Amwiiye Kukkazyika Moyo Kwa Jehova A Jesu
Amwiiye Kukkazyika Moyo Kwa Jehova A Jesu
“Amubone kukkazyika moyo kwa Mwami wesu kuti ndufwutuko.”—2 PE. 3:15.
INO INGA MWAINGULA BUTI?
Mbuti Jehova mbwaatondezya kuti ulakkazyika moyo?
Nkaambo nzi Jesu ncaakeelede kukkazyika moyo kwaciindi cilamfwu?
Nintaamu nzi nzyotweelede kubweza kutegwa katukkazyika moyo mbuli Leza?
1. Mubuzyo nzi bantu bamwi basyomeka ngobabuzya?
MUCIZYI umwi uusyomeka iwakaliyumya mumapenzi manji kwaciindi cilamfwu wakabuzya kuti, “Sena mamanino ayoosika kanditanafwa?” Bamwi ibabelekela Jehova kwaciindi cilamfwu balalibuzya mubuzyo nguwenya ooyu. Tulabulombozya buzuba Leza nayoobambulula zyintu zyoonse kuti zibe zipya, akugusya mapenzi ngotujana mazuba aano. (Ciy. 21:5) Nikuba kuti kuli twaambo tumvwika itutupa kusyoma kuti mamanino aabweende bwa Saatani alaafwaafwi kapati, cilakonzya kutukatazya kulindila buzuba oobo cakukkazyika moyo.
2. Mibuzyo nzi iijatikizya kukkazyika moyo mbuli Leza njotutiilange-lange?
2 Pele Bbaibbele lilatondezya kuti tweelede kukkazyika moyo. Mbubwenya mbuli babelesi ba Leza bakaindi, tuyootambula zisyomezyo zya Leza ikuti katujisi lusyomo luyumu akulindila cakukkazyika moyo ciindi cakwe cakuzuzikizya zisyomezyo eezyo. (Amubale Bahebulayo 6:11, 12.) Kuzwa kaindi, Jehova wali kukkazyika moyo. Naalibugusyide kale bubi bucitika, pele ulindila ciindi ceelede. (Lom. 9:20-24) Nkaambo nzi ncakkazyika boobo moyo? Mbuti Jesu mbwaatondezya cikozyanyo cakukkazyika moyo mbuli Leza? Nzilongezyo nzi nzyotuyoojana ikuti katukkazyika moyo mbuli Leza? Bwiinguzi kumibuzyo eeyi bulakonzya kutugwasya kukkazyika moyo alimwi akutupa kuba alusyomo luyumu, nikuba kuti cilakonzya kuboneka mbuli kuti Jehova wamuka.
NKAAMBO NZI JEHOVA NCAKKAZYIKA MOYO?
3, 4. (a) Nkaambo nzi Jehova ncakkazyika moyo mukuzuzikizya makanze aakwe aajatikizya nyika? (b) Ino Jehova wakacita nzi kujatikizya kuzanga kwamu Edeni?
3 Jehova ulijisi twaambo tubotu ncakkazyikila moyo. Masimpe kuti ulijisi nguzu mububumbo boonse ciindi coonse; pele kuzanga mu Edeni kwakabusya mibuzyo iiyandika kapati mububumbo boonse. Kuzwa kaindi, Jehova wali kukkazyika moyo, nkaambo ulizyi kuti cilatola ciindi cilamfwu kwiingula mibuzyo eeyo munzila iizulide. Akaambo kakuba aluzyibo luzulide lwamilimo alimwi ambozilimvwa zilenge kujulu alimwi abantu anyika, mubwini ulacita zyintu kutegwa tugwasyigwe.—Heb. 4:13.
4 Jehova wakali kuyanda kuti bana ba Adamu a Eva bavwule munyika. Ciindi Saatani naakayunga Eva, mpoonya awalo Adamu naatakamvwida, Leza tanaakaaleka makanze aakwe. Wakakkazyika moyo alimwi tanaakasala cakubinda naa kunyema kapati akuukaka mukwasyi wabantu. Muciindi caboobo, wakajana nzila iimbi yakuzuzikizya makanze kujatikizya bantu alimwi Anyika. (Is. 55:11) Kutegwa azuzikizye makanze aakwe alimwi akusumpula bweendelezi bwakwe, Jehova watondezya kulilesya kapati alimwi akukkazyika moyo, mane akulindila kwazyuulu-zyuulu zyamyaka kutegwa zibeela zimwi zyamakanze aakwe zicitwe munzila mbotu kapati.
