“Ne Fa Iyange Shin Ihwa Kpaa Ga”

“Yô, kuran nen gadia ne fa iyange shin ihwa kpaa ga.”​—MAT. 25:13.

Ú NA MLUMUN WER NYI?

Ka sha igbenda i nyi nahan mfe u se fe iyange shin ihwa i mkur una va ga la a lu se a iwasene?

Mbakristu mba i shigh ve mkurem mbara za hemen u kuran sha nyi gbenda?

Ka sha igbenda i nyi nahan se tese ser se wa iyol se mba keghen a kegh mve u Kristuu?

1-3. (a) Ka mbamlu mba nyi vea wase se ve se fa inja i anzaakaa a ahar a Yesu yange ôr laa? (b) Ka mbampin mba han i doo u se zua a mbamlumun sha mini?

 TÔÔ wer gba u ortom u gomoti u tagher tagher nana za zende u hange hange, nahan nan kaa a we ér u tôô nan shin mato wou u za a nan zende la. Ka zurum u ú za tôô nan yô, u mase kaven wer mkurem kuma ken kwaghhendan wou la ga. Nahan u kera ngôôr ga je maa u yem u za seer mkurem. U yemen yô, ortom u gomoti la maa za va. A jinge her cii kpa a nenge a we ga. Kpa er i lu kwagh u una fatyô u keghen we ga yô, a kaa a orgen ér nana tôô un una za zende la. Ica i gbe ga yô, u za hide, nahan u mase kaven wer or la yem zende la undu u. A lu u nena?

² Tôô ase wer ka we u lu ortom u gomoti la ye, nahan u tsua iorov utar wer ve er u tom u hange hange. U pase ve kwagh u i gbe u vea er la, ve kpa ve lumun u eren nahan. Kpa shighe karen kpuaa, u za hidi zende la yô, ka iorov uhar ken mba utar mbara tseegh ve er tom la ye. U a er tom na ga la gema ngu kperan ishô, man u nôngon tsô kpa a nôngo ér una er tom la ga. Nahan a lu u ken ishima nena?

³ Yesu yange ôr anzaakaa ahar, a a nôngo u lun kwaghmôm yô. A ôr injakwagh sha kwagh u anuunaukase man kwagh u utalenti. Anzaakaa ne cii ôr kwagh u sha shighe u mkur, shi a pase er Mbakristu mba i shigh ve mkurem mbagenev vea tile sha jighjigh kpa mbagenev vea tile sha jighjigh ga yô. * (Mat. 25:1-30) Yesu yange pase awashima u anzaakaa ne wang, kaa ér: “Yô, kuran nen gadia ne fa iyange shin ihwa kpaa ga.” Yesu lu kaan ér mbahenen nav vea fa shighe u una va tim tar u Satan ne jighilii ga. (Mat. 25:13) Se fatyô u dondon kwaghwan la nyian. Ka nyi se er ve se zua a mtsera sha mkor u Yesu yange kaa ér se kuran laa? Ka unô ve we iyol ve lu keghen a kegh u va warene? Man se er nan se za hemen u kurana?

 ER I HII VE I DOO U SE KURAN YÔ

4. Gba u fa shighe u mkur una va la keng keng ve se ‘lu per’ ga sha ci u nyi?

⁴ Ashighe agen ka i gba hange hange u se er kwagh sha shighe vough. Ambaakaa er tom u kômpeni shin u za nengen a ortwer shin u keghen mato nahan cii, ka i gba u se er sha shighe. Nahan kpa, or u nan lu nôngon ér nana pir usu shin nana war uma u or u kwagh a tser nan yô, doo u nana zer kenger shighe ga. Nana zer kenger shighe yô, kwagh la una dan nan, shi kwaghbo una fatyô u duen ker je kpaa. Hemba doon u or la nana ver ishima sha tom u i gbe u nana er la, a u keren ér nana fa shighe la. Kape tom wase u pasen kwagh ne kpa u wasen ior u henen kwagh u Yehova a lu eren sha u yiman ior je la. Man tom ne hemba ngun hange hange hegen cii, sha ci u mkur u tar ne ngu ikyua. Gba u se fa shighe u mkur una va la jighilii keng ve se kuran shi se eren kwagh u Yehova a soo ér se er la ga. Jighilii yô, mfe u se fe iyange shin ihwa ga la wase se sha igbenda itian.

