‘O Kizuua ni Kithangana, ki mu Kijiia’
‘O Kizuua ni Kithangana, ki mu Kijiia’
‘Enu uenu dilangienu-phe, kuma o kizuua ni kithangana ki mu kijiia.’—MAT. 25:13.
KIEBHI KI UEJI TAMBUIJILA?
Mbote iahi i tu tena ku katula mu ku kamba kuijiia o kizuua ni ola ia-nda kuíza o dizubhilu?
Kiebhi kiene mu dilanga o Jikidistá a a undu?
Kiebhi ki tu tena kulondekesa kuila tuala polondo phala o kizuua kia Kristu?
1-3. (a) Ihi ia longo Jezú mu ifika iê iiadi ia bhange? (b) Ibhuidisu iebhi i tua tokala o ku tambuijila?
XINGANEKA kuila o xefe u ku bhinga phala ku mu ambata bhu kididi kia fuma. Maji, ande dia ku bhixila o ola ia ku mu ambata bhu kididi kiki, eie u mona kuila o kazolina ki ka-nda soka phala ku bhanga o njila. Eie uia ni lusolo ku sumba o kazolina phala kuizalesa o dikalu. Kioso ki u tunda, o xefe u bhixila. Muéne u tala ku jimbandu, eie kuala-bhu. Muéne ka tena dingi ku kingila, anga u bhinga muthu uéngi phala ku mu ambata. Kioso ki u vutuka, u mona kuila muéne ua ku xisa. Kiebhi ki ueji divua?
2 Kindala xinganeka kuila eie u xefe, eie ua solo athu kitatu phala ku bhanga kikalakalu kia katunda. Eie u a jimbulula ihi ia tokala o ku bhanga, anga kitatu kiâ a xikina o kikalakalu. Kioso ki u vutuka, eie u sanga kuila kiiadi kiâ a bhange o kikalakalu ki ua tumina. O ua katatu, u zuela se mukonda diahi ka tena ku ki bhanga. Muéne ka fikisa ku bhanga o kikalakalu. Kiebhi ki ueji divua?
3 Mu kifika kiê kia ilumba ni talendu, Jezú ua tange misoso ia difu phala kulondekesa se mukonda diahi, mu thembu ia sukidila-ku saí Jikidistá a a undu eji londekesa kuila jifiiele, a dimuka, maji o a mukuá kana. * (Mat. 25:1-30) Muéne ua jimbulula o pondo íii, mu kuzuela: ‘Enu uenu dilangienu-phe, kuma o kizuua ni kithangana ki mu kijiia’—kiki kieji bhita kioso Jezú kieji bhanga o vondadi ia Nzambi mu ku fundisa o mundu iú ua Satanaji. (Mat. 25:13) Tu tena ku kumbidila o kitendelesu kiki lelu. Mbote iahi i tu tena ku katula se tu dilanga kala kia tu tendelesa Jezú? A nanhi ene mu londekesa kuila ala polondo phala ku bhuluka? Ihi i tua tokala o ku bhanga lelu phala ku dilanga?
KATULA MBOTE MU KU KALA KU MESU A ZELE
4. Mukonda diahi o ku kala ‘ku mesu a zelele’ ki kulombolola ku tala ku dikumbi phala ku mona o kithangana kia kambe?
4 Saí ima i tu bhanga kála o ku kalakala mu inzo ia salu, kuia kua dotolo mba kuia mu kuata o maximbombo, ku bhinga ku bhixila mu ola ia xindi. Sumbala o ikalakalu ia mukuá, kála, o ku jima túbhia, o kikalakalu kia ku bhulula athu a bhiti mu mavuua, o ku tala ku dikumbi, ki tena ku landukisa o muthu mba kiluezu kia dikota. Mu ithangana íii, o kima kia tokala o ku bhanga, o ku di bhakula ngó mu kikalakalu, kana ku tala ku dikumbi. Kuma o dizubhilu dia mundu iú ua iibha, ua zukama, o ku di bhakula mu kikalakalu kia Jihova, kiene kia beta-kota. O ku kala ku mesu a zele, ki kilombolola kuila o Jikidistá a bhinga ku tala ku dikumbi phala ku mona o kithangana kia kambe. Mu kidi, kuala maukexilu atanu mu tu tena ku katula mbote mu ku kamba kuijiia o kizuua ni kithangana kia-nda kuíza o dizubhilu.
