“Ng Diak Modengelii Sel Sils Me Sel Belsechel”

“Bo mkerekikl, ele ng diak modengelii sel sils me sel blsechel.” ​—MATEUS 25:13.

NGERANG A NGER ER KAU?

Ngera uchul me ngungil a lak dodengelii a temel a ulebongel?

Te milekerang a rengellitel e melemolem el mekar?

Kede mekerang e ochotii el kmo kede kltmokl el kirel a ulebongel?

1-3. (a) Ngerang a ngosukid el mo medengei a belkul a eru el okesiu er a Jesus? (b) Ngera el ker a kired el onger?

 KA MOLATK, oleko ngmle kirem el oltak er a ta el ngarbab el chad el mo er a klou a ultutelel el chelsengul, engdi a uchei er a obo moltak er ngii e ke mlo medengei el kmo ngdimlak mkerekikl el mekekii a cheluchul a mlai. Me ke orreched el mo omechar a cheluch. Me ke dirk melai a cheluch e ngika el ngarbab el chad a mei el osiik er kau e diak lebetik er kau. Ngdimlak el sebechel el choilau me ngdmu er a ta er a chad me ngotekir el merael. Me sera omei e ngmla merael. Ngmo uangerang a uldesuem?

² Chelechang e molatk el kmo oleko ke ngarbab el chad, el uchei er a obo er a omerael e ke melilt er a retedei el chad el mo oungerachel a meklou a ultutelel el urerem. Me ke smaod aike el rokui el soam, e tir a kongei el mo meruul. E sera omluut el mei e ke mlo medengei el kmo a reterung er tir a riruul aike el urerir. Engdi ngike el tang a dimlak lerellii a urerel e di melekoi a betok el tekoi. Ngmo uangerang a uldesuem?

³ A blekeradel el dulsaod a di osisiu er a eru el okesiu er a Jesus el kirir a reteruich el ekebil me a okesiu er a udoud. Aika el okesiu a di dul mesaod el kirel a taem er a ulebongel e dirrek el ochotii a uchul me a rebebil el ngellitel el Kristiano a melemolem el blak a rengrir e a rebebil a mo diak. * (Mateus 25:1-​30) A Jesus a millisiich er a klungel a ultutelel aika el okesiu er a ledu el kmo: “Bo mkerekikl, ele ng diak modengelii sel sils me sel belsechel,” el belkul a kmo a redisaiplo er ngii a dimlak lodengelii a ulterekokl el temel a okngemedel tia el beluulechad er a Satan. (Mateus 25:13) Me kid a dirrek el kired el mo kerekikl el mekar. Ngera uchul me ngungil a dolengesenges a tekingel a Jesus? Te rua  techang a melemolem el mekar? E ngera kired el meruul me dolemolem el kerekikl el mekar?

A KLUNGIOLEL A DOLEMOLEM EL KEREKIKL

4. Ngera uchul me ngkired el kerekikl alta e ngdiak dodengelii a ulterekokl el temel a ulebongel?

⁴ A lebebil er a taem e ngkired el mo medengelii a ulterekokl el temel a tekoi. A lsekum e ke oureor er a klou el kombalii, me a lechub e ngkirem el mo omes er a toktang me a lechub e ke mo merael el ngar er a skoki, e ngkirem el omech er a temel me lak bo meoud. Engdi a chad el omekoad er a seseb me a lechub e ngolsobel er a chad er a uriul er a klou el tellemall a diak el kirel el mechesang el di omes er a taem, e le ngsebechel el chosengur me ngmo diak leketmeklii a urerel. Ngar er a chouaika el blekeradel e ngkmal kired el kerekikl er a urered er a bai di demechesang el omes er a taem. Me ngdi osisiu, a omesiunged a ngosuterir a rechad el mesuub el kirel aike el bla leruul a Jehovah el olsobel er a rechad. Tiang a kmal klou a ultutelel e le ulebongel a kmal kmedang. Me ngdiak a belkul el bo dodengelii sel temel a ulebongel, ngbai kired el melemolem el kerekikl e meruul a soal a Jehovah. Ngar er ngii a eim el tekoi el mo uchul a klungioled e le kid el diak dodengelii a ulterekokl el temel a ulebongel.