5. Er se fe shighe man ihwa i mkur una va jighilii ga yô, kwagh ne wasen se u tesen er ishima i lu se ker la nena?

⁵ Gbenda u hiihii yô, er se fe shighe u mkur una va ga yô, kwagh ne ka a wase se u tesen er ishima yase i lu ker la. Yehova na se icivir, sha ci u a de ér se̱ tsua u civir un sha mimi a ishima yase. Shin er se lu veren ishima ser se va war mkur u tar ne nahan kpa, se mba civir Yehova sha ci u a doo se ishima, ka sha ci u se va zua a uma u tsôron tseegh tsô ga. (Ôr Pasalmi 37:4.) Doo se u eren ishima i Yehova, shi se fa kpaa ser, ngu tesen se kwagh u una lu se a inja yô. (Yes. 48:17) Se nenge ser atindi a na yuhwa se ga.—1 Yoh. 5:3.

6. Ka sea civir Aôndo sha ci u a doo se ishima yô, i lu un ken ishima nena, man ka sha ci u nyi?

⁶ Gbenda u sha uhar u se zough a mtsera sha ci u se fa shighe man ihwa i mkur una va jighilii ga yô, ka ian i se lu a mi i nan ser i saan Yehova iyol la. Aluer se mba civir Yehova sha ci u a doo se ishima, ka sha ci u se fa ser mkur sôôn van yum ga, shi ka sha ci u injar i se va zua a mi la kpaa ga yô, se lu eren kwagh u Yehova una gema a kaa imo a Satan, orihyom u a lahan un a ityôkyaa shio la yô. (Yobu 2:4, 5; ôr Anzaakaa 27:11.) Er se fe ican i Satan a ve se a mi kpishi la yô, doo se tsung u tan ikyaa a hemen u Yehova, geman vendan hemen u Satan.

7. U tsua wer u civir Aôndo a iyoltangen shio sha ci u nyi?

⁷ Gbenda u sha utar u se zough a mtsera sha ci u se fa iyange i mkur una va la jighilii ga yô, ka er ishima ngi i taver se u civir Aôndo a iyoltangen shio la. Nyian ne, ior mba ve fe Aôndo ga je kpa na jighjigh ér, tar ne ua lu gbem sha won ga. Mba cian ér maa aahe una va tim tar ne sha hanma shighe cii, nahan mba a mhen u bo ne ken asema a ve, ér: “Se gbaa yan nen akaa man akaa tsô, gadia kper se mba kpen.” (1 Kor. 15:32) Kpa se yô, se mba a mciem iyol ga. Se wa ayol a ase ikyo tseegh ga. (Anz. 18:1) Kpa se nyiman ayol a ase, se mba eren tom a shighe wase man agee a ase kua akaa a ase sha u pasen mbagenev loho u dedoo u Tartor u Aôndo, a mkighir shio. (Ôr Mateu 16:24.) Ka i doo se u civir Aôndo, hemban je yô, u wasen mbagenev sha u ve fa un.

8. Ka hanma ikyav ken Bibilo i tese ér gba u se suur sha Yehova man Mkaanem nam a ishima yase ciilii?

⁸ Gbenda u sha unyiin u se zough a mtsera sha ci u se fa iyange man ihwa i mkur una va la ga yô, ka sha ci u kwagh ne wase se u hemban suur sha Yehova cii, shi a wase se u eren akaa a se hen ken Mkaanem nam la ken uma wase. Er se yen yô, ka taver se u suur sha ayol a ase ga. Paulu yange wa Mbakristu cii kwagh ér: “Or u nan fe er nan tile yô, nana̱ ver ishima er nana kera va gba ga yô.” Shighe u yange zurum u Yosua una hemen ior mba Aôndo una nyôr a ve ken Tar u Ityendezwa la, Yehova wua iorov dubu ikyundu kar utar mba ve hemba un ato la. Paulu kaa ér, “akaa ne [yange] lu akav a tesen man i nger a sha u a̱ lu se ityesen, se mba mkur  u ashighe a ve sha a vese ne yô.”—1 Kor. 10:8, 11, 12.

