1. Sampela gutpela bratasista i gat wanem askim?

 WANPELA sista husat i bin lotuim Jehova inap longpela taim na i bin karim planti hevi, i mekim askim olsem, “Pinis bai kam paslain long mi dai?” Sampela husat i bin mekim wok bilong Jehova inap planti yia i mekim wankain askim. Yumi laik tru long lukim dispela de we God bai rausim ol hevi bilong nau na mekim olgeta samting i kamap nupela. (Rev. 21:5) Maski i gat planti as na yumi bilip olsem pinis bilong dispela graun Satan i bosim i klostu tru, em i hatwok long kamapim pasin bilong i no les kwik taim yumi wetim dispela de.

2. Wanem ol askim long pasin bilong i no les kwik bai yumi kisim bekim bilong ol?

² Baibel i tok long yumi mas i gat pasin bilong i no les kwik. Olsem ol wokboi bilong God long bipo, bai yumi kisim ol samting God i promis long givim yumi sapos yumi gat strongpela bilip na yumi no les kwik long wetim taim bilong em long truim ol dispela promis. (Ritim Hibru 6:11, 12.) Jehova yet i kamapim pasin bilong i no les kwik. Em inap pinisim pasin nogut long bipo yet, tasol em i wet long mekim long taim stret. (Rom 9:20-24) Bilong wanem em i no save les kwik? Olsem wanem Jisas i stap gutpela piksa long bihainim pasin bilong God long i no les kwik? Bilong wanem em i gutpela long lain long pasin bilong i no les kwik olsem Jehova? Ol bekim bilong ol dispela askim bai helpim yumi long strongim bilip bilong yumi na kamapim pasin bilong i no les kwik, maski i luk olsem Jehova i isi isi tumas long mekim samting.

3, 4. (a) I gat wanem as na Jehova i kamapim pasin bilong i no les kwik? (b) Taim Adam na Iv i sakim tok, Jehova i mekim wanem?

³ I no gat wanpela i gat bikpela namba moa winim Jehova long bosim ol samting bilong heven na graun, na i no olsem em i mas wet long pinisim ol hevi. Tasol i gat gutpela as na  Jehova i no les kwik. Pasin bikhet long Iden i mekim na i gat sampela bikpela askim em bekim bilong ol bai helpim olgeta lain i stap long heven na long graun. Jehova i wet bikos em i save olsem bikpela haptaim i mas lus pastaim bilong bekim gut ol dispela askim. Em i save gut long olgeta samting ol lain long heven na long graun i tingting long en na mekim, olsem na samting em i mekim em bilong helpim tru yumi.—Hib. 4:13.

⁴ Jehova i tingting pinis olsem ol tumbuna bilong Adam na Iv i mas sindaun long olgeta hap bilong graun. Taim Satan i giamanim Iv, na Adam i bin sakim tok, God i no tingting planti. Em i no kirap mekim nating ol samting, o les kwik long ol man. Nogat. Em i makim rot em bai bihainim bilong inapim ol samting em i tingting pinis long mekim long ol man na long graun. (Ais. 55:11) Jehova i bosim gut em yet na i no les kwik, olsem na em inap kamapim ol samting em i tingting pinis long mekim na soim olsem wok bos bilong em i nambawan gutpela rot bilong helpim ol man. Bilong mekim long rot i gutpela tru, em i bin wet inap sampela tausen yia bilong inapim sampela hap bilong ol samting em i tokaut pinis long mekim.

5. Wanem wanpela gutpela as na yumi wet long Jehova?

⁵ Narapela as na Jehova i no les kwik, em long opim rot long planti manmeri moa long kisim laip oltaim. Nau yet, em i mekim ol samting bilong kisim bek “bikpela lain manmeri.” (Rev. 7:9, 14; 14:6) Long rot bilong wok autim tok bilong yumi, Jehova i singautim ol manmeri long kisim save long Kingdom bilong em na ol stretpela lo bilong em. Tok bilong Kingdom em “gutnius” bilong helpim ol manmeri. Tru tumas, i no gat narapela gutnius i winim dispela! (Mat. 24:14) Olgeta wan wan man Jehova i singautim, ol i kam insait long wanpela oganaisesen i stap long olgeta hap we ol manmeri i stap pren tru na i laikim stretpela pasin. (Jon 6:44-47) Gutpela God bilong yumi i mekim olgeta dispela samting na bai em i ken orait long ol manmeri. Na tu, em i wok long makim sampela manmeri long insait long gavman bilong em long heven. Taim ol i go long heven, ol bai helpim ol man husat i bihainim tok long kamap gutpela olgeta na kisim laip oltaim. So, taim em i wet i stap, Jehova i wok long mekim ol samting bilong truim ol tok promis bilong em. Na ol samting em i mekim em bilong helpim yumi.