5. Ngmekerang e obeketakl aike el ngar er a rengud e le kid el diak dodengelii a temel a ulebongel?

⁵ A kot e kid el diak dodengelii a temel a ulebongel a uchul, me ngngar er ngii a techelled el mo olecholt aike el ngar er a rengud. A Jehovah a olecholt er a omengull el bedul kid el meskid a techelled el melilt a tekoi el doruul. Ngdiak di dosiou er a Jehovah e le ngsoad el mo suobel er a temel a ulebongel e mo nguu a diak a ulebengelel el klengar, e ngbai bltkil a rengud el mo er ngii a uchul. (Monguiu er a Psalm 37:4.) Ngdmeu a rengud el meruul a soal a Dios e le kede medengei el kmo ngolisechakl er kid el di mo uchul a klungioled. (Isaia 48:17) Kede medengei el kmo a llechul a diak lemeringel er kid el oltirakl.​—1 Johanes 5:3.

6. Ngmo uangerang a uldesuel a Dios sel dosiou er ngii e le ngbetik a rengud er ngii? E ngera uchul?

⁶ A ongerung, e kid el diak dodengelii a temel a ulebongel a uchul me ngngar er ngii a techelled el mo odeuir a rengul a Jehovah. Kede mesiou er ngii e le ngbetik a rengud er ngii el diak el omeltked el kmo ngkmedang a ulebongel me a lechub e kede di osiik a klungioled. Kede dirrek el olengeseu er ngii el mo meketeklii el kmo a cherrouel el Satan a bulak. (Job 2:4, 5; monguiu er a Osisechakl 27:11.) Kede medengei el kmo a Satan a uchul a klou el chelebuul, me ngdmeu a rengud el melisiich er a llemeltel a Jehovah el mengedereder e otngeklii a Satan.

7. Ngera uchul me ngsoam el ousbech er a klengar er kau el mesiou er a Dios e olengeseu er a rechad?

⁷ Ongedei, ngdiak dodengelii a temel a ulebongel a uchul me ngbeot er kid el melenget a temed el mesiou er a Dios e olengeseu er a rechad. A rebebil el diak lodengelii a Dios a dirrek el oumerang er a ulebongel er a beluulechad. Me a dektir el kirel a telemellel a beluulechad a uchul me te melekoi el kmo, “di dongang e dolim ele kede mad er a klukuk.” (1 Korinth 15:32) Engdi kid a diak demedakt, e dirrek el diak di dolatk er kid. (Osisechakl 18:1) Kede bai nguu a Jehovah el mo kot er a klengar er kid e kongei el ousbech aike el rokui er kid el uldimukl er a temed me a klisiched el omerk er a ungil el chais el kirel a Rengedel a Dios. (Monguiu er a Mateus 16:24.) Ngmo dmeu a rengud sel dosiou er a Jehovah, el ileakl sel dengesuterir a rechad el mo medengelii.

8. Ngera el cheldecheduch er a Biblia a ochotii el kmo ngkired el mo mui el oumerang er a Jehovah me a Tekingel?

⁸ Ongeuang, kid el diak dodengelii a temel a ulebongel a uchul me kede mui el oumerang er a Jehovah, e melasem el olengesenges a Tekingel. Ngdiak demecherrungel me ngbeot er kid el mo oumerang er a uldesued. A Paulus a milengelechel er a Rekristiano el kmo: “Ngikel omdasu el kmo ng mesisiich el dechor, bo le kerekikl  me lak bo lubuu.” Ngdilu el kmo a re 23,000 el chad er a Israel el mlo diak lolengesenges er a Jehovah a mlad er a uchei er a bo lesiseb er a Beluu er a Nglat. Ngdirrek el dilu el kmo: “A ikal tekoi a . . . mlo meluches me kede mo mela klubeled er ngii, kid el chad er chelechang el bocha lolekeed a ulebengelel a beluulchad.”​—1 Korinth 10:8, 11, 12.

