‘Kemuyūkile Shi Dyuba’ka Shi Dyuba’pi’

“Mwikale kutengela nanshi, ke-mwi-bantu kemuyūkile shi dyuba ka? shi dyuba pi?”—MAT. 25:13.

USA KULONDOLOLA NAMANI?

Le i miswelo’ka imoimo yotumwenanga mu kubulwa kuyuka difuku ne nsaa ikafika mfulo?

Le bashingwe māni bendelelanga kutengela namani?

I mu miswelo’ka motukalombola amba twibeadije kala kutengela kwiya kwa Kidishitu?

1-3. (a) Le i myanda’ka yelekejibwe na bintu bibidi bya mu lukindi lwa Yesu? (b) Le i bipangujo’ka byotusa kulondolola?

 LANGA’PO bidi shi mbikavu umo wa lupusa wakunena ukamutūle na obe motoka ku kilaeno kya mvubu. Ino minite mityetye’tu kumeso kwa kwenda kukamusela ukamutūle ku lenyo, ubamone amba mu motoka obe kemudipo mazutu akukemufikija komwenda. Ubanyema lubilo kukapota mazutu. Abe’tu wenda, mbikavu wafika. Wakutaletale kakumwene. Aye pa kukomenwa kukwilaija, wanena muntu mukwabo akamutūle na motoka. Kepejije abe pa kujoka, ubayuka’mba abakamutūla kudi muntu ungi. Le ukeivwana namani?

² Pano langa’po bidi shi abe ye mbikavu, ne ubatonge bana-balume basatu bankomokomo bengile mwingilo kampanda wa mvubu. Ubebashintulwila uno mwingilo, bonso basatu abaitabija kwiwingila ne mutyima tō. Ino, abe pa kujoka mwenda mafuku, ubamone amba i enka babidi kete bo bavuija mwingilo wabo. Ne kadi, yewa wadi kengile washilula kwibingija. Na bubine, katompelepo nansha kwingila kwine. Le ukeivwana namani?

³ Mu lukindi lwandi lwa bajike ne talenta, Yesu wāingidije mwanda wa uno muswelo pa kwelekeja mwanda waka Bene Kidishitu bamo bashingwe māni bakatanwa mu kitatyi kya mfulo bekele ba binebine ne ba manwa, ino bakwabo mpika. * (Mat. 25:1-30) Wākomeneje luno lukindi na kunena amba: “Mwikale kutengela nanshi, ke-mwi-bantu kemuyūkile shi dyuba ka? shi dyuba pi?”—ko kunena amba, kitatyi kine kikafikidija Yesu butyibi bwa Leza pa ntanda ya Satana. (Mat. 25:13) Tubwanya kwingidija ano madingi dyalelo. I muswelo’ka otubwanya kumwena mu kutengela, monka mwētukankamikile’kyo Yesu? Le i bāni beadije kala kutengela mwanda wa kupanda? Ne i bika  byotufwaninwe kulonga dyalelo pa kwikala nyeke batengele?

MWENA BYABUYABUYA MU KUTENGELA

4. I kika kinenenwa amba ‘kwikala nyeke batengele’ kekushintululapo kutala pa nsaa?

⁴ Mu myanda imo, pamo bwa kwingila ku tshapu (usine), kukemona na dokitele, nansha kwenda na byendwa nabyo bya bantu bonso, bilomba kulēmeka kitatyi. Ino mu myanda mikwabo namo, kimfwa kubula mimbi ya mudilo nansha mwingilo wa kupandija bantu pa kupwa kwa kimpengele kupona, kutala pa nsaa kubwanya kwikala bu kilabi, ne kibi mpata kubwanya kuleta kyaka. Mu ngikadilo ya uno muswelo, i biyampe kuta mutyima mpata ku mwingilo oingila pa kyaba kya kutala pa nsaa. Pano pafwena mfulo ya ino ntanda, mwingilo witupele Yehova mwanda wa kupandija bantu udi na mvubu kutabuka. Kwikala Bene Kidishitu batengele kekushintululapo kutala pa nsaa. Na bubine, kudi miswelo itano yotubwanya kumwena mu kubulwa kuyuka difuku ne nsaa mine ikafika mfulo.