5. Ino kukkazyika moyo kwa Jehova kuleta zilongezyo nzi?
5 Akamwi kaambo ikapa kuti Jehova alindile cakukkazyika moyo, uyanda kuti bantu banji bakajane buumi butamani. Ecino ciindi, Jehova ulibambila kufwutula “nkamu mpati.” (Ciy. 7:9, 14; 14:6) Jehova ulabazyibya bantu kwiinda mumulimo wesu wakukambauka, kubatamba kutegwa baiye kujatikizya Bwami bwakwe alimwi azyeelelo zyakwe ziluleme. Mulumbe wa Bwami ngomulumbe mubotu kapati kubantu—inzya, “[nga]makani mabotu.” (Mt. 24:14) Muntu umwi aumwi Jehova ngwakwela uba cibeela cambungano yanyika yoonse yabalongwe beni-beni ibayanda zyintu ziluleme. (Joh. 6:44-47) Leza wesu siluyando ulabagwasya bantu bali boobo kuti babe balongwe bakwe. Kunze lyaboobo, wali kusala akati kabantu boonse ibantu ibayooba mumfwulumende yakwe yakujulu. Baakubweza masena aabo kujulu, aaba bantu balyaabide bayoogwasya bantu basyomeka kulondoka alimwi akujana buumi butamani. Cilasalala kuti nociba ciindi nalindila cakukkazyika moyo, Jehova wali kubeleka kutegwa azuzikizye zisyomezyo zyakwe kutegwa tugwasyigwe.
6. (a) Muunzila nzi Jehova mwakakkazyika moyo mumazuba aa Nowa? (b) Mbuti Jehova mbwakkazyika moyo mazuba aano?
6 Jehova ulakkazyika moyo nikuba kuti bamwi bamunyemya kapati. Mucikozyanyo, amuyeeye ncaakasala kucita kujatikizya bubi bwakaliko Zambangulwe kalitanacitika. Nyika yakazwide kutalilemeka alimwi akulwana, alimwi Jehova “wakausa” nkaambo kabubi bwabantu. (Matl. 6:2-8) Tanaakali kukonzya kulekelela bukkale oobo kukabe kutamani, aboobo wakakanza kuleta zambangulwe kubantu batamvwi. “Ciindi Leza naakali kulindila cakukkazyika moyo kumazuba aa Nowa,” Jehova wakabikka bubambe bwakuvwuna Nowa amukwasyi wakwe. (1 Pe. 3:20) Aciindi ceelede, Jehova wakazyibya Nowa kusala ooku alimwi akumupa mulimo wakuyaka bwato. (Matl. 6:14-22) Kuyungizya waawo, Nowa wakali “mukambausi wabululami,” wakali kwaambila basimukobonyina kujatikizya lunyonyooko lwakali kuboola. (2 Pe. 2:5) Jesu wakaamba kuti ciindi ncotupona cilikozyenye amazuba aa Nowa. Jehova ulizyi ciindi nayooleta mamanino kubweende bwazyintu oobu bubyaabi. Taakwe muntu uuzyi “buzuba oobo alimwi aciindi” nayoocita oobo. (Mt. 24:36) Kuciindi eecino, tupedwe mulimo a Leza wakucenjezya bantu akubaambila mbobakonzya kufwutulwa.
7. Sena Jehova wamuka kuzuzikizya zisyomezyo zyakwe? Amupandulule.
7 Cakutadooneka, kukkazyika moyo kwa Jehova tacaambi kuti wiide kulindila kuti ciindi ciinde pe. Kukkazyika moyo kwa Leza tacaambi kuti tatubikkili maano alimwi akuti tatulanganyi pe. Kwaamba masimpe, ikuti twatalika kucembaala alimwi akupenga mubweende obuno bubyaabi, cilakonzya kutukatazya kutuyeeya twaambo tuli boobu. Tulakonzya kutyompwa naa kulimvwa kuti Leza ulamuka kuzuzikizya zisyomezyo zyakwe. (Heb. 10:36) Mutalubi kuti Leza ulijisi twaambo tubotu ncakkazyikila moyo alimwi kuti ciindi eeci ucibelesya munzila iigwasya babelesi bakwe basyomeka. (2 Pe. 2:3; 3:9) Lino, amubone Jesu mbwakkazyika moyo mbuli Leza.
