1-3. (a) Ngo ma romo konyowa me niang carolok aryo pa Yecu-ni? (b) Lapeny mene ma myero wagamgi?

 GO KONG ni ladit mo muywek owacci itere ki mutoka i cokke mo ma pire tek adada. Ento ma odong dakika manok ma myero igamme kwede, wii opo ni moo ma i mutoka pe romo. Omyero i cit oyotoyot ka wilo moo. Ento ma icito ka wilo moo, ladit-ti obino. Otemo yenyi ento pe onongi. Pienni pe romo kuri, ladit-ti openyo ngat mukene me tere. Ma idwogo ki ka wilo moo kiwacci ni ladit-ti dong ocito i cokke meno. Ibiwinyo nining?

² Tam kong ni ibedo ladit meno, iyero co adek mucwiny ma gikwiri me timo tic mo ma pire tek adada. Itito botgi gin ma myero gutim dok bene guye timone. Ento ma idwogo, inongo ni co aryo keken aye gucobo ticgi. Marac dong loyo aye ni ngat ma pe ocobo ticce ni tye ka gengo ngeye. I kom lok, en pe bene otemo timo tic ma imiye-ni. Ibiwinyo nining?

³ I carolokke i kom anyira apar ki lim, Yecu otiyo ki carolok acel-lu me nyuto gin mumiyo i kare me agikki Lukricitayo mogo ma kiwirogi gibibedo lugen dok ma giryek, ento mukene pe gibibedo kumeno. * (Mat. 25:1-30) En otito man kun waco ni: “Pi meno wuki [piny], pien pe wungeyo nino kadi wa cawa”​—meno aye kare ma Yecu bingolo kop i kom lobo pa Catan-ni. (Mat. 25:13) Waromo tic ki tira meno i kare-ni bene. Waromo nongo adwogi maber nining ka wabedo ma wakiyo piny kit ma Yecu ocuko cwinywa me timone-ni? Angagi ma gubedo ma gikiyo piny? Dok gin ango ma myero watim i kare-ni wek wabed ma wakiyo piny?

4. Pingo bedo ma ‘wangwa twolo’ pe te lokke ni bedo ka neno cawa?

⁴ Jami mogo calo tic i cuma madongo, cito ka neno dokto, ki dong wot me cito ka mo mito lubo cawa. Tic mukene calo neko mac nyo laro kwo pa dano ka ma peko ma poto atura otimme iye pe twere ka wabedo mot ka neno kit ma cawa woto ki kato kwede, man keto kwo ka mading. I jami magi ducu, ber me keto cwinywa me tiyo tic ma tye, ma ka paro pi kit ma cawa woto kwede. Ka agikki me lobo man woto ki nyiko cok, ticwa me tito kwena-ni konyo dano me niang gin ma Jehovah otimo me laro dano. Bedo ma wangwa twolo macalo Lukricitayo pe te lokke ni bedo ka neno cawa. Bedo ma pe wangeyo nino ki cawa ma agikki piny bibino iye konyowa i yo abic mapat pat.

5. Bedo ma pe wangeyo nino ki cawa me agikki konyo me nyuto gin ma tye i cwinywa nining?

⁵ Mukwongo, pienni pe wangeyo nino meno nyo cawane, man miyo wanyuto gin ma tye i cwinywa. Ki lok ada, bedo ma pe wangeyo cawa ki ninone konyowa me moko tamwa piwa kenwa kun wanyuto ni wan lugen bot Jehovah. Kadi bed ni watye ka kuro bwot ki i agikki me lobo man, wan watiyo pi Jehovah pienni wamarre ento pe ni pien wamito kwo. (Kwan Jabuli 37:4.) Wanongo yomcwiny i timo mitine kun wangeyo ni Lubanga tye ka pwonyowa wek wanong adwogi maber. (Ic. 48:17) Pe wanongo ni cikke nurowa.​—1 Jon 5:3.