5. Le kubulwa kuyuka difuku ne nsaa kwitukwashanga namani tusokole bidi mu mutyima wetu?

⁵ Muswelo mubajinji, kubulwa kuyuka kitatyi kikafika mfulo, kwitukwashanga tusokole bine bidi mu mutyima wetu. Bine, kubulwa kuyuka kwitupejanga bulēme mwanda kwitukwashanga twingidije bwanapabo bwetu bwa kwitongela pa kulombola dikōkeji dyetu kudi Yehova. Nansha byotutengele kupanda ku mfulo ya ino ntanda, twingidilanga Yehova mwanda tumusenswe, ke mwandapo’tu wa kupanda. (Tanga Mitōto 37:4.) Tusangedile kulonga kiswa-mutyima kyandi, kadi tuyukile amba Leza witufundijanga pa mwanda wa kamweno ketu. (Is. 48:17) Kadi ketumonengapo nansha dimo bijila byandi bu bilēma.—1 Yoa. 5:3.

6. Le Leza wiivwananga namani potumwingidila na buswe ne mwanda waka?

⁶ Wa bubidi, kubulwa kuyuka difuku nansha nsaa kwitupanga mukenga wa kusangaja mutyima wa Yehova. Kitatyi kyotumwingidila na buswe—ke pa mwandapo wa mfulo yafwena nansha’tu mwanda wa kukatambula mpalo—tukwashanga Yehova alondolole Satana walwana nandi umupunika. (Yoba 2:4, 5; tanga Nkindi 27:11.) Potulangulukila pa masusu onso ne bulanda bulengeje Dyabola, tukwatakanyanga na nsangaji bubikadi bwa Yehova ne kupela buludiki bubi bwa Satana.

7. Mwanda waka ulanga’mba kulondalonda būmi bwa kwipāna i kupite buya?

⁷ Wa busatu, kwingila kwa kubulwa kuyuka difuku, kwitukankamikanga tulondelonde būmi bwa kwipāna. Bantu bamo kebayukilepo Leza dyalelo nabo bakulupile’nka na batwe amba ntanda ikafula. Byobadi na moyo wa kimpengele kampanda kibwanya kuponena ntanda, badi na mulangwe wa amba: “Tudye, tutome, ke-twi-bantu dyakesha tufwa.” (1 Kod. 15:32) Ino batwe ketudipo na moyo. Kadi tupelanga kwitolwela mwanda wa kukimba kiswa-mutyima kya batwe bene. (Nk. 18:1) Inoko, twipelanga batwe bene ne kwingidija na bwanapabo kitatyi kyetu, bukomo, ne bintu bikwabo mwanda wa kusapwila bakwetu myanda miyampe ya Bulopwe bwa Leza. (Tanga Mateo 16:24.) Tutananga nsangaji mu kwingidila Leza, nakampata na kukwasha bakwetu bamuyuke.

8. Le i kimfwa’ka kya mu Bible kilombola mwanda mwine otufwaninwe kukulupidila ne pa mfulo mudi Yehova ne mu Kinenwa kyandi?

⁸ Wa buná, kubulwa kuyuka difuku nansha nsaa kwitukwashanga tukulupile ne pa mfulo mudi Yehova ne kulonga bukomo bwa kwingidija Kinenwa kyandi mu būmi bwetu. Ngikadilo mikatampe idi na batwe bantu ba kubulwa kubwaninina i mutyima wa kwikulupila batwe bene. Polo wādyumwine Bene Kidishitu bonso amba: “Yewa ufwatakanya’mba: Naimana; atūkanye pa kutyina’mba, wakapona.” Bene Isalela 23000 babudilwe buntu bwa Yehova kumeso’tu kwa Yoshua kutweja bantu ba Leza mu Ntanda ya Mulao. Polo unena’mba  “bino bintu byonso bino byebafikile mwanda wa kyelekejo; ebiya nabyo byalembelwe mwanda wa kwitudyumuna bātwe bakufikilwa na pa mfulo ya panopantanda.”—1 Kod. 10:8, 11, 12.

