«Mu xanaʼic cʼusi ora, cʼusi cʼacʼalil»

«Tscʼan ti viqʼuiluc asatique, yuʼun mu xanaʼic cʼusi ora, cʼusi cʼacʼalil.» (MAT. 25:13)

¿KʼUSI CHATAKʼ?

¿Kʼuxi ta jtabetik sbalil ti mu jnabetik kʼusi ora mi jaʼuk kʼusi kʼakʼalil chtal li slajebal kʼakʼale?

¿Kʼuxi yakʼojik ta ilel ti lek vikʼil satik li buchʼutik tʼujbilik chbatik ta vinajele?

¿Kʼuxi xuʼ xkakʼtik ta ilel ti lek chapalutik mi sta yorail chtal li Cristoe?

1-3. 1) ¿Kʼusi chakʼ jchantik Jesús li ta chib lokʼolkʼop laj yale? 2) ¿Kʼusitik sjakʼobiltak oy ta koʼontontik stakʼel?

NOPO noʼox ti oy buchʼu tsots yabtel chayalbot ti xavikʼ batel ta akaro ti oy bu tsots skʼoplal chbate. Kʼalal skʼan xaʼox jayibuk minuto skʼan xbat skʼelote, chavakʼ venta ti jutuk xa tajek li agasolinae, jaʼ yuʼun ta anil chbat asaʼ talel. Pe li buchʼu chavikʼ batele solel mu xa xmalaj yuʼun, tskʼelilan ta jujujot mi oy xa bu xatal. Ta skoj ti muʼyuk xakʼot-o chile, la skʼanbe buchʼu yan ti x-ikʼat batele. Kʼalal lakʼot ta sjalil xae, li stuke batem xaʼox. ¿Kʼu van yelan chavaʼi aba?

² Vaʼun nopo ti jaʼot li krixchano ti tsots yabtel taje, xchiʼuk ti atʼujoj xa oxib viniketik ti apatoj avoʼonton ta stojolalik ta skoj ti anaʼoj ti spas yuʼunik junantik abtelaletik ti tsotsik skʼoplale. Chavalbe smelolal li kʼusi tspasike, vaʼun chchʼam yoxibalik. Pe akʼo mi jech, kʼalal chasut talele chavakʼ venta ti kʼajomal noʼox chaʼvoʼ spasojik li kʼusi la avalbe akʼo spasike. Li yoxibale mi jaʼuk yakʼoj persa spasel, maʼuk noʼox taje, yuʼun tsaʼ kʼusi tspak-o skʼoplal xtok. ¿Kʼu van yelan chavaʼi aba?

³ Taje jaʼ xkoʼolaj li ta lokʼolkʼop laj yal Jesús ta sventa li tojol tsebetik xchiʼuk ta sventa li talentoetike. Li ta skʼelobiltak taje, jaʼ jech laj yalbe smelolal ti kʼu yuʼun ti ta slajebaltik xa kʼakʼale oy junantik ti buchʼutik tʼujbil chbatik ta vinajele tukʼ xchiʼuk pʼij chakʼ sbaik ta stojolal li Jeovae, pe jaʼuk li yantike muʼyuk tukʼ chakʼ sbaik (Mat. 25:1-30). * Xchiʼuk xi to laj yalbe smelolale: «Tscʼan ti viqʼuiluc asatique, yuʼun mu xanaʼic cʼusi ora, cʼusi cʼacʼalil», li kʼusi la skʼan laj yal Jesús taje, jaʼ ti tspas li kʼusi tskʼan Dios sventa chakʼbe slajeb li sbalumil Satanase (Mat. 25:13). Ta melel, li kʼusi laj yal Jesuse toj tsots skʼoplal chkaʼitik li ta jkʼakʼaliltike. ¿Kʼuxitik ta jtabetik sbalil mi ta jchʼunbetik smantal li  Jesuse xchiʼuk ti lek vikʼil jsatike? ¿Buchʼutik yakʼojik ta ilel ti lek chapalik sventa kuxul chkomike? ¿Xchiʼuk kʼusi xuʼ jpastik sventa vikʼiluk jsatik?