9. Ngmekerang a ongarm e mo uchul a kmes el deleuill er kid me a Jehovah me a mesisiich el klaumerang?

⁹ Ongeim, kid el diak dodengelii a temel a ulebongel a uchul me a bo dechelebangel a ongarm e ngsmisichii a klaumerang er kid. (Monguiu er a Psalm 119:71.) Me a ulebongel er tia el mekngit el blekeradel a “mor ngii a ringel er ngii.” (2 Timothy 3:1-5) Ngsebechel el measem a klaumerang er kid e le kede kiei er a beluulechad er a Satan. (Johanes 15:19; 16:2) Engdi a ongarm a sebechel el melisiich a klaumerang er kid el di ua ngau el sebechel el melul er a deel el omiich er ngii. Me a lsekum e ngmo ngariou a rengud e olengesenges er a Jehovah e nglmuut el smisichii a deleuill er kid el obengkel e dirrek el rullid me ngdiak bo demechitechut er a ongarm.​—Jakobus 1:2-4; 4:8.

10. Ngmekerang e sebechel el mereched el mo chuib a taem?

¹⁰ A taem a sebechel el mereched el mo chuib me a lechub e ngmeoud. Ngmo mereched sel demechesang e lak di domes a taem. Me a lsekum e kede mo mechesang el meruul er a omesiunged e ngua bo lemereched a ulebongel el mei. A ruumesingd el ngellitel a mechesang el meruul a soal a Dios me te kmal ungil el kerebai el kired. Me bo dosaod a tekoi el dilubech er a uriul er a bo le King a Jesus er a 1914, me sel rolel e a rebebil el ngellitel a mle ungil kltmokl e a rebebil a dimlak.

A RENGELLITEL A OCHOTII EL KMO TE KLTMOKL

11. Ngera uchul me rebebil er a rengellitel a ulemdasu el kmo a Jesus a mlo meoud er a uriul er a rak er a 1914?

¹¹ Me deluut el melatk er a okesiu er a Jesus el kirir tirke el ekebil me a udoud. Ngmo diak a ultutelel el lolemolem el mekar a lsekum tirke el ekebil me tirke el sibai a mle medengelii a temel a chad el mo bechiil, me a lechub a temel a luut er a mastang er tir. Tir el dimlak lodengei a uchul me ngmle kirir el di kltmokl. Ngmle betok el rak el rengellitel a ulemes er a rak er a 1914 el kmo ngkmal ileakl, engdi ngdimlak lungil el medengei aike el tekoi el mo duubech. Me a rebebil a mlo omdasu el kmo a Jesus a meudang el mei er sera leduubech a tekoi el dimlak loltirakl a uldesuir. A ta el odam a mesaod el kirel a October 1914 el kmo, “A rebebil er kemam a kmal uluumerang el kmo aki mo er a eanged er a uchelel seikid el buil er a October.”

12. Ngmilekerang a rengellitel e ullecholt el kmo ngblak a rengrir?

¹² Ka di molatk, tirke el odam a mle sebechel el mo mechitechut a rengrir er sera lekea lemei a ulebongel. Te dirrek el chilarm er a odechelakl er sel taem er a Kot el Mekemedil a Beluulechad. Me a ureor er a berkel a klumech a mlo soal el meterob el telkib el taem, e a rengellitel a ua el iliit a mederir. Engdi sera 1919 e ngua lebilekiis e le Jesus a mlei el merriter er tirke el leko te Kristiano. A rebebil er a rengellitel a dimlak leblak a rengrir me ngmlo diak el sebechir el oureor el mo er a Mastang el Jesus. (Mateus 25:16) Te uai tirke el mekebelung el ekebil el dimlak el kerekikl el mekeek a cheluchul a olbdelir. E dirrek el ua ngike el mesaik el mesiou el dimlak el kengei el chemoit a klisichel me a temel el mesiou er a Renged. Engdi a ruumesingd er a rengellitel a mle blak a rengrir el mesiou er a Mastang er tir er sel taem er a mekemad.

