Xtachuna la Jehová chu Jesús kakgalhkgalhinaw
Xtachuna la Jehová chu Jesús kakgalhkgalhinaw
«Lantla makgapalama xliminat nkimPuchinakan, kaliʼakgatakgstit mpi kaj xpalakata xliʼakgaputaxtunkan.» (2 PED. 3:15)
¿LA XKGALHTINANTI?
¿La limasiyanit Jehová pi xakgalhkgalhina?
¿Tuku xlakata talakaskilh pi Jesús xkgalhkgalhilh lhuwa kilhtamaku?
¿Tuku tlan natlawaya xlakata nakatsiniyaw kgalhkgalhinanaw la Dios?
1. ¿Tukuya takgalhskinin katlawanikan lhuwa xlakskujni Dios?
CHATUM tala puskat tiku lhuwa kata skujnanima Jehová chu lhuwa taʼakglhuwit titaxtunit kgalhskininalh: «¿Naklatama xlakata naʼakxilha lisputni?». Lhuwa tiku nikxni makgxtakgkgonit Jehová na katlawanikan uma takgalhskinin. Chu chuna la, xlakata kimputumkan lakaskinaw kachilh kilhtamaku akxni Jehová «paks kmasastiy xlipaks nkatuwaj», chu kamasputulh tuku nitlan titaxtuyaw (Apoc. 21:5). Putum tuku lama masiya pi xlisputni xkakilhtamaku Satanás lakatsu wi. Pero min kilhtamaku lu tuwa makgkatsiyaw nakgalhkgalhinanaw.
2. ¿Tukuya takgalhskinin nakgalhtinanaw kʼuma artículo?
2 Biblia masiya pi xlakaskinka nakatsiyaw kgalhkgalhinanaw. Xlakata naʼakxilhaw la nakgantaxtukgo tuku Dios kinkawaninitan pi natlawa, talakaskin nakgalhiyaw akgtum tliwakga takanajla chu kakatsiw kgalhkgalhinanaw, xtachuna la xlakskujnin Dios xala makgasa (kalikgalhtawakga Hebreos 6:11, 12). Kalilakapastakwi xliʼakxilhtit Jehová. Xla tlan xtimasputulh uma lixkajni kakilhtamaku makgasa, pero kgalhkgalhima akxni chuna natlawa (Rom. 9:20-24). ¿Tuku xlakata kgalhkgalhima? ¿La limasiyalh Jesús uma tayat nema kgalhi Jehová chu la nakinkamakgtayayan nachuna tlawayaw? Xtakgalhtin uma takgalhskinin natlawa pi katatliwakglhli kintakanajlakan chu kakatsiw kgalhkgalhinanaw maski namin kilhtamaku nalakpuwanaw pi Jehová lu tamakgapalima xlakata natlawa tuku kinkawaninitan.
TUKU XLAKATA LU KGALHKGALHINAN JEHOVÁ
3, 4. 1) ¿Tuku xlakata Jehová ni tunkun tlawanit tuku lakaskin xlakata Katiyatni? 2) ¿Tuku tlawalh Jehová akxni nialh kgalhakgaxmatka kʼEdén?
3 Maski Jehová wa tiku kgalhi putum tamapakgsin wi tuku xlakata kgalhkgalhinan. Akxni nialh kgalhakgaxmatka kʼEdén tawilakgolh lu xlakaskinka takgalhskinin, chu Dios xkatsi pi xlakata liwana xkgalhtika xtalakaskin kilhtamaku. Xlakata liwana katsi tuku tlawakgo, la likatsikgo ángeles chu latamanin, xla tlawa tuku tlakg tlan kimpalakatakan (Heb. 4:13).
4 Jehová xlakaskin pi xkamanan Adán chu Eva xmatsamakgolh Katiyatni. Satanás akgskgawilh Eva chu Adán ni kgalhakgaxmatninalh, pero Dios ni lakgpalilh tuku xtlawaputun. Xla ni kamakgxtakgli latamanin, wata lakkaxwililh tuku xʼama tatlawa xlakata xkgantaxtulh xtalakaskin xpalakata latamanin chu katiyatni (Is. 55:11). Xlakata xkgantaxtulh xtalakaskin chu xkatsika pi xla lakgchan namapakgsinan, Jehová kgalhkgalhinit lhuwa mil kata xlakata tlakg tlan nakgantaxtukgo makgapitsi tuku xla lakaskin.