SBALILTAK TI VIKʼIL LEK JSATIKE

4. ¿Kʼu yuʼun skʼan mu persauk jkʼelilan jrelojtik sventa vikʼiluk jsatik li yajtsʼaklomutik Cristoe?

⁴ Oy abtelaletik ti skʼan jtsaktik ta venta li orae, jech kʼuchaʼal li abtelal ta favrikae, kʼalal chijbat ta doktore o jaʼo kʼalal chijbat ta karoe. Pe oy abtelaletik jech kʼuchaʼal li buchʼu tstupʼ kʼokʼ o li buchʼutik chpojvanike, mu stakʼ skʼelilan srelojik yuʼun mi jech la spasike xuʼ xchʼaybat yoʼontonik o xuʼ xcham yuʼunik li krixchanoetike. Mi jaʼ jeche, jaʼ mas lek ti jaʼ xkakʼ ta koʼontontik li kʼusi yakal ta jpastike, maʼuk li orae. Jaʼ jech ek, ta skoj ti yantik xa xnopaj talel li slajeb kʼusitik chopol liʼ ta balumile, mas me tsots skʼoplal ti xkaltik batel li kʼusi spasoj Jeova sventa spojutike. Li yajtsʼaklomutik Cristoe mu me persauk skʼan jkʼelilan jrelojtik sventa vikʼiluk jsatik. Melel onoʼox, ta skoj ti mu jnaʼtik kʼusi ora xchiʼuk kʼusi kʼakʼalil chtal li slajebal kʼusitik chopol liʼ ta balumile xuʼ jtabetik voʼob sbalil.

5. ¿Kʼu yuʼun tskoltautik ti mu jnaʼtik kʼusi ora xchiʼuk kʼusi kʼakʼalil chtal li slajebal kʼakʼal sventa xkakʼtik ta ilel li kʼusi oy ta koʼontontike?

⁵ Ta baʼyuke, kʼalal mu jnaʼtik kʼusi ora chtal li slajebal kʼakʼale, jaʼ chakʼ ti akʼo xkakʼtik ta ilel li kʼusi oy ta koʼontontike. Li Jeovae tstsakutik ta venta, jaʼ yuʼun chakʼ jnop jtuktik mi ta jkʼantik ti tukʼ chkakʼ jbatik ta stojolale. Melel onoʼox, jkotoltik ta jkʼan kuxul chijkomutik kʼalal mi tal li slajebal kʼusitik liʼe, pe kʼalal chijtun ta stojolal Jeovae maʼuk noʼox ti ta jkʼantik kuxul chijkome, yuʼun jaʼ ti jkʼanojtike (kʼelo Salmo 37:4). Toj lek xkaʼitik spasel li kʼusi chalbutike xchiʼuk jnaʼojtik ti chanubtasel chakʼbutike jaʼ sventa jlekilaltik (Is. 48:17). Muʼyuk tsots chkaʼitik ta xchʼunbel li smantaltake (1 Juan 5:3).

6. Kʼalal chijtunutik ta stojolal Jeova ta skoj ti jkʼanojtike, ¿kʼuyelan chaʼi sba, xchiʼuk kʼu yuʼun?

⁶ Ta xchibale, kʼalal mu jnaʼtik kʼusi ora chtal li slajebal kʼakʼale, jaʼ chakʼ ti akʼo jmuyubtabetik yoʼonton li Jeovae. Kʼalal chijtunutik ta stojolale yuʼun jkʼanojtik —maʼuk ta skoj ti jutuk xa skʼan xtal li slajebal kʼakʼale o ti ta jkʼan ta jtatik junuk matanale—, ti jech ta jpastike xuʼ jaʼ jech tstakʼbe li yajkontra Jeova ti chopol skʼoplal ch-albate, ti jaʼ li Satanase (Job 2:4, 5; kʼelo Proverbios 27:11). Skotol li kʼusitik kʼux xchiʼuk li vokoliletik yakʼoj li Diabloe, ta sjunul koʼontontik ta jpakbetik skʼoplal li mukʼul pasmantal yuʼun Jeovae xchiʼuk ta jpʼajtik li kʼusitik tspas Satanase.

