1-3. (a) Fruteri wan tu tori di kan yepi wi fu frustan tu fu den agersitori fu Yesus. (b) Sortu aksi musu kisi piki?

KON meki wi taki dati wan heihei lantiman abi wan prenspari sani fu du èn a e aksi yu fu rèi en go na a presi pe a musu go. Ma wan tu miniti fosi yu go teki en, yu e si taki yu no abi nofo oli na ini yu wagi. Now yu musu hasti yusrefi fu go lai oli. Disiten a lantiman doro kaba na a presi pe yu musu teki en, ma yu no de drape. A e luku lontu, ma a no man si yu. A no man wakti, sobun a e aksi wan tra sma fu rèi en go na a presi pe a musu go. Syatu baka dati yu e doro èn yu e si taki a lantiman gowe kaba. Fa yu ben o firi?

² Kon meki wi taki now dati yu na wan heihei lantiman èn yu teki dri man fu du wan prenspari bisnis gi yu. Yu e fruteri den san den musu du èn ala dri de klariklari fu du dati. Ma bakaten te yu drai kon baka, yu e si taki soso tu fu den man disi du san yu aksi den, èn a wan di no du san a ben musu du e taki wan lo sani fu puru ensrefi na ini a tori. Yu e si taki a no du nowan muiti srefi fu du san yu aksi en. Fa yu ben o feni dati?

³ Den tori di wi fruteri didyonsro na den srefi sortu situwâsi di Yesus ben taki fu den na ini na agersitori fu den tin nyunwenke èn a di fu den talenti. Ala tu agersitori abi fu du nanga a ten fu a kaba. Den e sori fu san ede son salfu Kresten ben o du den wroko bun èn na wan koni fasi. Den e sori tu fu san ede son salfuwan no ben o du dati (Mat. 25:1-30). * Yesus sori tu san wi kan leri fu den agersitori disi. A taki: „Fu dati ede, tan na ai bika unu no sabi a dei noso a yuru.” A ben sori taki den disipel fu en no ben o sabi soifri o ten a ben o kon fu pori a grontapu fu Satan (Mat. 25:13). Wi srefi musu „tan na ai”. Fu san ede a bun fu tan na ai? Suma ben  tan na ai na ini a ten di pasa? San wi musu du fu tan na ai na ini a ten disi?

4. Fu man tan na ai, a no prenspari fu sabi soifri o ten a kaba o kon. Fu san ede?

⁴ Son leisi a prenspari fu sabi a ten. Fu eksempre, te yu e wroko na ini wan fabriki, te yu abi wan mofo nanga datra, noso te yu musu teki wan lantibus, a prenspari fu sabi o lati a de, so taki yu no lati. Ma wan brandweer-man noso wan sma di e yepi trawan wantewante baka wan rampu, no musu tan luku en oloisi doronomo. Efu a e du dati, a no o poti prakseri na san a e du èn disi kan tyari moro bigi problema kon. Na ini den sortu situwâsi disi a de moro prenspari fu poti prakseri na a wroko di a e du, leki fu sabi o lati a de. Na so a de tu nanga a preikiwroko. Nanga a wroko disi wi e yepi sma fu kon sabi san Yehovah du fu frulusu libisma. A wroko disi prenspari spesrutu na ini a ten disi, fu di a kaba fu a grontapu disi e kon krosibei dei fu dei. Wi no abi fu sabi soifri o ten a kaba o kon. San prenspari, na taki wi musu tan na ai èn wi musu du san Yehovah wani wi fu du. Fu taki en leti, wi kan kari feifi sani fu san ede a bun taki wi no sabi soifri o ten a kaba o kon.

5. Kari wan sani fu san ede a bun taki wi no sabi o ten a kaba o kon.

⁵ A fosi sani na disi: Fu di wi no sabi o ten a kaba o kon, meki wi abi na okasi fu sori san de na ini wi ati trutru. Yehovah e sori taki a abi lespeki gi wi, fu di a meki wi bosroiti gi wisrefi efu wi wani dini en trutru. Wi e dini Yehovah fu di wi lobi en. Wi no e dini en soso fu di wi wani pasa a kaba fu a grontapu disi libilibi so taki wi kan kisi têgo libi. (Leisi Psalm 37:4.) Wi e prisiri fu du a wani fu en èn wi e frustan taki a e gi wi leri fu di a wani taki wi abi wan bun libi (Yes. 48:17). Wi no e si den wèt fu en leki wan hebi.​—1 Yoh. 5:3.

