“Ha mu Zibi Lizazi Kamba Nako”

“Hakulicwalo, mu zwelepili ku tona kakuli ha mu zibi lizazi kamba nako.”—MAT. 25:13.

MU KONA KU ALABA CWAÑI?

Ki mwa linzila mañi mo lu fumana tuso ka ku sa ziba lizazi kamba nako ya ku fela kwa lifasi le?

Bakreste ba ba tozizwe ba zwezipili cwañi ku tona?

Ki mwa linzila lifi mo lu kona ku bonisa kuli lu itukiselize mafelelezo a lifasi le?

1-3. (a) Ki mitala mañi ye kona ku lu tusa ku utwisisa litaba ze lu ituta mwa linguli ze peli za Jesu? (b) Ki lipuzo mañi ze lu tokwa ku alaba?

MU NAHANE kuli likwambuyu la muuso li mi kupa kuli mu li matiseze kwa sibaka se siñwi ka ku itusisa mota ili ko li tokwa ku yo peta nto ye ñwi ya butokwa. Mizuzunyana pili mu si ka yo li bitula kale fa sibaka se ne mu lumelelani, mu lemuha kuli mwa mota ya mina ha ku na hande mafula. Mwa mata kuli mu yo beya mafula. Likwambuyu ha li fita li fumana kuli ha mu yo fateñi. La talima kafa ni kafa kono ha li mi boni. Bakeñisa kuli likwambuyu leo ha li koni ku mi libelela, li kupa mutu yo muñwi kuli a li matiseze ko li ya ka ku itusisa mota. Nakonyana feela ku zwa fo, ni mina mwa fita ni ku fumana kuli likwambuyu leo li mi siile. Mu ka ikutwa cwañi?

² Mu nahane kuli mu likwambuyu. Mu si ka tama kale musipili, mwa keta baana ba balaalu kuli ba mi petele musebezi wa butokwa. Mwa ba taluseza ze mu bata kuli ba eze mi kaufela bona ba itumelela kuli ba ka eza musebezi wo. Kono ha se mu kutile mu to fumana kuli ba ba ezize musebezi ki ba babeli feela. A li muñwi ya palezwi ku eza musebezi u fa mabaka a ku ikemela. Mane naa si ka lika nihaiba hanyinyani ku eza musebezi. Mu kona ku ikutwa cwañi?

³ Mitala ye lu nyakisisize ya swana ni linguli ze peli za Jesu, ili nguli ya basizana ni nguli ya litalenta. Bubeli bwa linguli zeo li talusa za nako ya mafelelezo mi li bonisa libaka Bakreste ba bañwi ba ba tozizwe ha ne ba ka sepahala ni ku ba ni kutwisiso ni libaka ba bañwi ha ne ba si ke ba eza cwalo. * (Mat. 25:1-30) Jesu naa koñomekile ze lu ituta mwa linguli ze ka ku bulela kuli: “Hakulicwalo, mu zwelepili ku tona kakuli ha mu zibi lizazi kamba nako.” Jesu naa talusa kuli balutiwa ba hae ne ba si ke ba ziba nako luli fa naa ka sinyeza lifasi la Satani. (Mat. 25:13) Ni luna lu swanela ku “zwelepili ku tona.” Ki kabakalañi ha lu swanela ku  zwelapili ku tona sina mwa naa bulelezi Jesu? Ki bo mañi ba ba zwezipili ku tona? Mi lu swanela ku ezañi kuli lu zwelepili ku tona?

