1-3. (a) Ondaka yipi ya velapo Yesu a tukula valusapo avali? (b) Apulilo api tu sukila oku tambulula?

 SOKOLOLA ndu okuti, ombiali yimue yi ku pinga oco o ya ambate vekãlu liove toke kocipito cimue ci kuete esilivilo lia velapo. Osimbu kua lisangele lombiali yaco, o limbuka okuti, vekãlu liove ka muli ongasolina yecelela oku linga ungende toke kocitumãlo caco. Ove o sandiliya lonjanga ongasolina. Osimbu enda oku landa ongasolina, ombiali yaco ya pitĩla konjo yove. Omo okuti ka ya ku sangele, ka yi ku kevelela, kuenje, yi pinga komunu ukuavo o kuete ekãlu oco yende laye. Eci o tiuka, o sanga okuti, ombiali yaco ya enda lomunu ukuavo. Vepuluvi liaco o kala ndati?

² Sokolola ndu okuti ove umbiali, kuenje, o nõla alume vatatu va loñoloha oco va linge upange umue wa velapo. O valomboluila ndomo upange waco u lingiwa, kuenje, vosi yavo va tava kolonumbi viove. Pole, eci o tiuka, o sanga okuti alume vavali ovo lika va linga ciwa upange wavo. Ukuavo, wa li sandela esunga, kuenda ka lingile upange wo tuma. Ulume waco u tenda ndati?

³ Yesu poku ta alusapo atiamẽla kafeko kuenda kolokondu, wa linga ocindekaise ndeci ca tukuiwa ndeti oco a lekise okuti, kotembo ya sulako pokati Kakristão olombuavekua, pa kala vamue va kolelua haivo va lunguka, pole, vakuavo sio. a (Mat. 25:1-30) Oco Yesu a lekise esilivilo lialusapo aco, wa popia hati: ‘Lavululi momo ka wa kũlĩhĩli eteke ndaño owola’ eye a ka nena esombiso lia Suku, lioku nyõla oluali lulo lua vialiwa la Satana. (Mat. 25:13) Koloneke vilo, tu sukila oku kapako elungulo liaco. Onima yipi tu pondola oku tambula omo lioku lavulula, ndomo Yesu a tu vetiya oku ci linga? Velie va lekisa okuti, va liangiliya? Omunu lomunu pokati ketu, o lekisa ndati okuti o kasi oku lavulula?

4. Momo lie ‘oku lavulula’ ka ku lombolokela oku tala kowola?

⁴ Poku linga ovopange amue ndeci: Oku talavaya vonjo yoku panga ovikuata, oku enda kosipitali, kuenda oku talamẽla okalela, tu sukila oku pokola kesokiyo liotembo. Pole, kuli ovopange amue ndeci: Oku popela omanu vondalu ale kovilunga vimue okuti, poku a linga ka tu sukila oku tala kowola, momo ci kapa kohele omuenyo womanu. Olonjanja vimue oku kũlĩhĩsa otembo osimbu omunu a kasi oku talavaya ci kuete esilivilo. Omo okuti, esulilo lioluali lulo li kasi ocipepi, oku tiamisila utima kupange Yehova a tu ĩha woku popela omanu, ci kuete esilivilo lia velapo. Pole, oku lavulula, ka ku lomboloka oku vanja vanja kowola. Vocipama cilo, tu konomuisa ovina vitãlo vi tu kuatisa oku limbuka esunga lieci ka tua kũlĩhĩlĩle eteke lowola esulilo liya.

