1-3. (a) Edena haheitalai rua ese ita idia durua, Iesu ena parabole rua edia anina ita lalopararalaia totona? (b) Edena henanadai edia haere ita tahua be namo?

 MANI oi laloa, gavamani tauna ta ese oi ia noia mai anina bada hebouna ta dekenai ia do oi abia lao. To, ia oi udaia totona oi lao gwauraia neganai, oi davaria emu motuka ena petrol be ia hegeregere lasi, bona petrol haida hoia totona oi lao. Gavamani tauna be ia haraga dainai, tau ma ta ia noia ia do ia abia lao. Oi giroa mai neganai, oi davaria gavamani tauna be ia lao vadaeni. Reana do oi moale lasi, ani?

² Mani oi laloa, oi be unai gavamani tauna bona gabu ta do oi lao dainai, tatau toi oi abia hidi mai anina bada gaukara haida idia karaia totona. Idia ese do idia karaia gaudia oi gwauraia hedinarai, bona idia gwau do idia karaia. To oi giroa lou neganai, oi davaria rua sibona be edia gaukara idia karaia, to ma ta be ekskius momo ia gwauraia, badina gaukara ta ia karaia lasi. Reana do oi badu, ani?

³ Ataiai ita herevalaia haheitalai rua be Iesu ese ia gwauraia parabole rua bamona. Unai parabole be dokona negana idia herevalaia, bona idia hahedinaraia dahaka dainai horoa Keristani taudia haida be kamonai bona kara maoromaoro taudia, to haida be lasi. a (Mat. 25:1-30) Iesu ese unai parabole edia anina ia gwauraia hedinarai, ia gwau: “Unai dainai, do umui gima noho, badina dina eiava hora be umui diba lasi.” Iesu ena hereva ena anina be, ena hahediba taudia be ia ese Satani ena tanobada do ia hadikaia negana do idia diba lasi. (Mat. 25:13) Unai dainai, ita danu ita “gima noho” be namo. Dahaka dainai Iesu ena hereva ita badinaia be namo? Daidia be idia gima noho? Bona ita gima noho totona dahaka ita karaia be namo?

4. Ita gima noho totona, dahaka dainai tanobada dokona ena dina bona hora ita diba be gau badana lasi?

⁴ Nega haida taim ita diba be mai anina bada. Hegeregere, bema oi be faktori dekenai oi gaukara, oi ura doketa oi itaia, o oi ura peleini dekenai oi guia, taim oi laloa bada be namo, unai amo do oi leiti lasi. To, lahi ia habodoa tauna o doketa be disasta lalonai dika ia davaria tauna ia durua neganai, taim do ia itaia momo lasi. Badina unai ese iena gaukara ia hadikaia diba. Unai bamona negadiai, namona be iena gaukara sibona ia laloa bada, bona taim ia laloa momo lasi. Tanobada ena dokona be ia kahirakahira momokani vadaeni dainai, iseda haroro gaukara amo taunimanima dekenai Iehova ena hahemauri dalana ita hadibaia be gaukara badana. Dokona do ia mai dinana o horana ita diba be gau badana lasi, to namona be ita gima bona Iehova ese ia henia gaukarana ita karaia noho. Hari ita be badina 5 do ita herevalaia, bona do ita itaia tanobada dokona ena dina bona hora ita diba lasi be mai ena namo.

5. Edena dala ai dina bona hora ita diba lasi ese dala ia kehoa, eda kudouna ai ita laloa bada gaudia ita hahedinaraia totona?

⁵ Badina namba 1: Dina bona hora ita diba lasi ese dala ia kehoa, eda kudouna ai ita laloa bada gaudia ita hahedinaraia totona. Iehova be ita ia matauraia dainai, ia ura ita sibona ese abia hidi ita karaia bona ia ita badinaia. Momokani, ena be ita ura tanobada ena dokona amo do ita roho mauri bona mauri hanaihanai ita abia, to Iehova ita hesiai henia ena badina badana be ia ita lalokau henia. (Salamo 37:4 duahia.) Dirava ena ura ita karaia neganai, ita moale bona ita laloparara ia ese ita ia hadibaia noho, badina ia ura namo do ita davaria. (Isa. 48:17) Bona do ita mamia iena taravatu ita badinadia be auka lasi.​—⁠1 Ioa. 5:3.