6. Fa Gado e firi te wi e dini en fu di wi lobi en èn fu san ede a e firi so?

⁶ A di fu tu sani na disi: Fu di wi no sabi o ten a kaba o kon, meki wi abi na okasi fu meki Yehovah ati prisiri. Te wi e dini Yehovah fu di wi lobi en èn no fu di a kaba de krosibei noso fu di wi wani kisi blesi, dan wi e yepi Yehovah buweisi taki en feanti Satan na wan leiman. (Yob 2:4, 5; leisi Odo 27:11.) Wi sabi ala den problema di Didibri tyari kon gi libisma. Dati meki wi breiti srefisrefi fu saka wisrefi ondro a tiri fu Yehovah èn fu kakafutu gi Satan.

7. Fu san ede yu wani gebroiki yu libi fu dini Gado èn fu yepi trawan?

⁷ A di fu dri sani na disi: Fu di wi no sabi o ten a kaba o kon, meki a o moro makriki gi wi fu dini Gado nanga wi heri ati èn fu no denki wisrefi nomo. Wi o wani gebroiki wi heri libi fu dini Gado èn fu yepi trawan. Na ini a ten disi son sma di no sabi Gado e bribi tu taki a grontapu disi o kon na wan kaba. Den e frede taki wan bigi rampu o kon èn dati meki den e prakseri: „Meki wi nyan èn dringi, bika tamara wi o dede” (1 Kor. 15:32). Ma wi no e frede èn wi no e suku wini gi wisrefi nomo (Odo 18:1). Na presi fu dati, wi e poti a wani fu Yehovah na a fosi presi na ini wi libi. Wi de klariklari fu gebroiki ala san wi abi, sosrefi wi ten nanga wi krakti fu preiki a bun nyunsu fu Gado Kownukondre. (Leisi Mateyus 16:24.) Wi e prisiri fu dini Gado, spesrutu te wi e yepi trawan fu leri sabi en.

8. Sortu Bijbel tori e sori fu san ede wi musu frutrow moro tapu Yehovah nanga a Wortu fu en?

⁸ A di fu fo sani na disi: Fu di wi no sabi o ten a kaba o kon, meki wi o frutrow moro tapu Yehovah èn wi o du ala muiti fu du san en Wortu e taki. Fu di wi na sondu sma, meki a makriki gi wi fu frutrow tapu wisrefi nomo. Ma Paulus gi ala Kresten a warskow disi: „A sma di denki taki a e tanapu, musu luku bun taki a no fadon.”  Dyaso a ben taki fu den 23.000 Israelsma di ben trangayesi Yehovah èn di dede leti fosi den go na ini a Pramisi Kondre. Paulus taki: „Den sani disi di pasa nanga den de leki eksempre gi wi èn den skrifi leki wan warskow gi wi di e libi na a kaba fu a ten disi.”​—1 Kor. 10:8, 11, 12.

9. Fa tesi kan tranga wi bribi èn meki taki wi tron moro bun mati fu Gado?

⁹ A di fu feifi sani na disi: Fu di wi no sabi o ten a kaba o kon, meki wi abi na okasi fu leri wan sani fu den tesi di e miti wi. Na so wi bribi o kon moro tranga. (Leisi Psalm 119:71.) Fu tru, den lasti dei fu a grontapu disi na ’muilek ten di tranga fu pasa’ (2 Tim. 3:1-5). Furu sma na ini a grontapu fu Satan no lobi wi. Dati meki den e frufolgu wi fu wi bribi ede (Yoh. 15:19; 16:2). Ma neleki fa faya e krin gowtu, na so tesi kan meki wi bribi kon moro tranga. Efu wi abi a sakafasi fu suku yepi na Gado te wi e kisi tesi, dan nowan tesi o man tapu wi fu dini en. Te wi e du disi, dan wi nanga Yehovah o tron moro bun mati.​—Yak. 1:2-4; 4:8.

10. O ten a gersi leki a ten e lon?

¹⁰ Son leisi a gersi leki ten e pasa esi, ma son leisi a gersi leki a ten no e go. Te wi abi furu fu du èn te wi no e luku a ten doronomo, dan a o gersi leki a ten e lon. Sosrefi, te wi de fayafaya fu du a moi wroko di Yehovah gi wi fu du, dan a o gersi leki a kaba o kon moro esi leki san wi e denki. Furu salfuwan na moi eksempre gi wi fu di den tan du a wroko fu Gado fayafaya. Meki wi luku syatu san pasa, baka di Yesus tron Kownu na ini 1914. Wi o si fa son salfuwan ben de na ai èn fa trawan no ben de na ai.

