“Zot pa konn ni zour ni ler”

“Veye alor, akoz zot pa konn ni zour ni ler.”​—MAT. 25:13.

KI OU POU REPONN?

Ki serten byenfe nou gannyen lefet ki nou pa konnen kan lafen pou arive?

Ki mannyer bann Kretyen swazir in kontinyen veye?

Dan ki fason nou kapab montre ki nou pare pour larive Kris?

1-3. (a) Ki sityasyon ki ed nou konpran sa de parabol Zezi? (b) Ki kestyon nou bezwen reponn?

IMAZINEN ki en zofisye gouvernman i demann ou pour anmenn li kot en randevou enportan. En pe letan avan ou al sers li ou realize ki napa ase bennzin dan loto. Ou depese pour al rod en pe. Ler ou’n ale sa zofisye i arive. I rod ou me i pa vwar ou. I pa kapab espere, alor i demann en lot dimoun pour anmenn li. Ler ou retournen i’n fini ale. Ki mannyer ou ti pou santi?

² Aprezan meton ou ki sa zofisye e ou’n swazir trwa zonm ki kapab fer bann travay enportan ler ou pa la. Ou eksplik zot travay ki ou ekspekte zot fer e tou le trwa i aksepte pour fer li. Me ler ou retournen ou aprann ki zis de ki’n fer zot travay byen. Pli pir ankor, sa enn ki pa’n fer son travay pe esey zistifye son lekor. Anfet i pa ni’n menm eseye. Ki mannyer ou ti pou santi?

³ Dan son parabol konsernan dis zenn fiy ek sa trwa serviter, Zezi ti servi menm sityasyon pour dekrir akoz serten Kretyen swazir pandan letan lafen ti pou fidel e pridan tandis ki serten non. * (Mat. 25:1-30) I ti met lanfaz lo sa pwen par dir: “Veye alor, akoz zot pa konn ni zour ni ler,” setadir kan i pou egzekit zizman lo lemonn Satan. (Mat. 25:13) Nou kapab aplik sa konsey ozordi. Ki byenfe nou gannyen ler nou veye parey Zezi ti ankouraz nou pour fer? Lekel ki pe montre ki zot in pare pour sa zour? Ki nou bezwen fer konmela menm pour kontinyen veye?

BYENFE POUR KONTINYEN VEYE

4. Akoz kontinyen veye pa vedir vey ler?

⁴ Ler nou travay dan en lizin, pe vizit dokter  oubyen pe vwayaz dan bis, nou swiv sa ler ki’n ganny progranmen. Dan bann lezot sityasyon, par egzanp si nou pe tenny en dife oubyen pe sov lavi en dimoun nou pa kapab tyek nou mont tanzantan akoz sa i kapab distrer nou oubyen menm vin en danze. Dan en tel sityasyon i pli enportan pour konsantre lo sa ki nou pe fer dan plas fer keksoz dapre ler ki’n ganny progranmen. Vi ki lafen pe aprose, sa travay predikasyon in vin pli enportan akoz nou pe montre dimoun bann dispozisyon ki Zeova in pran pour sov zot. Pour en Kretyen, kontinyen veye pa vedir vey ler. Anfet, i annan omwen senk fason ki nou benefisye ler nou pa konn ni sa zour, ni sa ler egzakt kan lafen pou arive.

5. Lefet ki nou pa konn ni zour ni ler, ki mannyer sa i fer nou konn sa ki dan nou leker?

⁵ Premyerman, ler nou pa konnen kan lafen pou arive sa i vreman fer nou konn sa ki dan nou leker. Zeova i demontre nou loner par les nou servi nou liberte pour swazir pour prouv nou fidelite anver li. Kantmenm nou ti pou kontan ganny sove ler lafen i arive, sa pa premye rezon ki nou pe servi Zeova, me akoz nou kontan li. (Lir Psonm 37:4. *) Nou vreman kontan fer son lavolonte e nou realize ki Bondye pe ansenny nou pour nou prop byenfe. (Iza. 48:17) Nou pa vwar son bann komannman konman en fardo.​—1 Zan 5:3.