6. Ka watiyo pi Lubanga pienni wamarre, en winyo nining dok pingo?

⁶ Me aryo, adwogi mukene ma wanongo pienni pe wangeyo nino meno nyo cawane aye ni miniwa kare me yomo cwiny Jehovah. Ka watiyo pi Lubanga pienni wamarre​—ento pe ni pi nino nyo ni wabinongo adwogi maber​—ci wakonyo Jehovah me nyuto ni Catan lagoba. (Yubu 2:4, 5; kwan Carolok 27:11.) Pien wangeyo arem kacel ki deno can ma Larac-ci okelo, cwinywa yom ni wan wacwako twero me loc pa Jehovah kun wakwero loc pa Catan.

7. Pingo itamo ni pore me jalo kwoni i tic pi Lubanga?

⁷ Me adekke aye ni, tic pi Jehovah labongo keto nino meno i wiwa miyo wajalle me timo tic matir. Jo mukene i kare-ni ma bene pe giye i kom Lubanga-ni gingeyo ni agikki pa lobo man dong cok. Pien gitye ki lworo pi peko ma bitimme i anyim, gin gitye ki cwiny man ni, “wacamu, wamatu, pien diki wabito woko.” (1 Kor. 15:32) Ento wan wape ki lworo mo keken. Wan pe wabedo ka kanne akana wek watim jami ma cobo mitiwa keken ento waribbe ki jo mukene. (Car. 18:1) Ma ka meno, wan waketo Jehovah bedo mukwongo i kwowa, kun watiyo ki cawawa, kerowa ki jami ma watye kwede me tito pi kwena maber me Ker pa Lubanga bot jo mukene. (Kwan Matayo 16:24.) Wanongo yomcwiny i tiyo tic pa Lubanga, tutwalle konyo jo mukene wek gunge en.

8. Labol mene ma tye i Baibul ma nyuto ni pire tek me jenge i kom Jehovah kacel ki Lokke?

⁸ Adwogi me angwenne ma wanongo pienni pe wangeyo nino nyo cawa me agikki aye ni konyowa me keto genwa duc i kom Jehovah dok miyo waketo Lokke i tic. Pien watye ki roc, yot tutwal me keto gen i komwa kekenwa. Paulo ociko Lukricitayo duc ni: “Ngat mo ma tamo ni etwero cung myero ogwokke wek pe opoti.” Ma peya Yocwa otelo  wi Luicrael me donyo i Lobo ma Kiciko Pire, dano 23,000 kulu guto pien pe gulubo lok pa Jehovah. Paulo coyo ni: “Meno ducu yam otimme i komgi macalo lapo wic, ka dong gicoyo me cikowa, wan jo ma agikki piny oo i komwa-ni.”​—1 Kor. 10:8, 11, 12.

9. Atematema twero jingowa nining kun wanyikke cok bot Lubanga?

⁹ Me abicce, adwogi maber ma wanongo pienni pe wangeyo awene ma agikki piny bibino iye aye ni lonyowa weko wadoko leng. (Kwan Jabuli 119:71.) Kare man me agikki-ni tye kare mo ma “piny bibedo marac.” (2 Tem. 3:1-5) Jo mapol i lobo pa Catan-ni gidagwa, pi meno kibiunowa pi niyewa. (Jon 15:19; 16:2) Ka wamwolle kun wayenyo tira pa Lubanga i kare me atematema, ci wabijingo niyewa bedo matek. Pe wabilo cingwa. Ento, wabinyikke cok bot Jehovah.​—Yak. 1:2-4; 4:8.

10. Gin ango ma weko nen calo iwacci cawa woto oyotoyot?

¹⁰ Waromo neno ni cawa woto mot nyo oyotoyot. Ka watye ki tic mapol me atima kun pe wabedo ka neno cawa, cawa woto oyot. I yo acel-lu, wan watiyo matek i tic ma Jehovah omiyo ni watim, nino ki cawa me agikki bibino ma pe wangeyo. Man oweko jo ma kiwirogi gitye lanen maber me aluba. Kong wanenu wiye wiye gin mutimme i nge keto Yecu macalo Kabaka i mwaka 1914 ki kit ma jo ma kiwirogi gubedo ma guyubbe kun jo mukene pe guyubbe.

