Kuna horasa ukat kunürus jutani uk janiw yatipktati
Kuna horasa ukat kunürus jutani uk janiw yatipktati
“Jumanakajj suyapjjapunim, janiw yatipktati kuna horasatejj, jan ukajj kunürutejj jutkani [...] ukjja.” (MAT. 25:13.)
¿KAMSASAS QHANAÑCHTʼASMA?
¿Akapachan tukusiñapajj kuna horasa ukat kunürus jutani uk jan yatiñajj kunanakansa yanaptʼistu?
¿Ajllitanakajj kunjamsa wakichtʼatäsipkakitap uñachtʼayapjje?
¿Criston puriniñapatak wakichtʼat suyaskatas kunjamsa uñachtʼaysna?
1-3. 1) ¿Jesusan pä uñachtʼäwipajj kunanaksa amuytʼayistu? 2) ¿Kuna jisktʼanakar qhanañchañas wakisi?
WALI uñtʼata ukat aytat mä jaqes automat wali wakiskiri mä tantachäwir apita siskiristam ukham amuytʼañäni. Ukat aptir niy sarkasajj gasolin tukusiskatap amuyasma, ukat janis tiempojj utjchejja ukhampach jankʼak alir sarasma. Ukäñkamasti, uka jaqejj uks aksa uñchʼukis wal suyiristam. Ukat jan puritam laykojj yaqhampi apayasjjaspa. Ukat juman puriñamatakejj uka jaqejj chhaqhatäjjaspa ukhajja, ¿kunjamakis jikjjatasisma?
2 Jichhajj jumas uka aytat jaqëkasma ukat confiykaña kimsa chacharus wali wakiskiri luräwi churkasma ukham amuytʼarakma. Ukat kunsa lurapjjañapa uk qhanañchtʼasma ukat kimspachanirak iyaw sapjjaspa. Ukampis kuttʼaniñamatakejj paninik kunjamtï sawaykta ukarjam phoqhapjjaspa. Ukat kimsïr jaqejj jan kuns luratapat may mayak parljjaspa ukhajja, ¿jumajj kunjamakis jikjjatasisma?
3 Jesusajja, patronat qollq katoqer kimsa chachata ukat tunka virgenanakat parlki uka uñachtʼäwinakapanjja, niya ukar uñtasitwa qhanañchäna. Uka uñachtʼäwinakapampejja, qhep qhepa urunakan jakiri ajllit cristianonakat yaqhepajj wali amuyumpi ukat taqe chuymaw suyapjjani, yaqhepasti janirakiw ukham suyapkaniti sasaw qhanañchäna (Mat. 25:1-30). * Ukat kunapachas jupajj Supayan apnaqat aka ñanqha pacha Diosan amtaparjam tukjani uka toqet parlkasajja akham sasaw qhanañchäna: “Jumanakajj suyapjjapunim, janiw yatipktati kuna horasatejj, jan ukajj kunürutejj jutkani Jaqen Yoqapajja ukjja” sasa (Mat. 25:13). Jichhürunakanjja, uka ewjjtʼaparjamaw sarnaqañasaraki. ¿Jesusan arunakaparjam wakichtʼat suyañajj kunjamsa yanaptʼistaspa? ¿Khitinakas qhespiyasiñatak wakichtʼatäpjjatap uñachtʼayapjjäna? ¿Ukat wakichtʼat suyañatakejj kunsa lurañasa?
¿KUNATSA WAKICHTʼAT SUYAÑAJJ WAKISI?
4. ¿Wakichtʼata suyañatakejj kunatsa cristianonakan “hora” uñjjatat sarnaqapjjañapajj jan wakiski?
4 Mä fabrican trabajisasa, doctorar sarañatakisa jan ukajj autot sarañatakis horarupuniw sarnaqañasa. Ukampisa, bomberonakasa jan ukajj jan waltʼäwinakan qhespiyapki ukanakasa, hora uñjjatata sarnaqapjjaspa ukhajj tiempo aptʼasipjjaspa ukat inas maynin jakäwipsa aptʼasiyapjjchispa. Ukhamanakanjja, horar atinisis sarnaqañajj janiw walïkiti, jan ukasti kuntï lurañapäki ukaruw chuyma churañapa. Niya ukhamarakiw akapachan tukusiñap wal jakʼachasisinkipanjja, Diosajj kuntï jiwasar qhespiyañatak lurawayki ukanakat yatiyañajj jukʼampi wakiskirejja. Ukampis wakichtʼata suyañatakejja, cristianonakajj janiw “hora” uñjjatat sarnaqañasajj wakiskiti. Ukhamarus kuna horasapunis jutani uk jan yatiñajj mä phesqa toqetwa yanaptʼistu.
