“A Ni Leh A Hun In Hre Si Lo”
“A Ni Leh A Hun In Hre Si Lo”
“Chutichuan, ngaihven rawh u, a nî leh a hun in hre si lo va.” —MT. 25:13.
ENGTIN NGE KAN CHHAN ANG?
Tâwpna lo thlen hun tûr nî leh dâr kan hriat lohna kan hlâwkpui dân kawng ṭhenkhat chu engte nge ni?
Engtin nge hriak thihte chu ngaihven renga an awm?
Eng kawngin nge Krista lo kal hun atân kan inpeih tih kan lantîr theih?
1-3. (a) Isua tehkhin thu pahnihte chuan eng dinhmun nge an târ lan? (b) Eng zawhnate nge kan chhân ngai?
SAWRKAR mi pawimawh tak pakhatin a meeting pawimawh taka thlah tûrin a ti che angah han inchan teh. Amah lam tûra i chhuah hma chiah chuan, i motor-ah petrol mamawh tâwk a awm lo tih i hre chhuak ta tlat mai. Lei tûra i kal vat a ngai a ni. I kal hlân chuan i mi hruai tûr chu a lo thleng ta mai a. A han hawi vêl a, a hmu ta mai si lo che a. A hmanhmawh si avângin mi dang a inhruaitîr ta a ni. I rawn kîr leh chuan ani chu a lo kal daih tawh tih i hre ta a. Engtin nge i ngaih ang?
2 Tûnah chuan nangmah chu sawrkâr mi pawimawh tak angah han inchan ve thung la, hna pawimawh tak engemaw thawk tûrin mi tling tak pathum i thlang a ni. An hna thawh tûr chu i hrilhfiah a, anni pawhin thawh an inhuam vek a. Mahse, i rawn kîr leh chuan an zînga pahnihte chauh chuan an hna chu an thawk tih i rawn hmu ta a ni. Chu mai bâkah, a thawk lotu ber chuan chhuanlam a siam lehnghâl a. A nihna takah chuan thawh pawh a tum chhin lo a ni. Engtin nge i ngaih ang?
3 Nula thianghlim leh talent tehkhin thu a sawiah Isua chuan tâwpna hun chhûnga hriakthih Kristian ṭhenkhat an rinawm leh an fin laia a ṭhente erawh chutiang an nih loh chhan târlan nân chutiang bawk dinhmun chu a hmang a ni. * (Mt. 25:1-30) Isua chuan: “Chutichuan, ngaihven rawh u, a nî leh a hun in hre si lo,” tia sawiin a thu sawi awmzia chu a târ lang uar a. (Mt. 25:13) Chu fuihna chu tûn laiah pawh kan hmang ṭangkai thei a ni. Engtin nge Isua fuihna anga ngaihven renga awm chu kan hlâwkpui theih? Tute nge dam khawchhuak tûra inring renga awm? Tûnah hian ngaihven renga awm tûrin eng nge kan tih ngai?
NGAIHVEN RENGA AWMIN A HLAWKNA TEL RAWH
4. Engvângin nge ‘harhvâng’ renga awm tih chu hun hriat nân sana en reng tihna a nih loh?
4 Thiltih ṭhenkhat, thil siamna hmuna hna thawh te, doctor râwn te, a nih loh leh vântlâng veivahna lîrtheia chuan dâwn ang chi ahte hian an hun duan kan ngaih pawimawh a ngai a. Mahse, thiltih dang, kâng ṭhelh lai emaw, chhiatna a thlen hnua chhan chhuahna hna thawh lai emawa sana enna chuan hnathawh lai a tibuai theiin, chhiatna hial pawh a thlen thei a ni. Chutiang dinhmunah chuan hun vawn dik lam aiin hnathawh laia rilru pêk tlat chu a pawimawh zâwk fê a ni. He kalhmang tâwpna hi kan hnaih tawh êm avângin, chhandamna atâna Jehova ruahmanna mite hnêna kawhhmuh chu a pawimawh lehzual tawh a ni. Kristian kan nih anga harhvâng renga awm tih chu hun hriat nâna sana en reng tihna a ni lo. Dik takin, tâwpna lo thlen nî leh hun tûr chiah kan hriat lohna chu a lo berah kawng chi nga-in kan hlâwkpui a ni.
