Gudani Kha U Sa Fhela Mbilu Ha Yehova Na Yesu
“U sa fhela mbilu ha Murena washu ni hu ḓivhe uri ndi tshone tshitshidzi tshaṋu.”—2 PET. 3:15.
1. Vhaṅwe vhathu vha fulufhedzeaho vha ḓivhudzisa mini?
WAHASHU wa tshisadzini a fulufhedzeaho we a sedzana na milingo minzhi lwa tshifhinga tshilapfu o vhudzisa a ri: “Naa vhufhelo vhu ḓo swika ndi tshi kha ḓi tshila?” Na vhaṅwe vho shumelaho Yehova tshifhinga tshilapfu vha ḓivhudzisa mbudziso i fanaho. Ro lavhelela ḓuvha ḽine Mudzimu a ḓo ita ngaḽo uri zwithu zwoṱhe zwi vhe zwiswa na u fhelisa thaidzo dzine ra ṱangana nadzo zwino. (Ndzumb. 21:5) Naho ri na zwiitisi zwinzhi zwa u tenda uri vhufhelo ha ano maitele a Sathane vhu tsini vhukuma, zwi nga konḓa nga maanḓa u lindela ḽeneḽo ḓuvha ri sa fheli mbilu.
2. Ndi mbudziso dzifhio dzine ra ḓo dzi haseledza malugana na u sa fhela mbilu?
2 Bivhili i sumbedza uri a ro ngo fanela u fhela mbilu. U fana na vhashumeli vha Mudzimu vha tshifhingani tsho fhiraho, ri ḓo wana zwe Mudzimu a ri fulufhedzisa zwone arali ri na lutendo lwo khwaṱhaho nahone ra lindela ri sa fheli mbilu tshifhinga tshine a ḓo ḓadzisa ngatsho eneo mafulufhedziso. (Vhalani Vha-Heberu 6:11, 12.) Na Yehova ha fheli mbilu. A nga kona u fhelisa vhuvhi tshifhinga tshiṅwe na tshiṅwe, fhedzi o lindela tshifhinga tsho teaho. (Vha-Roma 9:20-24) Ndi ngani a sa fheli mbilu? Yesu o ri vhetshela hani tsumbo nga u sa fhela mbilu u fana na Mudzimu? Ri ḓo vhuyelwa hani nga u ṱahulela u sa fhela mbilu u fana na Mudzimu? Phindulo dza mbudziso dzenedzi dzi ḓo ri thusa uri ri sa fhele mbilu na uri ri vhe na lutendo lwo khwaṱhaho, naho zwi tshi nga vhonala u nga Yehova u khou lenga.
NDI NGANI YEHOVA A SA FHELI MBILU?
3, 4. (a) Ndi ngani Yehova o sumbedza u sa fhela mbilu malugana na nḓila ine a ṱoḓa u ḓadzisa ngayo ndivho yawe nga ha ḽifhasi? (b) Yehova o aravha hani vhushandukwa ha Edeni?
3 Yehova u na zwiitisi zwi pfalaho zwa u sa fhela mbilu. Ndi ngoho uri u na maanḓa a u vhusa fhethu hoṱhe tshifhinga tshoṱhe; naho zwo ralo, vhushandukwa ha Edeni ho ita uri hu vhudziswe mbudziso dza ndeme malugana na vhuvhusahoṱhe. Yehova ho ngo fhela mbilu ngauri o vha a tshi zwi ḓivha uri zwi ḓo dzhia tshifhinga u fhindula dzenedzo mbudziso nga nḓila yo teaho. U vha hawe na nḓivho yo teaho nga ha zwiito zwa vhathu ṱaḓulu na kha ḽifhasi, zwi ita uri a ite zwithu nga nḓila ine ya ri vhuyedza.—Vha-Heb. 4:13.
