1-3. a) ¿Imakunawanmi tupan Jesuspa iskay rikchanachisqankunaqa? b) ¿Imakunatam tapukunanchik?

PIENSARIY kaypi: allin reqsisqa runam nisunkiman carroykiwan huk sitioman apanaykipaq. Apanaykipaqña kachkaspaykim ichaqa cuentata qokuruwaq carroykipa gasolinan manaña kasqanta, hinaspaykim chaylla gasolina rantiq pasanki. Apanaykipaq runañataqmi kaylaw-waklawta qawaykachakuspan nichkan: ¡imay horataq hamunqa!, nispan. Manaña rikurimuptikim huk runataña niykun apananpaq. Kutiramuptikiñataqmi pasakusqaña. ¿Imaynataq tarikuwaq?

² Kunanñataq chay allin reqsisqa runa kasqaykita piensariy, allin confianza kimsa runakunata akllaruspaykim huk llamkayta ruranankupaq niykuwaq. Niykuwaqmi imaynata ruranankupaq hinaptinmi paykunañataq chaylla arí niykusunki. Kutimunaykipaqmi ichaqa iskaylla nisqaykita rurarusqaku. Huknin runaqa manam imaniraqllatapas rurasqachu hinaspanmi nisunkiraq imarayku mana rurasqanmanta. ¿Imatam rurawaq?

³ Chayna kaqlla rikchanachiykunatam Jesuspas servichikurqa doncellakunamanta hinaspa illananpaq sirvientenkunaman qollqen saqeykuq apumanta rimaspan. Chay rikchanachiykunawanmi Jesusqa rimachkarqa hanaq pachaman riqkuna tukupay tiempopi imanasqa wakinnin rikchan-rikchanlla kanankumanta hinaspa wakinninñataq mana chayna kanankumanta (Mat. 25:1-30). * Chaymi Satanaspa munaychakusqan runakunata chinkachinanmanta rimaspan kaynata nirqa: “Rikchan-rikchanllayá kaychik, manam yachankichikchu ima punchawmi otaq imay horam kutimunaytapas”, nispa (Mat. 25:13). Chay nisqantam kay sasallaña tiempopi kasukuyta munanchik. Chaynaqa, ¿imakunapim chay nisqanta kasukuyqa hinaspa rikchan-rikchanlla kayqa yanapawachwan? ¿Pikunataq listolla  kasqankuta qawachinku hinalla kawsanankupaq? ¿Imatam rurananchik rikchan-rikchanlla kanapaq?

4. ¿Imanasqataq puchukay tiempo haykapi chayamunanta mana yachaspapas rikchan-rikchanlla kayta atichwan?

⁴ Llamkayman rinapaq, doctorman rinapaq otaq chayman rikchakuq sitiokunaman rinapaqpas allinmi kanman imay hora kasqanta yachayninchikqa. Ichaqa, bomberokuna otaq runakunapa vidanta salvaypi llamkaqkuna imay hora kasqanta qawapayayninkuqa manam allinchu kanman, chayta ruraspankuqa sasachakuypim tarikunmanku. Chaynapi tarikuspaqa allinmi kanman ima rurasqanchikpi afanakuyninchik imay hora kasqanta qawapayanamantaqa. Chaynallataqmi Jehová Diosmanta willakuyninchikpas runakunata yanapan salvakunankupaq. Kay Pachapa puchukaynin hichpallapiña kasqanraykum ancha allin chay rurayninchikqa. Cheqap cristianokunaqa puchukay haykapi chayamunanta mana yachaspanchikpas hinallam rikchan-rikchanlla kananchik. Chaynaqa, puchukay haykapi chayamunanta mana yachasqanchikqa pichqapim yanapawasun.

5. ¿Imanasqataq puchukay haykapi chayamunanta mana yachayninchikqa sonqonchikpi imayna kasqanchikta qawachikunapaq allin?

⁵ Punta kaq: haykapi puchukay punchaw chayamunanta mana yachayninchikqa yanapawasunmi sonqonchikpi imayna kasqanchikta qawachikunapaq. Jehová Diosqa respetawasqanchikraykum saqewanchik payman sonqo kayta akllanapaq. Kay Pachapi mana allinkunawan kuska chinkachisqa kayta mana munaspapas, manam wiñaypaq kawsananchikraykullachu Dios serviytaqa munanchik aswanqa payta kuyasqanchikraykum (leey Salmo 37:4). Allinninchikpaq kasqanraykum kamachiwasqanchikta kasukuyta munanchik (Is. 48:17). Kamachiwasqanchikkunataqa manam llumpay sasata hinachu qawanchik (1 Juan 5:3).

6. ¿Imaynataq Diosqa tarikunman kuyasqanchikrayku serviptinchikqa, hinaspa imanasqa?