5. ¿Tuku tasikulunalin nakgalhiyaw xlakata Jehová ni tunkun kamasputunit tiku nitlan likatsikgo?
5 Atanu tuku xlakata Jehová ni kamasputunit tiku nitlan likatsikgo wa xlakata tlakg lhuwa latamanin tlan nakgalhikgo latamat nema ni kgalhi lisputni. La uku lhuwa tuku maklakaskima xlakata tlan nalakgtaxtukgo «lhuwa ntachixkuwitat» (Apoc. 7:9, 14; 14:6). Xlakata lichuwinanaw Dios, xla kawani latamanin pi kakatsikgolh xalakatitum xlimapakgsin chu tuku natlawa xTamapakgsin. Tuku tlakg xatlan, kgaxmatkgo latamanin wa «xatlan tamakatsinin», nema lichuwinanaw xlakata xTamapakgsin Dios (Mat. 24:14). Putum tiku Jehová kamamakxtumi litaxtukgo linatalan xlikalanka kakilhtamaku xlakata paxkikgo tuku xaʼakgstitum (Juan 6:44-47). Xapaxkina kiDioskan kamakgtaya xlakata tlan natalakatsuwinikgo. Xla na kalaksakma latamanin tiku namapakgsinankgo kʼakgapun. Akxni naʼankgo kʼakgapun, uma kstalaninanin Cristo namakgtayakgo latamanin tiku nakgalhakgaxmatkgo Dios xlakata nialh nakgalhikgo talakgalhin chu nikxni nanikgo. Wa xlakata, maski Jehová kgalhkgalhima, skujma xlakata nakgantaxtu tuku lakpuwanit natlawa.
6. 1) ¿La limasiyalh Jehová pi xkgalhkgalhinan akxni xlama Noé? 2) ¿La limasiyama la uku Jehová pi kgalhkgalhinan?
6 Jehová ni tunkun tlawa tuku lakaskin maski tiku lixkajni likatsikgo tlawakgonit lhuwa tuku nitlan chuna la tasiya xlakata tuku lalh akxni nina xmin Munkaklat. Ama kilhtamaku, Katiyatni xlitsama lhuwa talakgxtumit xalimaxana, tiku xlatlawani tuku nitlan, chu Jehová «katsanilh xnaku» xlakata latamanin xtlawakgo tuku nitlan (Gén. 6:2-8). Ni xʼama masta talakaskin pi putum kilhtamaku chuna xtawilalh, wa xlakata lakkaxwililh xmilh munkaklat xlakata xkamalakgsputulh. Pero Dios xkgalhkgalhinama «akxni xkilhtamaku xlama Noé», lakkaxwililh xlakata xlakgmaxtulh chu nachuna xfamilia (1 Ped. 3:20). Akxni xchanita kilhtamaku, makatsinilh tuku xlakkaxwilinit chu wanilh pi xtlawalh akgtum arca (Gén. 6:14-22). Nachuna Noé «xlichuwinama wantuku xaʼakgstitum» chu kawanilh latamanin pi xtalakatsuwima lisputni (2 Ped. 2:5, NM). Wa xlakata, Jesús wa pi kinkilhtamakujkan xʼama wan xtachuna la akxni xlama Noé. Jehová lakkaxwilinit pi namalakgsputu uma xalixkajni kakilhtamaku, pero niti katsi tukuya «nkilhtamaku nchuna nalay, chu xatu hora» (Mat. 24:36). La uku Dios kinkalakgayawanitan nakawaniyaw latamanin pi namin lisputli chu la tlan nalakgtaxtukgo.
7. ¿Lu makgapalama Jehová xlakata namakgantaxti tuku wanit natlawa? Kawanti tuku xlakata chuna wana.
