Jchanbetik smalael yuʼun Jeova xchiʼuk li Jesuse
Jchanbetik smalael yuʼun Jeova xchiʼuk li Jesuse
«Naʼic me ti ep smucʼul yoʼnton li Cajvaltique, yuʼun tscʼan chijcolutic.» (2 PED. 3:15)
¿KʼUSI CHATAKʼ?
¿Kʼuxi yakʼoj ta ilel Jeova ti oy smalael yuʼune?
¿Kʼu yuʼun jal tajek laj yakʼ ta ilel smalael yuʼun li Jesuse?
¿Kʼusitik xuʼ jpastik sventa jchʼiestik li smalael oy yuʼun Diose?
1. ¿Kʼusi tsjakʼbe sbaik epal tukʼil yajtuneltak Dios?
JUN ermana ti epal jabiletik tukʼ yakʼoj-o sba ta stojolal Jeova xchiʼuk ti ep vokolil snuptanoje, xi la sjakʼbe sbae: «¿Mi ta to van xkil chtal li slajebal kʼakʼale?». Epal ermanoetik ti tukʼ yakʼoj sbaik ta epal jabiletike, jaʼ jech tsjakʼbe sbaik ek. Stalel onoʼox ti oy ta koʼontontik ti xkʼot skʼakʼalil ti tspas «ta achʼ scotol li cʼusitic [oy]» li Jeovae xchiʼuk ti xakʼbe slajeb li vokoliletik ta jnuptantike (Apoc. 21:5). Taje jaʼ chakʼ ta ilel ti slajebal kʼakʼale toj nopol xa skʼan xtal, pe mu kʼunuk onoʼox ta akʼel ta ilel ti oy smalael kuʼuntike.
2. ¿Kʼusi sjakʼobiltak ta jtakʼtik li ta xchanobil liʼe?
2 Li Vivliae chal ti skʼan oyuk smalael kuʼuntike. Sventa xkiltik xkʼot ta pasel li kʼusi yaloj tspas Diose skʼan xkakʼtik ta ilel xchʼunel koʼontontik xchiʼuk ti oyuk smalael kuʼuntike, jech kʼuchaʼal la spasik li yajtuneltak Dios ta voʼnee (kʼelo Hebreos 6:11, 12). Jnoptik ta stojolal li Jeovae. Li stuke xuʼ ox van laj yakʼbe slajeb ta ora noʼox li chopol balumil liʼe, pe jaʼ smalaoj ti kʼusi ora yakʼojbe yoraile (Rom. 9:20-24). ¿Kʼu yuʼun toj ep smalael yuʼun? ¿Kʼuxi la xchanbe smalael yuʼun Dios li Jesuse xchiʼuk kʼuxi ta jtabetik sbalil mi jech ta jpastik eke? Mi ta jsabetik stakʼobiltak taje, jaʼ me tskoltautik sventa oyuk xchʼunel koʼontontik xchiʼuk smalael kuʼuntik akʼo mi ta jnoptik ti muʼyuk to chkʼot li kʼusitik yaloj Jeovae.
KʼU YUʼUN OY SMALAEL YUʼUN LI JEOVAE
3, 4. 1) ¿Kʼu yuʼun yakʼoj ta ilel smalael yuʼun Jeova sventa xkʼot ta pasel li kʼusi tskʼan ta sventa li Balumile? 2) ¿Kʼusi la spas Jeova kʼalal laj xaʼox stoy sbaik li Adán xchiʼuk Evae?
3 Akʼo mi jaʼ noʼox stuk xuʼ spas mantal ta vinajelbamil li Jeovae, oy lek srasonaltak yuʼun ti chakʼ ta ilel ti oy smalael yuʼune. Kʼalal la stoy sbaik li Adán xchiʼuk Eva ta Edene, ep kʼusitik laj yichʼ jakʼel ti toj tsotsik skʼoplale, li Jeovae snaʼoj onoʼox ti mu ta aniluk ta takʼel taje. Ta skoj ti lek xojtikin kʼusi tspasik, kʼuyelan stalelalik li anjeletik xchiʼuk li krixchanoetike, jaʼ tspas li kʼusi xuʼ mas jtabetik sbalile (Heb. 4:13).
