“Ok Ung’eyo Chieng’no Kata Sano”

“E momiyo rituru, nikech ok ung’eyo chieng’no kata sano.”​—MATH. 25:13.

INYALO DWOKO NADE?

Moko kuom ber mantie kuom bedo ni wakiya odiechieng’ kata sa ma giko nobie gin mage?

Jokristo mowal osebedo karito e yo mane?

Gin yore mage mwanyalo nyisogo ni waikore ne duok Kristo?

1-3. (a) Gin ranyisi mage makonyowa winjo tiend ngeche ariyo mag Yesu? (b) Gin penjo mage monego wayud dwoko maggi?

KAW ane ni jatelo moro maduong’ e sirkal okwayi ni ibedne dereba matere e wuoth moro mochuno. Kapod odong’ dakika matin to urom kama ne uwinjore kode, ifwenyo ni ok in gi petrol moromo chopou wuodhno. Iringo mapiyo mondo inyiew petrol. Sama idhi olo petrol, jatelono chopo kama ne uwinjore kode to oyudo ka ionge. Otemo rango koni gi koni to ok oneni. To nikech ok onyal riti, okwayo dereba machielo mondo otere e wuodhno. Bang’ olo petrol, idok iyudo ni jatelono nosedhi ma oweyi. Inyalo winjo nade e chunyi?

² Koro kaw ane ni in e jatelo kendo iyiero chwo adek molony mondo otini tich moro makende. Inyisogi kaka idwaro ni mondo otim tijno, kendo giduto giyie ni gibiro timo mana kaka iwachono. Kata kamano, bang’ kinde matin iduogo to iyudo ni ji ariyo kende ema otimo tich mane iweyonegi. E wi mano, jal ma ne ok otiyo temo ywagore gi weche mang’eny konyisogo gimomiyo ok ne otimo tijno. Adiera en ni, ne ok otemo kata matin. Diwinj nade e chunyi?

³ Yesu notiyo gi ngeche ariyo mar nyiri apar kod mar talanta, mondo onyisgo kaka e kinde mag giko chal ma kamago ne dhi betie kuom Jokristo mowal. Moko kuom Jokristo mowal ne dhi bedo jo migeno kendo mariek, to moko kuomgi ne dhi bedo mofuwo. * (Math. 25:​1-​30) Nojiwo wachno kowacho kama: “E momiyo rituru, nikech ok ung’eyo chieng’no kata sano”​—matiende ni, kindeno ma Yesu ne dhi kelo kum mag Nyasaye ne piny ma Satan oteloeni. (Math. 25:13) Wan bende wanyalo tiyo gi puonjno. Gin ber mage mwanyalo yudo ka warito kaka Yesu nojiwowa? Gin jomage moseikore ne tony?  Kendo ang’o manyaka watim mondo wasik ka warito?

GIMOMIYO BER BEDO KA WARITO

4. Mondo ng’ato obed karito, ang’o momiyo ok ochuno ni ong’e odiechieng’ sie kata sa ma giko nobie?

⁴ Nyalo dwarore mondo wanyis luor ne sa koda chenro moketi sama waloyo yorewa machalo kaka dhi tich, dhi neno laktar, kata temo mondo mtoka kik weyi. Kata kamano, kuom tije mamoko machalo kaka nego mach kata reso ngima jogo moyudo masira, ok gin gik madwaro ni ng’ato ong’i sa nikech mano nyalo galo pache ma hinyruok wuogie. Kuom tije machalo kamago, gimaduong’ moloyo en keto paro duto e tich madhi nyime to ok ng’iyo seche monego otimie mano. E yo machalo kamano, tijwa mar lendo konyo ji mondo ong’e gima Jehova osetimo mondo ores dhano. Ma e tich maduong’ie moloyo e kindegi sama giko pinyni medo kayo machiegni. Mondo wasik ka warito kendo timo kaka Jehova dwaro, ok ochuno ni nyaka wang’e ni en karang’o ma giko dhi biroe. Bedo ni wakiya odiechieng’ sie kata sa ma giko nobie konyowa e yore chiegni abich.

5. Bedo ni ok wang’eyo odiechieng’ kata sa, nyalo konyo nade e nyiso gima nie chunywa?

⁵ Mokwongo, bedo ni ok wang’eyo odiechieng’ ma giko nobie, miyowa thuolo mar nyiso gima nie chunywa. Ka gadier, bedo ni ok wang’eyo odiechieng’no, miyowa thuolo mar tiyo gi nyalo ma Jehova nomiyowa mar yiero tiyone ka wamakore kode chuth. Kata obedo ni wageno tony e giko mar pinyni, ok wati ne Jehova mana nikech wadwaro ngima mochwere, to watiyone nikech wahere. (Som Zaburi 37:4.) Wayudo mor sama watimo dwaro mar Nyasaye, kendo wafwenyo ni Nyasaye puonjowa mondo wan ema wayud konyruok. (Isa. 48:17) Chike Nyasaye ok gin ting’ mapek kuomwa.​—1 Joh. 5:3.

