“Ke Nuzeye e Lumbu ko Ngatu ola”
“Ke Nuzeye e Lumbu ko Ngatu ola”
“Dianu vo, nuyingila, kadi ke nuzeye e lumbu ko ngatu ola.”—MAT. 25:13.
NKIA MVUTU OVANA?
Nkia nluta tuvwanga muna lembi zaya lumbu ngatu ola yambaninu?
Akuswa aweyi bekwamanenanga yingila?
Nkia mpila tulenda songela vo twakubama mu kuma kia ngiz’a Kristu?
1-3. (a) Nkia nona ilenda kutusadisa mu bakula yingana yole katá Yesu? (b) Nkia yuvu tufwete vanina mvutu?
YINDULA vo nyadi mosi ulombele wenda kumfila ku lukutakanu lwamfunu. Vava ovaika muna kwenda kumbaka kuna nzo andi, obakwidi vo ekalu ke dina ye mazuti mafwana ko muna vanga nkangalu. Vava ovaika mu nzaki zawonso mu kwenda sumba mazuti, o mfumu osidi vinga. Uvavidi, kansi kamwene ko. Vana fulu kia kuvingila, obokele muntu akaka kenda kumfila. Vava ovutuka, obakwidi vo mfumu wele yo muntu akaka. Aweyi omona?
2 Owau yindula vo ngeye u mfumu, osolele wantu atatu azikuka yo kubavana salu kiamfunu. Ubasasidi una kifwete sadilwa, awonso batambulwidi. Kansi, vava ovutuka omwene vo wantu wole kaka basadidi salu. Mosi ovavidi vakuba muna songa e kuma kalembi sadila salu. Kavangidi konso diambu ko. Aweyi wadi mona?
3 Muna kingana kiandi kia ndumba kumi ye talanta, Yesu wasadila nona yayi muna songa e kuma Akristu akaka akuswa bezindalala ye kwikizi muna lumbu yambaninu, kansi akaka ke bezindalala ko. * (Mat. 25:1-30) Muna toma songa e ziku kia diambu diadi, Yesu wavovesa alongoki andi vo: “Dianu vo, nuyingila, kadi ke nuzeye e lumbu ko ngatu ola.” Yesu lumbu ye ola kefwasa e nza ya Satana kayika. (Mat. 25:13) Yeto mpe tufwete sadilanga luludiku lwalu. Nkia nluta tuvwa avo tukwamanana yingila nze una Yesu katukasakesa? Aki nani besonganga vo bakubama muna vuluka? Adieyi tufwete vanga owau muna kwamanana yingila?
NLUTA MIA KWAMANANA YINGILA
4. Muna kwamanana ‘yingila’ ke divavanga ko vo twazaya lumbu ye ola yilwaka e mbaninu, ekuma?
4 Salu yayingi yivavanga vo twazitisa e ntangwa yasikidiswa, nze ntangwa yayantika sala, ntangw’a lwaka kwa dotolo ye fulu kia bakila ekumbi dia ntoto. Kansi, e salu yakaka nze zima tiya, vuluza wantu babwididi sumbula, ke yisikidisilwanga ntangwa ko. Otokanena e ntangwa muna salu yayi dilenda vunzanesa ngindu za muntu yo twasa mfwilu. Muna salu yayi, diambote mu sia sungididi muna salu ke mu ntangwa ko. Ekolo mbaninu a nza yayi yifinamanga, e salu kakubika Yave muna vuluza wantu, i salu kisundidi o mfunu owau ke mu salu yakaka ko. Muna kwamanana yingila ke divavanga ko vo twazaya lumbu ye ola yilwaka e mbaninu. Dialudi, olembi zaya lumbu ngatu ola ilwaka e mbaninu, dikutusadisanga mu mpila tanu.
5. Olembi zaya lumbu ngatu ola yikwiza mbaninu, aweyi dilenda sengomona makani ma ntim’eto?
5 Yantete, olembi zaya e lumbu ngatu ola yikwiza e mbaninu dilenda kutusadisa mu sengomona makani ma ntim’eto. Dikutusadisa mpe mu toma sadila o nswa wa kuyisolela yo songa kwikizi kieto kwa Yave. Kana una vo tuna ye vuvu kia vuluzwa muna mbaninu a nza yayi, ke mu kuma kia vwa moyo ko tusadilanga Yave, kansi mu kuma kia zola. (Tanga Nkunga 37:4.) Tuyangalalanga vanga luzolo lwandi yo zaya vo Nzambi okutulonganga muna wete dieto. (Yes. 48:17) Ke tubadikilanga nsiku miandi ko vo miampasi.—1 Yoa. 5:3.
