1-3. 1) ¿Toni tachiualismej uelis techpaleuis maj tikajsikamatikan tein tamachtij Jesús ika ome neskayomej? 2) ¿Toni netajtanilmej moneki tiknankiliskej?

XIKONNEMILI ke se takat akin tel ueyichiujkej mitsontajtania xikonuika itech motepos itech se nechikol. Tepitsin achto ke tikonuikas, tikonita ke gasolina tein kipia motepos amo ajsis uan moneki tionyas tikonkouatiuj okachi. Takat ijsiui uan peua mitsonixtemoua, uan kemej amo tionejko, kiiluia okse taltikpaknenkej maj kiuika. Keman tejuatsin tionejko, takat ipa yajkiya. ¿Keniuj tionmomachiliskia?

² Axkan xikonnemili ke tejuatsin nejon takat akin tel ueyichiujkej, uan tikonixpejpenak eyi takamej akin inintech tiontakuaujtamati uan tikonkauilia seki tekimej tein motelnekij. Tikonmelaua toni moneki kichiuaskej uan nochin eyin niman kijtouaj ke kichiuaskej. Sayoj ke ijkuak tionmokepa tikonmati ke sayoj omen kichiujkej tein tiontanauatij. Expatika takat nion tepitsin mochikauak kichiuas tekit uan sayoj kitemoua keniuj motajtouis. ¿Toni tikonchiuaskia?

³ Tachiualismej tein tikitakej tamati kemej neskayomej tein Jesús ika tamachtij, kampa ika tajtoj seki ichpochmej uan platajtomin. Ika nejin ome neskayomej kimelauak keyej itech itamian tonalmej sekin taixpejpenalmej akin kichiuaj kemej Cristo yeskiaj melaujkej uan takuaujtamachmej, sayoj ke sekin amo (Mat. 25:1-30). * Jesús kiyeknextij nejin tamachtilis ijkuak kijtoj: “Xiijsatokan uan xitatachixtokan porin amo nankimatiske katiyejua tonal nion katiyejua hora”. Keman kijtoj nejin, kiteajsikamatiltij ke imomachtijkauan amo kimatiskiaj kemanian kiixpoloskia tein amo kuali tein kiixyekana Satanás (Mat. 25:13). Yekmelauj, itech nejin tonalmej motelneki tiktakamatiskej tein kijtoj. ¿Keniuj techpaleuia komo tiktakamatij tein kijtoj Jesús? ¿Akonimej kinextianij ke tachixtokej? Uan, ¿toni moneki  tikchiuaskej tein techpaleuis maj titachixtokan?

4. ¿Keyej tein tikchiuaj kemej Cristo amo moneki tikmatiskej kemanian ejkos ixpoliuilis?

⁴ Onkak tekimej tein moneki tikchiuaskej itech se hora tein ixyetokya, kemej ijkuak moneki tiajsiskej kampa titekitij, ijkuak tikitatij tapajtijkej oso tikchiaj tepos tein techuikas kansaika. Sayoj ke, onkak okseki tekimej kampa okachi motelneki maj sayoj se tanemili itech tekit tein se kichiujtok uan amo itech hora tein se yetok, kemej tein kichiuaj taltikpakneminij tein kiseuiaj tit ijkuak kansaika motatikui oso akin tapaleuiaj ijkuak panoua se ueyi ouijkayot. No ijkon, kemej amo uejkaua ixpoliuis tein amo kuali itech taltikpak, okachi motelneki tikteixmatiltiskej toni kichiujtok Jiova tein ika techmakixtis. Sayoj ke akin tikchiuaj kemej Cristo, amo moneki tikmatiskej kemanian ejkos ixpoliuilis. Tein melauj, onkak makuil nepaleuil tein tikseliaj porin amo tikmatij kemanian uan katiyejua hora yeski.