LIBAKA KU ZWELAPILI KU TONA HA KU LI KO KUNDE

4. Kuli lu zwelepili ku tona, ki kabakalañi ha lu sa tokwi ku ziba luli fa ka tela mafelelezo?

⁴ Fokuñwi ki kwa butokwa ku ziba nako luli. Ka mutala, haiba mu sebeza mwa kampani ye ñwi, kamba haiba mu tokwa ku yo bonana ni dokota, kamba mu bata ku yo kwela mbasi kamba sitima, mu swanela ku ziba nako luli kuli mu si ke mwa liyeha. Kono mutu ya tima mulilo o yambile kwa sibaka se siñwi kamba ya yangwela mutu yo muñwi hasamulaho wa kozi, ha swaneli ku zwelapili ku talima fa nako. Ku eza cwalo ne ku ka tahisa kozi ye tuna. Mwa miinelo ye cwalo, ki kwa butokwa hahulu ku isa pilu kwa musebezi ku fita ku ziba kuli ki nako mañi. Ka nzila ye swana, musebezi wa luna wa ku kutaza u tusa batu ku ituta za ezize Jehova kuli a pilise batu. Musebezi wo ki wa butokwa hahulu sihulu ka nako ya cwale kakuli mafelelezo a lifasi le a sutelezi. Kuli lu zwelepili ku tona ni ku eza za bata Jehova ku luna, ha lu tokwi ku ziba luli fa ka tela mafelelezo. Mane ku sa ziba lizazi luli kamba nako fa ka tela mafelelezo kwa lu tusa mwa linzila ze ketalizoho.

5. Ku sa ziba fa ka tela mafelelezo a lifasi le ku lu fa cwañi kolo ya ku bonisa ze mwa pilu ya luna?

⁵ Nzila ya pili: Ku sa ziba fa ka tela mafelelezo a lifasi le ku lu fa kolo ya ku bonisa ze mwa pilu ya luna luli. Jehova wa lu kuteka ka ku lu tuhelela kuli lu iketele ku sepahala ku yena. Lu sebeleza Jehova bakeñisa kuli lwa mu lata, isiñi ka libaka la kuli lu bata ku punyuha mafelelezo a lifasi le ni ku to fumana bupilo bo bu sa feli. (Mu bale Samu 37:4.) Lu na ni tabo ha lu eza za lata Mulimu, mi lwa lemuha kuli wa lu luta kakuli u bata kuli lu tusiwe hahulu. (Isa. 48:17) Ha lu ikutwi kuli milao ya hae i taata hahulu ku i latelela.—1 Joa. 5:3.

6. Mulimu u ikutwa cwañi ha lu mu sebeleza ka libaka la kuli lwa mu lata, mi ki kabakalañi?

⁶ Nzila ya bubeli: Ku sa ziba lizazi kamba nako fa ka tela mafelelezo a lifasi le ku lu fa kolo ya ku tabisa pilu ya Jehova. Ha lu sebeleza Jehova bakeñisa kuli lwa mu lata isiñi ka libaka la kuli mafelelezo a fakaufi kamba isiñi ku sebeleza Mulimu kuli a lu fe mupuzo, lu tusa kuli Jehova a bonise kuli sila sa hae, yena Satani ki lihata. (Jobo 2:4, 5; mu bale Liproverbia 27:11.) Lwa ziba kuli Satani u tahisize manyando a mañata, kamukwaocwalo lu na ni tabo ya ku yemela bubusi bwa Jehova ni ku hana bubusi bwa Satani.

7. Ki kabakalañi ha mu bata ku sebeleza Mulimu ni ku tusa ba bañwi mwa bupilo bwa mina?

⁷ Nzila ya bulaalu: Ku sa ziba luli fa ka tela mafelelezo a lifasi le ku tahisa kuli ku be bunolo ku luna ku sa ba ni buitati ni ku itusisa bupilo bwa luna ku sebeleza Mulimu ni ku tusa ba bañwi. Batu ba bañwi ba ba sa zibi Mulimu ni bona ba lumela kuli lifasi li ka fela. Ba saba kuli ku ka ba ni kozi ye ñwi ye tuna ye ka sinya lifasi ka nako ifi kamba ifi, mi nto yeo i ba tahiseza ku ba ni mubonelo wa kuli, “Ha lu ceñi ni ku nwa, kakuli kamuso lwa shwa.” (1 Makor. 15:32) Kono luna ha lu sabi. Mi ha lu isezi feela pilu ku ze lu tokwa luna. (Liprov. 18:1) Kono lu beya tato ya Jehova mwa sibaka sa pili mwa bupilo bwa luna, mi lwa itatela ku itusisa ze lu na ni kaufela, ze cwale ka nako ni maata a luna, kuli lu kutaze taba ye nde ya Mubuso wa Mulimu. (Mu bale Mateu 16:24.) Ku sebeleza Mulimu ku lu tahiseza tabo sihulu ha lu tusa ba bañwi kuli ba fite fa ku mu ziba.

