1-3. (a) Ndi zwiimo zwifhio zwine zwa tshimbidzana na zwifanyiso zwivhili zwa Yesu? (b) Ndi mbudziso dzifhio dzine ra fanela u dzi fhindula?

KHA RI zwi dzhie muofisiri muhulwane o ni humbela uri ni mu ise fhethu ha ndeme vhukuma. Musi ni sa athu u mu tevhela, na mbo zwi ṱhogomela uri goloi yaṋu a i na mapfura o eḓanaho lwonolwo lwendo. Zwenezwo zwi amba uri ni fanela u thoma na gidimela u ya u renga mapfura. Musi no ya u renga mapfura, muofisiri u sala a tshi swika. U a sedza-sedza fhedzi a si ni wane. A nga si kone u lindela, nga zwenezwo u humbela munwe muthu uri a mu ise henefho fhethu. Musi ni tshi tou vhuya na ṱhogomela uri muofisiri o ṱuwa na munwe muthu. No vha ni tshi ḓo ḓipfa hani?

² Zwino kha ri zwi dzhie ni muofisiri nahone no khetha vhanna vhararu vha re na vhukoni uri vha ṱhogomele mafhungo a ndeme a bindu. Ni a vha ṱalutshedza zwine vha fanela u zwi ita, nahone vhuraru havho vha tenda nga u ḓifunela. Musi ni tshi vhuya nga murahu ha tshifhinganyana, ni wana uri ndi vhavhili fhedzi vhe vha ita mushumo wavho. Fhedzi we a si ite mushumo wawe u a lingedza u ḓiimelela. Ngoho ndi ya uri ha ngo vhuya a lingedza u shuma. No vha ni tshi ḓo ḓipfa hani?

³ Kha tshifanyiso tshawe tsha vhasidzana vha fumi na tsha vhalanda, Yesu o shumisa zwiimo zwi fanaho u itela u sumbedza uri maḓuvhani a vhufhelo, vhaṅwe Vhakriste vho ḓodzwaho vha ḓo fulufhedzea na u vha na vhuṱali ngeno vhaṅwe vha sa ḓo ita nga u ralo. * (Mat. 25:1-30) O ombedzela mbuno yawe nga u amba uri: “Fhaṱuwani-ha, ngauri a ni ḓivhi ḓuvha na tshikhathi”—zwenezwi zwi amba uri a vha ḓivhi uri Yesu u ḓo ḓisa lini khaṱulo ya Mudzimu kha shango ḽa Sathane. (Mat. 25:13) Yeneyo nyeletshedzo i shuma na kha riṋe ṋamusi. Ri nga vhuyelwa hani nga u dzula ro fhaṱuwa samusi Yesu o ri ṱuṱuwedza uri ri ite nga u ralo?  Ndi vhonnyi vhe vha sumbedza u vha vho lugelaho u tshidzwa? Nahone ndi mini zwine ra fanela u zwi ita u itela u dzula ro fhaṱuwa?

4. Ndi ngani u ‘dzula ro fhaṱuwa’ zwi sa ambi uri ri fanela u dzula ro sedza tshifhinga?

⁴ Zwiṅwe zwithu zwi ngaho u shuma mimagani, u dalela dokotela, u tshimbila nga tshiendedzi tsha vho muthu munzhi, zwi ṱoḓa uri ri ṱhogomele tshifhinga. Naho zwo ralo, kha ḽinwe sia zwithu zwi ngaho u dzima mulilo kana mushumo wa u phulusa vhathu khomboni, a zwi ṱoḓi uri ri sedze tshifhinga ngauri zwi nga vha khombo khulwane vhukuma. Nga fhasi ha zwiimo zwo raloho tsha ndeme vhukuma ndi u livhisa ṱhogomelo kha mushumo hu si kha tshifhinga. Samusi vhufhelo vhu tshi khou sendela, mushumo washu wa u huwelela nga ha ndugiselelo ya Yehova ya u tshidza vhathu ndi wa ndeme vhukuma. U dzula ro fhaṱuwa sa Vhakriste a zwi ambi u vha ro sedza tshifhinga. Ngoho ndi ya uri, u sa ḓivha ḓuvha na tshikhathi tshine vhufhelo ha ḓo ḓa ngatsho zwi nga ri vhuyedza nga nḓila ṱhanu.