5. Kemej amo tikmatij kemanian ejkos ixpoliuilis, ¿keniuj ueli tiknextiaj toni onkak itech toyolo?

⁵ Yekinika nepaleuil, kemej amo tikmatij kemanian ejkos ixpoliuilis, uelis tiknextiskej toni onkak itech toyolo. Jiova techpoujkaita, yejua ika, techkaua maj tikixpejpenakan ox tiksentokaskej tiktekitiliskej oso amo. Melauak ke tinochin tiknekij timakisaskej ijkuak ixpoliuis tein amo kuali, sayoj ke tiktekitiliaj Jiova, porin tiktasojtaj uan amo sayoj porin tiknekij tinemiskej nochipaya (xikonixtajtolti Salmo 37:4). Tikuelitaj tikchiuaskej tein technauatia uan tikmatij ke tein techmachtia semi techpaleuia (Is. 48:17). Amo tikitaj ke ouij se kitakamatis itanauatiluan (1 Juan 5:3).

6. Keman tiktekitiliaj Jiova porin tiktasojtaj, ¿keniuj momachilia uan keyej?

⁶ Ojpatika nepaleuil, kemej amo tikmatij kemanian ejkos ixpoliuilis ueli tikyolpaktiaj Jiova. Amo tiktekitiliaj sayoj porin tiknekij maj techmaka tein kuali oso porin ejkotokya ixpoliuilis, ta tikchiuaj porin tiktasojtaj. Titapaleuiaj maj Jiova kinexti ke Satanás, akin semi kiixnamiki, se takajkayaujkej (Job 2:4, 5; xikonixtajtolti Proverbios 27:11). Kemej Amokuali kichiuani maj onka tekokojkayot uan tajyouilis, ika miak yolpakilis tikpaleuiaj iueyitaixyekanalis Jiova uan tikixnamikij itaixyekanalis Satanás tein semi amo kuali.

7. ¿Keyej tikonneki tikonkuis monemilis uan ika tikontekitilis Dios uan tikonpaleuis oksekin?

⁷ Expatika nepaleuil, kemej amo tikmatij kemanian ejkos ixpoliuilis, ueli tiknextiaj ke amo tikchiaj tikseliskej teisa keman tikuij tonemilis uan ika tiktekitiliaj Dios uan tikinpaleuiaj oksekin. Axkan, sekin taltikpakneminij tein amo kineltokaj Dios kimouiliaj maj ejko se ixpoliuilis. Yejua ika, kijtouaj: “Ma titatakuakan san uan ma timouintikan san porin mosta timikiske” (1 Cor. 15:32). Sayoj ke tejuan amo timouij. Amo timoxelouaj nion tikchiuaj sayoj totanejnekilis (Prov. 18:1). Ta okachi kuali, tikuij totonaluan, tochikaualis uan okseki taman tein tikpiaj uan ika tikteixmatiltiaj iTekiuajyo Dios (xikonixtajtolti Mateo 16:24). Semi techyolpaktia tiktekitiliskej Dios uan okachi keman tikinpaleuiaj oksekin maj kiixmatikan Jiova.

8. ¿Katiyejua neskayot tein moajsi itech Biblia techmachtia ke moneki senkis titakuaujtamatiskej iuan Jiova uan itech iTajtoltsin?

⁸ Naujpatika nepaleuil tein tikseliaj porin amo tikmatij kemanian ejkos ixpoliuilis, techpaleuia maj senkis titakuaujtamatikan iuan Jiova uan maj tikchiuakan tein kijtoua iTajtoltsin. Kemej titajtakouanij, semi totech titakuaujtamatij. Pablo kinyolmajxitij nochin akin kichiuayaj kemej Cristo: “Naken moyolmachilia ke yejua semi se yek takuautamatkatagat [...] moneki ma kiyekita niyalis para ma amo uetsiti tech in tajtakol”. Pablo ika tajtoj 23,000 israelitas akin amo kitakamatkej Jiova uan amo kalakkej itech Tal tein motenkaujka kinmakas. Yejua kijtoj: “Nochi nijin [...] ijkuiliutok nochi tech in Tajtoltsin de Dios para technejmachtis de nochi tejuan ten axkan tinentinemij tech nijin [‘itamian’,  TNM] tonalme” (1 Cor. 10:8, 11, 12).

9. ¿Keniuj ouijkayomej uelis kichikauaskej totakuaujtamatilis uan okachi timotokiskej iuan Dios?