5. Akapachan tukusiñapajj kunürus jutani uk jan yatiñajja, ¿kunjamsa kunatï chuymasan utjki uk uñachtʼayañatak yanaptʼistu?
5 Maya, akapachan tukusiñapajj kunürus jutani uk jan yatiñajja, kunas chuymasan utji uk uñachtʼayañatakiw yanaptʼistu. Jehová Diosajj respetompiw uñjistu, ukatwa taqe chuymat Jupar serviñäni janicha uk jiwas pachpa amtañasatak jaytistu. Cheqas taqeniw akapachan tukusïwipat qhespiñ muntanjja, ukampis janiw wiñay jakañ jikjjatañ laykukejj Jehová Diosar yupaychktanti, jan ukasti Jupar taqe chuyma munasitasatwa yupaychtanjja (Salmo 37:4 liytʼasiñapawa). Diosan munañap lurasajj kusisitaw jikjjatastanjja, ukat yatichäwinakapajj jiwasan askisatakïtapsa yatiraktanwa (Isa. 48:17). Ukat janirakiw Diosan kamachinakap phoqhañajj sinti chʼamäkaspas ukham amuyktanti (1 Juan 5:3).
6. Jehová Diosarojj munasiñat yupaychktan ukhajja, ¿kunjamsa Jupajj jikjjatasi, ukat kunatsa?
6 Paya, akapachan tukusiñapajj kunürus jutani uk jan yatiñajja, Jehová Diosar kusisiyañatakiw yanaptʼarakistu. Jiwasajj janiw kuntï jutïrin katoqkañäni uka laykusa ni kunürus akapachajj tukusini uk yatisakis Jehová Diosar yupaychktanti, jan ukasti munasiñatwa yupaychtanjja, ukhamatwa kuna kʼarinaktï Supayajj Dios contra arsuwaykäna ukanakajj jan cheqätap uñachtʼayañapatak yanaptʼtanjja (Job 2:4, 5; Proverbios 27:11 liytʼasiñapawa). Supayajj kuna jan walinaktï utjayawayki uk yatisaw jupa conträtanjja ukat taqe chuymaw Jehová Diosan Apnaqäwipat saytʼastanjja.
7. ¿Kunatsa munañanakas maysar apanukusin Diosar taqe chuyma serviñasa ukat yaqhanakar yanaptʼañas wakisispa?
7 Kimsa, akapachan tukusiñapajj kunürus jutani uk jan yatiñajja, munañanakas maysar apanukusin Diosar taqe chuyma serviñataki ukat yaqhanakar yanaptʼañatakiw yanaptʼistu. Jichhürunakanjja, Diosajj janiw utjkiti siri jaqenakas akapachan tukusiñap yatipjjewa, ukampis mä jan waltʼäwimpi Oraqpach tukjatäñapwa ajjsarapjje. Ukatwa “manqʼasiñäni, umtʼasiñäni, qharürojj jiwjjchiñänejjaya” sasin sapjje (1 Cor. 15:32). Ukampis jiwasajj janiw ukham ajjsarktanti. Akapachansa jakstanjja, janiw akapachankirinakjam munañasar jakktanti (Pro. 18:1). Jan ukasti, taqe chuymaw Diosan Reinopat suma yatiyäwinak yatiyañatakejj tiempsa, chʼamsa ukat qollqsa apsustanjja (Mateo 16:24 liytʼasiñapawa). Jehová Diosar serviñsa ukat yaqhanakar Jupar uñtʼapjjañapataki yanaptʼañsa wal muntanjja.
8. ¿Bibliankir kawkïr sarnaqäwis Jehová Diosar confiyañasa ukat Aruparjam sarnaqañas wali wakiskirïtap uñachtʼayistu?
8 Pusi, akapachan tukusiñapajj kuna horasa ukat kunürus jutani uk jan yatiñajja, Jehová Diosar jukʼampi confiyañataki ukat Aruparjam sarnaqañatakiw yanaptʼistu. Juchararätas laykojja, jiwas pachpar atinisisakiw sarnaqtanjja. Pablojj akham sasaw cristianonakar ewjjtʼäna: “Khititejj chʼamanïtapa amuyasejja, wal amuytʼaspan ukatarak tinkuskaspan” sasa. Josué chachajj israelitanakar Suma Oraqer janïr irpkipanjja, 23.000 israelitanakaw Diosar jan istʼapjjatapat jiwapjjäna. Ukatwa Pablojj akham säna: “Ukanakasti qellqatawa jiwasanakan amuytʼasipjjañasataki, ukatsti jan ukham lurañasataki” sasa (1 Cor. 10:8, 11, 12).