9. Le byamalwa bibwanya kwitulumbulula ne kwitufwenya kudi Leza namani?

⁹ Wa butano, kubulwa kuyuka kitatyi kikafika mfulo kwitukwashanga tuboile ñeni ku byamalwa bitutana dyalelo ne kwilumbulula. (Tanga Mitōto 119:71.) Mafuku a mfulo a ino ntanda i “byaba bibi.” (2 Tem. 3:1-5, MB) Bavule mu ino ntanda ya Satana betushikilwe, o mwanda tubwanya kupangwapangwa pa mwanda wa lwitabijo lwetu. (Yoa. 15:19; 16:2) Shi twityepeje ne kukimba buludiki bwa Leza mu matompo a uno muswelo, lwitabijo lwetu lukalumbuluka nansha kutōkejibwa pamo bwa lupityijibwe mu mudilo. Ketukazozapo. Ino, tukafwena bininge kudi Yehova kupita ne motwadi tulangila.—Yak. 1:2-4; 4:8.

10. Le i bika bilengeja kitatyi kimweke bu kyenda lubilo?

¹⁰ Kitatyi kyendanga muswelo umo onka. Ino shi tuvudilwe bya kulonga pa kyaba kya kutala pa nsaa, kitatyi kikamweka bu kyenda lubilo. Mu muswelo umo onka, shi twielele bininge mu mwingilo wa nsangaji witupele Yehova, dino difuku nansha nsaa ikokeja kubwana batwe kuyuka mpika. Bashingwe māni i betupe kimfwa kya kutendelwa mu uno mwanda. Tubandaulei bidi mu kīpi byālongekele kupwa kwa Yesu kubikikwa bu Mulopwe mu 1914 ne kumona muswelo wēadije bamo kutengela ino bakwabo kutengela mpika.

BASHINGWE MĀNI I BEADIJE KALA KUTENGELA

11. Kitatyi kyāpwile mwaka wa 1914, mwanda waka bashingwe māni bamo bafudile ku kunena amba Mfumwetu waije?

¹¹ Vuluka lukindi lwa Yesu lwa bajike ne lwa talenta. Shi bajike nansha bapika ba mu luno lukindi bādi bayukile kitatyi kyādi kya kufika musoñañani nansha mfumwabo, longa kebādipo basakilwa ne kutengela kwine. Ino kebādipo bekiyukile, o mwanda bādi basakilwa kutengela. Nansha bashingwe māni byobādi bayukile mu bula bwa myaka mivule amba mwaka wa 1914 i mwaka wa pa bula, ino kebādipo bevwanije biyampe bine byādi bya kulongeka. Kitatyi kekyālongekelepo bintu mobādi balangila, bamo bamwene amba musoñañani waije. Tutu umo wānene amba, “batyetye mu bukata mwetu badi bakulupile kwenda mūlu mu yenga mubajinji wa Kweji 10, [1914].”

12. Le bashingwe māni bēlombwele namani amba i ba binebine kadi ba manwa?

¹² Fwatakanya’po bidi mobatyumukilwe mutyima pa kutengela mfulo ino ayo kufika mpika! Pakwabo kadi, banabetu bāpangilwepangilwe mu Divita I dya Ntanda. Mu kino kitatyi mwingilo wāimene, pamo bwa abo bālēle mu tulo. Ino mu 1919, kwādi lwito lwa kwibalangula! Kitatyi kya kupempulwa kyābwene, Yesu wāiya ku tempelo ya ku mushipiditu ya Leza. Inoko bamo bāponene mu kuno kupempulwa ne kujimija madyese abo a kutala “lupeto” lwa Mulopwe. (Mat. 25:16) Bidi pamo bwa abo kebādingilepo māni a ku mushipiditu mu binanu byabo pamo bwa bajike balembakane. Kadi pamo bwa mupika wa mulēle, kebāitabijepo kwipāna pa mwanda wa Bulopwe. Inoko, bashingwe māni bavule, bālombwele dikōkeji dya binebine ne mutyima wa kwingidila Mfumwabo enka ne mu myaka ya divita dikomo.

