“Wha Riẹ Ẹdẹ Na Hayo Oke [Na] Gbe He”

“Wha roro, keme wha riẹ ẹdẹ na hayo oke [na] gbe he.”​—MAT. 25:13.

ẸVẸ WHỌ TE K’UYO ENỌ NANA?

Nọ ma riẹ ẹdẹ hayo oke nọ urere na o te rọ ze he na, ẹvẹ onana o rọ rrọ erere kẹ omai?

Ẹvẹ Ileleikristi nọ a rọ ẹzi wholo na a be rọ jaja aro vi?

Ẹvẹ ma sai ro dhesẹ nọ ma ruẹrẹ oma kpahe no kẹ ẹtha Kristi?

1-3. (a) Iyero vẹ i re fi obọ họ k’omai wo otoriẹ etadhesẹ ivẹ Jesu na? (b) Enọ vẹ ma te k’uyo rai?

DAE rehọ iẹe nọ ọga-iruo jọ nọ o wuzou gaga ọ ta kẹ owhẹ nọ whọ rọ omoto wọe kpohọ ẹgwae jọ. Rekọ umutho iminiti jọ i kiọkọ taure whọ tẹ dhẹ nyae wọe, who te muẹrohọ inọ epẹtiro nọ e rrọ omoto na i ti te he. Whọ tẹ dhẹ nyae dẹ. Nọ whọ nwane dhẹ vrẹ no, ọga-iruo na ọ tẹ nyaze. O rri wariẹ, ọ ruẹ owhẹ hẹ. Ọ sae hẹrẹ hẹ, fikiere ọ tẹ ta kẹ omọfa inọ ọ wọe nya. U ri kri hi na, who te zihe ze jẹ ruẹ nọ ọga-iruo na ọ nya vrẹ no evaọ emu ra. Ẹvẹ o te jọ owhẹ oma?

² Dae rehọ iẹe nọ whẹ họ ọga-iruo na, yọ whọ salọ ezae esa jọ nọ i te, whọ tẹ kẹ ae iruo jọ nọ i wuzou gaga. Who dhesẹ iruo na kẹ ae vevẹ, aimasa na a tẹ rọwo inọ a ti ru iruo na. U ri kri hi na, who te zihe ze jẹ ruẹ nọ imava ọvo i ru iruo rai. Ọrọ avọ esa nọ o ru hu na o te bi gu inoma. Uzẹme riẹ họ, o tube dhobọte iruo na dede he. Ẹvẹ o te jọ owhẹ oma?

³ Evaọ ọtadhesẹ Jesu ọrọ emetẹ-kọkọ gbe ọrọ etalẹnte na, ọ rehọ iriruo itienana dhesẹ oware nọ o te whae ze nọ evaọ edẹ urere na Ileleikristi jọ nọ a rọ ẹzi wholo a ti ro dhesẹ nọ a wo ẹrọwọ gbe areghẹ rekọ efa i ru ere he. * (Mat. 25:1-30) O fiẹgba họ onana, inọ: “Wha roro, keme wha riẹ ẹdẹ na hayo oke [na] gbe he,” koyehọ okenọ Ọghẹnẹ o ti ro vi Jesu ze te raha akpọ Setan na. (Mat. 25:13) Ma sai fi ohrẹ yena h’iruo nẹnẹ. Irere vẹ i re te omai nọ ma tẹ be jaja aro vi, wọhọ epanọ Jesu ọ tuduhọ omai awọ nọ ma ru na? Amono a ruẹrẹ oma kpahe kẹ esiwo no? Kọ eme ma re ru re ma gbẹ jaja aro vi?

