“Tamwaishiba Ubushiku Nangu ni Nshita”

“E ico mulelola, pantu tamwaishiba ubushiku nangu ni nshita.”—MAT. 25:13.

KUTI MWAYASUKA SHANI?

Busuma nshi bumo ubwaba mu kukanaishiba ubushiku ne nshita ilyo impela ikesa?

Bushe abasubwa batwalilila shani ukuba abalola?

Ni muli finshi umo twingalanga ukuti twali-ipekanya ku kubwela kwa kwa Kristu?

1-3. (a) Fya kumwenako nshi fibili ifingalenga twaumfwikisha icishinka ico Yesu alandilepo mu milumbe yakwe ibili? (b) Fipusho nshi ifyo tulingile ukwasuka?

ELENGANYENI ukuti shimucindikwa amweba ukuti mumutwale na motoka kumo ukuli umulimo uwacindama uo afwile ukubomba. Ilyo kwashala fye inshita inono iya kuyamusenda, e lyo mwaibukisha ukuti muli motoka yenu muli fye amafuta ayanono sana. Mwatontonkanya ukuti mulingile ukwangufyanya ukuyashitilamo. Ilyo fye mwaya mu kushita, shimucindikwa na o ashala afika lelo afilwa ukumulolela, e co aeba umbi ukuti amutwale. Cilya mwabwela mwasanga naya kale. Bushe kuti mwaumfwa shani?

² Nomba elenganyeni ukuti e imwe shimucindikwa, kabili namusala abaume batatu abafikapo ukubomba imilimo imo iyacindama. Mwabalondolwela ifya kubomba iyi imilimo, e lyo bonse batatu basumina. Nomba ilyo mwabwela, mwasanga ukuti babili fye e babombele imilimo mwacibapeela. Lelo ulya wine uushibombele, e watampa ukuipokololako pa co ashibombeele. Bushe kuti mwaumfwa shani?

³ Mu milumbe iyo Yesu aumine pali banacisungu na matalanti, alilangilile ico Abena Kristu bamo abasubwa aba mu nshiku sha kulekelesha bakabela aba cishinka kabili aba mano, e lyo ne co bambi bena bashakabele aba cishinka. * (Mat. 25:1-30) Pa kukomaila pa cishinka, atile: “E ico mulelola, pantu tamwaishiba ubushiku nangu ni nshita.” Muli aya mashiwi, Yesu alelanda pa nshita ilyo akonaula icalo ca kwa Satana. (Mat. 25:13) Na ifwe bene tulingile ukukonka uku ukufunda. Busuma nshi bwaba mu kutwalilila ukuba abalola nga fintu Yesu atwebele? Ni bani  balanga ukuti baliba abalola? Kabili kuti twacita shani pa kuti na ifwe tutwalilile ukuba abalola?

UBUSUMA BWABA MU KUBA ABALOLA

4. Bushe tulingile ukwishiba ilyo impela ikesa pa kuti ‘tube abalola’?

⁴ Ukukonka inshita kulafwaikwa pa kucita ifintu fimo pamo nga ukubomba mu fakitare, ukuya kuli dokota, nangu ukuya mu kunina motoka ya cintubwingi. Nomba ifintu fimo pamo nga, ukushimya umulilo nangu ukupususha abantu nga kwacitika ubusanso, fyena fifwaikwa ukubomba ilyo line fye pantu nga te ifyo akayofi kuti kakulilako. Ifya musango yu nga fyacitika kuti cawama ukubika amano ku kucitapo cimo ukucila ukukonka inshita. Ilyo icalo cilepalamina sana ku kupwa, umulimo ucindeme sana wa kwafwa abantu pa kuti bakapusuke. Ukuba abalola tacipilibula ukuti tulingile ukulatontonkanya fye pa nshita ilyo impela ikesa. Na kuba kwaba ifintu fisano ifilangilila ubusuma bwaba mu kukanaishiba ubushiku ne nshita ilyo impela ikesa.