6. Dahaka dainai mai lalokau ida Iehova ita hesiai henia be namo?

⁶ Badina namba 2: Dina bona hora ita diba lasi ese dala ia kehoa, Iehova ita hamoalea totona. Momokani, ita diba dokona be kahirakahira do ia mai bona ita ura ahuna namona do ita abia, to Iehova ita hesiai henia ena badina be ia ita lalokau henia. Unai ita karaia neganai, ita hamomokania Iehova ena inai tauna Satani be koikoi tauna. (Iobu 2:4, 5; Aonega Herevadia 27:11 duahia.) Danu, mai moale ida Iehova ena lohia dalana ita abia isi, to Satani ena lohia siahuna ita dadaraia, badina ita diba ia ese hisihisi bada ia havaraia noho.

7. Dahaka dainai oi ura Dirava oi hesiai henia bona ma haida oi durua?

⁷ Badina namba 3: Dina bona hora ita diba lasi ese dala ia kehoa, sibona eda ura ita dadaraia bona eda mauri ita gaukaralaia Dirava ita hesiai henia, bona ma haida ita durua totona. Dirava idia diba lasi taudia haida idia abia dae danu dokona do ia mai. To, idia gari badina idia diba lasi edena nega ai unai do ia vara. Unai dainai idia gwau: “Ita aniani bona ita inuinu badina kerukeru do ita mase.” (1 Kor. 15:32) To, ita be ita gari lasi bona sibona eda namo ita laloa lasi. (Aon. 18:1) Oibe, eda mauri lalonai Iehova ena ura ita atoa guna bona iseda kohu, nega bona goada ita gaukaralaia, iena Basileia sivarai namona ita harorolaia totona. (Mataio 16:24 duahia.) Iehova ena hesiai gaukara ita karaia neganai ita moale, badina haida ita durua ia idia dibaia totona.

8. Edena Baibel sivarai ese ia hahedinaraia, Iehova bona Baibel ita abidadama henia be namo?

⁸ Badina namba 4: Dina bona hora ita diba lasi ese dala ia kehoa, Iehova ita abidadama henia bona Baibel ita badinaia totona. Ita be goevadae lasi taudia dainai, nega momo ita ura sibona eda diba dekenai ita tabekau. To, Paulo ese Keristani taudia ia sisiba henidia ia gwau: “Bema tau ta ia laloa ia gini goada noho, namona be ia naria namonamo, dika ia moru.” Ma ia gwau, Israela taudia be kahirakahira Gwauhamata Tanona ai do idia vareai neganai, idia ibounai 23,000 be Iehova idia gwau-edeede henia  dainai ia hamasedia. Danu, Paulo ia gwau “unai gaudia idia torea, inai nega oromana ena dokona ai ita noho taudia idia hadibaia totona.”​—⁠1 Kor. 10:8, 11, 12.

9. Edena dala ai hahetoho ese eda abidadama bona hetura karana Iehova ida ia hagoadaia?

⁹ Badina namba 5: Dina bona hora ita diba lasi ese dala ia kehoa, hahetoho ita haheaukalaia bona eda abidadama ita hagoadaia totona. (Salamo 119:71 duahia.) Inai tanobada ena “dina gabediai nega aukadia do idia vara.” (2 Tim. 3:1-5) Danu, Dirava ita abidadama henia dainai, Satani ena tanobada taudia ese ita idia dagedage henia. (Ioa. 15:19; 16:2) To, lahi ese auri ia hagoevaia hegeregerena, hahetoho ese eda abidadama idia hagoadaia. Bema ita manau bona Iehova ena hakaua dalana ita badinaia, hahetoho ese eda hesiai gaukara do ia koua lasi, bona eda hetura karana Iehova ida be do ia goada momokani.​—⁠Iam. 1:2-4; 4:8.

10. Edena dala ai nega ia heau haraga diba?

¹⁰ Taim be ia heau haraga eiava ia metairametaira diba. Bema gaukara ta dekenai ita bisi bona taim ita itaia momo lasi, taim be ia heau haraga. Unai hegeregerena, bema Iehova ena gaukara dekenai ita bisi, dokona be do ia mai haraga. Horoa taudia momo be haheitalai namona, badina Dirava ena hesiai gaukara dekenai idia bisi noho. To, lagani 1914 ai Iesu be king ai ia lao murinai, idia haida be idia hegaegae lasi. Mani unai ita herevalaia.