7. ¿Kʼu yuʼun tskʼan ta sjunul koʼontontik jpastik li yabtel Diose?

⁷ Ta yoxibale, kʼalal mu jnaʼtik kʼusi ora chtal li slajebal kʼakʼale, jaʼ tstij koʼontontik sventa mu jkʼuxubin jba jtuktik. Li avi kʼakʼale oy krixchanoetik ti muʼyuk xchʼunojik Diose, pe ti chiʼik ti jutuk xa skʼan xtal jun mukʼta lajelale. Jaʼ yuʼun xi nopem chalike: «Laʼ xa noʼox veʼcutic, cuchʼtic lec voʼ, yuʼun ocʼom chaʼej xuʼ chijchamutic» (1 Cor. 15:32). Li voʼotike muʼyuk chijxiʼ, yuʼun maʼuk ta jpastik li kʼusi ta jkʼan jtuktike (Prov. 18:1). Yuʼun li kʼusi ta jpastike, jaʼ ti ta xkakʼtik ta slekil koʼontontik jkʼakʼaltik, kipaltik xchiʼuk yantik kʼusitik kuʼuntik sventa xkaltik batel li lekil aʼyej ta sventa li Ajvalilal yuʼun Diose (kʼelo Mateo 16:24, Ch). Toj echʼ noʼox lek chkaʼitik ti chijtun ta stojolal Diose, pe mas to kʼalal ta jkoltatik yan krixchanoetik ta yojtikinel li Diose.

8. ¿Kʼusi skʼelobil ta Vivlia oy kuʼuntik ti chakʼ jchantik ti skʼan jpat koʼontontik ta stojolal Jeova xchiʼuk li ta Skʼope?

⁸ Ta xchanibale, kʼalal mu jnaʼtik kʼusi ora chtal li slajebal kʼakʼale, jaʼ tskoltautik sventa jpat koʼontontik ta stojolal li Jeovae xchiʼuk xkakʼ ta jkuxlejaltik li kʼusi chalbutik ta Skʼope. Ta skoj ti jmulavilutike, li kʼusi mas nopem xkaʼitik spasele jaʼ ti ta jpat koʼontontik ta jtuktik noʼoxe. Li Pabloe xi laj yalbe skotol li yajtsʼaklomtak Cristoe: «Jaʼ yuʼun li bochʼo tsnop ti toj jun yoʼnton xchʼunoje, acʼo me sqʼuel sba, naca me yaluc ta lum». Kʼalal jutuk xaʼox skʼan  sbeiltas ochel ta Albil Balumil j-israeletik li Josuee, 23 mil muʼyuk xa lek ilatik yuʼun Jeova. Xi laj yal li Pabloe: «Jaʼ sventa [...] tsʼibabil icom scʼoplalic sventa acʼo bijubcutic, vuʼutic ti poʼot xa scʼan jtatic slajebal cʼacʼale» (1 Cor. 10:8, 11, 12).

9. ¿Kʼuxi tstsatsubtas batel xchʼunel koʼontontik xchiʼuk tsnopajesutik ta stojolal Dios li vokoletik chkiltike?

