‘An siman cɛn’n nin dɔ’n’

“I ti’n, an tran minndɛ, afin an si-man cɛn’n nin dɔ’n.”​—MAT. 25:13.

?AMÚN TƐ́ SU SƐ?

?Kɛ e siman cɛn annzɛ dɔ nga mɛn’n i awieliɛ’n jú’n, ye nga i sɔ’n yo e’n be nun wie mun yɛle benin?

?Wafa sɛ yɛ be nga be kpali be sieli be ngunmin’n be tran minndɛli ɔ?

?Wafa sɛ yɛ e kwla kle kɛ y’a buabua e wun y’a sie naan e su minndɛ Klist i balɛ’n niɔn?

1-3. (a) ?Sunnzun ase benin mun yɛ be kwla uka e naan y’a wun afɔtuɛ nga Zezi i ɲanndra nɲɔn be man’n i wlɛ ɔ? (b) ?Kosan benin mun yɛ ɔ ti cinnjin kɛ e tɛ be su ɔ?

 MAAN e se kɛ awa i sa nun sran dan kun seli amun kɛ amun fɛ i loto nun wɔ aɲia cinnjin kpa kun bo. Kɛ dɔ ng’ɔ nin i fata kɛ amun ko fɛ i wɔ’n ɔ́ wá mántan koko kpa’n, kpɛkun amun a wun i kɛ amun loto’n i nun sannzi’n w’a sɔnman. Ndɛndɛ, amun kɔ sannzi tolɛ. Kpɛkun o, bian’n w’a kpɛn amun sin wa. Ɔ niannian lika’n nun ɔ wunman amun. Kɛ m’ɔ kwlá minndɛman’n ti’n, ɔ srɛ sran uflɛ kɛ ɔ ko jrɛ i. Amún bá o, bian’n w’a wɔ. ?I sɔ’n yó amun sɛ?

² Siɛn’n, maan e se kɛ awa i sa nun sran sɔ’n yɛle amun bɔbɔ. Ka naan amun a tu ajalɛ’n, amun kpali sran yasua nsan mɔ be si junman di kpa’n, yɛ amun mannin be junman cinnjin kpa kun. Amun klekleli be junman’n i dilɛ wafa’n kpɛkun be nsan’n be kplinnin su kɛ bé dí. Kɛ i osu lali nun kan mɔ amun sali amun sin be bali’n, amún tí ɔ, be nun nɲɔn cɛ yɛ be dili junman’n niɔn. Kun nga w’a dimɛn i junman liɛ’n, ɔ su kankan ndɛ wie mun kplí i ti. I kpa’n, w’a boman junman’n i dilɛ bo bɔbɔ. ?I sɔ’n yó amun sɛ?

³ Sunnzun ase nga e fali be lɛ’n, be nin Zezi i ɲanndra’m be nun nɲɔn be fa be wun. Ɲanndra sɔ mun yɛle talua blu mun yɛ junman difuɛ nsan mun be su ɲanndra’n. Ɲanndra nɲɔn sɔ’m be ti mɛn’n i awieliɛ’n i su ɲanndra. Be kle like nga ti yɛ Klistfuɛ nga be kpali be sieli be ngunmin’n be nun wie’m bé yó nanwlɛfuɛ nin ngwlɛlɛfuɛ mɔ wie’m be kusu be su yoman i sɔfuɛ’n. * (Mat. 25:1-30) Sa nga ti yɛ Zezi buli ɲanndra sɔ mun’n, ɔ tuli i ɲin seli kɛ: “An tran minndɛ, afin an si-man cɛn’n nin dɔ’n.” Zezi su se i sɔnnzɔnfuɛ’m be kɛ be su siman cɛn trele nin dɔ trele nga i su yɛ ɔ́ wá núnnún Satan i mɛn’n. (Mat. 25:13) E kusu ɔ fata kɛ e “tran minndɛ.” ?Ngue ti yɛ ɔ ti kpa man e kɛ e tran minndɛ kɛ nga Zezi fa kannin’n sa ɔ?  ?Wan mun yɛ be buabuali be wun sieli ɔ? ?Yɛ ngue yɛ ɔ fata kɛ e yo i dɔ nga su naan y’a kwla tran y’a minndɛ titi ɔ?