⁹ Makuiltika nepaleuil tein tikseliaj porin amo tikmatij kemanian ejkos ixpoliuilis, techpaleuia maj ouijkayomej tein tipanouaj kichikauakan totakuaujtamatilis (xikonixtajtolti Salmo 119:71). Yekmelauj, kemej amo uejkaua ixpoliuis tein amo kuali itech taltikpak, itech nejin tonalmej onkak “ueyi tajyouilis” (2 Tim. 3:1-5). Miakej taltikpakneminij akin kinixyekana Satanás techtauelitaj, yejua ika, uelis techixnamikiskej porin titaneltokaj (Juan 15:19; 16:2). Sayoj ke komo tiyolyemankej uan tiktemouaj maj Dios techixyekana, tayejyekolis yeski kemej tit tein kiyektalia oso kichipaua totakuaujtamatilis. Amo timosenkauaskej, ta okachi timotokiskej iuan Jiova kemej amo keman tiknemilianij (Sant. 1:2-4; 4:8).

10. ¿Keyej kemansa tikmachiliaj ke tel ijsiujka panoua tonal?

¹⁰ Uelis tikmachiliskej ke tonalmej tel ijsiujka oso yolik panouaj. Keman tikchiujtokej teisa, uan amo tikitaj katiyejua hora tiyetokej, nion tikmachiliaj keniuj panoua tonal. No ijkon, komo tikchiujtokej tekit tein Jiova techmakak, nion tikmachiliskej keman ejkos ixpoliuilis. Ika nejin tachiualis, tokniuan taixpejpenalmej kikauaj se tel kuali neskayot. Maj tikitakan toni panok satepan ke Jesús kiselij tekiuajyot itech xiuit 1914. Uan tikitaskej ke sekin kinextijkej ke tachixtoyaj sayoj ke sekin amo.

11. Satepan ke panok xiuit 1914, ¿keyej sekin tokniuan taixpejpenalmej kinemilijkej ke Jesús amo niman ualaskia?

¹¹ Maj oksepa tikitakan neskayomej tein ika tajtoj Jesús. Komo ichpochmej kimatiskiaj kemanian ejkoskia novio oso takeualmej ininTeko, amo monekiskia tachixtoskiaj. Sayoj ke amo kimatiaj, yejua ika monekia tachixtoskej. Miak xiujmej achto, tokniuan taixpejpenalmej kimatiajya ke itech xiuit 1914 panoskia teisa tein motelnekia maski amo kiyekajsikamatiaj toni katka. Keman ejkok nejon xiuit uan amo mochiuak tein kichiayaj, sekin kinemilijkej ke Jesús amo niman ualaskia. Satepan, se tokniuj kijtoj: “Sekin yekmelauj tikchiayaj tiyaskej iluikak itech yekinika semana tein kipiaya octubre [itech xiuit 1914]”.

12. ¿Keniuj kinextijkej tokniuan taixpejpenalmej ke katkaj melaujkej uan takuaujtamachmej?

¹² Uelis tiknemiliskej ke tel amo kuali momachilijkej keman kiitakej ke ixpoliuilis amo ejkok keman yejuan kichiayaj. Uan no, keman peuak yekinika neteuilis itech nochi taltikpak, kijyouijkej miak taixnamikilis. Nejon kichiuak maj tanojnotsalis moitani ke ixpoliuiskia. Tokniuan taixpejpenalmej kemej yeskia kochtoyaj. Sayoj ke itech xiuit 1919 teisa kinijxitiskia. Jesús kemej yeskia ualajka kiitako toni kichiujtoyaj akin kijtouayaj kichiuayaj kemej Cristo. Sekin tokniuan taixpejpenalmej amo kichiujtoyaj tein monekia uan amo uelik kitekitilijkejok Tekiuaj (Mat. 25:16). Nejin tokniuan amo tachixtoyaj, kichiujkej kemej ichpochmej akin amo yektanemiliayaj tein amo kitalilijkej tein ika xotaskia inintauiloni. Uan no ijkon kemej takeual akin tatsiuia, amo kinekkej kipaleuiskej iTekiuajyo Dios. Sayoj ke, miakej tokniuan taixpejpenalmej kinextijkej ke amo kikauayaj ininTeko uan kinejnekiaj kitekitiliskej, maski kipanokej miak ouijkayomej itech xiujmej keman mochiujtoya neteuilis.