5. Engtin nge tâwpna lo thlen hun leh nî kan hriat lohna chuan kan thinlung dinhmun dik tak târ lang tûra min ṭanpui?
5 A hmasa berin, tâwpna lo thlen nî leh hun tûr kan hriat lohna chuan kan thinlung dinhmun dik tak târ lan theihna hun remchâng min pe a. A nihna takah chuan, tâwpna thlen hun tûr kan hriat lohna chuan min chawimawi a ni; zalên taka duhthlan theihna kan neih chu Jehova chunga kan rinawmna târ lan nâna hman theihna hun remchâng min pêk avângin. He khawvêl tâwpnaa dam khawchhuah chu kan beisei ni mah se, Jehova rawng kan bâwl chhan chu nun neih nân hrim hrim ni lovin, amah kan hmangaih vâng zâwk a ni. (Sâm 37:4 chhiar rawh.) Pathian duhzâwng tih chu nuam kan ti a, kan hlâwkna tûrin min zirtîr tih kan hre bawk. (Is. 48:17) A thupêkte pawh a khirh kan ti hek lo.—1 Joh. 5:3.
6. Pathian chuan amah hmangaihna avânga a rawng kan bâwl hian engtin nge a ngaih?
6 Tâwpna lo thlen hun leh nî tûr kan hriat lohna kan hlâwkpui theih dân kawng dang leh chu Jehova thinlung tihlâwm theihna hun remchâng min pe hi a ni. A nî kan hriat vâng emaw, lâwmman ringawt kan thlîr vâng emaw ni lova amah hmangaihna avânga Jehova rawng kan bâwl hian, a hmêlma pa, Setana sawichhiatna chhâng thei tûrin kan ṭanpui a ni. (Job. 2:4, 5; Thufingte 27:11 chhiar rawh.) Setana’n natna leh lungngaihna a thlen zawng zawngte ngaihtuah hian, Jehova Lalchungnunna chu lâwm takin kan ṭan a, Setana rorêlna suaksual tak chu kan hnâwl a ni.
7. Engvângin nge Pathian rawngbâwl nân leh mi dangte ṭanpui nâna i nun hman i duh?
7 A pathumnaah chuan, tâwpna nî leh hun tûr lam ngaihtuah lo va rawngbâwlna chuan mahni hma sial lo nun ûm tûrin min ṭanpui a. Tûn laia mi ṭhenkhat Pathian hre lotute pawhin kan hriat ang bawkin he khawvêl hian rei a daih theih an ring tawh lo va. Chhiatna engemaw a lo thlen mai an hlauh avângin: “I eiin i in ang u hmiang, naktûkah kan thi dâwn alâwm,” tih rilru put hmang an nei a ni. (1 Kor. 15:32) Keini erawh chuan chutiang chu kan hlauh ve loh avângin, mahni duhzâwng chauh ngaihtuaha inkulh hran chu kan pumpelh a. (Thuf. 18:1) Mahni inphatin, kan hun te, tha leh zung te, leh thil hlu dangte chu mi dangte hnêna Pathian Ram chanchin ṭha hrilh nân kan hmang zâwk a ni. (Matthaia 16:24 chhiar rawh.) Pathian rawng bâwl chu nuam kan ti a, a bîk takin mi dangte’n amah an hriat theih nâna ṭanpui chu nuam kan ti lehzual a ni.
8. Bible-a thiltawn engin nge Jehova leh a thu kan rinchhan a ṭulzia târ lang?
8 Tâwpna nî leh hun kan hriat loh a hlâwkna palina chu Jehova rinchhan lehzual tûr leh taima taka a Thu nunpui tûra min ṭanpui hi a ni. Kan mihring sual nunphung langsâr tak pakhat chu mahni inrinna kan nei ṭhîn hi a ni. Paula chuan Kristian zawng zawngte chu heti hian a fuih a: “Dinga inring chu fîmkhur rawh se, chutilochuan a tlu dah ang e,” tiin. Josua’n Pathian mite Ram Tiama a hruai luh hma lawk khân mi sîng hnih leh sângthumin Jehova duhsakna an chân a. Paula chuan, “chûng chu . . . keini, hun tâwp lo thlennate hi, min zilhna tûrin ziak a ni,” a ti.—1 Kor. 10:8, 11, 12.