SA NGA TI YƐ Ɔ TI KPA KƐ E TRAN MINNDƐ’N

4. ?Sɛ e waan é kwlá trán mínndɛ’n, ngue ti yɛ ɔ timan cinnjin kɛ e si blɛ nga mɛn’n wíe’n niɔn?

⁴ Wie liɛ’n, ɔ fata kɛ e si dɔ trele nga w’a ju’n. I wie yɛle kɛ sɛ e di junman susute wie nun’n, annzɛ dɔɔtrɔfuɛ kun w’a kle e dɔ kɛ e w’a wun i wun’n, annzɛ kusu ɔ fata kɛ e ko fa loto kun dɔ kun su’n, ɔ ti cinnjin kɛ e nian dɔ’n naan y’a kaman siɛn. Sanngɛ sɛ sin wie su di lika kun naan e su nuɛnnuɛn i’n, annzɛ sanvuɛsa wie w’a ɲan sran kun naan e su le i’n, sɛ e waan é nían dɔ’n i tikatika’n, e ɲin kwla kpa like nga e su yo’n su. I kpa bɔbɔ’n, i bo kwla gua tɛ. Blɛ kɛ ngalɛ sa’m be nun’n, junman’n yɛ ɔ ti cinnjin kɛ e fa e ɲin e sie su ɔ. Nán dɔ’n niɔn. I wafa kunngba’n, jasin fɛ’n bolɛ junman nga e di’n ɔ uka sran mun naan b’a si like nga Zoova yoli i kɛ ɔ́ fá dé be’n. Junman sɔ’n ti cinnjin kpa dɔ nga su afin mɛn i awieliɛ’n w’a wie ju. Sɛ e waan é kwlá trán mínndɛ naan é yó like nga Zoova kunndɛ kɛ é yó’n, ɔ timan cinnjin kɛ e si blɛ trele nga i nun yɛ mɛn’n i awieliɛ’n jú’n. I li bɔbɔ’n, kɛ e siman cɛn annzɛ dɔ nga mɛn’n i awieliɛ’n jú’n, sɛ be waan i sɔ liɛ’n w’a yoman e ye like kaka nun’n, yɛle like nnun.

5. ?Kɛ mɔ e siman blɛ trele nga mɛn’n i awieliɛ’n jú’n, wafa sɛ yɛ i sɔ’n uka e naan y’a yi like ng’ɔ o e awlɛn’n nun lɔ’n i nglo ɔ?

⁵ Kɛ mɔ e siman blɛ trele nga mɛn’n i awieliɛ’n jú’n, ye klikli nga i sɔ’n yo ye’n yɛle kɛ ɔ uka e naan y’a yi like trele ng’ɔ o e awlɛn’n nun lɔ’n i nglo. Zoova buli e sran dan. Yɛle kɛ ɔ mannin e atin kɛ sɛ e klo’n e nin i e nanti, annzɛ e fa e atin liɛ. Kannzɛ e kunndɛ kɛ kɛ mɛn’n wá wíe’n é fíte nun’n, sanngɛ klolɛ mɔ e klo Zoova’n i ti yɛ e su i ɔ. Nán anannganman nguan ɲanlɛ ngunmin ti ɔ. (An kanngan Jue Mun 37:4 nun.) Ɲanmiɛn i klun sa yolɛ’n man e aklunjuɛ. Kpɛkun e wun i wlɛ kɛ e bɔbɔ e kpa yolɛ ti yɛ ɔ kle e like ɔ. (Eza. 48:17) E bumɛn i kɛ i mmla’m be ti kɛ trɔ nɔnninnɔnnin wie sa.​—1 Zan 5:3.

6. ?Kɛ klolɛ mɔ e klo Ɲanmiɛn’n ti yɛ e su i’n, wafa sɛ yɛ i sɔ’n yo i ɔ? ?Ngue ti ɔ?