9. ¿Kunjamsa yantʼanakajj Jehová Diosar confiyañataki ukat Jupar jukʼamp jakʼachasiñatak yanaptʼistu?
9 Phesqa, akapachan tukusiñapajj kunürus jutani uk jan yatiñajja, Jehová Diosar jukʼamp confiyañatakiw yantʼanakajj yanaptʼistu (Salmo 119:71 liytʼasiñapawa). Cheqpachansa, aka “qhepa urunakanjja jan wali tiemponakaw jutani” (2 Tim. 3:1-5). Supayan apnaqat akapachanjja, jila parte jaqenakajj uñisipjjestuwa, ukhamasti inas Diosan arunakaparjam sarnaqatasat arknaqapjjchistani (Juan 15:19; 16:2). Ukampis altʼat chuymanïñäni ukat Diosan yanaptʼapa thaqhapuniñäni ukhajja, yantʼanakajj kunjamtï ninajj qollqsa qorsa qʼomachkejja, ukhamwa iyawsäwis qʼomachistani. Ukat yantʼanakampi ayñachtʼañat sipansa, jukʼampwa Jehová Diosar jakʼachasiñäni (Sant. 1:2-4; 4:8).
10. ¿Awisajj kunatsa tiempojj jankʼakipun pasi?
10 Tiempojja, inas jankʼaki jan ukajj wali kʼachak paschispa. Ukampisa walja lurañanakanïktan ukat hora uñjjatañsa armastan ukhajj jankʼakipuniw tiempojj pasi. Kuna lurañtï Diosajj jaytawaykistu uk lurañar uchasiñäni ukhajja, inas kuna horasatejj jan ukajj kunürutejj jutkani ukajj jan amuykayaki jankʼak purinchini. Uka toqet parlkasajja ajllitanakajj yateqaskaywa sarnaqawayapjje. Jesusajj 1914 maran Reyit uttʼayatäkäna uka qhepatjja, kunas pasäna uk amuytʼañäni. Jupanakat yaqhepajj wakichtʼatäpjjänwa, yaqhepasti janiraki.
AJLLITANAKAJJ WAKICHTʼATÄPJJATAPWA UÑACHTʼAYAPJJÄNA
11. Khä 1914 mara pasatatjja, ¿kunatsa yaqhep ajllitanakajj Jesusajj qheptʼankaspas ukham amuyapjjäna?
11 Jesusan uñachtʼäwinakapat amuytʼaskakiñäni. Qollq katoqeri kimsa jaqenakas ukat tunka virgenanakas Casarasir Waynana jan ukajj Utanin puriniñap yatipjjaspäna ukhajja, janiw wakichtʼat ukat wali amuyumpi suyapjjañapajj wakiskaspänti. Ukampis jan yatipjjatapatjja wakichtʼataw suyapjjañapäna. 1914 marat walja maranak nayraw ajllitanakajj uka maran wali wakiskirïtap yatipjjäna, ukampis kunas pasani uk janiw sum amuyapkänti. Kunapachatï uka marajj purinkäna ukat kuntï pasañap suyapkäna ukanak jan phoqhasitapatjja, Jesusajj qheptʼankaspasa ukhamwa yaqhepajj amuyapjjäna. Ukat mä jilatajj akham sasaw qhepat säna: “Yaqhepajja, [1914 maran] octubre phajjsit nayrïr semananwa alajjpachar sarjjañ suyapjjayäta” sasa.
12. ¿Kunjamsa jila parte ajllitanakajj Utaniru taqe chuyma serviskakiñsa ukat amuytʼasirïpjjatapsa uñachtʼayapjjäna?
12 Akapachan tukusiñap suyapkäna ukarjam jan phoqhasitapatjja, kunja aynachtʼatas jikjjatasipjjpachäna uk amuysnawa. Ukat Nayrïri Jachʼa Chʼajjwäwi qalltatapatjja arknaqataw uñjasipjjäna. Ukhaman jikjjatasisajja, ajllitanakajj iktʼapkaspas ukhamänwa, janiw Diosan arunakap nayrjam yatiyjjapjjänti. Ukampisa 1919 maranwa sartjjapjjäna. Jesusajj uka maraw Diosan templop uñjir jutäna, mä arunjja, kunjamsa Diosar yupaychasiski uk uñjir jutäna. Yaqhepajj janiw Reyimpi askit uñjatäpkänti, ukatwa jupatak ‘negocio luraña’, mä arunjja, reyir yanaptʼaskakiñ aptʼasipjjäna (Mat. 25:16). Jan amuytʼasir virgenanakjamawa Diosar yupaychañ toqet jan wakichtʼat suyapkänti. Ukat jayra esclavor uñtataw Reino laykojj jan chʼamachasipkänti. Ukampis jila parte ajllitanakatjja, jachʼa chʼajjwäwi tiempon jan walinakan jikjjataskasasa, Utaniru taqe chuyma serviskakiña ukat jupat jan jitheqtañ munapjjatapwa uñachtʼayapjjäna.