 WO ERERE ẸKWOMA ARO ỌJAJAVI

4. Fikieme aro ọjajavi u gbe ro dhesẹ nọ ohwo o re dhe oke erieriwi hi?

⁴ Eware wọhọ iruo ekọmpene, edọkita nọ a rẹ nyae ruẹ, hayo nọ ohwo ọ tẹ gwọlọ ruọ omoto ofa kpohọ oria, o gwọlọ nọ o re rri oke ẹsikpobi re ọ seba eleti. Rekọ nọ erae e tẹ be to nọ o gwọlọ nọ a re furie, hayo nọ eware okpẹtu e tẹ via nọ o gwọlọ ogbo-ọdhẹ, ohwo o re du rri oke ẹsikpobi hi keme ere oruo o rẹ raha oke, tubẹ wha ebẹbẹ ilogbo ze. Evaọ otọ iyero itieye, o rẹ mai woma re ohwo ọ tẹrovi iruo na ukpenọ o re dhe oke erieriwi. Nọ ekuhọ uyerakpọ nana u bi si kẹle na, iruo nọ e mai wuzou kpaobọ họ re ma fi obọ họ kẹ ahwo riẹ eruẹrẹfihotọ nọ Jihova ọ be te rọ kẹ ahwo esiwo. Re Ileleikristi a jaja aro vi orọnikọ u dhesẹ nọ a re dhe oke erieriwi hi. Uzedhe ẹdẹ hayo oke nọ urere na o te rọ ze nọ ma riẹ hẹ na o rẹ kẹ omai erere evaọ idhere isoi jọ.

5. Ẹvẹ oke nọ urere na o te rọ ze nọ ma riẹ hẹ na u bi ro dhesẹ oghẹrẹ ohwo nọ ma rrọ via?

⁵ Orọ ọsosuọ, oke nọ urere na o te rọ ze nọ ma riẹ hẹ na u re dhesẹ oghẹrẹ ohwo nọ ma rrọ evaọ obeva. Evaọ uzẹme, ẹdẹ na nọ ma riẹ hẹ na u bru ọghọ họ omai oma, keme u bi ru nọ ma be rọ rehọ udu obọmai gọ Jihova. Dede nọ ma bi rẹro esiwo evaọ oke nọ a te raha uyerakpọ omuomu nana, uyoyou nọ ma wo kẹ Jihova o be wọ omai gọe orọnikọ fiki esiwo mai ọvo ho. (Se Olezi 37:4.) O be were omai re ma ru oreva Ọghẹnẹ, yọ ma riẹ nọ Ọghẹnẹ o bi wuhrẹ omai eware nọ e rẹ kẹ omai erere. (Aiz. 48:17) Izi riẹ e rrọ owha ogbẹgbẹdẹ k’omai vievie he.—1 Jọn 5:3.

6. Nọ ma tẹ be gọ Ọghẹnẹ fiki uyoyou nọ ma wo kẹe, ẹvẹ o rẹ jariẹ oma, kọ fikieme?

⁶ Orọ avọ ivẹ, oke nọ urere na o te rọ ze nọ ma riẹ hẹ na o k’omai uvẹ nọ ma re ro ru Jihova eva were. Nọ ma tẹ be gọe fiki uyoyou nọ ma wo kẹe, orọnikọ fiki ẹdẹ jọ nọ ma wo họ iroro ho hayo eghale nọ ma bi rẹro rai hi, yọ ma be kẹ Jihova oware nọ ọ te ruẹ kpahe kẹ Setan, ọwegrẹ riẹ nọ ọ rrọ ọtọrue na. (Job 2:4, 5; se Itẹ 27:11.) Nọ ma te roro kpahe edada gbe uweri nọ Ẹdhọ ọ wha ze no, ma rẹ jọ abọ esuo Jihova jẹ siọ esuo omuomu Setan.

7. Fikieme who ro roro nọ uzuazọ omarọkẹ Ọghẹnẹ o rẹ wha evawere ze?

⁷ Orọ avọ esa, nọ ma gbe wo uzedhe ẹdẹ jọ họ iroro be gọ Ọghẹnẹ hẹ, u re ru omai yeri uzuazọ omarọkẹ Ọghẹnẹ. Ahwo jọ nẹnẹ nọ a riẹ Ọghẹnẹ hẹ a rọwo nọ uyerakpọ nana o te jọ ribri hi. Fikinọ ozọ u bi mu ai inọ okpẹtu jọ ọ te rọ oma via kẹle, a wo uruemu ọ: “Jo ma da ma re, keme odẹ ma re ti whuẹ.” (1 Kọr. 15:32) Rekọ ozọ u bi mu omai hi. Ma re yeri uzuazọ oriobọ họ re ma le isiuru omobọ mai ọvo. (Itẹ 18:1) Ukpoye, ma rẹ vro omamai, ma vẹ rọ oke mai, ẹgba, gbe eyero mai ta usiuwoma Uvie Ọghẹnẹ kẹ amọfa. (Se Matiu 16:24.) Egagọ Ọghẹnẹ e rẹ were omai, maero kọ obọ nọ ma re fihọ kẹ amọfa re a riẹ Ọghẹnẹ.