5. Bushe ukukanaishiba ubushiku nelyo inshita kutwafwa shani ukwishiba ifyaba mu mutima wesu?

⁵ Ubusuma bwa kubalilapo ubwa kukanaishiba ubushiku nelyo inshita ilyo impela ikesa bwa kuti, cilalenga twaishiba ifyo umutima wesu waba. Na kuba ifi tushaishiba inshita caliwama, pantu cilalenga twaitemenwa ukuba aba cishinka kuli Yehova. Nangu ca kuti tulafwaisha ukwisapusuka impela ya cino calo, tatubombela Yehova pa mulandu wa kuti akatupeela bumi, lelo nico twalimutemwa. (Belengeni Amalumbo 37:4.) Tulatemwa ukucita ifyo Lesa afwaya, kabili twalishiba ukuti ifyo atusambilisha filalenga tuleikala bwino. (Esa. 48:17) Na kuba tatumona ukuti amafunde yakwe yalyafya ukukonka.—1 Yoh. 5:3.

6. Bushe Lesa omfwa shani nga tulemubombela pa mulandu wa kuti twalimutemwa, kabili mulandu nshi omfwila ifi?

⁶ Ubusuma bwalenga bubili ubwa kukanaishiba ubushiku nangu inshita bwa kuti tulakwata ishuko lya kusekesha Yehova. Nga tulebombela Yehova pa mulandu wa kuti twalimutemwa, te pa mulandu wa kwishiba ubushiku ilyo akaleta ubonaushi nelyo pa mulandu wa kuti akatupeela icilambu, tulalenga Yehova ashinina umulwani wakwe Satana uumusaalula apabula no mulandu. (Yobo 2:4, 5; belengeni Amapinda 27:11.) Nga twatontonkanya pa kucula no bulanda ifyo Satana aleta, cilalenga twafwaisha ukutungilila Yehova Mulopwe no kukaana Satana kateka wabipa.

7. Cinshi mwingalandila ukuti ukuipeelesha mu kubombela Lesa kusuma?

⁷ Ubusuma ubwalenga butatu ubwa kukanaishiba ilyo impela ikesa bwa kuti tulaipeelesha sana mu kubombela Lesa. Muno nshiku kwaliba bamo abashaishiba Lesa abasumina ukuti tuli ku mpela ya cino calo. Apo balatiina ifikacitika ku ntanshi batila: “Tulye no kunwa, pantu mailo tukafwa.” (1 Kor. 15:32) Lelo ifwe tatutiina, tatufwaya ukuitalusha ku banensu pa kutila tulecita ifyo imitima yesu ifwaya. (Amapi. 18:1) Lelo tulaipeelesha no kubomfya inshita yesu na maka e lyo ne fyuma ku kushimikila imbila nsuma ya Bufumu bwa kwa Lesa. (Belengeni Mateo 16:24.) Tulatemwa nga nshi ukubombela Lesa, maka maka ilyo tuleafwa bambi ukumwishiba.

8. Ca kumwenako nshi ica mu Baibolo icilanga ukuti tufwile ukushintilila sana pali Yehova na pa Cebo cakwe?

⁸ Ubusuma ubwalenga bune ubwa kukanaishibila ubushiku nangu inshita bwa kuti, tulashintilila sana pali Yehova e lyo no kulakonka sana ifyo tusambilila mu Cebo cakwe. Ilingi line fwe bantu abashapwililika tufwaya fye ukucita ifyo tutemenwe. Umutumwa Paulo akonkomeshe Abena Kristu bonse ukuti: “Uuletila naiminina ndi acenjele epali awa.” Ilyo fye Yoshua ali  mupepi no kwingisha abantu ba kwa Lesa mu Calo ca Bulayo, abantu 23,000 abamupondokele balifwile. Paulo atile: “Ifi fintu . . . fyalembeelwe ku kutusoka fwe baleikala mu nshiku sha kulekelesha.”—1 Kor. 10:8, 11, 12.