13. Satepan ke panok xiuit 1914, ¿keniuj tokniuan taixpejpenalmej kinextijkej ke kipiayaj se kuali tanemilil uan toni kinextiaj axkan?

¹³ Satepan ke panok xiuit 1914, itech nejin amaix moijkuiloj: “Tokniuan, tejuan akin tikpiaj se kuali tanemilil ika tein kiixtalia Dios amo tikmachiliaj ke techkajkayauak. Amo tiknekiaj tikchiuaskej totanejnekilis, yejua ika, keman tikitakej ke timopolojtoyaj ika tein tikchiayaj maj pano itech metsti octubre xiuit 1914, techyolpaktij maj toTekotsin amo kipatani tein kiixtalijtoya kichiuas sayoj porin tejuan ijkon tiknekiaj. Amo tiknekiaj maj kichiua nejon. Sayoj tiknekij tikajsikamatiskej tein kiixtalijtok  kichiuas uan Itanejnekilis”. Axkan, tokniuan taixpejpenalmej kisentokaj kinextiaj ke yolyemankej uan kimoujkatokaj Dios. Amo kijtouaj ke kiselijtokej itanemililuan Dios ijkon kemej akin kijkuilojkej Biblia, sayoj ke kiixtalijtokej kichiuaskej tekit tein Jesús kinmakak itech taltikpak. Uan no, axkan moajsij “uel miak tagayot” tein kisaj itech ‘okseki ichkamej’, akin kichiuaj kemej Cristo tein kichiaj nemiskej nochipaya nikan taltikpak, tein kitojtokaj ininneskayo taixpejpenalmej (Apoc. 7:9; Juan 10:16).

14. ¿Keniuj techpaleuia komo tiktakamatij takeual takuaujtamach uan tamatkej akin Jiova kiixtalij maj techmachti?

¹⁴ Ijkon kemej tokniuan taixpejpenalmej, akin poujtokej itech miakej taltikpakneminij, kinextiaj ke tachixtokej porin kitakamatij akin Jiova kiixtalij maj kinmaka nemachtil tein kemej yeskia takual. Ijkon, ijkuak kitakamatij nochi tein takeual takuaujtamach uan tamatkej kinmachtia, kemej yeskia kitaliliaj inintauiloni tein ika xotas (xikonixtajtolti Salmo 119:130 uan Juan 16:13). Nejin kinyolchikauas maj amo kikauakan Dios, maski kipanoskej uejueyi ouijkayomej tein kiyejyekoua inintakuaujtamatilis, uan ijkon kinextiaj ke kichixtokej tonal keman mokepas Cristo. Kemej neskayot, kampa nazis kintsakuayaj taltikpakneminij, tokniuan tein ompa moajsiaj sayoj kipiayaj se Biblia, yejua ika kitajtanijkej Jiova maj kinmakani okachi tamachtilis tein kemej yeskia takual. Seki tonalmej satepan, kimatkej ke se tokniuj tein yekin kitsakkaj uelik kikalakij miak amaixmej Tanejmachtijkej porin kintatij itech ikes tein chijchiujtoya ika kouit. Semej tokniuan akin makiskej, yejua tokniuj Ernst Wauer, akin katka taixpejpenal, uan kijtoj seki xiujmej satepan: “Jiova techpaleuij maj mokauani itech totsontekon miak tamachtilis tein kipiayaj amaixmej tein semi techyolchikauak”. Uan no kijtoj: “Axkan amo ouij tikseliaj tamachtilis tein kemej yeskia takual, sayoj ke, ¿yekmelauj tiktasojkamatij? Nikyekmati ke Jiova kinmakasok miak tatiochiualismej akin iuan takuaujtamatij, akin amo kikauaj uan kiseliaj tamachtilis tein kitemaka”.

15, 16. ¿Toni tatiochiualismej kiselijkej seki namikuanij ijkuak kitayekanaltijkej tanojnotsalis, uan toni techmachtiaj neskayomej kemej nejon?