11. I nge mwaka 1914, pingo jo mogo ma kiwirogi gutamo ni Yecu tye ka galle?

¹¹ Kong dok watamu i kom carolok ma Yecu omiyo i kom anyira apar kacel ki lim. Ka anyira apar-ri nyo opii ma i lapor aryo magi-ni onongo gingeyo awene ma lanyom nyo laditgi bidwogo iye, kono onongo pe mitte botgi me kiyo piny. Ento gin onongo pe gingeyo, pi meno wan bene omyero wabed ma wayubbe. Kadi bed ni jo ma kiwirogi nongo gineno 1914 calo mwaka ma pire tek, ngecgi onongo nok i kom gin ma obitimme. I kare ma jami pe owoto kit ma gutamo kwede, onongo nen ki botgi ni Lanyom tye ka galle. Omego mo acel owaco lacen kuman: “Jo mogo manok i kinwa gutamo ni kadi ningo wang ma dong wacito i polo i cabit mukwongo me dwe me Apar, mwaka 1914.”

12. Jo ma kiwirogi gunyuto nining ni gitye lagwok ot ma lagen dok maryek?

¹² Tam kong kit ma onongo tye me tur cwiny kwede me geno ni agikki bibino ento pe dok otimme! Medo i kom meno, utmege magi gurwatte ki atematema i kare me Lweny me I me Wi Lobo. Tic me tito kwena-ni onongo nen calo cok gik woko. Ento i mwaka 1919, tye gin mo ma okonyogi! Yecu obino ka ngiyo jo ducu ma giwacci gibedo Lukricitayo dok karene onongo dong oromo. Ento jo mogo ma kiwirogi kinongo ni pe gupore ci gukeng mot me medde ki ‘cato wil’ pa Kabaka. (Mat. 25:16) Bedo calo iwacci gin onongo pe gitye ka medo moogi i yo me cwiny calo anyira apar ca ma gin luming-ngi. Calo opii ca ma kome wac-ni, gin onongo pe gimito jalle me tito pi Ker-ri. Pol pa jo ma kiwirogi-ni gunyuto gennegi kacel ki miti matek me tic pi Laditgi kadi wa i kare me lweny.

13. Cwiny ango ma lagwok ot ma lagen onongo tye kwede i nge mwaka 1914 ki dong i kare-ni?

¹³ I nge mwaka 1914, Watchtower okati ki lok man: “Utmege, wan ma  watye ki cwiny matir i kom Lubanga-ni wape ki wang ic mo keken i kom yub ma Mege. Pe onongo wamito ni mitiwa aye ocobbe; ento i kare ma waniang ni genwa pe ocobbe i dwe me Apar, i mwaka 1914, wabedo ki yomcwiny ni Rwot pe oloko Pulanne wek ocob mitiwa. Pe onongo wamito ni En otim kumeno. Ento wamito mere niang Pulanne kacel ki yubbe.” Jo ma kiwirogi i kare-ni bene gitye ki cwiny man me mwolo ki jalle ken. Gin pe giwakke ni giryek, ento gumoko tamgi me “tiyo tic” pa Rwot i lobo kany. Ki bene Lukricitayo ma gitye ki gen me kwo i lobo, ma gin aye “lwak dano mapol ata” dok ma gin ‘romi mukene-ni,’ gilubo lanen pa jo magi ma kiwirogi-ni i kit me kiyo piny ki mit kom.​—Yabo 7:9; Jon 10:16.

14. Pingo ber ni walub gin ma lagwok ot ma lagen dok maryek pwonyowa kwede?

¹⁴ Calo Lukricitayo ma kiwirogi, lwak dano mapol ata-ni gitye ka lubo yo ma Lubanga tiyo kwede me miyo cam me cwiny. Man bedo calo iwacci gitye ka medo moogi i yo me cwiny. (Kwan Jabuli 119:130; Jon 16:13.) Macalo adwogine, niyegi jing dok gibedo ma guyubbe me kuro dwogo pa Kricito kun bene gibedo lugen i atematema magwar. Me labolle, i gang buc mo acel i Nazi, utmege onongo gitye ki Baibul acel keken. Pi meno, gin gulego bot Jehovah wek ginong cam me cwiny. Lacen, gin guniang ni omego mo ma pud kitweyo nyen olwite ki Watchtower i ot buc. I ngeye, omego mo acel ma nyinge Ernst Wauer, ma tye lakricitayo ma kiwiro dok bene kitweyo i gang buc meno owacci: “Jehovah okonyowa adada ma oweko wiwa opo i kom lok mogo me cuko cwiny dok ma pigi tego ma tye i Watchtower meno.” En omedde ni: “I kare-ni, cam me cwiny dong nongone yot, ento tika pire tek botwa? Ageno ni Jehovah tye ki mot mapol pi jo ma gigene kun gicamo i wi mejane.”

