1. Irmaun-irmán balu neʼebé serbí Jeová ho laran-metin dala ruma hanoin saida?

IRMÁN ida neʼebé tinan barak ona serbí Jeová ho laran-metin no tahan hasoru susar oioin, nia husu: “Haʼu sei haree mundu neʼe nia rohan antes haʼu mate ka lae?” Irmaun-irmán balu neʼebé serbí Jeová kleur ona mós dala ruma hanoin hanesan neʼe. Ita hein ba tempu neʼebé Maromak sei halakon ita-nia problema hotu no halo buat hotu foun fali. (Apok 21:5) Maski ita iha razaun barak atu fiar katak Satanás nia mundu aat neʼe nia rohan besik ona atu mai, maibé dala ruma ita sente susar atu hein ba loron neʼe ho pasiénsia.

2. Iha lisaun neʼe, ita sei koʼalia kona-ba pergunta saida deʼit?

² Bíblia hatete katak ita presiza iha pasiénsia. Hanesan ho Maromak nia atan sira iha tempu uluk, se ita hatudu fiar metin no hein ho pasiénsia ba Jeová nia tempu atu kumpre ninia promesa, ita mós sei hetan buat neʼebé nia promete. (Lee Ebreu 6:11, 12.) Jeová rasik mós hatudu pasiénsia. Nia bele halakon buat aat iha tempu naran deʼit, maibé nia hein ba tempu neʼebé loos. (Rom 9:20-24) Tanbasá mak nia hatudu pasiénsia hanesan neʼe? Oinsá mak Jesus mós hatudu pasiénsia hodi fó ezemplu diʼak mai ita? Tanbasá mak ita presiza aprende atu hein ho pasiénsia hanesan Jeová? Resposta ba pergunta sira-neʼe bele ajuda ita atu hein ho pasiénsia no hametin ita-nia fiar maski dala ruma ita sente katak Jeová nia loron sei demora hela.

3, 4. (a) Tanbasá mak Jeová hein ho pasiénsia? (b) Saida mak Jeová halo kuandu Adão ho Eva la halo tuir nia?

³ Tuir loloos, Jeová mak iha kbiit boot liu iha lalehan no rai, tan neʼe nia bele hadiʼa kedas problema hotu. Maibé nia iha razaun neʼebé loos atu hein ho pasiénsia.  Buat neʼebé Satanás no Adão ho Eva halo hodi kontra hasoru Jeová iha jardín Eden hamosu pergunta sira neʼebé importante atu rezolve. No husi tempu neʼebá, Jeová hatudu pasiénsia tanba nia hatene katak presiza tempu atu fó resposta ba pergunta sira-neʼe iha dalan neʼebé kompletu. Tanba Jeová hatene didiʼak kona-ba buat neʼebé ninia kriatura sira hotu iha lalehan no rai halo no hanoin, ita bele fiar katak nia halo duni buat neʼebé lori diʼak ba ita.—Ebr 4:13.

⁴ Jeová nia hakarak mak atu Adão ho Eva nia oan no bei-oan sira sai barak no halo nakonu mundu. Maski Satanás lohi Eva, no Adão mós la halo tuir Jeová, maibé Jeová la rende an lalais kona-ba kumpre ninia hakarak neʼe. Tan neʼe, duké foti desizaun kedas atu halakon sira, Jeová halo arranju atu kumpre ninia hakarak ba ema no mundu. (Isa 55:11) Hodi halo nuneʼe no atu hatudu katak Jeová deʼit mak iha direitu atu ukun, nia kontrola an no hein ho pasiénsia ba tinan rihun ba rihun.