9. Engtin nge dinhmun khirh takte chuan min tithianghlim a, Pathian min hnaih lehzualtîr theih?
9 Tâwpna lo thlen nî leh hun tak kan hriat loh a hlâwkna pangana chu tûna dinhmun khirh tak kan tawnte aṭanga insiam ṭhatna hun remchâng min pêk vang a ni. (Sâm 119:71 chhiar rawh.) Hêng ni hnuhnûngte hi “hun khirh takte” a ni tak zet a ni. (2 Tim. 3:1-5) Setana khawvêla mi tam tak hian min huat tlat avângin, kan rinna avânga sawisak pawh kan ni mai thei a. (Joh. 15:19; 16:2) Chutianga fiahna kan tawn huna kan inngaihtlâwm a, Pathian kaihhruaina kan zawn chuan, kan rinna chu meia tihfai emaw, tihthianghlim emaw ang mai a ni ang a. Kan chau chhe lo vang. Chutih a hnêkin, kan rin phâk bakin Jehova kan hnaih lehzual zâwk ang.—Jak. 1:2-4; 4:8.
10. Engin nge hun chu kal chak tak anga lantîr?
10 Kan dinhmun azirin hun chu a kal chak emaw, a kal muang emaw angin kan hre thei a. Kan buai êm êm a, sana pawh kan en hman loh châng chuan hun chu kal chak hle angin a lang thei a ni. Chutiang bawkin, Jehova’n hna thawh tûr phurawm tak min pêkte thawka kan buai hle chuan tâwpna nî leh hun chu rawn thleng hma hle angin kan ngai mai dâwn a ni. He mi chungchângah hian hriak thih tam zâwk chuan entawn tûr ṭha tak an siam a ni. Tûnah chuan kum 1914-a Isua Lala a ṭhut hnua thil thleng chu tâwitêa ennawnin, hriakthih ṭhenkhat ngaihven renga an awm loh laia ṭhenkhat ngaihven renga an awm dân pawh i lo en bawk ang u.
HRIAK THIHTE CHU INRING RENGIN AN AWM
11. Kum 1914 hnu khân, engvângin nge hriak thih ṭhenkhat chuan Lalpa chu tlai anga an ngaih?
11 Nula thianghlim leh talent tehkhin thu Isua sawi kha ngaihtuah chhuak leh teh. Chu tehkhin thua nula thianghlimte leh chhiahhlawhte chuan mo neitu, a nih loh leh an pu lo kîr hun tûr hria sela chuan, ngaihven renga an awm a ngai hauh lo vang. Mahse, a hun tûr an hriat loh avângin an inrin reng a ngai a ni. Hriak thihte chuan kum 1914 chu kum pawimawh bîk a ni dâwn tih chu kum rei tak chhûng an lo hre tawh nain, eng thil chiah nge thleng dâwn tih an hre lo va. An beisei anga thil a thlen tâk lovah chuan Mopa chu a tlai angin a lang thei a ni. A hnuah unaupa pakhat chuan heti hian a sawi a: “Kan zînga ṭhenkhat chuan October 1914 kuma kâr hmasa ber chhûnga vâna lâwn kan inring tak zet a ni,” tiin.
12. Engtin nge hriak thihte chu rinawm leh fing taka an awm?
12 Tâwpna lo thleng tûra an beisei êm êm chu a lo thleng ta si lo, an tâna a beidawn thlâk dân tûr chu han ngaihtuah teh! Chu mai bâkah, unaute chuan Khawvêl Indopui 1-na chhûngin dodâlna an tâwk bawk nên. Muhîl ang maia awm hun, chêt hleih theih lohna dinhmunah an ding a ni. Mahse, kum 1919 chuan chutiang dinhmun aṭanga kaih thawh leh an ni a. Isua chu Pathian thlarau lam biak inah rawn kalin, endikna hun chu a rawn thleng ta. Amaherawhchu, an zînga ṭhenkhat chuan chu endikna chu an pal tlang zo lo va, an Pu, “sumdâwnna,” a nih loh leh hna chu an thawh chhunzawm zêl thei ta lo a ni. (Mt. 25:16) Anni chu nula thianghlim âte ang maiin an thlarau lam khâwnvâr tui thun khat reng tûrin an taima tâwk lo va. Tin, bawih zawmthawpa ang maiin, Lalram hming avânga mahni inphatna neih chu an inhuam lo a ni. Mahse, hriak thih a tam zâwkte chuan chûng indo kum hrehawm tak chhûng pawh chuan an Pu rawng bâwl châkna nasa tak leh rinawmna tihnghîn rual loh an lantîr a ni.
