“Ousap Silei Lon Meni Rän Ika Kulok”
“Ousap Silei Lon Meni Rän Ika Kulok”
“Oupwe mamasa, pun ousap silei lon meni rän ika kulok Nöün Aramas epwe war lon.”—MAT. 25:13.
IFA USUN KOPWE PÉLÚWENI?
Ikkefa ekkewe popun a éch ngenikich ach sise silei ránin me kulókun ewe sópwólóón?
Ifa usun ekkewe mi kepit ra mammasa?
Ifa usun sia tongeni pwáraatá pwe sia mmolnetá ngeni ewe sópwólóón?
1-3. (a) Ikkefa ekkewe pwóróus repwe álisikich le weweiti ewe lesen seni án Jesus kewe ruu kapas monomon? (b) Ikkefa ekkewe kapas eis mi lamot sipwe pélúweni?
ANCHANGEI pwe emén meilapen mwú a tingoreok óm kopwe uwei ngeni eú an mwich mi lamot. Iwe nge mwen chék fitu minich óm kopwe chuuri, ka kúna pwe ese naf káásin woom we. Iwe ka mwittir le ló alélééú. Ewe meilap a war, a kúttók nge kese nóm. Ese tongeni witiwit, ina popun a tingorei pwal emén an epwe uwei. Ekiseló chék ka liwin nge ka kúna pwe ewe meilap a fen ló. Epwele ifa usun meefiom?
2 Iei kopwe anchangei pwe itá en ewe meilap. Mwen óm kopwe sái ngeni pwal eú fénú, ka filatá úlúmén mwán ar repwe túmúnú ekkóch angang mi lamot. Ka áweweei ngeniir wiser, iwe iir me úlúmén ra tipeeú ngeni. Nge mwirin och fansoun ka liwinitiir, iwe ka kúna pwe rúúemén chék me leir ra féri ekkewe angang ka ewisa ngeniir. Nge ewe emén ese féri wisan, a pwal mwo nge kúnetipingen. Ren enletin, ese mwaren mwo nge féri minne ka tingorei an epwe féri. Iwe, epwe met meefiom?
3 Minne a fis lón ekkena pwóróus asan ra léllé ngeni án Jesus kewe ruu kapas monomon usun ekkewe fépwúl me ekkewe féún moni. Ra áweweei ewe popun ekkóch Chón Kraist mi kepit lón ei fansoun lesópwólóón repwe alúkúlúk me tipachem nge ekkóch resap. * (Mat. 25:1-30) Jesus a menlapei ewe lesen seni ekkewe kapas monomon ren an apasa: “Iei mine oupwe mamasa, pun ousap silei lon meni rän ika kulok Nöün Aramas epwe war lon.” Jesus a erá pwe néún kewe chón káé resap silei tichikin ewe fansoun epwe ataieló án Satan ei ótót. (Mat. 25:13) A lamot kich sipwe pwal “mamasa.” Met popun a éch ach sipwe féri minne Jesus a apasa? Ié kewe ra fen mammasa? Ren ach sipwe mammasa iei, met mi lamot sipwe féri?
FEIÉCHÚN MAMMASA
4. Ren ach sipwe mammasa, met popun ese pwal lamot ach sipwe silei tichikin ránin me kulókun warotoon ewe sópwólóón?
4 Fán ekkóch a lamot ach sipwe wesewesen silei ika a kulók fite. Áwewe chék, ika ka angang lón eú kompeni, a wor óm appointment ren tokter, are kopwe fiti sepelin, ka túmúnúéchú ika a kulók fite pwe kete mmang. Nge ren emén a kunukun ekkei are emén mi achocho le amanawa emén mwirin eú feiengaw watte, epwe orukoruk are fen mwo nge efeiengaw an epwe chék kakkatol ika a kulók fite. Lón ekkena atun, a fen lamot an epwe chék nefotofot wóón an angang nge esap wóón ewe kulók. Pwal ina chék usun, ach angangen afalafal a álisi aramas le káé met Jiowa a fen féri pwe epwe amanawa aramas. Ei angang a kon lamot lón ei fansoun pún sópwólóón ei ótót a akkarapakkanoto. Ren ach sipwe mammasa me féri met Jiowa a kútta senikich, ese lamot ach sipwe silei tichikin ineet ewe sópwólóón epwe feito. Nge, ach sise silei kulókun me ránin a fen échitikich ren nimu popun.
