1-3. (a) Wanem 2-pela stori inap helpim yumi long kliagut long mining bilong 2-pela tok piksa bilong Jisas? (b) Yumi mas kisim bekim bilong wanem ol askim?

 TINGIM olsem wanpela bikman bilong gavman i pasim tok wantaim yu long yu bai draivim em i go long wanpela bikpela miting. Sampela minit paslain long yu bungim em, yu luksave olsem kar bilong yu i sot long petrol. Olsem na yu hariap i go bilong baim sampela. Taim yu no stap, bikman i kam kamap na em i no lukim yu. Em i no inap wet, so em askim narapela long kisim em i go. Taim yu kam bek yu luksave olsem bikman i lusim yu pinis. Bai yu pilim olsem wanem?

² Orait nau tingim olsem yu dispela bikman. Paslain long yu go raun long wanpela hap, yu makim 3-pela man long lukautim sampela bikpela wok. Yu stori gut long ol samting ol i mas mekim, na 3-pela wantaim i orait long mekim. Tasol bihain, taim yu kam bek, yu kisim save olsem 2-pela man tasol i mekim wok yu bin askim ol long mekim. Na man husat i no mekim wok i kamapim planti eskius. Tru tru, em i no bin kirap mekim wanpela samting. Bai yu pilim olsem wanem?

³ Dispela tupela stori i wankain olsem 2-pela tok piksa bilong Jisas, olsem tok piksa bilong 10-pela yangpela meri na ol talen. Tupela tok piksa i makim ol samting long taim bilong pinis na i kamapim klia as na sampela Kristen God i bin makim bai stap gut long em na bihainim savetingting na sampela bai i no mekim olsem. a (Mat. 25:1-30) Bilong strongim poin bilong dispela 2-pela tok piksa, Jisas i tok: “Yupela i mas was i stap, long wanem, yupela i no save long dispela de o dispela aua.” Jisas i tok olsem ol disaipel bai i no inap save long taim stret Jisas bai bagarapim ol samting bilong dispela graun em Satan i bosim. (Mat. 25:13) Yumi tu “i mas was i stap.” Bilong wanem em i gutpela long bihainim tok bilong  Jisas? Husat i bin was i stap inap long nau? Na nau yet yumi mas mekim wanem bilong was i stap?

4. Bilong was i stap, bilong wanem yumi no gat wok long save long taim stret pinis bai kam?

⁴ Sampela taim em i bikpela samting long yumi mas save em wanem taim stret. Olsem, sapos yu wok long wanpela faktori, o yu gat apoinmen long lukim dokta, o yu mas kalap long balus, orait yu mas save gut long taim na bai yu no ken leit. Tasol taim paiaman i wok long kilim i dai paia o sevim laip bilong man bihain long wanpela disasta, i no gutpela sapos em i wok long sekim hanwas. Dispela inap pulim tingting bilong em o kamapim hevi. Long ol kain taim olsem, em i bikpela samting moa long tingting tasol long mekim wok na no ken bisi long sekim taim. Wok autim tok bilong yumi i save helpim ol man long kliagut long ol samting Jehova i bin mekim bilong kisim bek ol. Dispela wok em i bikpela samting moa long nau, long wanem, pinis i kam klostu moa. Bilong was i stap na mekim ol samting Jehova i tok yumi mas mekim, yumi no gat wok long save long wanem taim stret pinis bai kam. Na tu, i gat 5-pela as na i gutpela yumi no save long dispela de o dispela aua.

5. Yumi no save wanem taim pinis bai kam. Olsem wanem dispela i givim rot long yumi long kamapim klia tingting i stap long bel bilong yumi?

⁵ Namba 1, yumi no save wanem taim pinis bai kam na dispela i givim rot long yumi long kamapim tingting tru i stap long bel bilong yumi. Jehova i soim rispek long yumi na em i larim yumi long makim olsem yumi bai stap gut long em o nogat. Yumi mekim wok bilong Jehova, long wanem, yumi laikim em, yumi no tingting tasol long abrusim bagarap na kisim laip oltaim. (Ritim Song 37:4.) Yumi kisim amamas taim yumi mekim laik bilong God, na yumi luksave olsem em i skulim yumi, long wanem, em i laik bai ol gutpela samting i painim yumi. (Ais. 48:17) Yumi no pilim olsem ol lo bilong em i hatwok tumas long bihainim.—1 Jon 5:3.