13. Kum 1914 hnua bawih pâwl rilru put hmang chu eng nge ni a, tûn laia a rilru put hmang chu eng nge ni?
13 Kum 1914 hnu chuan, Vênnainsâng chuan he thu pawimawh tak hi a sawi a: “Unaute u, kan zînga Pathian lama rilru dik tak pu apiangte chuan A ruahmanna eng chungah mah lunghnualna kan nei lo va. Keimahni duhzâwng anga thil a thlen chu kan beisei lo; chuvângin, October, 1914-a thil dik lo kan beisei tih kan hriat chhuah khân Lalpa’n keimahni mil tûra a ruahmanna a tidanglam lo kha kan lâwm a. Chutianga a tih chu kan duh lo a ni. A thil ruahman leh thiltumte hriat thiam theih chu kan duh mai chauh a ni,” tih hi. Chutiang inngaihtlâwmna leh inpêkna chu tûn laia Lalpa hriak thihte chhinchhiahna a la ni zêl a. Anni chuan thlarauva thâwk khum angah an inchhâl lo va, Isua’n he leia hna thawh tûr a pêkte thawh chu an tum tlat zâwk a ni. Tûnah hian, lei lam beiseina nei “berâm dang” zînga “mipui tam tak” chuan an ngaihven rengna leh ṭhahnemngaihna chu an entawn a ni.—Thup. 7:9; Joh. 10:16.
NGAIHVEN RENGA AWMIN
14. Engtin nge thlarau lam chaw min pêk nâna Pathian hmanraw hman vawn tlatna chuan min vênhim?
14 Hriak thih Kristiante ang bawkin, mipui tam tak harhvâng takte chuan thlarau lam chaw min pêk nâna Pathian hmanraw hman chu an vuan tlat a. Chuvângin, anni pawh chuan Pathian Thu leh thlarau hmangin an thlarau lam khâwnvâr tui chu an tikhat reng anga sawi theih a ni. (Sâm 119:130; Johana 16:13 chhiar rawh.) Chutianga tihchak chu an nih avângin, anni chu Krista lo kîr leh hun atân inring rengin an awm a, fiahna khirh tak hnuaiah pawh an ding nghet tlat a ni. Entîr nân, Nazi tân in pakhata unaute chuan a tîrah chuan Bible pakhat chauh an nei a. Thlarau lam chaw dawn tam lehzual theih nân an ṭawngṭai a ni. Chu mi hnu rei lo têah chuan, unaupa pakhat tâng thar chuan a ke lem thinga siam chhûngah chuanVênnainsâng tûn hnai chhuak tlêm azâwng thukruin, tân inah a rawn keng lût thei tih an hre ta a. Chuta dam khaw chhuakte zînga unaupa pakhat Ernst Wauer-a chu hriak thih a ni a, ani chuan: “Jehova chuan chûng thuziaka mi tichak thei tak takte chu chhinchhiah theih tûrin mak takin min ṭanpui a ni,” tiin a sawi a. Heti hian a sawi zawm a ni: “Tûnah chuan thlarau lam chaw hmuh chu a awlsam tawh êm êm a, hêngte hi kan hlut tak zet em? Jehova chuan amah rinchhantute, a laka rinawm tlatte, leh a dawhkâna chaw kîltute chu namên lovin mal a sâwm ang tih ka ring nghet tlat a ni,” tiin.
15, 16. Engtin nge Kristian rawngbâwlnaa nupa pakhat ṭhahnemngaihna chu malsâwm a nih a, chutiang chu thiltawnte aṭang chuan engnge i zir theih?