4 Ho vha hu ndivho ya Yehova uri vhaḓuhulu vha Adamu na Eva vha ḓadze shango. Musi Sathane a tshi fhura Eva nahone nga murahu Adamu a si thetshelese, ndivho ya Mudzimu a yo ngo shanduka. Ho ngo ita zwithu nga vhutsilu, kana u shandula ndivho yawe malugana na vhathu. Nṱhani hazwo, o dzudzanya nḓila ine a ḓo khunyeledza ngayo ndivho yawe nga ha vhathu na Ḽifhasi. (Yes. 55:11) U itela u ḓadzisa ndivho yawe na u lwela vhuvhusahoṱhe hawe, Yehova o sumbedza u ḓivhofha na u sa fhela mbilu nga nḓila khulwane, nahone o lindela miṅwaha ya zwigidi u itela uri zwiṅwe zwipiḓa zwa ndivho yawe zwi ḓadzee nga nḓila ye a vha o lavhelela uri zwi ḓadzee ngayo.
5. U sa fhela mbilu ha Yehova zwi ḓo ita uri ri wane phaṱhutshedzo dzifhio?
5 Tshiṅwe tshiitisi tsha uri Yehova a lindele a sa fheli mbilu ndi uri u ṱoḓa uri vhathu vhanzhi vha wane vhutshilo vhu sa fheli. Zwa zwino, u khou ita ndugiselelo dza u tshidza vha “gogo ḽihulu.” (Ndzumb. 7:9, 14; 14:6) Musi ri tshi ita mushumo washu wa u huwelela, Yehova u swikelela vhathu vhanzhi nahone u vha ramba uri vha gude nga ha Muvhuso wawe na zwilinganyo zwawe zwo lugaho. Mulaedza wa Muvhuso ndi “mafhungo maḓifha” avhuḓisa kha vhathu u fhira naho e afhio. (Mat. 24:14) Muṅwe na muṅwe ane a kokodzwa nga Yehova u vha tshipiḓa tsha tshivhidzo tsha shango ḽoṱhe tsha khonani dza vhukuma dzine dza funa zwo lugaho. (Yoh. 6:44-47) Mudzimu washu wa lufuno u thusa vhathu vho raloho u itela uri vha ṱanganedzee khae. U dovha a khetha vhaṅwe vhukati hashu uri vha ye u vha miraḓo ya muvhuso wawe wa ṱaḓulu. Musi vha tshi wana vhuimo havho ngei ṱaḓulu, vhenevha vhathu vha fulufhedzeaho vha ḓo thusa vhathu vhane vha thetshelesa uri vha vhe vho fhelelaho nahone vha wane vhutshilo vhu sa fheli. Zwi tou vha khagala uri naho o lindela a sa fheli mbilu, Yehova u khou ita zwoṱhe u itela u ḓadzisa mafulufhedziso awe uri a ri vhuyedze.
6. (a) Yehova o sumbedza u sa fhela mbilu misini ya Noaxe nga muhumbulo ufhio? (b) Yehova u khou sumbedza hani u sa fhela mbilu misini yashu?
6 Yehova ha fheli mbilu naho vhathu vha tshi mu khakhela nga ho kalulaho, samusi ro zwi vhona kha nḓila ye a shumisana ngayo na vhathu vhavhi nga phanḓa ha Maḓi Mahulu. Nga tshenetsho tshifhinga, shango ḽo vha ḽo ḓala vhuḓifari vhu si havhuḓi na vhuvemu nahone Yehova “mbilu yawe yó sinyuwa” nga nṱhani ha vhuimo ha vhathu. (Gen. 6:2-8) O vha a sa ḓo tendela zwenezwo zwi tshi itea lwa tshoṱhe, ndi ngazwo o ḓisa maḓi mahulu u itela u fhelisa vhathu vhavhi. Musi “u sa fhela mbilu ha Mudzimu hó lindela maḓuvhani a Noaxe” Yehova o ita ndugiselelo dza u tshidza Noaxe na muṱa wawe. (1 Pet. 3:20) Nga tshifhinga tsho teaho, Yehova o vhudza Noaxe zwine a ḓo zwi ita nahone a ri a fhaṱe gungwa. (Gen. 6:14-22) Zwiṅwe hafhu, Noaxe ‘o vha e muhuweleli wa u luga,’ a tshi vhudza vhahura vhawe nga ha ndozwo ine ya ḓo ḓa. (2 Pet. 2:5) Yesu o amba uri ri khou tshila maḓuvhani ane a fana na a misini ya Noaxe. Yehova o ita phetho ya uri u ḓo fhelisa lini ano maitele mavhi a zwithu. A hu na muthu ane a ḓivha “ḓuvha na tshikhathi” tsha uri zwenezwo zwi ḓo itea lini. (Mat. 24:36) Zwino ndi tshifhinga tsha uri ri ite mushumo we Mudzimu a ri ṋea wone wa u sevha vhathu na u vha vhudza zwine vha nga zwi ita u itela uri vha tshidzwe.
