‘Beno Me Zaba Ve Kilumbu to Ngunga’

‘Yo yina, beno landa na kukengila sambu beno me zaba ve kilumbu to ngunga.’​—MAT. 25:13, NW.

INKI MVUTU NGE TAPESA?

Kukonda kuzaba kilumbu to ngunga yina nsuka takwisa kenatila beto nki mambote?

Na nki mutindu bapakulami kengilaka?

Inki mutindu beto lenda monisa nde beto kele ya kuyilama sambu na kukwisa ya Kristu?

1-3. (a) Inki bambandu kemonisa dilongi yina Yezu pesaka na bingana zole yina yandi tubilaka? (b) Beto fwete pesa bamvutu na nki bangyufula?

YINDULA nde mfumu mosi mezabisa nge na kunata yandi na kamio na lukutakanu mosi ya mfunu mingi. Kansi, mwa minuta fyoti na ntwala nde nge kwenda kubaka yandi, nge memona nde kamio na nge kele ve ti mazuti ya kufwana. Nge fwete kwenda nswalu sambu na kusumba mazuti. Ntangu nge mekwenda, mfumu yango mekwisa mpi metala-tala na nzyunga kansi yandi memona nge ve. Yandi lenda vingila ve, yo yina yandi melomba shofere yankaka na kunata yandi. Nge mevutuka nswalu mpi mebakisa nde yandi mekwenda dezia. Nge tawa nki mutindu?

² Ntangu yai, yindula nde nge kele mfumu mpi nge mepona babakala tatu ya kufwana sambu na kusadila nge mumbongo mosi ya mfunu. Nge mezabisa bo mambu yina bo fwete sala mpi bo yonso mendima. Kansi, ntangu nge mevutuka nge mewa nde bantu zole mpamba salaka kisalu na bo. Mpi dyambu ya kuluta mbi, muntu yina salaka ve kisalu na yandi kesosa kupesa nge bikuma. Nkutu, yandi mekaka kusala ve ata fyoti. Nge tawa nki mutindu?

³ Na kingana na yandi ya bamwense mpi ya batalanta, Yezu tubilaka mambu ya kiteso mosi sambu na kumonisa kikuma yina na ntangu ya nsuka Bakristu yankaka ya kupakulama tavanda ya kwikama mpi ya mayele kansi bankaka ve. * (Mat 25:1-30) Yandi tubilaka dilongi ya bingana yango na bangogo yai: “Beno landa na kukengila sambu beno me zaba ve kilumbu mpi ngunga,” disongidila ntangu yina Yezu takwisa kufwa nsi-ntoto ya Satana. (Mat. 25:13, NW) Beto lenda sadila ndongisila yina bubu yai. Inki mambote beto lenda baka kana beto kekengila mutindu Yezu syamisaka beto? Banani vandaka ya kuyilama sambu na kuguluka? Mpi nki beto fwete sala bubu yai sambu na kulanda kukengila?

 MAMBOTE YA BETO TABAKA KANA BETO KEKENGILA

4. Sambu na nki ‘kukengila’ ketendula ve kutala ntangu?

⁴ Sambu na bisalu yankaka, mu mbandu kusala na kompani, kukwenda na munganga, to kubaka bisi, yo kelombaka nde beto zitisa manaka mosi buna. Kansi sambu na bisalu yankaka, mu mbandu kufwa tiya, kugulusa bantu na nima ya kisumbula kutala ngunga lenda katula dikebi na beto, to nkutu yo lenda vanda kigonsa. Kana mambu ya mutindu yina mesalama, dyambu ya mfunu kele kutula dikebi na kisalu yina nge fwete sala na kisika ya kusosa kulanda manaka mosi buna. Sambu nsuka ya ngidika yai kefinama, kusadisa bantu na kuzaba bangidika yina Yehowa mebaka sambu na luguluku kele mfunu mingi. Sambu na beto Bakristu, kukengila ketendula ve nde beto fwete talaka ntangu. Nkutu, kele ti mambote tanu yina beto kebakaka sambu beto mezaba ve kilumbu to ngunga ya sikisiki yina nsuka takwisa.