5. Ifa usun ach sise silei ewe rán me ewe kulók a álisikich le pwáraaló masouen letipach?
5 Áeúin, ach sise silei ineet ewe sópwólóón epwe war a suuk ngenikich ach sipwe pwáraaló enletin masouen letipach. Án Jiowa mut ngenikich le pwisin filatá ach sipwe tuppwél ngeni, a pwáraatá an súfélitikich. Sia angang ngeni Jiowa pokiten sia tongei, nge esap chék ren ach mochen manawewu seni talóón ei ótót me kúna manaw esemuch. (Álleani Kölfel 37:4.) Sia meefi pwapwa lupwen sia féri letipen Kot, me sia mirititi pwe a ekkemiritikich pokiten a tipeni minne mi échitikich seni meinisin. (Ais. 48:17) Sise meefi pwe an kewe allúk ra kon áweires.—1 Joh. 5:3.
6. Lupwen sia angang ngeni Jiowa pokiten ach tongei, ifa meefian? Pwata?
6 Oruuan, ach sise silei ewe rán me ewe kulók, a suuk ngenikich ach sipwe apwapwaai letipen Jiowa. Lupwen sia angang ngeni Jiowa pokiten ach tongei nge esap chék pokiten ach mochen angei feiéch are arapotoon ewe sópwólóón, iwe, sia álisi le ánnetatá ngeni chón koputan we, Satan, pwe mi chofona. (Hiop 2:4, 5; álleani Än Salomon Fos 27:11.) Pokiten sia silei úkúkún watteen ewe riáfféú Satan a efisatá, iwe, sia pwapwa le álisatá án Jiowa nemenem me péénaaló án Satan.
7. Met popun ka mochen áeá manawom le angang ngeni Kot me álisi aramas?
7 Aúlúngátin, ach sise silei ewe rán me ewe kulók a ámecheresaaló ach sipwe pennúkú pwisin mochenich me áeá manawach le angang ngeni Kot me álisi aramas. Lón ei fansoun, ekkóch aramas rese silei Kot ra pwal lúkú pwe ei fénúfan epwe taló. Iwe pokiten ra niwokkus pwe eli lón chék ekkeei rán och feiengaw watte epwe ataieló ei fénúfan, iwe ra eáni ei ekiek: “Ousipwe momongö o ükün, pun lesor sipwe mäla.” (1 Kor. 15:32) Nge kich sise niwokkus me sise ekieki chék pwisin kich. (SalF. 18:1) Sia akkomwa Jiowa lón manawach, me sia áeá meinisin minne mi nóm rech kapachelong ach fansoun me péchékkúl le afalafala ewe kapas allim usun ewe Mwúún Kot. (Álleani Mateus 16:24.) Ach angang ngeni Kot a atoto rech pwapwa ákkáeúin lupwen sia álisi aramas ar repwe silei i.
8. Ifa ewe pwóróus lón Paipel a áiti ngenikich lamoten ach sipwe unusen lúkúlúk wóón Jiowa me an we Kapas?
8 Arúánúún, ach sise silei ewe rán me ewe kulók a álisikich le unusen lúkúlúk wóón Jiowa me achocho úkúkún ach tufich le álleasochisi an we Kapas. Pokiten sise unuséch, a mecheres ach sipwe eáni lúkúlúk wóón pwisin kich. Paulus a éúréúra meinisin Chón Kraist: “Iö a ekieki pwe a nüküchar, epwe fokun tümwünüfichi pwe esap turula.” Rúwe me úlúngát ngeréú chón Israel ra álleasolapa Jiowa me ra máló me mwen chék ar repwele tolong lón ewe Fénú mi Pwonetiw. Paulus a erá pwe, “ekei mettoch meinisin . . . eman a makkeretiu pwe repwe eu kapasen fön fän itach. Pun sia manau lon eu fansoun a arapoto fansoun sopolan.”—1 Kor. 10:8, 11, 12.