8. Ki mutala ufi wa mwa Bibele o bonisa kuli lu swanela ku sepa Jehova ni Linzwi la hae ka ku tala?

⁸ Nzila ya bune: Ku sa ziba lizazi kamba nako fa ka tela mafelelezo a lifasi le ku lu tusa kuli lu sepe Jehova ka ku tala ni ku eza mo lu konela kaufela kuli lu mamele ze li bulela Linzwi la hae. Bakeñisa kuli ha lu si ka petahala, ku bunolo hahulu kuli lu itinge fa maata a luna. Paulusi naa lemusize Bakreste kaufela kuli: “Yena ya nahana kuli u yemi a tokomele kuli a si ke a wa.” Naa bulezi ka za Maisilaele ba 23,000 be ne ba si ka utwa Jehova mi ne ba shwile nakonyana feela pili nako ya ku kena mwa Naha ya Sepiso i si ka fita kale. Paulusi naa bulezi kuli lika zeo “ne li ñolezwi ku lemusa  luna” ba ba pila mwa lifasi le, le li tuha li fela.—1 Makor. 10:8, 11, 12.

9. Miliko i kona ku tiisa cwañi tumelo ya luna ni bulikani bwa luna ni Jehova?

⁹ Nzila ya buketalizoho: Ku sa ziba fa ka tela mafelelezo a lifasi le ku lu fa kolo ya ku ituta se siñwi kwa miliko ye lu kopana ni yona ni ku tiisa tumelo ya luna. (Mu bale Samu 119:71.) Mazazi a maungulelo a lifasi le a tezi “linako ze taata, ze ziyeza.” (2 Tim. 3:1-5) Batu ba bañata mwa lifasi la Satani ba lu toile, kabakaleo lu kana lwa nyandiswa bakeñisa tumelo ya luna. (Joa. 15:19; 16:2) Sina feela mulilo ha u kona ku kenisa sipi, miliko ya kona ku lu tahiseza kuli lu tiise tumelo ya luna. Haiba lu ikokobeza ni ku latelela ketelelo ya Jehova, miliko ha i na ku lu palelwisa ku mu sebeleza. Kono bulikani bwa luna ni Mulimu bu ka tiya hahulu ku fita mo lu nahanela.—Jak. 1:2-4; 4:8.

10. Kiñi ze kona ku bonahalisa kuli nako ya mata?

¹⁰ Nako i kona ku bonahala kuli ya mata kamba ya liyeha. Haiba lu patehile mi ha lu talimi fa nako, nako i kona ku bonahala kuli i mata hahulu. Ka nzila ye swana, haiba lu patehile ku eza musebezi o munde wa lu file Jehova, mafelelezo a lifasi le a kona ku bonahala kuli a fakaufi hahulu ku fita mo lu kona ku nahanela. Buñata bwa Bakreste ba ba tozizwe ba lu tomezi mutala o munde kakuli ba zwezipili ku pateha mwa sebelezo ya Mulimu. Ha lu nyakisiseñi ka bukuswani ze ne ezahezi hamulaho wa silimo sa 1914, ili fo Jesu naa bile Mulena, ni ku nyakisisa mo Bakreste ba ba tozizwe ba bañwi ne ba itukiselize ni mo ba bañwi ku bona ne ba si ka itukiseza.

