1-3. (a) Situasaun saida deʼit mak ajuda ita atu komprende Jesus nia ai-knanoik rua? (b) Ita sei koʼalia kona-ba pergunta saida deʼit?

HANOIN toʼok katak ema-boot ida husu Ita atu tula nia iha Ita-nia karreta atu bá enkontru importante ida. Maibé minutu balu antes Ita sai husi uma atu foti nia, Ita haree katak Ita-nia karreta nia mina besik atu maran. Tan neʼe, Ita bá lalais atu enxe mina. Durante tempu neʼe, ema-boot haree katak Ita seidauk mai, nuneʼe, nia buka fali ema seluk atu lori nia. Kuandu Ita toʼo iha neʼebá, ema-boot neʼe bá tiha ona. Ita sente oinsá?

² Agora, hanoin toʼok katak Ita mak ema-boot neʼe. Antes atu halo viajen, Ita hili ema naʼin-tolu atu tau matan ba serbisu importante balu no esplika ba sira saida mak sira presiza halo. Sira hotu simu. Maibé, liutiha tempu balu kuandu Ita fila fali mai, Ita haree katak ema naʼin-rua deʼit mak halo duni buat neʼebé Ita haruka no ida seluk fó razaun oioin tansá nia la halo ninia serbisu. Ita sente oinsá?

³ Situasaun sira-neʼe hanesan ho Jesus nia ai-knanoik kona-ba feto-raan sanulu no kona-ba talenta. Jesus konta ai-knanoik rua neʼe atu hatudu tanbasá mak durante loron ikus sira ema kristaun kose-mina balu hatudu laran-metin no matenek maibé balu lae. * (Mt 25:1-30) Liuhusi ai-knanoik sira-neʼe, nia fó konsellu neʼebé importante, hodi dehan: “Imi matan-moris neon-naʼin, basá imi la hatene loron ka oras.” Neʼe katak Jesus nia dixípulu sira la hatene bainhira loos mak nia sei halakon Satanás nia mundu aat neʼe. (Mt 25:13) Ohin loron, ita mós presiza matan-moris nafatin. Maibé, tansá mak diʼak ba ita atu matan-moris nafatin? Sé deʼit mak hatudu katak sira matan-moris nafatin? No atu matan-moris nafatin, saida deʼit mak ita presiza halo?

4. Atu matan-moris nafatin, tanbasá mak ita la presiza hatene kona-ba oras neʼebé mundu neʼe nia rohan sei toʼo mai?

⁴ Iha situasaun balu, importante atu ita tuir oras. Porezemplu, kuandu atu bá serbisu ka eskola, tuir enkontru ruma, ka saʼe ró ka aviaun, ita presiza haree oras atu labele tarde. Maibé, ema neʼebé serbisu nuʼudar bombeiru ka salva ema kuandu dezastre mosu, sira labele haree oras beibeik, tanba se halo ida-neʼe dada sira-nia atensaun husi sira-nia serbisu no bele lori perigu. Iha situasaun hanesan neʼe, importante liu mak atu tau atensaun ba sira-nia serbisu. Nuneʼe mós ho ita neʼebé halo serbisu haklaken. Nuʼudar mundu aat neʼe nia rohan besik daudauk, serbisu haklaken sai importante liu tanba ajuda ema atu hatene kona-ba buat neʼebé Jeová halo hodi sira bele hetan salvasaun. Tan neʼe, atu matan-moris nafatin nuʼudar ema kristaun, ita la presiza hatene bainhira loos mak mundu neʼe nia rohan sei toʼo mai. Tuir loloos, ita iha razaun lima tansá diʼak ba ita atu la hatene loron ka oras neʼe.