6. Aweyi Nzambi kemonanga vava tukunsadilanga muna zola? Ekuma?
6 Yazole, olembi zaya e lumbu ngatu ola yikwiza e mbaninu, dikutuvananga elau dia yangidika ntim’a Yave. Ekolo tukunsadilanga muna zola, ke mu kuma kia lumbu ko ngatu nsendo una tutambula, Yave ovananga mvutu zasikila kwa Satana wa mbeni andi ona okunsembanga. (Yobi 2:4, 5; tanga Ngana 27:11.) Muna kuma kia ntantu ye mpasi zitwasanga mavangu ma Nkadi ampemba, tuyikamanga kimfumu kia Yave yo bembola luyalu lwambi lwa Satana.
7. Kuyivana kuna mvevo mu sadisa akaka ekuma ditwasilanga kiese?
7 Yatatu, olembi zaya lumbu ngatu ola yikwiza mbaninu, dikutusadisanga muna sadila Yave kuna mvevo. O unu, akaka mpe ana ke bazeye Nzambi ko bekwikilanga vo e mbaninu a nza yayi ifinamene. Muna kuma kia wonga wa lufwasu lulenda kubalwakila, bevovanga vo: “Tudia, tunua, kadi mbazi tufwa.” (1 Kor. 15:32) Kansi, yeto ke tuna ye wonga ko. Muna lembi vukumunwa muna zolela ya yeto kibeni, tuvenganga fu kia kuyivaula. (Nga. 18:1) Tukuyivaninanga nkalu yo sadila ntangw’eto, ngolo ye mavwa meto kuna mvevo mu samuna e nsangu zambote za Kintinu kw’akaka. (Tanga Matai 16:24.) Tuyangalalanga sadila Nzambi, musungula vava tusadisanga akaka kimana banzaya.
8. Nkia nona kia Nkand’a Nzambi kisonganga vo tufwete bundanga e vuvu kwa Yave yo lemvokela nkanikinu mia Nkand’a Nzambi?
8 Diayá, olembi zaya lumbu ngatu ola yikwiza mbaninu, dikutusadisanga mu toma bunda Nzambi e vuvu yo lemvokela nkanikinu mia Nkand’a Nzambi muna zingu kieto. Muna kuma kia usumuki weto, tukalanga ye fu kia kuyibunda e vuvu. Paulu walukisa Akristu awonso vo: “Ndion’obenze vo telama ketelama, mbula katoma tala kàbwa.” Vava nkangu a Nzambi bafinama kota muna Nsi a Nsilu, 23.000 ma Aneyisaele bakolamena Yave yo fwa. Paulu wavova vo: “Omama mun’elongi mababwidila; masonamena muna lutemweno lueto, oyeto tuluakilu kwa nsuka za tandu.”—1 Kor. 10:8, 11, 12.
9. E mpasi aweyi zilenda kumikina lukwikilu ye ngwizani eto yo Yave?
9 Yatanu, olembi zaya lumbu ngatu ola yikwiza mbaninu, dikutusadisanga mu yambula vo mpasi tumonanga owau za kumika lukwikilu lweto. (Tanga Nkunga 119:71.) Dialudi, e lumbu yambaninu ya tandu kiaki yampasi kikilu. (2 Tim. 3:1-5) Wau vo ndonga bekutumenganga mu nza yayi ya Satana mu kuma kia lukwikilu lweto, bekutubangikanga. (Yoa. 15:19; 16:2) Avo tuyisakidikidi yo landa luludiku lwa Nzambi vava tubangikwanga, lukwikilu lweto lukumama. Ke tuyoya ko. Ngwizani eto yo Yave itoma kumama.—Yak. 1:2-4; 4:8.
10. Aweyi ntangwa ilenda viokela mu nzaki?
10 Ntangwa ilenda vioka nzaki yovo malembe. Avo tuyivene emvimba muna salu yo lembi tokanena ola, e ntangwa mu nzaki ivioka. Diau adimosi mpe, avo tuyivene emvimba muna salu katuvana Yave, ke tutokana ko mu kuma kia lumbu kia mbaninu. Akristu ayingi akuswa mbandu ambote besonganga muna diambu diadi. Yambula twabadika dina diabwa muna mvu a 1914 vava Yesu kayadikwa se Ntinu. Tumona una akaka muna yau bawanukina bakubama ekolo akaka balembi kubama.