MBUTI JESU MBWAAKAPA CIKOZYANYO CIBOTU CAKUKKAZYIKA MOYO?
8. Muubukkale buli buti Jesu mwaakali kukkazyika moyo?
8 Jesu ulacita kuyanda kwa Leza alimwi walikucita oobo cabusungu kwazyuulu-zyuulu zyamyaka iitabaliki. Ciindi Saatani naakazanga, Jehova wakasala kuti Mwanaakwe simuzyalwaalikke aboole ano anyika kali Mesiya. Amuyeeye buyo kukkazyika moyo kwa Jesu nkwaakatondezya kwazyuulu zyamyaka kalindila kuti ciindi cisike. (Amubale Bagalatiya 4:4.) Tanaakakkede buyo taandabale kulindila ciindi eeco kuti cisike pe; muciindi caboobo, wakajisi bubi kucita mulimo Bausyi ngobakamupede. Ciindi naakaboola ano anyika, wakalizyi kuti wakeelede kujaigwa a Saatani kweelana ambokwakasinsimwa. (Matl. 3:15; Mt. 16:21) Cakukkazyika moyo wakali kucita kuyanda kwa Leza, nikuba kuti kucita boobo tiicakali cintu cuuba-uba pe, wakeelede kupenga akujaigwa. Wakatondezya kusyomeka cakumaninina. Kunyina naakali kulibikkila buyo maano mwini pe, andiswe tulakonzya kwiiya kucikozyanyo cakwe cibotu.—Heb. 5:8, 9.
9, 10. (a) Ino Jesu wali kucita nzi nacilindila kuti Jehova abweze ntaamu? (b) Mbuti mbotweelede kucibona ciindi ncabikkide Jehova?
9 Naakabusyigwa, Jesu wakapegwa nguzu kujulu alimwi aanyika. (Mt. 28:18) Ulazibelesya nguzu eezyi kuzuzikizya makanze aa Jehova kweelana aciindi ncabikkide Leza. Jesu, cakukkazyika moyo wakakkala kujanza lyalulyo lya Leza kusikila mumwaka wa 1914 kutegwa basinkondonyina babikkwe kuba cilyatilo camaulu aakwe. (Int. 110:1, 2; Heb. 10:12, 13) Lino-lino uyoozibelesya nguzu nzyapedwe kutegwa anyonyoone bweende bwa Saatani. Nacilindila ciindi eeco, Jesu cakukkazyika moyo ulabeleka antoomwe abantu kutegwa abasololele “[ku]maanzi aabuumi.”—Ciy. 7:17.
10 Kwiinda mucikozyanyo ca Jesu, sena mwabona mbomweelede kucibona ciindi ncabikkide Jehova? Cakutadooneka, Jesu wakaliyandide kucita kufwumbwa mulimo Bausyi ngobakamupa; nikuba boobo, wakalilisungwide kulindila ciindi ncabikkide Leza. Nitulindila mamanino abweende bubyaabi bwa Saatani, toonse tuyandika kukkazyika moyo kwa Leza, tatweelede kusotoka malailile aa Leza naa kucileka akaambo kakutyompwa. Ncinzi ncotweelede kucita kutegwa katukkazyika moyo mbuli Leza?
MBUTI MBONDIKONZYA KWIIYA KUKKAZYIKA MOYO KWA LEZA?
11. (a) Nkweendelana nzi kuliko akati kalusyomo alimwi akukkazyika moyo? (b) Ntwaambo nzi tutupa kuba alusyomo luyumu?
11 Jesu katanaboola ano anyika, basinsimi alimwi ababelesi ba Leza bamwi basyomeka bakapa cikozyanyo cibotu citondezya kuti nibaba bantu batalondokede balakonzya kuliyumya cakukkazyika moyo. Zikozyanyo zyabo zitondezya kuti kuli kweendelana kuli akati kalusyomo lwabo alimwi akukkazyika moyo kwabo. (Amubale Jakobo 5:10, 11.) Nibatakali kuzisyoma nzyaakabaambila Jehova—nibatakalijisi lusyomo—sena nibakacikonzya kulindila cakukkazyika moyo kuti Leza azuzikizye zisyomezyo zyakwe? Bakacikonzya kuliyumya mubukkale bukatazya naa buyoosya akaambo kakuti bakalijisi lusyomo lwakuti Leza uyoozuzikizya nzyaakasyomezya. (Heb. 11:13, 35-40) Swebo tulijisi twaambo tunji tutupa kuba alusyomo luyumu akaambo kakuti Jesu lino ulabeleka kali yooyo “Uulondola lusyomo lwesu.” (Heb. 12:2) Jesu wakazuzikizya businsimi akuyubununa makanze aa Leza munzila iitupa kuba alusyomo luyumu.