⁹ Ta svoʼobale, kʼalal mu jnaʼtik kʼusi ora chtal li slajebal kʼakʼale, kʼalal chkil jvokoltike jaʼ tstsatsubtas li xchʼunel koʼontontike (kʼelo Salmo 119:71). Ta melel, «cʼalal poʼot xa slajebal cʼacʼale ta to xlic tsots vocol» (2 Tim. 3:1-5). Jutuk mu skotoluk li slumal Satanase spʼajojutik tajek, jaʼ yuʼun xuʼ me jtatik-o nutsel ta skoj li kʼusitik jchʼunojtike (Juan 15:19; 16:2). Pe mi bikʼit chkakʼ jbatike xchiʼuk mi jaʼ ta jsaʼtik li beiltasel chakʼ Diose, li prevaetik ta jnuptantike jaʼ me tskoltautik sventa stsatsub batel li xchʼunel koʼontontike. Muʼyuk chijchibaj, yuʼun jaʼ noʼox mas chijnopajutik ta stojolal Jeova ti muʼyuk toʼox jech jnopojtike (Sant. 1:2-4; 4:8).

10. ¿Kʼu yuʼun ta anil chjelav bakʼintik li kʼakʼaletike?

¹⁰ Li kʼakʼaletike, xuʼ van ta anil o kʼunkʼun chjelav chkaʼitik. Kʼalal batem tajek koʼontontik ta spasel jtosuk abtelale xchiʼuk ti muʼyuk xa ta jkʼel li jrelojtike, mu xkaʼitik kʼuxi ch-echʼ li kʼakʼaletike. Jaʼ me jech ek, mi jaʼ laj kakʼ ta koʼontontik spasel li labal sba abtelal yakʼojbutik Jeovae, mu me xkaʼitik tsta yorail xchiʼuk skʼakʼalil li slajebal kʼakʼale, yuʼun jaʼ to chkiltike vulem xaʼox. Ta sventa taje, li buchʼutik tʼujbil chbatik ta vinajele toj lek me ta chanbel stalelalik. Kalbetik jutuk skʼoplal li kʼusi kʼot ta pasel kʼalal och ta ajvalil Jesús ta sjabilal 1914. Taje te chkiltik ti oy jlom lek chapalik kʼalal la sta yoraile, pe li jlome muʼyuk.

LI BUCHʼUTIK TʼUJBIL CHBATIK TA VINAJELE CHAPAL TAATIK

11. Kʼalal echʼem xaʼox 1914, ¿kʼu yuʼun la snopik jlom ti muʼyuk xa chvul li Yajvalik ta abtele?

¹¹ Jchaʼalbetik skʼoplal li lokʼolkʼop laj yal Jesuse. Ti snaʼojikuk xa onoʼox kʼusi ora chtal jnupunel li tojol tsebetik o li Yajvalik ta abtel li mosoiletike, mu persauk lek julavemik ti jechuke. Ta skoj ti mu snaʼike skʼan lek julavemik. Ta epal jabiletik xa onoʼox, li buchʼutik tʼujbil chbatik ta vinajele snaʼojik ti oy kʼusi tsots skʼoplal chkʼot ta pasel li ta sjabilal 1914, akʼo mi mu snaʼik lek kʼusi jaʼ. Kʼalal kʼot li jabil taje xchiʼuk ti muʼyuk kʼot ta pasel li kʼusi snopojike, li jlome yalojik mi muʼyuk xa chtal li jnupunele. Ta tsʼakal jutuke, xi laj yal jun ermanoe: «Oy jayvoʼunkutik jmalaoj chibatkutik ta vinajel li ta sba xemanail yuʼun oktuvre [ta sjabilal 1914]».

12. ¿Kʼuxi laj yakʼik ta ilel li buchʼutik tʼujbil chbatik ta vinajel ti tukʼ yoʼontonik xchiʼuk ti lek pʼijike?