11. Lagani 1914 murinai, dahaka dainai horoa taudia haida idia laloa Iesu be ia leiti?

¹¹ Mani Iesu ese ia gwauraia rami-hebou kekeni 10 edia parabole, bona biaguna ese hesiai taudia toi dekenai moni ia henia ena parabole ita laloa. Bema unai rami-hebou kekeni 10 bona hesiai taudia be headava tauna o biaguna do idia ginidae negana idia diba, idia gima noho be anina lasi. To, edia ginidae negana idia diba lasi dainai, idia hegaegae bona gima noho be gau badana. Lagani momo lalodiai, horoa taudia idia abia dae lagani 1914 be lagani badana ta, to idia diba lasi unai lagani ai dahaka do ia vara. To, edia ura gauna ia vara lasi neganai, horoa taudia haida idia laloa Iesu be ia leiti. Gabeai, tadikaka ta be October 1914 ia herevalaia neganai, ia gwau: “Ai haida ai laloa, October hua ena wiki ginigunana ai, ai be guba dekenai do ai daekau.”

12. Edena dala ai horoa taudia idia hahedinaraia, idia be kamonai bona kara maoromaoro Keristani taudia?

¹² Idia laloa dokona do ia ginidae, to ia vara lasi neganai idia lalohisihisi! Danu, unai be nega aukana badina Tanobada Tuarina Ginigunana ai tadikaka be dagedage bada idia davaria. Kahirakahira haroro gaukara ia doko. Toana be horoa taudia idia mahuta noho, to lagani 1919 ai, tau ta ese idia ia hanogaia bamona! Biaguna tauna, Iesu ia mai bona sibona idia gwauraia Keristani taudia ibounai ia sekea neganai, ia davaria horoa taudia haida be idia hegeregere lasi iena gaukara idia karaia totona. (Mat. 25:16) Idia be idia gima lasi; idia be unai kavakava rami-hebou kekeni 5 bamona, edia lamepa totona oela idia abia lasi. Danu, idia be ia lahedo hesiai tauna bamona; idia ese edia biaguna idia badinaia lasi bona ena Basileia idia atoa guna lasi. To tuari lagani lalodiai, horoa taudia momo be edia Biaguna idia badinaia, bona iena hesiai gaukara idia goadalaia.

13. Lagani 1914 murinai, horoa taudia edia lalohadai be dahaka? Bona hari edia lalohadai be dahaka?

¹³ Lagani 1914 murinai, The Watchtower ese unai nega ai idia noho horoa taudia momo edia lalohadai ia gwauraia hedinarai. Ia gwau: “Tadikaka e, lalohadai maorona ita abia taudia be Dirava ena palani dainai ita lalohisihisi lasi. Iseda ura gauna do ia vara o lasi be ita laloa bada lasi; unai dainai ita laloparara iseda lalohadai October, 1914 dekenai be ia kerere neganai, ita moale badina Lohiabada ese Iena Palani ia haidaua  lasi. Ita ura lasi ena Palani do ia haidaua, iseda ura gauna ia vara totona. To, ita ura Iena palani bona ura do ita lalopararalaia namonamo.”Hari, horoa taudia be unai bamona kara idia hahedinaraia danu, bona idia ura Dirava ena ura idia karaia. Idia hekokoroku lasi, to mai manau ida Iesu ese ia henia gaukarana be tanobada ai idia karaia noho. Danu, “hutuma bada” Keristani taudia, tanobada ai do idia mauri hanaihanai taudia unai, be horoa taudia idia tohotohoa noho.​—⁠Apok. 7:9; Ioa. 10:16.

14. Dahaka dainai igui hesiai tauna amo Iehova ese ia halasia hahediba herevadia ita badinaia be namo?

¹⁴ Dirava ese igui hesiai tauna mai ena kamonai bona kara maoromaoro oreana ia abia hidi, ena taunimanima totona buka bona magasin idauidau do ia halasia. Danu, iena Hereva bona lauma helaga amo namo do idia abia dalana ia hahedinaraia. Horoa Keristani taudia bona hutuma bada taudia idia hahedinaraia idia hegaegae, badina idia ese igui hesiai tauna amo Iehova ese ia halasia hahediba herevadia idia badinaia. Unai be hegeregere, oela be edia lamepa dekenai idia bubua bamona. (Salamo 119:130; Ioane 16:13 duahia.) Unai idia karaia dainai, nega aukadia lalonai do idia gini goada bona Keriso ia mai neganai, idia noho hegaegae vadaeni. Hegeregere, guna Nazi dibura kamepa ta dekenai idia noho tadikaka ibounai be Baibel tamona sibona idia gaukaralaia dainai, buka bona magasin ma haida totona idia guriguri. Daudau lasi murinai, idia kamonai tadikaka ta ia ginidae, bona ena aena koikoina (au amo idia karaia gauna) lalonai The Watchtower magasin matamatadia haida ia hunia. Unai negai ia noho horoa tadikaka ta be Ernest Wauer. Ia gwau Iehova ese hoa dalanai tadikaka ia durudia magasin ena hagoadaia herevadia idia laloatao totona. Ma ia gwau: “Hari inai negai, buka bona magasin ita abia be auka lasi, to edia hereva ita laloa bada, eiava? Lau abia dae momokani Iehova be ia idia abidadama henia, idia badinaia bona iena pata amo idia aniani taudia dekenai, hahenamo momo do ia henia.”