9. Bushe amafya kuti yatulopolola shani no kutupalamika kuli Lesa?

⁹ Ubusuma ubwalenga busano ubwa kukanaishiba ilyo impela ikesa bwa kuti, amafya tukwata yalalenga icitetekelo cesu ukukoselako. (Belengeni Amalumbo 119:71.) Shino nshiku sha kulekelesha shili “ishayafya nga nshi.” (2 Tim. 3:1-5) Abengi muno calo ca kwa Satana balitupata, kanshi kuti batucusha pa mulandu wa citetekelo cesu. (Yoh. 15:19; 16:2) Nga twaicefya no kulomba Lesa ukuti aletutungulula ilyo tulekwata amesho, icitetekelo cesu cikakoselako nelyo ukulopololwa kwati capita mu mulilo. Amesho tayakatunenune, lelo yakalenga tukapalame sana kuli Yehova ukucila na pa fyo twingatontonkanya.—Yako. 1:2-4; 4:8.

10. Cinshi cilenga cilemoneka kwati inshita yapwa bwangu?

¹⁰ Limo cimoneka kwati inshita ilenda bwangu, e lyo limbi tayenda bwangu. Nga natukwata sana ifya kucita inshita ilenda bwangu. Na ifwe nga ca kutila tuli abacincila mu kubomba umulimo Yehova atupeela, ubushiku bwa kwa Yehova bukafika fye bwangu bwangu. Abasubwa abengi baliba abacincila sana mu mulimo wa kushimikila kabili tulingile ukubapashanya. Lekeni tulandeko panono pa fyacitike ilyo Yesu asubilwe fye pa Bufumu mu 1914, kabili twalamona ne fyo abasubwa bamo balangile ukuti bali abaipekanya e lyo ne fyo bambi bashali abaipekanya.

ABASUBWA BALALANGA UKUTI BALI-IPEKANYA

11. Pa numa ya 1914, mulandu nshi abasubwa bamo baletontonkanishisha ukuti Shikulu nacelwa?

¹¹ Ibukisheni imilumbe Yesu aumine pali banacisungu na basha aba matalanti. Nga ca kuti banacisungu nelyo abasha ba muli ilya milumbe balishibe ilyo shibwinga nelyo shikulwibo ali no kufika, nga tacabapamfishe ukuba abalola. Lelo apo tabaishibe e co babelele abalola. Nangu ca kuti pa myaka iingi abasubwa balishibe ukuti umwaka wa 1914 wali uwaibela, tabaishibe bwino bwino ifyali no kucitika. Ifyo bale-enekela tafyacitike ukulingana ne fyo baletontonkanya, ne ci camoneke kwati shibwinga alicelelwe ukwisa. Munyinefwe umo ebukisha ukuti, “Bamo pali ifwe twaletontonkanya ukuti tukaya ku muulu mu mulungu fye wa kubalilapo mu October mu 1914.”

12. Bushe abasubwa balangile shani ukuti ba cishinka kabili balishilimuka?

¹² Baleni tontonkanyeni ifyo baumfwile ilyo impela ishaishile nge fyo bale-enekela, bafwile balifuupwilwe nga nshi! E lyo kabili iyi, yali ni nshita iyayafya nga nshi kuli bamunyinefwe pantu balebacusha ilyo kwali Inkondo ya Calo iya Kubalilapo. Pali iyi nshita calyafishe sana ukushimikila, cali fye kwati nabaleka. Lelo mu 1919, kwali ubwite bwa kubacincisha! Yesu alishile ku kuceceta itempele lya kwa Lesa ilya ku mupashi. Bamo tabali abalola e co tabatwalilile ukucita ‘ubukwebo’ bwa Mfumu. (Mat. 25:16) Cali kwati tababikile amano ku kubika amafuta ya ku mupashi mu nyali nga filya banacisungu abawelewele bacitile. Kabili bali kwati musha umunang’ani, tabalefwaya ukubombesha mu mulimo wa Bufumu. Nomba abasubwa abengi balitwalilile ukuba aba cishinka kabili abakosa mu kubombela Shikulwibo nangu ca kuti kwali inkondo.