⁶ Iskay kaq: haykapi puchukay punchaw chayamunanta mana yachayninchikqa yanapawasunmi Jehová Diospa sonqonta kusichinapaq. Kuyasqanchikraykum servinchik, manam imatapas chaskinanchikraykuchu. Chaynata serviptinchikqa Jehová Diosmi Satanasta yanqa tumpawasqanchikmanta penqaypi churanqa (Job 2:4, 5; leey Proverbios 27:11). Diablo ñakarichiwaptinchikpas ancha kusikuywanmi Diospa Llapallan Kamachiq kasqanta yanapanchik Diablopa contranpi churakuspa.

7. ¿Imanasqataq munanki tukuy sonqowan Dios serviyta hinaspa hukkuna yanapaytapas?

⁷ Kimsa kaq: haykapi puchukay punchaw chayamunanta mana yachayninchikqa yanapawanchiktaqmi kikillanchikpi mana llumpayta piensaspa hukkunata yanapanapaq hinaspa tukuy sonqowan Diosta servinapaqpas. Kunan tiempopi runakunaqa Diospi mana creespankupas manchakunkum kay Pacha imawanpas chinkachisqa kananmanta. Chaymi paykunaqa ninku: “Mikukusun, tomakusun, ichapas paqarin wañukusun”, nispanku (1 Cor. 15:32). Ñoqanchikmi ichaqa mana manchakunchikchu. Hinaspapas runamasinchikmantaqa manam karunchakunchikchu nitaq kikillanchikpichu piensanchik (Prov. 18:1). Aswanmi tiemponchikta, kallpanchikta hinaspa imapas kapuqninchikta servichikunchik Diosmanta willakunapaq (leey Mateo 16:24). Anchatam munanchik Dios serviyta hinaspa huk runakuna Diosta reqsinankupaq yanapaytapas.

8. ¿Bibliapa ima nisqanmi yanapawanchik Jehová Diospi hinaspa Palabranpi astawan hapipakunapaq?

⁸ Tawa kaq: haykapi puchukay punchaw chayamunanta mana yachayninchikqa yanapawanchiktaqmi Jehová Diospi astawan hapipakunapaq hinaspa Diospa Palabranpa nisqanta kasukunapaqpas. Pantaq kasqanchikraykum kikillanchikpi confiayta qallaykuchwan. Pablom lliw iñiqmasinkunaman nirqa: “Pipas qaqa hina sayasqanpaq hapikuqqa cuidakuchunyá wichiykunanmanta”, nispa. Prometesqa  allpaman israelitakunata Josuey manaraq pusachkaptinmi 23.000 israelitakuna Diosta mana kasukuspanku wañururqaku. Pablom nirqa: ‘Tukuy chaykunatam [. . .] Dios qellqachirqa qepa tiempokunapi yuyarichiwananchikpaq’, nispa (1 Cor. 10:8, 11, 12).

9. ¿Imaynatam sasachakuykunaqa yanapawanchik iñiyninchikpi allin takyasqa kanapaq hinaspa Diosman asuykunapaqpas?

⁹ Pichqa kaq: haykapi puchukay punchaw chayamunanta mana yachayninchikqa yanapawasuntaqmi sasachakuykuna kaptinpas iñiyninchik allin takyasqa kananpaq (leey Salmo 119:71). Kay ‘tukupay tiempokunaqa sasallañam kachkan’ (2 Tim. 3:1-5). Satanaspa munaychakusqan cheqniwaqninchik runakunaqa iñiyninchikraykum qatikachawanchik (Juan 15:19; 16:2). Ichaqa, humilde kaspa Diospa yanapakuyninta maskaptinchikqa chay sasachakuykunam yanapawasun iñiyninchikpi allin takyasqa kanapaq. Hukmanyananchikmantaqa astawanmi Jehová Diosman asuykusun (Sant. 1:2-4; 4:8).

10. ¿Imanasqataq tiempoqa apurawllamanña pasan?

¹⁰ Apurawman otaq allillamanpas rikchakuwachwanmi tiempopa pasasqanqa. Imapas rurayninchikpi afanasqa kaspanchikqa imay hora kasqantapas manam qawanchikchu, tiempoñataqmi apurawllamanña pasarun. Chaynataqmi Diospa kamachiwasqanchikta ruraypi afanakuptinchikqa puchukay punchawpa chayamunanpas mana unaypaqchu rikchakuwasun. Yaqa llapallan hanaq pachaman riqkunapa Dios serviypi afanasqa kasqankum qatipakunapaq. Pisillapi yuyarisun 1914 watapi Jesus nombrasqa kasqan qepaman imakuna pasakusqanta. Qawasunmi wakinku listolla kasqankumanta hinaspa wakinku mana listolla kasqankumantapas.