5. Inki mutindu kukonda kuzaba kilumbu to ngunga kesadisaka beto na kumonisa mambu yina kele na ntima na beto?

⁵ Ya ntete, kukonda kuzaba ntangu yina nsuka takwisa kesadisaka beto na kumonisa mambu yina kele mpenza na ntima na beto. Nkutu, yo kepesaka beto lukumu mpi nzila ya kusadila kimpwanza na beto ya kupona mpi kumonisa kwikama na Yehowa. Ata mpusa na beto kele nde, nsuka ya ngidika yai kukwisa beto kesadilaka Yehowa sambu beto kezolaka yandi kansi kaka ve sambu na kubaka luzingu. (Tanga Nkunga 37:4.) Beto kesepelaka kusala luzolo na yandi, mpi kebakisaka nde Nzambi kelongaka beto sambu na mambote na beto. (Yez. 48:17) Beto kemonaka ve nde bansiku na yandi kele kilo.​—1 Yoa. 5:3.

6. Ntangu beto kesadilaka Nzambi sambu beto kezolaka yandi, yandi kewaka nki mutindu mpi sambu na nki?

⁶ Ya zole, kukonda kuzaba kilumbu to ngunga kepesaka beto dibaku ya kusepedisa ntima ya Yehowa. Ntangu beto kesadilaka Yehowa sambu beto kezolaka yandi​—kansi ve sambu beto ketala dati mosi ya sikisiki to sambu na kubaka lufutu​—beto kepesaka Yehowa nzila ya kupesa mvutu na mambu ya luvunu yina mbeni na yandi Satana basisaka. (Yobi 2:4, 5; tanga Bingana 27:11.) Ntangu beto ketadilaka bampasi yonso yina Satana mebasisaka, na kyese yonso beto kepesaka maboko na luyalu ya Yehowa mpi kebuyaka luyalu ya mbi ya Satana.

7. Sambu na nki nge keyindula nde kuvanda ti luzingu ya kuditambika kele mbote?

⁷ Ya tatu, kusadila Yehowa kukonda kuzaba dati ya sikisiki kepesaka beto kikesa ya kuvanda ti luzingu ya kuditambika. Bubu yai, bantu yankaka yina mezaba ve Nzambi, kekwikilaka mpi nde nsi-ntoto yai tazinga dyaka ntangu mingi ve. Sambu bo kewa boma nde dyambu mosi ya nene tasalama ntama mingi ve, bo ketuba nde: “Beto dia mpi beto nwa sambu mbasi beto ta fwa.” (1 Kor. 15:32) Kansi beto, beto kele na boma ve. Beto kebuyaka kudivandila sambu na kulungisa bampusa na beto ya bwimi. (Bing. 18:1) Nkutu, beto kekudibuyaka mpi kesadilaka na luzolo yonso ntangu ti ngolo na beto, mpi mambu yankaka sambu na kuzabisa bankaka nsangu ya mbote ya Kimfumu ya Nzambi. (Tanga Matayo 16:24.) Beto kevandaka na kyese ya kusadila Nzambi, mingi-mingi ntangu beto kesadisaka bankaka na kuzaba yandi.

8. Inki mbandu ya Biblia kemonisa kikuma yina beto fwete tula ntima ya mvimba na Yehowa mpi na Ndinga na yandi?

⁸ Ya iya, kukonda kuzaba kilumbu to ngunga kesadisaka beto na kutula ntima ya mvimba na Yehowa mpi kusadila mbote-mbote Ndinga na yandi na luzingu na beto. Kikalulu mosi yina beto bantu ya kukonda kukuka kevandaka ti yo mingi kele kuditudila ntima. Polo kebisaka Bakristu yonso nde: ‘Bika muntu yina keyindula nde yandi kele ya kutelama, yandi keba na mpila nde yandi bwa ve.’ Bantu 23 000 fwaka mwa ntangu fyoti na ntwala nde Yozue kunata bantu ya Nzambi na Ntoto ya Lusilu. Polo tubaka nde: ‘Bo sonikaka mambu yai sambu na kukebisa beto, bantu  yina ke zinga na nsuka ya ngidika ya bima.’​—1 Kor. 10:8, 11, 12.