7. Naa Yehova u khou lenga u ḓadzisa mafulufhedziso awe? Ṱalutshedzani.
7 Zwi tou vha khagala uri u sa fhela mbilu ha Yehova a zwi ambi uri u khou sokou lindela uri hu fhele tshifhinga. A ro ngo fanela u humbula uri u sa fhela mbilu ha Yehova zwi sumbedza u sa ri ṱhogomela hawe na u sa ri pfela vhuṱungu! Zwi re zwone ndi uri zwi nga vha khaedu u vha na mavhonele o teaho musi ri tshi vha vhalala kana musi ri tshi khou shengela kha ano maitele mavhi. Ri nga kulea nungo kana ra pfa u nga Mudzimu u khou lenga u ḓadzisa mafulufhedziso awe. (Vha-Heb. 10:36) Ni songo hangwa uri u na zwiitisi zwi pfalaho zwa u sa fhela mbilu na uri u khou shumisa tshenetsho tshifhinga u itela u vhuyedza vhashumeli vhawe vha fulufhedzeaho. (2 Pet. 2:3; 3:9) Kha ri ṱhogomele nḓila ye Yesu a sumbedza u sa fhela mbilu u fana na Mudzimu.
YESU O VHA HANI TSUMBO YAVHUḒI YA U SA FHELA MBILU?
8. Ndi nga fhasi ha vhuimo vhufhio he Yesu a sumbedza u sa fhela mbilu?
8 Yesu u khou ita lufuno lwa Mudzimu nahone o ita zwenezwo nga u fhisea lwa miṅwaha minzhi. Musi Sathane a tshi vha ḽishandukwa, Yehova o phetha nga uri Murwa wawe mubebwa e eṱhe a ḓe kha ḽifhasi sa Messia. Humbulani nga ha u sa fhela mbilu he Yesu a hu sumbedza musi o lindela lwa miṅwaha ya zwigidi uri tshenetsho tshifhinga tshi swike. (Vhalani Vha-Galata 4:4.) Musi o lindela o vha a songo sokou dzula a sa khou ita tshithu, nṱhani hazwo o vha o farakanea nga mushumo we a ṋewa nga Khotsi awe. Musi a tshi ḓa kha ḽifhasi o vha a tshi zwi ḓivha uri Sathane o vha a tshi ḓo mu vhulaha, samusi zwo vha zwo no porofitiwa. (Gen. 3:15; Mat. 16:21) O ḓiṱukufhadzela u ita zwine zwa funwa nga Mudzimu a sa fheli mbilu, naho zwo vha zwi tshi amba uri u ḓo pfa vhuṱungu vhuhulu. O fulufhedzea nga nḓila khulwane. O vha a songo livhisa ṱhogomelo kha ene muṋe na kha vhuimo hawe, nahone zwenezwo zwi nga ri vhuyedza.—Vha-Heb. 5:8, 9.
9, 10. (a) Yesu u khou ita mini musi o lindela a sa fheli mbilu uri Yehova a dzhie vhukando? (b) Ri fanela u dzhia hani nḓila ye Yehova a dzudzanya ngayo tshifhinga?