5. Jeová nia pasiénsia lori bensaun saida deʼit?

⁵ Razaun ida seluk neʼebé Jeová hein ho pasiénsia mak atu fó oportunidade ba ema barak liután atu hetan moris rohan-laek. Agora daudauk, Jeová halo buat oioin atu salva “ema-lubun boot”. (Apok 7:9, 14; 14:6) Porezemplu, liuhusi ita-nia serbisu haklaken, Jeová konvida ema atu aprende kona-ba ninia Ukun no ninia matadalan sira. Tuir loloos, mensajen kona-ba Maromak nia Ukun mak “lia-foun” neʼebé diʼak duni ba ema hotu! (Mt 24:14) Ema ida-idak neʼebé Jeová mak dada, sira sai parte husi kongregasaun iha mundu tomak neʼebé hadomi buat neʼebé loos. (Joao 6:44-47) Hodi halo buat sira-neʼe hotu, ita-nia Maromak neʼebé domin ajuda ema atu hetan ninia bensaun. Jeová mós hili ema balu atu hola parte iha ninia governu iha lalehan. Kuandu sira moris hiʼas fali iha lalehan, sira sei ajuda ema iha mundu atu sai ema neʼebé perfeitu no moris ba nafatin. Sin, maski Jeová hein daudauk ho pasiénsia, maibé nia mós halo buat barak atu kumpre ninia hakarak, no nia halo buat sira-neʼe hotu ba ita-nia diʼak.

6. (a) Iha Noé nia tempu, oinsá mak Jeová hatudu pasiénsia? (b) Ohin loron, oinsá mak Jeová hatudu pasiénsia?

⁶ Jeová hatudu pasiénsia boot maski ninia kriatura sira halo buat neʼebé aat oioin hasoru nia. Porezemplu, hanoin toʼok kona-ba tempu antes Rai-Nabeen. Kuandu mundu sai nakonu ho violénsia no hahalok sala-foʼer, ida-neʼe halo Jeová sente “laran-kanek”. (Gên 6:2-8) Maibé, nia la husik situasaun aat neʼe ba nafatin, tan neʼe nia deside atu halo rai-nabeen hodi halakon ema neʼebé la halo tuir nia. Nuʼudar Jeová hein atu halo ida-neʼe, nia halo buat neʼebé presiza atu salva Noé ho ninia família. (1 Ped 3:20) Iha tempu neʼebé loos, Jeová fó-hatene Noé kona-ba Rai-Nabeen no haruka nia atu halo arka, ka ró boot. (Gên 6:14-22) Liután neʼe, Jeová mós haruka Noé atu fó avizu ba ema kona-ba mundu nia rohan nuʼudar “justisa nia manu-ain”. (2 Ped 2:5) Jesus hatete katak ita-nia tempu hanesan ho Noé nia tempu. Jeová deside ona bainhira loos mak nia sei halakon mundu aat neʼe, maibé ema ida la hatene “loron no oras”. (Mt 24:36) Ohin loron, Maromak fó mai ita serbisu atu fó avizu ba ema seluk no fó-hatene kona-ba oinsá sira bele hetan salvasaun.

7. Jeová hein tempu kleur demais atu kumpre buat neʼebé nia promete ka lae? Esplika toʼok.

⁷ Klaru katak Maromak nia pasiénsia la dehan katak nia hein deʼit hodi la halo buat ida. Ita labele hanoin sala katak Jeová la haree ita ka la hanoin ita! Maibé, kuandu ita-nia tinan aumenta ba beibeik ka ita hasoru susar oioin iha mundu aat neʼe, ida-neʼe bele halo ita sente laran-tun no hanoin katak Maromak hein tempu kleur demais atu kumpre buat neʼebé nia promete. (Ebr  10:36) Maibé, ita labele haluha katak Jeová iha razaun neʼebé loos atu hein ho pasiénsia no uza tempu neʼe iha dalan neʼebé lori diʼak ba ninia atan sira. (2 Ped 2:3; 3:9) Agora, mai ita koʼalia kona-ba oinsá Jesus hatudu pasiénsia hanesan ninia Aman.