13. Mibele nshi abasubwa balangile pa numa ya 1914, kabili mibele nshi balanga na muno nshiku?

¹³ Pa numa ya 1914, Ulupungu lwa kwa Kalinda lwalandile ukutila: “Bamunyinefwe bonse fwe baba no mutima wa kubombela Lesa tatwafuupwilwe pa fyo Lesa  apekenye ifintu. Tatwaletontonkanya ukuti ifyo twalefwaya e fyo ficitike; kanshi ilyo twaishibe ukuti ifyo twale-enekela mu October 1914 te fyo fyalingile ukuba, twalitemenwe, pantu Shikulu ta-alwile ifyo alefwaya pa kuti fye atusekeshe. Twalefwaisha ukumfwikisha ukufwaya kwa kwa Shikulwifwe.” Ifi fine e fyo na basubwa aba kwa Shikulu baba abaicefya kabili baliipeelesha ku kucita ukufwaya kwa kwa Lesa. Tabaibililika ukuti balikwata umupashi wa kwa Lesa uwaibela, lelo baliipeelesha ukucita “amakwebo” ya kwa Shikulu pano calo. Abena Kristu aba mwi “bumba ilikalamba” kabili aba “mpaanga shimbi” balapashanya abasubwa mu kuba abalola kabili abacincila.—Ukus. 7:9; Yoh. 10:16.

TULALANGA UKUTI TWALI-IPEKANYA

14. Bushe ukulakonka ifyo umusha wa cishinka atusambilisha kuti kwatwafwa shani?

¹⁴ Nge fyo Abena Kristu basubwa baba, aba mwi bumba likalamba ababa abalola balakonka ifyo umusha wa cishinka uo Lesa asonta asambilisha. Nga balekonka ifyo umusha asambilisha mu Cebo ca kwa Lesa ne fyo umupashi ubatungulula, ciba kwati balebika amafuta na yambi mu nyali shabo. (Belengeni Amalumbo 119:130; Yohane 16:13.) Apo balakoshiwa, balaba na maka ya kulalolela Kristu, kabili balatwalilila abacincila nangu balekwata amesho. Ku ca kumwenako, ilyo bamunyinefwe bamo bali mu cifungo ca ba Nazi, bakwete fye Baibolo imo. E co bapepele ukuti bakwate ifya kulya fya ku mupashi na fimbi. Tapapitile ne nshita, baumfwile ukuti munyinefwe umbi uo batwele mu cifungo alikwete amakope ayapya aya Ulupungu lwa kwa Kalinda ayo afishile mu kuulu kwa cimuti uko bamupangiile uko ale-endelako. Pa bapuswike mu cifungo pali na munyinefwe uwasubwa Ernst Wauer uwalandile pa numa ukuti: “Yehova alitwafwile mu nshila ya kupapa, twaleibukisha fyonse ifyaletukosha ifyo twalebelenga muli ba magazini.” Alundilepo no kuti: “Muno nshiku tacayafya ukukwata ica kulya ca ku mupashi, lelo bushe tulabikako amano ukulabelenga lyonse? Nalicetekela ukuti Yehova alapaala bonse abamucetekela, abatwalilila ukuba aba cishinka, kabili abasambilila Icebo cakwe.”

15, 16. Bushe abaupana abali abacincila mu kushimikila bapaalilwe shani, kabili cinshi twingasambililako?