9. Inki mutindu bampasi lenda tomisa beto mpi kukumisa ngolo bangwisana na beto ti Nzambi?

⁹ Ya tanu, kukonda kuzaba ntangu yina nsuka takwisa kesalaka nde bampasi kutomisa beto mpi na nima lukwikilu na beto kekumaka ngolo. (Tanga Nkunga 119:71.) Ya kyeleka, bilumbu ya nsuka ya ngidika yai kele bantangu ya “mpasi mingi.” (2 Tim. 3:1-5) Bantu mingi na nsi-ntoto ya Satana kemengaka beto, yo yina beto lenda nyokwama sambu na lukwikilu na beto. (Yoa. 15:19; 16:2) Kana beto kekudikulumusa mpi kelanda lutwadisu ya Nzambi ntangu beto kenyokwama, lukwikilu na beto takuma ngolo bonso kibende yina bo metomisa na tiya. Beto talemba nitu ve. Kansi, bangwisana na beto ti Yehowa takuma ngolo kuluta mutindu yina beto lenda yindula.​—Yak. 1:2-4; 4:8.

10. Inki kesalaka nde ntangu kumonana bonso nde yo kekwenda nswalu?

¹⁰ Ntangu kekwendaka nswalu to malembe. Kana beto kele ti kisalu mingi mpi mekudipesa na kisalu yango na kisika ya kutala ngunga, yo kemonanaka bonso nde ntangu keluta nswalu. Kiteso mosi, kana beto kekudipesa na kisalu ya kitoko yina Yehowa mepesaka beto, kilumbu mpi ngunga yina takwisa nswalu kuluta mutindu yina beto keyindula. Na dyambu yai, bapakulami mingi kele mbandu ya mbote. Bika beto tadila na bunkufi mambu yina salamaka na nima ya 1914, ntangu Yezu kumaka Ntotila mpi mutindu bapakulami yankaka monisaka nde bo vandaka ya kuyilama kansi bankaka ve.

BAPAKULAMI MONISAKA NDE BO VANDAKA YA KUYILAMA

11. Na nima ya 1914, sambu na nki bapakulami yankaka yindulaka nde Yezu sukininaka?

¹¹ Beto yibuka kingana ya Yezu ya bamwense mpi ya batalanta. Kana bamwense to bampika yina yandi tubilaka na bingana yina zabaka ntangu yina bakala ya makwela to mfumu zolaka kukwisa, bo zolaka kuvanda ve na mfunu ya kukengila. Kansi bo zabaka ve, yo yina bo vandaka na mfunu ya kuvanda ya kuyilama. Ata bapakulami zabaka tuka bamvula mingi nde 1914 tavanda mvula mosi ya mfunu mingi, bo zabaka ve na pwelele mambu yina zolaka kusalama. Ntangu mambu salamaka ve mutindu bo vandaka kuyindula, yo monanaka bonso nde bakala ya makwela sukininaka. Mpangi-bakala mosi tubaka na nima nde: “Bampangi yankaka na kati na beto vandaka kuyindula nde beto takwenda na zulu na mposo ya ntete ya Oktobri 1914.”

12. Inki mutindu bapakulami monisaka nde bo vandaka ya kwikama mpi ya mayele?

¹² Yindula mutindu bo lembaka nitu sambu bo vandaka kuvingila nsuka, kansi yo kwisaka ve! Dyaka, bampangi kutanaka ti kimbeni ya ngolo na Mvita ya Ntete ya Ntoto ya Mvimba. Na nsungi mosi buna, bo vandaka kusamuna dyaka ve, yo vandaka bonso nde bo lalaka mpongi. Kansi na mvu 1919, dyambu mosi tedimisaka bo na mpongi! Yezu kwisaka na tempelo ya kimpeve sambu na kutala bantu yonso yina vandaka kudibinga Bakristu. Kansi, bapakulami yankaka monanaka nde bo kudibongisaka ve mpi bo vidisaka dibaku na bo ya kulanda kusala “mumbongo” sambu na Mfumu. (Mat 25:16) Yo vandaka bonso nde bo vandaka ve kikesa sambu na kufulusa mafuta na bamwinda na bo ya kimpeve, mutindu bamwense ya bazoba salaka. Mpi bonso mpika ya molo, bo vandaka ve ti luzolo ya kusala bibansa sambu na mambote ya Kimfumu. Kansi, bapakulami mingi bikalaka ya kwikama mpi monisaka mpusa ya ngolo ya kusadila Mfumu na bo ata na bamvula yina ya mvita.

