Unaj u chúukpajal k-óol jeʼex Jéeoba yéetel Jesuseʼ
Unaj u chúukpajal k-óol jeʼex Jéeoba yéetel Jesuseʼ
«Yanak ta tuukuleʼex [...] le chúukaʼan óolal yaan tiʼ k-Yuumtsiloʼ utiaʼal [k-salvación].» (2 PED. 3:15)
¿BAʼAX JEʼEL A NÚUKIKEʼ?
¿Bix u yeʼesik Jéeoba chúukaʼan u yóol páaʼtaj?
¿Baʼaxten anchaj u páaʼtaj Jesús yaʼab jaʼaboʼob?
¿Baʼax jeʼel u yáantkoʼon utiaʼal u chúukpajal k-óol páaʼtaj jeʼex Dioseʼ?
1. ¿Baʼax kʼáatchiʼil ku beetik yaʼab sukuʼunoʼob chúukaʼan u yóol u meyajtoʼob Dios?
J UNTÚUL kiik úuch káajak u meyajtik Jéeoba yéetel chúukaʼan óolal kex tsʼoʼok u muʼyajtik yaʼab baʼaloʼobeʼ, tu yaʼalaj: «¿Yaan wa in wilik u taal le xuʼulsajoʼ?». Yaʼab sukuʼunoʼob úuch káajak u meyajtikoʼob Jéeoba yéetel chúukaʼan óolaleʼ ku tuukuloʼob xan beyoʼ. Leloʼ maʼ kʼaasiʼ, tumen tuláakloʼon taak k-ilik u kʼiinil u «túumbenkunsik tuláakal baʼal» yéetel u xuʼulsik le talamiloʼoboʼ (Apo. 21:5). Tuláakal le baʼaxoʼob ku yúuchloʼ ku yeʼesik chéen ken téek xuʼulsaʼak le kʼasaʼan yóokʼol kaabaʼ. Kex k-ojel lelaʼ yaan horaeʼ maʼ chéen chʼaʼabil u chúukpajal u yóol máakiʼ.
2. ¿Baʼax kʼáatchiʼiloʼob ken k-núuk teʼ xookaʼ?
2 Le Bibliaoʼ ku yaʼalikeʼ unaj u chúukpajal k-óol páaʼtaj. Utiaʼal k-ilik u béeytal le baʼaxoʼob u yaʼalmaj Diosoʼ, unaj u muʼukʼaʼantal k-fe yéetel u chúukpajal k-óol jeʼex le máaxoʼob meyajt úuchjeakoʼ (xokaʼak Hebreob 6:11, 12). Koʼoneʼex ilik bix u chúukpajal u yóol Jéeoba. Letiʼeʼ desde úuchjeak jeʼel u páajtal u xuʼulsik le kʼasaʼan yóokʼol kaabaʼ, baʼaleʼ táan u páaʼtik junpʼéel maʼalob súutukil (Rom. 9:20-24). ¿Baʼaxten chúukaʼan u yóol páaʼtaj? ¿Bix tu beetil xan Jesús, yéetel baʼax utsil jeʼel k-kʼamik wa k-beetik xan beyoʼ? K-ojéeltik u núukileʼ ku yáantkoʼon utiaʼal u yantaltoʼon fe yéetel utiaʼal u chúukpajal k-óol kex yaan hora k-tuklik bey táan u xáantal Jéeobaeʼ.
BAʼAXTEN CHÚUKAʼAN U YÓOL JÉEOBA
3, 4. 1) ¿Baʼaxten maʼ u jáan béeykunt Jéeoba le baʼax u tukultmaj utiaʼal le Luʼumaʼ? 2) ¿Baʼax tu beetaj Jéeoba ka xuʼul u yuʼubaʼal u tʼaan tu jardinil Edenoʼ?
3 Kex Jéeoba u maas nojchil tiʼ tuláakal baʼaleʼ yaan baʼax oʼolal ku chúukpajal u yóol. Jéeobaeʼ u yojel kʼaʼabéet u máan tiempo utiaʼal u núukaʼal le kʼáatchiʼob anchaj úuchik maʼ u yuʼubaʼal u tʼaan tu jardinil Edenoʼ. Tumen jach u yojel baʼax ku beetik yéetel ku tuklik angeloʼob yéetel wíinikeʼ, ken u beet wa baʼaxeʼ ku kaxtik u yutsiloʼob (Heb. 4:13).