6. Ler nou servi Bondye akoz nou kontan li, ki mannyer i santi e akoz?

⁶ Dezyenmman, ler nou pa konnen kan lafen pou arive, sa i donn nou loportinite pour rezwir leker Zeova. Ler nou servi Zeova akoz nou kontan li me pa akoz en dat oubyen en rekonpans, nou pe osi defann li e montre ki Satan i en manter. (Zob 2:4, 5; lir Proverb 27:11. *) Ler nou mazin tou sa soufrans ek sagrinasyon ki Dyab in koze, nou kontan pour siport souvrennte Zeova e rezet move dominasyon Satan.

7. Akoz ou krwar i vo lapenn viv en lavi sakrifis?

⁷ Trwazyenmman, ler nou servi Bondye san en dat spesifik antet sa i ankouraz nou pour viv en lavi sakrifis. Pour bann dimoun ozordi ki pa konn Bondye, zot mazinen ki i pou annan en lafen avek sa lemonn. Zot per ki i kapab ariv bann dezas ki pou detrir later, alor zot annan sa latitid: “Annou manze e bwar, parski demen nou pou mor.” (1 Kor. 15:32) De lot kote, nou nou pa per. Lefet ki nou pa anvi satisfer nou dezir egois, alor nou pa izol nou. (Prov. 18:1) O kontrer nou pa viv zis pour nou menm e nou servi nou letan, lenerzi ek resours pour anons sa bon nouvel Rwayonm avek lezot. (Lir Matye 16:24.) Nou ganny bokou lazwa dan servis Bondye, sirtou kan nou ed dimoun konn li.

8. Ki legzanp dan Labib ki montre ki nou bezwen depan plis lo Zeova ek son Parol?

⁸ Katriyenmman, lefet ki nou pa konn ni sa zour ni sa ler, sa i ed nou depan plis ankor lo Zeova e fer nou mye pour aplik son Parol dan nou lavi. Akoz nou enparfe, nou annan sa tandans pour met konfyans dan nou menm. Pol ti averti tou Kretyen: “Sa ki krwar i pe debout, fer atansyon ki i pa tonbe.” I ti mansyonn sa venntrwa mil dimoun ki ti perdi faver Zeova pa tro lontan avan ki Zozye ti pou gid pep Bondye dan Later Promiz. Pol ti azoute: “Tousala ti ariv zot pour servi legzanp pour lezot, me in ganny ekri konman en lavertisman pour  nou, ki’n ariv dan letan lafen.”​—1 Kor. 10:8, 11, 12.

9. Ki mannyer leprev i ranforsi nou lafwa e fer nou vin pli pros avek Bondye?

⁹ Senkyenmman, lefet ki nou pa konnen kan lafen pou vini, sa i permet bann leprev ki nou rankontre ranforsi nou lafwa. (Lir Psonm 119:71. *) Sa bann dernyen zour ki nou pe viv ladan i vreman “difisil.” (2 Tim. 3:1-5) En kantite dimoun dan sa lemonn Satan pa kontan nou, alor nou kapab ganny persekite akoz nou lafwa. (Zan 15:19; 16:2) Si nou demontre limilite e rod gidans Bondye ler nou pas dan bann leprev, nou lafwa pou vin pli for. I pou konmsi i’n ganny rafinen parey en metal i ganny rafinen kan i pas dan dife. Nou pa pou aret servi Zeova. O kontrer nou pou vin pli pros avek li ki nou kapab imazinen.​—Zak 1:2-4; 4:8.

10. Kwa ki fer letan paret pas vit?

¹⁰ I paret ki letan i pas vitman oubyen dousman. Ler nou okipe e pe konsantre lo sa ki nou pe fer olye vey ler, i paret ki letan i pas vit. Pareyman, si nou byen okipe dan sa travay predikasyon ki Zeova in konfye nou, sa zour ek sa ler pou paret ariv pli vit ki nou ti pe ekspekte. Bann Kretyen swazir in kit en bon legzanp pour nou. Annou get an bref ki ti arive apre ki Zezi ti vin Lerwa an 1914 e vwar ki mannyer serten ti montre ki zot ti pare tandis ki lezot non.