9 Nga murahu ha musi o no vuswa vhafuni, Yesu o ṋewa maanḓa ṱaḓulu na kha ḽifhasi. (Mat. 28:18) U shumisa eneo maanḓa u itela u ḓadzisa ndivho ya Yehova u tendelana na tshifhinga tshe Mudzimu a tshi dzudzanya. Yesu o lindela a sa fheli mbilu e kha tshanḓa tsha u ḽa tsha Mudzimu u swikela nga 1914 musi maswina awe a tshi itwa vhukando ha milenzhe yawe. (Ps. 110:1, 2; Vha-Heb. 10:12, 13) Hu si kale u ḓo dzhia vhukando ha u fhelisa maitele a zwithu a Sathane. Zwa zwino Yesu u khou shuma na vhathu a sa fheli mbilu nahone u vha livhisa ‘maḓini a vhutshilo.’—Ndzumb. 7:17.
10 Naa tsumbo ya Yesu i ita uri ni kone u vhona nḓila ine na fanela u dzhiela nṱha ngayo nḓila ye Yehova a dzudzanya ngayo tshifhinga? Yesu o vha o ḓiimisela vhukuma u ita zwoṱhe zwine a humbelwa nga Khotsi awe nahone o vha o ḓiimisela u lindela tshifhinga tsho vhewaho nga Mudzimu. Samusi ro lindela tshifhinga tsha u fheliswa ha ano maitele mavhi a Sathane, ri fanela u edzisa u sa fhela mbilu ha Mudzimu, nahone a ro ngo fanela u itela Mudzimu phetho kana u kulea nungo. Ndi mini zwine ra fanela u zwi ita u itela uri ri songo fhela mbilu?
NDI NGA ṰAHULELA HANI U SA FHELA MBILU U FANA NA MUDZIMU?
11. (a) Lutendo na u sa fhela mbilu zwi tshimbidzana nga nḓila-ḓe? (b) Ndi ngani ri na zwiitisi zwi pfalaho zwa u vha na lutendo lwo khwaṱhaho?
11 Musi Yesu a sa athu u ḓa kha ḽifhasi, vhaporofita na vhaṅwe vhashumeli vha Yehova vha fulufhedzeaho vho vhetshela tsumbo vhaṅwe vhathu vha songo fhelelaho uri na vhone vha kone u konḓelela vha sa fheli mbilu. U sa fhela mbilu havho ho vha hu tshi tshimbidzana na lutendo lwavho. (Vhalani Yakobo 5:10, 11.) Arali vho vha vhe si na lutendo—naa vho vha vha tshi ḓo kona u lindela mafulufhedziso awe vha sa fheli mbilu? Tshifhinga tshinzhi vho konḓelela zwiimo zwi tshusaho na zwine zwa ḓisela khaedu lutendo lwavho, vha tshi fulufhela uri Mudzimu u ḓo ḓadzisa zwe a zwi fulufhedzisa. (Vha-Heb. 11:13, 35-40) Ri na zwiitisi zwinzhi vhukuma zwa u vha na lutendo lwo khwaṱhaho ngauri Yesu u khou shuma sa “Muvuledzi wa lutendo” lwashu. (Vha-Heb. 12:2) O ḓadzisa vhuporofita nahone a dzumbulula ndivho dza Mudzimu nga nḓila ine ya ri ṋea zwiitisi zwi pfalaho zwa u vha na lutendo.
12. Ndi mini zwine ra nga zwi ita u itela u khwaṱhisa lutendo lwashu?
12 Ndi mini zwine ra nga zwi ita u itela u khwaṱhisa lutendo lwashu ri sa fheli mbilu? Ndi zwa ndeme u tevhedza vhulivhisi ha Mudzimu! Sa tsumbo, humbulani nga ha zwithu zwe zwa ita uri ni ṱoḓe u vhea Muvhuso wa Mudzimu u thoma vhutshiloni haṋu. Ndi ngani ni sa iti vhuḓidini ho engedzeaho ha u shumisa nyeletshedzo ine ya wanala kha Mateo 6:33? Zwenezwo zwi nga katela u fhedza tshifhinga tsho engedzeaho ni vhuḓinḓani ha tsimu kana uri ni leludze vhutshilo haṋu. Ni songo dzhiela fhasi nḓila ye Yehova a ni fhaṱutshedza ngayo u swika zwino. A nga vha o ni thusa uri ni kone u fara pfunzo ntswa ya Bivhili kana uri ni vhe na ‘mulalo wa Mudzimu, u fhiraho u ṱalukanya hoṱhe.’ (Vhalani Vha-Filipi 4:7.) Musi ni tshi livhisa ṱhogomelo kha phaṱhutshedzo dze na dzi wana nga u tevhela nyeletshedzo dza Yehova, ni ḓo vha ni tshi khou engedza nḓila ine na dzhiela ngayo nṱha u sa fhela mbilu.—Ps. 34:8.