4 Jéeobaeʼ u tukultmaj u chuʼupul le Luʼum yéetel u paalaloʼob Adán yéetel Evaoʼ. Ka tuʼus Eva tumen Satanaseʼ Adaneʼ xuʼul xan u yuʼubik tʼaan, baʼaleʼ Dioseʼ maʼ tu yaʼalaj wa júub le baʼax u tukultmoʼ. Letiʼeʼ maʼ saʼat u yóoliʼ mix tu jáan pʼataj wíinikiʼ, baʼaxeʼ yaan baʼax tu beetaj utiaʼal u béeytal le baʼax u tukultmaj yoʼolal wíinik yéetel le Luʼumaʼ (Isa. 55:11). Utiaʼal u béeytal le baʼax u tukultmaj yéetel u yeʼesik chéen tiʼ letiʼ yaan u derechoil u gobernareʼ, Jéeobaeʼ tsʼoʼok u páaʼtik u máan u milesil jaʼaboʼob utiaʼal u béeytal maas maʼalob jujunpʼéel tiʼ le baʼaxoʼob u tukultmoʼ.
5. ¿Baʼax jatsʼuts baʼal kun béeytal tu yoʼolal u chúukaʼan óolal Jéeoba?
5 Uláakʼ baʼax oʼolal tsʼoʼok u chúukpajal u yóol Jéeobaeʼ, tumen u yojel maas yaʼab máax jeʼel u kʼamik le kuxtal minaʼan u xuuloʼ. Bejlaʼeʼ táan u beetik tuláakal le ku páajtal utiaʼal u salvartik «yaʼabkach máakoʼob» (Apo. 7:9, 14; 14:6). Yéetel le kʼaʼaytajoʼ táan u invitartik yaʼab máakoʼob utiaʼal u kankoʼob le baʼaxoʼob uts tu tʼaanoʼ yéetel le baʼax ken u beet u Reinooʼ. U jaajileʼ u «maʼalob péektsil» le Reinooʼ, letiʼe baʼax maas maʼalob jeʼel u kʼamik wíinikoʼ (Mat. 24:14). Tuláakal le máakoʼob u yaabiltmoʼob baʼax tojoʼ Jéeoba natsʼoʼob tu yiknal (Juan 6:44-47). Jéeoba áantkoʼob utiaʼal u beetkoʼob baʼax uts tu tʼaan. Letiʼ yéeyik xan le máaxoʼob kun binoʼob gobernar teʼ kaʼanoʼ. Ken káajak u gobernar le sukuʼunoʼob chúukaʼan u yóoloʼobaʼ yaan u yáantajoʼob utiaʼal u lukʼul u kʼeban le wíinikoʼob ku yuʼubikoʼob tʼaanoʼ yéetel utiaʼal u yantaltiʼob kuxtal minaʼan u xuul. Bey túunoʼ kex chúukaʼan u yóol Jéeoba u páaʼt u kʼiinileʼ, yaan baʼax u beetmaj utiaʼal k-kʼamik u yutsil le baʼaxoʼob u yaʼalmaj u beetkoʼ.
6. 1) ¿Bix tu yeʼesil Jéeoba chúukaʼan óolal tu kʼiiniloʼob Noé? 2) ¿Bix u yeʼesik chúukaʼan óolal Jéeoba teʼ kʼiinoʼobaʼ?
6 Jéeobaeʼ jach chúukaʼan u yóol kex le kʼasaʼan máakoʼoboʼ ku beetkoʼob yaʼab baʼaloʼob utiaʼal u pʼuʼujul, jeʼex táanil tiʼ le Búulkabaloʼ. Teʼ kʼiinoʼoboʼ jach «yaachaj u yóol» tumen chuʼup le luʼum yéetel núupkʼeban yéetel u beetaʼal looboʼ (Gén. 6:2-8). Letiʼeʼ maʼ mantatsʼ ken u chéen il kaʼach u beetaʼal baʼax kʼaasiʼ, le oʼolal tu chʼaʼtuklaj u taasik le Búulkabaloʼ. Baʼaleʼ tu «kʼiiniloʼob Noé, le kaʼach táan u páaʼtaj Jajal Dios[oʼ]», tu yilaj bix ken u salvartil Noé yéetel u familia (1 Ped. 3:20). Ka kʼuch u kʼiinileʼ tu yaʼalajtiʼ baʼax tsʼoʼok u chʼaʼtuklik u beetik yéetel tu yaʼalajtiʼ ka u beet junpʼéel arca (Gén. 6:14-22). Tsʼoʼoleʼ Noeeʼ juntúul «máax tu [kʼaʼaytaj] toj kuxtal» yéetel le xuʼulsajil ku taal kaʼach u kʼiinoʼ (2 Ped. 2:5). Jesuseʼ tu yaʼaleʼ le kʼiinoʼob kuxlikoʼonaʼ yaan u chíikpajal tiʼ u kʼiiniloʼob Noé. Jéeobaeʼ tsʼoʼok u yaʼalik yaan u xuʼulsik le kʼasaʼan yóokʼol kaabaʼ, baʼaleʼ mix máak u yojel «baʼax kʼiin wa baʼax hora» (Mat. 24:36). Teʼ kʼiinoʼobaʼ baʼax unaj k-beetkeʼ k-aʼalik tiʼ le máakoʼob baʼax unaj u beetkoʼob utiaʼal u salvarkubaʼoboʼ.