BA BA TOZIZWE BA BONISA KULI BA ITUKISELIZE

11. Hamulaho wa silimo sa 1914, ki kabakalañi ba bañwi kwa batoziwa ha ne ba nahanile kuli Jesu naa liyehile?

¹¹ Ha lu nyakisiseñi hape linguli za Jesu za basizana ni litalenta. Kambe basizana ba mwa nguli ya Jesu ne ba ziba nako ya naa ka taha munyali kamba kambe batanga ba mwa nguli ye ñwi ya Jesu ne ba ziba nako ya naa ka taha mulenaa bona, ne ba si ke ba zwelapili ku tona. Kono kaufela bona ne ba sa zibi nako, kona libaka ha ne ba tokwa ku itukiseza. Ka lilimo ze ñata, ba ba tozizwe ne ba ziba kuli silimo sa 1914 ne si ka ba silimo sa butokwa hahulu, kono ne ba sa zibi hande ze ne ka ezahala. Lika ha ne li si ka ezahala mo ne ba nahanela, ba ba tozizwe ba bañwi ne ba nahanile kuli Jesu naa liyehile. Muzwale yo muñwi naa bulezi cwana ka za October 1914, “Ba sikai ku luna ne lu nahana kuli lu ka ya kwa lihalimu mwa sunda ya pili ya October, ili ka silimo sa 1914.”

12. Bakreste ba ba tozizwe ne ba bonisize cwañi kuli ne ba sepahala ni kuli ne ba naa ni kutwisiso?

¹² Mu nahane feela mo ne ku ka bela taata ku libelela mafelelezo a lifasi mi mafelelezo ao a tahi. Mizwale bao ni bona ne ba li mwa butata bo bu swana, mi ne ba kopani ni twaniso ye tuna ka nako ya Ndwa ya Lifasi ya Pili. Musebezi wa ku kutaza ne se u felisizwe luli. Ne ku swana inge kuli ba ba tozizwe ba lobezi. Kono ka silimo sa 1919, nto ye ñwi ya ba zusa kwa buloko! Jesu naa tile ku to tatuba batu kaufela be ne ba ipiza kuli ki Bakreste. Ba bañwi ku ba ba tozizwe ne ba palezwi ku zwelapili ku sepahala mi ne ba sa koni ku zwelapili ku sebeleza Mulenaa, yena Jesu. (Mat. 25:16) Ne ba si ka itukiseza, ne ba swana sina basizana ba likuba bani be ne ba si ka beya mafula mwa lilambi za bona. Mi ka ku swana ni mutanga yani ya buzwa ya naa si ka sepahala ku mulenaa hae, batoziwa bao ne ba sa tabeli ku itombolela za Mubuso. Kono buñata bwa Bakreste ba ba tozizwe ne ba sepahalile hahulu ni ku bonisa takazo ye tuna ya ku sebeleza Mulenaa bona nihaiba mwa lilimo ze taata zeo ha ne ku na ni ndwa.

13. Ki mubonelo mañi o ne ba na ni ona Bakreste ba ba tozizwe hamulaho feela wa silimo sa 1914, mi ki mubonelo mañi o ba na ni ona ba ba tozizwe kacenu?

¹³ Hamulaho wa silimo sa 1914, magazini ya The Watchtower ya February 1, 1916, ne i talusize mubonelo o ne ba naa ni ona Bakreste ba ba tozizwe ba bañata ka nako yeo. Magazini yeo ne i bonisize kuli batoziwa be ne ba naa ni mubonelo o swanela ne ba si ka swabiswa. Ne i zwezipili ku talusa kuli: “Ne lu sa bati  kuli ku eziwe tato ya luna, kamukwaocwalo ha ne lu zibile kuli ze ne lu libelela kuli li ka ezahala mwa October, 1914 ne si zona, ne lu tabile kuli Mulena naa si ka cinca Mulelo wa Hae kuli u lumelelane ni mo ne lu nahanela luna. Ne lu sa bati kuli Mulimu a cince mulelo wa hae.” Bakreste ba ba tozizwe bao ne ba bata feela ku utwisisa hande milelo ya Mulimu. Bakreste ba ba tozizwe kacenu ni bona ba bonisa moya o swana wa buikokobezo ni takazo ye swana ya ku eza tato ya Mulimu. Bakreste bao ha ba buleli kuli ba buyelezwi. Ba bata feela ku eza musebezi wa ba file Jesu kuli ba eze fa lifasi. Kacenu Bakreste ba ba na ni sepo ya ku pila ku ya ku ile fa lifasi, ili “buñata bo butuna bwa batu” ba ba li “lingu ze ñwi,” ba likanyisa mutala wa Bakreste ba ba tozizwe.—Sin. 7:9; Joa. 10:16.

