1-3. (a) Anong mga situwasyon an nag-iilustrar sa punto kan duwang parabola ni Jesus? (b) Anong mga hapot an sisimbagon niato?

IMAHINARA na pinakiolayan ka nin sarong prominenteng opisyal na ipagmaneho sia para sa sarong importanteng lakaw. Minsan siring, mga pirang minuto bago mo sia hapiton para sa miting, narisa mo na dai na magkakaigo an gasolina para sa biaheng iyan. Kaipuhan mong maghidaling magpakarga. Paghale mo, nag-abot an opisyal. Nangalagkalag sia pero mayo ka. Dai na sia makahalat, kaya iba na sana an pinakiolayan niang magmaneho. Dai nahaloy, nagbalik ka asin naaraman mo na naghale na an opisyal na dai ka kaiba. Ano an mamamatean mo?

² Ngonyan, imahinarang ika an opisyal asin nagpili ka nin tolong may kakayahan na lalaki tanganing asikasohon an sarong importanteng gibohon. Ipinaliwanag mo an gigibohon ninda, asin nag-oyon an tolo. Pero, dai nahaloy nagbalik ka, asin naaraman mo na duwa sana sa sainda an nakagibo kan asignasyon ninda. Apuera kaiyan, an dai nakagibo may mga idinadahilan. An totoo, dai man lamang sia naghingoa. Ano an mamamatean mo?

³ Sa parabola ni Jesus dapit sa mga daraga asin mga talento, ginamit nia an magkaagid na situwasyon tanganing iilustrar kun taano ta sa panahon kan katapusan an nagkapirang linahidan na Kristiano mapapatunayan na maimbod asin mapagmansay, pero an iba dai. * (Mat. 25:1-30) Idinoon nia an punto sa pagsabing: ‘Magpuruka kamo, huli ta dai nindo naiisihan an aldaw ni an oras’—an boot sabihon, kun noarin nanggad isasagibo ni Jesus an paghokom nin Dios sa kinaban ni Satanas. (Mat. 25:13) Ikakaaplikar ta ngonyan an konsehong iyan. Paano kita makikinabang sa pagigin mapagbantay, siring kan inenkaminar ni Jesus na gibohon ta? Sairisay an nagin andam para sa kaligtasan? Asin ano an  dapat tang gibohon ngonyan tanganing magdanay na mapagbantay?

4. Taano ta an ‘pagigin puka’ dai nangangahulogan na kaipuhan niatong maaraman kun noarin eksaktong maabot an katapusan?

⁴ Sa nagkapirang aktibidad, arog nin pagtrabaho sa pabrika, pagpa-checkup sa doktor, o pagsakay sa pampublikong transportasyon, kaipuhan na magsunod kita sa iskedyul. Pero, sa ibang mga aktibidad, arog nin pagsigbo sa kalayo kun may kasulo o pagsalbar pagkatapos nin kalamidad, an pagparahiling sa oras puedeng makadisturbo, o magin peligro pa ngani. Sa siring na mga kamugtakan, mas mahalaga nanggad na magpokus sa gibohon kisa magsunod sa iskedyul. Mantang parani nang parani an katapusan kan sistemang ini, an pagtotokdo sa mga tawo manongod sa mga probisyon ni Jehova para sa kaligtasan orog na mahalaga kisa kasuarin man. An pagpuka bilang mga Kristiano dai nangangahulogan na kaipuhan niatong maaraman kun noarin eksaktong maabot an katapusan. Sa katunayan, igwa kita nin kisiera limang pakinabang sa dai pakaaram kan eksaktong aldaw o oras.

5. Paanong an dai pakaaram kan aldaw o oras nakakatabang na ikapahiling kun ano an nasa puso ta?

⁵ Enot, huling dai niato aram kun noarin maabot an katapusan, ikakapahiling niato kun ano talaga an nasa puso ta. Sa katunayan, an dai pakaaram kaiyan nagtataong dignidad sa sato huling nagagamit niato an satong libertad na magdesisyon kun baga magigin maimbod kita ki Jehova. Minsan ngani inaantisipar tang makaligtas sa katapusan kan sistemang ini, naglilingkod kita ki Jehova huli sa pagkamoot sa saiya, bako sanang tanganing magkamit nin buhay. (Basahon an Salmo 37:4.) Naoogma kita sa paggibo kan saiyang kabotan, asin aram ta na tinotokdoan kita nin Dios tanganing makinabang kita. (Isa. 48:17) Dai niato minamansay na pagabat an mga togon nia.—1 Juan 5:3.