15, 16. Luot mo acel gunongo mot nining pi mit komgi i ticwa me pwony, dok pwony ango ma i nongo ki i lanengi?

¹⁵ Romi mukene-ni bene giteno kor omegi Kricito kun gilungo wigi i tic pa Laditgi. (Mat. 25:40) Pien pe gitye calo opii ma kome wac i lapor pa Yecu-ni,  gin gijalle wek giket pi Ker-ri obed mukwongo. Me lapore, i kare ma Jon gin ki dakone Masako kilwongogi me tito kwena bot luwotgi ma gitye i Kenya ma gua ki i China, gin onongo cwinygi nok. Ento i nge lega bot Jehovah, gin guye bino i Kenya.

¹⁶ Pi tutegi matek i tito kwena, Jehovah ominigi mot mapol. Gin guwacci, “Ticwa me pwony-nyi pud dong tye ka nyako nyige.” Gin gucako kwano Baibul ki lutino kwan abiro. Dok bene gunongo mot mabeco mapol. Gin gumedde ni, “Wapwoyo Jehovah nino ducu me yeni wa ni wabin kany.” Tye omege ki lumege mapol ma gumoko tamgi me tic pi Lubanga ki mit kom labongo paro pi awene ma agikki piny bibino iye. Tam kong i kom dano alip ki alip ma gunongo pwonye ki i Cukul me Pwonyo Lumiconari dok gitye ka tic macalo lumiconari. Iromo nongo ngec mukene mapol ma lubbe ki tic macalo lamiconari ki i pwony ma wi lokke tye ni, “We Do the Best We Can!” i Watchtower me Oktoba 15, 2001. Ka itye ka kwano pwony meno ma gudo cwiny tutwal-li, tam i kom yo mapat pat ma iromo medo kwede ticci me pwony pi Lubanga kacel ki yomcwiny ma bino.

17. Bedo ma pe wangeyo nino ki cawa me agikki tye mot botwa nining?

¹⁷ Ada, bedo ma pe wangeyo nino ki cawa ma agikki piny bibino iye tye twon mot madit adada. Ma ka bedo ma iwa wang, wanyikke cok bot Lubanga, Wonwa ma lamar ma tye i polo, ka nongo waketo cwinywa i timo mitine. Wanongo yomcwiny pien waketo cwinywa i tic ma Yecu omiyo ni watim kun pe waye ni gin mo odwo tamwa.​—Luka 9:62.

18. Pingo wamito ni wamedde ki bedo lugen i tiyo tic pa Lubanga?

¹⁸ Nino ma Lubanga bingolo iye kop dong cok adada. Pe wamito ni wacwer cwiny Jehovah nyo Yecu. Gin guminiwa tic ma pire tek me atima i kare man me agikki-ni. Cwinywa yom mada ni gin guketo gengi i komwa!​—Kwan 1 Temceo 1:12.

19. Wan watwero bedo ma wayubbe nining pi nino me agikki?

¹⁹ Kono watye ki gen me kwo i polo nyo i Paradic, wamoku wunu tamwa me bedo lugen i tic ma Lubanga ominiwa me tito kwena kun waloko dano me doko lupwonnye pa Yecu. Pe mitte ni myero wange nino ki cawa mene kikome ma Jehovah bikelo iye agikki. Waromo bedo ma wayubbe pire dok bene wamito ni ada watim kumeno. (Mat. 24:36, 44) Watye ki tekcwiny ni ka teke wageno Jehovah dok waketo pi Ker-re bedo mukwongo, ci lewic pe bimakowa.​—Rom. 10:11.