6. (a) Olsem wanem Jehova i bin kamapim pasin bilong i no les kwik long taim bilong Noa? (b) Olsem wanem Jehova i kamapim pasin bilong i no les kwik long taim bilong yumi?

⁶ Maski ol man i mekim ol samting Jehova i no laikim, em i no save les kwik. Pasin em i bihainim paslain long Bikpela Tait i kamapim klia dispela samting. Jehova i bin “bel hevi tru,” long wanem, ol manmeri i mekim na pasin pamuk na pasin pait i go bikpela tru, na ol manmeri i tingting tasol long ol samting nogut. (Stt. 6:2-8) Tasol em i no inap larim ol pasin nogut i stap oltaim. Olsem na em i wokim disisen long bringim Bikpela Tait i kam na bagarapim ol bikhet manmeri. Taim Jehova i wet i stap, em i mekim ol samting bilong helpim Noa na famili bilong en long abrusim bagarap. (1 Pita 3:20) Long taim stret, God i tokim Noa long Bikpela Tait bai kamap na i tokim em long wokim sip. (Stt. 6:14-22) Na tu, Jehova i tokim Noa long tok lukaut long ol arapela olsem klostu nau bagarap bai kamap. Baibel i tok olsem Noa em “man bilong tokaut long stretpela pasin.” (2 Pita 2:5) Jisas i tok taim bilong yumi i wankain olsem taim bilong Noa. Jehova i makim taim pinis we em bai pinisim pasin nogut bilong nau, tasol i no gat wanpela man i save long “dispela de na dispela aua.” (Mat. 24:36) Long nau, God i givim wok long yumi long tok lukaut long ol manmeri na tokim ol long olsem wanem ol i ken abrusim bagarap.

7. Yu ting Jehova i wok isi isi tumas long truim ol promis bilong en? Stori long dispela.

⁷ Pasin bilong Jehova long i no les kwik i no makim olsem em i wet nating inap long sampela haptaim i pinis pastaim. Nogat. Na yumi no ken kisim tingting olsem em i no tingim yumi! Dispela kain tingting inap kamap taim yumi go lapun o yumi karim pen nau long dispela taim  nogut. Ating yumi inap bel hevi na pilim olsem God i wok isi isi tumas long truim ol promis bilong en. (Hib. 10:36) No ken lusim tingting olsem i gat ol gutpela risen na em i no les kwik, na tu, em i wok long yusim dispela haptaim long helpim ol gutpela wokboi bilong em. (2 Pita 2:3; 3:9) Nau bai yumi skelim olsem wanem Jisas i bin bihainim pasin bilong Papa bilong en long i no les kwik.

8. Wanem ol samting i bin kamap na Jisas i kamapim pasin bilong i no les kwik?

⁸ Jisas i wok long bihainim laik bilong God na inap planti tausen yia pinis em i amamas long mekim olsem. Taim Satan i bikhet, Jehova i tok olsem Pikinini bilong em bai kam long graun na kamap Mesaia. Tingim pasin bilong i no les kwik Jisas i bin kamapim taim em i wet inap planti tausen yia paslain long em i kamap Mesaia. (Ritim Galesia 4:4.) Long dispela taim em i no wet nating tasol, nogat. Em i bisi tru long mekim wok Papa i givim em. Na taim em i kam daun long graun, em i save olsem Satan bai kirapim ol man long kilim em i dai, olsem tok profet i bin makim. (Stt. 3:15; Mat. 16:21) Jisas i daun long laik bilong God na em i no les kwik, maski em i mas karim bikpela pen. Jisas i no tingim em yet. Na maski em i Pikinini Bilong God, em i gat pasin daun na em i orait long karim pen. Jisas i stap nambawan gutpela piksa long pasin bilong stap gut long God, na yumi mas bihainim pasin bilong em.—Hib. 5:8, 9.

9, 10. (a) Jisas i wok long mekim wanem taim em i wetim Jehova long kirap mekim sampela samting? (b) Olsem wanem yumi inap bihainim pasin bilong Jisas?

⁹ Bihain long Jisas i kirap bek, em i kisim namba long bosim olgeta samting long heven na graun. (Mat. 28:18) Oltaim em i bin yusim namba em i holim bilong kamapim ol samting Jehova i tingting pinis long mekim na oltaim em i bin mekim ol samting long taim stret Jehova i makim. So Jisas i wet na i no les kwik taim em i sindaun long han sut bilong God i go inap long 1914. Long dispela taim God i bin givim namba long Jisas long bosim ol birua bilong em. (Sng. 110:1, 2; Hib. 10:12, 13) I no longtaim na em bai pinisim ol pasin bilong graun em Satan i bosim. Taim Jisas i wet i stap, em i helpim ol manmeri long mekim ol samting na bai God i ken orait long ol, na em i bringim ol i go long “wara bilong laip.”—Rev. 7:17.