7 ¿Wamputun uma pi Jehová kaj mastama talakaskin katitaxtulh kilhtamaku? Ni. Ni watiya wamputun kgalhkgalhinankan chu nitu makgkatsikan akxni wi tuku nitlan lama. Xlikana tlakg tuwa lilakapastakaw uma akxni tlakg lanka wanaw o wi tuku nitlan patinanaw. Tlan xlajwananaw o nalakapastakaw pi Dios lu tamakgapalima xlakata namakgantaxti tuku wanit (Heb. 10:36). Putum kilhtamaku kalakapastakwi pi wi tuku xlakata kgalhkgalhinan chu kilhtamaku nema tsankga limaklakaskima xlakata nakalimakgtaya tiku ni makgxtakgkgo (2 Ped. 2:3; 3:9). Pero na kaʼakxilhwi la Jesús kgalhkgalhinalh la Dios.
JESÚS AKGTUM LU TLAN LIʼAKXILHTIT XLAKATA KGALHKGALHINALH
8. ¿Tuku titaxtulh Jesús niku limasiyalh pi xkgalhkgalhinan?
8 Jesús akglhuwata mil kata xatapaxuwan tlawama xtalakaskin Dios. Akxni Satanás nialh kgalhakgaxmatninalh, Jehová lakkaxwililh pi xapuxku xKgawasa xmilh kKatiyatni chu Mesías xlitaxtulh. Kalilakapastakwi tuku tlawalh Jesús: kgalhkgalhilh akglhuwa mil kata asta akxni xchalh kilhtamaku (kalikgalhtawakga Gálatas 4:4). Chu ni kaj kgalhkgalhilh chu nitu tlawalh. Wata xtlawa taskujut nema xTlat xlakgayawanit. Akxni chalh kilhtamaku namin kKatiyatni, xkatsi pi Satanás xʼama makgni chuna la xlichuwinankanit (Gén. 3:15; Mat. 16:21). Tlawalh xtalakaskin Dios, maski lhuwa patinalh chuna limasiyalh pi ni xmakgxtakga Dios. Ni kaj lakpuwa la tlan xkitaxtulh o tuku xkgalhi. ¡Kinkamaxkin akgtum lu tlan liʼakxilhtit! (Heb. 5:8, 9.)
9, 10. 1) ¿Tuku tlawama Jesús xlakata kgalhkgalhima akxni Jehová nalimin lisputni? 2) ¿La kiliʼakxilhatkan xkilhtamaku Jehová?
9 Akxni Jesús malakastakwanikan, makglhtinalh limapakgsin kʼakgapun chu kKatiyatni (Mat. 28:18). Chu limaklakaskin uma limapakgsin xlakata namakgantaxti tuku Dios lakapastaknit chuna la lakkaxwilinit. Kxpaxtun xTlat, Jesús kgalhkgalhilh asta 1914, akxni xtalamakgasitsin “tatsokgostanikgolh” (Sal. 110:1, 2; Heb. 10:12, 13). Nialh makgas namasputu xkakilhtamaku Satanás, pero la uku kakgalhkgalhima latamanin chu kalin niku anan «nchuchut xla latamat» (Apoc. 7:17).
10 Xliʼakxilhtit Jesús kinkamasiyaniyan naʼakxilhaw la Jehová lakkaxwilinit xkilhtamaku. Xla xtlawaputun putum tuku xTlat kskinilh, pero kgalhkgalhilh asta akxni xchalh kilhtamaku chuna la xlakkaxwilinit Dios. Xlakata kgalhkgalhimaw namasputukan xkakilhtamaku Satanás, talakaskin pi na nakgalhkgalhinanaw chu ni nalakatsalayaw tuku Jehová wan chu ni naxlajwananaw. Wa xlakata, ¿la tlan nakgalhkgalhinanaw?
¿LA TLAN NAKGALHKGALHINANAW LA DIOS?
11. 1) ¿La kinkamakgtayayan takanajla chu nakgalhkgalhinanaw? 2) ¿Tuku xlakata xlitat tliwakga natawila kintakanajlakan?