7. ¿Jach wa tsʼoʼok u xáantal maʼ u béeykunt Jéeoba le baʼaxoʼob u yaʼalmoʼ? Tsole.
7 ¿U kʼáat wa túun u yaʼaleʼ Jéeobaeʼ chéen táan u yilik u máan tiempo? Maʼatech. Yaan u jelaʼanil u páaʼtaj máak yéetel u chéen ilik u máan tiempo. Baʼaleʼ u jaajileʼ ken joʼopʼok u yantal k-jaʼabil wa ken muʼyajnakoʼon teʼ kʼasaʼan yóokʼol kaabaʼ jeʼel k-tuʼubsikeʼ. Maʼ xaaneʼ jeʼel u lúubul k-óoleʼ wa k-tuklik táan u jach xáantal Dios maʼ u béeykunt le baʼaxoʼob u yaʼalmoʼ (Heb. 10:36). Kʼaʼajaktoʼoneʼ yaan baʼax oʼolal ku chúukpajal u yóol yéetel le tiempooʼ ku meyajtiʼ utiaʼal u kiʼikiʼtʼantik le máaxoʼob meyajtik yéetel chúukaʼan óolaloʼ (2 Ped. 2:3; 3:9). Koʼoneʼex ilik xan bix chúukpajik u yóol Jesús jeʼex tu beetil Dioseʼ.
JESUSEʼ CHÚUKPAJ U YÓOL
8. ¿Tiʼ baʼax súutukiloʼob tu yeʼesaj Jesús chúukaʼan u yóol páaʼtaj?
8 Jesuseʼ tsʼoʼok u máan u milesil jaʼaboʼob ku beetik tu jaajil u yóol baʼax uts tu tʼaan Dios. Ka tu tsʼáajuba Satanás tu contraeʼ, Jéeobaeʼ tu chʼaʼtuklaj u túuxtik u Hijo way Luʼum utiaʼal u beetkuba Mesíasil. Chéen tukult baʼax anchaj u beetik Jesús: tu páaʼtaj u milesil jaʼaboʼob tak ka kʼuch u kʼiinil (xokaʼak Galaciailoʼob 4:4). Baʼaleʼ maʼ chéen u méekʼmaj u kʼabiʼ. Baʼaxeʼ tu kʼubaj u yóol u beet le baʼaxoʼob aʼalaʼabtiʼ tumen u Taataoʼ. Le ka taal way Luʼumeʼ u yojliliʼ Satanás kun beetik u kíimsaʼal jeʼex aʼalaʼaniloʼ (Gén. 3:15; Mat. 16:21). Kex jach muʼyajnajeʼ chúukpaj u yóol u beet le baʼax aʼalaʼantiʼoʼ, beyoʼ tu yeʼesaj jach u kʼubmaj u yóol tiʼ Dios. Maʼ tuukulnaj chéen tu yoʼolaliʼ. ¡Bey unaj k-tuukul xanoʼ! (Heb. 5:8, 9.)
9, 10. 1) ¿Baʼax ku beetik Jesús le táan u páaʼtik le kʼiin u chʼaʼtukultmaj Jéeobaoʼ? 2) ¿Bix unaj k-ilik le tiempo ku páaʼtik Jéeobaoʼ?