5. Kiebhi o ku kamba kuijiia o kizuua ni kithangana, ki tu kuatekesa kuijiia kiebhi kiala o muxima uetu?
5 Kia dianga, o ku kamba kuijiia o kizuua kia-nda kuíza o dizubhilu, ki tu bhana kithangana kia kuijiia kiebhi kiala o muxima uetu. Mu kidi, o ku kamba o kuijiia o kithangana, ku tu bhana ujitu ua dikota, ki tu kuatekesa ku kala ni unjimu mu ufôlo uetu ua ku sola, ni kulondekesa o ufiiele uetu kua Jihova. Sumbala tua kingila ku bhuluka ku hádia kioso kia-nda buika o mundu iú, ki tua mu sidivila ngó Jihova, mukonda tua mesena muenhu, maji mukonda tua mu zolo. (Tanga Jisálamu 37:4.) Tua sanguluka mu ku bhanga o vondadi iê, mukonda tuejiia kuila Nzambi ua mu tu longa phala o mbote ietu. (Iza. 48:17) Etu ki tuene mu mona kuila o itumu iê, ia neme.—1 Nzu. 5:3.
6. Kiebhi ki divua Nzambi se tu mu sidivila ni henda, ni mukonda diahi?
6 Kaiiadi, o ku kamba kuijiia o kizuua ni kithangana, ki tu bhana kithangana kia ku sangulukisa o muxima ua Jihova. Se tu mu sidivila ni henda—ki mukonda dia kizuua mba mukonda dia mabesá—tu kala ku mbandu ia Jihova mu ku tambuijila o kitateku kia bhange o nguma iê Satanaji. (Jobe 2:4, 5; tanga Jisabhu 27:11.) Mu ku mona o ndolo ioso ni hadi iene mu bheka Diabhu, tu sanguluka kiavulu mu ku kuatekesa o ungana ua Jihova ni ku dituna o sobha ia iibha, Satanaji.
7. Mukonda diahi eie ua mesena ku di bhakula mu sidivisu ia Nzambi ni ku kuatekesa akuenu?
7 Katatu, o ku sidivila Nzambi se ku banza mu kizuua, ki tu kuatekesa ku kala ni ukexilu uambote. Saí iá kejiia Nzambi, ejiia uá kuila o mundu iú ki ua-nda nangenena katé ku hádia, kála ki tua xikina etu. Mukonda dia ku kala ni uôma ua divuua dia-nda kuíza, ene a kala ni ukexilu ua kuila, ‘tu dienu-tu, tu nuenu-tu, mukonda mungu tua-nda kufu’etu.’ (1 Kol. 15:32) Maji etu ki tuala ni uôma. Ki tuene mu diunga mu ku bhanga o jivondadi jetu. (Jisa. 18:1) Mu veji dia kiki, tu dituna o ku di banza mudietu, tu ngastala o kithangana kietu, o thembu ietu ni jimbote jetu phala ku tula o njimbu iambote ia Utuminu ua Nzambi ku akuetu. (Tanga Matesu 16:24.) Tua sanguluka mu ku sidivila Nzambi, bhenge-bhenge mu ku kuatekesa akuetu o ku muijiia.
8. Phangu iebhi ia Bibidia ilondekesa kuila tua tokala ku dielela kua Jihova ni mu Maka mê?
8 Kauana, o ku kamba kuijiia o kizuua ni kithangana, ki tu kuatekesa ku dielela dingi kua Jihova ni ku kumbidila o Maka mê ku muenhu uetu. O ukexilu uetu ua ituxi, u tu bhangesa ku di dielela mu dietu. Phaulu ua tendelesa o Jikidistá joso: “Uoso ua di fika kuila uemana, a di lange phala ka di bhale.” Makuinhi a iiadi ni kitatu kia midi, a batula o ukamba uâ ni Jihova ande dia Josuué kuambata o mundu ua Nzambi mu Ixi ia a Kanena. Phaulu uambe: “Ima ien’iii-phe a i soneka phala ku tu dimuna etu. Mukonda tuala mu kithangana kia kuila o dizubhilu dia jithembu dia zukama kiá.”—1 Kol. 10:8, 11, 12.