5. Omo okuti ka tua kũlĩhĩle eteke lowola esulilo liya, tu sukila oku lekisa ekalo lipi?

⁵ Catete, omo okuti ka tua kũlĩhĩle eteke esulilo liya, ci tu kuatisa oku situlula ovisimĩlo vietu. Omo okuti ka tua kũlĩhĩle eteke liaco, ci tu kuatisavo oku nõla nda tu yongola oku lekisa epokolo ku Yehova ale sio. Ka tu kasi lika oku vumba Yehova oco tu popeliwe kenyõleho lioluali lulo, kuenda oku tambula omuenyo ko pui, pole, tu kasi oku u vumba omo liocisola tu u kuetele. (Tanga Osamo 37:⁠4.) Tua sanjukila oku linga ocipango ca Yehova, kuenda tua kolela okuti, alongiso aye a tu kuatisa. (Isa. 48:​17) Ka tu tendi ovihandeleko viaye ndocilemo.​—⁠1 Yoa. 5:⁠3.

6. Nda tu kasi oku vumba Suku omo liocisola tu u kuetele, eye o kala ndati, kuenda momo lie?

⁶ Cavali, omo ka tua kũlĩhĩle eteke esulilo liya, ci tu ĩha epuluvi lioku linga ovina vi sanjuisa utima wa Yehova. Nda tu kasi oku vumba Yehova omo liocisola tu u kuetele, okuti ka tu ci lingi lonjongole yoku tambula asumũlũho, tu u kuatisa oku eca etambululo ku Satana, una wa siata oku u lingila usuanji. (Yovi 2:​4, 5; tanga Olosapo 27:11.) Oku sokolola ohali lesumuo Eliapu lia siata oku tu kokela, ci tu kuatisa oku amamako oku sanjukila uviali wa Yehova loku yuvula evĩho lioluali lulo lua vialiwa la Satana.

7. Momo lie o simĩla okuti oku lieca olumue kupange wa Suku ci nena esanju?

⁷ Catatu, omo okuti ka tua kũlĩhĩle eteke esulilo liya, tu vetiyiwa oku amamako oku vumba Suku lutima wosi. Koloneke vilo, omanu vana ka va kũlĩhĩle Suku, va tava okuti, oluali lulo ndopo lu nyõliwa. Omo liovilemawe vi komõhisa va siata oku mola, va kuete ovisimĩlo viokuti: “Tu li, tu nyui, momo hẽla tu fa.” (1 Va Kor. 15:​32) Pole, etu ka tu kuete ovisimĩlo viaco. Kuenda ka tua siatele oku yuvula oku kala lomanu vakuavo omo liolonjongole vietu muẽle. (Olosap. 18:⁠1) Handi vali, tu lieca olumue poku pesela otembo, ongusu yetu lovina vikuavo, oco tu kuatise omanu poku va kundila olondaka viwa Viusoma wa Suku. (Tanga Mateo 16:24.) Tu kuata esanju lialua koku vumba Suku, ca piãla enene poku kuatisa omanu oku u kũlĩha.

8. Ulandu upi Wembimbiliya u lekisa okuti, tu sukila oku kolela ku Yehova kuenda Kondaka yaye?

⁸ Cakuãla, omo okuti ka tua kũlĩhĩle eteke lowola esulilo liya, ci tu kuatisa oku kolela Yehova lutima wosi, kuenda oku likolisilako oku kapako Ondaka yaye komuenyo wetu. Omo okuti ka tua lipuile, pamue tu lekisa ocituwa coku likolela etu muẽle. Paulu wa lungula Akristão vosi hati: ‘Omunu una o sima okuti o tãi, a lunguke sanga o kupuka.’ Osimbu Yehosua ka songuilile omanu va Suku Vofeka Yohuminyo, ci soka akũi avali latatu kolohulukãi viomanu va fa momo ka va taviwile la Yehova.  Omo liaco, Paulu wa popia hati: “Ovina evi, via linga ­elungulo ­kokuetu tu kasi koloneke vilo via sulako, momo via sonehiwila oku tu longisa.”​—⁠1 Va Kor. 10:​8, 11, 12, NW.

