“Tou te Lē Iloa le Aso po o le Itula”
“Tou te Lē Iloa le Aso po o le Itula”
“O le mea lea, ia faaauau ai ona outou mataala, auā tou te lē iloa le aso po o le itula.”—MATA. 25:13.
O LE Ā LAU TALI?
O ā aogā o le lē iloaina o le itula ma le aso e oo mai ai le iʻuga?
Ua faapefea ona faaalia e le ʻaufaauuina le mataala?
E faapefea ona iloa o loo tatou nofosauni mo le oo mai o le iʻuga?
1-3. (a) O ā faataʻitaʻiga na faamatilatila mai ai le manatu autū o talafaatusa a Iesu? (e) O ā fesili o le a tatou talanoaina?
SEʻI faapea ua talosaga atu se tagata maualuga o le malo iā te oe e momoli o ia i se fono tāua, ae e iloa ane e lē o lava le penisini o lau taavale. Ona e faanatinati atu loa lea i le pamu penisini e utu le taavale. Talu ai ua fiu e faatali atu oe, o lea na ia talosagaina ai se isi tagata e momoli o ia. Faamata o ā ni ou faalogona i lenā taimi?
2 Ae faapefea pe afai o oe o le tagata maualuga? E toʻatolu ni tagata faigaluega na e tuu atu i ai faatonuga patino i galuega e tatau ona fai, ma sa latou malilie uma o le a faia faapea. Peitaʻi, ina ua e toe foʻi mai i lau malaga, e na o le toʻalua sa faatinoina ma le māeʻaeʻa galuega sa tuuina i ai. Ae e leʻi faia faapea e le isi tagata, ma ia faia ni faamolemolega. O ā ni ou faalogona?
3 O faataʻitaʻiga e lua e pei ona taʻua, e talitutusa ma talafaatusa e lua na faamatalaina e Iesu e faatatau i taupou ma taleni. Ua faamatalaina ai le māfuaaga ua faaauau ai ona faamaoni ma faautauta le isi vaega o le ʻaufaauuina, ae e lē o faia faapea e le isi vaega i le taimi o le iʻuga. * (Mata. 25:1-30) Sa manaʻomia ona mataala soo o Iesu auā latou te lē iloa le taimi o le a oo mai ai le iʻuga. O lea, na faamatilatila ai e Iesu le manatu autū o na talafaatusa e faapea, “o le mea lea, ia faaauau ai ona outou mataala, auā tou te lē iloa le aso po o le itula.” (Mata. 25:13) Aiseā e tatau ai ona tatou mataala? O ai o loo faaauau pea ona mataala? O ā auala e tatou te faaalia ai le mataala?
AOGĀ O LE MATAALA
4. Ina ia mataala, aiseā e lē manaʻomia ai ona tatou iloa tonu le taimi e oo mai ai le iʻuga?
4 E iai tulaga e tāua ai ona iloa tonu le taimi o loo iai, e pei o le faigaluega i se kamupani, vaaia o le fomaʻi, po o le malaga i le vaa. Ae e iai foʻi tulaga e tāua ai le uaʻi i le galuega o loo faia nai lo o le taimi. O se faataʻitaʻiga, e sili atu ona popole le tagata fuimū i le faasaoina o le ola o le tagata nai lo o le taimi, ona e tāua le galuega o loo ia faia. I se tulaga talitutusa, e sili atu ona tāua le galuega talaʻi mo le faasaoina o tagata, ona ua lata tele mai le iʻuga. E lē manaʻomia ona tatou iloa tonu le taimi e oo mai ai le iʻuga, ina ia mataala ma faia ai le finagalo o Ieova. E lima māfuaaga e lē manaʻomia ai ona tatou iloa tonu le taimi e oo mai ai le iʻuga.
5. O le ā se tasi aogā o le lē iloa tonu o le taimi e oo mai ai le iʻuga?
5 O le māfuaaga muamua: ina ia faaalia ai faanaunauga moni o o tatou loto. O le manatu mamafa o Ieova iā i tatou ua ia tuuina mai ai le saʻolotoga e filifili ai. O lea, e tatou te auauna iā Ieova ona o le alolofa iā te ia, ae lē tau ina ia faasaoina ai. (Faitau le Salamo 37:4.) E tatou te lē manatu i poloaʻiga a Ieova o se avega mamafa. Ua ia aʻoaʻoina i tatou i mea e aogā, ma e maua le olioli i le faia o lona finagalo.—Isa. 48:17; 1 Ioa. 5:3.