¹⁵ Aba mpaanga shimbi nabo baliba abacincila mu mulimo wa kwa Shikulu, uwa kwafwa bamunyina ba kwa Kristu. (Mat. 25:40) Tababa ngo musha mubi kabili  umunang’ani uo Yesu alandilepo mu mulumbe wakwe, pantu bena balaipeelesha kabili balabika umulimo wa kwa Lesa pa ntanshi. Ku ca kumwenako, ilyo ba Jon na ba Masako abaupana babepwishe nga ca kutila kuti baya ku Kenya mu kwafwilishako ku ncende uko balanda ululimi lwa ciChinese, calyafishe pa kuti bapingulepo. Lelo pa numa ya kupepa, balisumine ukuya ku Kenya.

¹⁶ Ilyo baile, Lesa alibapaalile nga nshi. Balandile abati: “Kuno kuntu kusuma nga nshi ukubombelako.” Batampile ukulatungulula amasambililo ya Baibolo 7 e lyo kwali na fimbi ifisuma ifyo bamwene. Batile, “Tulatootela Yehova cila bushiku pa kututuma kuno.” Kwaliba aba bwananyina abengi abalanga ukuti balipingulapo ukulabombesha mu mulimo wa kwa Lesa mpaka fye impela ikese. Tontonkanyeni pali bamunyinefwe abengi nga nshi abapwisha Isukulu lya Gileadi kabili ababomba umulimo wa bumishonari. Nga mulefwaya ukwishibilapo na fimbi pali uyu mulimo waibela, kuti mwabelenga icipande ica kuti, “Tulabombesha Ukufika Apo Twingapesha!” mu Ulupungu lwa kwa Kalinda ulwa October 15, 2001. Ilyo mulebelenga pa fyo babomba bwino muli bumishonari, muletontonkanya pa fyo na imwe mwingalabombesha pa kuti Yehova alecindikwa. Ici cikalenga ukuti na imwe muleba ne nsansa.

NA IMWE BENE BENI ABALOLA

17. Busuma nshi bwaba mu kukanaishiba ubushiku ne nshita ilyo impela ikesa?

¹⁷ Twamona ukuti caliwama nga nshi pa kukanaishiba ubushiku ne nshita ilyo cino calo cikapwa. Mu nshita ya kufuupuka nangu ukumfwa ububi, lyonse tulapalama sana kuli Yehova, Shifwe uwatutemwa, ilyo tule-esha na maka ukucita ifyo afwaya. Pa mulandu wa kuti twalikata kuli plao, tatulolesha na ku numa twalipaalwa nga nshi mu mulimo wa kwa Shikulu.—Luka 9:62.

18. Cinshi ico tufwile ukubela aba cishinka mu mulimo wa kwa Lesa?

¹⁸ Ubushiku bwa kwa Yehova ubwa bupingushi nabupalama nga nshi. Takuli nangu umo pali ifwe uwingafwaya ukukalifya Yehova nangu Yesu. Balitupeela ishuko ilikalamba nga nshi ilya kubomba umulimo muli shino nshiku sha mpela. Tulatootela nga nshi pa fyo batucetekela!—Belengeni 1 Timote 1:12.

19. Kuti twacita shani pa kuti tuipekanye?

¹⁹ Nga ca kuti isubilo lyesu lya kuya ku muulu nangu nga lya kwikala muli Paradaise pano calo, tulingile ukutwalilila ukuba aba cishinka mu kubomba umulimo Lesa atupeela uwa kushimikila no kupanga abasambi. Na nomba tatwaishiba ubushiku ne nshita ilyo ubushiku bwa kwa Yehova bukesa. Nomba bushe tulingile ukwishiba? Icacindama kuipekanya kabili tukatwalilila ukuba abaipekanya. (Mat. 24:36, 44) Twalisubila ukuti nga twatwalilila ukucetekela Yehova no kubika Ubufumu bwakwe pa ntanshi, tatwakabombele ibusha.—Rom. 10:11.

[Futunoti]

[Ifipusho]

[Icikope pe bula 26]

Mulefwaya ifya kulya fya ku mupashi nangu ifintu fyafye shani

[Icikope pe bula 27]

Nga twabika sana amano ku milimo ya kwa Lesa, inshita imoneka kwati ile-enda bwangu