1-3. (a) Anto ran situasyon so ontulong ed sikatayo pian natalosan so duaran parabolo nen Jesus? (b) Anto ran tepet so kaukolan tayon ebatan?

IMADYIN mo pan ingganggan ka na sakey ya opisyal na gobierno a man-drive parad sikato diad sakey ya importantin miting. Balet nen kuan mo lan abeten, anengneng mon kulang la so gasolinay luluganan. Kanian kaukolan moy manpagasolinan tampol. Legan mon manpapagasolina, sinmabi imay opisyal. Inanap to ka balet agto ka naromog. Agla akalagar kanian anawag lay arum. Kapawil mo, anggapo la imay opisyal. Anto kasi naliknam?

² Natan imadyin mon sika imay opisyal tan amili ka na taloran kualipikadon lalaki ya mangasikaso ed importantin kimey. Impaliwawam no antoy iilaloan mod sikara tan inawat da itan. Balet kapawil mo, naamtaan mon duara labat so tinmulok ed pagagawam, tan manbabaraan ni ingen imay sakey ya agtinmulok. Diad tua, agto anggan sinali nankimey. Antoy naliknam?

³ Diad samay parabolo nen Jesus nipaakar ed saray mamarikit tan talento, sikatoy angusar na miparan situasyon pian iyilustra no akin ya diad panaon na anggaan et wala ray alanaan a Kristianon mansiansian matoor tan makabat, balet wala ray andi. * (Mat. 25:1-30) Indanet to iya diad impangibagan: “Mantultuloy kayo sirin a manbantay, lapud agyo amta so agew odino say oras”​—say panaon sano ipaakseb la nen Jesus so panangukom na Dios ed mundo nen Satanas. (Mat. 25:13) Onaplika iyan simbawa ed panaon tayo. Panon tayon nagunggonaan diad pansiansian akabantay? Siopa ray nansiansian akaparaan parad kilalaban? Tan antoy kaukolan tayon gawaen pian makapansiansia tayon akabantay?

4. Pian makapansiansian akabantay, akin ya agkaukolan ya amtaen so eksakton isabi anggaan?

⁴ Wala ray kimey a kaukolan ya imanoey panaon, singa bilang say pantrabaho ed pabrika, pampacheck-up ed doktor, odino pantalaran na luluganan. Balet parad arum a trabaho a singa say bombero tan rescuer, say pangimanod oras et makadisturbo odino mapeligro ni ingen. Diad saratan a situasyon, mas importante so panggawan tampol ed kimey nen say pangimanod oras. Ontan met, say kimey a panagpulong so ontulong ed saray totoon naamtaan no anto lay ginawa nen Jehova pian iliktar so totoo. Mas lalo lan importante iyan kimey natan, legan a manasingger so anggaan. Pian makapansiansian akabantay tan nagawaan iray iilaloan nen Jehova ed sikatayo, agtayo kaukolan ya amtaen so eksakton isabi anggaan. Diad tua, walay limaran paraan a nagunggonaan tayo diad agpakaamta ed eksakton agew odino oras na isabi na satan.

5. Panon a say agpakaamtad isabi anggaan so ontulong ed sikatayon napaneknekan no antoy walad puso tayo?

⁵ Unona, say agpakaamtad isabi anggaan so ontulong ed sikatayon napaneknekan no antoy walad puso tayo. Rerespetoen itayo nen Jehova diad impangiter tod sikatayoy pankanawnawan ipatnag so katooran ed sikato. Manlilingkor tayod si Jehova lapud sikatoy inaro tayo, aliwan pian makaliktar ed anggaan na sayan sistema, odino nawalaay bilay ya andi-anggaan. (Basaen so Salmo 37:4.) Maliket tayon gagawaey linawa to, tan amta tayon parad pankaabigan tayoy ibabangat to. (Isa. 48:17) Agtayo ipapasen a makapabelat iray ganggan to.​—1 Juan 5:3.