AKUSWA BESONGANGA VO BAKUBAMA
11. Ekuma akaka bayindulwilanga vo muna mvu a 1914 o Mfumu womboka kawomboka?
11 Sungamena e kingana kia Yesu kia ndumba ye talanta. Kele vo ndumba yovo ntaudi muna kingana kiaki bazaya lumbu kadi lwaka etoko dia nsopi yovo mfumu, ke badi vwa mfunu wa lungalala ko. Kansi, wau vo ka bazaya lumbu kiakina ko, diavavanga vo bakubama yo lungalala. Kana una vo Akristu akuswa tuka kolo bazaya wo vo diambu diamfunu dibwa muna mvu wa 1914, kansi ke batoma bakula ko kana nkia diambu dibwa. Vava diambu diabwa ke mu mpila ina bavingilanga ko, akaka muna yau bayindulanga vo Yesu womboka kawombokanga. Mpangi mosi wasungamena vo: “Akaka muna yeto twayindulanga vo muna lumingu lwantete lwa ngonde a Okutoba ya mvu a [1914] tusinga tomboka kun’ezulu.”
12. Akuswa aweyi basongela kwikizi yo lulungalalu?
12 Yindula ntantu dilenda twasa mu vingila e mbaninu, kansi ke yizidi ko. Vana ntandu, ampangi bawanana ye ntonta za Vit’Antete ya Nz’Amvimba. E salu kia samuna nsangu zambote kia ningama. Kansi, muna mvu a 1919 akuswa basikama vava Yesu kalwaka mu kingula tempelo ya Nzambi ya mwanda. Yesu wamona vo akaka muna yau ka bafwana ko, muna kuma kiaki bavidisa elau dia kwamanana sala e ‘salu’ kia Ntinu. (Mat. 25:16) Nze ndumba za mazowa, ke basia sungididi ko kia nata mazi makaka ma mwanda. Nze ntaudi wa molo, ke bakala ye luzolo ko lwa kuyivana kuna mvevo muna salu kia Kintinu. Kana nkutu muna mpasi za vita, ndonga muna akuswa basikila ye kwikizi ye luzolo lwa sadila Mfumu au.
13. Nkia ngindu bakala zau akuswa vava kiavioka mvu a 1914? Nkia ngindu bena zau o unu?
13 Vava kiavioka mvu a 1914, Eyingidilu diavova vo: “Ampangi, ndonga mu yeto tuna ye nyindu asikila mu kuma kia Nzambi ke tulendi dimbula vuvu ko muna kuma kia nkubika zandi. Ka tuzolele ko vo luzolo lweto lwavangama; muna kuma kiaki, vava twabakula vo dina twavingilanga muna ngonde a Okutoba ya mvu wa 1914 ke diasikila ko, twayangalela wau vo o Mfumu kasoba Nkubika Andi ko kimana yakala betela ye ngindu zeto. Ka tuzolele ko vo kavanga wo. Kansi, tufwete bakula nkubika ye makani mandi.” Akuswa bakinu songa lulembamu y’etima dia vanga luzolo lwa Nzambi. Ke bevovanga ko vo bavumunwinwa, kansi bena y’ekani dia kwamanana sala e salu kabavana Yesu va ntoto. Owau, “ndong’ayingi” ya “mameme makaka” i sia vo Akristu bena ye vuvu kia zingila va ntoto, betangininanga lulungalalu yo vema kwau.—Lus. 7:9; Yoa. 10:16.
SE NUKUBAMA KWENO
14. Ekuma tufwete yikamenanga buka kia ntaudi akwikizi yo lulungalalu eki kesadilanga Nzambi muna kutuvana madia ma mwanda?
14 Nze una bevanganga Akristu akuswa, ndong’ayingi y’alungaladi beyikamanga buka kia ntaudi akwikizi yo lulungalalu kasola Nzambi muna vananga madia ma mwanda kwa nkangu andi. Ekolo bevanganga wo, dikalanga nze yau belundanga mazi ma mwanda mu kuma kia mini yau, i sia vo Diambu dia Nzambi yo mwand’andi. (Tanga Nkunga 119:130; Yoane 16:13.) Ediadi dikubakumikanga yo toma kubama mu kuma kia ngiz’a Kristu yo sala y’etima diawonso kanele vo bebangikwanga. Kasikil’owu, ampangi muna pelezo ya esi Nazi, Nkand’a Nzambi umosi kaka bakala wau. Muna kuma kiaki, basamba kimana bavwa diaka madia mayingi ma mwanda. Ke kolo ko, bawá vo mpangi mosi wampa ona wasiwa mu pelezo, muna ndekwa zawonso wasweka ma Eyingidilu mampa muna kulu kwandi kwa nti. Mosi muna awana basala yo moyo i mpangi Ernesto Vauer ona wakala Nkristu akuswa, wavova vo: “Yave watusadisa mu mpila esivi mu sungamena malongi ma lukasakeso makala muna nkanda miamina.” I bosi, wavova diaka vo: “O unu diasazu mu vwa madia ma mwanda, kansi nga tuyangalelanga mo ntangwa zawonso? Ngina ye vuvu vo Yave nsambu zayingi kelundilanga awana bekumbundanga e vuvu yo zizidila ye kwikizi yo dila vana meza mandi.”