9 Ka tsʼoʼok u kaʼa kuxkíintaʼaleʼ tsʼaʼab páajtalil tiʼ Jesús teʼ kaʼan bey xan way Luʼumeʼ (Mat. 28:18). Lelaʼ mantatsʼ ku meyajtiʼ utiaʼal u beetik tu súutukil le baʼax u chʼaʼtukultmaj Jéeobaoʼ. U Hijo Dioseʼ chúukpaj u yóol páaʼtaj tu x-noʼoj kʼab u Taata tak tu jaʼabil 1914, le ka tsʼaʼab u enemigoʼob bey «u kúuchilil [u] tʼalkúuntik [u yookoʼobeʼ]» (Sal. 110:1, 2; Heb. 10:12, 13). Maʼ kun xáantaleʼ yaan u xuʼulsik u kʼasaʼan yóokʼol kaab Satanás, baʼaleʼ le maʼ kʼuchuk u kʼiinileʼ chúukaʼan u yóol tiʼ máak yéetel ku bisik tu yiknal «u jaʼil kuxtal» (Apo. 7:17).
10 Jesuseʼ ku kaʼansiktoʼon bix unaj k-ilik le tiempo ku páaʼtik Jéeobaoʼ. Letiʼeʼ jach taak u beetik jeʼel baʼaxak ka aʼalaʼaktiʼ kaʼach tumen u Taataeʼ, kex beyoʼ chúukpaj u yóol u páaʼt le súutukil u chʼaʼtukultmaj Diosoʼ. Le táan k-páaʼtik u xuʼulsaʼal u kʼasaʼan yóokʼol kaab Satanaseʼ, maʼ unaj xan k-jáan beetik junpʼéel baʼal maʼ u yaʼalmaj Diosiʼ mix u lúubul k-óoliʼ. Le oʼolaleʼ, ¿baʼax jeʼel u yáantkoʼon utiaʼal u chúukpajal k-óol páaʼtajeʼ?
¿BIX JEʼEL U CHÚUKPAJAL K-ÓOL PÁAʼTAJ JEʼEX DIOSEʼ?
11. 1) ¿Baʼaxten kʼaʼabéettoʼon fe yéetel chúukaʼan óolal? 2) ¿Baʼaxten yaan baʼax oʼolal u muʼukʼaʼantal k-fe?
11 ¿Jeʼel wa u chúukpajal u yóol wíinik kex kʼebaneʼ? Jeʼeleʼ, bey tu yeʼesil le profetaʼob yéetel uláakʼ máaxoʼob chúukpaj u yóoloʼob tiʼ Dios táanil tiʼ u taal Jesús way Luʼumaʼ. Anchajtiʼob fe yéetel chúukpaj u yóoloʼob páaʼtaj (xokaʼak Santiago 5:10, 11). Wa minaʼan u fejoʼob tiʼ le baʼaxoʼob aʼalaʼantiʼob tumen Jéeobaoʼ, ¿jeʼel wa u chúukpajal u yóol u páaʼtoʼob le baʼaxoʼob u yaʼalmoʼ? Yaan kʼiineʼ tu aktáantoʼob talamiloʼob, baʼaleʼ u yojloʼobeʼ jeʼel baʼaxak kʼiineʼ Dioseʼ yaan u beetik le baʼax u yaʼalmoʼ (Heb. 11:13, 35-40). Bejlaʼeʼ maas yaan baʼax oʼolal u muʼukʼaʼantal k-fe, tumen Jesús «utsil chúukaʼankúuntik» (Heb. 12:2). Úuchik u béeykuntik le profecíaʼob yéetel u yeʼesik le baʼaxoʼob u tukultmaj u beetik Diosoʼ, tu yeʼesaj yaan baʼax oʼolal k-kʼubik óol tiʼ Jéeoba.
12. ¿Baʼax unaj k-beetik utiaʼal u muʼukʼaʼantal k-fe?
12 ¿Baʼax unaj k-beetik utiaʼal u muʼukʼaʼantal k-fe yéetel u chúukpajal k-óol páaʼtaj? Unaj k-beetik baʼax ku yaʼalik Dios. Maʼalob ka k-tukult baʼaxten unaj k-tsʼáaik táanil le Reinooʼ. ¿Jeʼel wa u páajtal k-maas beetik le baʼax ku yaʼalik Mateo 6:33? Maʼ xaaneʼ yaan u kʼaʼabéettal k-maas jóoʼsik tiempo utiaʼal k-jóokʼol kʼaʼaytaj wa k-beetik uláakʼ kʼeexoʼob ichil k-kuxtal. Maʼ u tuʼubultoʼon bix tsʼoʼok u kiʼikiʼtʼantkoʼon Jéeoba ikil k-meyajtik. Maʼ xaaneʼ tsʼoʼok u yáantkoʼon k-tsʼáa xook tiʼ wa máax wa tsʼoʼok u tsʼáaiktoʼon le jeetsʼel «maas nojoch tiʼ le ku páajtal u naʼatik máakoʼ» (xokaʼak Filiposiloʼob 4:7). Le oʼolaleʼ wa k-tuukul tiʼ le utsiloʼob tsʼoʼok k-kʼamik ikil k-beetik baʼax ku yaʼalik Jéeobaoʼ, maas yaan u kiʼimaktal k-óol páaʼtaj (Sal. 34:8).