4 Li kʼusi ox tskʼan Jeova ta stojolal li snitilulal Adán xchiʼuk Evae, jaʼ ti snojesik li Balumile. Kʼalal la sloʼla Eva li Satanase, li Adane muʼyuk la xchʼunbe smantal Dios ek, pe akʼo mi jech, li Diose muʼyuk laj yikta spasel li kʼusi yaloj onoʼox tspase. Li Diose muʼyuk maʼ ti mu xa snaʼ kʼusi tspas ta skoj li kʼusi kʼot ta pasel taje xchiʼuk muʼyuk laj yikta stuk li krixchanoetike, yuʼun oy kʼusitik la spas sventa li kʼusi onoʼox snopoj ta stojolal li krixchanoetike xchiʼuk li Balumile (Is. 55:11). Sventa xkʼot ta pasel li kʼusi onoʼox snopoj tspas xchiʼuk ti tspakbe skʼoplal li mukʼul pasmantal yuʼune, li Jeovae smalaoj ta smilal noʼox jabiletik sventa spas junantik li kʼusi tskʼan mi jaʼ xa yorail chile.
5. ¿Kʼusi bendision xuʼ jtatik ti yakʼoj ta ilel smalael yuʼun li Jeovae?
5 Yan srasonal xtok ti kʼu yuʼun yakʼoj ta ilel smalael yuʼun li Jeovae, jaʼ ti xuʼ mas krixchanoetik staik li kuxlejal sbatel osile. Li avie, oy kʼusi yakal tspas sventa tspoj «epal cristianoetic» (Apoc. 7:9, 14; 14:6). Kʼalal ta jcholtik mantale, jaʼ ta stunes Jeova ti akʼo xtalik li krixchanoetik yoʼ xchanik li stukʼil mantaltake xchiʼuk li kʼusi tspas li Ajvalilal yuʼune. Ta melel, li «Lequil Aʼyej» ta sventa li Ajvalilal yuʼun Dios ta sventa li krixchanoetike, jaʼ li kʼusi mas leke (Mat. 24:14). Skotol li buchʼutik ikʼbilik talel yuʼun Jeovae, ta me xkʼotik ta jun mukʼta utsʼ alalil ta spʼejel Balumil ti jaʼ skʼanojik li tukʼilale (Juan 6:44-47). Li jkʼanvanej Dios kuʼuntike, tskoltautik sventa lekuk xkil jbatik xchiʼuk. Li Dios eke yakal tstʼuj lokʼel ta stojolal krixchanoetik li buchʼutik ch-ajvalilajik ta vinajele. Kʼalal mi la stsak li yabtelik ta vinajele, li yajtsʼaklomtak Cristo taje tskoltaik li jchʼunej mantal krixchanoetik sventa staik tukʼilal xchiʼuk li kuxlejal sbatel osile. Akʼo mi oy smalael yuʼun li Jeovae, pe oy kʼusitik tspas sventa chkʼot ta pasel li kʼusi onoʼox tskʼan tspase.
6. 1) ¿Kʼuxi laj yakʼ ta ilel Jeova ti oy smalael yuʼun li ta skʼakʼalil Noee? 2) ¿Kʼuxi chakʼ ta ilel ti oy smalael yuʼun Jeova li ta jkʼakʼaliltike?
6 Li Jeovae toj echʼ noʼox oy smalael yuʼun, pe jaʼuk li chopol krixchanoetike yolbaj xa ta sabeik sjol, jech kʼuchaʼal li kʼusi kʼot ta pasel kʼalal skʼan toʼox xtal li Nojelal ta voʼe. Taje jaʼo noj ta mulivajel xchiʼuk ta majbail li Balumile, li Jeovae «toj vocol laj yaʼay» ta skoj li kʼusitik chopol tspasik li krixchanoetike (Gén. 6:2-8). Pe li Diose muʼyuk me te stsʼikoj-o ta sbatel osil, jaʼ yuʼun laj yakʼ tal nojelal ta voʼ sventa xlaj li jtoyba krixchanoetike. Pe akʼo mi jech, «cʼalal cuxul toʼox li Noee», li Diose oy kʼusi la spas sventa kolem xkom xchiʼuk yutsʼ yalal (1 Ped. 3:20). Kʼalal la sta yorail laj yile laj yalbe li kʼusi snopoj tspase xchiʼuk laj yalbe ti akʼo meltsan junuk arkae (Gén. 6:14-22). Jech xtok, li Noee «laj yal ta jamal cʼusi tucʼ ta pasel» ta stojolal xchiʼiltak ti jutuk xa skʼan xtal slajelike (2 Ped. 2:5). Li Jesús eke laj yal ti xkoʼolaj ta skʼakʼalil Noé li jkʼakʼaliltike. Li Jeovae yaloj xa onoʼox kʼusi ora chakʼbe slajeb li kʼusitik chopol avie, pe mi junuk krixchano snaʼoj «li cʼusi ora chcʼot yoraile» (Mat. 24:36). Li avi kʼakʼale, yakʼojbutik jun kabteltik li Diose, jaʼ ti jpʼijubtastik krixchanoetik xchiʼuk ti xkalbetik kʼuxi xuʼ xkolike.