8. Iha situasaun saida deʼit mak Jesus hatudu pasiénsia?

⁸ Jesus sempre prontu atu halo Maromak nia hakarak no nia halo nuneʼe durante tinan rihun ba rihun. Iha tempu uluk kuandu Satanás kontra hasoru Jeová, Jeová deside atu haruka ninia Oan-Mane mesak mai toʼo mundu nuʼudar Mesias. Hanoin toʼok oinsá Jesus hein ho pasiénsia tinan rihun ba rihun antes tempu neʼe toʼo mai. (Lee Galasia 4:4.) Maibé, durante tempu neʼe, Jesus la hein deʼit hodi la halo buat ida. Nia halo serbisu barak neʼebé ninia Aman haruka. Ikusmai, kuandu Jesus mai toʼo mundu, nia hatene ona katak nia sei mate iha Satanás nia liman, hanesan hakerek nanis ona. (Gên 3:15; Mt 16:21) Jesus tahan hasoru terus boot ho pasiénsia toʼo mate tanba nia hatene katak ida-neʼe mak Maromak nia hakarak. Jesus la hanoin kona-ba ninia an rasik. Nia hatudu haraik-an no prontu atu hetan terus maski nia Maromak nia Oan. Jesus hatudu duni laran-metin ba Maromak, no ita mós bele halo tuir ninia ezemplu.—Ebr 5:8, 9.

9, 10. (a) Saida deʼit mak Jesus halo nuʼudar nia hein toʼo tempu neʼebé Jeová deside ona? (b) Oinsá mak ita bele halo tuir Jesus nia ezemplu?

⁹ Depois Jesus moris hiʼas fali, nia simu kbiit tomak iha lalehan no rai. (Mt 28:18) Jesus sempre uza kbiit neʼe atu kumpre Jeová nia hakarak hodi tuir tempu neʼebé Jeová deside ona. Tan neʼe, Jesus hein ho pasiénsia iha Maromak nia sorin kuana toʼo tempu neʼebé Jeová tau ninia inimigu sira iha Jesus nia ain okos iha tinan 1914. (Sal 110:1, 2; Ebr 10:12, 13) Lakleur tan, Jesus sei halakon Satanás nia mundu aat neʼe. Maibé nuʼudar Jesus hein toʼo tempu neʼe, nia ho pasiénsia ajuda ema atu hetan “bee moris nian”.—Apok 7:17.

¹⁰ Oinsá mak ita bele halo tuir Jesus nia ezemplu? Jesus laran-manas atu halo buat naran deʼit neʼebé ninia Aman haruka. Maibé nia mós prontu atu hein toʼo tempu neʼebé Maromak deside ona. Nuʼudar ita hein hela Satanás nia mundu aat neʼe nia rohan, ita hotu tenke hatudu pasiénsia. Ita presiza hein ba Maromak no labele rende an kuandu ita laran-tun. Maibé, oinsá mak ita bele iha pasiénsia hanesan neʼe?

11. (a) Pasiénsia ho fiar iha relasaun saida? (b) Tanbasá mak ita iha razaun neʼebé diʼak liután atu iha fiar neʼebé metin?

¹¹ Antes Jesus mai toʼo mundu, Maromak nia profeta sira no atan sira seluk hatudu ezemplu diʼak kona-ba oinsá mak ema sala-naʼin bele tahan ho pasiénsia. Sira bele hatudu pasiénsia tanba sira iha fiar. (Lee Tiago 5:10, 11.) Se sira la iha fiar, ka ladún fiar ba buat neʼebé Jeová promete ba sira, karik sira la bele hein ho pasiénsia toʼo tempu neʼebé Jeová kumpre ninia liafuan. Maibé tanba sira fiar metin, sira bele tahan hasoru susar oioin. (Ebr 11:13, 35-40) Ohin loron, ita iha razaun neʼebé diʼak liután atu iha fiar neʼebé metin tanba Jesus halo “ita-nia fiar sai diʼak loos”. (Ebr 12:2) Sin, Jesus kumpre ona profesia barak no mós ajuda ita atu hatene diʼak liután kona-ba Maromak nia hakarak, tan neʼe ita iha razaun barak atu iha fiar.