9. Kiebhi o izukutisu i tena ku kolesa o kixikanu kietu ni ku tu zukamesa kua Nzambi?
9 Katanu, o ku kamba kuijiia o kizuua kia-nda bhixila o dizubhilu, kia-nda tu kuatekesa ku mona se tuala muene polondo. (Tanga Jisálamu 119:71.) O izuua isukidila-ku ia mundu iú, ‘jithembu ja bhonzo.’ (2 Tim. 3:1-5) Athu avulu ku mundu ua Satanaji, a tu zembe, a tu zukutisa mukonda dia kixikanu kietu. (Nzu. 15:19; 16:2) Se tu londekesa o ku lenduka ni ku sota o itendelesu ia Nzambi mu ithangana ia ibhidi, o kixikanu kietu kia-nda kola dingi, kála ki bhanga o túbhia ku felu. Etu ki tua-nda bhuila kana. Mu veji dia kiki, tua-nda zukama dingi kua Jihova.—Tiia. 1:2-4; 4:8.
10. Ihi i bhangesa o thembu ku bhita ni lusolo?
10 O thembu i bhita ni lusolo. Kioso ki tu di bhakula mu sidivisu, mu veji dia ku tala ku dikumbi ithangana ioso, ki tu mona o kithangana ku bhita. Kiene kimoxi ué se tu di bhakula mu sidivisu ia tu bhana Jihova, o kizuua ni kithangana kia-nda bhixila sé muene etu ku kijiia. Mu maka enhá, o Jikidistá a a undu ene mu bhana phangu iambote. Tua-nda bhitulula ihi ia bhiti kioso Jezú kia mu tumbika ku Usobha ku muvu ua 1914 ni ku mona kiebhi o Jikidistá a a undu akexile polondo, a mukuá kana.
O JIKIDISTÁ A A UNDU ALONDEKESELE KUILA AKEXILE POLONDO
11. Mu ku bhita o muvu ua 1914, mukonda diahi saí Jikidistá a a undu a banzele kuila o Ngana ua kexile mu laleka?
11 Xinganeka o kifika kia Jezú kia lungu ni ilumba, ni jitalendu. Se o ilumba mba o jiselevende ja kifika ejidile o kizuua kieji kuíza dibhanga mba mesene iâ, ene ka bhingile ku di langa. Maji ene ka ki fikile, mukonda dia kiki a tokalele ku kala polondo. Sumbala o athu a a undu kiá ukulu a kingile o muvu ua 1914, ene kejidile ihi ieji bhita. Kioso kia kambe o ku bhita o ima ia kingile, saí Jikidistá a a undu a banze kuila o Dibhanga ua kexile mu laleka. Saí phange uambe: “Saí iá bhu kaxi k’etu, a fikile kuma tueji banda ku diulu mu semana ia dianga ku mbeji ia Kamusasadi ka muvu ua 1914.”
12. Kiebhi kia londekesa o Jikidistá a a undu kuila exile jifiiele?
12 Xinganeka o ku luuala kua Jikidistá akexile mu kingila o dizubhilu, maji o dizubhilu ki diejile! O jiphange a a zukutisa kiavulu kioso kia bhiti o Ita ia Dianga ku bhita ku Mundu. Ene ka kexile mu boka, kia difuangana kala akexile mu kilu. Maji ku muvu ua 1919, a a balumuna! Jezú ua bhixile mu tembulu ia Nzambi, kiexile ué o kithangana kia ku a tonginina kiambote. Maji saí iá akexile mu zeka, a texile o ujitu uâ ua ku bhanga o “kikalakalu” kia Sobha. (Mat. 25:16) Kiki kia londekesa kuila ene kezalesele o tundeia tuâ ni máji mu nzumbi, kála o ilumba ia tobhele mu kifika kia Jezú. Kála o mubhika uexile kimonha, ene ka kexile ni vondadi ia ku suína mu sidivisu ia Utuminu. Maji saí Jikidistá a a undu alondekesa kuila a mesenene ku sidivila o Mesene iâ, né muene mu ithangana ia ita.