7. ¿Mi chjalij xa van tajek li kʼusi yaloj tspas Diose? Albo smelolal.
7 Vaʼun chaʼa, ¿mi jaʼ van skʼan xal ti naka noʼox chakʼ echʼuk kʼakʼaletik li Jeovae? Ta melel moʼoj. Yuʼun mu xkoʼolaj li smalael xchiʼuk ti mu kʼusi sventa-oe. Jaʼ yuʼun, melel onoʼox ti mu kʼunuk ta pasel ti teuk-o ta joltik kʼalal chijyijubutik batel o kʼalal chkil jvokoltik liʼ ta balumile. Xuʼ van xijchibajutik o jnoptik ti chjalij xa tajek li kʼusi yaloj tspas Diose (Heb. 10:36). Pe mu me xchʼay ta joltik ti oy lek srasonaltak yuʼun ti oy smalael yuʼune xchiʼuk li skʼakʼalil ti mu to xtale, jaʼ sventa tskolta li tukʼil yajtuneltake (2 Ped. 2:3; 3:9). Jkʼeltik xtok, kʼuxi la xchanbe smalael yuʼun Dios li Jesuse.
LEK TA CHANBEL LI SMALAEL YUʼUN JESUSE
8. ¿Butik laj yakʼ ta ilel ti oy smalael yuʼun li Jesuse?
8 Li Jesuse xmuyubaj noʼox tspas li kʼusi tskʼan Diose xchiʼuk ta smilal noʼox jabiletik spasoj talel. Kʼalal la stoy sba li Satanase, li Jeovae la snop ti tstak talel ta Balumil li sbaʼyel Nichʼone xchiʼuk ti xkʼot ta Mesiase. Jnoptik noʼox ti kʼuyelan laj yakʼ ta ilel smalael yuʼun li Jesús kʼalal ta smilal xa noʼox jabil la smala sventa sta yorail li kʼusi albil xa noʼoxe (kʼelo Gálatas 4:4). Kʼalal jaʼo yakal tsmala taje, maʼuk noʼox smeyoj skʼob kom, moʼoj, yuʼun laj yakʼ yoʼonton spasel li abtelal akʼbat yuʼun Stote. Kʼalal jaʼo tal ta Balumile, snaʼoj xa onoʼox ti jaʼ chmilat yuʼun li Satanase, jech kʼuchaʼal chal ta albilkʼope (Gén. 3:15; Mat. 16:21). Laj yakʼ ta ilel smalael yuʼun kʼalal la spas li kʼusi tskʼan yoʼonton Diose, akʼo mi ep vokolil la snuptan, taje jech laj yakʼ ta ilel ti tukʼ laj yakʼ sbae. Maʼuk noʼox laj yichʼ sba ta kʼux stuk. ¡Jaʼ jun slekil kʼelobil kuʼuntik! (Heb. 5:8, 9.)
9, 10. 1) ¿Kʼusi yakal tspas Jesús yoʼ to tsmala sventa xkʼot ta pasel li kʼusi tskʼan yoʼonton Jeovae? 2) ¿Kʼu yelan skʼan xkiltik li yorail yakʼoj Jeovae?
9 Kʼalal chaʼkuxi xaʼox li Jesuse, laj yichʼ akʼbel svuʼel sventa tsventain li vinajel xchiʼuk li Balumile (Mat. 28:18). Ta onoʼox stunes sventa chakʼ kʼotuk ta pasel li kʼusi tskʼan tspas Dios ti kʼuyelan yorail snaʼ x-abteje. Li Xnichʼon Diose laj yakʼ ta ilel smalael yuʼun kʼalal te chotol la smala ta sbatsʼikʼob Stot kʼalal to ta 1914, jaʼ to kʼalal la sta «yorail ch-acʼbat stecʼubin scotol li yajcontrae» (Sal. 110:1, 2; Heb. 10:12, 13). Jutuk xa me skʼan xakʼbe slajeb li slumal Satanase, pe yoʼ to mu xkʼot ta pasel taje, oy to smalael yuʼun ta stojolal li krixchanoetike xchiʼuk jaʼ chikʼ batel «ta nioʼ sventa cuxlejal» (Apoc. 7:17).