8. Oriruo Ebaibol vẹ o dhesẹ nọ u fo re ma rẹroso Jihova gbe Ẹme riẹ?

⁸ Orọ avọ ene, oke nọ urere na o te rọ ze nọ ma riẹ hẹ na u re ru omai rẹroso Jihova ziezi jẹ romatotọ fi ẹme riẹ h’iruo evaọ uzuazọ mai. Uruemu jọ nọ mai ahwo-akpọ nọ a gba ha ma rẹ gwọlọ dhesẹ họ, ẹro nọ ma rẹ rọ so omobọ mai. Pọl ọ hrẹ Ileleikristi kpobi inọ: “Wha jọ ọ nọ o roro nọ o dikihẹ whawha [ọ] yọrọ oma riẹ, ogbẹrọ ere he o re ti kie.” Omojọ u kiọkọ re Joshua o te ti su idibo Ọghẹnẹ te Ẹkwotọ Eyaa na, ahwo nọ a bu te idu udhegbesa a whu evaọ ẹdẹ ọvo. Pọl ọ ta nọ: “A kere ai re e jọ  unu ovẹvẹ rọ kẹ omai, e nọ orugba ige nọ e vrẹ no o bruze.”—1 Kọr. 10:8, 11, 12.

9. Ẹvẹ ebẹbẹ e sai ro ru ẹrọwọ mai ga je ru omai si kẹle Ọghẹnẹ ziezi?

⁹ Orọ avọ isoi, oke nọ urere na o te rọ ze nọ ma riẹ hẹ na u re ru nọ ma re ro thihakọ ebẹbẹ, onana u ve ru ẹrọwọ mai ga. (Se Olezi 119:71.) Edẹ urere uyerakpọ nana ginọ “oke ẹbẹbẹ.” (2 Tim. 3:1-5) Ahwo buobu a mukpahe omai evaọ akpọ Setan nana, fikiere a rẹ sai kpokpo omai fiki ẹrọwọ mai. (Jọn 15:19; 16:2) Ma tẹ roma kpotọ jẹ nya lele ọkpọvio Ọghẹnẹ evaọ etoke edawọ itieye, ẹrọwọ mai ọ te ga ziezi. Ma ti kiuke ku Jihova ha. Ukpoye, usu mai kugbei o te kpekpe vi epanọ ma tube roro.—Jem. 1:2-4; 4:8.

10. Eme o rẹ lẹliẹ oke wọhọ nọ o be dhẹ vẹrẹ vẹrẹ?

¹⁰ Nọ obọ mai o tẹ rrọ iruo nọ ma gbe bi dhe oke erieriwi hi, o rẹ wọhọ nọ oke o be dhẹ vẹrẹ vẹrẹ. Epọvo na re, ma tẹ rọ omamai kpobi kẹ iruo evawere nọ Jihova ọ kẹ omai na, ẹdẹ gbe oke nọ ma bi rẹro riẹ na o ve ti te vẹrẹ vẹrẹ. Ileleikristi buobu nọ a rọ ẹzi wholo a fi emamọ oriruo h’otọ evaọ onana. Joma ta kpẹkpẹe kpahe oware nọ o via okenọ a rehọ Jesu mu ovie no evaọ ukpe 1914 re ma ruẹ oghẹrẹ nọ Ileleikristi jọ nọ a rọ ẹzi wholo a ro dhesẹ nọ a ruẹrẹ oma kpahe rekọ efa a ru ere he.

