1-3. (a) Aniada a situasion ti mangyilustrar iti punto ti dua a pangngarig ni Jesus? (b) Ania dagiti saludsod a sungbatantayo?

IPAPANMO a kiniddaw kenka ti maysa a natan-ok nga opisial nga imanehuam para iti importante nga appointment-na. Ngem sumagmamano laeng a minuto sakbay ti oras a nagtulaganyo, nakitam a kurang gayam ti gasolina ti luganmo isu a nagdardaraska a napan nagpagasolina. Kapampanawmo idi sumangpet ti opisial. Idi saannaka a mabirokan, saanen a nakauray ket nagpaitulod iti sabali. Nakasublika met la a dagus ngem nadlawmo a nakapanawen ti opisial. Ania ngata ti mariknam?

² Ita, ipapanmo a sika ti opisial ket pimmilika iti tallo a lallaki tapno adda napateg nga ipaaramidmo kadakuada. Inlawlawagmo ti aramidenda, ket immanamongda amin. Ngem idi nagsublika, naammuam a dua laeng kadakuada ti nangasikaso iti impaaramidmo. Ti maysa a saan a nagtungpal ket nagpambar ken dina pay ketdi pinadas nga aramiden ti imbagam. Ania ngata ti mariknam?

³ Nagusar met ni Jesus iti umasping a situasion kadagiti pangngarigna maipapan kadagiti birhen ken kadagiti talento. Inaramatna dagitoy a pangngarig tapno ipakitana ti makagapu no apay nga adda dagiti matalek ken masirib a napulotan a Kristiano iti tiempo ti panungpalan ken adda met dagiti saan nga agmatalek. * (Mat. 25:1-30) Impaganetgetna daytoy a punto idi kinunana: “Agtultuloykayo nga agbantay, ngarud, agsipud ta saanyo nga ammo ti aldaw wenno uray ti oras”​—kayatna a sawen, inton iyeg ni Jesus ti panangukom ti Dios iti lubong ni Satanas. (Mat. 25:13) Agaplikar met kadatayo dayta a balakad. Kasano a magunggonaantayo iti panagtultuloytayo nga agbantay, kas imparegta  ni Jesus? Siasino dagiti nangpaneknek a nakasaganada a maisalakan? Ken ania ti aramidentayo itan tapno makapagtultuloytayo nga agbantay?

4. Apay a ti ‘panagtalinaed a siririing’ saanna a kaipapanan ti panangpadpadaan laeng iti oras?

⁴ Napateg a silalagiptayo iti iskediul no agtrabahotayo iti paktoria, agpakonsultatayo iti doktor, wenno aglugantayo iti terminal. Ngem iti dadduma a banag, kas iti panangsebseb iti uram wenno panangispal kadagiti biktima ti didigra, mabalin a makasinga wenno napeggad pay ketdi ti panangkitkita iti relo. Kadagita a sirkumstansia, napatpateg nga amang ti panangipamaysa iti agdama a trabaho ngem iti panangsurot iti maysa nga iskediul. Bayat nga umasideg nga umasideg ti panungpalan daytoy a sistema, nakapatpateg unay ti trabaho a panangipakaammo no ania ti aramiden dagiti tattao tapno isalakan ida ni Jehova. Ti panagtalinaed a siririing kas Kristiano saanna a kaipapanan ti panangpadpadaan laeng iti oras. Kinapudnona, adda lima a pagimbagan ti saan a pannakaammo iti eksakto nga aldaw wenno oras nga iyaay ti panungpalan.

5. Kasano a ti saantayo a pannakaammo iti aldaw wenno oras ipalgakna ti adda iti pusotayo?

⁵ Umuna, ti saantayo a pannakaammo iti iyaay ti panungpalan ipalgakna no ania a talaga ti adda iti pusotayo. Kinapudnona, ipapaayannatayo ni Jehova iti gundaway a mangaramat iti wayawayatayo tapno maipakitatayo a nasungdotayo kenkuana. Nupay kayattayo ti maispal iti panungpalan daytoy a sistema, agserbitayo koma ken Jehova gapu ta ay-ayatentayo, saan laeng a tapno maaddaantayo iti biag. (Basaen ti Salmo 37:4.) Maragsakantayo a mangaramid iti pagayatanna, ken mabigbigtayo nga isursuronatayo ti Dios para iti pagimbagantayo. (Isa. 48:17) Saantay koma nga ibilang a makapadagsen dagiti bilinna.​—1 Juan 5:3.