9. Ifa usun ekkewe sóssót ra tongeni apéchékkúlaló ach lúkú me ach riri ngeni Jiowa?
9 Enimuan, ach sise silei ineet warotoon ewe sópwólóón a atufichikich le káé seni ekkewe sóssót mi torikich me apéchékkúla ach lúkú. (Álleani Kölfel 119:71.) Ekkewe ránin le sópwólóón a eú “fansoun weires.” (2 Tim. 3:1-5) Chómmóng aramas lón án Satan ei ótót ra oputakich, ina popun eli sia tongeni kúna riáfféú mwáál pokiten ach lúkú. (Joh. 15:19; 16:2) Nge usun chék án ewe ekkei a tongeni etelaló limengawen ewe mechá, ekkewe sóssót ra tongeni apéchékkúla ach lúkú me elimeliméchú. Ika sia tipetekison me álleasochisi án Jiowa emmwen, ekkewe sóssót resap eppetikich lón ach angang ngeni i nge repwe fókkun apéchékkúlaló ach chiechi ngeni i.—Jas. 1:2-4; 4:8.
10. Met popun sia meefi pwe usun itá ewe kulók a mwittir ssá?
10 Sia meefi pwe usun itá fán ekkóch ewe kulók a mwittir are a mmang. Ika sia kon osukosuk ren ach angang me sise nennengeni ewe kulók, iwe usun itá ewe kulók a kon mwittir ssá. Pwal ina chék usun, ika sia achocho lón ewe angang mi ámmeseik Jiowa a ewisa ngenikich, iwe eli sópwólóón ei ótót epwe mwittirito nge sise tepereni. Lap ngeni ekkewe mi kepit a múrinné ar leenien áppirú ren ar angang weires lón án Kot angang. Sipwe ppii pwóróuseer lón ewe ier 1914, lupwen Jesus a wiliti king, me ifa usun ekkóch leir ra mmolnetá nge ekkóch rese.
EKKEWE MI KEPIT RA ÁNNETATÁ PWE RA MMÓLNETÁ
11. Mwirin 1914, pwata ekkóch ekkewe mi kepit ra ekieki pwe Jesus a mmang?
11 Chechchemeni án Jesus kewe kapas monomon usun ekkewe fépwúl me féún moni. Ika ekkewe fépwúl are ekkewe chón angang lón ekkena kapas monomon ra silei ineet ewe mwán apwúpwúlú are ewe masta epwe war, iwe, esor lamoten ar repwe mammasa. Nge pokiten rese silei, a lamot repwe mmolnetá fansoun meinisin. Inaamwo ika ren fite fite ier, ekkewe mi kepit ra silei pwe 1914 a eú ier mi fil, nge rese kon lien weweiti met epwe fis. Lupwen ese fis met ekkewe chón kepit ra ekieki an epwe fis, iwe ekkóch leir ra meefi pwe Jesus a mmang. Iei alón emén pwiich usun ena fansoun: “Ekkóch me leim, aua wesewesen lúkú pwe aupwele feitá láng lón ewe áeúin wiiken October [1914].”
12. Ifa usun ekkewe mi kepit ra pwáraatá pwe ra alúkúlúk me tipachem?
12 Ekieki watteen lichippúngur atun ra wikkitiwiti sópwólóón ei ótót nge mwirin ese fis! A pwal weires ngeni pwiich kewe pún ra kúna riáfféú seni chón koputer lón ewe Áeúin Maunen Fénúfan. Arapakkan ewe angangen afalafal epwele unusen kaúló. Nge lón 1919, a fis eú kékké mi ánenelor! Jesus a war pwe epwe chosani chókkewe mi erá pwe iir Chón Kraist. Nge ekkóch chón kepit rese pássini ei chosa, iwe rese chúen angang fán iten ewe Masta, Jesus. (Mat. 25:16) Rese mammasa, ra usun chék ekkewe fépwúl mi tiparoch rese alélééú néúr kewe lamp ren oil. Iir ra pwal usun chék ewe chón angang mi chipwang, ewe ese tuppwél ngeni néún we masta, ren ar rese mochen pennúkú pwisin mocheniir fán iten ewe Mwú. Nge lap ngeni ekkewe mi kepit ra lúkúchar lón ar tuppwél me fitipachei ar angang ngeni néúr Masta pwal mwo fán weires atun ewe áeúin maunen fénúfan.