5. Tanba ita la hatene bainhira mak mundu neʼe nia rohan sei toʼo mai, oinsá mak ida-neʼe kona ita?

⁵ Razaun primeiru tansá diʼak ba ita atu la hatene bainhira loos mak mundu neʼe nia rohan sei toʼo mai mak tanba ida-neʼe hatudu sai buat neʼebé loloos iha ita-nia laran. Jeová hatudu respeitu mai ita hodi husik ita atu serbí nia ho laran-metin ho ita-nia hakarak rasik. Ita serbí Jeová tanba ita hadomi nia, laʼós deʼit tanba ita hakarak hetan salvasaun no moris rohan-laek. (Lee Salmo 37:4. *) Hodi halo Maromak nia hakarak halo ita sente haksolok, no ita mós hatene katak nia hanorin ita kona-ba buat neʼebé lori diʼak ba ita. (Isa 48:17) Loos duni, ita la sente susar atu halo tuir ninia ukun-fuan sira.—1 Joao 5:3.

6. Kuandu ita serbí Jeová tanba ita hadomi nia, nia sente oinsá? Tanbasá?

⁶ Razaun segundu mak tanba ida-neʼe fó oportunidade mai ita atu halo Jeová nia laran kontente. Kuandu ita serbí nia tanba ita hadomi nia, laʼós tanba mundu nia rohan atu mai ona ka tanba ita hakarak deʼit atu simu bensaun, ita ajuda Jeová atu hatudu katak ninia inimigu Satanás mak bosok-teen. (Jó 2:4, 5; lee Provérbios 27:11. *) Kuandu ita hanoin kona-ba oinsá mak Diabu hamosu susar oioin iha mundu neʼe, ida-neʼe book ita atu apoia Jeová nia ukun ho laran-kontente hodi la simu Satanás nia ukun.

7. Tanbasá mak ita hakarak uza ita-nia moris hodi serbí Maromak no ajuda ema seluk?

⁷ Razaun terseiru mak tanba ida-neʼe halo fasil liu ba ita atu la buka uluk ita rasik nia diʼak maibé uza ita-nia moris hodi serbí Maromak no ajuda ema seluk. Ohin loron, ema balu neʼebé la hatene Maromak mós fiar katak mundu neʼe atu ramata. Sira taʼuk katak lakleur dezastre ruma sei halakon mundu neʼe, tan neʼe sira hanoin: “Ita han no hemu bá, basá aban ita sei mate.” (1 Kor 15:32) Maibé, ita la taʼuk kona-ba mundu nia rohan, no ita mós la hanoin deʼit kona-ba ita-nia an rasik. (Prov 18:1) Duké sai hanesan neʼe, ita tau uluk Jeová nia hakarak iha ita-nia moris no ita mós prontu atu uza ita-nia tempu, forsa, no buat neʼebé ita iha atu haklaken lia-foun diʼak kona-ba Maromak nia Ukun ba ema seluk. (Mt 16:24) Kuandu ita serbí Jeová, liuliu kuandu ita ajuda ema seluk atu koñese nia, ida-neʼe lori haksolok mai ita.

8. Ezemplu saida mak hatudu katak ita presiza tau ita-nia fiar tomak ba Jeová no ninia Liafuan?

⁸ Razaun ida seluk tansá diʼak atu ita la hatene loron ka oras mak tanba ida-neʼe ajuda ita atu tau ita-nia fiar tomak ba Jeová no hakaʼas an atu halo tuir ninia Liafuan. Nuʼudar ema sala-naʼin, fasil ba ita atu tau fiar ba ita-nia an rasik. Apóstolu Paulo fó avizu ba ema kristaun hotu, hodi dehan: “Ema neʼebé hanoin katak nia hamriik metin, matan-moris bá atu nia labele monu.” Paulo mós temi ezemplu kona-ba ema Israel naʼin-23.000  neʼebé la halo tuir Jeová no mate foin antes atu tama iha rai neʼebé Maromak promete ona. Depois, Paulo dehan: “Buat sira-neʼe hakerek tiha atu halo ita sai matan-moris, ita neʼebé tempu nia rohan toʼo ona mai.”—1 Kor 10:8, 11, 12.