6. Sama watiyone Nyasaye nikech wahere, owinjo nade e chunye, to nikech ang’o?

⁶ Mar ariyo, bedo ni ok wang’eyo odiechieng’ ma giko nobie, miyowa thuolo mar miyo chuny Jehova obed mamor. Sama watiyone nikech wahere​—to ok nikech tarik moro sie kata nikech mich moro, wakonyo Jehova mondo ochiw dwoko ne jal makwede ma en Satan. (Ayub 2:​4, 5; som Ngeche 27:11.) Ka waparo rem gi lit duto ma Jachien osekelonwa, wamor chung’ motegno e riwo lwedo loch mar Jehova kendo kwedo loch marach mar Satan.

7. Ang’o momiyo ngima mar chiwruok mondo iti ne Nyasaye kendo ikony jomoko ema berie moloyo?

⁷ Mar adek, bedo ni ok wang’eyo odiechieng’ ma giko nobie, nyalo jiwowa mondo wati ne Jehova gi chuny mar chiwruok. Tinde, kata mana joma kiya Nyasaye bende oyie ni pinyni chiegni rumo. To nikech giluoro masira mabiro, gisebedo ka gin gi chuny mar ni “wachiemuru, kendo wamethuru, nikech kiny wanatho.” (1 Kor. 15:32) Wan to ok waluor. Ok waleng’re konchiel ka watimo mana gik makonyowa wawegi. (Nge. 18:1) Kar mano, wakwedore wawegi kendo tiyo gi thuolowa, tekowa koda mwanduwa e konyo jomoko ong’e wach maber mar Pinyruodh Nyasaye. (Som Mathayo 16:24.) Wabedo mamor tiyone Nyasaye, to ahinya wuon, seche ma wakonyo jomoko mondo ong’eye.

8. En ranyisi mane manie Muma makonyowa ng’eyo gimomiyo onego wagen chuth kuom Jehova kod Wachne?

⁸ Mar ang’wen, bedo ni wakiya odiechieng’ sie kata sa ma giko nobie, konyowa mondo wamed keto genowa kuom Jehova kendo timo duto mwanyalo mondo wati gi puonj mag Muma e ngimawa. Kido achiel maduong’ ma wan-go kaka dhano ma joricho, en keto geno kuomwa wawegi. Paulo nojiwo Jokristo duto niya: “E momiyo, ng’ato ma paro ni ochungo, mondo onen kik  ogore piny.” Jo-Israel 23,000 ma nodagi luwo chik Jehova, ne otho kapok Joshua ochako tayogi gidonj e Piny Manosingi. Paulo nomedo wacho kama: “To wechegi duto notimorenigi kaka ranyis, kendo nondikgi mondo omiwa tang’, wan ma giko mar ndalo ochoponwa.”​—1 Kor. 10:​8, 11, 12.

9. Ere kaka tembe nyalo tego yie marwa kendo konyowa sudo machiegni gi Nyasaye?

⁹ Mar abich, bedo ni ok wang’eyo odiechieng’ sie kata sa, chiwo thuolo mondo omi tembe ma wakale omed tego yiewa. (Som Zaburi 119:71.) En adier ni ndalo mag gikogi gin “kinde mag chandruok.” (2 Tim. 3:​1-5) Ji mang’eny manie piny ma Satan lochoeni osin kodwa, omiyo inyalo sandwa nikech yie marwa. (Joh. 15:19; 16:2) Ka wanyiso bolruok kendo luwo kaka Nyasaye chikowa, tembe machalo kamano, biro tego kendo miyo yiewa obed mopwodhi mana ka gima okadho e mach. Chunywa ok nyosre. Kar mano, wabiro medo sudo machiegni gi Jehova moloyo.​—Jak. 1:​2-4; 4:8.

10. Ang’o manyalo miyo onenre ni sa dhi piyo kata odhi mos?

¹⁰ Seche nyalo nenore ni dhi piyo kata dhi mos kaluwore gi gima ng’ato timo. Seche ma wadich kendo ok waketo pachwa e ng’iyo sa, seche ringo piyo ahinya. E yo machalo kamano, ka waketo pachwa e tich majaber ma Jehova omiyowa, odiechieng’ gi sa mar giko, biro chopo piyo moloyo kaka waparo. Kaluwore gi wachni, ng’eny Jokristo mowal, oseketonwa ranyisi maber. Weuru wanon ane machuok gima ne otimore kane oket Yesu obed Ruoth e higa 1914, kendo neno kaka Jokristo moko mowal nonyiso ni giikore to moko kuomgi ne ok oikore.