13. Ifa ekiekin ekkewe mi kepit mwirin ewe ier 1914? Nge ifa ar ekiek ikenái?
13 Mwirin 1914, The Watchtower minen February 1, 1916 a áweweei ekiekin lap ngeni ekkewe mi kepit lón ena atun. A erá pwe chókkewe mi eáni ekiek pwúng usun ena fansoun rese lichippúng. A sópweló: “Am ause ekieki pwe pwisin letipem epwe pwénútá, ina popun lupwen aua kúna pwe ese fis minne aua ésúkúsúkú lón ewe October, 1914, iwe aua pwapwa pwe ewe Samol ese siwili An Akkót pokitem. Ause pwal mochen I epwe féri ena.” Ra chék mochen weweéchúti minne Kot a tipeni. Ekkewe mi kepit ikenái, ra pwal pwáraatá ena esin napanap tipetekison me ewe mochen le féri letipen Kot. Iir rese apasa pwe rese tongeni mwáálliló pún usun itá Kot a unusen tichiki ngeniir met repwe apasa are akkóta. Ra chék mochen apwénúetá ewe angang wóón ei fénúfan Jesus a fen ewisa ngeniir ar repwe féri. Me ikenái, ewe “mwich mi fokun chocho,” seni ekkewe ‘ekoch sip’ iir kewe mi ápilúkúlúkún kúna manaw esemuch wóón fénúfan, ra áppirúúr ren ar mammasa me tinikken.—Pwär. 7:9; Joh. 10:16.
SIA PWÁRAATÁ PWE SIA MMOLNETÁ
14. Pwata a éch ach sipwe álleasochisi án ewe mwichen chón angang mi alúkúlúk me tipachem emmwen?
14 Kot a filatá chón ewe mwich mi alúkúlúk me tipachem pwe repwe wisen amwéngééni néún kewe aramas me áiti ngeniir ifa usun repwe kúna feiéch seni an we Kapas me an we manaman mi fel. Chón ewe mwich mi fókkun chóchó mi pwáraatá pwe iir mi mmolnetá, ra álleasochisi án ewe mwichen chón angang emmwen. Iwe, usun itá ra alélééú oil néúr kewe lamp. (Álleani Kölfel 119:130; Johannes 16:13.) Pokiten ra péchékkúleló, ra pwal ánnetatá ar mmolnetá fán iten ewe sópwólóón lupwen Kraist epwe liwinsefál. Ra pwal mwo nge tuppwél fán watteen sóssót. Áwewe chék, le mwúún Hitler we, lón eú leenien kalapus, pwiich kewe ra néúni eú chék Paipel. Iwe, ra iótek pwe epwe pwal wor ener mwéngé lón pekin lúkú. Ekiseló chék, ra rongorong pwe emén pwiich a kerán war me a uwei ekkóch kapiin ewe minefé Watchtower mi kopeló lón pechen we mi fér seni amúch. Ernst Wauer, emén mi kepit, emén me lein ekkewe mi manawewu seni ewe riáfféú, a apasa: “Jiowa a álisikem lón eú napanap mi amwarar ám aupwe tufichin amwéchúlúkú lón ekiekim ekkewe pwóróus mi apéchékkúl seni ekkewe lesen.” A pwal erá: “Ikenái, a mmen mecheres ach sipwe angei ekkewe mwéngé lón pekin lúkú, nge kich mi aúcheaniir fansoun meinisin? Ua lúkúlúk pwe ekkewe feiéch mi wachemwuk Jiowa a awora ra chék wikkiti chókkewe mi lúkúlúk wóón, akkamwéchú ar tuppwél me mwémmwéngé seni an cheepel.”
15, 16. Ifa usun Jiowa a efeiéchú án ewe pean pwúpwúlú achocho lón ewe angangen afalafal? Met ka tongeni káé seni pwóróuseer ei?