13. U vha na lutendo na u sa fhela mbilu zwi nga vhambedzwa na mini?
13 Enea maitele a nga vhambedzwa na nḓila yo ḓoweleaho ya u ṱavha, u sheledza na u kaṋa. Tshifhinga tshoṱhe musi mulimi a tshi kaṋa zwiliṅwa zwinzhi u vha na khwaṱhisedzo ya uri a dovhe a lime nga khalaṅwaha i tevhelaho. Zwi tou vha khagala uri u ḓo fanela uri a lindele tshifhinga tsha khaṋo a sa fheli mbilu, fhedzi zwenezwo a zwi iti uri a si zwale mbeu, nahone khamusi u ḓo zwala mbeu masimuni manzhi u fhira tshifhingani tsho fhiraho. U fulufhela uri u ḓo kaṋa. Nga hu fanaho, musi ri tshi dovholola u guda na u tevhela vhulivhisi ha Yehova nahone ha ri vhuyedza, ri fulufhela Yehova nga ho khwaṱhaho. Lutendo lwashu na lwone lu ḓo hula, nahone zwa ri lelutshela u lindela phaṱhutshedzo dzine ra ḓivha uri dzi ḓo vha hone.—Vhalani Yakobo 5:7, 8.
U sa fhela mbilu ha Mudzimu zwi ḓo ni thusa uri ni dzule no livhisa ṱhogomelo kha Muvhuso u itela uri ni wane phaṱhutshedzo!
14, 15. Ndi mavhonele afhio ane ra fanela u vha nao nga ha tshengelo ya vhathu?
14 Iṅwe nḓila ya u ṱahulela u sa fhela mbilu ndi u ṱhogomela nḓila ine ra dzhia ngayo shango na zwiimo zwa muthu nga eṱhe. Lingedzani u dzhia zwithu nga nḓila ine Yehova a zwi dzhia ngayo. Sa tsumbo, humbulani nga ha nḓila ine Yehova a dzhia ngayo tshengelo ya vhathu. U pfa vhuṱungu vhuhulu vhukuma musi vhathu vha tshi shengela; fhedzi u pfa hawe vhuṱungu a zwi mu thivheli u ita zwithu zwo lugaho. O rumela Murwa wawe mubebwa eṱhe “uri a thuthekanye mishumo ya Sathane” na uri a fhelise tshengelo yoṱhe ye Sathane a i ḓisela vhathu. (1 Yoh. 3:8) Zwi re zwone ndi uri tshengelo yoṱhe i ḓo vha ya tshifhinganyana, fhedzi thandululo ya Mudzimu ndi ya tshoṱhe. Nga hu fanaho, nṱhani ha u tendela ano maitele mavhi a Sathane a tshi ri kula nungo kana u ita uri ri fhele mbilu nga ha uri vhufhelo vhu ḓo ḓa lini, ri fanela u vhea fulufhelo ḽashu kha zwithu zwi sa vhonwiho zwa tshoṱhe zwe ra zwi lavhelela. Yehova o dzudzanya uri u ḓo fhelisa lini vhuvhi, nahone u ḓo dzhia vhukando nga tshifhinga tsho teaho.—Yes. 46:13; Nah. 1:9.
15 Ri nga kha ḓi sedzana na khaedu khulwane dza lutendo lwashu kha ano maḓuvha a konḓaho a vhufhelo. Nṱhani ha uri ri sinyuwe musi ri tshi vutshelwa kana musi vhane ra vha funa vha tshi shengela, ri fanela u ḓiimisela u fulufhela Yehova nga ho fhelelaho. A ro ngo fhelela, nga zwenezwo u ita zwenezwo zwi nga si ri lelutshele. Naho zwo ralo, humbulani zwe Yesu a zwi ita samusi zwo ṅwaliwa kha Mateo 26:39.—Vhalani.