12. Saida deʼit mak ita presiza halo atu hametin ita-nia fiar?

¹² Saida deʼit mak ita presiza halo atu hametin ita-nia fiar hodi bele iha pasiénsia liután? Buat ida neʼebé importante mak  halo tuir Maromak nia konsellu sira. Porezemplu, hanoin toʼok kona-ba tanbasá mak ita presiza tau uluk Maromak nia hakarak iha ita-nia moris. Ita bele hakaʼas an liután ka lae, atu halo tuir konsellu husi Mateus 6:33? Karik ita bele aumenta ita-nia tempu atu halo serbisu haklaken, ka halo buat ruma atu halo ita-nia moris sai simples liu. Diʼak atu ita la haluha oinsá mak Jeová fó bensaun ba ita-nia hakaʼas-an toʼo agora. Karik nia ajuda ita atu hetan estudante Bíblia foun ka ajuda ita atu sente dame iha laran. (Lee Filipe 4:7.) Kuandu ita hanoin didiʼak kona-ba bensaun sira-neʼe, ida-neʼe ajuda ita atu iha pasiénsia.—Sal 34:8.

13. Esplika toʼok oinsá mak ita-nia fiar bele ajuda ita atu iha pasiénsia.

¹³ Atu komprende oinsá mak ita-nia fiar bele ajuda ita atu hein ho pasiénsia, mai ita hanoin kona-ba toʼos-naʼin ida. Nia kari fini, tau rai-metan, no ikusmai nia koʼa fuan barak. Ida-neʼe halo nia tau fiar liután kona-ba rezultadu husi ninia serbisu iha tinan oinmai. Maski nia presiza hein ho pasiénsia toʼo tempu koʼa nian, karik nia kari fini barak liután tanba nia fiar duni katak nia sei koʼa fuan barak. Hanesan neʼe mós ho ita. Kuandu ita aprende kona-ba Jeová nia konsellu, halo tuir no ikusmai hetan rezultadu diʼak, ida-neʼe halo ita-nia fiar ba Jeová sai metin liután. Nuneʼe, sai fasil liután ba ita atu hein ho pasiénsia ba bensaun neʼebé ita sei hetan iha futuru.—Lee Tiago 5:7, 8.

14, 15. Ita presiza iha hanoin saida kona-ba ema nia susar?

¹⁴ Buat ida tan neʼebé ita bele halo atu haburas liután ita-nia pasiénsia mak hodi hanoin kona-ba Jeová nia haree ba mundu aat neʼe no ita-nia situasaun. Porezemplu, hanoin toʼok oinsá mak Jeová sente kona-ba ema nia susar. Jeová haree ema nia susar ba tempu kleur ona no ida-neʼe halo nia laran-triste. Maski nuneʼe, Jeová la husik ida-neʼe  hapara nia atu halo buat neʼebé diʼak. Nia haruka ninia Oan atu “halakon buat neʼebé Diabu halo tiha” no susar hotu neʼebé Satanás mak lori ba ema. (1 Joao 3:8) Tuir loloos, lakleur tan, Jeová sei halo ramata ema nia terus hotu ba nafatin. Tan neʼe, ita lakohi husik buat aat iha mundu neʼe atu halo ita-nia fiar sai fraku no halo ita la hein ho pasiénsia toʼo tempu neʼebé Jeová sei halakon mundu aat neʼe. Nuneʼe, mai ita tau fiar ba buat hotu neʼebé Maromak promete. Jeová deside ona bainhira loos mak nia sei halakon buat aat hotu, no nia sei halo nuneʼe iha tempu neʼebé loos.—Isa 46:13; Naum 1:9.