15 Ekkewe ekkóch siip ra álisi pwiin Kraist kewe ren ar angang weires lón ei angangen afalafal. (Mat. 25:40) Rese usun ewe chón angang mi ngaw me chipwang lón án Jesus we kapas monomon. Ra tipemecheres le angang weires me pennúkú pwisin mocheniir pwe repwe akkomwa ewe Mwúún Kot lón manawer. Áwewe chék ren Jon me Masako, iir ra ketiw le ló ngeni Kenya lón Afrika ar repwe álillis le afalafal ngeni ekkewe chón Saini ikena ie. Lepoputáán, ra tipemwaramwar ika repwe ló are resap. Nge mwirin ar ekiekiéchú nonnomur me iótek ngeni Kot usun, ra filatá ar repwe mwékút ngeni ikena ie.
16 Pokiten ra achocho, iwe ra kúna watteen feiéch. Iei met ra apasa: “A mmen amwarar ewe angangen afalafal ikeei ie.” Ra poputá le káé Paipel ngeni fúmén aramas me ra pwal kúna chómmóng mettóch mi fókkun apwapwa lón ar angang. Ra pwal erá: “Iteiten rán aua kilisou ngeni Jiowa ren an mut ngenikem ám aupwe nónnóm ikeei.” Chómmóng pwiich kewe ra pwal pwáraatá pwe ra mochen angang weires ngeni Kot, ese lifilifil ika ineet epwe war ewe sópwólóón. Ekieki usun pwiich kewe fite ngeréú mi fiti ewe angangen misineri. Ka tongeni álleani pwóróusen ena sókkun angang mi aúchea mi mak lón ewe puk Ekkewe Lesen seni English Leenien Mas minen 2007, fán ewe itelap: “Akkachocho Ngeni Än Kot Angang Ikenäi.” Atun ka álleani ena pwóróus mi amwarar, ekieki ifa usun ka tongeni alapaaló óm angang ngeni Kot. Óm achocho epwe elingaaló Kot me atoto ngonuk chengel.
KOPWE PWAL MAMMASA
17. Ifa usun ach sise silei ránin me kulókun ewe sópwólóón a eú feiéch ngenikich?
17 A ffat pwe ach sise silei ránin me kulókun sópwólóón ei ótót, ina eú feiéch ngenikich. Sise fen letipengaw are lichippúng, nge lón ach akkachocho le féri letipen Kot, a fen péchékkúleló ach riri ngeni Jiowa, Semach we mi tong. Pokiten sia fen nefotofot wóón ewe angang Jesus a ewisa ngenikich me ti senikich ekkewe minen orukoruk, sia manaweni ewe sókkun manaw mi pwapwa lón ach angang ngeni Jiowa.—Luk. 9:62.
18. Met popun sia mochen amwéchú ach tuppwél lón ach angang ngeni Kot?
18 A fókkun arapakkan sópwólóón ei ótót, ina popun sia mochen amwéchú ach tuppwél lón ach angang ngeni Kot. Sise mochen elichippúngú Jiowa are Jesus. Ra fen ewisa ngenikich eú angang mi amwarar lón ekkeei ránin le sópwólóón. A ifa me kilisouch ren ar lúkúlúk wooch!—Álleani 1 Timoty 1:12.
19. Ifa usun sipwe mmolnetá fán iten sópwólóón ei ótót?
19 Ese lifilifil ika sia ápilúkúlúkún kúna manaw lón láng are lón Paratis wóón fénúfan, nge sipwe ákkálleasochisi án Kot allúk pwe sipwe afalafal me féraaló chón káé. Ese lamot ach sipwe silei tichikin ránin me kulókun warotoon ránin Jiowa we. Nge sia tongeni mmolnetá fán iten ena rán. Iwe sipwe chék fókkun mmolnetá! (Mat. 24:36, 44) Esor tipemwaramwar pwe ika sia unusen lúkúlúk wóón Jiowa me akkomwa an we Mwú, sisap fókkun lichippúng.—Rom 10:11.
[Sasing lon pekin taropwe 26]
Pwal mwo nge lón fansoun weires, kútta ekkewe mwéngé lón pekin lúkú
[Sasing lon pekin taropwe 27]
Atun sia achocho lón ach angang ngeni Kot sise fen meefi mwittirin fetálin ewe kulók