5. U sa ḓivha ḓuvha na tshikhathi zwi ri thusa hani u dzumbulula zwine zwa vha mbiluni dzashu?

⁵ Mbuyelo ya u thoma ya u sa ḓivha uri vhufhelo vhu ḓo swika lini ndi ya uri zwi ri thusa uri ri kone u dzumbulula zwine ra vha zwone zwa vhukuma mbiluni dzashu. Ngoho ndi ya uri u sa ḓivha zwi a ri thusa, zwi ri ṋea tshibuli tsha u sumbedza u fulufhedzea kha Yehova nga u ḓifunela. Naho ro lavhelela nga maṱo matswuku u tshidzwa musi hu tshi fheliswa ano maitele a zwithu, ri shumela Yehova ngauri ri a mu funa, hu si nga nṱhani ha u ṱoḓa vhutshilo vhu sa fheli fhedzi. (Vhalani Psalme ya 37:4.) Ri takalela u ita zwine a funa nahone ri a ṱhogomela uri Mudzimu u ri funza zwine zwa ri vhuyedza. (Yes. 48:17) A ri dzhii milayo yawe sa i lemelaho.—1 Yoh. 5:3.

6. Musi ri tshi shumela Mudzimu nga nṱhani ha uri ri a mu funa, u ḓipfa hani nahone ndi ngani?

⁶ Mbuyelo ya vhuvhili ya u sa ḓivha ḓuvha kana tshikhathi, ndi uri ri ḓo vha na tshibuli tsha u takadza mbilu ya Yehova. Musi ri tshi mu shumela nga lufuno—hu si nga nṱhani ha uri ḓuvha ḽa vhufhelo ḽi tsini kana nga nṱhani ha u ṱoḓa malamba—ri ita uri Yehova a kone u fhindula swina ḽawe Sathane ḽine ḽa mu hanedza. (Yobo 2:4, 5; vhalani Mirero 27:11.) Musi ri tshi humbula nga ha vhuṱungu na maṱodzi zwe zwa vhangwa nga Diabolo ri ima ro khwaṱha ri tshi lwela vhuvhusahoṱhe ha Yehova na u landula vhuvhusi vhuvhi ha Sathane.

7. Ndi ngani ni tshi humbula uri ndi vhuṱali u tshila vhutshilo ha u ḓidzima zwiṅwe zwithu?

⁷ Mbuyelo ya vhuraru ndi ya uri u shumela Mudzimu ri sa ḓivhi ḓuvha zwi ri ṱuṱuwedza uri ri ḓidzime zwiṅwe zwithu vhutshiloni. Ṋamusi vhaṅwe vhathu vhane vha si ḓivhe Mudzimu na vhone u fana na riṋe vha a tenda uri ḽino shango ḽi ḓo fheliswa hu si kale. Nga nṱhani ha u ofha uri ḽi ḓo fheliswa, vha na mavhonele a uri “izwo-ha nga ri ḽe nga ri nwe, zwa matshelo zwo vhonwa nga nnyi!” (1 Vha-Kor. 15:32) Kha ḽiṅwe sia riṋe a ri na nyofho. A ri ṱoḓi u ḓifhambanya na vhaṅwe ri tshi itela u fusha lutamo lwashu. (Mir. 18:1) U fhambana na zwenezwo ri a ḓihangwa nahone ra shumisa nga u ḓifunela tshifhinga, maanḓa na thundu dzashu u itela u huwelela mafhungo maḓifha a Muvhuso wa Mudzimu kha vhaṅwe. (Vhalani Mateo 16:24.) Ri wana dakalo ḽihulu nga u shumela Mudzimu, zwihulu-hulu ri tshi thusa vhaṅwe uri vha mu ḓivhe.