10 Li skʼelobil laj yakʼ Jesuse chakʼ jchantik ti kʼuyelan skʼan xkiltik li yorail snaʼ x-abtej li Jeovae. Ta melel, xuʼ van oy tajek ta yoʼonton spasel kʼusi ch-albat yuʼun li Stote, pe akʼo mi jech, la smala kʼusi ora ch-albat. Yoʼ to ta jmalatik slajeb li xchopol balumil Satanase, jkotoltik skʼan oyuk smalael kuʼuntik pe maʼuk jpastik li kʼusi ta jkʼan jtuktike. Jaʼ yuʼun, ¿kʼuxi xuʼ oyuk kuʼuntik li smalaele?
¿KʼUXI XUʼ JCHANBETIK LI SMALAEL YUʼUN DIOSE?
11. 1) ¿Kʼuxi snitojbe sba skʼoplal li xchʼunel koʼontontik xchiʼuk ti oyuk smalael kuʼuntike? 2) ¿Kʼu yuʼun oy lek srasonal kuʼuntik ti tsotsuk li xchʼunel koʼontontike?
11 Akʼo mi jmulaviletik li krixchanoetike, ¿mi xuʼ van xkuch yuʼunik li prevaetike? Xuʼ, yuʼun jech laj yakʼik ta ilel krixchanoetik kʼalal skʼan toʼox xtal Jesús liʼ ta Balumile, jech kʼuchaʼal li j-alkʼopetik xchiʼuk yantik tukʼil yajtuneltak Diose. Li xchʼunel yoʼontonik xchiʼuk li smalael yuʼunike te me stsakojbe sba skʼoplal (kʼelo Santiago 5:10, 11). Ti muʼyukuk xchʼunel yoʼontonik ta sventa li kʼusi laj yichʼik albel yuʼun Jeovae, ¿mi laj van smalaik jechuk li kʼusi albil xa onoʼox skʼoplale? Bakʼintike laj yil svokolik, pe kuch yuʼunik ta skoj ti la spat yoʼontonik ti Diose ta onoʼox spas kʼuchaʼal albatike (Heb. 11:13, 35-40). Li avie, oy lek srasonal kuʼuntik sventa masuk tsots li xchʼunel koʼontontike, yuʼun li Jesuse «jaʼ li bochʼo chacʼ xchʼunojel coʼntontique» (Heb. 12:2). Jech onoʼox ta melel, kʼalal mi kʼot xaʼox ta pasel li albilkʼopetike xchiʼuk kʼalal chakʼ ta ilel li kʼusi yaloj onoʼox tspas Diose, jaʼ chakʼ ti akʼo jpat koʼontontik ta stojolal li Jeovae.
12. ¿Kʼusitik xuʼ jpastik sventa jtsatsubtastik li xchʼunel koʼontontike?
12 ¿Kʼusitik xuʼ jpastik sventa jtsatsubtastik li xchʼunel koʼontontike xchiʼuk ti oyuk smalael kuʼuntike? Toj tsots skʼoplal ti jchʼuntik li mantaletik chakʼ Diose. Jech kʼuchaʼal liʼe, jnoptik ta sventa li srasonaltak ti oy kuʼuntik kʼalal jaʼ chkakʼtik ta baʼyel ta jkuxlejaltik li Ajvalilal yuʼun Diose. ¿Mi xuʼ van xkakʼtik persa spasel li kʼusi chal Mateo 6:33? Taje jaʼ van skʼan xal ti jchʼakbetik mas yorail li cholmantale o ti jeltik kʼusitik ta jkuxlejaltike. Mu me xchʼay xkaʼitik ti yakʼojbutik bendision Jeova kʼalal ta xkakʼ kiptik chijtun ta stojolale. Xuʼ van yakʼojbutik Jeova ti xkakʼtik junuk chanubtasel ta Vivliae o yakʼojbutik jun oʼontonal ti «echʼem to xjelov jech chac cʼu chaʼal ta jnop ta jcʼantic li vuʼutique» (kʼelo Filipenses 4:7). Jech oxal chaʼa, mi jaʼ ta jvules ta joltik li sbaliltak jtaojtik ta skoj ti ta jpastik li kʼusitik chal Jeovae, mas me ta jtabetik sbalil li smalael yuʼune (Sal. 34:8).