13. Ihi ia bhange o kibuka kia Jikidistá a a undu kioso kia bhiti o muvu ua 1914, ni ihi ia mu bhanga lelu?
13 Kioso kia bhiti o muvu ua 1914, mu Mulangidi mu kingileji mua kexile ngolokela iambele: “O jiphange bhu kaxi k’etu a zolo Nzambi, ka luuala mu ima ia mu bhanga Nzambi. Ki tu mesena kuila o vondadi ietu iene i kala ku pholo; mu kiki, kioso ki tua mono kuila tua kexile mu kingila kima ki kiexile kia vondadi ia Nzambi, ku mbeji ia Kamusasadi ku 1914, tua sangulukile mu ku mona kuila o Ngana ka lungulula o kima kia mesenene o ku bhanga phala ku tu sangulukisa. Ki tu mesenene kuila Muéne u lungulula. Tua mesenene ku tendela o vondadi Iê.” O ukexilu iú ua ku lenduka, tuene hanji mu ku u mona ku Jikidistá a a undu kua Ngana. Ene ka bhange ngolokela ia kuila a a undu, maji a mu kolokota ku bhanga o “kikalakalu” kia Ngana mu ixi. Lelu, o “mundu uavulu” o ‘jimbudi ja mukuá’ a kingila ku kala mu ixi, a kaiela o ukexilu ua Jikidistá a a undu, ua ku dilanga ni ku suína kuâ mu sidivisu ia kuboka.—Dij. 7:9; Nzu. 10:16.
TU LONDEKESA KUILA TUALA POLONDO
14. Kiebhi ki tu langa o ku belesela o kibuka kia solo Nzambi mu ixi, kiene mu tu bhana o kudia mu nzumbi?
14 O mundu uavulu a tokala ku belesela o kibuka kia solo Nzambi mu ixi, ki tu bhana o kudia mu nzumbi. O ku bhanga kiki, kia difu ni kuizalesa o tundeia tuâ ni máji a Mak’â Nzambi mu ukexilu ua nzumbi. (Tanga Jisálamu 119:130; Nzuá 16:13.) O ku suína kuâ kulondekesa kuila ala polondo phala o kizuua kia-nda kuíza Kristu, a mu kolokota, né muene ni ibhidi iavulu. Mu kifika, mu ikoka ia jikaleia ja nazista, o jiphange kuenhoko akexile ngó ni Bibidia imoxi. Kienhiki, ene a sambe phala n’a tambule dingi kudia mu nzumbi. Mu ku bhita kithangana, evu kuila saí phange a mu te mu kaleia, ua bokona ni Mulangidi mu kingileji ia suekele mu kinama kiê kia muxi. Bhu kaxi ka athu a bhuluka, bhua kexile phange a mu undu, a mu ixana Ernst Wauer, uambe: “Jihova ua tu kuatekesa ku bhaka o milongi ia mulangidi mu kilunji kietu.” Anga u zuela dingi: “Mu izuua ietu ki ki bhonzo ku kala ni kudia mu nzumbi, maji o kuila tua mu u bhana valolo? Ngejiia kuila Jihova ua bhake mabesá avulu phala oso a mu dielela, a kolokota mu ufiiele, a mudia ku meza mê.”
15, 16. Dibesá diahi dia tambula o dikaza didi mu sidivisu ia Nzambi ni ihi i u tena ku di longa mu misoso iâ?
15 O jimbudi ja mukuá a di bhakula uá mu kikalakalu kia Mesene, mu ku kuatekesa o jiphange ja Kristu. (Mat. 25:40) Ene ka bhanga kála kia bhange o mubhika ua iibhila, ua tobhele mu kifika kia Jezú, ene ala polondo phala ku bhanga ioso, ku bhana o thembu iâ mu ku ta ku pholo o kikalakalu kia Utuminu ua Nzambi. Mu kifika, kioso phange ietu ia diiala Jon, ni muhatu uê Masako, a exana phala ku kuatekesa mu dimi dia Chinese mu ixi ia Quênia, ku dimatekenu akexile ni hele. Maji kia zubha o ku samba, ene a xinganeka kiambote, ia xikina o kuia mu kuatekesa.