6. No manlingkor tayod Dios lapud panangaro tayod sikato, antoy nalikna to tan akin?

⁶ Say komadua et naikdan itayo na pankanawnawan napaliket so puso nen Jehova. Sano sikatoy panlingkoran tayo lapud aro, aliwan lapud petsa odino tumang, makatulong tayod pamaneknek a si Satanas et matila. (Job 2:4, 5; basaen so Uliran 27:11.) Amta tayon si Satanas so sengegay dakel a kairapan, kanian maliket tayon suportaay inkasoberano nen Jehova tan ipulisay so uley nen Satanas.

7. Akin a labay mon usarey bilay mo a manlingkor ed Dios tan ontulong ed arum?

⁷ Komatlo, lapud agtayo iisipen so eksakton petsa na isabi anggaan, napaseseg tayon mansakripisyo diad panlilingkor tayod si Jehova. Saray arum ya agmakapikabat ed Dios et manisia met ya mangangga la iyan mundo. Natatakot iran onsabi la itan, kanian say panmoria da la ingen et ‘Mangan tan oninum tayo ta nabuas et ompatey tayo.’ (1 Cor. 15:32) Balet agtayo natatakot tan labay tayoy ontulong ed arum. (Uli. 18:1) Iyuuna tayoy panlabayan nen Jehova tan uusaren tayoy panaon, biskeg, tan kaykayarian tayo pian ipulong so maong a balita na Panarian. (Basaen so Mateo 16:24.) Maliket tayon manlilingkor ed Dios, lalo lad itutulong ed arum a makapikabat ed sikato.

8. Anton alimbawa so mangipapanengneng a kaukolan tayoy sigpot a panagmatalek ed si Jehova tan ed Salita to?

⁸ Say komapat a gunggona et sigpot tayon makapanmatalek ed si Jehova tan maseet tayon niyaplikay Salita to diad bilay tayo. Lapud agtayo perpekto, mainomay tayoy manmatalek ed sarili tayo. Oniay insimbawa nen Pablo ed amin a Kristiano: “Samay maniisip a sikatoy akaalagey et manalwar komon ya agnatumba.” Antis na iloob dad Insipan a Dalin, walay 23,000 ya Israelitan inatey lapud agda intulok ed si Jehova.  Unong ed si Pablo: ‘Sarayan bengatla et nisulat bilang pasakbay ed sikatayon nasabian na anggaan na saray sistema na mundo.’​—1 Cor. 10:8, 11, 12.

9. Panon a saray subok et mamasimbalo ed sikatayo tan mas mamaapit na relasyon tayod si Jehova?

⁹ Komalima, tutulongan itayo na saray kaplesan a subok pian napasimbaloy bilay tayo. (Basaen so Salmo 119:71.) Saray kaunoran ya agew na sayan mundo et “nikadkaduma tan mair-irap a panaon.” (2 Tim. 3:1-5) Dakel so mamusol tan mamasegsegang ed sikatayo. (Juan 15:19; 16:2) No manpaabeba tayo tan kerewey panangigiya na Dios legan na saray subok, napasimbalo tan napabiskeg so pananisia tayo. Agtayo onsusuko. Imbes, mas lalo itayon onapit ed si Jehova.​—Sant. 1:2-4; 4:8.

10. Antoy gawaen mo pian agnaliklikas ya onlabas so panaon?

¹⁰ Nayarin maples odino matantan so ilabas na oras. Balet no dakel so gagawaen tayo tan agtayo labat banbantayan so oras, main-inomay itan ya onlabas. Ontan met, no makulikuli tayon gagawaen so linawa nen Jehova, agtayo naliklikas so isabi anggaan. Saray alanaan so maabig ya alimbawa tayod saya. Pantongtongan tayoy agawa kayari na inkitrono nen Jesus bilang Ari nen 1914 tan amtaen tayo no panon ya apaneknekan na arum ya alanaan ya akaparaan ira tan say arum et andi.