6. Ano an namamatean nin Dios kun naglilingkod kita sa saiya huli sa pagkamoot, asin taano?

⁶ An ikaduwang pakinabang sa dai pakaaram kan aldaw o oras iyo na igwa kita nin oportunidad na paogmahon an puso ni Jehova. Kun naglilingkod kita sa saiya huli sa pagkamoot—bakong huli sa petsa o premyo—nakakakontribwir kita sa simbag ni Jehova sa mayong basehan na pagduhagi kan kaiwal niang si Satanas. (Job 2:4, 5; basahon an Talinhaga 27:11.) Kun iisipon an gabos na kolog asin kamondoan na pinangyari kan Diablo, naoogma kitang manindogan para sa soberaniya ni Jehova asin isikwal an maraot na pamamahala ni Satanas.

7. Taano ta sa paghona mo marahay na mamuhay kita na may pagsasakripisyo?

⁷ Ikatolo, an paglilingkod niato na mayong iniisip na espesipikong petsa nakakadagka sa sato na mamuhay na may pagsasakripisyo. An nagkapira ngonyan na dai nakakamidbid sa Dios naniniwala man na an kinaban, siring kan aram ta, dai na maghahaloy. Huling may ikinakatakot na maabot na kalamidad, may kaisipan sindang, ‘Magkarakan asin mag-irinom kita, ta sa aga magagadan kita.’ (1 Cor. 15:32) Pero kita dai natatakot. Dai niato isinusuway an satong sadiri tanganing mapanigoan an satong makasadiring mga kamawotan. (Tal. 18:1, NW) Imbes, pinapaindahan ta an satong sadiri asin lubos na ginagamit an satong panahon, kosog, asin iba pang kapakipakinabang na mga bagay tanganing sabihon sa iba an maogmang bareta kan Kahadean nin Dios. (Mat. 16:24) Naoogma kita sa paglilingkod sa Dios, nangorogna sa pagtabang sa iba na mamidbid sia.

8. Anong halimbawa sa Biblia an nagpapahiling kun taano ta kaipuhan tang mas lubos na magsarig ki Jehova asin sa saiyang Tataramon?

⁸ An ikaapat na pakinabang ta sa dai pakaaram kan aldaw o oras iyo na tinatabangan kita kaiyan na lubos na magsarig ki Jehova asin magmaigot sa pag-aplikar kan saiyang Tataramon sa satong buhay. Huling makasalan kita, may tendensia kita na magsarig sa satong sadiri. Sinadol  ni Pablo an gabos na Kristiano: ‘An naghohona na sia nagtitindog mag-ingat na dai sia mapukan.’ Kan madali nang giyahan ni Josue an banwaan nin Dios pasiring sa Dagang Panuga, nawara kan 23,000 sa sainda an pag-oyon ni Jehova. Sinabi ni Pablo: ‘An mga bagay na ini isinurat sa pagpatanid sa sato, na sa sato an katapusan kan mga panahon nagdatong.’—1 Cor. 10:8, 11, 12.

9. Paano kita nadadalisay asin orog na napaparani sa Dios huli sa mga problema?

⁹ An ikalimang pakinabang ta sa dai pakaaram kun noarin maabot an katapusan iyo na nakakatabang iyan tanganing madalisay kita kan mga problema sa presente. (Basahon an Salmo 119:71.) Tunay nanggad na an huring mga aldaw kan sistemang ini ‘mga panahon na makahahandal.’ (2 Tim. 3:1-5) Dakol an naoongis sa sato sa kinaban ni Satanas, kaya puede kitang persegiron huli sa pagtubod ta. (Juan 15:19; 16:2) Kun magigin mapakumbaba kita asin hahagadon an paggiya nin Dios sa panahon kan mga pagbalong iyan, an pagtubod ta madadalisay na garo baga pinaagi sa kalayo. Dai kita minasuko. Imbes, mapaparani kita ki Jehova nin orog kisa sa maiimahinar niato.—Sant. 1:2-4; 4:8.

10. Ano an dahilan nin garo baga marikas na paglihis nin oras?

¹⁰ An paglihis nin oras puedeng garo marikas o maluway. Garo madalion sanang maglihis an oras kun sibot kita imbes na nagpaparahiling sa relo. Kaagid kaiyan, kun sibot kita sa nakakaogmang gibohon na itinao sa sato ni Jehova, an aldaw asin oras na iyan puedeng mag-abot na dai niato naririsa. May koneksion digdi, an kadaklan na linahidan nagin marahayon na halimbawa. Repasohon niato nin madali an nangyari pagkatukaw ni Jesus bilang Hade kan 1914 asin kun paano an nagkapira nagin andam mantang an iba dai.