11. Fu san ede son salfuwan ben e denki baka 1914, taki Yesus no ben o kon ete?

¹¹ Meki wi luku den agersitori di Yesus fruteri fu den tin nyunwenke èn fu den talenti. Efu den nyunwenke nanga den srafu ben sabi o ten a trowmasra noso a masra ben o kon, den no ben o abi fu tan na ai. Ma fu di den no ben sabi dati, meki den ben musu tan na ai. Someni tenti yari den salfuwan ben frustan kaba taki 1914 ben o de wan spesrutu yari, ma den no ben sabi krin san ben o pasa na a ten dati. Di sani no pasa soleki fa den ben e denki, a ben kan gersi leki Yesus no ben o kon ete. Wan brada taki: „Wan tu fu wi ben e denki trutru taki wi ben o go na hemel na ini a fosi wiki fu oktober 1914.”

12. Fa den salfuwan sori taki den koni èn taki den de fu frutrow?

¹² Prakseri nomo fa son salfuwan lasi-ati di den si taki a kaba fu a grontapu no kon soleki fa den ben e denki! Na a ten dati den ben e kisi frufolgu tu fu di a Fosi Grontapufeti ben bigin. Pikinmoro den no ben e du a preikiwroko èn a ben de neleki den ben fadon na sribi. Ma na ini 1919 den ben musu wiki! Yesus ben kon na a agersi tempel fu Gado èn a ben o luku fa sani ben e waka drape. Ma sonwan fu den salfuwan no ben de na ai èn den lasi a grani fu du „bisnis” gi Masra Yesus (Mat. 25:16). Den ben de leki den don nyunwenke di no ben abi oli gi den lampu moro. Neleki fa a lesi srafu no ben wani wroko gi en masra, na so den no ben wani du muiti gi a Kownukondre. Ma furu fu den salfuwan tan du den wroko èn den sori taki den wani dini den Masra ala ten, srefi na ini den muilek yari dati di feti ben de.

13. Sortu denki a srafu-grupu ben abi baka 1914 èn fa den e denki now?

¹³ Baka 1914, a moi sani disi ben skrifi na ini A Waktitoren: „Brada nanga sisa, iniwan fu wi di abi a yoisti denki fu Gado no o lasi-ati te a kon sabi fa Gado seti sani. Wi no wani taki wi eigi wani musu pasa. Sobun, di wi kon frustan taki wi no  ben abi a yoisti denki fu san ben o pasa na ini oktober 1914, dan wi ben breiti taki Masra no kenki den sani di a seti, soso fu du wi wan bun. Wi no ben wani taki a du dati. A wan-enkri sani di wi wani, na fu frustan fa a seti sani èn san a o du.” Te now ete den salfuwan abi a sakafasi disi èn a srefi faya fu du Gado wani. Den no e taki dati Gado e taigi den langalanga san fu du. A wan-enkri sani di den wani du, na a wroko di Masra gi den fu du na grontapu. Now „wan bigi ipi” „tra skapu”, sobun den Kresten di abi a howpu fu libi na grontapu, de na ai tu èn den e wroko fayafaya neleki den salfuwan.​—Openb. 7:9; Yoh. 10:16.

14. Fu san ede a bun te wi de klariklari fu teki leri fu a srafu-grupu?

¹⁴ Gado abi en organisâsi di a e gebroiki fu leri a pipel fu en fa den kan kisi wini te den e meki Gado Wortu nanga en santa yeye tiri den. Den salfuwan nanga den sma fu a bigi ipi di de na ai, e sori taki den de klariklari fu teki a leri dati. A de leki den e furu den lampu baka nanga oli. (Leisi Psalm 119:130; Yohanes 16:13.) Na so den srefi o de srekasreka te Krestes o kon baka fu tyari a kaba kon. Boiti dati den e kisi krakti baka fu tan dini Yehovah, srefi te bun hebi tesi miti den. Fu eksempre, di son brada ben de na ini wan Nazi strafuman-kampu, den ben abi wán Bijbel nomo. Dati meki den begi Gado fu kisi moro buku di abi fu du nanga Bijbel. A no langa baka dati den yere taki den srudati tyari wan tra brada kon na ini a strafuman-kampu. A brada disi ben abi wan udu-futu èn a ben kibri wan tu nyun Waktitoren na ini. Brada Ernst Wauer, wan salfu brada di ben de na ini a strafuman-kampu, taki bakaten: „Yehovah yepi wi trutru fu no frigiti den sani di wi ben leisi na ini den Waktitoren. Disi ben gi wi deki-ati trutru.” Dan a taki: „Na ini a ten disi wi e kisi someni buku di e gi Bijbel leri, ma a de so taki wi e warderi dati? Mi de seiker taki Yehovah o gi bun furu blesi na den wan di e frutrow na en tapu, di e tan dini en èn di e tan nyan na a tafra fu en.”