6. God i pilim olsem wanem taim yumi mekim wok bilong en, long wanem, yumi laikim em tumas? Bilong wanem i olsem?

⁶ Namba 2, yumi no save long dispela de na aua na dispela i givim rot long yumi long mekim Jehova i belgut. Taim pasin laikim i as na yumi mekim wok bilong em—na yumi no mekim bikos yumi ting pinis i klostu o yumi tingim gutpela samting yumi bai kisim—yumi helpim Jehova long kamapim klia olsem birua bilong en, Satan, em i man bilong giaman. (Jop 2:4, 5; ritim Sindaun 27:11.) Yumi save pinis long planti pen na hevi em Satan i bin kamapim, olsem na yumi laik sapotim wok bos bilong Jehova na sakim wok bos bilong Satan.

7. Bilong wanem yu laik yusim laip bilong yu long mekim wok bilong God na helpim ol arapela?

⁷ Namba 3, yumi no save long det stret pinis bai kam, olsem na em i isi moa long yusim laip bilong yumi bilong mekim wok bilong God na helpim ol arapela, na yumi no tingim yumi yet tasol. Sampela long nau husat i no save long God, ol tu i ting olsem pinis i klostu. Ol i pret olsem wanpela disasta bai bagarapim graun, olsem na ol i bihainim tingting olsem, “yumi kaikai na dring, long wanem, tumora bai yumi dai.” (1 Kor. 15:32) Tasol yumi no pret. Na yumi no tingim yumi yet tasol. (Snd. 18:1) Yumi putim laik bilong Jehova i stap nambawan long laip bilong yumi, na yumi amamas long yusim taim na strong na olgeta samting yumi gat, bilong autim gutnius bilong Kingdom Bilong God. (Ritim Matyu 16:24.) Yumi kisim amamas long mekim wok bilong God, na moa yet taim yumi helpim ol arapela long save long em.

8. Wanem tok bilong Baibel i soim olsem yumi mas bilip tru long Jehova na long Tok Bilong Em?

⁸ Namba 4, yumi no save long dispela de na aua, na dispela i helpim yumi long trastim tru Jehova na traim bes bilong yumi long bihainim tok bilong en. Wanpela hevi bilong yumi ol sinman em yumi save bilip tumas long yumi yet. Pol i tok lukaut long ol Kristen olsem: “Man i ting em i sanap strong i stap, em i mas lukaut, nogut em i pundaun.” Em i stori long 23,000 Israel husat i  bin bikhet long Jehova na ol i dai paslain liklik long ol i go insait long Graun Bilong Promis. Pol i tok “ol man i bin raitim ol dispela stori bilong givim tok lukaut long yumi husat i stap nau long pinis bilong dispela taim.”—1 Kor. 10:8, 11, 12.

9. Olsem wanem ol traim i ken strongim bilip bilong yumi na pasin bilong yumi long stap pren bilong Jehova?

⁹ Namba 5, yumi no save wanem taim pinis bai kam, dispela i helpim yumi long kisim skul long ol traim na i save strongim bilip bilong yumi. (Ritim Song 119:71.) Dispela taim bilong las de em ‘taim nogut i givim hatwok long ol man.’ (2 Tim. 3:1-5) Planti manmeri long dispela graun bilong Satan i save heitim yumi, olsem na bilip bilong yumi inap kirapim ol long mekim nogut long yumi. (Jon 15:19; 16:2) Olsem paia i save kukim gol na mekim i kamap gutpela moa, ol traim inap mekim bilip bilong yumi i kamap gutpela na strongpela moa. Sapos yumi daunim yumi yet na bihainim tok bilong Jehova, ol traim bai i no inap pasim yumi long mekim wok bilong em. Na pasin bilong yumi long stap pren bilong Jehova bai kamap strong moa yet.—Jems 1:2-4; 4:8.

10. Wanem samting inap mekim na i olsem taim i go hariap tru?

¹⁰ Long tingting bilong yumi i olsem taim inap go hariap o i go isi isi. Sapos yumi bisi na yumi no lukluk long klok klostu klostu, i olsem taim i go hariap tru. Long wankain pasin, sapos yumi bisi long mekim gutpela wok Jehova i givim long yumi, orait yumi inap ting olsem pinis i kam hariap tru. Planti Kristen God i bin makim, ol i bin stap gutpela piksa, long wanem, oltaim ol i save bisi long mekim wok bilong God. Nau yumi ken skelim samting i bin kamap bihain long Jisas i kamap King long 1914 na olsem wanem sampela Kristen God i bin makim i redi i stap na sampela nogat.

