Mu Fil Rogon Ni I Gum’an’ Jehovah Nge Jesus
Mu Fil Rogon Ni I Gum’an’ Jehovah Nge Jesus
“Mu lemniged e gum’an’ rok e Somol rodad, ni aram e tayim ni be pi’ ngomed ni ngam guyed rogon ngkam thapgad ngak.”—2 PET. 3:15.
UW ROGON NI GA RA FULWEG?
Uw rogon ni ke dag Jehovah ni ir be’ nib gum’an’?
Mang nib t’uf ni nga i gum’an’ Jesus nib n’uw nap’an?
Mang boch ban’en nrayog ni ngad rin’ed ya nge yag ni ngaud gum’an’gad?
1. Mang e be fith boch e tapigpig rok Got nib yul’yul’?
REB e walag ni ppin ni ke par nib yul’yul’ u nap’an ni ke yib boor e magawon ngak u lan bokum e duw e ke fith ni gaar, “Gur, ra taw e tomur u m’on ni nggum’?” Boch e girdi’ ni kar pigpiggad ngak Jehovah nib n’uw nap’an e ku aram rogon ni yad be lemnag. Ri gad be sonnag fare rran nra beechnag Got urngin ban’en, me chuweg urngin e magawon ni ke yib ngodad e chiney. (Rev. 21:5) Yugu aram rogon nri bay fan ni nge mich u wan’dad ni ke chugur e tomur ko re m’ag rok Satan ney, ma rayog ni nge mo’maw’ ni ngad sonnaged e re rran ney u fithik’ e gum’an’.
2. Mang boch e deer u murung’agen e gum’an’ ni gad ra weliy?
2 Machane, be dag e Bible nthingar da gum’an’gad. Rayog ni nge yag ngodad e tin ke micheg Got nfaanra bay e michan’ rodad nib gel, ma ngaud sonnaged ni nge lebug e tin ni ke micheg u fithik’ e gum’an’. Ireray e n’en nrin’ e pi tapigpig rok Got kakrom. (Mu beeg e Hebrews 6:11, 12.) Jehovah e ba gum’an’. Susun rayog rok ni nge thang e pogofan rok e girdi’ nib kireb ndemtrug e ngiyal’, machane be sonnag e ngiyal’ nib puluw. (Rom. 9:20-24) Mang fan nrib gum’an’? Uw rogon ni dag Jesus ni ir be’ nib gum’an’? Uw rogon ni nge fel’ rogodad riy nfaanra ngaud athamgilgad ni ngad gum’an’gad? Fulweg ko pi deer ney e rayog ni nge ayuwegdad ni nge yag e gum’an’ nge michan’ nib gel ngodad, nyugu aram rogon ni gad be lemnag ni gowa ke sagaal Jehovah.
MANG FAN NI BE GUM’AN’ JEHOVAH?
3, 4. (a) Mang ni i gum’an’ Jehovah ya nge lebug e tin nib m’agan’ ngay ni fan ko fayleng? (b) Mang e rin’ Jehovah nbochan e togopuluw nni tay u Eden?
3 Dariy be’ ni bay e liw rok ni kab tolang ngak Jehovah, ma de t’uf ni nge sonnag ni nge m’ay urngin e magawon. Machane, ri bay fan ni nga i gum’an’. Bochan e togopuluw ni kan tay u Eden, ma bay boch e deer nib ga’ fan e ba t’uf ni ngan fulweg ya nge fel’ rogon e pi engel u tharmiy nge girdi’ nu fayleng. Ke par Jehovah nib gum’an’ ya manang nib t’uf ni nge yan boor e tayim nge yag ni ngan fulweg e pi deer nem nib tamilang. Ma bochan nri manang e n’en ni be rin’ nge n’en ni be lemnag urngin e pi engel nge girdi’, ere ba mudugil ni be rin’ ban’en nrib fel’ ni fan ngodad.—Heb. 4:13.
4 Ba m’agan’ Got ngay ni nge sug e fayleng ko girdi’ ni pi pifak Adam nge Efa. Nap’an ni ke bannag Satan Efa, me th’ab Adam e motochiyel rok Got, ma de thilyeg Got e tin nib m’agan’ ngay. De rin’ ban’en nde lemnag ko som’on, ma de gurgur ni nge turguy ban’en, ma de pag e girdi’. Ya n’en ni ke rin’ e ke dugliy u rogon ni nge lebguy e tin nib m’agan’ ngay ni fan ko girdi’ nge Fayleng. (Isa. 55:11) Bochan ni i t’ar Jehovah laniyan’ mab gum’an’, ma rayog ni nge lebguy e tin nib m’agan’ ngay, me m’ug riy nrib fel’ e gagiyeg rok. Me sonnag ni nge yan bokum biyu’ e duw ya nge lebug boch ko tin nib m’agan’ ngay nib fel’ rogon.