⁶ Mɛn’n i awieliɛ cɛn’n mɔ e simɛn i’n i su ye nga e ɲɛn i’n, i nɲɔn su’n yɛle kɛ i sɔ’n man e atin naan y’a yo naan Zoova i klun w’a jɔ. Kɛ klolɛ mɔ e klo Zoova’n i ti yɛ e su i’n, mɔ nán kɛ mɛn’n i awieliɛ’n mɔ w’a mantan koko’n annzɛ like nga i waan ɔ́ fá mán e’n i ti yɛ e su i’n, e yo naan w’a kle kɛ i kpɔfuɛ Satan ti gblɛfuɛ. (Zɔb 2:4, 5; an kanngan Nyanndra Mun 27:11 nun.) E si ɲrɛnnɛn nga Satan w’a fa yi i sran’m be su’n. I sɔ’n ti’n, aklunjuɛ su, e jran Zoova i sin kɛ i yɛ ɔ le atin sie like kwlaa ɔ, kpɛkun e kplinman su kɛ Satan sie e.

7. ?Ngue ti yɛ amun klo kɛ amún fá amun nguan’n sú Ɲanmiɛn naan amún fá úka amun wiengu ɔ?

⁷ Kɛ e siman mɛn’n i awieliɛ cɛn’n, ye’n i nsan su nga i sɔ’n yo e’n yɛle kɛ ɔ man e wunmiɛn naan y’a buman e bɔbɔ e wun akunndan sanngɛ e fa e nguan’n e su Ɲanmiɛn yɛ e fa uka e wiengu. Dɔ nga su’n, be nga be siman Ɲanmiɛn bɔbɔ’n be nun wie’m be lafi su kɛ mɛn’n su cɛman kun, naan sanvuɛsa wie wá fú sran’m be nun ɔ́ sáci mɛn’n. I ti’n srɛ kun be. Ɔ maan be se be wun kɛ “maan e di like e nɔn nzan, ainman é wú, wuun e liɛ a wie.” (1 Kor. 15:32) E liɛ’n, srɛ kunman e, yɛ e buman e ngunmin e wun akunndan. (Nya. 18:1) Sanngɛ e klɛn e wun yɛ e klun su e fa e blɛ’n, nin e wunmiɛn’n ɔ nin e sa nun ninnge mun e bo Ɲanmiɛn Sielɛ’n i jasin fɛ’n. (An kanngan Matie 16:24 nun.) Ɲanmiɛn i sulɛ’n yo e fɛ. Kɛ e uka sran mun mɔ be si i’n yɛ e di aklunjuɛ dan bɔbɔ’n niɔn.

8. ?Biblu’n nun sa benin yɛ ɔ kle kɛ ɔ fata kɛ e fa e wla’n kwlaa e gua Zoova nin i Ndɛ’n be su ɔ?

⁸ Kɛ e siman cɛn annzɛ dɔ nga mɛn’n i awieliɛ’n jú’n, ye’n i nnan su ng’ɔ yo e’n yɛle kɛ ɔ uka e naan y’a fa e wla’n kwlaa y’a gua Zoova su. Asa kusu’n, ɔ uka e naan y’a wla e wun ase y’a fɛ i Ndɛ’n su. Fɔ m’ɔ o e nun’n ti’n, i kan nn e su lafi e bɔbɔ e wun su. Pɔlu wlali Klistfuɛ’m be kwlaa be su nun kɛ: “Sran ng’ɔ bu kɛ w’a jran kpa’n, maan ɔ niɛn i wun kpa naan w’a tɔ-man.” Ɔ kannin Izraɛlifuɛ 23.000 mɔ be ɲin w’a yiman Zoova mɔ kɛ bé wá jú mɛn nga ɔ seli kɛ ɔ́ fá mán be’n i wun koko lɛ’n be wuli’n be ndɛ. Pɔlu seli kɛ: “Sa  sɔ’n bɔ be tɔli be su’n, [...] be klɛli be kɛ bé fá tú e bɔ y’a ju mɛn’n i bue nuan’n e fɔ.”​—1 Kor. 10:8, 11, 12.

9. ?Wafa sɛ yɛ sa nga be tɔ e su’n be kwla yo maan e lafi Ɲanmiɛn su kpa yɛ e nin i e afiɛn mantan kpa ɔ?