8. Ndi tsumbo dzifhio dzi wanalaho Bivhilini dzine dza sumbedza uri ri fanela u ḓitika nga Yehova na Ipfi ḽawe nga vhuḓalo?

⁸ Mbuyelo ya vhuṋa ya u sa ḓivha ḓuvha kana tshikhathi, ndi ya uri zwi ri thusa uri ri ḓitike nga Yehova nga vhuḓalo nahone zwa dovha zwa ita uri ri fhisetshele u shumisa Ipfi ḽawe vhutshiloni hashu. Tshinwe tshithu tsho ḓoweleaho vhukuma nga ha riṋe vhathu vha songo fhelelaho ndi u vha na nḓowelo ya u ḓitika nga riṋe vhane. Paulo o ṱuṱuwedza Vhakriste vhoṱhe a ri: “Ané a ri ndo ima, a vhone a sa ḓo wa.” Musi Yoshua a sa athu livhisa vhathu vha Mudzimu Shangoni ḽo Fulufhedziswaho, vhathu vha 23 000 vho xelelwa nga ndugelo  ya u vha vhathu vha Yehova. Paulo o ri: “Hezwo zwoṱhe” zwo “ṅwalelwa u ri dzudzanya, riṋe vhe ra ṱangana na mafhelelo a zwifhinga.”—1 Vha-Kor. 10:8, 11, 12.

9. Milingo ine ra sedzana nayo i ri khwaṱhisa na u ri sendedza tsini na Mudzimu nga nḓila-ḓe?

⁹ Mbuyelo ya vhuṱanu ya u sa ḓivha uri vhufhelo vhu ḓo ḓa lini ndi ya uri zwi ita uri milingo ine ra sedzana nayo i ri khwaṱhise. (Vhalani Psalme ya 119:71.) I ngoho maḓuvha a vhufhelo a ano maitele a zwithu ndi “zwifhinga zwi lemelaho.” (2 Tim. 3:1-5) Vhathu vhanzhi kha shango ḽa Sathane vha a ri vhenga, nga zwenezwo ri nga kha ḓi tovholwa nga nṱhani ha lutendo lwashu. (Yoh. 15:19; 16:2) Arali ra ḓiṱukufhadza nahone ra ṱoḓa vhulivhisi ha Mudzimu musi ro sedzana na milingo, lutendo lwashu lu ḓo vusuluswa lwa khwaṱha. Ri nga si kulee nungo. Nṱhani hazwo ri ḓo sendela tsini-tsini na Yehova nga nḓila khulwane.—Yak. 1:2-4; 4:8.

10. Ndi mini zwine zwa nga ita uri tshifhinga tshi vhonale tshi tshi khou gidima?

¹⁰ Nḓila ine tshifhinga tsha tshimbila ngayo i nga vhonala i sa pfesesei. Musi ro farakanea nahone ri sa sedzi tshifhinga, tshi vhonala tshi tshi khou gidima vhukuma. Nga hu fanaho, arali ra farakanea nga mushumo we Yehova a ri ṋea wone, ḓuvha na tshikhathi zwi nga swika ri songo zwi lavhelela. U tendelana na anea mafhungo, vhunzhi ha vhaḓodzwa vho ri vhetshela tsumbo yavhuḓi vhukuma. Kha ri ṱolisise uri ho itea mini nga murahu ha musi Yesu a tshi vhewa sa Khosi nga 1914 nahone ri dovhe ri ṱhogomele uri vhaṅwe vho zwi sumbedza hani uri vho fhaṱuwa ngeno vhaṅwe vho kundelwa u ita ngauralo.