JOKSRITO MOWAL NYISO NI GIIKORE

11. Bang’ higa 1914, ang’o momiyo Jokristo mowal nokawo ni Ruoth ne deko?

¹¹ We wapar ane kendo ngeche ma Yesu nogoyo e wi nyiri apar koda ngero mar talanta. Ka dine nyiri miwuoyo kuomgi e ngerono ong’eyo seche ma wuon kisera kata ruodhgi ne dhi biroe, dine onge tiende siko ka girito. To nikech ne ok ging’eyo, ne dwarore ni gibed ka giikore. Kata obedo ni kuom higini mang’eny Jokristo mowal nosebedo karito higa 1914 gi ilo kaka higa makende, ne ok ging’eyo maler gima ne dhi timore. Kane gik moko ok otimore kaka ne giparo, ne chalo mana ka gima Wuon kisera ne odeko. Owadwa moro nowacho kama, “Jomoko kuomwa nokawo ni ne wadhi dhi e polo e juma mokwongo e dwe mar Oktoba higa 1914.”

12. Ere kaka Jokristo mowal nonyiso ni gin joma igeno kendo mariek?

¹² Par ane kaka ne en gima nyoso chuny rito mondo giko obi kae to gikono bare! E wi mano, chuny owete bende ne nyosore nikech akwede ma ne giyudo kaluwore gi Lweny Mokwongo mar Piny. Tij lendo ne chiegni chung’ chuth. Kata kamano e higa mar 1919, gimoro ne ochiewogi! Noyudo Yesu osebiro nono chal mar hekalu mar ranyisi. Kata kamano, jomoko ne oyud ka ok owinjore tiyo ne Ruoth e ‘ohande.’ (Math. 25:16) Mana kaka nyiri mofuwoka, ne ok gimedo mo e techegi, tiendeni ne ok gitego winjruokgi gi Nyasaye. Kendo mana kaka jatich ma jasamwoyo, ok ne giikore nyiso chiwruok ne Pinyruodh Nyasaye. Kata kamano, thoth Jokristo mowal, nonyiso ni gimakre chuth, kendo ne gin gi gombo motegno mar tiyo ne Ruoth kata mana e higinigo ma lweny ne lich.

13. Jokristo mowal ne nigi chuny mane bang’ higa mar 1914, to gin gi paro machalo nade e ndalogi?

¹³ Bang’ higa mar 1914, The Watchtower nondiko weche maluwogi: “Owete, jogo ma nigi paro makare e wi Nyasaye, ok chwanyre gi chenro moro amora ma Nyasaye oketo. Ok ne wadwar ni mondo gik moko otimre kaka wan ema wadwaro; omiyo kane wafwenyo ni ne wageno gima ok adier e dwe  mar Oktoba, higa 1914, ne wamor ni Ruoth ok noloko Chenro mage mondo omorwago. Bende, ne ok wanyal hero ni otim kamano. Gima wadwaro en mana ni mondo wamed ng’eyo dwache kod chenro mage e yo matut.” E kindegi pod Jokristo mowal nyiso chuny mar bolruok kod chiwruok e timo dwaro mar Nyasaye. Ok gikaw ni Nyasaye wuoyo kodgi achiel kachiel kaka ne owuoyo gi jonabi machon, kata kamano gin gidwaro mana timo tich ma Ruoth noweyonegi e piny. To gie sani “oganda mang’ongo” mar ‘rombe mamoko,’ ma gin Jokristo ma nigi geno mar dak e piny, luwo ranyisi margi mar bedo gi kinda kendo bedo ka girito.​—Fwe. 7:9; Joh. 10:16.

WE WANYIS NI WAIKORE

14. Ere kaka bedo machiegni gi chenro ma Nyasaye oketo mar chiwo chiemb chuny miyowa rit?

¹⁴ Mana kaka Jokristo mowal timo, oganda mang’ongo mabende nyiso ni giikore, makore ahinya gi chenro ma Nyasaye oseketo mar miyowa chiemb chuny. Nikech mano, gin bende gimedo tego winjruokgi gi Nyasaye kokalo kuom Wachne koda rohone. (Som Zaburi 119:130; Johana 16:13.) Nikech timo kamano, gin bende ginyiso ni giikore ne duok Kristo, ka gichung’ motegno kata mana e bwo tembe mager. Kuom ranyisi, e kambi moro mar Jo-Nazi owete moko ma noyudo nie tuech, ne nigi Muma achiel kende. Omiyo ne gilemo mondo giyud chiemb chuny momedore. Mapiyo bang’ mano, ne gifwenyo ni owadwa moro mokel manyien e twech, kane odonjo e kambino ne opando ling’ ling’ gasede moko manyien mag Ohinga mar Jarito ei bao mane ochomgo tiende. Owadwa Ernst Wauer ma en achiel kuom owete mowal, ma bang’e nowuok e kambino, paro kawacho niya: “Jehova nokonyowa e yo maber mondo wamak e wiwa weche mag jip ma ne yudore e sula mag gasedego.” Kae to omedo wacho niya: “Ndalogi, yot ahinya yudo chiemb chuny, to kata kamano be kinde duto wasomogi kendo dwoko erokamano? An gadier chuth ni Jehova gwedho jogo moketo geno kuome, momakore kode, kendo ma gago e mesane mar chiemb chuny.”