6. O ā faalogona o Ieova pe a tatou auauna iā te ia ona o le alofa, ma aiseā?
6 O le māfuaaga lona lua: ua tatou maua ai le avanoa e faafiafia ai le finagalo o Ieova. (Faitau le Faataoto 27:11.) E tatou te lagolagoina le pule silisili ese a Ieova, nai lo o le pule a Satani. E mafai ona tatou saosaolaumea e faamaonia le pepelo o Satani. E ala i le auauna iā Ieova ona o lo tatou alofa mo ia, ae lē ina ia maua se taui pe faasaoina ai i tatou.—Iopu 2:4, 5.
7. Aiseā e tatou te auauna ai iā Ieova, ma fesoasoani i isi?
7 O le māfuaaga lona tolu: e faaalia ai e tatou te lotomalilie e faamuamua le faia o le finagalo o Ieova, ma fesoasoani i isi. E tatou te lē pei o tagata o le lalolagi o ē manatu mo lo latou lava lelei, ma faia mea e fiafia i ai. Ua latou manatu, ʻseʻi o tatou aai ma inu auā o a taeao e tatou te feoti ai.’ (1 Kori. 15:32) I se faaeseesega, e tatou te lē matataʻu i le oo mai o le iʻuga, ma e tatou te lē manatu mo so tatou lava lelei. (Faata. 18:1) Ua tatou maua le fiafia i le faamuamuaina o le Malo. Ua faamaonia lenā e ala i le faaaogā o a tatou alagaʻoa, taimi, faapea le malosi e faailoa atu ai i isi le tala lelei o le Malo.—Faitau le Mataio 16:24.
8. O le ā se mea na tupu e faaalia ai e tatau ona tatou faalagolago atoatoa atu iā Ieova?
8 O le māfuaaga lona fā: e fesoasoani iā i tatou e faalagolago atoatoa ai iā Ieova, ma faatatauina i o tatou olaga lana Afioga. E faigofie ona tatou faalagolago i lo tatou lava atamai, ona o lo tatou tulaga lē lelei atoatoa. O lea, na taʻua ai e Paulo tagata Isaraelu e 23,000 na lē ulu atu i le Nuu o le Folafolaga, ona o le lē usiusitaʻi iā Ieova. O lenā mea na tupu, ʻna tusia ina ia lapataʻia ai i tatou o ē o loo ola i le iʻuga o faiga o mea a le lalolagi, o lea, o lē ua manatu o loo tū o ia, ia faaeteete neʻi paʻū.’—1 Kori. 10:8, 11, 12.
9. E faapefea i tofotofoga ona faamalosia lo tatou faatuatua faapea la tatou faiā ma Ieova?
9 O le māfuaaga lona lima: e tatou te iloa ai le auala e tutumau ai e ui i tofotofoga, ma faamalosia ai lo tatou faatuatua. (Faitau le Salamo 119:71.) E tatou te faatalitalia e itagia ma sauāina i tatou, ona o loo tatou ola ma soifua i nei “aso e sili ona faigatā.” (2 Timo. 3:1-5; Ioa. 15:19; 16:2) E faamalosia e tofotofoga lo tatou faatuatua, nai lo o le faavaivaia ai o i tatou mai i le auaunaga iā Ieova, e pei ona faamamāina o le auro i le afi. Ae e faamalosia la tatou faiā ma Ieova pe a oo mai tofotofoga, e ala i le taliaina ma le lotomaulalo lana taʻitaʻiga.—Iako. 1:2-4; 4:8.
10. O le ā e tupu pe a tele mea fai i le auaunaga?
10 E vave lava le alu o le taimi pe afai e tatou te pisi i le tele o mea e fai. I se tulaga talitutusa, o le tele o mea fai i le auaunaga iā Ieova, e tatou te ʻalofia ai le manatu ua tuai ona oo mai le iʻuga. Ua faataatia e le ʻaufaauuina se faaaʻoaʻoga mataʻina, e ala i le faaalu o le tele o le taimi i le auaunaga iā Ieova. O le a tatou talanoaina le mea na tupu ina ua māeʻa ona nofotupu Iesu i le 1914, faapea le auala na faaalia ai e nisi o le ʻaufaauuina le mataala.