5. Bochan e gum’an’ rok Jehovah ma mang tow’ath ni ke yib ngak e girdi’?
5 Ma reb i fan ni i son Jehovah u fithik’ e gum’an’ e bochan ni nge yag e yafas ndariy n’umngin nap’an ngak boor e girdi’. Chiney e be fal’eg rogon ni nge ayuweg e girdi’ ni “pire’ ni pire’.” (Rev. 7:9, 14; 14:6) Be ayuweg Jehovah e girdi’ u daken e machib, ma yibe piningrad ni ngar filed murung’agen Gil’ilungun Got nge pi motochiyel rok nib mat’aw. Fare thin ko Gil’ilungun e rib fel’ ni fan ko girdi’, ma riyul’ ni ireray e ‘thin nib fel’.’ (Matt. 24:14) Urngin e girdi’ ni ke piningrad Jehovah e kar manged bang ko ulung rok u ga’ngin yang u fayleng nrib fel’ e tha’ u thilrad, mab ga’ fan e tin nib mat’aw u wan’rad. (John 6:44-47) Ma ayuwegrad Jehovah ni ngar fel’gad u wan’. Maku i mel’eg boch e girdi’ ni ngar manged bang ko gagiyeg rok u tharmiy. Nap’an ni yad ra yan nga tharmiy ma yad ra ayuweg e girdi’ nib yul’yul’ u fayleng ni ngar flontgad, ma nge yag ngorad e yafas ndariy n’umngin nap’an. Ba tamilang nnap’an ni be son Jehovah u fithik’ e gum’an’, ma be maruweliy ni nge lebug e tin ni ke micheg ni fan ngodad.
6. (a) Uw rogon ni i gum’an’ Jehovah u nap’an Noah? (b) Uw rogon ni be gum’an’ Jehovah e ngiyal’ ney?
6 Be par Jehovah nib gum’an’ ni yugu aram rogon ni bay boch e girdi’ ni yad be rin’ ban’en nra k’aring e damumuw ngak. Mu lemnag e n’en ni i rin’ ni fan ko tin nib kireb ni immoy u m’on ni yib fare Ran ni tharey e fayleng. Me “par ni kari kolngan’ riy” ya ke yoor e girdi’ ni yad be un ko ngongol ndarngal nge cham, ma goo tin nib kireb e yad baadag ni ngar rin’ed. Dabi pag ni nge par e fayleng ni aram rogon, ere ke dugliy ni nge kirebnag e girdi’ nib kireb u daken fare ran ni tharey e fayleng. Nap’an ‘ni i sonnagrad Got u fithik’ e gum’an’’ u nap’an Noah, me fal’eg boch ban’en nra ayuweg e yafas rok Noah nge chon e tabinaw rok. (1 Pet. 3:20) Nap’an ni taw nga ngal’an, me yog Jehovah ngak Noah e n’en ni ke dugliy miki yog ngak ni nge fal’eg e barkow. (Gen. 6:14-22) Maku i “machibnag” Noah e girdi’, me weliy ngorad ni ke chugur ni nge yib e mogothgoth. (2 Pet. 2:5) Ke yog Jesus ni ngiyal’ ney e “ra bod e n’en nrin’ ko fa ngiyal’ i n’em nnap’an Noah. Ke dugliy ngal’an nra gothey e re m’ag ney nib kireb. Dariy be’ ni manang ko wuin e ra yib e “re rran nem nge re awa nem.” (Matt. 24:36) Ngiyal’ ney ma bay e maruwel ni ke pi’ Got ngodad ni gad be fonownag e girdi’ ma gad be weliy ngorad murung’agen e kanawo’ ni ngar mageygad nib fas.
7. Gur, ba sagaal Jehovah u rogon ni be lebguy e tin ni ke micheg? Mu weliy.
7 Ba tamilang ni gum’an’ rok Jehovah e gathi be yip’ fan ni kemus ni be son ni nge yan e tayim. Dab da lemnaged nder ma lemnag rarogodad. Machane mom ni ngad lemnaged ni aram rogon nfaanra kad pilibthirgad ara ke yib e gafgow ngodad. Rayog ni nge mulan’dad ara da lemnaged ni ke n’uw nap’an ma de lebguy Jehovah e tin ni ke micheg. (Heb. 10:36) Dab da paged talin ni bay fan ni be gum’an’ ma be fanay e tayim rok e ngiyal’ ney ni nge ayuweg e pi tapigpig rok nib yul’yul’. (2 Pet. 2:3; 3:9) Ma kum lemnag ko uw rogon ni i gum’an’ Jesus.