13. Ngera mle uldesuir a rengellitel er a uriul er a 1914? E ngerang a uldesuir er chelechang?

¹³ A uriul er a 1914, e a Ongkerongel a milsaod er a uldesuir a ruumesingd el ngellitel er sel taem. Ngmelekoi el kmo tirke el mle melemalt a uldesuir a dimlak bo lemechitechut a rengrir. Te dilu el kmo: “Ngdimlak ki moureng me  lemeketmokl a somam el tekoi, me sera ki bo modengei el kmo a uldesuam el kirel a October 1914 a mle cheleuid, e ngkmal mlo ungil a rengmam e le Rubak a dimlak lolodech er a Uldesuel el mo oltirakl a somam.” Te di mle sorir el mo ungil el medengei a moktek er a Dios. A rengellitel er chelechang a dirrek el ngariou a rengrir e sorir el meruul a soal a Dios. Engdi ngdiak lolekoi el kmo te mecherrungel me ngdiak a ta el cheleuid el tekoi el lerellii. Te di semeriar el meruul er a ureor el Jesus a mla oterekeklii er tir. Me chelechang e a ‘kuk bebil el sib,’ el tir a “kloul seked” er a Rekristiano el oba omelatk el mo kiei er a chutem el mo cherechar, a oukerebai er tirka el ngellitel.​—Ocholt 7:9; Johanes 10:16.

DOCHOTII EL KMO KEDE KLTMOKL

14. Ngera uchul me ngungil a dolengesenges a osisecheklel a blak a rengul el mesiou?

¹⁴ A Dios a ulemekngerachel er a blak a rengul el mesiou el mo olisechakl er a rechedal er a rolel e te ngmai a klungiolir el okiu a Tekingel me a oureor el klisichel. Tirke el chedal a klou el seked el olengesenges er a blak a rengul el mesiou a ochotii el kmo te di uai tir el kltmokl, el ua lomekeek a cheluchul a olbdelir. (Monguiu er a Psalm 119:130; Johanes 16:13.) E tiang a ngosuterir me te melemolem el kltmokl el mo lmuut er a lemei a Kristus, e dirrek el melemolem el blak a rengrir er a chelsel a meringel el blekeradel. El ua tiang, a rudam el mle chelsimer er a ta er a blil a kelebus er a Nazi a di uleba chimong el Biblia. Me te milluluuch el kirel a lmuut el bebil el babier. Me ngdi mle telkib e te remenges el kmo a ta el odam el dirk mle soiseb er a kelebus a milart a beches el Ongkerongel er a chelsel a ochil el rruul er a kerrekar. A ta er a rengellitel el odam el silobel er tia el kelebus el Brother Ernst Wauer a dilu el kmo a Jehovah a ullengeseu er a rudam el mo melatk aika el suobel el okiu a mengasireng el rolel. Ngmelemolem el kmo: “Ngkmal beot el dengai a babier el melisiich a klaumerang er kid er chelechang, engdi kede oba omereng el saul el kirel? A kuumerang el kmo a Jehovah a omekngeltengat er tirke el oumerang er ngii, e blak a rengrir, e dirrek el melemolem el omengur er a tebelel.”

15, 16. A blakerreng er a ta el obekel ngmlo uchul a ngera el klengeltengat? Ngera ke suubii er a chouaika el tekoi?