13. Na nima ya 1914, nki nkadilu kimvuka ya mpika ya kwikama mpi ya mayele monisaka, mpi nki nkadilu bo kemonisa bubu yai?

¹³ Na nima ya 1914, Nzozulu ya Nkengi vandaka ti bangogo yai: “Bampangi, bayina na kati na beto vandaka ti mabanza ya mbote sambu na Nzambi ndimaka bangidika na yandi yonso. Beto kele na mfunu ve nde lukanu na beto kulungana; yo yina ntangu beto monaka nde kivuvu na beto lunganaka ve na Oktobri 1914, beto vandaka na kyese nde Mfumu sobaka ve Lukanu  na yandi sambu na kusepedisa beto. Luzolo na beto vandaka ve nde yandi sala mpidina. Beto kezola kaka kubakisa balukanu na yandi.” Tii bubu yai, nkadilu yai ya kudikulumusa mpi ya kukangama na Nzambi kemonanaka na Bakristu bapakulami. Bo ketubaka ve nde bo kele ya kupemama, kansi lukanu na bo kevandaka ya kusala “mumbongo” sambu na Mfumu awa na ntoto. Bubu yai, ‘kibuka ya nene’ ya “mameme ya nkaka,” disongidila Bakristu yina kele ti kivuvu ya kuzinga na ntoto kelanda mbandu na bo ya kukengila mpi ya kuvanda kikesa.​—Kus. 7:9; Yoa. 10:16.

BETO MONISA NDE BETO KELE YA KUYILAMA

14. Inki mutindu kukangama na ngidika yina Nzambi kesadilaka sambu na kupesa madya ya kimpeve ketaninaka beto?

¹⁴ Kaka mutindu Bakristu ya kupakulama kesalaka, kibuka ya nene kelanda kukengila mpi kukangama na ngidika yina Nzambi kesadilaka sambu na kupesa bo madya ya kimpeve. Yo kele bonso nde bo kefulusa mafuta na bamwinda na bo ya kimpeve na nzila ya Ndinga ya Nzambi mpi ya mpeve na yandi. (Tanga Nkunga 119:130; Yoane 16:13.) Sambu bo kekuma ngolo, bo mpi kemonisa nde bo kele ya kuyilama sambu na kuvutuka ya Kristu mpi bo kelanda kusadila Nzambi ata na nsungi ya bampasi ya ngolo. Mu mbandu, na boloko mosi na kan ya Nazi, na luyantiku bampangi vandaka kaka ti Biblia mosi. Yo yina, bo sambaka Yehowa sambu na kulomba madya yankaka ya kimpeve. Ntangu fyoti na nima, bo waka nde mpangi mosi yina kwisaka na kan vandaka ti mwa banimero ya Nzozulu ya Nkengi na kati ya saki na yandi. Na kati ya bantu yina gulukaka, mpangi Ernst Wauer, Mukristu ya kupakulama tubaka na nima nde: “Yehowa sadisaka beto na mutindu ya kuyituka sambu na kubumba na mabanza na beto bangindu ya kepesa kikesa ya masolo yina.” Yandi tubaka dyaka nde: “Bubu yai, yo kele mpasi ve na kuzwa madya ya kimpeve, kansi keti beto kesepelaka na yo ntangu yonso? Mono kele ti kivuvu nde Yehowa mebumbaka balusakumunu mingi sambu na bantu yina ketudilaka yandi ntima, kebikalaka ya kwikama, mpi kedyaka na mesa na yandi.”

15, 16. Inki mambote bankwelani mosi bakaka na kisalu ya kusamuna, mpi nki dilongi nge lenda baka na masolo ya mutindu yai?

¹⁵ Mameme yankaka mpi kesalaka mingi na kisalu ya Mfumu mpi kepesaka bampangi ya Kristu maboko. (Mat. 25:40) Na kuswaswana ti mpika ya molo ya kingana ya Yezu, bo kendimaka kusala bibansa mpi bikesa ya mingi sambu na kutula mambote ya Kimfumu na kisika ya ntete. Mu mbandu, ntangu bo bingisaka Jon mpi Masako  na kukwenda kusamuna na bantu yina ketubaka kishinwa na insi Kenya, bo vandaka ti baketi-keti na luyantiku. Kansi na nima ya kutadila mambu ya luzingu na bo mpi kusambaka, bo ndimaka kukwenda.