BANN KRETYEN SWAZIR IN MONTRE KI ZOT PARE

11. Apre 1914, akoz serten Kretyen swazir ti krwar ki Senyer ti pe tarde?

¹¹ Rapel parabol Zezi konsernan sa bann zenn fiy ek sa trwa serviter. Si sa bann fiy oubyen serviter dan sa de parabol ti konnen kan ki zot nouvo marye oubyen met ti pou arive, zot pa ti pou bezwen veye. Me zot pa ti konnen, alor zot ti bezwen met zot pare. Menm si pour plizyer lannen bann Kretyen swazir ti konnen ki 1914 ti pou en lannen spesyal, zot pa ti vreman konpran sa ki ti pou arive. Ler keksoz pa ti pas parey zot ti pe ekspekte, sa ti’n kapab donn lenpresyon ki Nouvo marye ti pe tarde vini. En frer ti rakonte: “Serten parmi nou ti vreman krwar ki nou ti pe al dan lesyel pandan sa premye semenn an Oktob 1914.”

12. Ki mannyer bann Kretyen swazir ti montre zot fidel e pridan?

¹² Zis mazinen ki mannyer sa bann ki ti pe ekspekte lafen arive ti’n kapab dekouraze ler sa pa ti arive! Deplis, bann frer ek ser ti fer fas avek lopozisyon pandan Premye Lager Mondyal. Zot ti vin inaktif e ti pe dormi spirityelman. Me an 1919, en keksoz ti revey zot dan zot sonmey. Zezi ti vin kot tanp spirityel Bondye e i ti’n ler pour fer lenspeksyon. Serten pa ti pare pour sa lenspeksyon e zot ti perdi zot privilez pour kontinyen travay avek zot Met Zezi. (Mat. 25:16) Zot pa ti vizilan spirityelman, zot ti parey sa senk zenn fiy ki pa ti anmenn fyol delwil. Parey sa serviter pares, zot pa ti pare pour fer bann sakrifis pour Rwayonm Bondye. Par kont, lamazorite Kretyen swazir ti lwayal e annan sa gran dezir pour servi zot Met menm si zot ti rankontre difikilte pandan lager.

13. Ki ti latitid bann Kretyen swazir apre 1914 e ki zot latitid ozordi?

¹³ Apre 1914, Latour Veyer ti fer sa deklarasyon enportan: “Frer, bann parmi nou ki annan sa bon leta lespri anver Bondye pa dezapwente avek okenn laranzman ki I fer. Nou pa ti anvi ki nou prop lavolonte i ganny fer. Alor kan sa  ki nou ti pe ekspekte pa ti arive an Oktob 1914, nou ti kontan ki Senyer pa ti’n sanz Son Plan pour fer nou plezir. Nou pa ti anvi ki I fer sa. Nou senpleman anvi konpran Son plan.” Bann Kretyen swazir i touzour pe demontre sa menm limilite ek devosyon. Zot pa pretann ki zot in ganny serten pouvwar sorti kot Bondye, me zot determinen pour fer travay Senyer lo later. Aprezan bann Kretyen ki annan sa lespwar pour viv pour touzour lo later ki form parti sa “gran lafoul” oubyen ‘lezot mouton’ pe imit zot legzanp.​—Rev. 7:9; Zan 10:16.

MONTRE KI NOU PARE

14. Si nou swiv atantivman lansennyman bann Kretyen swazir, ki mannyer sa pou protez nou?

¹⁴ Zis parey bann Kretyen swazir, sa gran lafoul pe montre ki zot vizilan par swiv atantivman lansennyman sa lesklav fidel e pridan ki Zeova in apwente. An rezilta sa, i konmsi zot osi zot pe kontinyen ranpli zot fyol delwil spirityel avek Parol Bondye ek son lespri sen. (Lir Psonm 119:130 *; Zan 16:13.) Sa i donn zot lafors pour montre zot pare pour retour Kris e reste aktif menm anba bann gro leprev ki zot fer fas avek. Dan enn bann prizon dan letan Nazi, premye kou bann frer ti annan zis en Labib. Alor zot ti priye pour ganny plis nouritir spirityel. En pti pe letan apre, zot ti aprann ki en nouvo frer ti’n kapab fer antre detrwa nouvo nimero Latour Veyer dan sa prizon par kasyet sa bann piblikasyon dan son lazanm artifisyel. Frer Ernst Wauer, en Kretyen swazir ki ti parmi bann sirvivan, ti rakonte plitar: “Zeova in ed nou dan en fason ekstraordiner pour mazin bann panse ankourazan dan sa bann lartik.” I ti osi azoute: “Konmela i fasil pour ganny nouritir spirityel, me eski nou montre lapresyasyon? Mon asire ki Zeova pou beni en kantite bann ki met zot konfyans dan li, reste lwayal anver li e manz lo son latab.”

