“Yufala i No Save Dei Blong Samting Ya Mo Aoa Blong Hem”

“Yufala i mas lukaot gud, from we yufala i no save dei blong samting ya mo aoa blong hem.”—MAT. 25:13.

?BAMBAE YU YU ANSA OLSEM WANEM?

Talem faef samting we i givhan long yumi, from we yumi no save taem we en i kam.

?Ol tabu Kristin oli rere olsem wanem?

?Yumi save mekem wanem blong soemaot se yumi rere?

1-3. (1) ?Wanem pijatok i sem mak long tufala parabol blong Jisas? ?Oli tijim yumi long wanem? (2) ?Wanem kwestin we yumi mas ansa long hem?

YU TRAEM tingbaot se wan haeman blong gavman i askem blong yu draevem hem i go long wan impoten miting. Be bifo we yu go blong karem hem, yu luk se yu no gat naf bensin long trak blong yu. Ale yu spid i go blong pem sam moa. Be taem yu go, haeman ya i kam. Hem i lukaotem yu, be yu no stap. Hem i no save wet long yu, ale hem i askem long wan narafala man blong i draevem hem. I no longtaem afta, yu yu kambak, mo yu luk se haeman ya i go finis. ?Bambae yu yu harem olsem wanem?

² Naoia, yu traem tingbaot se yu yu haeman ya. Yu rere blong go long wan narafala ples. Bifo yu go, yu jusum tri man blong oli lukaot long sam impoten wok blong yu. Yu eksplenem wanem we trifala bambae i mekem, mo trifala i agri blong mekem. Be taem yu kambak, yu faenemaot se tu nomo i mekem wok we yu askem. Narawan i no mekem wok nating, mo afta hem i mekem sam eskius. ?Bambae yu yu harem olsem wanem?

³ Tufala pijatok ya i sem mak long tufala parabol blong Jisas, long saed blong ten yang gel mo parabol blong mane. Tufala parabol ya i tokbaot taem blong en, mo tufala i soemaot from wanem sam tabu Kristin oli waes mo oli holemstrong long Jisas, be sam narafala nogat. * (Mat. 25:1-30) Jisas i makem gud impoten tijing long tufala parabol ya. Hem i talem se: “Oraet, yufala i mas lukaot gud, from we yufala i no save dei blong samting ya mo aoa blong hem.” Jisas i talem se ol disaepol blong hem bambae oli no save stret taem we en blong rabis wol blong Setan i kam. (Mat. 25:13) Yumi tu yumi mas “lukaot gud.” ?From wanem i gud we yumi mekem olsem we Jisas i  talem? ?Hu i lukaot gud? ?Mo yumi mas mekem wanem blong yumi lukaot gud?

?FROM WANEM YUMI MAS LUKAOT GUD?

4. ?From wanem yumi no nid blong save stret taem blong en?

⁴ Samtaem i impoten blong save stret taem. Yu traem tingbaot se yu wok blong wan masta, no yu go long wan miting, no yu tekem plen. Yu mas lukluk taem, blong yu no let. Be sipos yu mas kilim faea we i stap bonem wan haos, no yu mas sevem wan narafala long taem blong wan disasta, yu no lukluk taem. Yu mas putum tingting blong yu long wok we yu stap mekem, be yu no tingbaot taem. Wok blong prij i givhan long ol man blong oli save samting we Jehova i mekem blong sevem ol man. Wok ya i impoten naoia from we en blong rabis wol ya i stap kam klosap. Yumi no nid blong save stret taem blong en, blong yumi lukaot gud mo mekem samting we Jehova i wantem. Be from we yumi no save stret dei mo aoa, hemia i save givhan long yumi long faef samting.

5. ?Yumi soemaot samting we i stap long hat blong yumi olsem wanem?

⁵ Fas samting se, from we yumi no save stret taem blong en, yumi save soemaot wanem i rili stap long hat blong yumi. Jehova i respektem yumi taem hem i letem yumi jusum se yumi wantem holemstrong long hem, no nogat. Yumi mekem wok blong Jehova from we yumi lavem hem, be i no from we yumi wantem laef tru long en blong rabis wol ya mo kasem laef we i no save finis. (Ridim Ol Sam 37:4.) Yumi glad taem yumi mekem wok blong Jehova, mo yumi luksave se hem i tijim yumi from we hem i wantem givhan long yumi. (Aes. 48:17) Yumi no harem se ol tok blong hem oli strong tumas blong folem.—1 Jon 5:3.