13. Tsol bix jeʼel u yantal fe yéetel chúukaʼan óolal tiʼ máakeʼ.
13 Lelaʼ bey jeʼex le máaxoʼob ku paakʼaloʼob tsʼoʼoleʼ ku meyajtikoʼob yéetel ku joochoʼoboʼ. Cada ken joochnakeʼ le j-kolnáaloʼ maas ku taaktal u kaʼa paakʼal. Maʼatech u lúubul u yóol kex ku páaʼtik u kʼiinil u jooch. Maʼ xaaneʼ ku beetik maas yaʼab u kool, tumen u yojel yaan u jooch. Óoliʼ bey u yúuchul yéetel le baʼaxoʼob ku yaʼalik Diosoʼ. Cada ken k-kan wa baʼax, ken k-tsʼáa ichil k-kuxtal yéetel ken k-il u yutsileʼ, k-maas kʼubik óol tiʼ Jéeoba yéetel k-maas páaʼtik le utsiloʼob ken u taasoʼ (xokaʼak Santiago 5:7, 8).
14, 15. ¿Bix unaj k-ilik le baʼaxoʼob ku muʼyajtik wíinikoʼ?
14 Utiaʼal u chúukpajal k-óol páaʼtajeʼ unaj k-ilik le yóokʼol kaab yéetel le kuxtal jeʼex u yilik Jéeobaoʼ. Letiʼeʼ kex tsʼoʼok u milesil jaʼaboʼob yaat u yóol u yilik u muʼyaj wíinikeʼ, maʼ tu chaʼik u jach lúubul u yóol. Tu lugar u saʼatal u yóoleʼ, tu túuxtaj u juntúuliliʼ Paal «utiaʼal u mixbaʼalkúunt[ik] le baʼax u beetmaj [le] Kʼaasilbaʼaloʼ» yéetel utiaʼal u yutskíintik le talamiloʼob tsʼoʼok u taasik tiʼ wíinikoʼ (1 Juan 3:8). Bey kun xuʼulul le baʼaloʼob ku muʼyajtaʼaloʼ, baʼaleʼ le utsiloʼoboʼ utiaʼal mantatsʼ. Le oʼolaleʼ tu lugar k-sen chiʼichnaktal yoʼolal le kʼasaʼanil ku yilaʼal tu yóokʼol kaab Satanás tumen taak k-ilik u xuʼululeʼ, unaj k-tsʼáaik fe tiʼ le baʼaxoʼob maʼ tu yilaʼaloʼob ku xáantaloʼob utiaʼal mantatsʼoʼ. Jéeobaeʼ tsʼoʼok u chʼaʼtuklik baʼax kʼiin ken u xuʼuls le kʼasaʼan yóokʼol kaabaʼ, yéetel yaan u beetik jach teʼ kʼiinoʼ (Isa. 46:13; Nah. 1:9).
15 Teʼ tu tsʼook kʼiinoʼob le kʼasaʼan yóokʼol kaabaʼ, maʼ xaaneʼ yaan u túuntaʼal k-fe tumen nukuch talamil. Wa ku beetaʼal k-muʼyaj bey xan wa ku muʼyaj juntúul k-láakʼtsileʼ, maʼ unaj k-pʼuʼujuliʼ. Kex ka talamchajak yoʼolal le kʼebanoʼ unaj k-kʼubik k-óol tiʼ Jéeoba yéetel u yantaltoʼon le tuukul anchaj tiʼ Jesús ku chíikpajal tiʼ Mateo 26:39 (xokaʼak).
16. ¿Baʼax maʼ unaj k-beetik teʼ tu tsʼook kʼiinoʼobaʼ?