15, 16. Ki mannyer en koup devoue dan minister ti ganny rekonpanse e ki nou kapab aprann avek bann tel leksperyans?

¹⁵ Lezot mouton osi i okipe dan travay zot Met par donn tou zot sipor bann frer Kris. (Mat. 25:40) Kontrerman avek  sa move serviter pares dan parabol Zezi, zot pare pour fer bann sakrifis e fer bokou zefor pour met lentere Rwayonm premye dan zot lavi. Par egzanp, ler Jon ek Masako ti ganny envite pour ede dan en group Sinwan Kenya, o konmansman zot ti ezite. Me apre ki zot ti’n priy lo sa size e egzamin zot sityasyon, zot ti deside pour al laba.

¹⁶ Sa koup ti ganny beni en kantite pour zot zefor. Zot ti dir: “Nou minister i enkrwayab!” Zot ti konmans set letid Labib e ganny en kantite lezot leksperyans enteresan. Pour terminen, sa koup ti dir: “Nou remersye Zeova sak zour ki i permet nou pour la.” Byensir, i annan en kantite frer ek ser ki’n fer sa bon desizyon pour kontinyen reste byen okipe dan servis Bondye menm si zot pa konnen kan lafen pou arive. Mazin sa plizyer mil frer ek ser ki’n al Lekol Gilead e ki pe fer servis misyonner. Ou kapab ganny en apersi lo sa servis par lir sa lartik dan Latour Veyer le 15 Oktob 2001 an Angle ki annan pour tit: “We Do the Best We Can!” (Nou fer nou mye!) Anmezir ki ou revwar sa resi enteresan lo lazournen en misyonner, esey mazin bann fason ki ou kapab ogmant ou servis pour loue Bondye e sa pou donn ou plis lazwa.

OU OSI KONTINYEN VEYE

17. Vi ki nou pa konnen kan lafen pou arive, ki mannyer sa in en benediksyon pour nou?

¹⁷ Lefet ki nou pa konn sa zour ek ler egzakt kan lafen sa move lemonn pou arive, sa in en benediksyon pour nou. Si nou fer bokou zefor pour fer lavolonte Zeova nou Papa lanmour, nou pou vin pli pros ankor avek li olye fristre oubyen dezapwente. Vi ki nou kontinyen reste byen okipe dan servis nou Met e evite les nou ganny distrer, nou ganny bokou lazwa.​—Lik 9:62.

18. Akoz nou anvi reste fidel dan nou servis?

¹⁸ Zour zizman Bondye pe apros byen vit. Napa personn antre nou ki anvi dezapwent Zeova oubyen Zezi. Zot in donn nou bann privilez spesyal dan zot servis pandan sa bann dernyen zour. Pa nou vreman apresye en kantite sa konfyans ki zot annan dan nou!​—Lir 1 Timote 1:12.

19. Ki mannyer nou montre ki nou pare?

¹⁹ Ki swa nou annan lespwar pour viv dan lesyel oubyen dan Paradi lo later, annou kontinyen reste determinen pour prese e fer disip parey Bondye in demann nou. Nou touzour pa konnen ki zour oubyen ki ler zour Zeova pou arive, me eski i vreman enportan pour konnen? Nou kapab e pou kontinyen montre ki nou pare. (Mat. 24:36, 44) Osi lontan ki nou annan konfyans total dan Zeova e met son Rwayonm premye dan nou lavi, nou pa pou dezapwente.​—Rom. 10:11.

[Not anba lo paz]

[Kestyon]

[Portre lo paz 26]

Menm dan bann sityasyon difisil, rod manze spirityel

[Portre lo paz 27]

I paret ki letan i pas vit ler nou konsantre dan bann aktivite Kretyen