15, 16. Yakala dimosi yo nkaz’andi bena vo Akristu akwa vema aweyi basambulwilwa? Adieyi lenda longoka muna nona kiau?
15 Mameme makaka bekuyivananga mpe muna salu kia Mfumu yo yikama mpangi za Kristu una ufwene. (Mat. 25:40) Nswaswani ye ntaudi ambi wa molo muna kingana kia Yesu, mameme makaka bekuyivananga kuna mvevo yo sia salu kia Kintinu va fulu kiantete muna zingu kiau. Kasikil’owu, vava Jon ye Masako bavoveswa vo benda sadisa wantu bevovanga ndinga Chinês kuna Quênia, kuna lubantiku lukatikisu bakala lwau. Kansi, vava basamba yo fimpa e zingu kiau, babaka nzengo za kwenda kuna Quênia.
16 Batoma sambulwa muna ngolo bavanga. Bavova vo: “Diakiese mu sala e salu kia umbangi ku Quênia.” Bayantika longoka Nkand’a Nzambi yo wantu nsambwadi. Mambu mayingi makiese bawanana mau. Kuna mfoko bavova vo: “Lumbu yawonso tuvutulanga matondo kwa Yave wau katuvana elau dia kwiza mu nsi yayi.” Dialudi, vena ye mpangi zayingi befimpanga zingu kiau yo baka nzengo za kuyivana emvimba muna salu kia Nzambi ekolo mbaninu ke yalweke ko. Yindula mpangi zayingi ana bekotanga muna sikola ya Ngiladi yo kuyivana muna salu kia missionario. Olenda tanga mambu malukasakeso mu kuma kia salu kiaki muna Eyingidilu dia 15 kia ngonde a Okutoba, 2001, mun’elongi dina ye ntu a diambu vo, “Fazemos o melhor que podemos!” Ekolo otanga elongi diadi divovelanga zingu kia mpangi bena muna salu kia missionario, yindula una olenda wokesela salu kiaku muna kembelela Nzambi ye kiese dilenda kutwasila.
YENO MPE NUYINGILA
17. Nkia nsambu tuvwanga wau tulembele zaya lumbu ngatu ola yikwiza e mbaninu?
17 Dialudi, olembi zaya lumbu kia mbaninu a nza yayi, nluta miayingi dikututwasilanga. Vana fulu kia dimbula vuvu, tuvanganga wawonso muna finama Yave wa S’eto anzolwa yo kuyivana emvimba muna vanga luzolo lwandi. Ekolo tusianga sungididi kia sala e salu katuvana Yesu yo venga mambu malenda kutuvunzanesa, tuna ye zingu kiakiese muna sadila Yave.—Luka 9:62.
18. Ekuma tufwete kwamanana ye kwikizi muna salu kia Nzambi?
18 E lumbu Nzambi kesinga fwasa nza yayi kifinamene. Ka vena muntu ko mu yeto zolele kendeleka Yave ngatu Yesu. Salu kiamfunu batuvana mu lumbu yayi yambaninu. Tufwete vutulanga matondo muna vuvu bekutubundanga.—Tanga 1 Timoteo 1:12.
19. Aweyi tulenda songela vo twakubama?
19 Diakala vo vuvu kia zingila kun’ezulu tuna kiau yovo mu paradiso va ntoto, yambula twakala y’ekani dia kwamanana ye kwikizi muna salu kia samuna nsangu zambote yo kitula wantu s’alongoki katuvana Nzambi. Ka dina mfunu ko mu zaya lumbu ngatu ola ikwiza lumbu kia Yave. Tufwete kala wakubama yo kwamanana yingila. (Mat. 24:36, 44) Ekolo tubundanga Yave e vuvu yo sia Kintinu kiandi va fulu kiantete, tukala ye ziku vo ke tufusuka nsoni ko.—Roma 10:11.
[Mvovo Vana Yand’a lukaya]
^ tini. 3 Tala Eyingidilu dia 1 Malusu 2004, lukaya lwa 14-18 muna kimputu.
[Yuvu ya Longoka]
[Foto ina muna lukaya lwa 26]
Kana nkutu mu ntangw’ampasi, vava madia ma mwanda
[Foto ina muna lukaya lwa 27]
Vava tukuyivananga muna salu kia Nzambi e ntangwa nzaki iviokanga