6. ?Taem yumi mekem wok blong Jehova from we yumi lavem hem, Jehova i harem olsem wanem? ?Mo from wanem?

⁶ Nambatu samting se, yumi save mekem Jehova i glad. Taem yumi mekem wok blong Jehova from we yumi lavem hem, yumi stap givhan long hem blong pruvum se enemi blong hem Setan, i man blong giaman. (Job 2:4, 5; ridim Ol Proveb 27:11.) Yumi luksave ol trabol we Setan i mekem long ol man. Taswe yumi glad blong sapotem rul blong Jehova mo yumi sakemaot rul blong Setan.

7. ?From wanem yu wantem yusum laef blong yu blong mekem wok blong God mo givhan long ol narafala?

⁷ Namba tri samting se, yumi no tingbaot yumi nomo, be yumi yusum taem blong yumi blong mekem wok blong God mo givhan long ol narafala. Samfala we oli no save God, oli bilif se en bambae i kam. Oli fraet se enitaem nomo sam disasta bambae i spolem wol ya, taswe oli gat tingting ya se: “I gud yumi gohed, yumi kakae, yumi dring, from we tumora bambae yumi ded.” (1 Kor. 15:32) Be yumi, yumi no fraet. Yumi no tingbaot yumi nomo. (Prov. 18:1) Yumi putum wok blong Jehova long fasples long laef blong yumi. Mo yumi yusum taem, paoa, mo olting blong yumi, blong talemaot gud nius blong Kingdom blong God. (Ridim Matiu 16:24. *) Yumi glad taem yumi mekem wok blong Jehova, speseli taem yumi givhan long narafala blong i save hem.

8. ?Wanem stori long Baebol we i soemaot se yumi mas trastem Jehova fulwan mo Tok blong hem?

⁸ Namba fo samting se, yumi save trastem Jehova fulwan mo yumi traehad blong obei long Tok blong hem. Yumi sinman taswe i isi nomo blong yumi trastem yumi wan. Pol i givim woning long olgeta Kristin se: “Man we i ting se i stap stanap strong, hem i mas lukaot gud, blong bambae i no foldaon bakegen.” Hem i talem se taem klosap ol man Isrel oli go insaed long Promes Lan, 23,000 blong olgeta oli ded from we oli no obei long  Jehova. Pol i talem se: ‘Olgeta trabol ya we ol man ya oli kasem, oli raetem stori blong hem long buk blong wekemap yumi’ we yumi stap laef klosap long en blong wol ya.—1 Kor. 10:8, 11, 12.

9. ?Ol trabol we yumi kasem, oli mekem bilif mo fasin fren blong yumi wetem Jehova i strong olsem wanem?

⁹ Namba faef samting se, from we yumi no save stret taem blong en, yumi stanap strong long ol trabol mo bilif blong yumi i kam strong. (Ridim Ol Sam 119:71.) Laef long ol las dei blong wol ya, i “strong tumas.” (2 Tim. 3:1-5) Plante man oli no laekem yumi, ale maet oli agensem yumi. (Jon 15:19; 16:2) Be ol samting ya oli mekem bilif blong yumi i strong, sem mak olsem we faea i save mekem gol we oli bonem, i klingud. Sipos yumi gat tingting daon mo yumi letem Jehova i lidim yumi, ol trabol bambae oli no blokem yumi blong mekem wok blong Jehova. Yes bambae yumi fren gud moa wetem hem.—Jem. 1:2-4; 4:8.

10. ?Wanem i mekem se taem i pas kwik?

¹⁰ Yumi save ting se taem i pas kwik no i slo. Sipos yumi bisi mo yumi no lukluk long taem, yumi luk se taem i pas kwik. Long sem fasin, sipos yumi bisi long wok blong Jehova, maet en i kam kwik moa i bitim wanem we yumi tingbaot. Bighaf blong ol tabu Kristin, oli soemaot gudfala eksampol long yumi, from we oli bisi long wok blong Jehova. Bambae yumi tokbaot samting we i hapen afta we Jisas i kam King long 1914. Mo bambae yumi luk olsem wanem sam long ol tabu Kristin long taem ya oli rere, be sam narafala nogat.

OL TABU KRISTIN OLI SOEMAOT SE OLI RERE

11. ?From wanem sam tabu Kristin oli ting se Jisas i let?