¹⁵ Okseki ichkamej no kintelpaleuiaj iikniuan Cristo keman kichiuaj tekit tein toTekotsin kikauak (Mat. 25:40). Yejuan amo kemej “takeual ne ten amo yolkuali uan [...] tatsiu” tein Jesús ika tajtoj itech neskayot, ta ika miak yolpakilis  kichiuaj nochi tein monekis uan ijkon kitayekanaltiskej iTekiuajyo Dios itech ininnemilis. Kemej neskayot, Jon uan Masako kinyoleujkej maj yakan Kenia maj kinnojnotsatij taltikpakneminij akin tajtouaj chino. Yejuan omeyolouayaj, sayoj ke ijkuak kichiujkej netataujtil uan kiitakej ox ueliskiaj yaskej, kiixtalijkej ompa tapaleuitiuij.

¹⁶ Nejin tein kiixtalijkej kichiuaskej kinualkuilij miak tatiochiualismej. Yejuan kijtouaj: “¡Nikan tel kualtsin se tanojnotsa!”. Kipeualtijkej chikome nemachtilmej ika Biblia uan kipanokej miak taman tein kualtsin. Ijkon kimelauaj tein kipanokej: “Mojmostaj tiktasojkamatiliaj Jiova porin techkauak maj nikan tiyetokan”. Yekmelauj miakej tokniuan kinextianij ke kinekij kisentokaskej kitekitilijtoskej Dios maski amo kimatij kemanian ejkos ixpoliuilis. Maj inintech titanemilikan tel miakej tokniuan akin kichiuaj kemej Cristo, akin kiselijkej nemachtil tein kitemakaj Galaad uan peuak kichiuaj tekit kemej misionero. Komo tikonneki tikonmatis toni kichiua se misionero itech se tonal, xikonixtajtolti tamachtilis “Hacemos todo lo que podemos”, tein kisak itech amaix La Atalaya 15 de octubre de 2001. Keman tikonixtajtoltijtos, xionmotajtani keniuj ueliskia okachi tikonchiuas tekit tein ika tikonueyichiua Jiova uan tein mitsonualkuilia yolpakilis.

17. ¿Keniuj techpaleuia maj amo tikmatikan kemanian ejkos ixpoliuilis?

¹⁷ Ika nochi tein tikitakejya, tikajsikamatij ke tikseliaj miak taman nepaleuilmej porin amo tikmatij kemanian ejkos ixpoliuilis. Amo tikmachiliaj ke techkajkayauaj porin ayamo mochiua tein tikchiaj, ta okachi kuali tikchiuaj itanejnekilis Jiova uan tikmachiliaj ke okachi iuan timotokiaj toTajtsin tetasojtakej. Ijkuak amo tikauaj maj nion teyi techtapololti, ta tiksentokaj tiktekitiliaj toTekotsin, ijkon “keme se tayuntajuijke ten tekiti”, nejon techualkuilia ueyi yolpakilis (Luc. 9:62).

18. ¿Keyej amo tiknekij maj tami totakuaujtamatilis?

¹⁸ Amo uejkaua ixpoliuis tein amo kuali itech taltikpak, yejua ika, tiknekij tiksentokaskej tiktekitilijtoskej Jiova. Yejuatsin uan Jesús techmakanij kualtsitsin tekimej itech nejin itamian tonalmej. ¡Semi tiktasojkamatij maj totech takuaujtamatikan! (Xikonixtajtolti 1 Timoteo 1:12.)

19. ¿Keniuj tiknextiaj ke tikchixtokej tonal tein Jiova kiixtalijtok?

¹⁹ Komo tikpiaj nechialis tinemiskej iluikak oso itech Xochital, maj tikixtalikan tiksentokaskej titanojnotsaskej uan tikinpaleuiskej oksekin maj mochiuakan imomachtijkauan Jesús, ijkon kemej Dios technauatij. Ayamo tikmatij katiyejua tonal uan katiyejua hora ejkos tamilis, uan amo moneki tikmatiskej. Uelis tiknextiskej ke tikchixtokej uan moneki ijkon tikchiuaskej (Mat. 24:36, 44). Komo senkis titakuaujtamatij iuan Jiova uan tiktayekanaltiaj iTekiuajyo, yejuatsin amo keman techkajkayauas (Rom. 10:11).