15 Berâm dangte chuan Krista unaute theihtâwpa thlâwpin, an Puin hna thawh tûr a pêkte chu an thawk a. (Mt. 25:40) Isua tehkhin thua chhiahhlawh suaksual leh zawmthaw ang lo takin, anni chuan Lalram dah pawimawh ber theih nâna mahni inphat leh theihtâwp chhuah chu an inhuam a ni. Entîr nân, Jon-a leh Masako te chu Kenya rama China Ṭawng hmang awmna bial ṭanpui tûrin sâwm an ni a, atîrah chuan an hreh deuh hlek a. Mahse, an dinhmun ngun taka an han ngaihtuah hnu chuan chuta insawn chu an titlu ta a ni.
16 Chutianga an inpêkna avâng chuan malsâwmna tam tak an dawng a. Heti hian an sawi a ni: “Chuta tlawhhma rawng bâwl chu nuam tak a ni” tiin. Bible zirpui pawh pasarih an nei nghâl a. Thiltawn phûrawm dang tam tak pawh an nei bawk. Heti hian an sawi zawm a ni: “He mi hmuna rawng min bâwltîr avâng hian nî tin Jehova hnênah lâwmthu kan sawi a ni,” tiin. Unaunu leh unaupa dang tam takte pawhin tâwpna lo thlen hmaa Pathian rawngbâwlnaa inhman zawh an duhzia an thutlûkna siam hmangin an târ lang bawk a ni. Gilead School chhuak, missionary anga rawngbâwl mi sâng tam takte hi han ngaihtuah teh. Vênnainsâng (English), October 15, 2001 chhuaka thuziak “Kan Theih Anga Ṭhain Kan Ti” tih chu chhiarin, engvângin nge missionary rawngbâwlna chungchâng chu hriatthiam kan tum loh vang ni? Missionary rawngbâwlna chungchâng thuziak ngaihnawm tak i chhiar lai chuan, Pathian chawimawi nân leh chutianga i tih avânga hlimna i neih nâna i rawngbâwlna i tihpun theih dân tûr ngaihtuah ang che.
NANG PAWH NGAIHVEN RENGIN AWM RAWH
17. Engtin nge tâwpna nî leh a hun tûr kan hriat lohna chu malsâwmna a nih?
17 He khawvêl tawpna nî leh a hun chiah kan hriat lohna chu kan tân malsâwmna a ni tih a chiang hle a. Lunghnual emaw, beidawng emawa awm ai chuan a duhzâwng tia kan inhman hian hmangaihna ngah kan Pa, Jehova kan hnaih lehzual a ni. Leilehnaa kan kut nghat reng a, min tibuai thei thilte pumpelhna chuan kan Pu rawngbâwlnaah hlimna nasa tak min hmuhtîr a ni.—Lk. 9:62.
18. Engvângin nge Pathian rawng kan bâwlnaah rinawm taka awm kan duh?
18 Pathian rorêlna nî chu kan hnaih tawh hle a. Kan zînga tumah hian Jehova leh Isua tihlunghnual chu kan duh lo a ni. Anni chuan hêng ni hnuhnûng chhûngte hian chanvo hlu tak min pe a. Chutianga min rintâwkna chu kan va ngaihlu tak êm!—1 Timothea 1:12 chhiar rawh.
19. Engtin nge ngaihven renga kan awm theih?
19 Kan beisei chu vâna nun emaw, lei Paradis-a nun emaw pawh ni se, thu hrilh leh zirtîra siam tûra Pathian hna min pêk hi rinawm taka thawh i tum tlat ang u. Jehova nî lo thlen hun tûr leh dâr kâr chu tûn thleng hian kan la hre lo va, kan hriat kher pawh a ngai hek lo. Ngaihven rengin kan awm thei a, kan awm chhunzawm zêl thei a ni. (Mt. 24:36, 44) Jehova kan rinchhan tlat a, a Ram kan dah pawimawh ber chhûng chuan kan lunghnual ngai lo vang.—Rom 10:11. (w12-E 09/15)
[Footnote]
[Zirlai Atâna Zawhnate]
[Phêk 26-naa milem]
Dinhmun harsa tak hnuaiah pawh thlarau lam chaw zawng rawh
[Phêk 27-naa milem]
Kristian thiltihtea kan buai reng chuan hun a kal chak duh hle