15, 16. Fa wan Kresten trowpaar kisi blesi fu di den e dini Gado fayafaya? San yu kan leri fu den sortu ondrofenitori disi?

¹⁵ Den tra skapu e du a wroko fu Masra fayafaya tu èn den e horibaka dorodoro gi  den brada fu Krestes (Mat. 25:40). Den no de leki a lesi ogri srafu fu na agersitori fu Yesus. Den de klariklari fu wroko tranga gi a Kownukondre èn fu tyari bigi kenki kon na ini den libi, soso fu poti Kownukondre afersi na a fosi presi. Fu eksempre, di Jon nanga Masako kisi wan kari fu go yepi preiki gi den Sneisi na ini Kenia, den ben e tweifri fu go na ini a bigin. Ma baka di den begi fu a tori disi èn baka di den luku a situwâsi fu den, den bosroiti fu go tan drape.

¹⁶ Den kisi furu blesi fu a muiti di den du. Den taki: „A preikiwroko dyaso switi srefisrefi.” Den bigin nanga seibi Bijbelstudie èn den ondrofeni furu moi sani. Den taki: „Wi e taki Yehovah tangi ibri dei taki a gi wi na okasi fu kon dyaso.” A no de fu taki dati furu tra brada nanga sisa de di sori taki den wani tan dini Gado fayafaya te na a kaba, awinsi o ten dati o kon. Prakseri den dusundusun brada nanga sisa di tron zendeling, baka di den go na a Gileadskoro. Yu kan leisi moi sani fu a zendelingwroko na ini na artikel di nen „Wi e du ala san wi man!” na ini A Waktitoren fu 15 oktober 2001. Na artikel disi e taki fa a dei fu wan zendeling de nofo tron. Te yu o leisi en, prakseri fa yu kan du moro na ini a diniwroko fu Gado. Na so yu o man prèise en moro èn disi o gi yu moro prisiri.

17. Fu san ede a bun gi wi taki wi no sabi soifri o ten a kaba fu a grontapu disi o kon?

¹⁷ A de krin fu si taki a bun taki wi no sabi soifri o ten a kaba fu a grontapu disi o kon. Na presi fu bruya noso fu lasi-ati, wi e firi taki Yehovah, wi lobi-ati Papa, de moro krosibei fu wi te wi e du en wroko fayafaya. Fu di wi e poti ala prakseri na a wroko di Yesus gi wi fu du èn fu di wi no e meki tra sani puru wi prakseri, meki wi abi wan koloku libi now fu di wi e dini Yehovah.​—Luk. 9:62.

18. Fu san ede wi no wani lasi bribi?

¹⁸ A krutudei fu Gado e kon krosibei esi-esi. Nowan fu wi wani meki Yehovah nanga Yesus sari. Den gi wi wan moi wroko fu du na ini den lasti dei disi. Wi e warderi en trutru taki den abi a frutrow taki wi o du a wroko disi bun!​—Leisi 1 Timoteyus 1:12.

19. Fa wi kan sori taki wi de na ai?

¹⁹ Awinsi wi abi a howpu fu libi na hemel noso na ini wan paradijs na grontapu, meki wi tan du a preikiwroko èn meki wi tan meki disipel soleki fa Gado taigi wi fu du. Te now ete wi no sabi o ten a dei fu Yehovah o kon èn wi no abi fu sabi dati tu. Wi man tan na ai èn na dati wi o du tu! (Mat. 24:36, 44) Wi de seiker taki solanga wi e frutrow na Yehovah tapu èn solanga wi e poti a Kownukondre na a fosi presi, wi o kisi blesi.​—Rom. 10:11.