9. Ameen aa na jighjigh wase u nan una hemba taver shi se hemba kporom hen Aôndo nena?

⁹ Gbenda u sha utaan u se zough a mtsera sha ci u se fa shighe u mkur una va la ga yô, ka sha ci u kwagh ne ngu a na atsan a se tagher a mi hegen la a tsaase se. (Ôr Pasalmi 119:71.) Sha mimi yô, ayange a masejime a tar ne ka “ashighe a ican.” (2 Tim. 3:1-5) Ior kpishi ken tar u Satan ne kôr se ihyom, nahan ka ve tôv se a ican sha ci u jighjigh wase u nan. (Yoh. 15:19; 16:2) Er ka i sôô akam sha usu sha u a taver nahan, ameen aa na jighjigh wase u nan una hemba taver. Aluer se hide a iyol ijime, se mba dondon kwaghwan u Yehova yô, ameen aa yange se u civir un ga. Kpa se kporom hen Yehova je a hemba er yange se hen la.—Yak. 1:2-4; 4:8.

10. Ka nyi ka i na ve shighe a yevese se yumu?

¹⁰ Ka sea wa ityough eren kwagh, sea ver ishima sha kwagh u shighe ga yô, shighe a yevese se je i gande. Kape se uve ityough eren tom u sagher iyol, u Yehova a ne se ne ve, iyange man ihwa la ia va fele je la. Mbakristu mba i shigh ve mkurem mbara kpishi ver se ikyav i dedoo sha gbaa ne. De se time sha kwagh u yange er shighe u i ver Yesu Tor ken inyom i 1914 la, man er mbagenev ken mba i shigh ve mkurem mbara wa iyol lu keghen a kegh, mbagenev di wa iyol ga yô.

MBAKRISTU MBA I SHIGH VE MKUREM MBARA WA IYOL KEGH A KEGH

11. Inyom i 1914 la yange i been kera yô, Mbakristu mba i shighe ve mkurem mbagenev kure ikyaa ér Yesu timbir u van, sha ci u nyi?

¹¹ Umbur injakwagh i Yesu ôr sha kwagh u anuunaukase man sha kwagh u talenti la. Luun er anuunaukase man mbatomov mba ken anzaakaa la yange vea fe shighe u orkwasehe shin ter ve una hide yô, ma kera gba u vea kuran kpee ga. Kpa ve fa shighe ga, nahan gba u vea kuran. Er Mbakristu mba i shighe ve mkurem mbara lu veren ashe anyom anyom ér inyom i 1914 la ia lu inyom i vesen nahan kpa, yange ve fa kwagh u una er hen shighe la wang ga. Akaa yange nga ze er ve ver ishima la ga yô, mbagenev hen ér Yesu timbir u van. Anmgbian ugen umbur kwagh u yange er yô, a kaa ér, “Se mbagenev kpuaa yange se hen ser, se lu yemen sha ken sati u hiihii u uwer u Oktoba u inyom i 1914 la.”

12. Nongo u mba i shigh ve mkurem, ve lu mbajighjigh man mbafankwagh la yange ve tile sha mimi nena?

¹² Nenge er yange iyol a kpe ve shighe u ve hen er mkur una va la kar la sha wono! Heela tseegh ga, shighe ne lu shighe u taver kpishi, sha ci u anmgbianev tagher a ahendan zum u i lu nôngon Ityav Mbi Tar Cii Mbi Hiihii la. Hen shighe la, lu inja er a de a de tom u pasen kwagh la kuaa nahan. Kpa ka ker ken inyom i 1919 yô, ve hide shi ve gba eren tom u pasen kwagh la. Zum ne, Yesu va ken tempel u Aôndo, u ken jijingi la, nahan lu shighe u va nengen mba ve yilan ayol a ve ér Mbakristu la. Nahan kpa, mbagenev ken a ve gba ikyaren la, nahan ve kera kuma u zan hemen u eren “kasua” sha ci u Tor ga. (Mat. 25:16) Yange ve lu per, ve lu keghen ga, vough er anuunaukase a lanen kwagh, a yange haa mkurem ken amenger a ve ga la nahan. Shi ve lu er ortom u wan hwev, u yange venda u eren kasua sha ci u ter na la nahan. Er Mbakristu mba i shighe ve mkurem mbagenev tile sha mimi ga nahan cii kpa, jighjigh u nan u mba kpishiv yange tenger ga, shi ve tese ér sar ve tsung u shiren Ter ve, shin er ityav va a mbamtaver ken anyom a karen la nahan kpaa.