13. Le i ngikadilo’ka yādi na kabumbo ka umpika pa kupwa kwa mwaka wa 1914, ne kadi na ngikadilo’ka dyalelo?

¹³ Pa kupwa kwa mwaka wa 1914, Kiteba kya Mulami kyānene bino binenwa bya mvubu: “Banabetu, boba badi na mumweno muyampe padi Leza kebatyumukwangapo mutyima pa mpangiko Yandi yonso. Ketwādipo tusaka kulonga kiswa-mutyima kyetu; o mwanda kitatyi kyotwāyukile amba twadi tutengele kintu kya bubela mu Kweji wa 10, 1914, twāsangele pa kuyuka amba Mfumwetu kāshintyilepo mpango  Yandi mwanda wa kwitusangaja. Ketwādipo tusaka Alonge namino. Twādi tusaka’tu kwivwanija mpango Yandi.” Ino ngikadilo ya kwityepeja ne kwipāna ikiyukilwanga’po bashingwe māni ba Mfumwetu. Kebetelangapo abo bene bu badi na mushipiditu, ino i basumininwe kutubulula “lupeto” lwa Mfumwetu. Kadi dyalelo “kibumbo kikatampe” kya “mikōko mikwabo,” ko kunena amba Bene Kidishitu badi na lukulupilo lwa kwikala pano panshi, kiulanga kutengela ne bupyasakane bwabo.—Kus. 7:9; Yoa. 10:16.

TWIADIJE KALA KUTENGELA

14. Le kulamata ku mukola utūdile’ko Leza mwanda wa kuleta bidibwa bya ku mushipiditu kwitulamanga namani?

¹⁴ Monka mulongelanga Bene Kidishitu bashingwe māni, bantu ba mu kibumbo kikatampe batengele, nabo balamete bininge ku mukola utūdile’ko Leza mwanda wa kuleta bidibwa bya ku mushipiditu. Bano bantu badi pamo bwa abo badingile māni a ku mushipiditu mu binanu byabo kupityila ku Kinenwa kya Leza ne mushipiditu wandi. (Tanga Mitōto 119:130; Yoano 16:13.) Bano bantu bakankamane, nabo i beadije kala kutengela kujoka kwa Kidishitu, koku bengila nyeke’nka ne mu matompo makomo. Kimfwa mu komponi kamo ka masusu ka Nazi, dibajinji batutu bādi’nka na Bible umo kete. O mwanda badi balombela mwanda kupebwa bidibwa bikwabo bya ku mushipiditu. Kitatyi kityetye pa kupita’po bajingulula amba tutu mukwabo mupya mu kifungo obakutyile, watwejeje mu bufyafya manimelo mapya abala-anga a Kiteba kya Mulami mu komponi, mufye’o mu kūlu kwa mbao. Mu bantu bāpandile, mwadi ne tutu umo mushingwe māni witwa bu Ernst Wauer, wānene mwenda mafuku amba: “Yehova wētukweshe mu muswelo wa kutendelwa tulame nyeke mu ñeni myanda ikankamika ya mu bishinte.” Kupwa wabweja’ko amba: “Mu ano etu mafuku, i bipēla kusokola bidibwa bya ku mushipiditu, ino le tusangelanga’byo nyeke? Nkulupile amba Yehova ubikīle madyese mavule boba bakulupile mwadi, badi nyeke na kikōkeji, ne badya ku mesa andi.”

15, 16. Le ba mulume ne mukaji bamo bapyasakane mu mwingilo wa bwine Kidishitu baeselwe namani, ne i ñeni’ka yobwanya kuboila ku ino myanda mimweke?