11. ¿Imanasqataq 1914 watapi mana imapas pasakuptin hanaq pachaman riqkunamanta wakinninqa piensarqaku Jesus unamusqanta?

¹¹ Kaqmanta rimasun Jesuspa rikchanachisqanmanta. Sichu doncellakunawan sirvientekuna yachanmanku karqa haykapi novio otaq patron kutimunanta hinaspankuqa manachá rikchan-rikchanllaqa kanmankuchu karqa. Ichaqa mana yachasqankuraykum rikchan-rikchanlla kananku karqa. 1914 watapi ima pasakunanmanta mana sumaqta entiendespankupas, ñawpaqmantaraqmi yacharqaku chay watapi imapas pasakunanmantaqa. Chay watapi mana imapas pasakuptinmi wakinkuqa piensarqaku Jesus unamusqanta. Chay qepatam huk iñiqmasinchik nirqa: “Wakinniykuqa [1914 watapi] octubre killapa punta semanantam hanaq pachaman ripukuyta piensarqaniku”, nispa.

12. ¿Imaynatam hanaq pachaman riqkunaqa qawachirqaku allin yuyayniyoq confianza sirviente kasqankuta?

¹² Maynatachá hukmanyarurqaku chay watapi puchukay punchaw mana chayamuptinqa. Astawanraqmi enteron Pachapi punta kaq guerra qallaykuptin qatikachasqa karqaku. Chayraykum iñiyninkupi puñusqa hina tarikuspanku Diosmanta willakuytapas yaqalla saqerurqaku. 1919 watapim ichaqa chay puñusqa hina kasqankumanta rikcharirurqaku. Chay watapitaqmi Jesusqa llapallan “cristianom kani” niqkunata qawananpaq hamurqa. Paykunamanta wakinku iñiyninkupi puñusqa hina tarikusqankuraykum, Jesus serviyta manaña atirqakuñachu (Mat. 25:16). Mana yuyayniyoq doncellakuna hinam Jesus hamuptin rikchan-rikchanlla kayta mana atirqakuchu. Hinaspapas mana allin sirviente hinataqmi mana kallpanchakurqakuchu Diosta servinankupaq. Ichaqa, yaqa llapallan hanaq pachaman riqkunam Diosman sonqo kasqankutawan Dios serviy munasqankuta qawachirqaku guerrapa kasqan sasallaña tiempokunapipas.

13. ¿Imayna kasqankutam qawachirqaku hanaq pachaman riqkuna 1914 wata qepaman, hinaspa imayna kasqankutataq kunan qawachichkanku?

¹³ 1916 watapim kay Llaqta Cuidaq revista nirqa: “Wawqe-panillaykuna Diosman sonqo kaptinchikqa manam hukmanyachiwasunchu  paypa imapas tanteasqankunaqa. Manam kikinchikpa munayninchikta rurayta munarqanchikchu. Chaymi 1914 watapi ima pasananmanta pantaypi kasqanchikta musyakuruspanchik kusikurqanchik Jehová Diosninchik imapas tanteasqan mana cambiasqanmanta. Ima tanteasqanmantawan ima munasqanmanta sumaqta entiendeyllatam munanchik”, nispa. Kunan tiempopi hanaq pachaman riqkunapas hinallam chayna humillakuq hinaspa Diosman sonqo kanku. Paykunaqa manam ninkuchu Diospa yuyaychasqan kasqankutaqa, ichaqa kay Pachapi Jesuspa kamachisqanta ruranankupaqmi kallpanchakunku. Kachkantaqmi kay Pachapi wiñay kawsay suyakuyniyoq sapaq ovejakunamanta ‘achkallaña runakunapas’, paykunapas hanaq pachaman riqkunapa listolla kasqankutam qatipakunku (Apoc. 7:9; Juan 10:16).

14. ¿Imanasqataq ancha allin confianza sirvientepa yachachiwasqanchikta kasukuyqa?