¹⁰ Yu luksave long olsem wanem yu inap bihainim pasin bilong Jisas? Jisas i save olsem Jehova i bin makim taim stret bilong mekim ol samting. Jisas i laik tru long mekim samting Papa i bin tokim em long mekim. Tasol em i orait long wet inap long taim God yet i makim. Taim yumi wet long pinis bilong ol samting bilong dispela graun em Satan i bosim, yumi mas i gat pasin bilong i no les kwik. Yumi mas wet long God i kirap mekim ol samting na yumi no ken givap taim yumi bel hevi. Olsem wanem yumi ken kisim kain pasin olsem bilong i no les kwik?

11. (a) Olsem wanem pasin bilong i no les kwik i wok wantaim bilip? (b) Bilong wanem i gat as tru na yumi i gat strongpela bilip?

¹¹ Paslain long Jisas i kam long graun, ol profet na ol arapela gutpela wokboi bilong God i bin soim olsem ol sinman inap kamapim pasin bilong stap strong na i no les kwik. Pasin bilong ol long i no les kwik i wok wantaim bilip bilong ol. (Ritim Jems 5:10, 11.) Sapos ol i no gat bilip, o ol i no bilipim tru ol tok promis bilong Jehova, bai ol i no stap isi na wetim truim bilong ol tok promis bilong en. Tasol planti taim ol i sanap strong maski ol i karim ol bikpela hevi o ol i pret. Ol i mekim olsem, long wanem, ol i bilip olsem God bai truim ol tok promis bilong en. (Hib. 11:13, 35-40) Baibel i soim olsem i gat as tru na yumi gat strongpela bilip long nau. Jisas i stap pinis olsem “Man Bilong Inapim Tru bilip bilong yumi.” (Hib. 12:2) Em i bin truim planti tok profet na helpim yumi long kliagut moa long ol samting God i tingting pinis long mekim.

12. Yumi ken mekim wanem bilong strongim bilip bilong yumi?

 ¹² Olsem wanem yumi inap strongim bilip bilong yumi na bai yumi ken kamapim moa yet pasin bilong i no les kwik? Wanpela bikpela samting em long bihainim ol tok bilong God. Olsem, tingim as na yu mas wok long painim Kingdom pastaim. Yu inap bihainim gut moa tok i stap long Matyu 6:33? Ating yu inap lusim bikpela haptaim moa long autim tok o mekim sampela senis we yu no bisi tumas long ol samting bilong graun. Jehova i blesim pinis wok yu bin mekim bilong bihainim tok bilong em. Ating em i bin givim wanpela nupela Baibel stadi long yu o helpim yu long kisim “dispela bel isi bilong God i winim tru tingting bilong man.” (Ritim Filipai 4:7.) Taim yu tingim ol dispela blesing, yu bai luksave olsem em i gutpela long yu no les kwik.—Sng. 34:8.

13. Wanem tok piksa i soim olsem bilip bilong yumi inap helpim yumi long kamapim moa yet pasin bilong i no les kwik?

¹³ Wanpela tok piksa inap helpim yumi long kliagut long olsem wanem bilip bilong yumi inap helpim yumi long kamapim moa yet pasin bilong i no les kwik. Fama i save planim sid, lukautim gaden, na kisim kaikai. Taim gaden i kamapim planti kaikai, fama i kisim strong long planim ol sid gen. Ating bihain fama bai planim ol sid long sampela gaden moa. Em i planim ol sid maski em i save em i mas wet i stap bilong kisim kaikai. Em i bilip olsem em bai kamautim kaikai. Long wankain pasin, taim yumi lain long ol tok bilong Jehova, na bihainim, na lukim ol gutpela samting i kamap, pasin bilong yumi long trastim na bilip long Jehova bai i go bikpela moa. Long dispela rot em i no hatwok long stap isi na wetim ol blesing yumi save yumi bai kisim.—Ritim Jems 5:7, 8.

14, 15. Yumi mas i gat wanem tingting long ol manmeri i karim pen na hevi?