¹⁵ A rekuk bebil el sib a olengeseu er a rudam er a Kristus sel lemechesang el omerk er a klumech. (Mateus 25:40) Ngdiak leua ngike el mesaik el mesiou el ngar er a okesiu er a Jesus. Te  meringel el oureor el melenget a rokui er tir e nguu a Rengedel a Dios el mo kot er a klengar er tir. El ua tiang, a Jon me a Masako a mlo er ngii a techellir el mo olengeseu er a rechad er a Sina el kiei er a beluu er a Kenya. Te ulemai er a rengrir er a kot el uchul, engdi a uriul er a lolebedebek e loluluuch el kirel, e te millukl el mo er ngii el beluu.

¹⁶ A blakerreng er tir el mesiou a uchul me a Jehovah a ulemekngeltengat er tir. Te dilu el kmo ngkmal ungil a rengrir el oldingel a obliil er sel beluu. Te mla mo mesuub a Biblia el obengterir a reteuid el chad e dirrek el mla chobangel a lmuut el betok el ungil el tekoi el omesiungir a uchul. Te kmo: “Bek el sils e aki oureng a sulel a Jehovah el milskemam a techellam el me kiei er tia el beluu.” A rebetok el rudam me a rudos a mla ochotii el kmo te sorir el mechesang el mesiou er a Dios el mo lmuut er a lemei a ulebongel, alta e ngdiak lodengelii a ulterekokl el temel. Ka molatk er tirke el betok el telael el mlo er sel Skuul er a Gilead e milsiou el missionari. Ngsebechem el mesuub a lmuut el betok el kirel a ureor er a klemissionari el ngar er a suobel el kmo “Aki Meruul Aike el Sebecham!” el ngar er a Watchtower er a October 15, 2001. Sel suobel a sebechel el smisichau el mo menglou er a omesiungem, el uchul a odanges el mo er a Dios me a deuil a rengum.

MOLEMOLEM EL DI MEKAR

17. Ngera el klungiaol a bla dengai e le kid el diak dodengelii a temel a ulebongel?

¹⁷ Ngdiak bo el seselk a rengud e le kid el diak dodengelii sel temel me a blsechel a ulebongel. Ngbai mlo uchul a klungioled. Ngmla meskid a techelled el mo blak a rengud el meruul a soal a Demad el Jehovah e olekes er a deleuill er kid me Ngii. Me ngdmeu a rengud er a klengar er kid er chelechang e le kede uluusbech er a temed el mo mechesang el meruul er a urered el lebilskid a Jesus e milengeroid er kid er a chelsengsang el tekoi.​—Lukas 9:62.

18. Ngera uchul me ngsoad el melemolem el blak a rengud el mesiou er a Dios?

¹⁸ Ngkmal kmedang a temel a ulebongel me ngsoad el melemolem el blak a rengud el mesiou er a Jehovah. Ngdiak el soad el melemall er a rengul Ngii me a Jesus. Te mla meskid a klou el ureor el kired el meruul er ngii er chelecha el uriul el sils. Me kede oba omereng el saul e le tir el oumerang el kmo ngsebeched el rullii!​—Monguiu er a 1 Timothy 1:12.

19. Kede mekerang e kutmeklid el kirel a ulebongel?

¹⁹ Me dolemolem el oltaut er a ngerecheled el lebilskid a Dios el omerk er a klumech e olisechakl er tirke el semeriar, alta e a omeltked a mo kiei er a eanged me a lechub e ng Paradis el chutem. Ngdiak a ultutelel a bo dodengelii sel temel el lemei a sils er a Jehovah. Ngbai kired el kutmeklid me dungil el kltmokl sel lemei! (Mateus 24:36, 44) Ngulterekokl a rengud el kmo a dolemolem el ultuil er a Jehovah e denguu a Rengedel el mo kot, e ngdi mo ungilbesul a rokui el tekoi.​—Rom 10:11.

[Footnote]

[Aike el Ker er a Suobel]

[Siasing el ngar er a 26 el llel]

Bo blechoel el melisiich a klaumerang er kau el okiu a Tekingel a Dios

[Siasing el ngar er a 27 el llel]

Ngdi mereched a taem el mo chuib sel demechesang el mesiou er a Dios