9. Ovitangi vi kangula ndati ekolelo lietu, kuenda vi tu kuatisa ndati oku kuata ukamba la Yehova?

⁹ Catãlo, omo okuti ka tua kũlĩhĩle eteke lowola esulilo liya, cecelela okuti ovitangi tua siata oku liyaka lavio koloneke vilo, vi pamisa ekolelo lietu. (Tanga Osamo 119:71.) Oloneke via sulako violuali lulo vi tukuiwa hati, “otembo yohali.” (2 Tim. 3:​1-5) Omanu vana va kasi vemehi liuviali wa Satana, va tu suvuka kuenda va siata oku tu lambalala omo liekolelo lietu. (Yoa. 15:19; 16:⁠2) Nda tu lekisa umbombe loku kapako olonumbi via Suku poku liyaka lovitangi, tu pamisa ekolelo lietu kuenje, li kanguka ndocikuata ca pita vondalu. Omo liaco, tu sukila oku kuata ekolelo. Nda tua ci linga, ukamba wetu la Yehova u pamisiwa.​—⁠Tia. 1:​2-4; 4:⁠8.

10. Ovina vipi vi vetiya omunu oku sima okuti otembo yi pita lonjanga?

¹⁰ Otembo yi pita lonjanga. Nda tua sakalala loku linga upange umue okuti ka tu vanji kowola, tu limbuka okuti, otembo yi pita lonjanga. Cimuamue haico ci pita letu okuti, nda tu sakalala loku linga upange Yehova a tuma, ka tu limbuka eteke lowola esulilo liya. Vamanji valua olombuavekua, va siata oku lekisa ongangu yiwa. Tu kũlĩhĩsi ovina via pita noke yoku vialekiwa kua Yesu Kusoma kunyamo wo 1914, kuenda tu konomuisi ndomo olombuavekua vimue via lekisa okuti, via liangiliya kuenda vikuavo sio.

11. Noke yunyamo wo 1914, momo lie olombuavekua vimue via simĩla okuti Cime cavo o kasi oku cilua?

¹¹ Ivaluka olusapo lua Yesu lua tiamẽla kafeko kuenda apika va tambula olokondu. Nda afeko kuenda apika va tukuiwa volusapo luaco va kũlĩhĩle eteke lowola yoku iya kua cime cavo, nda ka va lavuluile. Omo okuti ka va kũlĩhĩle eteke lowola yaco, va sukilile oku liangiliya. Ndaño Akristão vamue olombuavekua va lavoka vokuenda kuanyamo alua okuti Cime cavo iya kunyamo wo 1914, pole, ka va kuatele elomboloko liovina via laikele oku pita kotembo yaco. Eci va limbuka okuti ovina va kala oku lavoka ka via tẽlisiwile, va fetika oku sima okuti, Sandombua o kasi oku cilua. Noke, manji umue wa popia hati: “Vamue pokati ketu va simĩle okuti, vosi yetu tu enda kilu vosemana yatete yosãi ya Mbalavipembe kunyamo wo [1914].”

12. Akristão vamue olombuavekua va lekisa ndati okuti va koleliwa, kuenda va lunguka?

¹² Vamanji vamue eci va limbuka okuti esulilo ka lieyile ndomo va kala oku lavoka, va konyõha! Pole, vamanji vana va lekisa ekolelo, va liyaka lelambalalo vokuenda Kuyaki Watete wa pita Voluali. Vokuenda kuotembo yaco, va liwekelepo oku linga upange ndomunu wa pekela. Pole, kunyamo wo 1919, va fetika vali oku kuata ombili! Kunyamo waco, oco Yesu eya oku kũlĩhĩsa Onembele ya Suku. Vamue pokati kavo va sangiwa okuti, ka va kuete vali ekolelo, kuenje, ka va taviwile oku linga ‘upange’ wa Cime cavo. (Mat. 25:​16) Omo okuti ka va lavuluile, va sokisiwa lafeko vana ka va kapele ulela volondiyelo viavo, kuenda va sokisiwa lupika una wa kuata owesi, momo ka va likolisilileko oku pitisa kovaso Usoma wa Suku. Pole, Akristão valua olombuavekua, va pandikisa lekolelo, kuenda va lekisa onjongole yoku vumba Cime cavo vokuenda kuotembo yuyaki.