13. Khä 1914 mara qhepatjja, ¿kunjam chuymanïpjjatapsa ajllitanakajj uñachtʼayapjjäna, ukat jichhürunakan kunjamäpjjarakisa?
13 Khä 1914 mara qhepatjja, Yatiyañataki revistanjja akham sasaw qhanañchasïna: “Jilat kullakanaka, Diosaru taqe chuyma yupaychktan ukanakarojja, Diosan amtanakapajj janiw chuym pʼakintkistuti. Janiw munañanakasak luraña munkayätanti; ukat octubre 1914 maran pasañap suykayätan ukajj pantjatätap amuyasajja, Tatitojj amuyusarjam amtanakap jan mayjtʼayatapat wal kusistanjja. Janirakiw amtasarjam lurañapsa munkayätanti. Jan ukasti, kunas amtanakapajja ukat kunsa lurani ukakwa amuyañ muntanjja” sasa. Jichhürunakanjja, ajllitanakajj ukham altʼat chuymanïpjjatapa ukat taqe chuyma serviñ munapjjatapwa uñachtʼayapjjaraki. Jupanakajj janiw Diosan amuytʼayatäpjjtwa sapkiti. Ukat kuna lurañtï Jesusajj aka Oraqen jaytawaykäna ukanak sum phoqañwa taqe chuym amtapjje. Ukat khitinakatï aka Oraqen wiñay jakañ suytʼäwinïpki, mä arunjja, ‘yaqha uwijanakjama’ uñtʼatäpki uka “walja jaqenaka[jja]” jupanakatwa yateqasipjjaraki (Apo. 7:9; Juan 10:16).
WAKICHTʼATÄTAS UÑACHTʼAYAPJJAÑÄNI
14. Amuyasir Cheqapa Uywatajj apayankistu uka yatichäwinakampi chʼamañchtʼasiñajja, ¿kunatsa wali askejja?
14 Jehová Diosajj Amuyasiri Cheqapa Uywataruw arunakapat markapar yatichañapatak uttʼayawayi. Ajllitanakajja uka yatichäwinakar istʼasaw sarnaqapjje ukat walja jaqenakjam uñtʼatäpki ukanakajj ukhamarakiw uka yatichäwinak wali amuyumpi istʼapjje. Ukhamatwa jupanakajj Diosan Arupampi ukat ajayupampi chʼamañchtʼatäpjje, mä arunjja, aceitepajj phoqtʼatäskiwa (Salmo 119:130; Juan 16:13 liytʼasiñapawa). Ukhamatwa Criston kuttʼaniñapatakejj suma wakichtʼatäpjje, sinti yantʼatas uñjasipkchejja taqe chuymaw Diosar servisipkaki. Amuytʼañäni, Hitler tiempon campos de concentración ukan katuntatäpkäna uk jilat kullakanakajja, mä Biblianikïpjjänwa, ukatwa Jehová Diosarojj Bibliat apstʼat qellqatanak apayaniñapatak mayisipjjäna. Ukat mä qhawqha tiempotjja, mä jilataruw ukar jistʼantañatak apapjjäna, jupasti lawat lurat kayupar imantasaw jichhak mistkäna uka revistanak apatayna. Ukanjja, ajllit Ernst Wauer jilataw jikjjatasïna, jupasti qhepat akham sänwa: “Jehová Diosaw uka revistanakan chʼamañchtʼkiri yatichäwinakap pʼeqer yatsuñ yanaptʼawayapjjetu”. Ukat akham sarakïnwa: “Jichhürunakanjja, Bibliat apstʼat qellqatanakajj waljaw utjistu, ukampis ¿askirjamati ukanak uñjasktanjja? Khitinakatï Jehová Diosaru taqe chuyma confiyapki, jan jitheqtas Jupar servipki ukat yatichäwinakapampi chʼamachtʼasipki ukanakatakejj Diosajj walja bendicionanakaniwa” sasa.
15, 16. ¿Cristiano mä chacha warmejj taqe chuyma yatiyir sarapjjatapat kuna bendicionsa katoqapjjäna, ukat ukham experiencianakat kunsa jiwasajj yateqsna?