⁹ Like i nnun su nga ti yɛ kɛ e siman mɛn’n i awieliɛ cɛn’n ɔ ti kpa man e’n, yɛle kɛ i sɔ’n yo maan sa nga be tɔ e su’n, be uka e naan y’a yo kpa y’a tra laa’n. (An kanngan Jue Mun 119:71 nun.) Nanwlɛ, mɛn’n i blɛ kasiɛn nga nun’n, ‘lika’n w’a yo kekle.’ (2 Tim. 3:1-5) Satan i mɛn’n nunfuɛ’m be nun kaka be kpɔ e. Ɔ maan e Ɲanmiɛn sulafilɛ’n ti’n be kwla kle e ɲrɛnnɛn. (Zan 15:19; 16:2) Sanngɛ kɛ nga sin’n kwla yo maan ninnge kɛ sika ɔkwlɛ sa’n be nun fiɛn fite’n, sa kekle’m be kwla yo maan e Ɲanmiɛn sulafilɛ’n i ɲin fite kpa yɛ ɔ uka su. Kɛ sa’m be tɔ e su’n, sɛ e kan e wun ase naan e srɛ Zoova kɛ ɔ kle e atin’n, sa sɔ’m be su yoman naan y’a yaci i sulɛ. I kpa bɔbɔ’n wafa nga e nin i afiɛn fá mántan’n, e bɔbɔ ba’n e nin a bumɛn i kɛ ɔ́ kwlá yó sɔ le.​—Zak 1:2-4; 4:8.

10. ?Ngue yɛ maan ɔ kwla yo e ɲrun kɛ blɛ’n sin ndɛndɛ ɔ?

¹⁰ Wie liɛ’n, dɔ’n sinman ndɛndɛ e ɲrun. Wie liɛ kusu’n, ɔ sin ndɛndɛ. Sɛ e sa o junman wie su naan e nianman dɔ’n i tikatika’n, kɛ dɔ’n sín’n e wunman nun. I wafa kunngba’n, sɛ e sa o junman fɛfɛ nga Zoova mannin e’n i dilɛ’n su’n, mɛn’n i awieliɛ’n jú ndɛndɛ kpa e ɲrun. Be nga be kpali be sieli be ngunmin’n be sunman lika be kle e ajalɛ kpa afin be sa trannin Ɲanmiɛn i junman’n i dilɛ’n su titi. Afuɛ nga be flɛ i 1914 nun’n, kɛ be sieli Zezi famiɛn’n, sa ng’ɔ juli’n maan e fa e ɲin e sie su kan. Yɛ maan e nian wafa nga be nga be kpali be sieli be ngunmin’n be nun wie’m be buabuali be wun sieli mɔ wie’m be kusu b’a yoman sɔ’n.

BE NGA BE KPALI BE SIELI BE NGUNMIN’N BE KLE KƐ B’A BUABUA BE WUN B’A SIE

11. ?Kɛ afuɛ nga be flɛ i 1914 sinnin’n, ngue ti yɛ be nga be kpali be sieli be ngunmin’n be nun wie’m be buli i kɛ e Min’n su cɛ ɔ?

¹¹ Maan e kan talua blu mun nin junman difuɛ nsan’m be su ɲanndra nga Zezi buli’n i ndɛ ekun. Sɛ ɔ ti kɛ talua’m be sili blɛ nga bian’n bá’n naan kusu’n junman difuɛ’m be sili blɛ nga be min’n bá’n, nn b’a kleman be wun yalɛ b’a tran b’a minndɛman. Sanngɛ be siman blɛ’n, i ti’n ɔ nin i fatali kɛ be buabua be wun sie. Be nga be kpali be sieli be ngunmin’n be sili kɛ afuɛ nga be flɛ i 1914 ɔ́ yó i liɛ ngunmin, yɛ be ɲin trɛnnin i sin cɛli kpa. Sanngɛ sa trele’n ng’ɔ́ jú afuɛ sɔ’n nun’n b’a wunmɛn i wlɛ. Kɛ sa’m b’a yoman kɛ nga be fa sunnzunnin’n sa’n, be nun wie’m be buli i kɛ Zezi su cɛ ngboko. Aniaan kun seli kɛ: “E nun wie mun e lafili su kpa kɛ [afuɛ 1914] Ɔktɔblu anglo’n i le mɔcuɛ klikli’n nun’n, é kɔ́ ɲanmiɛn su.”

12. ?Wafa sɛ yɛ be nga be kpali be sieli be ngunmin’n be kleli kɛ be ti nanwlɛfuɛ nin ngwlɛlɛfuɛ ɔ?