¹⁶ Bo bakaka balusakumunu mingi sambu na bikesa na bo. Bo tubaka nde: “Awa, kisalu ya kusamuna kele kitoko mpenza.” Bo yantikaka kulonguka Biblia ti bantu 7. Na nima, bo bakaka dyaka mambote mingi. Bo tubaka nde: “Konso kilumbu beto kepesaka Yehowa matondo na mutindu yandi pesaka beto nzila ya kukwisa awa.” Ya kyeleka, kele ti bampangi mingi ya babakala mpi ya bankento ya memonisaka na balukanu yina bo mebakaka nde, bo kezola kusala mingi na kisalu ya Nzambi ata nsuka takwisa nki ntangu yina. Yindula mafunda ya bampangi yina mebakaka diplome na Nzo-nkanda ya Gileade mpi kesalaka kisalu ya kimisionere. Nge lenda zaba mwa mambu mingi ya metala kisalu na bo na disolo “Beto Salaka Yonso Yina Beto Lendaka Kusala!” ya kubasikaka na Nzozulu ya Nkengi ya Kifalansa ya Oktobri 15, 2001. Ntangu nge tatanga disolo yai ya kitoko ya ketubila kisalu ya kimisionere, yindula mambu yina nge lenda sala sambu na kudipesa mingi na kisalu ya Nzambi sambu na kukumisa yandi mpi kutomisa kyese na nge.

NGE MPI LANDA NA KUKENGILA

17. Inki mutindu kukonda kuzaba kilumbu to ngunga kele lusakumunu?

¹⁷ Yo kele pwelele nde kukonda kuzaba kilumbu to ngunga ya sikisiki yina ngidika yai tafwa kele lusakumunu sambu na beto. Na kisika ya kuwa boma to kulemba nitu, beto kemonaka nde beto kekwendaka penepene ya Yehowa, Tata na beto ya zola, ntangu beto kekudipesaka ya mvimba sambu na kusala luzolo na yandi. Sambu beto mesimba nsengo mpi ketala ve mambu yina lenda katula dikebi na beto, kisalu ya Mfumu kenatila beto kyese mingi.​—Luka 9:62.

18. Sambu na nki beto kezola ve nde lukwikilu na beto kulemba?

¹⁸ Kilumbu ya kusambisa ya Nzambi mefinama nswalu. Ata muntu mosi ve na kati na beto kezola kusala mambu yina tapesa Yehowa mpi Yezu mawa. Bo mepesaka beto kisalu mosi ya mfunu na bilumbu yai ya nsuka. Beto kele na kyese mingi mpenza mutindu bo ketudilaka beto ntima!​—Tanga 1 Timoteo 1:12.

19. Inki mutindu beto lenda monisa nde beto kele ya kuyilama?

¹⁹ Yo vanda beto kele ti kivuvu ya kuzinga na zulu to na paladisu awa na ntoto, bika nde lukanu na beto kuvanda ya kubikala ya kwikama na kisalu yina Nzambi mepesaka beto ya kusamuna mpi kukumisa bantu balongoki. Tii bubu yai, beto kezaba ve kilumbu to ngunga ya sikisiki yina kilumbu ya Yehowa takwisa. Keti beto kele mpenza na mfunu ya kuzaba yo? Beto fwete landa kumonisa nde beto kele ya kuyilama. (Mat. 24:36, 44) Beto kele ti kivuvu nde, kana beto ketula ntima ya mvimba na Yehowa mpi ketula Kimfumu na yandi na kisika ya ntete, beto talemba ve.​—Roma 10:11.

[Noti na nsi ya lutiti]

[Bangyufula ya disolo ya kulonguka]

[Kifwanisu ya kele na lutiti 26]

Ata na bantangu ya mpasi, sosa madia ya kimpeve

[Kifwanisu ya kele na lutiti 27]

Ntangu kelutaka nswalu kana beto kekudipesa na kisalu ya Nzambi