¹¹ Yu traem tingbaot bakegen parabol blong ten yang gel, mo parabol blong mane. Sipos ol gel ya oli save taem we man we i mared i kam, no sipos ol man blong wok ya oli save taem we masta i kambak, bambae oli no nid blong lukaot gud. Be from we oli no save, oli mas lukaot gud. Blong plante yia, ol tabu Kristin oli save se 1914 i wan spesel yia, be oli no kasem save wanem we bambae i hapen. Taem ol samting oli no kamtru olsem oli tingbaot, sam long olgeta oli ting se Jisas i let. Wan brata i tokbaot taem ya, i se: “Sam long mifala oli gat strong tingting se long fas wik blong Oktoba, bambae mifala i go long heven.”

12. ?Ol tabu Kristin oli soemaot olsem wanem se oli stret mo oli waes?

¹² !Taem en i no kam olsem we ol Kristin ya oli bin tingbaot, oli harem nogud! Oli harem nogud tu from fasin agens mo ol trabol we oli kasem long Wol Wo Wan. Klosap wok blong prij i stop fulwan. I olsem se ol tabu Kristin oli slip. !Be long 1919, wan samting i wekemap olgeta! Jisas i kam blong jekemap wok blong ol man we oli talem se oli Kristin. Sam tabu Kristin oli no rere, nao oli no moa gohed blong mekem wok blong Masta Jisas. (Mat. 25:16) Oli olsem ol faef yang gel ya we oli no waes mo man blong wok ya we i les. Oli no glad blong lego sam samting we olgeta nomo i wantem, blong mekem wok blong Kingdom. Be bighaf blong ol tabu Kristin oli holemstrong long Jehova, mo oli glad blong mekem wok blong Masta blong olgeta, long taem ya blong trabol.

13. ?Ol tabu Kristin oli gat wanem tingting afta long 1914? ?Wanem tingting we oli gat tede?

¹³ Afta long 1914, Wajtaoa i talem toktok ya se: “Ol brata. Mifala we mifala i gat stret tingting long saed blong God, mifala i no harem nogud long ol plan blong hem. I no prapa tingting blong mifala we mifala i wantem se i kamtru. Taswe taem mifala i luk se long Oktoba 1914, samting we mifala i stap wet long hem i no kamtru, mifala i glad se Masta i no jenisim Plan blong Hem blong mekem mifala i harem gud. Mifala i no gat  tingting ya se Hem i mas mekem olsem. Mifala i wantem kasem save gud long stamba tingting blong God.” Tede tu, ol tabu Kristin oli gat tingting daon mo oli wantem mekem wok blong Jehova. Oli no talem se God i putum tok blong hem long tingting blong olgeta blong oli raetem. Oli wantem nomo blong mekem wok blong Jisas. Mo “bigfala hip” blong ol “narafala sipsip,” hemia ol Kristin we bambae oli laef olwe long wol ya, oli folem fasin blong ol tabu Kristin ya.—Rev. 7:9; Jon 10:16.

YUMI SOEMAOT SE YUMI RERE

14. ?From wanem i gud we yumi obei long tijing blong Jehova we yumi kasem long slef we i stret mo waes?

¹⁴ God i jusum slef we i stret mo waes blong i tijim ol man blong hem, blong oli harem gud long Tok blong God mo spirit blong hem. Ol samting ya oli olsem kakae we i mekem bilif blong olgeta i strong. Ol tabu Kristin mo bigfala hip blong man oli soemaot se oli rere taem oli obei long tijing blong Jehova we oli kasem long slef ya. I olsem we oli fulumap karsin long laet blong olgeta. (Ridim Ol Sam 119:130; Jon 16:13.) From samting ya, olgeta tu oli save rere from taem ya we Kraes i kambak. Mo oli save stanap strong taem oli kasem ol trabol we i strong tumas. Yu traem tingbaot. Taem ol brata oli stap long wan rabis kalabus blong ol Nasi, oli gat wan Baebol nomo. Ale oli prea blong oli save kasem sam samting blong mekem bilif blong olgeta i strong. Smoltaem afta, oli harem se wan brata we i jes kam long kalabus, i gat sam niu Wajtaoa we hem i haedem long giaman leg blong hem. Wan long ol brata ya, hemia Ernst Wauer we tabu spirit i makemaot hem. Hem i talem se Jehova i givhan long ol brata long wan nambawan fasin, blong oli save rimemba ol gudfala tok long ol magasin ya. Hem i talem se: “Tede i isi blong yumi kasem ol kakae ya we i mekem bilif blong yumi i strong. ?Be olsem wanem? ?Yumi tinghae long olgeta? Mi save se Jehova i gat plante blesing blong givim long olgeta we oli trastem hem, oli holemstrong long hem, mo oli tekem ol kakae we i mekem bilif blong olgeta i strong.”