BA LINGU ZE ÑWI BA BONISA KULI BA ITUKISELIZE

14. Ki kabakalañi ha ku li ko kunde ku utwa ze lu lutiwa ki mutanga ya sepahala ya na ni kutwisiso?

¹⁴ Sina mo ba ezeza Bakreste ba ba tozizwe, buñata bo butuna bwa batu bu zwelapili ku swalisana ni mutanga ya sepahala ya na ni kutwisiso ya itusiswa ki Mulimu kuli a fange batu sico sa kwa moya. Buñata bo butuna bwa batu ba ba bonisa kuli ba itukiselize, ba mamela ze ba lutiwa ki sitopa sa mutanga ya sepahala. Ku swana feela inge kuli ba beya mafula mwa lilambi za bona. (Mu bale Samu 119:130; Joani 16:13.) Ka ku eza cwalo, ni bona ba kona ku zwelapili ku itukiseza mafelelezo, ili nako ya ka kuta Kreste. Hape, ba na ni maata a kona ku ba tusa ku zwelapili ku sepahala nihaiba mwa miinelo ye taata hahulu. Ka mutala, mwa tolongo ye ñwi ya ba Nazi, mizwale ne ba naa ni Bibele i liñwi feela. Kamukwaocwalo, ne ba lapezi kuli ba fumane lico ze ñata za kwa moya. Ku si ka fita kale nako ye telele ku zwa fo, ba utwa kuli muzwale ya naa sa zo lengiwa mwa tolongo naa tisize lihatiso ze ñwi ze nca za magazini ya Watchtower za naa patile mwa nto ye ñwi. Muzwale yo muñwi ya tozizwe ili ya naa punyuhile mwa ndwa ya bizwa Ernst Wauer naa bulezi kuli Jehova naa tusize mizwale ka nzila ye nde hahulu kuli ba hupule litaba ze susueza za mwa lihatiso za luna. Hape naa bulezi kuli: “Mazazi a, ku bunolo hahulu ku fumana sico sa kwa moya, kono kana lwa bonisanga buitumelo kwa sico seo? Ni sepa kuli Jehova u ka fuyaula hahulu batu ba ba mu sepile, ba ba zwelapili ku sepahala, ni ba ba fepiwa fa tafule ya hae ya kwa moya.”

15, 16. Batu ba bañwi ba ba nyalani ne ba fuyauzwi cwañi bakeñisa cisehelo ya bona mwa bukombwa, mi mu kona ku itutañi ku bona?

¹⁵ Ba lingu ze ñwi ba tusa banyani ba Kreste ka ku zwelapili ku pateha mwa musebezi wa ku kutaza. (Mat. 25:40) Ha ba swani ni  mutanga ya maswe ili ya buzwa ya bulezwi mwa nguli ya Jesu. Ba itatela ku sebeza ka taata ni ku itusisa ze ba na ni kuli ba beye za Mubuso mwa sibaka sa pili mwa bupilo bwa bona. Ka mutala, bo Jon ni basali ba bona bo Masako ne ba kupilwe ku ya kwa naha ya Kenya kuli ba yo kutaza kwa batu ba ba bulela Sichainizi. Kwa makalelo, ne ba kakanya ka za haiba ne ba ka ya kwa naha ko. Kono hamulaho wa ku nyakisisa muinelo wa bona ni ku lapela ka za teñi, ba ikatulela ku ya.