13. Ocituwa cipi Akristão olombuavekua va lekisa noke yunyamo wo 1914, kuenda ocituwa cipi va siata oku lekisa koloneke vilo?

¹³ Utala Wondavululi 1 ya Kayovo wo 1916 wa lombolola olondaka vimue vi kuete esilivilo poku popia ndoco: “A vamanji, omo okuti vosi yetu tua kolela Suku, ka tua sumũile omo liesokiyo a ­linga. Ka tua yonguile okuti, olonjongole vietu vi tẽlisiwa.  Eci tua limbuka okuti elavoko tua kuata kosãi ya Mbalavipembe yunyamo wo 1914 ka lia sungulukile, tua sanjuka, momo Ñala ka pongoluile Ovisimĩlo viaye oco a tu sanjuise. Ka tua yonguile okuti, o linga epongoloko liaco. Omo liaco, tu yongola lika oku kũlĩha ovisimĩlo Viaye, kuenda ocipango caye.” Umbombe waco wa siata oku limbukiwa pokati kolombuavekua vina via litumbika kupange wa Suku. Ovio ka via siatele oku lipanda vati, via tambula espiritu lia Suku, pole, via nõlapo oku songuila ‘upange’ wa Suku palo posi. Omo liaco, ‘owiñi wakahandangala wolomeme vikuavo’ okuti Akristão vana va kuete elavoko lioku kala palo posi, va kasi oku setukula ocituwa colombuavekua coku lavulula, kuenda ombili yavo.​—⁠Esit. 7:9; Yoa. 10:⁠16.

14. Oku kakatela kololonumbi via siata oku eciwa lukuenje wa lunguka ci tu teyuila ndati?

¹⁴ Ndeci Akristão olombuavekua va siata oku linga, owiñi wakahandangala u kasi oku lavulula poku pokola kocisoko cukuenje wa lunguka, cina ca siata oku eca olonumbi via Suku vi pamisa ekolelo liavo. Omo okuti owiñi waco u kuete ukũlĩhĩso wa suapo Wondaka ya Suku, u sokisiwa lafeko vana va yukisa olondiyelo viavo lulela. (Tanga Osamo 119:130; Yoano 16:13.) Omo okuti owiñi waco u kuete ekolelo lia pama, wa liangiliyila oku iya kua Kristu, kuenda u kuete ombili yoku kunda olondaka viwa ndaño lovitangi. Kũlĩhĩsa ulandu wa vamanji vamue va kapiwile vokayike kolonazista ko Alemanya okuti, va kuata lika Embimbiliya limosi. Ovo va likutilila ku Suku oco a pamise ekolelo liavo. Noke, va yeva okuti, manji umue wa kapiwa ndopo vokayike, wa soleka Utala Wondavululi vocikasia caye cavaya. Pokati ka vamanji yaco, pa kala umue ombuavekua o tukuiwa hati, Ernst Wauer, okuti wa kapiwilevo vokayike kaco. Eye wa popia hati: “Yehova wa tu kuatisa lolonumbi vi sangiwa Vutala waco Wondavululi.” Eye wa amisako hati: “Ndaño okuti tua siata oku tambula alivulu mu sangiwa olonumbi viukuenje wa lunguka, anga hẽ tua vi kapako? Nda kolela okuti, Yehova o ka sumũlũisa vana va pokola kokuaye, haivo vakuacili okuti, va kapako olonumbi viaye va siata oku tambula.”

15, 16. Olohueli vimue okuti via lekisa ombili kupange woku kunda via tambula asumũlũho api, kuenda ongangu yavo yi ku longisa nye?

