‘Gallassaa Woy Saatiyaa Erekketa’

“Gallassaa woi saatiyaa intte erenna gishshau, naagi uttite.”—MAA. 25:13.

WOYGADA ZAARUUTII?

Wurssettay gakkana gallassaa woy saatiyaa erennaagee nuna goˈˈiyo issi issi ogeti awugeetee?

Ayyaanan tiyettidaageeti naagi uttidoy ayba ogiyaanee?

Nuuni Kiristtoosi yiyo wodiyau giigi uttidoogaa bessana danddayiyoy ayba ogetuunee?

1-3. (a) Yesuusi yootido naaˈˈu leemisotuppe tamaariyoobaa akeekanau maaddiya hara leemisoy awugee? (b) Nuuni woygiya oyshata zaarana koshshii?

 KAWOTETTAN suntta gidida issi uri keehippe koshshiya qaxaruwaa sohuwaa, kaamiyan neeni a efaanaadan oychidabadan qoppa. Gidikkokka, neeni a shiiquwaa efaanau aara gayttanaappe guuttaa kasetada, ogiyau gidiya benzzilee baynnaagaa akeekadasa. Neeni eesotada shammana koshshees. Neeni shammanau biidaashin he bitanee yiis. I heeraa yuushshi aatti xeelliyo wode neeni baawa. I nena naagana danddayenna gishshau, hara uri a efaanaadan oychees. Neeni sohuwaara simmiyo wode, he bitanee biichidoogaa akeekaasa. Yaatin waatuutii?

² Haˈˈi qassi neeni maatay deˈiyo asa gididabadan qoppa; heezzu asata doorada issi keehippe koshshiya oosuwaa oottanaadan etassi immadasa. Neeni he oosuwaabaa etassi yootin, heezzaykka oottanau eeno giidosona. Gidoppe attin, neeni amarida wodiyaa takkada simmiyo wode, etappe naaˈˈaa xallay bantta oosuwaa oottidoogaa akeekadasa. Qassi, ba oosuwaa oottibeennaagee hegau gaasuwaa shiishshiis. Ubba i oottanaukka malibeenna. Yaatin waatuutii?

³ Yesuusi geelaˈotubaanne biraabaa yootido leemisotun hegaa malabaa yootiis; i ayyaanan tiyettidaageetuppe issoti issoti wurssetta wodiyan ammanettidaageetanne wozannaama gidiyoy aybissakko, qassi harati gidennay aybissakko qonccissiis. * (Maa. 25:1-30) Yesuusi, “Gallassaa woi saatiyaa intte erenna gishshau, naagi uttite” yaagidi mintti yootiis. I Seexaanaa alamiyaa xayssanau yiyo saatiyaa ba erissiyo ashkkarati erennaagaa odiis. (Maa. 25:13) Ha wodiyan nuuni he zoriyaa oosuwan peeshshana danddayoos. Nuuni naagi uttanaadan Yesuusi zorido zoriyaa oosuwan peeshshiyoogan goˈettana danddayiyoy ayba ogiyaanee? Bashshaappe attanau  giigi uttidaageeti oonee? Nuuni ha wodiyan naagi uttanau ay oottana bessii?

NAAGA UTTIYOOGAN GOˈETTA

4. ‘Naagi uttiyoogee’ saatiyaa naagiyooba gidennay aybissee?

⁴ Paabirkkan oottiyoogaa woy aakime keettaa qaxaruwan biyoogaa malabati prograamiyan nuuni oottiyoobata. Gidoppe attin, keettaa tamay oyqqiyo wode toyssiyoogaa woy daafabaappe simmin asa shemppuwaa ashshiyoogaa mala hara oosota oottanau saatiyaa naagiyoogee qofay shaahettanaadan woy wolqqaama qohoy gakkanaadan oottana danddayees. Hegaa mala hanotatun keehippe koshshiyaabay saatiyaa naagiyoogaa gidennan, oottana koshshiyaabaa sohuwaara oottiyoogaa. Ha iita alamee mata wode xayiyo gishshau, Yihooway asaa bashshaappe ashshanau giigissidobaa yootiyoogee ha wodiyan keehi koshshiya ooso. Kiristtaaneti naagi uttoosona giyoogee, saatiyaa naagoosona giyoogaa gidenna. Wurssettay awude gakkanaakko erennaagee guuxxiis giishin ichashu ogetun nuna goˈˈees.