ENỌ A RỌ ẸZI WHOLO A RUẸRẸ OMA KPAHE

11. Nọ ukpe 1914 o vrẹ no, fikieme Ileleikristi jọ nọ a rọ ẹzi wholo a ro ku ei họ nọ Olori na ọ be raha oke?

¹¹ Kareghẹhọ ọtadhesẹ Jesu ọrọ emetẹ-kọkọ gbe ọrọ etalẹnte na. O hae jọnọ emetẹ-kọkọ hayo idibo nọ a jọ ọtadhesẹ na fodẹ na a riẹ oke nọ ọva hayo olori an ọ te rọ tha, o hai du gwọlọ nọ a jaja aro vi hi. Rekọ a riẹ oke na ha, fikiere u fo nọ a rẹ ruẹrẹ oma kpahe. Ikpe buobu taure 1914 u te ti te, enọ a rọ ẹzi wholo na a riẹ nọ ukpe yena o te jọ ukpe oka, rekọ a nwani wo otoriẹ oware nọ o te via dẹẹ hẹ. Nọ eware e via dẹẹ epanọ a rẹro rai hi, o tẹ wọhọ nọ Ọva na ọ be raha oke. Oniọvo-ọmọzae jọ ọ ta uwhremu na inọ, “Mai otujọ ma roro nọ oka ọsosuọ amara Akpe ọrọ ukpe [1914] na ma ti kpohọ odhiwu.”

12. Ẹvẹ enọ a rọ ẹzi wholo na a ro dhesẹ nọ a wo ẹrọwọ gbe areghẹ?

¹² Dai roro epanọ o rẹ kẹ uye te nọ who te roro nọ urere na u te no kpakiyọ u ri te he! U te no ere no, a kpokpo inievo na gaga evaọ etoke Ẹmo Akpọ Ọsosuọ. Evaọ oke yena, o tẹ wọhọ nọ inievo na a kieruọ owezẹ keme a joma siọ iruo Uvie na ba. Rekọ evaọ ukpe 1919, oware jọ o tẹ lẹliẹ ae kparoma no owezẹ yena ze! Jesu ọ nyaze ti riwi otu nọ i se omarai Ileleikristi. Rekọ ejọ i ru te epanọ Jesu ọ gwọlọ họ, fikiere o te mi ai owha-iruo rai evaọ “eki-ọthuọ” hayo iruo Ovie na. (Mat. 25:16) Ahwo nana a ruẹrẹ oma kpahe he, a wọhọ emetẹ igheghẹ na nọ e wha ewhri lele oma ha na. Wọhọ odibo ọyẹlẹ nọ o ru oware ovo kpahe etalẹnte olori riẹ hẹ na, a gwọlọ lahiẹ oma rai fiki Uvie na ha. Rekọ ibuobu enọ a rọ ẹzi wholo na a kru ẹrọwọ rai jẹ rọ ẹgba rai kpobi gbodibo kẹ Olori rai makọ evaọ ikpe yena kpobi nọ ẹmo ọ j’otọ na.

13. Didi uruemu utu ọrigbo na a wo nọ ukpe 1914 o vrẹ no, kọ didi uruemu a wo enẹna?

¹³ Nọ ukpe 1914 o vrẹ no, Uwou-Eroro Na o ta obọdẹ eme nana: “Inievo, mai otu nọ i wo iroro nọ i kiete kpahe Ọghẹnẹ, ma re wo idhọvẹ kpahe omaa Riẹ hẹ. Orọnikọ oreva mai ma gwọlọ họ; fikiere nọ oware nọ ma je rẹro riẹ evaọ amara Akpe orọ ukpe 1914 o via ha, eva  e were omai gaga inọ Olori na o nwene Omaa Riẹ fiki mai hi. Ma gwọlọ nọ o ru ere he. Oware nọ ma gwọlọ kpobi họ, re ma riẹ omaa Riẹ gbe ẹjiroro riẹ.” Ileleikristi nọ a rọ ẹzi wholo na a gbe bi dhesẹ omaurokpotọ gbe uruemu omarọkẹ Ọghẹnẹ nana rite inẹnẹ. Orọnikọ a be ta nọ Ọghẹnẹ ọ be rọ edhere igbunu jọ lele ai t’ẹme he, rekọ a gba riẹ mu inọ a rẹ rẹrote iruo Olori na evaọ otọakpọ. Yọ enẹna “otu obuobu” ọrọ “igodẹ efa” nọ i wo ẹruore uzuazọ otọakpọ na a wo ọwhọ jẹ be jaja aro vi wọhọ enọ a rọ ẹzi wholo na.—Evia. 7:9; Jọn 10:16.