15, 16. Kinda ma owadwa moro gi jaode notimo e tij lendo nokelonegi gweth nade? To gin puonj mage ma wayudo kuom ranyisi ma giketo?

¹⁵ Rombe mamoko bende odich e tij Ruoth, ka giriwo lwedo chuth owete Kristo. (Math. 25:40) Mopogore gi jatich marach kendo ma jasamwoyo e ngero mar Yesu, gin giikore mar chiwruok kendo timo kinda  ng’ato ka ng’ato mondo giket tije mag Pinyruoth obed mokwongo. Kuom ranyisi, kane Jon kod Masako ogwel mondo okony tij lendo e piny Kenya ne joma wacho dho-China, mokwongo ok ne yotnegi. Kata kamano, bang’ keto wachno e lamo, ne ging’ado mar timo kamano.

¹⁶ Jehova nogwedho kinda ma ne gitimo e tij lendo. Giwacho niya: “Tij lendo mit kae nyowuoyo.” Ne gichako puonjore Muma gi ji abiriyo, kendo gin gi weche mosene mang’eny. Ne gitieko ka giwacho kama: “Wadwoko erokamano ne Jehova kinde duto kuom yienwa mondo watine ka wan kae.” En adier ni nitie owete gi nyimine mamoko mathoth, mosenyiso kokalo kuom paro ma ging’ado ni giramo mar bedo modich chuth e tij Nyasaye kapok giko ochopo. Par ane owete gi nyimine gana gi gana moseyudo tiegruok e Skund Gilead ma kendo giyie bedo jomisonari. Donge ber bedo gi ng’eyo matin e wi skul makendeno kuom somo sula mawacho ni “Tunafanya Yote Tuwezayo!” mayudore e Mnara wa Mlinzi mar Oktoba 15, 2001? Sama isomo weche mabeyo mawuoyo kuom kaka ngima jamisonari chalo e odiechieng’ achiel e tij lendo, par ane kuom kaka inyalo medo lendo e okang’ momedore mondo imi Nyasaye duong’. Tiji biro kelone pak kendo biro keloni mor mogundho.

IN BENDE SIK KIRITO

17. Ere kaka bedo ni ok wang’eyo odiechieng’ kata sa ma giko nobie osebedonwa gweth?

¹⁷ Kuom adier nikech ok wang’eyo odiechieng’ kata sa sie ma giko mar pinyni nobie, mano osebedonwa gweth ahinya. Kar mondo chunywa onyosre, wamedo sudo machiegni ahinya gi Jehova ma en Wuonwa ma jahera seche mwatimo dwache gi chunywa duto. Sama wamako kwe dhiang’ mana kaka Yesu nowacho e ngero, ok onego wang’i chien mondo gimoro ogal pachwa. Mano biro miyo wayud mor e tich ma Ruodhwa osemiyowa.​—Luka 9:​62.

18. Ang’o momiyo wadwaro chung’ motegno e tiyo ne Nyasaye?

¹⁸ Giko mar pinyni medo kayo machiegni, omiyo wadwaro chung’ motegno e tiyo ne Nyasaye. Ng’ato ka ng’ato kuomwa ok diher kuodo wi Jehova kata Yesu. Gisemiyowa thuolo makende majaber mar tiyonegi e ndalogi mag giko. Mano kaka wamor nikech gigenowa e yo ma kamano!​—Som 1 Timotheo 1:​12.

19. Wanyalo nyiso nade ni waikore ne giko mar pinyni?

¹⁹ Kata bed ni wageno yudo ngima e polo kata e Paradis e piny, wadhiuru nyime luwo gima Nyasaye ochikowa, ni walend kendo watim ji obed jopuonjre. Ok ochuno ni nyaka wang’e chieng’no kata sa ma odiechieng Jehova nobie. Wanyalo bedo moikore ne chieng’no kendo mano e gima waikore timo. (Math. 24:36, 44) Wan gadier ni kaka wamedo keto yiewa chuth kuom Jehova kendo keto Pinyruodhe obed mokwongo, wiwa ok nokuodi.​—Rumi 10:11.

[Weche moler piny]

[Penjo mag Puonjruok]

[Picha e ite mar 26]

Kata ka in e chal matek, dhi nyime manyo chiemb chuny

[Picha e ite mar 27]

Sa dhi piyo sama waketo pachwa e tije mag Jokristo