9. Susar sira neʼebé ita hasoru ajuda ita oinsá?

⁹ Razaun ikus tansá diʼak atu ita la hatene bainhira mak mundu nia rohan sei toʼo mai mak tanba susar sira neʼebé ita hasoru durante loron ikus sira ajuda ita atu aprende husi ita-nia susar no hametin liután ita-nia fiar. (Lee Salmo 119:71. *) Ita hatene katak nuʼudar mundu aat neʼe besik ona toʼo rohan, “susar barak sei mosu”. (2 Tim 3:1-5) Ema barak iha Satanás nia mundu aat neʼe odi ita, no sira mós fó-terus ba ita tanba ita-nia fiar. (Joao 15:19; 16:2) Maibé, hanesan ahi bele halo besi sai moos liután, susar sira neʼebé kona ita bele halo ita-nia fiar sai metin liután. Se ita haraik an hodi halo tuir nafatin Jeová nia matadalan, susar sira la bele hapara ita atu serbí Jeová, maibé halo ita hakbesik liután ba Jeová.—Tgo 1:2-4; 4-8.

10. Bainhira mak ita sente katak tempu liu lalais?

¹⁰ Dala ruma ita sente tempu liu lalais, no dala ruma ita sente tempu liu neineik. Porezemplu, kuandu ita okupadu ho serbisu barak no la haree oras beibeik, ita sente katak tempu liu lalais. Hanesan neʼe mós, se ita okupadu ho serbisu neʼebé Jeová fó mai ita, mundu nia rohan sei toʼo mai lalais. Ema kose-mina barak hatudu ezemplu diʼak kona-ba uza sira-nia tempu atu halo serbisu ba Maromak. Tan neʼe, mai ita hanoin kona-ba buat neʼebé akontese iha tempu neʼebé Jesus sai Liurai iha tinan 1914 no oinsá mak ema kose-mina balu hatudu katak sira matan-moris nafatin maibé balu lae.

11. Depois tinan 1914, tanbasá mak ema kose-mina balu hanoin katak Jesus sei tarde?

¹¹ Mai ita hanoin filafali Jesus nia ai-knanoik kona-ba feto-raan sanulu no kona-ba talenta. Se feto-raan sira ka atan sira iha ai-knanoik sira-neʼe hatene ona kona-ba oras neʼebé noivu ka sira-nia naʼi sei mai, sira la presiza matan-moris nafatin. Maibé tanba sira la hatene, sira presiza matan-moris no halo sira-nia an prontu nafatin. Antes tinan 1914, ema kristaun kose-mina sira hatene ona katak tinan neʼe mak tinan neʼebé espesiál tebes, maibé sira la hatene ho loloos saida mak sei akontese iha tinan neʼe. Tan neʼe, kuandu buat neʼebé sira hein la mosu iha tinan neʼe, sira balu hanoin katak Jesus sei tarde. Irmaun ida neʼebé hanoin filafali kona-ba fulan-Outubru 1914 hatete: “Ami balu hanoin katak ami sei saʼe ba lalehan durante semana primeiru iha fulan-Outubru neʼe.”

12. Oinsá mak ema kose-mina barak hatudu laran-metin no matenek?

¹² Hanoin toʼok oinsá ema kose-mina sira sente kuandu sira haree katak mundu nia rohan seidauk mai! Liután neʼe, ema fó-terus sira durante Funu Mundiál Primeiru. Ho nuneʼe, sira besik atu para serbisu haklaken, neʼe hanesan sira toba. Maibé iha tinan 1919, buat ruma fanu sira! Jesus mai atu revista ema hotu neʼebé temi sira-nia an nuʼudar ema kristaun. Maibé, tanba sira balu la matan-moris nafatin, Jesus la simu sira, no sira lakon oportunidade espesiál atu halo serbisu ba Jesus. (Mt 25:16) Sira-nia hahalok hanesan ho feto-raan beik sira neʼebé la aumenta mina iha sira-nia ahi-oan. Sira mós la prontu atu halo serbisu ba Jesus hodi halo sakrifísiu, hanesan ho atan sira neʼebé baruk-teen iha Jesus nia ai-knanoik. Maibé, ema kose-mina barak hatudu laran-metin no hakarak tebes atu serbí Jesus maski sira hasoru susar barak durante tempu funu.