13. Albo junuk skʼelobil kʼuxi xuʼ jchʼiestik li xchʼunel koʼontontik xchiʼuk li smalaele.
13 Taje jaʼ xkoʼolaj ti kʼuyelan ta stsʼunolaj li jun j-abtel ta osiltike, ti tstsʼunolaje xchiʼuk ti tstsobbe sate. Kʼalal ep tstsobbe sat li kʼusi tstsʼun li jtsʼunolajele jaʼ chtijbat-o yoʼonton sventa xchaʼtsʼunolaj yan velta. Melel onoʼox ti skʼan smala chlokʼ li kʼusi la stsʼune, pe taje maʼuk chchibaj-o yoʼonton. Xuʼ van li ta yan jabile mas to ep tstsʼunolaj, yuʼun snaʼoj lek ti chakʼ lek sate. Jechtik chkʼot ta pasel ek ta sventa li mantaletik yuʼun Diose. Kʼalal ep ta velta ta jchantik ta sventa li mantaletik chakʼ Jeova, ti xkakʼ ta jkuxlejaltike xchiʼuk ti ta jtabetik lek sbalile mas me ta jpat koʼontontik ta stojolal li Jeovae xchiʼuk mas me kʼun chkaʼitik jmalatik li bendisionetik ti jnaʼojtik ti ta onoʼox xtale (kʼelo Santiago 5:7, 8).
14, 15. ¿Kʼu yelan skʼan xkiltik li svokol krixchanoetike?
14 Sventa oyuk smalael kuʼuntike, skʼan ta jkʼeltik li kʼusitik oy ta balumile xchiʼuk ti kʼu kelantik oyutik jech kʼuchaʼal chil li Jeovae. Li Jeovae ta smilal xa noʼox jabiletik yiloj ti chil svokol li krixchanoetike, pe muʼyuk yakʼoj ti xchibajesbat yoʼontone. Muʼyuk te jecheʼ smeyoj skʼob chkom, moʼoj yuʼun la stak tal li jun noʼox Xnichʼon ti «jaʼ tal slajesbe stsatsal yabtel li pucuje» xchiʼuk ti tslekubtas skotol li kʼusitik chopol yakʼojbe li krixchanoetike (1 Juan 3:8). Ta slajebale, skotol li vokoliletike ta j-echʼel noʼox ch-echʼ, pe li lekilale sbatel me osil-o. Jaʼ yuʼun, mu me xkakʼtik akʼo skʼunibtas xchʼunel koʼontontik li sbalumil Satanase o ti mu xa xmalaj kuʼuntik li kʼusitik tspas Diose, jaʼ mas lek ti xkakʼ xchʼunel koʼontontik ta sventa li kʼusitik mu xkiltik ti jaʼ sbatel osil-oe. Li Jeovae yakʼojbe skʼakʼalil kʼusi ora chakʼbe slajel li kʼusitik chopol avie xchiʼuk jech me tspas ti kʼusi ora yaloje (Is. 46:13; Nah. 1:9).
15 Li ta slajebal kʼakʼal ti kuxulutik avie, xuʼ me chil tsots preva li xchʼunel koʼontontike. Mi kiloj jvokoltik ta skoj li kʼusitik chopol o jaʼ yiloj svokol li kutsʼ kalaltike, mu me xij-ilin. Akʼo mi tsots chkaʼitik ta skoj ti jpasmulilutike, jaʼ mas lek kakʼ kiptik sventa jpat koʼontontik ta stojolal Jeova xchiʼuk ti jchanbetik li stalelal laj yakʼ ta ilel Jesús ti te chal ta Mateo 26:39 (kʼelo).
16. ¿Kʼusi skʼan mu jpastik li avi kʼakʼale?