MA RE DHESẸ NỌ MA RUẸRẸ OMA KPAHE

14. Ẹvẹ ẹmeoyo kẹ ọrigbo nọ o wo ẹrọwọ avọ areghẹ na o sae rọ thọ omai?

¹⁴ Wọhọ epanọ ileleikristi nọ a rọ ẹzi wholo na a bi ru, otu obuobu na nọ e jaja aro vi abi yoẹme kẹ ọrigbo nọ o wo ẹrọwọ avọ areghẹ na nọ Ọghẹnẹ o ro mu re o wuhrẹ ahwo eme riẹ na. Fikiere, o wọhọ ẹsenọ a wo ewhri ẹsikpobi nọ a be hai ku họ ikpẹ rai. (Se Olezi 119:130; Jọn 16:13.) Enẹ a be rọ bọ ẹrọwọ rai ga je bi dhesẹ nọ a ruẹrẹ oma kpahe no rọkẹ ẹtha Kristi, a tẹ jẹ be rọ ọwhọ ru iruo Olori na makọ evaọ otọ ukpokpoma. Wọhọ oriruo, inievo jọ nọ a fihọ uwou-odi evaọ obọ Germany, Ebaibol ọvuọvo a wo nọ a kaki mu ai te obei. Fikiere a tẹ lẹ re Ọghẹnẹ o fi obọ họ kẹ ae wo ebe ukoko na efa. U kri hi, a tẹ riẹ nọ oniọvo jọ nọ a rehọ ziọ uwou-odi na obọ ọ whariẹ Uwou-Eroro nọ a siobọno obọ ziọ uwou-odi na, enọ ọ thọrọ fihọ ure nọ a kare fihọ owọ riẹ nọ u bru no. Brọda Ernst Wauer nọ o wo ẹruore obọ odhiwu, nọ ọ jọ usu inievo nọ e jọ uwou-odi na ọ ta nọ: “Jihova ọ rọ edhere igbunu fi obọ họ k’omai kareghẹhọ eware ọbọga nọ ma jọ uwou-eroro na se.” Kẹsena ọ tẹ ta nọ: “Nẹnẹ, o rrọ lọlọhọ re ma wo ebe nọ ma re ro ru uwuhrẹ ẹme Ọghẹnẹ, kọ ma bi gine wo edẹro kẹ ae ẹsikpobi? Me wo imuẹro inọ eghale Jihova buobu e rrọ obaro hẹrẹ ahwo nọ a fievahọ iẹe, be roma kpotọ kẹe, je bi wuhrẹ ẹme riẹ.”

15, 16. Ẹvẹ ọzae-avọ-aye jọ a ro wo irere fiki ọwhọ rai evaọ usiuwoma ota na, kọ eme ma rẹ sai wuhrẹ no iriruo itieye na ze?

¹⁵ Igodẹ efa na a be rọ ọwhọ ru iruo Olori na, bi fi obọ họ kẹ inievo Kristi.  (Mat. 25:40) Wo ohẹriẹ no odibo omuomu avọ oyẹlẹ na nọ Jesu ọ fodẹ evaọ ọtadhesẹ riẹ na, u no igodẹ efa na eva ze re a rehọ oke gbe ẹgba rai ru iruo Uvie na, yọ ona a rọ karo evaọ uzuazọ. Wọhọ oriruo, oke nọ a zizie Jon avọ Masako kpohọ usiuwoma ota evaọ ẹkwotọ Kenya nọ ahwo nọ a rẹ ta ẹvẹrẹ China a rrọ, o jẹ ro ae oma ha. Rekọ nọ a lẹ kpahe iẹe no, a tẹ gbaemu inọ a rẹ kwa nya.