UW ROGON NI DAG JESUS NI IR BE’ NRIB GUM’AN’?
8. Mingiyal’ e i gum’an’ Jesus?
8 Be rin’ Jesus e tin nib m’agan’ Got ngay, ma i rin’ ni aram rogon u lan bokum biyu’ e duw u fithik’ e felfelan’. Nap’an ni i togopuluw Satan, me dugliy Jehovah ni nge yib Fak ni kari maagirag rok nga fayleng nge mang Kristus. Mu lemnag e gum’an’ ni tay Jesus u nap’an ni be son ni nge yan bokum biyu’ e duw ma fini taw e re rran nem. (Mu beeg e Galatia 4:4.) Ngiyal’ nem, ma gathi kemus ni be son ndariy ban’en ni be rin’. I tiyan’ ko maruwel ni ke pi’ e Chitamangin ngak. Nap’an ni ke yib nga fayleng ma manang nra gagiyegnag Satan ni nge yim’ ya kan yiiynag. (Gen. 3:15; Matt. 16:21) Ke rin’ e tin nib m’agan’ Got ngay u fithik’ e gum’an’ nyugu aram rogon nrib gel e gafgow nge amith nra tay. De lemnag e gafgow nra tay. Rib sobut’an’ mab m’agan’ ngay ni nge gafgow nyugu aram rogon ni Fak Got ir. Rib fel’ rogon ni i dag rogon ni ngan yul’yul’, ma ngad folwokgad rok.—Heb. 5:8, 9.
9, 10. (a) Mang e be rin’ Jesus u nap’an ni be son ni nge rin’ Jehovah e n’en ni ke yog? (b) Susun uw rogon u wan’dad e ngiyal’ ni ke turguy Jehovah ni nge rin’ e n’en ni ke yog?
9 Tomuren ni kan faseg Jesus ko yam’ min pag fan urngin ban’en ngak u tharmiy ngu but’. (Matt. 28:18) Me fanay e re liw rok nem ni nge lebguy e tin nib m’agan’ Jehovah ngay ni rogon nib puluw nga ngal’an ni ke tay Got. I par Jesus u ba’ nib mat’aw rok Got ni be son u fithik’ e gum’an’ nge mada’ ko ngiyal’ ni ke taw ko duw ni 1914 ma fini tay e pi toogor rok nga tan e rifrif u ay. (Ps. 110:1, 2; Heb. 10:12, 13) Dabki n’uw nap’an me gothey e m’ag rok Satan. Nap’an ni be son, ma be ayuweg e girdi’ ni ngar fel’gad u wan’ Got me pow’iyrad ko gin ni “bay e ran ko yafos riy.”—Rev. 7:17.
10 Rayog ni ngam folwok rok Jesus? Manang ni ke turguy ba ngiyal’ ni nge rin’ e n’en ni ke yog. Dariy e maruwar riy nri baadag Jesus ni nge rin’ e n’en ni ke tay chilen e Chitamangin ngak, machane ba m’agan’ ngay ni nge sonnag e ngiyal’ ni ke dugliy Got. Nap’an ni gad be son ni nge m’ay e m’ag rok Satan nib kireb, ma gadad gubin e ba t’uf ni ngad gum’an’gad, ma dab da darifannaged u rogon ni be pow’iydad Got ara ngad talgad ya ke mulan’dad. Mang e rayog ni ngad rin’ed ya nge yag ni ngaud gum’an’gad?
UW ROGON NI NGGU MARUWELIY YA NGE YAG NI NGAUG GUM’AN’?
11. (a) Uw rogon nib peth e michan’ nge gum’an’? (b) Mang ni bay fan ni nge gel e michan’ rodad?
11 U m’on ni yib Jesus nga fayleng, ma pi profet nge ku boch e tapigpig rok Got ni yad ba yul’yul’ e kar daged ni mus ko girdi’ nde flont e ku rayog ni ngar gum’an’gad. Ma gum’an’ rorad e ba peth ko michan’ rorad. (Mu beeg e James 5:10, 11.) Gur, faanra de mich u wan’rad e n’en ni ke yog Jehovah ngorad, ara de michan’rad ngay, ma rayog ni ngar songad u fithik’ e gum’an’ ko ngiyal’ ni nge lebug e tin ni ke micheg? Boor yay ni kan skengnag e michan’ rorad, machane ke l’agan’rad ngay ni bayi lebguy Got e tin ni ke micheg. (Heb. 11:13, 35-40) Bay fan ni nge gel e michan’ rodad, ya ba’ Jesus ni “be tor e michan’ rodad ngak.” (Heb. 12:2) I lebguy e yiiy me ayuwegdad ni nge tamilang e tin nib m’agan’ Got ngay.