11 ¿Tlan natayanikgo latamanin chu ni naxlajwanankgo maski lakgalhinanin? Tlan, xlakata chuna limasiyakgolh palakachuwinanin chu makgapitsi xlakskujnin Dios akxni Jesús nina xmin kKatiyatni. Takanajla chu kgalhkgalhinankan lu xlakaskinka (kalikgalhtawakga Santiago 5:10, 11). Komo ni xtikanajlakgolh tuku Jehová xkawaninit, ¿xtikgalhkgalhikgolh asta akxni xkgantaxtulh tuku xkawaninit? Milh kilhtamaku titaxtukgolh tuku tuwa pero lipawankgolh pi Dios xʼama makgantaxti tuku xkawaninit max tunkun o alistalh (Heb. 11:13, 35-40). La uku lhuwa tuku kgalhiyaw nema kinkamakgtayayan tliwakga natawila kintakanajlakan xlakata litaxtu «nkiliukxilhtitkan lantla nakanajlayaw» (Heb. 12:2). Xlikana akxni makgantaxtilh tuku xlichuwinankanit chu kinkawanin tuku Dios ama tlawa, tlawalh pi tlakg xlipawaw.
12. ¿Tuku tlan natlawayaw xlakata namatliwakglhaw kintakanajlakan?
12 ¿Tuku tlan natlawayaw xlakata namatliwakglhaw kintakanajlakan chu nakgalhkgalhinanaw? Lu xlakaskinka namakgantaxtiyaw xtastakyaw Dios. Akgtum liʼakxilhtit, kalilakapastakwi tuku xlakata pulana nawiliyaw xTamapakgsin Dios kkilatamatkan. ¿Tlan naliskujaw xlakata namakgantaxtiyaw Mateo 6:33? Max natalakaskin tlakg lhuwa nalichuwinanaw Dios o wi tuku nalakgpaliyaw kkilatamatkan. Kalilakapastakwi la Jehová kinkamaxkinitan talakaskin naskujniyaw. Max kinkamaxkinitan talakaskin wi tiku namakgalhtawakgayaw o kinkamaxkinitan takaksni nema «lakatsalaniy xlipaks kintapuwankan» (kalikgalhtawakga Filipenses 4:7). Akxni nalilakapastakaw tasikulunalin nema makglhtinanitaw xlakata kgalhakgaxmatnitaw Jehová, lu xlakaskinka naʼakxilhaw nakgalhkgalhinanaw (Sal. 34:8).
13. Kawanit tuku liʼakxilhtit tlan natamalakxtumiyaw xlakata la kgalhiyaw takanajla chu kgalhkgalhinanaw.
13 Uma tlan natamalakxtumiyaw la akxni wi tiku chananan, kuentajtlawa chu makgalanan. Makgatunu akxni lhuwa makgalanan, chanana tlakg xatapaxuwan chananampara. Pero katsi pi talakaskin nakgalhkgalhinan asta akxni namakgalanan pero uma ni tlawa pi nialh nachananamputun. Max asta tlakg nachananan xlakata lipawan pi namakgala tuku nachan. Nachuna xtastakyaw Dios. Makgatunu akxni katsiniyaw, lilatamayaw chu tlan kitaxtuyaw, tlakg lipawanaw Jehová chu kinkamakgtayayan nakgalhkgalhiyaw xtasikulunalin Dios nema katsiyaw pi namin (kalikgalhtawakga Santiago 5:7, 8).
14, 15. ¿La kiliʼakxilhatkan tapatin?
14 Xlakata nakgalhkgalhinanaw, na talakaskin naʼakxilhaw kakilhtamaku chu la wilaw chuna la Jehová. Akgtum liʼakxilhtit maski Dios akglhuwata mil kata lu nitlan limakgkatsi akxni akxilha la patinankgo latamanin, ni mastanit pi uma lu namakgalipuwan. Ni kaj chuna tamakgaxtakgli, wata makamilh xapuxku xKgawasa «namalakgsputuy xtatlaw akgskgawini» chu nalakkaxtlawa putum tuku nitlan katlawaninit latamanin (1 Juan 3:8). Alistalh putum tapatin kaj natitaxtu, chu tuku natlawa Jehová xliputum kilhtamaku natawila. Wa xlakata ni kalitaʼakglhuwiw tuku nitlan anan kxkilhtamaku Satanás, o nalakaskinaw pi tunkun kamasputuka, kakanajlaw tuku ni tasiya xlakata xliputum kilhtamaku natawilakgo. Jehová lakkaxwilinita akxni namasputu uma kakilhtamaku chu xlikana namakgantaxti (Is. 46:13; Nah. 1:9).