¹⁶ Eghale buobu i te rai obọ fiki omodawọ rai. A ta nọ: “Iruo odibọgba na i gbunu kẹhẹ evaọ obonẹ.” A wo emọ-uwuhrẹ Ebaibol ekpokpọ ihrẹ. Emamọ iyẹrẹ efa buobu i no rie ze. A ta nọ: “Kẹdẹ kẹdẹ ma bi yere Jihova nọ o ro vi omai ziọ obonẹ.” Inievo mai efa buobu a rọ uruemu rai dhesẹ inọ a rẹ ruabọhọ iruo Uvie na bọwo okenọ urere na o rẹ ze. Roro kpahe inievo buobu nọ i nwrotọ no isukulu Giliad ze nọ a vi kpohọ iruo imishọnare. Daoma se kpahe iruo obọdẹ nana evaọ uzoẹme na “We Do the Best We Can!” (Ma Dawo Ẹgba Mai Kpobi) nọ o roma via evaọ Uwou-Eroro ọ October 15, 2001 (orọ Oyibo). Nọ who bi se ikuigbe evawere nana nọ e ta kpahe iruẹru ẹdẹ ọvo jọ evaọ uzuazọ imishọnare na, roro kpahe idhere nọ whọ sai ro ru viere evaọ egagọ Ọghẹnẹ, onọ o te wha evawere ilogbo se owhẹ.

JAJA ARO VI RE

17. Ẹvẹ ẹdẹ gbe oke nọ urere na o te rọ ze nọ ma riẹ hẹ na o rọ rrọ erere kẹ omai?

¹⁷ O rrọ vevẹ inọ ẹdẹ gbe oke nọ urere na o te rọ ze nọ ma riẹ hẹ na o ginẹ rrọ oware erere kẹ omai. Ma be vioja hayo dheva ha inọ urere na o re ze he, ukpoye ma si kẹle Jihova Ọsẹ obọ odhiwu mai ziezi no nọ ma be rọ ẹgba mai kpobi ru oreva riẹ na. Otẹkpẹ nọ ma gb’obọ kru, wọhọ odẹme, gbe iruo na nọ ma tẹrovi o be lẹliẹ omai wo oghọghọ ulogbo evaọ iruo Olori na.—Luk 9:62.

18. Fikieme ma gbe ro kiuke ku Jihova ha?

¹⁸ Ẹdẹ ẹdhoguo Jihova o t’otọ no. Mai ọvuọvo ọ gwọlọ ru Jihova hayo Jesu oma vo ho. A mu iruo eghaghae họ omai obọ evaọ edẹ urere nana. Eva nọ a fihọ omai na o d’omai ẹro fia!—Se 1 Timoti 1:12.

19. Ẹvẹ ma sae rọ ruẹrẹ oma kpahe?

¹⁹ O make rọnọ ma wo ẹruore uzuazọ obọ odhiwu hayo orọ Aparadase otọakpọ, joma gbaemu inọ ma rẹ ruabọhọ iruo usiuwoma ota gbe ilele-iruo nọ Ọghẹnẹ ọ kẹ omai na. Rite enẹna ma re riẹ ẹdẹ hayo oke nọ ẹdẹ Jihova ọ te rọ ze he, kọ u gine fo nọ ma rẹ riẹ? Ma rẹ sae ruẹrẹ oma mai kpahe, yọ ere ma ti ru. (Mat. 24:36, 44) Ma wo imuẹro inọ, otẹrọnọ ma fi eva mai kpobi họ Jihova jẹ rọ Uvie riẹ karo, Jihova o ti ru oma vuọ omai hi.—Rom 10:11.

[Oruvẹ-obotọ]

[Enọ Uwuhrẹ]

[Uwoho nọ o rrọ ẹwẹ-obe avọ 26]

Makọ evaọ otọ ebẹbẹ, gwọlọ ẹme Ọghẹnẹ

[Uwoho nọ o rrọ ẹwẹ-obe avọ 27]

Oke o rẹ dhẹ vẹrẹ vẹrẹ nọ ma tẹ tẹrovi iruo Uvie na