11. Kayari 1914, akin ya inisip na pigarad saray alanaan ya singa naatrasadoy Jesus?

¹¹ Nonoten tayo pa imay parabolo nen Jesus nipaakar ed saray mamarikit tan talento. No amta na saramay mamarikit tan na saramay ariripen ya angawat na talento no kapigan so isabi na Katawan da, agla ra nantultuloy a manbantay. Balet agda itan amta kanian kaukolan day mansiansian alerto. Diad loob na dakel a taon, inisip na saray alanaan a say 1914 et makatantandan taon, balet agdan talaga amta no antoy nagawa. Nen ag-agawa imay iilaloan da, inisip na arum ya alanaan a singa naatrasadoy Jesus. Oniay imbaga na sakey a brother: “Pigarad sikami so nanilalon diad unonan simba na Oktubre [1914] et onla kami lad tawen.”

12. Panon a pinaneknekan na saray alanaan a sikaray matoor tan makabat?

¹² Nonoten pa labat so pakadismaya no say iilaloan ya isabi anggaan et ag-agawa! Likud ed satan, apasegsegang iray agagi legan na Sankamundoan a Guerra I. Say panagpulong a kimey et ngalngali tinmunda ya aliling to et naugip iray alanaan. Balet nen 1919, walay amangon ed sikara! Sinmabi si Jesus pian usisaen so espiritual a templo. Balet wala ray ag-akapasa ed satan ya impangusisa tan bilang resulta et abalang day pribilehyon mankimey parad Katawan a Jesus. Singa ra saramay makulangkulang a mamarikit ya ag-angawit na larak ed kargaan da. Tan singa samay mangiras ya aripen, agda labay so mansakripisyo parad Panarian. Balet karaklan ed saray alanaan et angipanengneng na makapadinayew a katooran tan mabiskeg a determinasyon a panlingkoray Katawan da anggan diad saray mairap a panaon na guerra.

13. Anton kualidad so impanengneng na saray alanaan kayari 1914, tan anton kualidad so ipapanengneng da natan?

¹³ Kayari 1914, oniay imbaga na The Watchtower: “Agagi, saramay walaan na dugan kanonotan nipaakar ed Dios et ag-adismaya ed dinan man ya uksoyan To. Aliwan say panlabayan tayo so nagawa; kanian sanen naamtaan tayon aliway iilaloan tayo nen Oktubre, 1914, maliket tayon agto inuman so Plano To pian labat gawaen so  pilalek tayo. Agtayo labay a gawaen to itan. Say pilalek tayo et natalosan iray plano tan gagala to.” Onia nin siansian kapaabebaan tan debosyon so napatnagan ed saray alanaan na Katawan natan. Agda ibabagan pinuyanan ira, balet determinado iran gawaen so kimey diad dalin a pagagawad sikara na Katawan. Tan natan, “sakey a baleg ya ulop” na ‘arum a karnero,’ saray Kristianon walaan na ilalon manbilay ed dalin so mangaalig ed panagbantay tan seseg da.​—Apo. 7:9; Juan 10:16.

14. Akin ya nabendisyonan tayo no unoren tayoy ibabangat ed sikatayo na matoor tan makabat ya aripen?

¹⁴ Pinili na Dios so matoor tan makabat ya aripen a mangitarya na espiritual a naakan ed saray totoo to, odino mangibangat ed sikara no panon iran nagunggonaan manlapud Salita tan espiritu to. Ipapanengneng na saramay membro na baleg ya ulop ya akaparaan iran ontulok ed amin ya ibabangat ed sikara na sayan aripen. Singa dad satan aaruman so kargaan da na larak. (Basaen so Salmo 119:130; Juan 16:13.) Kanian, papaneknekan da met ya akaparaan irad ipawil nen Kristo a mansiasiansia iran matoor anggan diad mairap iran subok. Singa bilang, diad sakey a kampo na saray Nazi, wala labat so saksakey a kopya na Biblia na saray agagi. Kanian, nampikasi ira parad kaaruman ya espiritual a naakan. Ag-abayag, naamtaan dan walay brother ya kakkasabi tod prisoan tan akapangiseksek na kopyay balon isyu na The Watchtower diad artipisyal a sali ton gawad kiew. Oniay nanonotan nen Brother Ernst Wauer, sakey ed saray alanaan ya akaliktar: “Makapadinayew so impanulong ed sikami nen Jehova a nanonotan iray makapabiskeg ya artikulo.” Intuloy to: “Natan et mainomay labat lay pakala na espiritual a naakan, balet kasin naynay tayon aapresyaen itan? Segurado ak ya dakel a bendisyon so ipagamor nen Jehova ed saramay manmamatalek, mansiasiansian matoor, tan mamangan ed espiritual a lamisaan to.”