¹⁵ Mikōko mikwabo nayo iputuminanga mu mwingilo wa Mfumwetu, na kukwatakanya banababo na Kidishitu. (Mat. 25:40) Kwishila na mupika mubi ne wa mulēle wa mu lukindi lwa Yesu, mikōko mikwabo itabije ne mutyima tō kwipāna  ne kwingidija bukomo bwabo mwanda wa kutūla tumweno twa Bulopwe pa kifuko kibajinji. Kimfwa kitatyi kyāityilwe ba Jon ne Masako kukwasha mu mwaba wa bantu besamba Kishinwa mu Kenya, bēkakile dibajinji. Ino pa kupwa kubandaula ngikadilo yabo ne kulombela ponka, bakwata butyibi bwa kuvilukila’ko.

¹⁶ Bāeselwe bininge pangala pa bukomo bobalongele. Bānene amba, “mwingilo kuno i usangaja mpata.” Bāshilwile kwendeja bifundwa bya Bible bisamba-bibidi. Myanda mimweke mivule isangaja yalondele’ko. Bafudile na kunena amba, “tufwijanga’ko Yehova difuku ne difuku pa kwitukwasha twiye kuno.” Na bubine, kudi batutu ne bakaka bavule bakwabo balombwele kupityila ku butyibi bwabo, kusumininwa kobasumininwe kuputumina mu mwingilo wa Leza kufika ne bikafika mfulo. Langa’po bidi tununu ne tununu twa bantu batambwile mapolome ku Masomo a Ngileade bengila mu mwingilo wa bu mishonele. Ubulwe’po kukimba kuyuka mwikadile uno mwingilo wa pa bula na kutanga kishinte kinena amba “Tuloñanga monso motubwaninya” kidi mu Kiteba kya Mulami kya Falanse kya 15 Kweji 10, 2001? Kitatyi kyobandaula ino nsekununi ikunka mutyima itala mwikadile mwingilo wa bu mishonele, langulukila pa miswelo yokokeja kutandabula mwingilo obe mwanda wa kutumbija Leza ne kumwena’mo nsangaji.

ABE NOBE ENDELELA NA KUTENGELA

17. Le kubulwa kuyuka difuku ne nsaa i dyese namani?

¹⁷ Na bubine, kuyuka koketuyukilepo difuku ne nsaa mine ikafula ino ntanda i dyese kotudi. Pa kyaba kya kukalala ne kutyumukwa mutyima, tufwenanga bininge kudi Yehova, Tata wetu wa buswe kitatyi kyotutakamena mu kulonga kiswa-mutyima kyandi. Mu muneneno mukwabo, kukwata makasa etu ku lukasu ne kwepuka bilabi kwitutwalanga ku nsangaji mivule mu mwingilo wa Mfumwetu.—Luka 9:62.

18. Mwanda waka ketusakangapo kuzoza mu lwitabijo lwetu?

¹⁸ Ketudi pabwipi bininge na difuku dya butyibi bwa Leza. Batwe bonso ketusakangapo kufityija Yehova nansha Yesu mutyima. I betupe madyese a kutendelwa a mwingilo mu ano mafuku a mfulo. Bine tusenswe kikulupiji kyobetukulupile!—Tanga 1 Temote 1:12.

19. Le tukeadija kala kutengela namani?

¹⁹ Nansha shi tudi na lukulupilo lwa kwenda mūlu nansha lwa kwikala mu Paladisa pano panshi, tusumininwei kwingila nyeke na kikōkeji mwingilo witupele Leza wa kusapula ne kulonga bana ba bwanga. Kufika ne pano ketuyukilepo difuku ne nsaa mine ikafika difuku dya Yehova, le bine tusakilwa kwibiyuka? Tubwanya, kadi tukendelela kwiadija kala kutengela. (Mat. 24:36, 44) Tudi na kikulupiji kya amba shi tukulupile ne pa mfulo mudi Yehova ne kutūla Bulopwe bwandi pa kifuko kibajinji, ketukatyumukwapo mutyima.—Loma 10:11.

[Kunshi kwa dyani]

[Bipangujo bya Kifundwa]

[Kifwatulo pa paje 26]

Kimba bidibwa bya ku mushipiditu nansha ke mu ngikadilo mikomo

[Kifwatulo pa paje 27]

Kitatyi kikenda lubilo shi tutele mutyima ku mingilo ya bwine Kidishitu