16. Ndi mini zwine ra fanela u iledza u zwi ita kha tshino tshifhinga tsho salaho?
16 Muthu ane a timatima uri vhufhelo vhu tsini a nga vha na mavhonele o khakheaho. A nga ḓiitela nzudzanyo dzawe musi a tshi vhona uri zwe Yehova a zwi amba a zwi khou ḓadzea. Nga maṅwe maipfi a nga kha ḓi ri, ‘Ndi ṱoḓa u vhona arali Yehova a tshi khou amba ngoho.’ A nga lingedza u ḓiitela dzina kha ḽino shango kana u ṱoḓa tsireledzo nga u vha na masheleni nṱhani ha u vhea Muvhuso wa Mudzimu u thoma, kana a fulufhela uri pfunzo ya nṱha i ḓo ita uri a tsireledzee na uri a vhe na vhutshilo havhuḓi vhukuma zwino. Naho zwo ralo, naa zwenezwo a zwi ṋei vhuṱanzi ha u sa vha na lutendo? Ni songo hangwa uri Paulo o ri ṱuṱuwedza uri ri edzise vhathu vha fulufhedzeaho vhe vha wana mafulufhedziso a Yehova nga nṱhani ha u “fulufhedzea” na u sa fhela mbilu. (Vha-Heb. 6:12) Yehova a nga si tendele ano maitele mavhi a tshi vha hone lwa tshifhinga tshilapfu u fhira tshee a tshi dzudzanya. (Hab. 2:3) Ri fanela u iledza u ita tshumelo ya Yehova nga u tou kombetshedzea. Nṱhani hazwo, ri fanela u dzula ro fhaṱuwa nahone ri huwelele mafhungo maḓifha nga u fhisea, ngauri zwenezwo zwi ḓo ita uri ri fushee zwino.—Luka 21:36.
NDI DZIFHIO PHAṰHUTSHEDZO DZINE DZA ḒISWA NGA U SA FHELA MBILU?
17, 18. (a) Zwa zwino, ndi tshibuli tshifhio tshine ra vha natsho musi ro lindela ri sa fheli mbilu? (b) Ndi phaṱhutshedzo dzifhio dzine ra ḓo dzi wana nga u ṱahulela u sa fhela mbilu zwino?
17 Hu sa londwi uri ro no shumela Mudzimu lwa miṅwedzi i si gathi kana lwa miṅwaha minzhi, ri ṱoḓa u mu shumela u ya nga hu sa fheli. U sa fhela mbilu zwi ḓo ri thusa uri ri kone u konḓelela u swikela ri tshi tshidzwa, hu sa londwi uri ho sala tshifhinga tshi ngafhani. Zwa zwino Yehova u khou ri ṋea tshibuli tsha u sumbedza uri ri fulufhela phetho dzawe nga ho fhelelaho na uri—arali zwi tshi ṱoḓea—ro ḓiimisela u shengela ri tshi itela dzina ḽawe. (1 Pet. 4:13, 14) Zwiṅwe hafhu, Mudzimu u khou ri ṋea ngudo ya ndeme u itela uri ri kone u konḓelela ri sa fheli mbilu uri ri tshidzwe.—1 Pet. 5:10.
18 Yesu u na maanḓa ṱaḓulu na kha ḽifhasi nahone a hu na tshine tsha nga mu thivhela uri a si ni tsireledze arali na dzula ni tshi fulufhedzea. (Yoh. 10:28, 29) A hu na tshiitisi tsha u ofha vhumatshelo kana u fa. Vhane vha konḓelela vha sa fheli mbilu u swika vhufheloni vha ḓo tshidzwa. Nga zwenezwo, ri fanela u ita vhungoho ha u sa tendela shango ḽi tshi ri fhura ḽa ita uri ri litshe u ḓitika nga Yehova. U fhambana na zwenezwo, ri tea u ḓiimisela u aluwa lutendoni na u shumisa tshifhinga tsha u sa fhela mbilu ha Mudzimu nga vhuṱali.—Mat. 24:13; vhalani 2 Petro 3:17, 18.