5. Wurssetta gallassaa woy saatiyaa erennaagee nu wozanan deˈiyaabaa qonccissanau maaddiyoy ayba ogiyaanee?

⁵ Koyruwan, nuuni wurssettay gakkana wodiyaa erennaagee, nu wozanan deˈiyaabay qonccanaadan oottees. Nuuni he saatiyaa erennaagee Yihoowayyo ammanettidaageeta gidiyoogaa qonccissanau maaddees; hegee Yihooway nuna bonchiyoogaa bessees. Nuuni ha alamiyaa bolli gakkiya bashshaappe attanau koyiyaaba gidikkokka, Yihoowayyo oottiyoy deˈuwaa demmanau koyiyo gishshataassa gidennan, a siiqiyo gishshataassa. (Mazamure 37:4 nabbaba.) Yihoowa sheniyaa oottiyoogee nuna ufayssees; qassi Xoossay tamaarissiyoy nuna goˈˈiyaaba gidiyoogaa eroos. (Isi. 48:17) A azazoti nuuyyo deexo gidokkona.—1 Yoh. 5:3.

6. Nuuni siiqoy denttettin ayyo oottiyoogaa Xoossay ayba ogiyan xeellii, qassi aybissi?

⁶ Naaˈˈanttuwan, nuuni he gallassaa woy saatiyaa erennaagee, Yihoowa ufayssanaadan maaddees. Nuuni wurssetta gallassay matido gishshau woy woyto demmana xallaassi gidennan, siiqoy denttettin Yihoowayyo oottiyoogee, i ba morkkiyaa Seexaanaa worddo mootuwaa shatimmanaadan maaddees. (Iyy. 2:4, 5; Leemiso 27:11 nabbaba.) Dabloosa gaasuwan gakkida tuggaanne kayyuwaa ubbaa qoppidi, Yihooway haariyo maatau ufayssan exatoos; qassi Seexaanaa iita haaruwaa eqettoos.

7. Neeni ne goˈˈaa agga bayada Xoossaayyo oottanaunne harata maaddanau koyiyoy aybissee?

⁷ Heezzanttuwan, nuuni wurssettay gakkana gallassaa erennaagee nu goˈˈaa aggibayiyo deˈo deˈanaadan maaddees. Ha wodiyan Xoossaa erenna issoti issotikka, ha alamee hagaadan daro wodiyaa takkennaagaa ammanoosona. Eti bashshay gakkana hanees giidi yayyiyo gishshau, “Simmi moosinne uyoos; aissi giikko, nuuni wontto haiqqana” giidi qoppoosona. (1 Qor. 15:32) SHin nuuni yayyokko. Nuuni amottiyoobaa polanau nubaa xallaa qoppokko. (Lee. 18:1) Hegaappe dumma ogiyan, nuna yeggi bayidi nu wodiyaa, wolqqaanne nuuyyo deˈiya ubbabaa, Xoossaa Kawotettaa mishiraachuwaa haratussi yootanau nu dosan goˈettoos. (Maa. 16:24) Nuuni Xoossaayyo oottiyoogan, ubba qassi harati a eranaadan maaddiyoogan ufayttoos.

8. Nuuni wozanappe Yihoowaninne a Qaalan ammanettana koshshiyoy aybissakko bessiya Geeshsha Maxaafaa taarikee awugee?

⁸ Oyddanttuwan, nuuni he gallassaa woy saatiyaa erennaagee, kumetta wozanaappe Yihoowan ammanettanaadaaninne a Qaalay yootiyoobaa nu deˈuwan oosuwan peeshshanaadan maaddees. Nuuni nagarancha gidiyo gishshau, geella nu huuphen ammanettana danddayoos. PHauloosi, “Bau eqqidobaa milatiyo urai ooninne kunddennaadan, bana naago” yaagidi ubba Kiristtaaneta zoriis. Yaasu Xoossaa asaa kaalettidi Hidoota Biittaa gelissanaappe guuttaa kasetidi, 23,000 asay  Yihoowa azzanttiis. PHauloosi, “Hagee ubbai . . . nuna wodiyaa wurssettai gakkana matidoogeeta seeranau xaafettiis” yaagiis.—1 Qor. 10:8, 11, 12.