15 Uma xʼawatiya kilhtamaku max natitaxtuyaw lu tuwa taʼakglhuwit. Komo wi tuku nitlan nakinkatlawanikan o akxilhaw akxni patinan tiku lu paxkiyaw max nasitsiyaw. Maski kgalhiyaw talakgalhin chu tuwa namakgkatsiyaw, kaliskujwi xlakata nalipawanaw Jehová chuna la tlawalh Jesús, la wan Mateo 26:39 (kalikgalhtawakga).
16. ¿Tuku ni kilitlawatkan uma kilhtamaku nema tsankga?
16 Komo kgalhkgalhinamputunaw la Jehová, talakaskin nalipawanaw xTachuwin. ¿Tuku wamputunaw? Akxni wi tiku ni lipawan pi lisputni lakatsu wi, «tlan atanu tuku nalakkaxwili natlawa» komo ni nakgantaxtu tuku Jehová lichuwinanit. Akgtum liʼakxilhtit, max wi tuku lu xlakaskinka nalitaxtuputun kkakilhtamaku, nakgalhiputun tumin chu nialh pulana nawili xTamapakgsin Dios, o max lhuwa nakgalhtawakga xlakata nakgalhi akgtum tlan latamat. Tiku chuna lakapastaka limasiya pi ni tliwakga wi xtakanajla. Kalakapastakwi pi Pablo kinkawanin natlawayaw chuna la tiku “xkanajlakgo” xkgalhkgalhinankgo chu makglhtinankgolh tuku Dios xwanit natlawa (Heb. 6:12). Jehová namasputu uma kakilhtamaku akxni nakgantaxtu tuku lakapastaknit natlawa (Hab. 2:3). Pero ni kamastaw talakaskin pi chuna la skujniyaw Dios kaj nalitaxtu la tuku lismaninitaw. Wata skgalalh katawilaw chu xatapaxuwan kalichuwinaw xalakwan xalaksasti tamakatsin, akgtum taskujut nema tlan nakinkamamakgkatsiniyan la uku (Luc. 21:36).
TUKU TLAN KITAXTU AKXNI KGALHKGALHINANAW
17, 18. 1) ¿Tuku tlan makglhtinanaw xlakata Jehová kgalhkgalhinan? 2) ¿La kinkamakgtayayan nakgalhkgalhinanaw la uku?
17 Maski aku lakgapaswi Jehová o akglhuwata kata, putum kilhtamaku xkujnaniputunaw. Akxni nakgalhkgalhinanaw nakinkamakgtayayan natayaniyaw asta akxni nalakgtaxtuyaw, maski ni katsiyaw la xlilhuwa kilhtamaku tsankga. La Jehová kinkamaxkiyan talakaskin nalimasiyayaw pi lipawanaw xliputum kinakujkan chu komo natalakaskin tlan napatinanaw xlakata xtukuwani (1 Ped. 4:13, 14). Nachuna, na kinkamasiyaniman xlakata nakgalhkgalhinanaw chu uma nakinkalakgmaxtuyan (1 Ped. 5:10).
18 Jesús makglhtinanita limapakgsin kʼakgapun chu kKatiyatni, wa xlakata chatunu chatunu nalaksaka komo natamakgatlini Jesús (Juan 10:28, 29). Ni xlilat napekuaniyaw tuku aku namin chu linin. Tiku natayani asta namin lisputni wa tiku nalakgtaxtu. Wa xlakata ni kamastaw talakaskin nakinkaʼakgskgawiyan kakilhtamaku chu ni natlawa pi nialh nalipawanaw Jehová. Kamatliwakglhwi kintakanajlakan chu kalitamakgtayaw xlakata Dios kinkakgalhkgalhiman (Mat. 24:13; kalikgalhtawakga 2 Pedro 3:17, 18).
[Takgalhskinin]
[Dibujos xla página 21]
Komo nakgalhkgalhinanaw la Dios, natlawayaw xtaskujut chu nakgalhiyaw lhuwa tasikulunalin