12. Mang e rayog ni ngad rin’ed ya nge yag ni ngaud gum’an’gad?
12 Mang boch ban’en nrayog ni ngad rin’ed nge gel e michan’ rodad, me yag ni ngaud gum’an’gad? N’en nib ga’ fan e ngad folgad ko fonow ni ma pi’ Got ngodad. Bod ni, ngam lemnag ko mang fan nthingar mu m’oneg Gil’ilungun Got ko yafas rom. Gur, rayog ni ngarim athamgil ni ngam fol ko fonow ni bay ko Matthew 6:33? Sana ba t’uf ni ngam thognag boor e tayim ni fan ko machib ara ngam thilyeg boch ban’en ni ga ma rin’. Dab mu pag talin rogon ni i tow’athnag Jehovah e athamgil ni kam tay ki mada’ ko chiney. Sana ke ayuwegem ya nge yag ni ngam pirieg be’ ni baadag e machib ma ga be fil e Bible ngak e chiney, ara ke ayuwegem ni nge yag ngom e “gapas rok Got ndabi chuchugur ni nge nang e girdi’ fan.” (Mu beeg e Filippi 4:7.) Ere faanra ngam tiyan’um ko pi tow’ath ni ke yag ngom ya kam fol ko thin rok Jehovah, ma rayog ni ngam guy nri bay fan ni ngaum gum’an’.—Ps. 34:8.
13. Uw rogon ni ngan fanathinnag rogon ni nge gel e michan’ rodad ma ud gum’an’gad?
13 Bay reb e fanathin nrayog ni nge ayuwegdad ni ngad nanged ni michan’ rodad e ra k’aringdad ni ngaud gum’an’gad. Be’ ni tamilay’ e ma fal’eg e milay’ rok, ma ma yung e awochngin e woldug, me t’ar wom’engin. Gubin ngiyal’ ni ma kunuy wom’engin e woldug ni boor me gel e pagan’ rok ni ku ra yung bayay. Riyul’ nib t’uf ni nge sonnag ngal’an e mokun woldug u fithik’ e gum’an’, machane dabi taleg e re n’ey ni nge dabki yung e awoch, sana ra ga’nag e milay’ rok nge yag ni nge yoornag boch e awoch ni nge yung. Me pagan’ nrayog ni ngki kunuy wom’engin e woldug bayay. Maku arrogodad, nap’an ni kad filed e fonow rok Jehovah, ma gad fol riy, me yib angin ngodad, me gel boch e pagan’ rodad ngak. Maku ra gel e michan’ rodad, me mom boch ni ngad sonnaged e pi tow’ath ni gad manang nra yib.—Mu beeg e James 5:7, 8.
14, 15. Susun uw rogon u wan’dad e gafgow ni ma yib ko girdi’?
14 Maku reb nrayog ni nge ayuwegdad nge yag ni ngaud gum’an’gad, e ngad guyed rogon ni ngad boded Jehovah nrogon ni ma lemnag e fayleng nge rarogodad. Bod ni, ngam lemnag ko uw rogon u wan’ Jehovah e gafgow ni ma tay e girdi’. Ke n’uw nap’an ni ma guy Jehovah ni kar gafgowgad, ma ma kireban’ ngorad. Machane de pag ni nge taleg e re n’ey ni nge dabki rin’ e tin nib fel’. Ke l’og Jesus ni ‘nge kirebnag e maruwel rok moonyan’’ me sulweg nga rogon urngin ban’en ni ke kirebnag Satan. (1 John 3:8) Riyul’ ni dabki n’uw nap’an me chuweg Got urngin e gafgow. Ere dab da paged ni nge warnag e michan’ rodad e tin nib kireb ko re fayleng ney. Ma susun dabi mulan’dad u nap’an ni gad be sonnag e ngiyal’ nra lebguy Jehovah e tin ke micheg. Ba t’uf ni nge michan’dad ko tin ni ke micheg Got ngodad. Ke turguy Jehovah e ngiyal’ nra gothey e tin nib kireb ma ra rin’ e re n’ey nrogon nib puluw ko ngiyal’ ni ke dugliy.—Isa. 46:13; Nah. 1:9.