11. Nga murahu ha 1914, ndi ngani vhaṅwe vhaḓodzwa vho humbula uri Murena u khou lenga?

¹¹ Humbulani nga ha tshifanyiso tsha Yesu tsha vhasidzana vha fumi na tsha vhalanda. Arali vhasidzana vha fumi kana vhalanda vha tshifanyiso tsha Yesu vho vha vha tshi ḓivha uri muhwe kana muṋe wavho u ḓo swika lini, zwo vha zwi si nga ṱoḓei uri vha dzule vho fhaṱuwa. Fhedzi nga nṱhani ha uri vho vha vha sa zwi ḓivhi, vho vha vha tshi fanela u dzula vho fhaṱuwa. Naho lwa miṅwaha minzhi vhaḓodzwa vho vha vho lavhelela uri ṅwaha wa 1914 u ḓo vha wo swayeaho, vho vha vha sa pfesesi zwavhuḓi zwe zwa vha zwi tshi ḓo itea. Musi zwithu zwi songo tsha itea nga nḓila ye vha lavhelela ngayo zwo vhonala u nga Muhwe u khou lenga. Nga murahu muṅwe wahashu o amba zwi tevhelaho: “Vhaṅwe vhashu vha si gathi vho vha vha tshi humbula uri ri khou ya ṱaḓulu nga vhege ya u thoma ya October [1914].”

12. Vhaḓodzwa vho sumbedza hani u fulufhedzea na u vha na vhuṱali?

¹² Humbulani uri zwi nga vha zwo vha kula nungo lungafhani u lavhelela uri vhufhelo vhu khou ḓa fhedzi ha si ḓe! Zwiṅwe hafhu, vhahashu vho sedzana na u pikiswa tshifhingani tsha Nndwa ya Shango ya u Thoma. Nga tshenetsho tshifhinga mushumo wa u huwelela wo ṱoḓa u ima lwa tshoṱhe. Fhedzi nga 1919, ho vha na tshiitea tshe tsha ita uri mushumo u dovhe u bvele phanḓa! Yesu o ḓa thembeleni ya Mudzimu ya lwa muya, nahone nga tshenetsho tshifhinga ho ṱolisiswa vhane vha ḓivhidza Vhakriste. Naho zwo ralo, musi hu tshi ṱolisiswa vhaṅwe vho xelelwa nga ndugelo ya u bvela phanḓa vhe vhashumeli vha Muṋe. (Mat. 25:16) Zwo vha zwi tshi nga a vho ngo dzhiela nṱha u ḓadza midzio yavho ya mapfura a muya, u fana na vhasidzana vha matsilu. Nahone, sa mulanda ane a bvafha, vho vha vha songo ḓiimisela u ḓidzima zwiṅwe zwithu u itela Muvhuso wa Mudzimu. Naho zwo ralo, vhunzhi ha vhaḓodzwa vho sumbedza u fulufhedzea vhukuma na u vha na lutamo luhulwane lwa u shumela Muṋe, na miṅwahani i konḓaho ya nndwa.

13. Tshigwada tsha mukoma a fulufhedzeaho tsho sumbedza mavhonele afhio nga murahu ha 1914, nahone ṋamusi tshi na mavhonele afhio?

¹³ Nga murahu ha 1914, Tshiingamo tsho ita heyi nḓivhadzo ya ndeme: “Vhaṅwe vhahashu,  vhane vha vha na mavhonele avhuḓi nga ha Mudzimu a vho ngo kulea nungo nga ndugiselelo Dzawe. A ro ngo ṱoḓa hu tshi itwa lutamo lwashu; nga zwenezwo musi nga October, 1914, ri tshi ṱhogomela uri ro vha ro lavhelela zwithu zwo khakheaho, ro takalela uri Murena ha ngo shandula Nzudzanyo Dzawe a tshi itela u ri takadza. Ro vha ri sa lavheleli uri a ite nga u ralo. Ro vha ri tshi ṱoḓa u pfesesa khwine nzudzanyo na ndivho Dzawe.” Vhaḓodzwa ṋamusi vha sumbedza mavhonele o raloho a u ḓiṱukufhadza na u ṱoḓa u ita lutamo lwa Murena. A vha ḓirwi khana uri ndi vhaḓodzwa, fhedzi vho ḓiimisela u ita mushumo wa Murena kha ḽifhasi. Nahone zwino vha “gogo ḽihulu” vha re vha “dziṅwe nngu,” Vhakriste vha re na fulufhelo ḽa u tshila kha ḽifhasi vha edzisa u fhaṱuwa na u fhisea havho.—Ndzumb. 7:9; Yoh. 10:16.