11. Bihain long 1914, bilong wanem sampela bilong ol Kristen God i bin makim i ting olsem Jisas i leit?

¹¹ Yumi ken tingim gen tok piksa bilong Jisas long 10-pela yangpela meri na ol talen. Sapos ol yangpela meri o ol wokboi bilong dispela tupela tok piksa i bin save long taim stret dispela man i laik marit o bos bai kam bek, ol bai i no gat wok long was i stap. Tasol ol i no save, olsem na ol i mas redi i stap. Inap planti yia, ol Kristen God i bin makim i save olsem 1914 em wanpela bikpela yia, tasol ol i no kliagut long wanem samting bai kamap. Taim ol samting i no kamap olsem ol i bin ting bai kamap, sampela bilong ol i ting olsem Jisas i leit. Long Oktoba 1914, wanpela brata i tok, “Sampela bilong mipela i tingting strong olsem bai mipela i go long heven long namba 1 wik bilong Oktoba.”

12. Olsem wanem ol Kristen God i bin makim i soim olsem ol i stap olsem gutpela wokboi i gat savetingting?

¹² Tingim hatwok bilong ol lain husat i bin ting olsem pinis bai kam, tasol em i no kam! Narapela samting i givim hatwok long ol em pasin birua ol man i mekim long ol long taim bilong Wol Woa 1. Klostu ol i lusim wok autim tok olgeta, i olsem ol Kristen God i bin makim i slip i stap. Tasol long 1919, wanpela samting i kirapim ol! Jisas i bin kam bilong skelim olgeta manmeri husat i tok ol i Kristen. Sampela bilong ol Kristen God i bin makim, ol i no winim mak taim Jisas i skelim ol, olsem na ol i no inap mekim moa wok bilong Bikman, Jisas. (Mat. 25:16) Ol i no bin was i stap, ol i olsem ol dispela krankimeri husat i no gat oil bilong putim long lam bilong ol. Na olsem dispela les wokboi husat i no bin mekim gut wok bilong bikman bilong en, ol i no laik lusim samting bilong ol yet bilong mekim wok bilong Kingdom. Tasol klostu olgeta Kristen God i bin makim i bin stap gut long God na ol i gat strongpela laik long mekim wok bilong Bikman bilong ol maski i hatwok long mekim long dispela taim bilong woa.

13. Bihain long 1914, ol Kristen God i bin makim i gat wanem tingting? Long nau ol i gat wanem tingting?

¹³ Bihain long 1914, nius The Watchtower i kamapim tingting bilong planti Kristen God i bin makim. Nius i tok ol lain i gat stretpela tingting ol i no bel hevi. Nius i tok moa: “Mipela i no  ting olsem laik bilong mipela yet i mas kamap, so taim mipela i luksave olsem samting mipela i ting bai kamap long Oktoba 1914 i no stret, mipela i amamas olsem Bikpela i no senisim Plen Bilong Em bilong amamasim mipela. Mipela i no laik bai Em i mekim olsem.” Ol i laik kliagut moa long ol samting God i tingting pinis long mekim. Long nau, ol Kristen God i bin makim i kamapim wankain pasin daun na wankain laik long bihainim laik bilong God. Ol i no tok olsem God i givim tok long ol. Ol i laik mekim wok Jisas i givim ol long mekim long graun. Long nau ol Kristen husat i wet long kisim laip oltaim long graun, em “bikpela lain manmeri” bilong “ol arapela sipsip,” ol i bihainim pasin bilong ol.—Rev. 7:9; Jon 10:16.

14. Bilong wanem i gutpela long yumi bihainim ol tok Jehova i skulim yumi long en long rot bilong gutpela wokboi i gat savetingting?

¹⁴ God i makim gutpela wokboi i gat savetingting long givim kaikai long ol manmeri bilong em, olsem skulim ol long rot bilong kisim helpim long Baibel na long holi spirit. Ol Kristen God i bin makim na bikpela lain manmeri i soim olsem ol i redi, ol i save bihainim ol tok Jehova i skulim ol long en long rot bilong gutpela wokboi i gat savetingting. I kain olsem ol i pulapim gen oil long lam bilong ol. (Ritim Song 119:130; Jon 16:13.) Olsem na ol tu inap redi i stap inap long pinis i kam, taim Krais i kam bek. Na tu, ol i gat strong long stap gut long God maski ol bikpela hevi i painim ol. Olsem, long wanpela banis kalabus bilong ol Natsi, ol brata i holim wanpela Baibel tasol. Olsem na ol i beten askim God long givim sampela nius bilong Baibel long ol. Sotpela taim bihain, ol i harim olsem wanpela brata husat i kam nau tasol long kalabus i bin bringim sampela nupela Wastaua i kam, em i bin haitim insait long giaman lek bilong em. Wanpela brata husat i bin winim dispela hevi, em Ernst Wauer bilong liklik lain. Em i tok Jehova i bin helpim ol brata long holim long tingting ol gutpela tok bilong ol nius. Em i tok tu olsem: “Long nau, em i isi long kisim ol buk na nius bilong Baibel, tasol yumi save tingim tru dispela samting o nogat? Mi bilip tru olsem Jehova i redim ol gutpela blesing long ol lain husat i bilip long em, stap gut long em, na kisim kaikai long tebol bilong em.”