13. Lakleur depois tinan 1914, ema kose-mina sira hatudu hahalok saida? Oinsá ho sira-nia hahalok ohin loron?

¹³ Lakleur depois tinan 1914, livru The Watchtower fó sai: “Maluk sira, ita neʼebé iha hanoin neʼebé loos kona-ba Maromak, ita la sente laran-tun kona-ba ninia arranju. Ita la hein atu ita-nia hakarak rasik mak sai loos. Tan neʼe, kuandu ita komprende katak buat neʼebé ita hein atu  akontese iha fulan-Outubru 1914 mak la loos, ita haksolok tanba Naʼi la troka Ninia Planu hodi tuir ita-nia hakarak rasik. Ita lakohi Nia atu halo nuneʼe. Ita hakarak deʼit atu komprende ninia planu no hakarak.” Ema kose-mina sira ohin loron mós hatudu nafatin haraik-an no laran-metin ba Maromak hanesan ho tempu uluk. Sira nunka dehan katak Maromak mak leno sira ho espíritu santu, maibé sira-nia hakarak mak atu halo serbisu neʼebé Jesus fó ba sira iha mundu neʼe. Ohin loron, “ema-lubun boot” husi “bibi seluk” neʼebé iha esperansa atu moris ba nafatin iha mundu foun, sira mós halo tuir ema kose-mina sira-nia ezemplu.—Apok 7:9; Joao 10:16.

14. Oinsá mak halo tuir hanorin husi atan laran-metin no matenek bele ajuda ita?

¹⁴ Maromak hili atan laran-metin no matenek atu fó ai-han espirituál ba ninia povu hodi sira bele simu ajuda husi Maromak nia Liafuan no espíritu santu. Ema-lubun boot neʼebé matan-moris hanesan atan laran-metin no matenek, sira halo tuir hanorin husi atan neʼe. Ida-neʼe hanesan ema-lubun boot mós aumenta mina iha sira-nia ahi-oan. (Lee Salmo 119:130; * Joao 16:13.) Rezultadu mak sira hatudu sira-nia an prontu ba tempu neʼebé Jesus sei mai fali iha mundu neʼe nia rohan, hanesan ema kose-mina sira. Sira mós hetan forsa atu laran-metin nafatin maski hasoru susar oioin. Porezemplu, iha tempu neʼebé Hitler mak ukun rai-Alemaña, irmaun sira neʼebé iha komarka boot ida nia laran, foufoun sira iha Bíblia ida deʼit. Tan neʼe, sira halo orasaun hodi husu ai-han espirituál barak liután. Lakleur depois neʼe, sira rona katak irmaun ida neʼebé foin tama iha komarka neʼe konsege lori Livru Haklaken foun balu hodi subar iha ninia ain falsu neʼebé halo husi ai. Irmaun kose-mina ida, neʼebé uluk iha komarka neʼe, naran Ernst Wauer, hatete katak Jeová ajuda sira iha dalan neʼebé kapás tebes hodi sira bele hanoin-hetan informasaun iha lisaun sira. Nia mós hatete: “Ohin loron, fasil tebes ba ita atu hetan ai-han espirituál, maibé ita sempre hafolin ida-neʼe ka lae? Haʼu fiar katak Jeová sei haraik bensaun ba ema neʼebé tau fiar ba nia, laran-metin nafatin, no han husi ninia meza.”

15, 16. Bensaun saida deʼit mak feen-laʼen ida hetan tanba sira haklaken ho laran-manas? Husi esperiénsia sira hanesan neʼe, ita bele aprende saida?