14. U dzula tsini-tsini na tshigwada tsha Mudzimu tshine tsha ri ṋea zwiḽiwa zwa muya zwi nga ri tsireledza nga nḓila-ḓe?

¹⁴ U fana na Vhakriste vho ḓodzwaho, miraḓo ya vha gogo ḽihulu yo fhaṱuwaho i dzula tsini-tsini na tshigwada tsho khethiwaho nga Mudzimu uri tshi ri ṋee zwiḽiwa zwa muya. Nga nṱhani ha zwenezwo, zwi tou nga vha khou ḓadza midzio yavho nga mapfura a lwa muya a bvaho Ipfini ḽa Mudzimu na kha muya wawe. (Vhalani Psalme ya 119:130; Yohane 16:13.) Nga zwenezwo vha a khwaṱhiswa, na vhone vha sumbedza u dzula vho lindela u vhuya ha Kristo, na u dzula vha tshi fulufhedzea nga fhasi ha milingo. Sa tsumbo kha iṅwe dzhele ya gammbani ya Vhanazi, u thomani vhahashu vho vha vhe na Bivhili nthihi fhedzi. Vho rabelela uri vha wane zwiḽiwa zwo engedzeaho zwa lwa muya. Nga u ṱavhanya nga murahu ha zwenezwo vho pfa u pfi muṅwe wahashu ane a kha ḓi bva u swika dzhele o ḓa na khandiso dzi si gathi ntswa dza Tshiingamo o dzi dzumba kha mulenzhe wawe wa bulannga. Kha vhaṅwe vhe vha ponyoka ho vha hu na wahashu wa muḓodzwa ane a pfi Ernst Wauer, we nga murahu a ri: “Yehova o ri thusa nga nḓila i mangadzaho uri ri kone u humbula thero dze dza ri khwaṱhisa.” O dovha a ri: “Musalauno zwi a leluwa u wana zwiḽiwa zwa muya, fhedzi naa ri a zwi dzhiela nṱha tshifhinga tshoṱhe? Ndi a fulufhela uri Yehova u na phaṱhutshedzo nnzhi dze a dzi vhetshela vhane vha mu fulufhela tshifhinga tshoṱhe na vhane vha ḽa zwiḽiwa ṱafulani ḽawe.”

15, 16. U fhisea ha vhaṅwe vhavhingani vhuḓinḓani ha Vhukriste zwo vha lambedza nga nḓila-ḓe, nahone ni guda mini kha tshenzhelo yavho?

¹⁵ Vha dziṅwe nngu na vhone vha dzula vho farakanea nga mushumo wa Muṋe wavho nahone vha tikedza vharathu vha Kristo nga  vhuḓalo. (Mat. 25:40) U fhambana na vhalanda vha re vhabva vha tshifanyiso tsha Yesu, vho ḓiimisela u ḓidzima zwiṅwe zwithu na u ita vhuḓidini u itela uri Muvhuso wa Mudzimu u ḓe u thoma vhutshiloni havho. Sa tsumbo, musi Jon na Masako vha tshi humbelwa u ya u shuma kha tsimu ya vhathu vhane vha amba Lutshaina ngei Kenya, u thomani vho timatima. Fhedzi musi vho no ṱolisisa vhuimo havho na u rabela nga hazwo vho mbo ḓi dzhia phetho ya u pfulutshela henengei.