12. Ncinzi ncotweelede kucita kutegwa tube alusyomo luyumu?
12 Nintaamu nzi nzyotukonzya kubweza kutegwa tuyumye lusyomo lwesu, akuti katukkazyika moyo? Cilayandika kuti katutobela lulayo lwa Leza. Mucikozyanyo, amuyeeye twaambo tumupa kuti kamubikka ziyandika zya Bwami mubusena bwakusaanguna mubuumi bwanu. Sena muyandika kubikkila maano kutegwa kamutobela lulayo lujanika mulugwalo lwa Matayo 6:33? Kucita oobo inga caamba kuti kamubeleka kwaciindi cilamfwu mumulimo wakukambauka naa kucinca zimwi zyintu mubuumi bwanu. Amuyeeye Jehova mbwaakulongezya kusoleka kwanu. Cakutadooneka, Leza wamugwasya kutegwa mucikonzye kusololela ciiyo ca Bbaibbele naa kumugwasya kuba “[a]luumuno lwa Leza oolo lwiinda kumvwisya koonse.” (Amubale Bafilipi 4:7.) Nimulanga zilongezyo nzyomwatambula nywebo kumugama akaambo kakutobela malailile aa Jehova, muyoobona kuti andinywe mweelede kukkazyika moyo.—Int. 34:8.
13. Ncikozyanyo nzi citondezya lusyomo lwesu mbolukonzya kutupa kukkazika moyo?
13 Atubone cikozyanyo cikonzya kutugwasya kumvwisya lusyomo mbolukonzya kutupa kuti katukkazyika moyo. Mulimi ulasyanga mbuto zyakwe, kuziliminina, akutebula. Ciindi mulimi najisi butebuzi bubotu, ulaba aaluyandisisyo lwakuyoosyanga mbuto zimbi ciindi ciboola. Ulakonzya kusyanga mbuto zinji nikuba kuti ulizyi kuti weelede kulindila cakukkazyika moyo kutegwa ciindi cakutebula cisike. Ulaalusyomo lwakuti uyootebula. Mbubwenya buyo, ikuti twaiya malailile aa Jehova, twaatobela, akubona bubotu bwakutobela malailile, lusyomo lwesu muli Jehova lulayuma. Eeco cilakonzya kupa kuti kacitakatazyi kulindila zilongezyo nzyotuzyi kuti ziyooboola ncobeni.—Amubale Jakobo 5:7, 8.
14, 15. Mbuti mbotweelede kukubona kupenga kwabantu?
14 Nzila imwi iikonzya kutugwasya kuti katukkazyika moyo nkwiinda mukulanga-langa mbotweelede kwiibona nyika alimwi abukkale bwesu. Amusole kuzyibona zyintu mbwazibona Jehova. Mucikozyanyo, amuyeeye mbwakubona kupenga kwabantu. Kwaciindi cilamfwu wali kukubona kupenga kwabantu; nikuba boobo, kunyina naatyompwa akaambo kabuumba cakuti takonzyi kucita cintu cibotu. Wakatuma Mwanaakwe simuzyalwaalikke “kutegwa anyonyoone milimo ya Diabolosi” akugusya mapenzi woonse Saatani ngaakaletela bantu. (1 Jo. 3:8) Masimpe ngakuti, lino-lino Leza uyookumanizya kupenga koonse mane kukabe kutamani. Aboobo, tatuyandi kulekela zyintu zibyaabi izili munyika kuti zinyonganye lusyomo lwesu. Tuyanda kuzumanana kukkazyika moyo mbwaanga Jehova ulaafwaafwi kubweza ntaamu. Jehova wabikka ciindi bubi boonse nibuyoomana, alimwi uyoobweza ntaamu eeyi aciindi ceelede.—Is. 46:13; Nah. 1:9.