15, 16. Panon ya abendisyonan so sakey a sanasawa lapud seseg dad ministeryo, tan antoy naaralan mod eksperiensya ra?

¹⁵ Say arum a karnero et maseseg met a mikikimey ed Katawan diad sigpot a panusuporta rad saray agagi nen Kristo. (Mat. 25:40) Aliwan singa samay mauges tan mangiras ya aripen ed parabolo nen Jesus,  mabulos iran mankikimey tan mansasakripisyo diad pangiyuuna ed Panarian. Singa bilang, sanen naimbitaan si Jon tan Masako ya ontulong ed Chinese-speaking a teritorya diad Kenya, nen inmuna et nanduaruwa ra. Balet kayari dan impikasi tan inusisay kipapasen da, nandesisyon iran onla.

¹⁶ Abendisyonan iran maong ed sagpot da. “Marakdakep so kimey dia,” so inkuan da. Akapangigapo ray pitoran iyaaralan na Biblia, tan dakel ni ray eksayting ya eksperiensya ra. Onia ni imbaga ra: “Inagew-agew min pisasalamatan si Jehova ta inabuloyan to kamin makakar dia.” Dakel met iray agagin lalaki tan bibii a determinado tan maseseg a manlingkor ed Dios anggad isabi anggaan. Singa saray nilibon nan-graduate ed Gilead School tan nanmisionero. Dakel ni naaralan mo nipaakar ed misioneron kimey diad artikulon “We Do the Best We Can!” ya isyu na Oktubre 15, 2001 na The Watchtower. Legan mon babasaen itan ya makapaseseg ya artikulo nipaakar ed bilay na saray misionero, nonot mo no panon mon napalaknab so kimey mo parad kirayewan na Dios, a mangiter ed sika na liket.

17. Panon a magmaliw a bendisyon so agtayo pakaamta ed eksakton isabi anggaan?

¹⁷ Talagan sakey a bendisyon so agtayo pakaamta ed eksakton agew odino oras na isabi anggaan. Tinmulong itan ed sikatayon magmaliw ya okupadod panggaway linawa nen Jehova tan amaapit ed relasyon tayod sikato bilang maaron Ama tayo. Lapud isesentro tayoy imano tayod kimey a pagagawa nen Jesus tan papaliisan iray pakaabalaan, nagmaliw a maliket so bilay tayon manlilingkor ed si Jehova.​—Luc. 9:62.

18. Akin a labay tayoy mansiansian matoor ed Dios?

¹⁸ Asingsingger lay agew na panangukom na Dios. Agtayo labay a nadismaya si Jehova odino si Jesus. Inmatalek dad sikatayo so importantin kimey diad sarayan kaunoran ya agew. Talagan papablien tayoy panagmatalek da!​—Basaen so 1 Timoteo 1:12.

19. Panon tayon napaneknekan ya naynay tayon akaparaan?

¹⁹ Antokaman so ilalo tayo, pambilay man ed tawen odino diad Paraison dalin, determinado itayo komon ya mansiansian matoor ed inter na Dios a kimey tayon manpulong tan manggawa na saray babangatan. Agtayo nin siansia amta no kapigan so eksakton agew odino oras na isabi na agew nen Jehova, balet kasin importante ni itan? Sarag tan kaukolan tayon itultuloy a paneknekan ya naynay tayon akaparaan. (Mat. 24:36, 44) Segurado a no sigpot tayon manmatalek ed si Jehova tan iyuunay Panarian to, agtayo nadismaya.​—Roma 10:11.