¹⁴ Hanaq pachaman riqkuna hinam kay Pachapi kawsanankupaq suyakuyniyoqkunapas, allin yuyayniyoq confianza sirviententakama Diospa yachachiwasqanchikta kasukunchik, chaynapim listolla kasqankuta qawachinchik. Chayta ruraspankum mecheroman aceiteta huntachichkaq hina iñiyninchikpi kanchik (leey Salmo 119:130; Juan 16:13). Chaynatam llumpay sasachakuypi tarikuspapas iñiyninchikpi allin takyasqa hinaspa listolla kasqanchikta qawachisunchik Cristo kutimunankama. Kaypi piensarisun, nazi tropakunapa carcelninkupi cristianokuna kaptinkuqa chullallam Bibliaqa karqa, chayraykum Jehová Diosta mañakurqaku paymanta astawanraq yachanankupaq. Chay qepallamanmi yacharurqaku chayllaraq presochasqa huk iñiqmasinchik achka Llaqta Cuidaq qellqakunata kaspimanta chakinpi pakasqata apamusqanta. Watakuna pasaytam hanaq pachaman rinanpaq suyakuyniyoq iñiqmasinchik Ernst Wauer nirqa: “Jehová Diosmi yanapawarqaku chay qellqapa kallpanchaq yachachikuyninkunata umallaykumanta yachanaykupaq”. Nirqataqmi: “Kunan tiemponchikpiqa manam sasa tariychu Jehová Diosmanta yachayqa, ichaqa ¿chaninchanchikchu? Sichu payman sonqo kasun, paypi hapipakusun hinaspa paymanta hinalla yachasun hinaptinqa achka bendicionkunatam qowasun”, nispa.

15, 16. ¿Imaynam tarikurqaku casarasqa iñiqmasinchik astawanraq Diosta servisqankumanta, hinaspa imatam yachachwan chaymanta?

¹⁵ Sapaq ovejakunaqa Jesuspa wawqenkunatapas yanapankum tukuy kallpankuwan Diosmanta willakuspanku (Mat. 25:40). Jesuspa  rikchanachisqanpi “qella, mana allin sirviente” hina kanankumantaqa Diosmanta willakuyta vidankupi puntapi churanankupaqmi kallpanchakunku. Jon hinaspa Masako casarasqa iñiqmasinchikkunatam Kenia nacionpi chino rimayniyoq runakunaman predicanankupaq nirqaku. Qallariypi manchapakuspankupas Diosta mañakuspanku hinaspa sumaqta tantearuspankum chay lawman astakurqaku.

¹⁶ Chayna kallpanchakusqankuraykum achka bendicionkunata chaskirqaku. Hina kikinkum ninku: “¡Diosmanta kaypi willakuyqa ancha allinmi kasqa!”, nispa. Qanchis runakunatam Bibliamanta yachachiyta qallaykurqaku hinaspapas kusisqam karqaku. Imayna tarikusqankumantam ninku: “Sapa punchawmi Jehová Diosta agradecekuniku kaypi kasqaykumanta”, nispa. Huk iñiqmasinchikkunapas chayna tukuy sonqonkuwan Dios serviy munasqankutam qawachinku, haykapi puchukay punchaw chayamunanta mana yachaspankupas. Piensasun Galaad Escuelamanta lloqsimuq waranqantin misionero iñiqmasinchikkunapi. Paykuna imayna servisqankumanta yachayta munaspaykiqa leey 2001 watapi 15 octubre Llaqta Cuidaq qellqapa “Hacemos todo lo que podemos” niq yachachikuyninta. Chayta leespayki tapukuy astawanraq Dios hatunchasqa kananpaqwan kikiki kusisqa kanaykipaq ima ruranaykimanta.

17. ¿Imapim yanapawanchik haykapi puchukay punchaw chayamunanta mana yachasqanchikqa?

¹⁷ Chaynaqa, haykapi puchukay punchaw chayamunanta mana yachasqanchikqa tukuy imapim yanapawanchik. Hukmanyasqa kananchikmantaqa Diospa munaynin ruraytam munanchik chaynataq payman asuykuytapas. Takllawan yapuspa mana qepanta qawakuq hinam mana imawanpas harkachikunachu, chay rurayqa anchatam kusichiwanchik (Luc. 9:62).

18. ¿Imanasqataq mana munanchikchu iñiyninchik chiriyananta?

¹⁸ Diospa piñakuynin punchawqa astawanmi asuykamuchkan, chaymi Jehová Diostapas nitaq Jesustapas hukmanyachiytaqa mana munanchikchu. Paykunam kay tukupay tiempopi munayninta rurananchikpaq saqewanchik. ¿Chaninchanchikchu chay rurayta? (Leey 1 Timoteo 1:12.)

19. ¿Imaynatam qawachinchik listolla kasqanchikta?

¹⁹ Hanaq pachapi otaq kay Pachapi kawsanapaq suyakuyninchik kaptinpas, hinallayá kallpanchasun runakunaman willakunapaq hinaspa Diosmanta yachachinapaq kamachiwasqanchikta cumplinapaq. Manam kunankamapas yachanchikchu haykapipuni puchukay punchaw chayamunantaqa, ichaqa ¿yachananchikraqchu? Hinallayá listo kasqanchikta qawachisun (Mat. 24:36, 44). Chaynaqa, Jehová Diospi tukuy sonqonchikwan hapipakuspanchikqa hinaspa munayninta puntapi churaspanchikqa manam iskayrayachwanchu pay yanapawananchikmantaqa (Rom. 10:11).