6. Ania ti marikna ti Dios no agserbitayo kenkuana gapu iti ayat, ken apay?

⁶ Ti maikadua a pagimbagan ti saantayo a pannakaammo iti aldaw wenno oras ket maipaayannatayo iti gundaway a mangparagsak iti puso ni Jehova. No agserserbitayo kenkuana gapu iti ayat​—saan a gapu laeng iti petsa wenno gunggona​—makaipaaytayo iti kanayonan a sungbat ni Jehova iti awan nakaibatayanna a panangrurod ti kabusorna, ni Satanas. (Job 2:4, 5; basaen ti Proverbio 27:11.) Ammotayo ti amin a saem ken ladingit nga impalak-am ti Diablo, isu a maragsakantayo a mangsuporta iti turay ni Jehova ket laksidentayo ti dakes a turay ni Satanas.

7. Apay a maikunam a naragsak ti agserbi buyogen ti panagsakripisio?

⁷ Maikatlo, no awan ti pampanunotentayo a petsa, matignaytayo nga agserbi buyogen ti panagsakripisio. Ti sumagmamano ita a saan a makaammo iti Dios mamatida met a saanen nga agpaut ti lubong. Gapu iti amakda iti umad-adani a didigra, ti prinsipioda ket “mangan ken uminumtayo, ta inton bigat mataytayo.” (1 Cor. 15:32) Ngem saantayo a kasta. Ditay isinsina ti bagbagitayo tapno laeng mapennek ti managimbubukodan a tarigagaytayo. (Prov. 18:1) Imbes ketdi, paglikudantayo ti bagitayo ken aramatentayo ti tiempo, pigsa, ken dadduma pay nga ik-ikutantayo tapno mairanudtayo ti naimbag a damag ti Pagarian ti Dios. (Basaen ti Mateo 16:24.) Maragsakantayo nga agserbi iti Dios, nangruna iti itutulongtayo kadagiti tattao a mangammo kenkuana.

8. Ania dagiti pagarigan iti Biblia a mangipakita a masapul a naan-anay nga agtalektayo ken Jehova ken iti Saona?

⁸ Ti maikapat a pagimbagan ti saantayo a pannakaammo iti aldaw wenno oras ket pagbalinennatayo nga ad-adda nga agtalek ken Jehova ken agregget a mangyaplikar iti Saona. Gapu ta managbasoltayo, adda tendensiatayo nga agpannuray iti bagbagitayo.  Imparegta ni Pablo iti amin a Kristiano: “Ti mangipagarup nga isu sitatakder agannad koma a saan a maikulbo.” Napukaw ti 23,000 a tattao ti pabor ni Jehova sakbay unay nga indauluan ni Josue ti ili ti Dios nga agturong iti Naikari a Daga. “Dagitoy a banag,” kuna ni Pablo, “ket naisuratda a pammakdaar kadatayo a nadatngan dagiti panungpalan dagiti sistema ti bambanag.”​—1 Cor. 10:8, 11, 12.

9. Kasano a sumayaat ti pammatitayo ken ad-adda a sumingedtayo iti Dios gapu kadagiti pakarigatan?

⁹ Ti maikalima a pagimbagan ti saantay a pannakaammo iti iyaay ti panungpalan ket mapasayaatna ti pammatitayo gapu kadagiti agdama a pakarigatan. (Basaen ti Salmo 119:71.) Talaga a “napeggad a tiempo a narigat a pakilangenan” ti maudi nga al-aldaw daytoy a sistema. (2 Tim. 3:1-5) Adu a tattao iti lubong ni Satanas ti manggurgura kadatayo, isu a mabalin a maidadanestayo gapu iti pammatitayo. (Juan 15:19; 16:2) No agpakumbabatayo ken agpaidalantayo iti Dios no maipasangotayo kadagiti kasta a pannubok, bumileg ti pammatitayo wenno arigna magugoran dayta babaen iti apuy. Saantayo a sumuksuko no di ket ad-adda koma nga umadanitayo ken Jehova.​—Sant. 1:2-4; 4:8.

10. Ania ti mamagbalin a kasla naparpartak ti panaglabas ti panawen?

¹⁰ Mabalin a kasla napartak wenno nabayag nga aglabas ti panawen depende iti panangmatmat ti maysa a tao. No okupadotayo ken saan la a ti oras ti sipsiputantayo, kasla nagbiit a lumabas ti panawen. Kasta met, no okupadotayo iti trabaho nga impaaramid ni Jehova, ditay mapupuotan a lumabas ti tiempo. Nagsayaat ti ulidan ti kaaduan kadagiti napulotan mainaig iti daytoy a banag. Usigentayo biit ti napasamak kalpasan a naisaad ni Jesus kas Ari idi 1914 ken kitaentayo no kasano nga impakita ti dadduma a napulotan a sisasaganada nupay saan ti sumagmamano.