16 Ene a a besoala kiavulu mu nguzu ia bhange. Ene ambe: “O ukunji mu kididi kiki u tu sangulukisa kiavulu.” Ene akexile mu longa o Bibidia ku sambuadi dia athu. Akexile ni misoso iavulu phala ku tanga. Ene ambe dingi, “tua sakidila Jihova izuua ioso mu ku tuehela kuíza bhu kididi kiki.” Mu kidi, phange javulu ja ahatu ni ja mala ene mu londekesa o ku suína kuâ kuila a di bhakula mu sidivisu ia Nzambi, né muene se o dizubhilu diza mu kithangana kieniókio. Xinganeka mu jimidi ni jimidi ja jiphange a di longo mu Xikola ia Ngiliiade ala mu sidivisu ia akunji mu jixi jengi. Mukonda diahi ki u di longe ia lungu ni sidivisu íii ia katunda mu ku tanga o milongi, exi: “Fazemos o Melhor que Podemos!” mu Mulangidi ua 15 ua Kamusasadi ua 2001? Kioso ki uia ni ku tanga o misoso íii iambote, xinganeka mu kikalakalu ki bhanga o akunji mu ixi iéngi ku kizuua, xinganeka mu maukexilu a tena ku ku kuatekesa ku bheza kiambote Nzambi, ni mu kisangusangu ki bheka o sidivisu íii.
EIE UÉ UA TOKALA U DILANGA
17. Kiebhi o ku kamba kuijiia o kizuua mba o kithangana, ki tu bhekela dibesá?
17 Mu kidi, o ku kamba kuijiia o kizuua ni kithangana kia-nda buika o mundu iú ua iibha, kiene mu tu bhekela mabesá avulu. Mu veji dia ku luuala, tu zukama dingi kua Jihova, o Tata ietu ia henda, kioso ki tu suína dingi mu ku bhanga o vondadi iê. O ku kuata ku ditemu, kia difuangana kueha o ukexilu ua ku landuka, ku tu bhekela kisangusangu kiavulu mu sidivisu ia Mesene ietu.—Luk. 9:62.
18. Mukonda diahi tua mesena ku kolesa dingi o kixikanu kietu?
18 O kizuua kia kufundisa kia Nzambi kia zukama. Se-ku muthu mudietu ua mesena ku luualesa Jihova mba Jezú. Ene a tu bhana ujitu ua dikota ua ku mu sidivila mu izuua íii ia sukidila-ku. Tua sakidila kiavulu mu ku tu dielela!—Tanga 1 Timote 1:12.
19. Kiebhi ki tu tena kulondekesa kuila tuala polondo?
19 Né muene se tua kingila kuia ku diulu mba ku kala mu Palaízu mu ixi, tu kolokote ku kala fiiele mu kikalakalu kietu kia tu bhana Nzambi, kia ku boka ni ku bhanga maxibulu. Ki tuejiie’tu luua o kizuua mba o ola ia-nda kuíza o kizuua kia Jihova, maji o kuila tua tokala muene kuijiia? Tua tokala kuijiia ni kulondekesa kuila tuala polondo phala o kizuua kiki. (Mat. 24:36, 44) Tuejiia kuila se tu dielela kua Jihova, tu ta ku pholo o Utuminu uê, ki tua-nda luuala kana.—Lom. 10:11.
[Tanga mu luji]
^ kax. 3 Tanga O Mulangidi ua 1 ua Katanu ua 2004, mu jimbandu ja 14-18, mu phutu.
[Ibhuidisu ia ku dilonga]
[Foto ku mbandu 26]
Né muene mu ithangana ia bhonzo, sota o kudia mu nzumbi
[Foto ku mbandu 27]
O thembu i bhita ni lusolo kioso ki tu di bhakula mu ku bhanga o kikalakalu kia Nzambi