16 Wa k-kʼáat ka chúukpajak k-óol páaʼtaj jeʼex Dioseʼ, unaj k-jach creertik le baʼax ku yaʼalikoʼ. ¿Baʼaxten k-aʼalik lelaʼ? Tumen wa juntúul máak maʼ tu jach creertik naatsʼ yanil le xuʼulsajoʼ jeʼel u yantaltiʼ junpʼéel «plan B» wa maʼ tu yúuchul le baʼax u yaʼalmaj Jéeobaoʼ. Maʼ xaaneʼ ku sen meyaj utiaʼal u yantaltiʼ taakʼin tu lugar u tsʼáaik táanil le Reinooʼ, wa ku kaʼantal u xook utiaʼal u yantaltiʼ junpʼéel maʼalob kuxtal. Le máax beetik beyaʼ ku yeʼesik maʼ muʼukʼaʼan u fejiʼ. Kʼaʼajaktoʼoneʼ Pabloeʼ tu yaʼalaj ka k-beet jeʼex le máaxoʼob tu yeʼesoʼob «oksaj óolal» yéetel «chúukaʼan óolal» tu creertoʼob le baʼaxoʼob u yaʼalmaj Jéeobaoʼ (Heb. 6:12). Jéeobaeʼ utiaʼal u béeykuntik le baʼax u tukultmoʼ maʼ ken u páaʼt mix junpʼéel kʼiin maas tiʼ le kʼaʼabéet utiaʼal u xuʼulsik le kʼasaʼan yóokʼol kaabaʼ (Hab. 2:3). Le táan k-páaʼtik le kʼiinaʼ maʼ unaj k-meyajtik Dios chéen tumen k-ojel unaj k-beetkiʼ. Baʼaxeʼ unaj k-jach pʼil ich yéetel k-kʼaʼaytik le maʼalob péektsiloʼ, tumen lelaʼ yaan u taasiktoʼon kiʼimak óolal tak teʼ kʼiinoʼobaʼ (Luc. 21:36).
LE UTSILOʼOB KU TAASIK LE CHÚUKAʼAN ÓOLALOʼ
17, 18. 1) ¿Baʼax páajtalil ku tsʼáaiktoʼon Jéeoba tumen chúukaʼan u yóol? 2) ¿Baʼax utsil jeʼel k-kʼamik wa ku chúukpajal k-óol teʼ kʼiinoʼobaʼ?
17 Kex úuch káajak k-meyajtik Jéeoba wa maʼeʼ, tuláakloʼon taak k-meyajtik mantatsʼ. Wa ku chúukpajal k-óol páaʼtajeʼ yaan k-salvartikba, jeʼel bukaʼaj kʼiin pʼaatal tiʼ le kʼasaʼan yóokʼol kaabaʼ. Bejlaʼeʼ Jéeobaeʼ ku tsʼáaik u páajtalil k-kʼubik óoltiʼ yéetel tuláakal k-puksiʼikʼal yéetel k-eʼesik jeʼel k-muʼyaj tu yoʼolal u kʼaabaʼ wa ku kʼaʼabéettaleʼ (1 Ped. 4:13, 14). Tsʼoʼoleʼ ku yáantkoʼon utiaʼal u chúukpajal k-óol páaʼt u salvartikoʼon (1 Ped. 5:10).
18 Tsʼoʼok u tsʼaʼabal tiʼ Jesús tuláakal páajtalil kaʼan yéetel way Luʼumeʼ, le oʼolaleʼ chéen jaʼaliʼ toʼon jeʼel k-náachtal tiʼeʼ (Juan 10:28, 29). Minaʼan baʼax oʼolal k-sajaktal tiʼ baʼax ku taal u kʼiin mix tiʼ le kíimiloʼ. Le máax kun chúukpajal u yóol páaʼtaj tak tu xuuleʼ yaan u salvarkuba. Le oʼolal unaj k-ilik maʼ u tuskoʼon le yóokʼol kaab ka xuʼuluk k-kʼubik k-óol tiʼ Jéeobaoʼ. Unaj k-muʼukʼaʼankúuntik k-fe yéetel k-jóoʼsik u yutsil u chúukaʼan óolal Dios (Mat. 24:13; xokaʼak 2 Pedro 3:17, 18).
[U kʼáatchiʼiloʼob le xookoʼ]
[Fotoʼob yaan teʼ táan juʼun 21]
Wa ku chúukpajal k-óol páaʼtaj jeʼex Dioseʼ, yaan k-tsʼáaik táanil le Reinooʼ yéetel yaan k-kʼamik yaʼab utsiloʼob