MATAALA O LE ʻAUFAAUUINA
11. Aiseā na manatu ai nisi o le ʻaufaauuina ua faatuai mai Iesu?
11 Seʻi toe mafaufau i talafaatusa e lua a Iesu sa taʻua i le amataga. Sa faaalia pea e taupou ma pologa le mataala, ona e latou te leʻi iloa tonu le taimi e taunuu ai le alii faaipoipo po o le matai. Sa iloa e le ʻaufaauuina mo le tele o tausaga, o le 1914 o se tausaga iloga, peitaʻi e latou te leʻi malamalama atoatoa i le mea o le a tupu i lenā tausaga. Sa faapea mai se tasi o i latou: “E iai nisi o i matou sa manatu o le a ō i le lagi i le vaiaso muamua o Oketopa i lenā tausaga.” Peitaʻi, ina ua lē taunuu le mea sa latou faatalitalia, na latou manatu ai atonu ua faatuai mai Iesu.
12. Na faapefea ona faaalia le faamaoni ma le faautauta o le ʻaufaauuina?
12 E mautinoa sa faigatā mo i latou sa faatalitalia i lenā taimi le lē oo mai o le iʻuga. A o faagasolo le Taua Muamua a le Lalolagi, sa tele teteega na feagai ma uso, ma na toetoe lava taofia atoatoa ai le galuega talaʻi, ma peiseaʻī ua latou momoe faaleagaga. Na asiasia e Iesu le malumalu faaleagaga o le Atua, ma i le 1919, sa latou toe feala mai i se uiga faaleagaga. Na melea e nisi o le ʻaufaauuina le faaeaga na tuuina atu e lo latou Matai o Iesu iā i latou, ona o le lē mataala. (Mata. 25:16) E leai se eseesega o i latou ma taupou vālea e leʻi faaalia le mataala, ma le pologa paiē lē faamaoni, lea e leʻi lotomalie e faia galuega sa tuuina atu iā te ia. Ae i le isi itu, sa iai pea nisi o le ʻaufaauuina sa tumau faamaoni ma auauna pea i lo latou Matai, e ui lava i teteega ma tofotofoga i le taimi o le taua.
13. O le ā le uiga sa faaalia e le ʻaufaauuina ina ua mavae le 1914, faapea aso nei?
13 Ina ua mavae le 1914, na faamatalaina ai i se tasi o lomiga o le Watchtower, le uiga sa iai i le toʻatele o le ʻaufaauuina i lenā taimi. Na taʻua i lea lomiga e faapea: “E matou te leʻi loto e faia le mea sa matou mananaʻo i ai. O lea, ina ua lē taunuu le mea sa matou faatalitalia iā Oketopa i le 1914, sa matou lagona le fiafia i le iloaina e leʻi suia le fuafuaga a le Atua, ona o le mea sa matou faatalitalia. E matou te leʻi mananaʻo e suia le fuafuaga a le Atua.” O le iai o se vaaiga saʻo iā i latou, na o latou lē faaalia ai se uiga lē fiafia. Nai lo o lea, sa o latou naunau e fia malamalama atili e faatatau i fuafuaga a Ieova. O le uiga lotomaulalo foʻi lenā o loo faaalia e le ʻaufaauuina i aso nei. E latou te lē manatu ua faagaeeina i latou, ae e pau lo latou faanaunauga, o le faataunuu lea o le galuega ua tuuina atu iā i latou. O lea, ua latou faataatia ai se faaaʻoaʻoga lelei mo le “motu o tagata e toʻatele” o “isi mamoe,” o ē e iai le faamoemoe e ola e faavavau i le lalolagi.—Faaa. 7:9; Ioa. 10:16.
FAAMAONIGA O LE MATAALA
14. O le ā le aogā o le usitaʻia o taʻiala mai le vasega o le pologa?
14 Na tofia e le Atua le pologa faamaoni ma le faautauta, e saunia mai meaʻai faaleagaga. O loo mataala le motu o tagata e toʻatele, ma o loo latou faataʻitaʻi i le ʻaufaauuina, e ala i le usitaʻia o taʻiala mai le pologa. E pei ai ua toe faatutumu a latou tuugālamepa i le suāuu faaleagaga, e ala i le Afioga a le Atua ma le agaga paia. (Faitau le Salamo 119:130; Ioane 16:13.) O le iʻuga, ua mafai ai ona latou nofosauni mo le toe afio mai o Keriso, ma tumau faamaoni e ui lava i tulaga e matuā sili ona faigatā. O se faaaʻoaʻoga, e na o le tasi le Tusi Paia sa iai i uso i se nofoaga o faasalaga i le taimi o pulega a Nasi. O lea, sa latou tatalo ai mo nisi meaʻai faaleagaga. Mulimuli ane, na ave faananā e se tasi o uso i totonu o lona vae faapipii, ni kopi o le Olomatamata. Na aofia iā i latou na faasaoina mai i lenā nofoaga, se tasi o uso faauuina e suafa iā Ernst Wauer. Na ia faapea mai: “E mataʻina le auala na fesoasoani ai Ieova iā i matou, ina ia manatua pea manatu faalaeiau sa maua i na lomiga. I aso nei, e tele ma anoanoaʻi meaʻai faaleagaga, ae po o tatou talisapaia na sauniuniga? Ou te talitonu e tele faamanuiaga e foaʻi e Ieova i ē e faatuatua ma faamaoni, o loo aai i lana laoai faaleagaga.”