13. Shighe u inyom i 1914 bee ica lu a gba ga la, lu ieren i nyi Mbakristu mba i shigh ve mkurem la lu a mini, man ka nyi ieren ve lu a mi nyiana?

¹³ Inyom i 1914 la yange i been kera yô, Iyoukura pase mnenge u Mbakristu mba i shighe ve mkurem mbara kpishi lu a mi yô, ér: “Anmgbianev, se mba se lu a mnenge u vough sha kwagh u Aôndo yô, se va ahenge sha ma kwagh u Aôndo a lu eren ga. Se soo ser i er ishima yase ga; nahan yange se mba fe ser, ishimaverenkeghen i se lu a mi sha kwagh u uwer u Oktoba 1914 la lu i sha mi  ga yô, doo se kpishi er Ter gema Awashima na ér a zua sha u wase ga nahan. Se soo ser A̱ er nahan kpaa ga. Kpa se gema se soo u seer kaven mbaawashima mba Aôndo tsô.” Nyian kpa, Mbakristu mba i shigh ve mkurem mbara mba a ieren i hiden a iyol ijime la, shi sar ve u eren ishima i Aôndo kpaa. Mba kaan ér ka jijingi u Aôndo a ôron ve akaa a ve ngeren la ga, kpa ve kange ishima u eren tom u Yesu a ne ve u eren shin tar la. Hegen yô, Mbakristu mba ve lu ken “zegeikpelaior” i i lu “iyôngo igen,” ve lu a ishimaverenkeghen i lun uma gbem sha won shin tar la mba dondon ikyav ve i kuran shi tseen ishima sha tom la.—Mpa. 7:9; Yoh. 10:16.

ER SE LU PER SE KURAN LA

14. Doo u se dondon akaawan a wanakiriki u jighjigh sha ci u nyi?

¹⁴ Yehova tsua wanakiriki u jighjigh man u fan kwagh ér a naan ior nav kwaghyan u ken jijingi. Iyôngo igen, i i lu per er Mbakristu mba i shigh ve mkurem la, kegh iyol u dondon kwagh u wanakiriki ne a tesen la. Sha nahan yô, ka inja er ve kpa mba ngohol ityesen i Aôndo a lu tesen se ken Mkaanem nam kua sha jijingi na la nahan. (Ôr Pasalmi 119:130; Yohane 16:13.) Er zegeikpelaior i zough a ishimataver yô, ia fatyô u lun a agoyol nahan keghen mve u Kristu, shi wan ishima shighe u i lu tôvon ve a ican je kpaa. U tesen ikyav yô, anmgbianev mba i wuhe ve ken afo a mbakwarev a Mbanazi agen yô, yange ve lu a Bibilo i môm tseegh. Nahan ve er msen ér Aôndo a seer nan ve kwaghyan u ken jijingi. Ica i gbe ga yô, ve ungwa ér anmgbian ugen u i sember wuhen un yô, yer ukôpi mba Iyoukura mba hev ken nguhar ku i er sha kon i wa un yô, va a mi ken afo a mbakwarev la. Môm ken anmgbianev mba ve war afo a Mbanazi la yô, lu anmgbian u i shigh un mkurem yô, i yilan un ér Ernst Wauer. A pase kwagh u yange za hemen la ér: “Yehova yange wase se sha gbenda u kpilighyol, a na se umbur mbamhen mba taver se asema, mba i due a mi ken ngeren mbara la. Taver u zuan a kwaghyan u ken jijingi ayange ne ga, kpa kwaghyan ne gba se kwagh je he? M na jighjigh mer, averen a Yehova nga keghen mba ve suur sha a na shi ve civir un sha mimi shi ve ye kwaghyan sha tebul na la mgbeghaa je.”

15, 16. Anmgbian ugen vea kwase na yange ve zua a iveren sha ishima i ve tsee sha tom u pasen kwagh la nena, man kwagh la tese u nyi?