¹⁴ Narapela rot we yumi ken kamapim moa yet pasin bilong i no les kwik em long holim wankain tingting olsem bilong Jehova long ol samting bilong dispela graun na sindaun bilong  yumi yet. Olsem, skelim tingting bilong Jehova long ol pen na hevi ol man i karim. Inap longpela taim, Jehova i bin lukim ol man i karim pen na hevi, na dispela i givim pen long em. Tasol dispela pen i no pasim em long mekim ol gutpela pasin. Em i salim Pikinini bilong em “bilong bagarapim ol samting Satan i kamapim” na rausim olgeta pen na hevi Satan i bin kamapim long ol man. (1 Jon 3:8) I no longtaim na God bai pinisim olgeta pen na hevi inap oltaim oltaim. Olsem na yumi no laik larim pasin bilong dispela graun i daunim bilip bilong yumi. Yumi no laik kisim pasin bilong les long wetim Jehova. Yumi mas bilip long ol promis bilong God. Jehova i makim pinis taim bilong pinisim pasin nogut, na em bai mekim long taim stret.—Ais. 46:13; Nah. 1:9.

¹⁵ Long dispela taim bilong las de, ating yumi bai karim sampela bikpela hevi em bai traim bilip bilong yumi. Nogut yumi yet o lain yumi laikim tumas i karim pen long pasin nogut narapela i mekim long ol o long sampela narapela as. Sapos olsem, yumi no ken belhat, yumi mas bilip strong long Jehova. Yumi no gutpela olgeta, olsem na i hatwok long mekim olsem. Tasol tingim samting Jisas i bin mekim taim yumi ritim Matyu 26:39.—Ritim.

16. Taim yumi wetim pinis i kamap, yumi mas abrusim wanem pasin?

¹⁶ Man husat i gat tupela tingting olsem pinis i klostu o nogat, em inap kisim tingting kranki. Em inap ting olsem em i mas mekim ol plen bilong em yet, nogut ol tok promis bilong Jehova i no kamap tru. Em inap ting olsem, ‘Bai mi wet na lukim, Jehova bai kamapim samting em i promis long mekim o nogat.’ Dispela kain tingting bai mekim man i hatwok long bihainim pasin bilong i no les kwik. Long dispela rot, ating em bai traim long kisim namba bilong dispela graun o kirap long bilip long mani na lusim pasin bilong tingim Kingdom bilong God pastaim. O ating em bai go long yunivesiti long kisim gutpela sindaun long nau. Tasol dispela bai soim olsem bilip bilong em i no strong. Tingim, Pol i tokim yumi long bihainim pasin bilong ol lain i “bilip na i no les kwik” na long dispela as, Jehova i promis long givim ol blesing long ol. (Hib. 6:12) Jehova i wokim tingting pinis olsem em bai pinisim pasin nogut bilong dispela graun, na em bai mekim long taim stret. (Hab. 2:3) Taim dispela i no kamap yet, yumi mas abrusim pasin bilong mekim liklik wok tasol bilong Jehova. Yumi mas tingim olsem yumi stap long taim bilong las de na yumi mas wok strong long autim tok. Dispela wok inap givim bikpela amamas long yumi long nau.—Luk 21:36.

17, 18. (a) Yumi gat rot long mekim wanem taim yumi wet i stap na yumi no les kwik? (b) Sapos yumi no les kwik, orait wanem ol blesing bai yumi kisim?

¹⁷ Maski yumi bin mekim wok bilong God inap sampela mun o inap planti yia, yumi laik mekim wok bilong em inap oltaim oltaim. Pasin bilong i no les kwik bai helpim yumi long sanap strong inap long pinis bilong dispela taim nogut bilong nau, maski yumi mas wet i go inap long wanem taim. Jehova i givim rot long yumi long soim olsem yumi trastim ol disisen bilong em na yumi bai stap gut long em maski yumi mas kisim pen na hevi. (1 Pita 4:13, 14) Na tu, God i trenim yumi na bai yumi inap sanap strong na i no les kwik i go inap long pinis i kamap na God i kisim bek yumi.—1 Pita 5:10.

¹⁸ Jisas i gat namba long bosim olgeta samting long heven na long graun, na sapos yu stap gut long em, orait i no gat wanpela samting inap pasim em long lukautim yu. (Jon 10:28, 29) I no gat wok long pret long ol samting bai kamap bihain o pret long indai. Man i no les kwik na i sanap strong inap long pinis, God bai kisim bek em. Olsem na yumi no ken larim tingting bilong dispela graun i paulim tingting bilong yumi na yumi no trastim moa Jehova. Nogat. Long dispela taim we God i no les kwik, yumi mas tingting strong long mekim ol samting bilong strongim bilip bilong yumi na yusim gut taim bilong yumi.—Mat. 24:13; ritim 2 Pita 3:17, 18.