¹⁶ Bakeñisa cisehelo ya bona mwa bukombwa, Jehova u ba kapwekile limbuyoti. Bo Jon ni bakubona ne ba bulezi kuli ne ba ikola bukombwa. Ne ba kalisize ku zamaisa lituto za Bibele ze supile mi ba na ni ze bonwi ze nde ze ñata. Ne ba zwezipili ku talusa kuli: “Lu itumela ku Jehova zazi ni zazi ka ku lu fa kolo ya ku sebeleza kwanu kwa Kenya.” Mizwale ni likaizeli ba bañwi ba bañata ba bonisize kuli ba bata ku zwelapili ku sebeleza Mulimu ku fitela mafelelezo a taha, ku si na taba kuli a taha lili. Mu nahane feela za batu ba bañata-ñata ba ne ba keni Sikolo sa Giliadi ili be se ba sebelize sina balumiwa. Mwa kona ku ituta ze ñata ka za musebezi wa bulumiwa mwa taba ye li, “Lu Eza Ka Mo Lu Konela Kaufela!” ye ne hatisizwe mwa Tora ya ku Libelela ya October 15, 2001. Ha mu nze mu bala taba ye tabisa yeo ye bulela za bupilo bwa balumiwa, mu nahane mo mu kona ku ezeza ze ñata ha mu nze mu sebeleza Mulimu. Ku sebeleza Mulimu kwa mina ku ka lumbekisa Mulimu mi ku ka mi tahiseza tabo ye tuna.

NI MINA MU ZWELEPILI KU TONA

17. Ku sa ziba lizazi kamba nako fa ka tela mafelelezo ku lu file mbuyoti mañi?

¹⁷ Ku sa ziba lizazi luli kamba nako fa ka tela mafelelezo a lifasi le ha ku koni ku lu zwafisa kamba ku lu swabisa. Mane ku sa ziba lizazi kamba nako i bile mbuyoti ku luna. Ku lu tusize ku pateha ku eza tato ya Mulimu, mi silikani sa luna ni Ndataa luna ya lilato, Jehova, si tiile. Bakeñisa kuli lu isize mamelelo kwa musebezi wa naa lu file Jesu kuli lu eze mi lu ambukile lika ze kona ku lu yembulula, lwa ikola bupilo bwa tabo ka ku sebeleza Jehova.—Luka 9:62.

18. Ki kabakalañi ha lu bata ku zwelapili ku sepahala ha lu nze lu sebeleza Mulimu?

¹⁸ Mafelelezo a lifasi le a fakaufi, kabakaleo lu bata ku zwelapili ku sepahala ha lu nze lu sebeleza Mulimu. Ha lu lati ku swabisa Jehova kamba Jesu. Jehova ni Jesu ba lu file musebezi o munde wa ku eza mwa mazazi a maungulelo a. Lwa itebuha kuli ba lu sepile!—Mu bale 1 Timotea 1:12.

19. Lu kona ku itukiseza cwañi mafelelezo a lifasi le?

¹⁹ Ibe kuli sepo ya luna ki ya ku pila kwa lihalimu kamba ki ya ku pila fa lifasi mwa Paradaisi, lu ka zwelapili ku mamela mulao wa Mulimu wa ku kutaza ni ku tusa batu ku ba balutiwa. Ha lu tokwi ku ziba lizazi luli kamba nako fo li ka tela lizazi la Jehova. Lwa kona ku zwelapili ku itukiseza lizazi leo. (Mat. 24:36, 44) Lu na ni buikolwiso bwa kuli ha lu ka zwelapili ku sepa Jehova ka ku tala ni ku beya za Mubuso wa hae mwa sibaka sa pili, ha lu na ku swabiswa.—Maro. 10:11.

[Litaluso za kwatasi]

[Lipuzo za Tuto]

[Siswaniso se si fa likepe 26]

Nihaiba mwa miinelo ye taata, mu batange sico sa kwa moya

[Siswaniso se si fa likepe 27]

Nako i mata hahulu haiba lu patehile ku sebeleza Mulimu