15, 16. O ā faamanuiaga na maua e se ulugalii mai i le la auaunaga, ma o le ā se mea ua e aʻoaʻoina mai ai?
15 Ua lagolagoina e isi mamoe uso o Keriso, e ala i le faaalu o le tele o le taimi i le galuega talaʻi. (Mata. 25:40) Ua latou lotomalilie e faamuamua manaʻoga o le Malo i o latou olaga, e lē pei o le pologa leaga ma le paiē. O se faataʻitaʻiga, e leʻi mautonu Jon ma Masako ina ua talosagaina i laʻua e galulue i Kenya, e talaʻi i tagata Saina i inā. Peitaʻi, ina ua la tatalo e faatatau i le mataupu, ma mafaufau loloto i ai, ona la filifili loa lea e malaga atu.
16 E tele faamanuiaga na la maua, e aofia ai le amataina o suʻesuʻega faale-Tusi Paia e fitu, ma le tele o iʻuga lelei na la selesele i ai. Na la faapea mai: “E tele vala mataʻina o le ma auaunaga, ma e faafetaia Ieova ona o le avanoa ua mafai ai ona ma auauna i inei.” Ua faaalia e le toʻatele o uso ma tuafāfine lo latou maumauaʻi, e tumau pea i le auaunaga iā Ieova e tusa lava po o le ā le taimi e oo mai ai le iʻuga. Seʻi mafaufau i le faitau afe o i latou na faauu mai i le Aʻoga o Kiliata ma ua auauna o ni misionare. O loo faamatalaina i Le Olomatamata o Oketopa 15, 2001, le olaga o se misionare, i le mataupu ua faaulutalaina, “E Matou te Faia le Mea Aupito Sili Matou te Mafaia!” A o faitauina lenā mataupu, ia manatunatu i ni auala e mafai ona faateleina ai sou sao i le auaunaga, lea e maua ai le olioli ma viia ai Ieova.
IA MATAALA
17. E faapefea ona avea o se faamanuiaga le lē iloa tonu o le taimi e oo mai ai le iʻuga?
17 O le lē iloa tonu o le aso ma le itula e oo mai ai le iʻuga, o se faamanuiaga ae lē faavaivaia ai i tatou. E fesoasoani iā i tatou e faaalu ai le tele o le taimi e faia ai le auaunaga i le Atua, ma faamalosia atili ai la tatou faiā ma Ia. E maua le fiafia i le auaunaga iā Ieova, e ala i le uaʻi atoatoa i le galuega ua tuuina mai e Iesu iā i tatou, ma ʻalofia mea e faavaivaia ai.—Luka 9:62.
18. Aiseā e tatau ai ona tatou tumau faamaoni i le auaunaga iā Ieova?
18 Ua toe o se aga ona oo mai lea o le iʻuga. Ia faafiafia le finagalo o Ieova ma Iesu, ma tumau faamaoni i le auaunaga. E tatou te faafetaia Ieova ma lona Alo, ona o le maufaatuatuaina o i tatou, e ala i le tuuina mai o se galuega mataʻina e tatou te faia.—Faitau le 1 Timoteo 1:12.
19. E faapefea ona tatou nofosauni mo le iʻuga o lenei faiga o mea?
19 Po o le ā lava lo tatou faamoemoe, ae e tatau ona tatou tumau pea ma le faamaoni i le faia o le galuega talaʻi, ma faia tagata ma soo. E lē manaʻomia ona tatou iloa tonu le aso ma le itula e oo mai ai le iʻuga, peitaʻi e tatau ona tatou nofosauni. (Mata. 24:36, 44) E mautinoa le maua o le fiafia pe a faaauau ona faatuatuaina Ieova, ma faamuamua i o tatou olaga lona Malo.—Roma 10:11.
[Faaopoopoga i lalo]
[Fesili mo le Suʻesuʻega]
[Ata i le itulau 26]
Ia saʻilia pea meaʻai faaleagaga e ui i tulaga faigatā
[Ata i le itulau 27]
E vave le alu o le taimi pe a pisi i le auaunaga iā Ieova