¹⁵ Liután neʼe, ema husi bibi seluk mós halo serbisu haklaken ho badinas hodi ajuda Kristu nia alin sira. (Mt 25:40) Sira-nia hahalok la hanesan ho atan sira neʼebé baruk-teen iha Jesus nia  ai-knanoik, sira prontu atu serbisu ho badinas no husik sira rasik nia diʼak hodi buka uluk Maromak nia hakarak. Porezemplu, feen-laʼen kristaun ida naran Jon no Masako hetan konvite atu ajuda ema neʼebé koʼalia língua xina iha rai-Kénia. Foufoun, sira laran-rua kona-ba atu bá neʼebá, maibé depois halo tiha orasaun no hanoin didiʼak, sira foti desizaun atu bá.

¹⁶ Ikusmai, Jeová fó bensaun barak ba sira-nia hakaʼas-an no laran-manas. Sira hatete: “Haklaken iha neʼe diʼak tebes.” Sira hetan estudu Bíblia hitu no mós esperiénsia barak neʼebé diʼak. Sira hatutan tan: “Loron-loron, ami fó-agradese ba Jeová tanba nia husik ami mai iha neʼe.” Iha mós irmaun-irmán seluk neʼebé hatudu katak sira hakarak serbí Jeová ho laran tomak toʼo mundu nia rohan maski sira la hatene bainhira mak loron neʼe sei toʼo mai. Hanoin toʼok kona-ba irmaun-irmán sira rihun ba rihun neʼebé tuir ona eskola misionáriu nian, ka sira neʼebé fó sira-nia an ho hakarak rasik atu serbí iha rai seluk. Ita bele hatene liután kona-ba muda ba fatin neʼebé presiza haklaken-naʼin barak liután hodi lee informasaun iha Livru Haklaken, 15 Jullu 2012, ho títulu: “Sira fó sira-nia an ho hakarak rasik iha rai-Ekuadór.” Kuandu ita lee kona-ba saida mak irmaun-irmán sira neʼebé serbí iha rai seluk hatete, diʼak atu ita hanoin kona-ba oinsá mak ita rasik mós bele aumenta ita-nia serbisu neʼebé fó hahiʼi ba Maromak hodi ita mós bele haksolok liután.

17. Tanbasá mak la hatene loron ka oras sai hanesan bensaun ida mai ita?

¹⁷ Maski ita la hatene loron ka oras neʼebé mundu neʼe nia rohan sei toʼo mai, ida-neʼe la halo ita laran-susar ka laran-tun. Tuir loloos, ida-neʼe hanesan bensaun ida mai ita tanba fó oportunidade ba ita atu halo Jeová nia hakarak ho badinas no hakbesik liután ba nia nuʼudar ita-nia Aman neʼebé hadomi ita. Hodi tau uluk serbisu neʼebé Jesus fó mai ita iha ita-nia moris no hakaʼas an atu la husik buat ida dada ita-nia atensaun, ida-neʼe halo ita serbí Jeová ho haksolok.—Lc 9:62.

18. Tanbasá mak ita hakarak laran-metin nafatin iha Maromak nia serbisu?

¹⁸ Maromak nia loron tesi-lia nian besik daudauk ona, tan neʼe ita hakarak laran-metin nafatin iha Maromak nia serbisu. Ita lakohi halo Jeová no Jesus sai laran-triste. Sira fó serbisu espesiál mai ita iha loron ikus sira-neʼe no ita fó-agradese ba sira tanba sira tau fiar mai ita!—Lee 1 Timoteo 1:12.

19. Oinsá mak ita bele hatudu ita-nia an prontu ba mundu nia rohan?

¹⁹ Maski ita-nia esperansa mak atu bá lalehan ka moris ba nafatin iha mundu foun, maibé ita hotu hakarak halaʼo nafatin Maromak nia serbisu hodi haklaken no hanorin ema seluk atu sai Jesus nia dixípulu. Ita la hatene bainhira loos mak Jeová nia loron sei toʼo mai, maibé ita bele matan-moris nafatin hodi hatudu ita-nia an prontu ba loron neʼe. (Mt 24:36, 44) Sin, hodi tau ita-nia fiar tomak ba Jeová no buka uluk ninia hakarak iha ita-nia moris, ita sei hetan duni ninia bensaun.—Rom 10:11.