Now Yehovah e gi wi na okasi fu sori taki wi e frutrow na en tapu dorodoro èn taki wi o tan dini en awinsi wi abi fu nyan pina fu en nen ede (1 Petr. 4:13, 14). Gado e gi wi leri tu di kan yepi wi fu kisi a pasensi di wi abi fanowdu fu man kisi frulusu.​—1 Petr. 5:10.

¹⁸ Yesus abi ala makti na hemel nanga grontapu èn nowan sani kan tapu en fu kibri yu efu yu tan dini Gado ala ten (Yoh. 10:28, 29). Yu no abi fu frede san o pasa na ini a ten di e kon. Yu no abi fu frede dede srefi. Den sma di e wakti nanga pasensi teleki a kaba kon, o kisi frulusu. Sobun, wi musu sorgu taki wi no gi pasi taki a grontapu disi kori wi, so taki wi no e frutrow tapu Yehovah moro. Na presi fu dati, wi musu du muiti ala ten fu kisi moro bribi èn fu gebroiki wi ten na wan koni fasi aladi Gado e sori pasensi.​—Mat. 24:13; leisi 2 Petrus 3:17, 18.