¹⁶ Nga nṱhani ha zwenezwo, vhuḓidini havho ho lambedzwa. Vho ri: “Vhuḓinḓa ha tsimu fhano vhu a takadza.” Vho thoma pfunzo dza Bivhili dza sumbe. Nahone vho vha na dziṅwe tshenzhelo nnzhi dzi takadzaho. Vho phetha nga uri: “Ḓuvha na ḓuvha ri livhuha Yehova nge a ri tendela uri ri vhe fhano.” I ngoho, hu na vhahashu vhanzhi vha tshinnani na vha tshisadzini vhe vha zwi sumbedza nga phetho dzavho uri vho ḓiimisela nga vhuḓalo u farakanea tshumeloni ya Mudzimu hu sa londwi uri vhufhelo vhu ḓo swika lini. Humbula nga vhahashu vhanzhi-vhanzhi vhe vha ṱhaphudza Tshikoloni tsha Gilead vhane vha shuma sa vharumiwa. Ni nga guda zwinzhi nga ha mishumo ya vharumiwa kha thero ine ya ri “Ri Ita Zwoṱhe Zwi Re Maanḓani Ashu!” i re kha Tshiingamo tsha ḽa 15 October 2001. Musi ni tshi ṱolisisa anea mafhungo a takadzaho nga ha vhutshilo ha vharumiwa, elekanyani nga ha nḓila ine na nga engedza ngayo tshumelo yaṋu u itela u rendisa Mudzimu na u wana dakalo.

17. U sa ḓivha ḓuvha na tshikhathi ndi phaṱhutshedzo kha riṋe nga nḓila-ḓe?

¹⁷ Zwi tou vha khagala uri u sa ḓivha ḓuvha na tshikhathi tshine ano maitele a zwithu a ḓo fheliswa ngatsho ndi phaṱhutshedzo kha riṋe. Nṱhani ha uri ri sinyuwe kana zwi ri kule nungo zwi ita uri ri sendele tsini-tsini na Yehova Khotsi ashu wa lufuno, musi ro farakanea nga u ita lufuno lwawe. U dzula hashu ro farakanea nga mushumo wa u huwelela na u iledza u thithisea zwi ita uri ri takale vhukuma tshumeloni ya Muṋe washu.—Luka 9:62.

18. Ndi ngani ri tshi ṱoḓa u dzula ri tshi fulufhedzea?

¹⁸ Ri khou sendela nga u ṱavhanya tsini-tsini na ḓuvha ḽa Mudzimu ḽa khaṱulo. A hu na ane a ṱoḓa u shonisa Yehova na Yesu. Vho ri ṋea ndugelo yo khetheaho ya tshumelo kha ano maḓuvha a vhufhelo. Ri a livhuha nge vha sumbedza uri vha a ri fulufhela!—Vhalani 1 Timotheo 1:12.

19. Ri nga sumbedza hani uri ri dzula ro lindela?

¹⁹ Hu sa londwi uri ri na fulufhelo ḽa u ḓiphina nga vhutshilo ṱaḓulu kana kha ḽifhasi ḽa Paradiso, ri fanela u ḓiimisela u dzula ri tshi fulufhedzea mushumoni we Mudzimu a ri ṋea wone wa u huwelela na u ita vhafunziwa. U swika ṋamusi a ri athu ḓivha ḓuvha na tshikhathi tshine ḓuvha ḽa Yehova ḽa ḓo swika ngatsho, nahone a zwi ṱoḓei uri ri ḽi ḓivhe. Ri nga kona u bvela phanḓa na u dzula ro lindela. (Mat. 24:36, 44) Ri na vhungoho ha uri arali ra fulufhela Yehova nga vhuḓalo na u vhea Muvhuso wawe phanḓa, a ri nga ḓo shona.—Vha-Roma 10:11.