15 Ngiyal’ n’ey ni ke mo’maw’ e par rodad, ma rayog ni nge yib e magawon ngodad nra skengnag e michan’ rodad. Ra buch ni gadad ara piin nib t’uf rodad e kad gafgowgad ni bochan e cham ni ke tay e girdi’ ngodad ara bochan boch e magawon. Dab da damumuwgad ya ba t’uf ni ngad pagedan’dad ngak Jehovah. Dawor da flontgad, aram fan nib mo’maw’ ni ngad rin’ed ni aram rogon. Machane dab mu pag talin e n’en nrin’ Jesus, ni bay ko Matthew 26:39.—Mu beeg.
16. Nap’an ni gad be sonnag ni nge yib e tomur, ma mang e thingar dab da rin’ed?
16 Be’ ni be maruwaran’ ko ke chugur e tomur fa dawor e rayog ni nge sum e lem rok nde puluw. Mang e be yip’ fan e re n’ey? Rayog ni nge lemnag nib t’uf ni bay ban’en ni nge rin’ nfaanra dabi lebug e tin ni ke micheg Jehovah. Rayog ni nge gaar u laniyan’, ‘Nggu son, ni ngguy ko riyul’ nra lebguy Jehovah e n’en ni ke yog.’ Ma sana ra athamgil ni nge mang be’ nib gilbuguwan ko re fayleng ney, ma ra tabab ni nge pagan’ ko salpiy me tal i m’oneg Gil’ilungun Got u wan’. Ara un ko skul nib tolang ya nge mom e yafas rok e ngiyal’ ney. Machane, gathi be m’ug riy ni ke war e michan’ rok? Dab da paged talin ni ke fonownagdad Paul ni ngad folwokgad rok e “piin nib mich Kristus u wan’rad ma ba gum’an’rad,” ma ke yag ngorad e tin ni ke micheg Jehovah ni nge pi’ ngorad. (Heb. 6:12) Ke dugliy Jehovah ni nge gothey e tin nib kireb ko re fayleng ney ma dabi sowath. (Hab. 2:3) Ere chiney e ngad athamgilgad ni ngad pigpiggad ngak Jehovah nrogon nrayog rodad. Dab da paged talin ni gadad be par ko tin tomuren e rran, ma ngad uned ko machib nrogon nrayog rodad. Re maruwel ney e rayog ni nge pi’ e felfelan’ ngodad e ngiyal’ ney.—Luke 21:36.
MANG E PI TOW’ATH NRA YIBNAG E GUM’AN’?
17, 18. (a) Mang e kanawo’ e kan bing ngodad ni bay rogon ko gum’an’? (b) Mang e pi tow’ath e yira pi’ ngodad nfaanra ngaud gum’an’gad e ngiyal’ ney?
17 Demtrug ko kad pigpiggad ngak u lan in e pul ara bokum e duw, ma gad baadag ni ngad pigpiggad ngak Got ndariy n’umngin nap’an. Ma ra ayuwegdad e gum’an’ nge yag ni ngad k’adedan’dad nge mada’ ko ngiyal’ ni ke yag e yafas ni manemus ngodad, ndemtrug ko uw n’umngin nap’an ni nge par e re m’ag ney. Ke bing Jehovah e kanawo’ ngodad ya nge yag ni ngad daged ko riyul’ ni gad be pagan’ ngak fa, danga’. Faanra ba t’uf ma ngad daged nib m’agan’dad ngay ni ngad yul’yul’gad ngak u fithik’ gafgow. (1 Pet. 4:13, 14) Maku be skulnagdad Got nra ayuwegdad ni ngaud gum’an’gad nge yag ni ngad thapgad ngak.—1 Pet. 5:10.
18 Tharmiy nge fayleng e ke mil fan ngak Jesus, ma dariy ban’en nrayog ni nge taleg ni nge dabkiyog ni nge ayuwegem nfaanra kam par ni gab yul’yul’ ngak. (John 10:28, 29) De t’uf ni ngad rusgad ko n’en nra buch boch nga m’on. Piin ni yad ra k’adedan’rad nge mada’ ko tomur e yad ra magey nib fas. Ere thingar da athamgilgad ni nge dab da paged e fayleng ni nge waliydad ko kireb ma ra k’aringdad ni nge dab ku uda pagedan’dad ngak Jehovah. Thingar da athamgilgad ni ngad gelnaged e michan’ rodad ma ngad fanayed e tayim rodad u fithik’ e gonop.—Matt. 24:13; mu beeg e 2 Peter 3:17, 18.
[Study Questions]
[Pictures on page 21]
Rayog ni nge ayuwegem e gum’an’ ya nge yag ni ngam tiyan’um ko Gil’ilungun Got ma ga t’ar wom’engin!