15, 16. ?Wanem blesing we Jon mo Masako tufala i kasem from we tufala i strong long wok blong prij? ?Yumi lanem wanem long ol stori olsem?

¹⁵ Ol narafala sipsip oli bisi long wok blong prij, blong sapotem ol brata blong Kraes. (Mat. 25:40) Oli no olsem rabis man ya blong wok we i les. Oli lego sam samting we olgeta nomo oli wantem, blong oli  save putum Kingdom long fasples long laef blong olgeta. Jon mo Masako i mekem olsem. Ol brata oli askem tufala blong go prij long ol Jaenis man we oli stap long Kenya. Fastaem tufala i no sua se bambae tufala i go, no nogat. Tufala i tingting plante long saed ya mo tufala i prea long Jehova. Biaen, tufala i mekem desisen se bambae tufala i go.

¹⁶ Tufala i wok strong long wok blong prij, mo Jehova i blesem wok blong tufala. Tufala i talem se wok blong prij longwe i gud tumas. Tufala i statem seven Baebol stadi mo tufala i gat plante stori blong wok blong prij. Tufala i talem se: “Evri dei, mitufala i talem tangkiu long Jehova from we hem i letem mitufala i stap long ples ya.” Plante narafala brata mo sista oli soemaot se oli wantem stap bisi long wok blong Jehova taem en i kam, nating se oli no save stret taem blong hem. Yu traem tingbaot plante taosen brata mo sista we oli bin joen long Skul Blong Gilead, mo oli mekem wok blong misinari. Sipos yu wantem save moa long wok blong misinari, i gud yu ridim haf long Wajtaoa blong Oktoba 15, 2001, we i talem se “!Yumi Traem Mekem Bes Blong Yumi!” Taem yu ridim haf ya, yu traem tingbaot olsem wanem yu save mekem moa long wok blong Jehova. Wok blong yu bambae i leftemap nem blong Jehova mo bambae i mekem yu yu glad bigwan.

YU TU YU MAS LUKAOT GUD

17. ?From wanem i gud we yumi no save stret dei mo aoa we en bambae i kam?

¹⁷ Nating se yumi no save stret dei mo aoa we en bambae i kam, be hemia i no mekem tingting blong yumi i foldaon. Defren olgeta, hemia i wan blesing blong yumi. Hem i givhan long yumi blong yumi bisi long wok blong Jehova, mo blong yumi fren gud moa wetem hem. Yumi no letem eni samting i pulum tingting blong yumi mo yumi wok strong long wok blong prij. From samting ya, yumi harem gud long laef blong yumi.—Luk 9:62.

18. ?From wanem yumi wantem gohed blong mekem wok blong Jehova?

¹⁸ En blong wol ya i klosap tumas, taswe yumi wantem gohed blong mekem wok blong Jehova. Yumi no wantem mekem Jehova mo Jisas tufala i harem nogud. Tufala i givim wan nambawan wok long yumi long ol las dei ya. !Yumi talem tangkiu long tufala from we tufala i trastem yumi!—Ridim 1 Timoti 1:12.

19. ?Yumi save mekem wanem blong soemaot se yumi rere?

¹⁹ Nomata se bambae yumi laef long heven no long Paradaes long wol, i gud yumi gohed blong prij mo blong tijim ol man. Yumi save rere from dei blong Jehova, taswe yumi no nid blong save wetaem dei ya bambae i kam. (Mat. 24:36, 44) Yumi save se sipos yumi trastem Jehova fulwan, mo yumi putum Kingdom fastaem, bambae yumi no harem nogud mo yumi no sem.—Rom 10:11.

[Futnot]

[Kwestin]

[Tok blong pija long pej 26]

Long taem blong trabol tu, yu mas traehad blong mekem bilif blong yu i strong

[Tok blong pija long pej 27]

Taem yumi bisi long wok blong Jehova, yumi luk se taem i pas kwik