¹² Be minndɛli mɛn’n i awieliɛ’n kɛ ngalɛ sa lele kpɛkun w’a juman. Wafa nga i sɔ’n kwla boli be wla’n, amun bu i akunndan kan be nian! Asa kusu’n, alɛ dan klikli’n nun’n be kleli be yalɛ. Be flɛ i kɛ jasin fɛ’n bolɛ junman’n jrannin mlɔnmlɔn. Ɔ yoli kɛ be nga be kpali be sieli be ngunmin’n be su lafi sa. Sanngɛ afuɛ nga be flɛ i 1919 nun’n, like kun tinngeli be! Zezi bali kɛ ɔ́ wá nían wafa nga be kwlaa nga be waan be ti Klistfuɛ’n be ti’n. I klun w’a jɔman be nga be kpali be sieli be ngunmin’n be nun wie’m be wun. I ti’n, i m’ɔ ti be Min’n ɔ leli junman ng’ɔ fa mannin be’n be sa nun. (Mat. 25:16) Afin b’a tranman b’a minndɛman. Be yoli kɛ talua sinnglinfuɛ nga b’a faman kannin nzue kpanngban’n sa. Yɛ kɛ junman difuɛ fuɛnfuɛ’n sa’n, b’a kloman kɛ bé klɛ́n be wun dí Ɲanmiɛn Sielɛ’n i junman’n. Sanngɛ be nga be kpali be sieli be ngunmin’n be dan lika b’a kpɔciman be Min’n i kaan sa. Yɛ afuɛ sɔ mun mɔ be yoli alɛ blɛ’n be nun bɔbɔ’n, be kloli kpa kɛ bé dí be Min’n i junman’n.

13. ?Kɛ afuɛ nga be flɛ i 1914 sinnin cɛ’n, ajalɛ benin yɛ be nga be kpali be sieli be ngunmin’n be fali ɔ? ?Yɛ ajalɛ benin yɛ be fɛ i andɛ ɔ?

¹³ Kɛ afuɛ nga be flɛ i 1914 sinnin’n, Sasafuɛ Tranwlɛ’n kannin ndɛ cinnjin nga: “Aniaan mun, be nga akunndan nga be bu i Ɲanmiɛn su’n ɔ ti su’n, ajalɛ ng’ɔ fa be’n be nun wie fi bubuman be sa sin. Y’a kloman kɛ Ɲanmiɛn yo like nga e bɔbɔ  e klo’n. I ti’n, kɛ e wunnin kɛ like nga e ɲin o i sin afuɛ nga be flɛ i 1914 Ɔktɔblu anglo’n nun’n ɔ timan su’n, mɔ e wunnin kɛ e Min’n w’a kaciman like nga i waan ɔ́ yó’n naan ɔ yo e liɛ’n su’n, e dili aklunjuɛ. Y’a kloman kɛ e bɔbɔ e klun sa yɛ ɔ yo ɔ.” Like nga be nga be kpali be sieli be ngunmin’n be kunndɛli kɛ bé wún i wlɛ’n, yɛle Ɲanmiɛn i klun sa’n. Andɛ’n, be nga be kpali be sieli be ngunmin’n be kan be wun ase sɔ wie. Yɛ be kunndɛ kɛ bé yó Ɲanmiɛn i klun sa’n i sɔ wie. Be seman be wun kɛ Ɲanmiɛn kan ndɛ trele kle be. Junman nga Zezi mannin be asiɛ’n su wa’n i dilɛ’n yɛ ɔ ti be cinnjin ɔn. Yɛ kɛ é sé yɛ’n, Klistfuɛ nga be wla o su kɛ bé trán anannganman nguan nun asiɛ’n su wa’n mɔ be ti ‘sran kpanngban kpa’n’ mɔ be o “bua’m be wie” mun be nun’n, be fa be ajalɛ’n su.​—Ngl. 7:9; Zan 10:16.

BUA’M BE WIE MUN BE BUABUA BE WUN SIE

14. ?Ngue ti yɛ ɔ ti kpa man e kɛ e nanti like nga sran kpa nanwlɛfuɛ m’ɔ si ngwlɛlɛ’n ɔ kle’n i su ɔ?