15 Yaqha uwijanakjam uñtʼatäpki ukanakajja, Diosan arunakap yatiyasaw Criston jilanakapar yanaptʼasipki (Mat. 25:40). Jupanakajj janiw ñanqha ukat jayra esclavjamäpkiti, jan ukasti Diosan Reinop nayrar uchañatakejj kunatï wakiski uk lurañatakiw wal chʼamachasipjje. Jon ukat Masako chacha warmit amuytʼañäni, jupanakasti Kenia markan chino aru parlirinakar Diosan Arup yatiyir sarañatakiw mä invitación katoqapjjäna. Qalltanjja pächasipjjänwa, ukampis Diosar maytʼasisin amuykiptʼasisajj uka markar sarañwa amtapjjäna.
16 Ukham chʼamachasipjjatapatjja walja bendicionanakwa katoqapjjäna. Ukat jupanakajj akham sapjjewa: “Akan yatiyañajj wali sumapuniwa” sasa. Paqallqoniruw Bibliat yatichañ qalltapjjäna ukat walja experiencianïpjjarakiwa. Ukat kunjamsa jikjjatasipjje uk akham sasaw qhanañchapjje: “Akankapjjatajat sapürupuniw Jehová Diosar yuspärapjjta” sasa. Cheqas walja jilat kullakanakaw Jehová Diosarojj walja maranak taqe chuyma yupaychasipki, jupanakasti akapachan tukusiñap urutjja janiw llakisipkiti. Galaad escuelat misturi walja misioneronakata ukat khitinakatï yatiyirinak munaski uka markanakar sarapki ukanakat amuytʼañäni. Ukham serviñajj kunjamasa uk amuytʼañatakejja, Yatiyañataki julio 15, 2012 revistanwa “Jupanakajj taqe chuymaw sarapjjäna: Ecuador markaru” siski uka yatichäwi liytʼäta. Uka jilat kullakanakajj kamsapjjesa uk liytʼkasajja, kunjamsa jumajj Jehová Diosar jachʼañchañataki ukat kusisit jikjjatasiñatakis jukʼampi yatiyasma uk amuytʼäta.
WAKICHTʼATÄPJJAÑÄNI
17. Akapachan tukusiñapajj kuna horasa ukat kunürus jutani uk jan yatiñajja, ¿kunjamsa yanaptʼistu?
17 Kunjamtï yateqawayktanjja, akapachan tukusiñapajj kuna horasa ukat kunürus jutani uk jan yatiñajj wal yanaptʼistu. Ukat llakisiñat sipansa, Jehová Diosan munañap lurañatakiw chʼamachastanjja ukat jukʼampirakiw Jehová Dios Awkisarojj jakʼachastanjja. “Arado kattʼatäkasin” jan kunampi tiempo apaqayasisajj jukʼampi kusisitaw Diosar yupaychtanjja (Luc. 9:62).
18. ¿Kunatsa Diosar taqe chuyma yupaychaskakiñ muntanjja?
18 Diosan juicio urupajja wali jakʼankapuniwa, ukatwa Jehová Diosarojj taqe chuyma yupaychañ muntanjja, janipuniw Juparusa ni Jesucristorus chuym ustʼayañ munktanti. Jupanakaw aka qhepa urunakan suma lurañanak confiyawäpjjestu. ¡Ukham confiyapjjatapat wal yuspärtanjja! (1 Timoteo 1:12 liytʼasiñapawa.)
19. ¿Kunjamsa wakichtʼatätas uñachtʼaytanjja?
19 Diosaw arunakap jaqenakar yatiyañataki ukat arkirinakap tukuyañasatak jaytawayistu, ukhamasti alajjpachar saraña jan ukajj Paraison wiñay jakañ suytʼäwinïkstansa, uka mayitapampi phoqañatakejj taqe chuymaw chʼamachasiñasa. Akapachan tukusiñapajj kuna horasa ukat kunürus jutani uk janiw yatktanti, ukampis ¿yatiñajj wakisipuniti? Janiwa. Ukhamasti wakichtʼat suyaskakiñasawa (Mat. 24:36, 44). Jiwasatï Jehová Diosar taqe chuyma confiyaskakiñäni ukat Reinop nayraqat thaqhaskakiñäni ukhajja, Jupajj janipuniw jaytanukkistaniti (Rom. 10:11).
[Qhanañchäwi]
[Jiskt’anaka]
[26 janan fotopa]
Jan waltʼäwinakan jikjjataskasas Diosan yatichäwinakap thaqhapuniñäni
[27 janan fotopa]
Kuntï cristianjamajj lurañasäki ukar chuym churktan ukhajj jankʼakiw tiempojj pasi