16 Mi ta jkʼantik ti jechuk smalael kuʼuntik kʼuchaʼal Diose, mu me stakʼ jchibal kʼoptatik li kʼusi chal ta Skʼop Jeovae. ¿Kʼusi jaʼ taje? Mi oy junuk krixchano ti mu xchʼun ti toj nopol xa skʼan xtal li slajebal kʼakʼale, xuʼ van oy kʼusi snop yan tspas, jaʼ xkaltik, mi muʼyuk kʼot ta pasel li kʼusi yaloj Jeovae. Jech kʼuchaʼal liʼe, xuʼ van chanop chakʼan ti oyuk lek avabtel li ta balumile xchiʼuk ti mu xavil avokol ta takʼine ti jaʼ xa ta tsʼakal chavakʼ ta akuxlejal li Ajvalilal yuʼun Diose, o xa chanunaj to batel sventa lekuk xbat li akuxlejale. Li buchʼu jech tsnop taje, chakʼ ta ilel ti chʼabal xchʼunel yoʼontone. Jvules ta joltik ti laj yal Pablo ti akʼo jchanbetik «xchʼunojel yoʼntonic» xchiʼuk «smucʼul yoʼntonic» ti la staik li kʼusi yaloj tspas Diose (Heb. 6:12). Sventa xkʼot ta pasel li kʼusi snopoj tspas Jeovae, muʼyuk me chakʼ ti te oyuk-o li kʼusitik chopol li ta balumile (Hab. 2:3). Jaʼ yuʼun, skʼan mu me jaʼuk noʼox ta jpastik ta skoj noʼox ti nopem xa noʼox xkaʼitik li abtel yakʼojbutik Diose. Moʼoj, jaʼ mas lek ti vikʼiluk jsatike xchiʼuk ti xijmuyubaj noʼox jcholtik li lekil aʼyeje, jun abtelal ti chakʼ ti jun noʼox koʼontontik yuʼun li avi kʼakʼale (Luc. 21:36).
SBALILTAK CHICHʼ TAEL TI OY SMALAELE
17, 18. 1) Ta skoj ti oy to smalael yuʼun li Jeovae, ¿kʼusi to xuʼ jpastik? 2) ¿Kʼuxi ta jtabetik sbalil mi oy smalael kuʼuntik li avie?
17 Akʼo mi oy to ta sjayibal u o mi voʼne xa xkojtikintik li Jeovae, jkotoltik me oy ta koʼontontik chijtunutik ta stojolal ta sbatel osil. Li smalael kuʼuntike jaʼ tskoltautik sventa xkuch kuʼuntik jaʼ to mi la jtatik li kolele, mu ventauk mi chjalij to o mi muʼyuk li kʼusitik chopol liʼe. Li avi kʼakʼale yakʼojbe to yorail Jeova sventa xkakʼtik ta ilel ti jpatoj koʼontontik ta sventa li kʼusitik snopoj tspase, mi jech tskʼan xkiltike, oy ta koʼontontik xkil jvokoltik ta skoj li sbie (1 Ped. 4:13, 14). Jech noxtok, li Diose yakal chchanubtasutik sventa oyuk smalael kuʼuntik sventa jta li jpojeltike (1 Ped. 5:10).
18 Li Jesuse jaʼ akʼbil svuʼel ta sventainel li vinajel xchiʼuk li Balumile, jaʼ yuʼun, li buchʼu xuʼ xchʼakutik ta stojolale, voʼotik noʼox (Juan 10:28, 29). Jaʼ yuʼun, skʼan me mu xijxiʼ yuʼun li kʼusi chtal ta jelavele xchiʼuk mi jaʼuk li lajele. Li buchʼutik oy smalael yuʼunik kʼalal to ta slajebal li kʼakʼale, ta me staik li pojele. Jaʼ yuʼun, skʼan me jkʼeltik ti mu sloʼlautik li kʼusitik oy ta balumile o ti tskʼunibtas li xchʼunel koʼontontik ta stojolal li Jeovae. Jtsatsubtas li xchʼunel koʼontontike xchiʼuk oyuk jpʼijiltik stunesel lek yoʼ to mu xtal li skʼakʼalil Jeovae (Mat. 24:13; kʼelo 2 Pedro 3:17, 18).
[Sjakʼobiltak sventa xchanobil]
[Lokʼol ta pajina 18]
[Lokʼol ta pajina 21]
[Lokʼol ta pajina 21]
Mi ta jchʼiestik li smalael oy yuʼun Diose, jaʼ me chkakʼtik ta baʼyel ta jkuxlejaltik li Ajvalilal yuʼun Diose xchiʼuk ta jtabetik ep sbalil