¹⁴ Ɲanmiɛn fali be nga be kpali be sieli be ngunmin’n be kɛ be fa Ɲanmiɛn ndɛ’n be ta i sran mun naan be kle be wafa nga be kwla ɲan i Ndɛ’n nin i wawɛ’n be su ye’n. (Zan 16:13) Be nga be kpali be sieli be ngunmin’n nin be nga be flɛ be sran kpanngban kpa mun’n be kle kɛ b’a buabua be wun b’a sie. Yɛle kɛ be nanti like nga Zoova sin sran kpa nanwlɛfuɛ m’ɔ si ngwlɛlɛ’n i lika kle be’n su. Ɔ ti kɛ nn be su fa kannin nzue kaka bé gúa be kannin’m be nun sa. (An kanngan Jue Mun 119:130 nun.) I ti’n kɛ mɛn’n i nunnunlɛ blɛ’n nun’n e Min’n wá bá’n, nn b’a buabua be wun b’a sie. Asa kusu’n, blɛ kekle kpa nun bɔbɔ’n be le wunmiɛn be jran kekle. I wie yɛle kɛ Itilɛli blɛ su’n, be wlali aniaan wie’m be bisua. Bisua kun nun’n Biblu kunngba cɛ yɛ ɔ o aniaan’m be sa nun ɔn. Ɔ maan be srɛli Ɲanmiɛn kɛ ɔ man be fluwa wie mun ekun mɔ bé úka be naan be nin i be afiɛn w’a mantan titi’n. I osu w’a cɛman, be ti o, aniaan bian kun mɔ blɛ li yɛ b’a wlɛ i bisua’n, ɔ́ bá’n ɔ nin Sasafuɛ Tranwlɛ’n uflɛuflɛ wie’m be bali. Ɔ fa be fiafiali i ja’m be nun kun m’ɔ ti waka nun’n i nun. Aniaan nga be fin sa kekle sɔ’n nun be fiteli’n, be nun kun suan Ernst Wauer. Ɔ o be nga be kpali be sieli be ngunmin’n be nun wie. Ɔ seli kɛ Zoova ukali aniaan mun klanman. Yɛle kɛ ɔ yoli maan Sasafuɛ Tranwlɛ’n sɔ’m be nun ndɛ mɔ be wla fanngan’n be kali be klun. I sin ɔ seli kɛ: “Siɛn’n, Ɲanmiɛn ndɛ nga e kwla fa ta e wun’n be ɲanlɛ ti pɔpɔ. ?Sanngɛ e fa be e yo e wun sa ye titi? N lafi su kɛ Zoova w’a siesie ninnge kpakpa kpanngban w’a sie be nga be fa be wla’n guɛ i su’n, mɔ be kpɔcimɛn i’n, mɔ be fa Ɲanmiɛn ndɛ’n be ta be wun’n.”

15, 16. ?Kɛ aniaan kun nin i yi be fali be wun wlali jasin fɛ’n bolɛ junman’n nun kpa’n, suyralɛ benin yɛ be ɲɛnnin i ɔ? ?Ngue yɛ ndɛ sɔ’m be kle amun ɔn?

 ¹⁵ Bua’m be wie mun be bo jasin fɛ’n titi. Be yo i sɔ fa uka Klist i niaan mun. (Mat. 25:40) Be timan kɛ Zezi i ɲanndra’n nun junman difuɛ klunwifuɛ nin fuɛnfuɛ’n sa. Be klunklo su be kpɔci ninnge wie mun yɛ be mian be ɲin naan b’a fa Ɲanmiɛn Sielɛ’n b’a sie i like kwlaa ɲrun. I wie yɛle aniaan Jon nin i yi Masako be liɛ’n. Be yiali be kɛ be ɔ Kenia be ko uka aniaan nga be bo jasin Sinua aniɛn’n nun’n. I klikli nun’n, lɔ kɔlɛ’n yoli tankantankan be sa nun. Sanngɛ kɛ be wa trannin buli akunndan mɔ be srɛli Ɲanmiɛn’n, be ɔli.