11. Kalpasan ti 1914, apay nga impapan ti sumagmamano a napulotan a nagtaktak ti Apo?

¹¹ Subliantayo dagiti pangngarig ni Jesus maipapan kadagiti birhen ken kadagiti talento. No ammo koma dagiti birhen wenno dagiti adipen no kaano a dumteng ti nobio wenno ti apo, saan koman a kasapulan nga agtultuloyda nga agbantay. Ngem saanda nga ammo, isu a kasapulan a kanayon a nakasaganada. Nupay nabayagen a ninamnama dagiti napulotan a dumteng ti panungpalan idi 1914, saanda a naan-anay a naawatan ti mapasamak. Idi saan a natungpal ti ninamnamada, agparang a kasla nagtaktak ti Nobio. Imbaga idi agangay ti maysa a kabsat, “Sumagmamano kadakami ti sipapasnek a namati a mapankamin idiay langit bayat ti umuna a lawas dayta nga Oktubre [1914].”

12. Kasano nga impakita dagiti napulotan a matalek ken masiribda?

¹² Panunotem laengen ti pannakaupayda idi saan a natungpal ti ninamnamada a panungpalan! Kasta met, mabusbusor idi dagiti kakabsat bayat ti Gubat Sangalubongan I. Gapuna, arigna nakaridepda iti naespirituan. Ngem idi 1919, adda nangriing kadakuada! Dimteng ni Jesus iti naespirituan a templo ti Dios tapno agsukimat. Ngem adda dagiti saan a nakapasa iti dayta a panagsukimat ket napukawda ti pribilehioda a mangasikaso iti impatrabaho ti Ari. (Mat. 25:16) Arigna naliwayanda ti nagkarga iti naespirituan a lana iti pagsilawanda, kas kadagiti maag a birhen. Ket kas iti nasadut nga adipen, saanda a kayat ti agsakripisio para iti Pagarian. Nupay kasta, impakita ti kaaduan a napulotan ti di maisin a kinasungdoda ken nasged a tarigagayda nga agserbi iti Apoda uray kadagidi narigat a tawtawen ti gubat.

13. Ania ti kababalin dagiti napulotan kalpasan ti 1914, ken ania ti kababalinda ita?

¹³ Kalpasan ti 1914, kastoy ti imbaga ti  Pagwanawanan: “Kakabsat, dagidiay addaan kadatayo iti umiso a kababalin ket saan a maupay iti aniaman nga urnos ti Dios. Saantayo a tarigagayan a maaramid ti bukodtayo a pagayatan; gapuna, idi matakuatanmi a di umiso ti ninamnamami idi Oktubre 1914, naragsakankami ta saan a binaliwan ti Apo ti Planona tapno bumagay laeng kadakami. Dimi tinarigagayan nga aramidenna ti kasta. Kayatmi laeng a tarusan dagiti plano ken panggepna.” Agingga ita, dayta a kinapakumbaba ken panagayat ti pakabigbigan pay laeng dagiti napulotan. Saanda nga ibagbaga a napaltiinganda no di ket determinadoda a mangasikaso iti impatrabaho ti Apo ditoy daga. Kasta met laeng a kinaridam ken kinaregta ti tultuladen ti “dakkel a bunggoy” ti “sabsabali a karnero,” dagiti Kristiano nga addaan naindagaan a namnama.​—Apoc. 7:9; Juan 10:16.

14. Kasano a masaluadantayo no agpannuraytayo iti naespirituan a taraon manipud iti matalek ken masirib nga adipen?

¹⁴ Kas kadagiti napulotan a Kristiano, dagiti alerto a kameng ti dakkel a bunggoy itultuloyda a suroten ti matalek ken masirib nga adipen a dinutokan ti Dios a mangipaay iti naespirituan a taraon. Arigna karkargaanda met ti pagsilawanda iti naespirituan a lana manipud iti Sao ti Dios ken iti espirituna. (Basaen ti Salmo 119:130; Juan 16:13.) Kas resultana, nakasaganada met iti isusubli ni Kristo ket aktiboda uray iti laksid ti nakaro a pannubok. Kas pagarigan, iti maysa a kampo a pagbaludan dagiti Nazi, idi damo maymaysa laeng ti Biblia dagiti kakabsat. Isu nga inkararagda ti kanayonan a naespirituan a taraon. Di nagbayag, naammuanda nga adda nabiit pay a naibalud a kabsat a nangipuslit iti sumagmamano a baro a ruar ti Pagwanawanan babaen ti panangidulinna kadagita iti kayo a sakana. Kinuna ni Ernst Wauer a maysa kadagiti nakalasat: “Tinulongannakami ni Jehova iti nakaskasdaaw a pamay-an tapno matandaananmi dagiti makapabileg a sasao a linaon dagiti artikulo.” Sa intuloyna: “Ita, nakalaklakan ti gumun-od iti naespirituan a taraon, ngem kanayon kadi nga ap-apresiarentayo dayta? Ammok nga aglaplapusanan ti bendision ni Jehova kadagidiay agtalek kenkuana, agtalinaed a nasungdo, ken makipangan iti lamisaanna.”