11. Pagkatapos kan 1914, taano ta nagkongklusyon an nagkapira sa mga linahidan na naaatraso an Kagurangnan?

¹¹ Girumdomon an parabola ni Jesus dapit sa mga daraga asin mga talento. Kun aram kan mga daraga o mga oripon kun noarin maabot an nobyo o an kagurangnan, dai na kutana ninda kaipuhan na magin mapagbantay. Pero dai ninda aram, kaya kaipuhan nindang magdanay na andam. Minsan ngani mga dekada nang aram kan mga linahidan na an 1914 magigin mahalagang taon, dai ninda nasasabotan nin malinaw kaidto kun ano an mangyayari. Kan dai mangyari an mga inaasahan ninda, inisip nin nagkapira na naaatraso an Nobyo. Nagirumdoman nin sarong brother, “An nagkapira sa samo talagang naghona na mapalangit kami sa enot na semana kan Oktubre [1914].”

12. Paano pinatunayan kan mga linahidan na sinda maimbod asin mapagmansay?

¹² Isip-isipa na sana kun gurano kanakakadesganar na umasa sa pag-abot kan katapusan pero dai man iyan nangyari! Dugang pa, an mga tugang napaatubang sa pagpersegir may koneksion sa Giera Mundial I. An paghuhulit ninda haros nagpondo, na garo torog sinda. Pero kan 1919, nagkaigwa nin pangapodan na magmata! Nagdatong na si Jesus sa espirituwal na templo nin Dios, asin nag-abot na an panahon para sa pagsiyasat. Minsan siring, an nagkapira dai nakapasar sa pagsiyasat na iyan kaya nawara ninda an saindang pribilehio na padagos na magtrabaho para sa Hade. (Mat. 25:16) Garo man sana dai sinda nagmaigot na dagdagan an suplay ninda nin espirituwal na lana, siring kan mangmang na mga daraga. Asin arog kan hugakon na oripon, habo nindang magsakripisyo para sa Kahadean. Pero, an kadaklan sa mga linahidan nagpahiling nin marigon na kaimbodan asin makosog na pagmawot na paglingkodan an saindang Kagurangnan dawa sa masakit na mga taon nin giera.

13. Ano an nagin saboot kan grupong oripon pagkatapos kan 1914, asin ano an saboot ninda ngonyan?

¹³ Pagkatapos kan 1914, sinabi kan The Watchtower an makahulogan na mga tataramon na ini: “Mga tugang, an mga may tamang pagmansay sa Dios dai nadesganar sa arin man sa mga areglo  Nia. Dai ta minawot na mangyari an satong sadiring kagustohan; kaya kan maaraman ta na sala an inaasahan niato kan Oktubre, 1914, naoogma kita na dai binago kan Kagurangnan an Saiyang Plano tanganing panigoan kita. Dai niato minawot na gibohon Nia iyan. Minawot sana niato na mas masabotan ta an Saiyang mga plano asin katuyohan.” An mga linahidan kan Kagurangnan midbid sagkod ngonyan sa mapakumbabang saboot na ini asin debosyon. Sinda dai naghihingakong pinasabngan, pero determinado sindang otobon an gibohon kan Kagurangnan digdi sa daga. Asin ngonyan inaarog nin “sarong dakulang kadaklan” nin ‘ibang mga karnero,’ mga Kristiano na may daganon na paglaom, an saindang pagigin mapagbantay asin kaigotan.—Kap. 7:9; Juan 10:16.

14. Paano kita naiingatan kun dayupot kitang nakikiasosyar sa pinakapaagihan nin Dios sa pagtao nin espirituwal na pagkakan?

¹⁴ Arog kan linahidan na mga Kristiano, an mapagbantay na mga miembro kan dakulang kadaklan dayupot na nakikiasosyar sa ninombrahan nin Dios na pinakapaagihan sa pagtao nin espirituwal na pagkakan. Bilang resulta, garo man sana dinadagdagan ninda an saindang suplay nin espirituwal na lana hale sa Tataramon asin espiritu nin Dios. (Basahon an Salmo 119:130; Juan 16:13.) Huling napakosog, sinda andam man sa pagbabalik ni Cristo, na nagdadanay na aktibo dawa nag-aagi nin grabeng pagbalo. Halimbawa, sa sarong kampong bilanggoan nin Nazi, an mga tugang may saro sanang kopya nin Biblia kan enot. Kaya namibi sinda para sa dugang pang espirituwal na pagkakan. Dai nahaloy, naaraman ninda na sarong bagong bilanggo na brother an nakapagpalusot sa kampo nin pirang bagong isyu kan The Watchtower paagi sa paglaog kaiyan sa bitis nia na gibo sa kahoy. Kaiba sa mga nakaligtas an sarong brother na linahidan na si Ernst Wauer, na kan huri nagsabi: “Tinabangan kami ni Jehova sa pambihirang paagi na matuom an nakakapakosog na mga punto sa mga artikulo.” Dangan sia nagsabi: “Ngonyan, madalion nang makakua nin espirituwal na pagkakan, pero pirme daw niatong inaapresyar iyan? Segurado ako na abundang bebendisyonan ni Jehova an mga nagtitiwala sa saiya, nagdadanay na maimbod, asin nagkakakan sa saiyang lamesa.”