¹² Kʼalal laj yakʼik venta ti muʼyuk xtal li slajebal kʼakʼale, ¿mi xnop van kuʼuntik kʼuyelan laj yaʼi sbaik li buchʼutik jech la snopike? Pe kʼalal lik li Baʼyel Mukʼta Paskʼop ta spʼejel Balumile, laj yichʼik nutsel. Li kʼusi kʼot ta pasel taje, jaʼ ti muʼyuk xa la xcholik mantale, taje xkoʼolaj ti vayem komike. Pe ta 1919 la sta yorail sventa xjulavik. Li Jesuse tal skʼel kʼuyelan oy li xchʼulna Jeovae, jaʼ xkaltik, li kʼusi xchapanoj sventa chichʼ ichʼel ta mukʼe. Li jlome muʼyuk lek taatik, jaʼ yuʼun lokʼesatik ta spasbel li yabtel Ajvalile (Mat. 25:16). Jech kʼuchaʼal li bol tojol tsebetike, muʼyuk la skʼelik mi oy to ep li yaseiteike. Jech kʼuchaʼal li chʼajil mosoile, muʼyuk la skʼan spasik li kʼusi sventa Ajvalilal yuʼun Diose. Pe jutuk mu skotolikuk li buchʼutik tʼujbil chbatik ta vinajele laj yakʼik ta ilel stukʼil yoʼontonik xchiʼuk laj yakʼik ta ilel ti oy tajek ta yoʼontonik chtunik ta stojolal li Yajvalik ta abtele, akʼo mi toj tsots laj yil svokolik kʼalal echʼ li paskʼope.

13. ¿Kʼu yelan laj yakʼ ta ilel stalelalik li mosoiletik kʼalal echʼ xaʼox li 1914, xchiʼuk kʼu yelan chakʼik ta ilel stalelalik li avi eke?

¹³ Ta 1916, li revista liʼe xi laj yale: «Kermanotak, li buchʼutik jech jnopbentik kʼuchaʼal Diose, mu me xchibaj koʼontontik ta sventa li kʼusi snopoj tspas Diose. Yuʼun mu jkʼantik ti akʼo xichʼ pasel jech kʼuchaʼal tskʼan koʼontontike, jaʼ  yuʼun kʼalal laj kakʼtik venta ti mu jechuk kʼot ta pasel ti kʼuyelan toʼox jmalaojtik li ta oktuvre ta 1914, solel lijmuyubajutik ti muʼyuk la sjel li kʼusi snopoj tspas li Kajvaltik ti kʼuyelan ta jkʼantike. Mu onoʼox jkʼantik ti jechuk kʼot ta pasel yuʼune. Jaʼ noʼox ta jkʼan ta jnaʼtik li kʼusi snopoj tspas xchiʼuk li kʼusi tskʼan tspase». Li buchʼutik tʼujbil chbatik ta vinajel avi kʼakʼale chakʼik ta ilel ti bikʼit chakʼ sbaik xchiʼuk ti tspasbeik kʼusi tskʼan yoʼonton Dios eke. Muʼyuk bu chalik ti jaʼ beiltasbilik yuʼun li Diose, pe chalik ti oy ta yoʼontonik tskʼelik lek li kʼusitik akʼbil ta sventaik li kʼusitik yuʼuntak Jesús ta Balumile. Jech xtok, li avie oy «epal cristianoetic» ti jaʼik li yantik chijetik ti smalaoj chkuxiik sbatel osil liʼ ta Balumile, taje yakal chchanbeik stalelal li buchʼutik chbatik ta vinajele (Apoc. 7:9; Juan 10:16).

KAKʼTIK TA ILEL TI LEK CHAPALUTIKE

14. ¿Kʼuxi chchabiutik kʼalal ta jtsʼetanbetik lek xchikinal li veʼlil ta mantal chakʼ Jeova ta stojolal li j-abtel ti lek tukʼ yoʼontone?