¹⁶ Zoova yrali be ɲin mɔ be miannin’n su dan. Be seli kɛ: “Wa’n jasin fɛ’n bolɛ junman’n ti abonuan.” Be boli sran nso be Biblu’n nun like klelɛ bo. Kpɛkun sa uflɛ wie mun be mannin be aklunjuɛ ekun. Be seli ekun kɛ: “Atin mɔ Zoova mannin e’n mɔ e juli wa’n ti’n, e lɛ i ase titi.” Ajalɛ nga aniaan bian nin aniaan bla kaka uflɛ wie mun ekun be fali’n, be yi i nglo kɛ aniaan sɔ’m be klo kɛ be akunndan’n kwlaa tran Ɲanmiɛn junman’n i dilɛ’n su. Nán cɛn nga mɛn’n i awieliɛ’n jú’n yɛ ɔ ti be cinnjin ɔn. Maan amun bu be nun akpiakpi nga be di ngaliɛ dilɛ junman’n be akunndan be nian. Amun kwla si be junman ngunmin kun sɔ’n i su like kan ekun Sasafuɛ Tranwlɛ’n afuɛ 2007, Novamblu 1 i nun ndɛ’n ng’ɔ suan “Maan Ɲanmiɛn klun sa yolɛ’n yɛ e ɲin tran su dɔ nga su ɔ” i nun. Kɛ amún kánngan ngaliɛ dilɛ junman’n i su ndɛ fɛfɛ sɔ’n, amun bu wafa nga amun kwla uka amun junman’n su fa manman Ɲanmiɛn’n naan amun a di aklunjuɛ kpa ekun’n, i akunndan.

MAAN E KUSU E BUABUA E WUN SIE

17. ?Kɛ e siman cɛn annzɛ dɔ trele’n nga mɛn’n i awieliɛ’n jú’n, ye benin yɛ i sɔ’n yo e ɔ?

¹⁷ Nanwlɛ, kɛ e siman cɛn annzɛ dɔ trele’n nga mɛn’n i awieliɛ’n jú’n, i sɔ’n yo e ye dan. I sɔ’n sannganman e akunndan annzɛ ɔ bubuman e sa sin. Sanngɛ ɔ yo maan e klɛn e wun e yo e Si Zoova m’ɔ klo e kpa’n i klun sa’n, yɛ e nin i e afiɛn mantan kpa cɛn kwlaa. Kɛ mɔ junman nga e Min’n mannin e’n yɛ ɔ ti e cinnjin’n mɔ e faman e akunndan’n e sieman like uflɛ su’n ti’n, e di aklunjuɛ Zoova i sulɛ’n nun.​—Lik 9:62.

18. ?Ngue ti yɛ e kunndɛ kɛ Ɲanmiɛn i junman nga e di’n, é dí i titi ɔ?

¹⁸ Ɲanmiɛn i jɔlɛ dilɛ cɛn’n w’a wie ju. E nun wie fi e kunndɛman kɛ é gúa Zoova annzɛ Zezi ɲin ase. Be mannin e junman ɲɛnmɛn kpa kun kɛ e di i mɛn’n i blɛ kasiɛn nga nun. Nanwlɛ, e bu be wla mɔ be fa gua e su’n i like dan!​—An kanngan 1 Timote 1:12 nun.

19. ?Wafa sɛ yɛ e kwla buabua e wun e sie ɔ?

¹⁹ Ɲanmiɛn mannin e junman kɛ e bo jasin fɛ’n yɛ e yo naan sran’m be kaci Zezi i sɔnnzɔnfuɛ. Sɛ e o be nga bé kɔ́ ɲanmiɛn su’n be nun wie o, annzɛ e o be nga bé trán mɛn klanman’n nun asiɛ’n su wa’n be nun o, maan e fua kɛ é dí i sɔ’n junman’n titi. Lele nin andɛ e siman cɛn annzɛ dɔ trele nga Zoova i cɛn’n jú’n. Ɔ timan cinnjin bɔbɔ kɛ e si i. Sanngɛ e kwla buabua e wun e sie. I sɔ kusu yɛ é yó i titi ɔ. (Mat. 24:36, 44) E lafi su kpa kɛ sɛ e fa e wla’n kwlaa e gua Zoova su titi’n naan e fɛ i Sielɛ’n e sie like kwlaa ɲrun titi’n, e ɲin su guaman ase le.​—Rɔm. 10:11.

[Ja ngua lɛ ndɛ’n]

[Kosan mun]

[Foto, bue 26]

Blɛ kekle nun bɔbɔ’n, maan amun kpɛ Ɲanmiɛn ndɛ’n i sin atin.

[Foto, bue 27]

Kɛ e sa o Ɲanmiɛn i junman’n i dilɛ’n su’n, blɛ’n sin ndɛndɛ e ɲrun.