15 Mumazuba aano aakatazya aakumamanino mubweende obuno bwazyintu, tulakonzya kujana buyumuyumu bulibedelede ibusunka lusyomo lwesu. Ikuti swebo naa bayandwa besu bacitilwa zyintu munzila yalunya, tatweelede kunyema, tweelede kusyoma muli Jehova cakumaninina. Tatulondokede aboobo tacili cuubauba kucita oobo. Amuyeeye, ncaakacita Jesu kweelana ambokulembedwe mulugwalo lwa Matayo 26:39.—Amubale.
16. Ncinzi ncotweelede kucita muciindi eeci ciceede?
16 Muzeezo wakuti tulazibona zyintu zyacitika, ulakonzya kutunyonganya akutupa kucileka kukkazyika moyo mbuli Leza. Ino eeci caamba nzi? Muntu uutasyomi kuti mamanino alaafwaafwi ulakonzya kutalika kupanga bubambe bwakwe mwini kayeeya kuti andiza zisyomezyo zya Jehova tazikonzyi kuzuzikizyigwa. Munzila imwi waamba kuti, ‘Ndilalindila akubona naa ncobeni Jehova ulasyomeka kukucita nzyaamba.’ Ulakonzya kutalika kulipangila mpuwo omuno munyika, kulangaula mulimo uuvwolwa mali manji muciindi cakusaanguna kulangaula ziyandika zya Bwami bwa Leza, naa kusyoma mulwiiyo lwaatala kutegwa kapona buumi buli kabotu lino. Kucita oobo inga kwatondezya kubula lusyomo. Amuyeeye kuti, Paulo wakatukulwaizya kwiiya baabo ibakali kusyomeka ibakatambula zisyomezyo kuzwa kuli Jehova “kwiinda mulusyomo akukkazyika moyo.” (Heb. 6:12) Jehova wabikka kale ciindi nayoonyonyoona bweende oobu bubyaabi, alimwi takoomuka pe. (Hab. 2:3) Muciindi eeci ciceede, tweelede kubelesya ciindi cinji mumulimo wa Jehova. Alimwi tweelede kupakamana akubeleka canguzu mukukambauka makani mabotu, alo aatupa kuti katukkutila neliba lino.—Lk. 21:36.
NZILONGEZYO NZI ZIBOOLA AKAAMBO KAKUKKAZYIKA MOYO?
17, 18. (a) Ncoolwe cili buti ncotujisi akaambo kakuti Leza ulakkazyika moyo? (b) Nzilongezyo nzi nzyotuyootambula akaambo kakukkazyika moyo?
17 Kufwumbwa naa twali kubelekela Leza kwamyezi buyo misyoonto naa kwamyaka minji, tuyanda kumubelekela kukabe kutamani. Kukkazyika moyo kulatugwasya kuliyumya kusikila mane tukafwutuke, kufwumbwa naa kwacaala ciindi cili buti kuti bweende oobu bumane. Jehova lino watupa coolwe cakutondezya kuti tulakusyoma kusala kwakwe, alimwi akutondezya kuti tuyoozumanana kusyomeka kulinguwe nikuba kuti twanjila mumapenzi. (1 Pe. 4:13, 14) Leza alimwi ulatuyiisya kuba abube oobu bwakukkazyika moyo kutegwa tuliyumye alimwi kuti tukafwutuke.—1 Pe. 5:10.
18 Jesu ulijisi nguzu zyoonse kujulu alimwi aanyika, alimwi kunyina uukonzya kumukwempa kuzwa mubukwabilizi bwakwe—ccita ndinywe buyo. (Joh. 10:28, 29) Tatweelede kuyoowa ziboola kumbele niluba lufwu. Aabo ibalindila cakukkazyika moyo kusikila kumamanino bayoofwutulwa. Aboobo, tweelede kubikkila maano kutegwa nyika eeyi itatunyonganyi akucileka kusyoma Jehova. Alimwi tweelede kuba amakanze aakuzumanana kuyumya lusyomo lwesu akucibelesya kabotu ciindi Leza nacikkazyika moyo.—Mt. 24:13; amubale 2 Petulo 3:17, 18.
[Mibuzyo yaciiyo]
[Cifwanikiso icili apeeji 21]
Kukkazyika moyo mbuli Leza kuyoomugwasya kuti kamubikkila kapati maano kuziyandika zya Bwami alimwi akujana zilongezyo