¹⁵ Mba ve lu iyôngo igen mbara kpa mba shiren Ter tom ngeegh, mba suen anmgbianev mba Kristu kpoghuloo je. (Mat. 25:40) Mba er mbatomov mba ken injakwagh i  Yesu la nahan ga, kpa ve kegh iyol u den ér akaa agen a kar ve, sha er vea vande keren Tartor u Aôndo yô. U tesen ikyav yô, yange i kaa ér anmgbian ugen, u i yilan un ér Jon yô, vea kwase na Masako, ér ve za wase annongo u lamen zwa Chinese ken tar u Kenya. Sha hiihii la, taver ve u eren kwagh ne kpishi. Nahan kpa, mba eren msen shi mba gbidi kwar sha mlu ve yô, ve mase tsuan ér vea yem twev ken tar la kpôô kpôô.

¹⁶ Er ve tese gbashima sha tom u pasen kwagh la yô, Yehova na ve injar. Ve kaa ér: “Tom u pasen kwagh u se lu eren heen ne za ikyura kpen kpen.” Yange ve hii u henen Bibilo a iorov utaankaruhar. Shi ve zua a akaa agen a doon ve kpa kpishi. Nahan ve mase kuren ér, “Hanma iyange ka se sugh Yehova, er a ne se ian i lun heen yô.” Anmgbianev mbagenev kpishi tese ér, hanma shighe u mkur a ve cii, una ngôôr shin una ngôôr ga kpa, vea za hemen u civir Aôndo sha gbashima. Hen ase kwagh u mba ve ze Makeranta u Gileadi ve hingir mbamishen la, shin mba ve ne ayol a ve sha u za pasen kwagh ken ityar igen la. Wea soo u seer fan kwagh u mba ve za pase kwagh hen ape kwagh a hembe gban sha mbapasenkwagh la yô, ôr ngeren u a kaa ér “Ve Na Ayol a Ve u Eren Tom ken Tar u Ecuador” la ken Iyoukura i Julai 15, 2012. U nguren ôron ngeren u doon tsung, u a er kwagh u anmgbianev mba nomso man mba kasev mba ve za pase kwagh ken tar ugen ve er sha ijô ve la yô, hen er we kpa u seer shiren Aôndo tom la. Aluer u er nahan yô, tom u ú eren Aôndo la ua va un a iwuese, shi we kpa a saan we iyol.

WE KPAA KURAN

17. Mfe u se fe iyange shin ihwa i mkurtar una va ga la wase se nena?

¹⁷ Mfe u se fe iyange shin ihwa i mkurtar una va ga la gema wase se kpishi. Er ishima ma i vihi se ker la yô, se hemba kporom a kporom hen Yehova, Ter wase u doon se ishima la cii, gadia se uve ityough u eren ishima na. Er se uve ityough ken tom u Yesu a ne se ne, shi se palegh akaa a danen se yô, se mba shiren Yehova tom saan saan.—Luka 9:62.

18. Se soo ser se za hemen u civir Aôndo sha jighjigh sha ci u nyi?

¹⁸ Iyange i jirigh i Aôndo mgbôghom. Mô wase môm kpa nan soo u van Yehova shin Yesu ahenge ga. Ve wa se tom u injaa ken ayange a masejime ne. Jighjigh u ve ne se la gba se kwagh kpen kpen!—Ôr 1 Timoteu 1:12.

19. Se tese ser se mba kuran nena?

¹⁹ Sea lu a ishimaverenkeghen i yemen sha shin va lun uma gbem sha won ken Paradiso shin tar kpa, se kange nen ishima ser, se za hemen u eren tom u Aôndo a ne se ér se gema ior ve hingir mbahenen la sha gbashima. Se fa iyange shin ihwa i iyange i Yehova ia va ga, man ityôkyaa ngi i se fa kpaa ga. Kpa se fatyô u lun per keghen iyange la, man ka kwagh u se er kpaa je la. (Mat. 24:36, 44) Se mba a vangertiôr ser, aluer se za hemen u suur sha Yehova shi se mba vanden keren Tartor na yô, una na se kunya mayange ga.—Rom. 10:11.

[Ngeren u shin kpe]

[Mbampin Mba Ngeren u Henen]

[Foto u sha peeji 26 la]

Shighe u ú tagher a mtaver je kpa, za hemen u keren kwaghyan u ken jijingi

[Foto u sha peeji 27 la]

Ka sea hemba veren ishima sha tom u pasen kwagh la yô, shighe a ngôôr been ga