15, 16. Headava tau bona hahine ta be edia haroro gaukara idia goadalaia dainai, dahaka hahenamo idia abia? Edia ekspiriens amo dahaka oi dibaia?

¹⁵ Mamoe ma haida be Keriso ena tadikaka idia durua bona haroro gaukara idia goadalaia noho. (Mat. 25:40) Idia be Iesu ese ena parabole lalonai ia gwauraia, kara dika bona lahedo  hesiai tauna bamona lasi. Idia gaukara goada bona edia ura gaudia haida idia dadaraia, badina idia ura edia mauri lalonai Basileia do idia atoa guna. Hegeregere, brens ofesi ese Jon bona Masako idia noia Kenya dekenai do idia lao, bona unuseniai idia noho China taudia do idia haroro henia. Matamanai idia daradara, to idia laloa lou bona gurigurilaia murinai, edia lalona idia hadaia do idia lao.

¹⁶ Haroro gaukara idia goadalaia dainai, Iehova ese edia gaukara ia hanamoa. Idia gwau edia haroro gaukara idia moalelaia bada. Baibel stadi seven idia hamatamaia bona ekspiriens namodia ma haida idia davaria danu. Idia gwau: “Dina ibounai Iehova ai tanikiu henia badina iniseni ai mai diba.” Tadikaka taihu momo idia hahedinaraia, herevana dahaka ia vara, to edia lalona idia hadaia Dirava do idia hesiai henia noho ela bona dokona ia mai. Gilead Sikuli idia lao bona misinari gaukara idia karaia tadikaka taihu tausen momo mani oi laloa. Gima Kohorona, October 15, 2001 ena hereva ladana, “Iseda Diba Hegeregerena Ita Karaia!” lalonai misinari taudia edia gaukara ena sivarai oi duahia diba. Oi duahia lalonai, emu hesiai gaukara oi habadaia diba daladia oi laloa be namo. Unai ese oi do ia durua emu hesiai gaukara oi moalelaia bona Dirava oi hanamoa totona.

17. Edena dala ai dina bona hora ita diba lasi be hahenamo ta?

¹⁷ Ena be tanobada dokona do ia mai ena dina bona hora ita diba lasi, to ita lalohekwarahi lasi. Bona ita dekenai ia be hahenamo ta, badina unai ese ita ia durua iseda lalokau Tamana, Iehova ena ura ita karaia noho, bona eda hetura karana ia ida do ia goada noho. Iesu ese ita dekenai ia henia gaukarana dekenai ita bisi bona lalona veria gaudia ita dadaraia neganai, Iehova ena hesiai gaukara do ita moalelaia.​—⁠Luka 9:62.

18. Dahaka dainai ita ura Dirava ena hesiai gaukara ita goadalaia?

¹⁸ Kahirakahira inai tanobada do ia ore dainai, ita ura Dirava ena hesiai gaukara do ita goadalaia noho. Ita ura lasi Iehova o Iesu ena lalona do ita hahisia. Inai nega dokona ai, idia ese unai gaukara badana be ita dekenai idia henia dainai, ita tanikiu henidia be namo!​—⁠1 Timoteo 1:12 duahia.

19. Edena dala ai tanobada dokona totona ita noho hegaegae diba?

¹⁹ Herevana iseda helaro be guba o tanobada paradaisona ai do ita noho, ita ura Dirava ena hahegani hegeregerena, haroro gaukara bona taunimanima be hahediba tauna halaoa gaukarana ita karaia noho. Ena be Iehova ena dina do ia mai ena hora bona dina be ita diba lasi, to ita noho hegaegae be gau badana! (Mat. 24:36, 44) Ita diba momokani, bema Iehova ita abidadama henia bona iena Basileia ita atoa guna, do ita lalohisihisi lasi.​—⁠Roma 10:11.