¹⁴ Jech kʼuchaʼal tspasik li buchʼutik tʼujbil chbatik ta vinajele, li epal krixchanoetike vikʼil lek satik kʼalal tstsʼetanbeik lek xchikinal li veʼlil ta mantal chakʼ Jeova ta stojolal li j-abtel ti lek tukʼ yoʼontone. Kʼalal jech tspasik taje, jaʼ jech chakʼik venta mi oy ep s-aseiteik, jaʼ xkaltik, ta sventa li Skʼop Diose xchiʼuk li xchʼul espiritue (kʼelo Salmo 119:130 xchiʼuk Juan 16:13). Mas me lek tsots chtaatik xchiʼuk lek chapalik mi kʼot yorail chtal li Cristoe, jech xtok, muʼyuk chikta sbaik ta abtel akʼo mi tsots chil svokolik. Jech kʼuchaʼal liʼe, li ermanoetik ti laj yichʼik ikʼel batel ta chukel yuʼun jnazietike, ta slikebale kʼajomal noʼox oy jlik Svivliaik, jaʼ yuʼun la skʼanbeik Jeova ti akʼo x-akʼbatik mas veʼlil ta mantale. Ta jelavel jutuke, laj yaʼiik ti jaʼ to och ta chukel jun ermano ti la stikʼ ochel ta nakʼal jayibuk revistaetik Li Jkʼel osil ta toyole, taje te la stikʼ ochel ta yok ti pasbil ta teʼe. Jun ermano ti kuxul kom ti Ernst Wauer sbi ti jaʼ li buchʼu tʼujbil chbat ta vinajele, xi laj yal ta mas tsʼakale: «La skoltaunkutik Jeova ta skomesel ta jolkutik li mantaletik chal ta revista ti tspat oʼontonale». Xi to laj yal xtoke: «Li avie mas xa kʼun ta tael li veʼlil ta mantale, pe, ¿mi ta van jkʼuxubintik? Jnaʼoj ta melel ti epal bendision chakʼbe li buchʼutik tspat yoʼontonik ta stojolale, ti tukʼ chakʼ sbaike xchiʼuk ti te tsmakʼlin sbaik li ta xmexae».

15, 16. ¿Kʼuxi la stabeik sbalil jun nupultsʼakal ti jaʼ laj yakʼik ta baʼyel ta xkuxlejalik li Ajvalilal yuʼun Diose, xchiʼuk kʼusi xuʼ jchantik ta stojolalik?

¹⁵ Li yan chijetik eke tskoltaik li yermanotak Cristo kʼalal ta sjunul yoʼonton tspasik li yabtel Yajvalik ta abtele (Mat. 25:40). Yuʼun mu xkoʼolaj  jech kʼuchaʼal li chopol chʼajil j-abtel li ta lokʼolkʼop laj yal Jesuse, yuʼun li stukike ta sjunul yoʼonton chakʼik ta baʼyel ta xkuxlejalik li Ajvalilal yuʼun Diose. Jech kʼuchaʼal liʼe, li Jon xchiʼuk li Masako laj yichʼik takel ta ikʼel sventa xbat xcholbeik mantal li buchʼutik chkʼopojik ta chino ta Keniae. Ta slikebale mu toʼox snaʼik lek mi chbatik, pe kʼalal laj xaʼox spasik orasion xchiʼuk la skʼelik lek mi xuʼ yuʼunike, la snop ti chbatike.

¹⁶ La staik epal bendisionetik kʼalal jech laj yakʼ yipik ta spasele. Xi chal stukike: «¡Li cholmantal liʼe toj echʼ noʼox jun yutsil!». La slikesik vukub chanubtaseletik ta Vivlia xchiʼuk ep kʼusitik la snuptan ta xkuxlejalik ti labalik sbae. Xi laj yal ti kʼuyelan tsnopike: «Jujun kʼakʼal chkalbekutik koliyal Jeova ti liʼ to oyunkutike». Melel onoʼox ti yakʼojik ta ilel epal ermanoetik ti batem yoʼontonik chtunik ta stojolal li Diose, pe mu sventaik kʼusi ora chtal li slajebal kʼakʼale. Jnoptik ta stojolalik li ermanoetik ti nelem xa yuʼunik li Chanobvun ta Galaade xchiʼuk ti ochemik ta misioneroale. Sventa xa naʼ kʼuyelan xkuxlejal li jun misioneroe, kʼelo li revista La Atalaya 15 yuʼun oktuvre ta 2001 ti bu chal: «Hacemos todo lo que podemos» xie. Pe jakʼbo aba kʼuxi xuʼ xavepajes li avabtel sventa chamuyubta li Jeovae xchiʼuk sventa xa ta amuyubajele.