15, 16. Paano binendisyonan an sarong mag-agom huli sa kaigotan sa Kristianong ministeryo, asin ano an manonodan mo sa arog kaiyan na mga eksperyensia?

¹⁵ An ibang mga karnero nagdadanay man na sibot sa gibohon kan Kagurangnan paagi sa lubos na pagsuportar sa mga tugang ni Cristo. (Mat. 25:40) Bakong arog kan maraot asin hugakon  na oripon sa parabola ni Jesus, sinda andam na magsakripisyo asin maghingoa bilang pag-enot sa intereses kan Kahadean. Halimbawa, kan an mag-agom na si Jon asin Masako imbitaran na magtabang sa mga lugar sa Kenya na Intsik an lenguahe, nagduwaduwa sinda kan enot. Pero pagkatapos na mapagngayongayong ipamibi an saindang kamugtakan, nagdesisyon sinda na magbalyo.

¹⁶ Abundang binendisyonan an saindang mga paghihingoa. “Magayonon an ministeryo digdi,” an sabi ninda. Nakapagpoon sinda nin pitong pag-adal sa Biblia. Dakol pang maogmang eksperyensia an suminunod. Sinda nagkongklusyon, “Aroaldaw kaming nagpapasalamat ki Jehova na yaon kami digdi.” Siempre, dakol pang tugang an nagpahiling kan saindang determinasyon na lubos na magin sibot sa paglilingkod sa Dios noarin man mag-abot an katapusan. Isip-isipa an rinibong naggradwar sa Paadalan nin Gilead asin nagin misyonero. Taano ta dai magkua nin ideya dapit sa espesyal na paglilingkod na iyan paagi sa pagbasa kan artikulong “We Do the Best We Can!” na yaon sa The Watchtower na Oktubre 15, 2001? Mantang binabasa mo an kawiliwiling pagkasaysay manongod sa sarong aldaw sa pagmimisyonero, isip-isipa kun paano mo madadagdagan an paglilingkod mo para sa kaomawan nin Dios, asin bilang resulta, pati an kaogmahan mo.

17. Taano ta bendisyon an dai pakaaram kan aldaw o oras?

¹⁷ Malinaw nanggad, bendisyon sa sato an dai ta pakaaram kan eksaktong aldaw o oras kun noarin matatapos an sistemang ini. Imbes na madesganar, nagigin mas dayupot kita ki Jehova, an satong mamomoton na Ama, mantang sibot kita sa paggibo kan kabotan nia. Paagi sa danay na pagkapot sa arado, sabi ngani, asin paglikay sa mga disturbo, nagkakaigwa kita nin dakulang kagayagayahan sa paglilingkod sa Kagurangnan.—Luc. 9:62.

18. Taano ta dai niato gustong magluya an satong pagtubod?

¹⁸ Marikas na nagdadangadang an aldaw kan paghokom nin Dios. Mayo sa sato an gustong pamondoon si Jehova o si Jesus. Ipinagkatiwala ninda sa sato an mahalagang marhay na mga pribilehio nin paglilingkod sa huring mga aldaw na ini. Pinapahalagahan nanggad niato an pagtitiwala ninda sa sato!—Basahon an 1 Timoteo 1:12.

19. Paano kita magigin andam?

¹⁹ Baga man an satong paglaom magkamit nin buhay sa langit o sa Paraiso digdi sa daga, magin determinado kitang magdanay na maimbod sa sugo sa sato nin Dios na maghulit asin maggibo nin mga disipulo. Dai pa man giraray niato aram an eksaktong aldaw o oras kan pag-abot kan aldaw ni Jehova, asin kaipuhan daw talaga niatong maaraman? Makakaya ta asin magpapadagos kita na magin mapagbantay. (Mat. 24:36, 44) May kompiansa kita na sagkod na lubos kitang nagtitiwala ki Jehova asin ineenot an Kahadean nia, maootob an mga linalaoman niato.—Roma 10:11.