15, 16. Olsem wanem tupela marit i kisim blesing long pasin bilong ol long givim bel long wok autim tok? Yu inap kisim wanem skul long ol kain ekspiriens olsem?

¹⁵ Ol arapela sipsip i helpim ol brata bilong Krais long rot bilong givim bel long mekim wok autim tok. (Mat. 25:40) Ol i no stap olsem dispela les wokboi nogut long tok piksa bilong Jisas. Ol  i amamas long wok hat na lusim ol samting bilong ol na bai ol inap putim Kingdom i stap nambawan long laip bilong ol. Olsem, ol brata i askim Jon na Masako long i go long Kenya bilong autim tok long ol Saina. Pastaim ol i gat tupela tingting, i gutpela long ol i go o nogat. Tasol ol i skelim sindaun bilong ol na beten, na bihain long dispela ol wokim disisen long i go.

¹⁶ Ol i givim bel tru long autim tok, olsem na Jehova i blesim ol na wok bilong ol i karim gutpela kaikai. Ol i tok wok autim tok bilong ol i gutpela tru. Ol i kirapim 7-pela Baibel stadi na ol i gat planti ol gutpela ekspiriens. Ol i tok moa olsem: “Long olgeta de mipela i tok tenkyu long Jehova long em i larim mipela i stap long hia.” Planti arapela brata na sista i soim olsem ol i laik bisi i stap long mekim wok bilong God taim pinis i kam, maski wanem taim pinis bai kam. Tingim planti tausen manmeri husat i bin go long skul Gileat na mekim wok misineri. Yu inap kisim save moa long wok misineri sapos yu ritim stori “Mipela i Wok Strong Inap Long Skel Bilong Mipela!” long Wastaua bilong Oktoba 15, 2001. Taim yu ritim dispela stori long wok ol misineri i mekim long wan wan de, tingim olsem wanem yu inap mekim sampela wok moa bilong God. Wok bilong yu bai givim biknem long God na bikpela amamas long yu.

17. Yumi no save long de na aua em pinis bai kam. Olsem wanem yumi kisim blesing long dispela?

¹⁷ Yumi no save long de na aua stret em pinis bai kam, na dispela i no mekim yumi bel hevi. Nogat. Yumi kisim blesing long dispela samting. Dispela i helpim yumi long bisi long mekim ol wok i stret wantaim laik bilong God, na pasin bilong yumi long i stap pren bilong gutpela Papa bilong yumi, Jehova, i kamap strong moa. Yumi tingting strong long dispela wok Jisas i givim long yumi na yumi bin sakim ol samting em inap pulim yumi, olsem na laip bilong yumi long mekim wok bilong Jehova i gat amamas long en.—Luk 9:62.

18. Bilong wanem yumi laik stap gut long wok bilong God?

¹⁸ Pinis bilong dispela taim i kam klostu tru, olsem na yumi laik stap gut long wok bilong God. Yumi no laik mekim Jehova o Jisas i bel hevi. Ol i givim wanpela gutpela wok tru long yumi nau long dispela taim bilong las de. Yumi amamas tru long ol i soim olsem ol i bilip long yumi!—Ritim 1 Timoti 1:12.

19. Olsem wanem yumi inap redi i stap long pinis bilong dispela taim bilong nau?

¹⁹ Maski yumi bilip na wet long kisim laip long heven o long Paradais long graun, bai yumi bihainim yet tok bilong God long autim tok na kamapim ol disaipel. Yumi no gat wok long save long dispela de o aua stret em de bilong Jehova bai kam. Yumi redi i stap, na bai yumi stap olsem i go inap long pinis. (Mat. 24:36, 44) Yumi save gut tru olsem dispela pasin bilong yumi long bilip tru long Jehova na putim Kingdom bilong em i go pas, bai i no givim bel hevi long yumi.—Rom 10:11.