15, 16. Kasano a nagunggonaan ti maysa a pagassawaan iti kinaregtada iti ministerio, ken ania ti maadalmo iti kakasta a kapadasan?

¹⁵ Okupado met ti sabsabali a karnero iti trabaho ti Apo, kas naan-anay a panangsuportada  kadagiti kakabsat ni Kristo. (Mat. 25:40) Saan a kas kadagiti dakes ken nasadut nga adipen iti pangngarig ni Jesus, agsaksakripisioda a mangyun-una iti interes ti Pagarian. Kas pagarigan, saan a makadesision da Jon ken Masako idi naawisda a tumulong kadagiti Chinese idiay Kenya. Ngem inkeddengda ti umakar sadiay kalpasan nga inkararag ken inusigda ti situasionda.

¹⁶ Adu a gunggona ti nasagrapda gapu iti panagreggetda. “Nakabungbunga ti ministeriomi ditoy,” kinunada. Nakairugida iti pito a panangyadal iti Biblia. Simmaruno ti adu pay a makaparagsak a kapadasanda. Kinunada: “Inaldaw nga agyamyamankami ken Jehova iti kaaddami ditoy.” Siempre, adu pay a kakabsat a lallaki ken babbai ti mangipakpakita a determinadoda nga agserbi iti Dios kaanoman a dumteng ti panungpalan. Panunotem ti rinibu a nagturpos iti Gilead ken agserserbin kas misionero. Apay a dimo padasen nga ammuen ti maipapan iti dayta a naisangsangayan a panagserbi babaen ti panangbasam iti artikulo nga “Aramidentayo ti Amin a Kabaelantayo!” iti Pagwanawanan nga Oktubre 15, 2001? Bayat nga us-usigem dayta a nakaay-ayat a salaysay maipapan iti agmalmalem nga aktibidad dagiti misionero, panunotem no kasano pay a maparang-aymo ti panagserbim iti Dios, agpaay a pakaidayawanna ken mangyeg iti rag-om.

17. Kasano a pagimbagantayo ti ditay pannakaammo iti aldaw ken oras nga iyaay ti panungpalan?

¹⁷ Nabatad a pagimbagantayo ti ditay pannakaammo iti eksakto nga aldaw wenno oras nga iyaay ti panungpalan daytoy a sistema. Imbes a maupaytayo, ad-adda ketdi koma nga umadanitayo ken Jehova, ti naayat nga Amatayo, bayat nga ipampamaysatayo nga aramiden ti pagayatanna. No arigna kanayon nga ig-iggamantayo ti arado ken ditay ipalubos a masingatayo, agbalin a naragsak ti panagserbitayo iti Dios.​—Luc. 9:62.

18. Apay a kayattayo ti agtultuloy nga agserbi a simamatalek?

¹⁸ Umasideg nga umasideg ti aldaw ti panangukom ti Dios. Ditay kayat a paayen ni Jehova ken ni Jesus. Adda napapateg a pribilehio nga intalekda kadatayo kadagitoy maudi nga al-aldaw. Apresiarentay koma ti kasta a panagtalekda.​—Basaen ti 1 Timoteo 1:12.

19. Kasano a mapaneknekantayo a nakasaganatayo?

¹⁹ Idiay man langit wenno iti Paraiso a daga ti namnamatayo, simamatalek koma nga itungpaltayo ti annongentayo a mangasaba ken mangaramid kadagiti adalan. Saantayo nga ammo no kaano ti eksakto nga iyaay ti aldaw ni Jehova, ken saantay met a kasapulan nga ammuen dayta. Itultuloytayo koma a paneknekan a nakasaganatayo. (Mat. 24:36, 44) Ammotayo a saantayto a maupay no naan-anay nga agtalektayo ken Jehova ken iyun-unatayo ti Pagarianna.​—Roma 10:11.