¹⁵ Olomeme vikuavo vi kasivo oku linga upange Cime cavo a tuma, lekuatiso Liakristão olombuavekua. (Mat. 25:​40) Omo okuti ka vi kasi ndupika ukuawesi Yesu a tukula volusapo luaye, via siata oku likolisilako oku linga upange woku kunda olondaka viwa Viusoma. Kũlĩhĩsa ulandu wa manji Jon lukãi waye Masako okuti, eci va lalekiwa oku kundila omanu kelimi lio China vofeka yo Kenia, va kuata ohele yoku ka linga upange waco. Pole, noke yoku likutilila va kũlĩhĩsa ekalo liavo, kuenje va nõlapo oku enda kofeka yaco.

¹⁶ Omo lialikolisilo avo, va tambula asumũlũho alua. Noke va popia vati: “Upange woku kunda tu kasi oku lingila kulo, u nena esanju lialua.” Ovo va fetika oku longisa Embimbiliya komanu epanduvali, kuenda va linga ovina vikuavo vi nena esanju. Kuenje va amisako vati: “Tu eca olopandu ku Yehova eteke leteke, omo a tava okuti tu iya kulo.” Kuli vamanji valua va nõlapo oku lieca olumue kupange wa Yehova, osimbu esulilo lioluali lulo ka lieyile. Sokolola ndomo vamanji valua okuti noke yoku pindisiwa Kosikola yo Gileada, va tumiwa kupange woku kala olomisionaliu. Momo lie ku tangela ocipama ci lombolola asumũlũho atiamẽla kupange ulikasi losapi hati: “Tu Linga Upange tu Pondola Oku Tẽlisa” ci sangiwa Vutala Wondavululi 15 ya Mbalavipembe, wo 2001, kelimi Lioputu? Osimbu o tanga ulandu watiamẽla kupange wumisionaliu, sokolola ndomo o pondola oku vokiya upange woku kunda, oco o sivaye Suku. Nda wa ci linga, o kuata esanju lialua.

17. Omo okuti ka tua kũlĩhĩle eteke lowola esulilo liya, ci tu kuatisa oku kuata asumũlũho api?

¹⁷ Tu kuete esumũlũho omo ka tua kũlĩhĩle eteke lowola esulilo lioluali lulo liya. Ndaño pamue tu sima okuti esulilo ka liya lonjanga, ka tu sumua. Pole, tu amamako oku linga ocipango ca Yehova, Isietu ukuacisola. Omo liaco, tu amamiko oku lekisa ombili, kuenda tu yuvuli ovitalukilo violuali lulo, oco tu kuate esanju kupange wa Cime cetu.​—⁠Luka 9:⁠62.

18. Momo lie ka tu yonguila oku liwekapo oku lekisa ekolelo?

¹⁸ Tua kũlĩha okuti, eteke liesombiso lia Suku li kasi ocipepi. Lomue pokati ketu o yongola oku sumuisa Yehova la Yesu. Ovo va tu ĩha ocikele coku linga upange koloneke vilo via sulako. Omo liaco, tu eca olopandu kokuavo, omo lioku tu kolela!​—⁠Tanga 1 Timoteo 1:⁠12.

19. Tu lekisa ndati okuti, tua liangiliya?

¹⁹ Ci kale okuti tu kuete elavoko lioku enda kilu, ale lioku kala Voluali Luokaliye palo posi, tu amamiko oku pamisa ekolelo lietu kupange woku kunda tua tambula ku Suku, loku longisa omanu oco va linge olondonge. Omo okuti ka tua kũlĩhĩle eteke lowola Yehova a ka nyõla oluali lulo, nye tu sukila oku linga? Tu sukila oku amamako oku lekisa okuti, tua liangiliya. (Mat. 24:​36, 44) Omo liaco, tu ivaluki okuti, nda tua kolela Yehova lutima wetu wosi, loku pitisa kovaso Usoma waye, lalimue eteke tu ka sumua.​—⁠Va Rom. 10:⁠11.