¹⁵ Durante loron ikus sira-neʼe, dala ruma ita mós hasoru situasaun susar neʼebé koko ita-nia fiar. Karik ita rasik, ita-nia família ka kolega sira hasoru violénsia ka susar seluk. Maibé, kuandu ida-neʼe akontese, duké sai hirus, ita presiza tau ita-nia fiar tomak ba Jeová. Nuʼudar ema sala-naʼin, susar ba ita atu halo nuneʼe, maibé hanoin toʼok kona-ba Jesus nia ezemplu, neʼebé hakerek iha Mateus 26:39.—Lee.

16. Nuʼudar ita hein ba mundu aat nia rohan, ita presiza hasees an husi hanoin sala saida?

¹⁶ Ema kristaun neʼebé sente laran-rua kona-ba mundu aat nia rohan besik ona, karik sira hanoin sala katak sira presiza halo planu oioin tanba dala ruma Jeová sei la kumpre buat neʼebé nia promete. Ema hanesan neʼe karik hanoin: ‘Haʼu sei haree toʼok se Jeová sei kumpre duni buat neʼebé nia promete.’ Hanoin hanesan neʼe bele halo sira la iha pasiénsia. No rezultadu mak sira sei koko atu buka naran-boot ka komesa tau fiar ba osan hodi la buka ona Maromak nia hakarak uluk iha sira-nia moris. Karik sira mós deside atu bá universidade hodi bele hetan moris diʼak iha mundu neʼe. Maibé tuir loloos, ema hanesan neʼe hatudu katak sira-nia fiar la metin. Hanoin-hetan katak Paulo hatete ba ita atu halo tuir ezemplu husi Maromak nia atan sira neʼebé ikusmai hetan bensaun barak tanba sira iha “fiar no pasiénsia”. (Ebr 6:12) Jeová deside ona atu halakon mundu aat, no nia sei la tarde atu halo nuneʼe. (Hab 2:3) Toʼo tempu neʼebá, ita labele hanoin katak halo Jeová nia serbisu uitoan deʼit toʼo ona. Duké hanoin hanesan neʼe, ita presiza hanoin nafatin katak ita moris iha loron ikus sira no kontinua hakaʼas an atu halo serbisu haklaken neʼebé lori haksolok boot mai ita.—Lc 21:36.

17, 18. (a) Nuʼudar ita hein ho pasiénsia, ita iha oportunidade atu halo saida? (b) Pasiénsia sei lori bensaun saida deʼit mai ita?

¹⁷ Maski ita serbí Jeová foin fulan balu ka tinan barak ona, ita hotu hakarak serbí nia ba nafatin. Pasiénsia ajuda ita atu tahan ho laran-metin toʼo mundu aat neʼe nia rohan maski ita la hatene tempu hira tan mak ita presiza hein. Agora daudauk, Jeová fó oportunidade ba ita atu hatudu katak ita tau ita-nia fiar tomak ba ninia desizaun no katak ita sei laran-metin nafatin ba nia maski iha susar laran. (1 Ped 4:13, 14) Maromak mós fó mai ita treinu neʼebé ajuda ita atu tahan ho pasiénsia toʼo rohan no hetan salvasaun.—1 Ped 5:10.

¹⁸ Jesus iha kbiit tomak iha lalehan no rai, no la iha buat ida neʼebé bele hapara nia atu proteje ita se ita laran-metin nafatin. (Joao 10:28, 29) Nuneʼe, ita lalika taʼuk ba futuru no mós ba mate. Ema neʼebé tahan ho pasiénsia toʼo rohan mak sei hetan salvasaun. Tan neʼe, ita labele husik mundu neʼe nia hanoin atu kontrola ita hodi halo ita la tau fiar tan ba Jeová. Entaun, nuʼudar Maromak hein daudauk ho pasiénsia, mai ita hametin ita-nia fiar no uza ita-nia tempu ho matenek.—Mt 24:13; lee 2 Pedro 3:17, 18.