VIKʼILUK ME ASAT

17. ¿Kʼuxi ta jtabetik sbalil kʼalal mu jnabetik lek kʼusi ora xchiʼuk kʼusi kʼakʼalil chtal li slajebal kʼakʼale?

¹⁷ Jamal lek ta aʼyel ti kʼalal mu jnabetik lek yorail kʼusi ora xchiʼuk kʼusi kʼakʼalil chtal li slajebal kʼakʼale, ta jtabetik jayibuk sbalil. Li voʼotike muʼyuk chopol chkaʼitik o chkat koʼontontik, yuʼun jaʼ batem ta koʼontontik spasbel li kʼusi tskʼan yoʼonton Jeovae xchiʼuk mas nopol chkaʼi jbatik ta stojolal li jkʼanvanej Totil kuʼuntike. Kʼalal jtsakoj ta jkʼob kabtejebtik sventa «slocobil banamile», ti muʼyuk chkakʼtik ti akʼo oy kʼusi xchʼay koʼontontike, ta me xijmuyubaj spasbel yabtel li Yajval kabteltike (Luc. 9:62).

18. ¿Kʼu yuʼun mu jkʼantik ti xkʼunib li xchʼunel koʼontontike?

¹⁸ Li skʼakʼalil chchapanvan Diose anil xa noʼox me chnopaj talel xchiʼuk mu jkʼantik ti chopol chaʼi o chat yoʼonton kuʼuntik Jeova xchiʼuk li Jesuse. Yuʼun xchaʼvoʼalik yakʼojbutik kabteltik li ta slajebal kʼakʼal liʼe. ¡Toj echʼ noʼox ta jkʼuxubintik ti spatoj yoʼontonik ta jtojolaltike! (Kʼelo 1 Timoteo 1:12.)

19. ¿Kʼuxi chkakʼtik ta ilel ti lek chapalutike?

¹⁹ Akʼo mi jpatoj koʼontontik chijnaki ta Balumil o mi ta vinajel, kakʼ ta koʼontontik xcholel mantal xchiʼuk jpastik ta yajtsʼaklom Cristo li krixchanoetik ti jaʼ kabteltik yakʼojbutik li Diose. Li voʼotike mu persauk skʼan jnaʼtik kʼusi ora mi jaʼuk kʼusi kʼakʼalil chtal li slajebal kʼakʼale. Yuʼun xuʼ kuʼuntik xchiʼuk skʼan xkakʼtik ta ilel ti lek chapalutike (Mat. 24:36, 44). Mi lek jpatoj koʼontontik ta stojolal Jeova xchiʼuk mi jaʼ baʼyuk chkakʼ ta jkuxlejaltik li Ajvalilal yuʼun Diose, li Jeovae muʼyuk me tsloʼlautik (Rom. 10:11).

[Tsʼib ta yok vun]

[Sjakʼobiltak sventa xchanobil]

[Lokʼol ta pajina 23]

[Lokʼol ta pajina 26]

Akʼo mi ep jvokoltik, jsaʼtik li veʼlil ta mantale

[Lokʼol ta pajina 27]

Mi jaʼ kakʼoj ta koʼontontik spasel li kʼusitik sventa mantale, mu me xkaʼitik ch-echʼ li kʼakʼaletike