9. Metoy nu ammanuwaa geeshshiyoynne nuuni Xoossaakko shiiqanaadan maaddiyoy ayba ogiyaanee?

⁹ Ichashanttuwan, wurssettay awude gakkanaakko erennaagee, nuna gakkiya metuwaappe tamaaridi nu ammanuwaa minttanaadan maaddees. (Mazamure 119:71 nabbaba.) Ha wurssetta gallassay tumuppe ‘wayssiya wode.’ (2 Xim. 3:1-5) Seexaanaa alamiyan deˈiya daroti nuna ixxiyo gishshau, nu ammanuwaa gaasuwan yedetay gakkana danddayees. (Yoh. 15:19; 16:2) Hegaa mala paacee gakkiyo wode, nu huuphiyaa kawushshidi Xoossaa kaaletuwaa koyiyaaba gidikko, tamay worqqa malabaa geeshshiyoogaadan paacee nu ammanuwaa geeshsheesippe attin, Yihoowayyo oottiyoogaa aggokko. Ubba, nuuni Yihoowakko keehi shiiqoos.—Yaaq. 1:2-4; 4:8.

10. Wodee sohuwaara wuriyaaba milatiyoy aybee?

¹⁰ Wodee sohuwaara wuriyaaba woy gamˈˈiyaaba milatana danddayees. Nuuni saate naagennan ooso xalla xeelliyo wode, wodee sohuwaara wuriyaaba milatees. Hegaadankka, Yihooway nuussi immido ufayssiya oosuwaa sheekkidi oottiyaaba gidikko, he gallassaynne saatee nuuni erennan gakkana danddayees. Hegaara gayttidaagan, ayyaanan tiyettidaageetuppe daroti loˈˈo leemiso gidoosona. Yesuusi 1914n Kawo gidi simmin hanidabaanne issoti issoti giigi uttibeennaba gidikkokka, harati giigi uttidoy ayba ogiyaanakko ane beˈoos.

TIYETTIDAAGEETI GIIGI UTTIDOSONA

11. Ayyaanan tiyettidaageetuppe issoti issoti 1914ppe simmin Goday takkidabadan qoppidoy aybissee?

¹¹ Yesuusi yootido geelaˈotu leemisuwaanne biraa leemisuwaa hassaya. He leemisotun odettida geelaˈoti woy ashkkarati bullachiyaagee woy goday yiyo wodiyaa eridaba gidiyaakko, eti naagi uttana koshshenna. SHin eti erenna gishshau, giigi uttana koshshees. Ayyaanan tiyettidaageeti 1914y dumma laytta gidanaagaa daro layttau naagidaba gidikkokka, he wode aybi hananaakko loyttidi eribookkona. Hanotati eti qoppidoogaadan polettibeenna wode, issoti issoti bullachiyaagee gamˈˈiyaabadan qoppidosona. Issi ishay guyyeppe, “Nu giddoppe amaridaageeti Xiqimita [1914] koyro saaminttan saluwaa biyaabadan qoppidosona” yaagiis.

12. Tiyettidaageeti ammanettidaageetanne wozannaama gididoy ayba ogiyaanee?

¹² Wurssettay yaanaagaa naagin hegee polettennan attiyoogee ay keena hidoota qanxxissana danddayiyaabakko qoppa! Hegaa bollikka, Koyro Alamiyaa Olaara gayttidaagan ishantta yedetay gakkiis. He wode sabbakiyo oosoy muleera attiis woykko ayyaanan tiyettidaageeti xiskkidosona gaana danddayettees. SHin 1919n issibay eti beegottanaadan oottiis! Yesuusi ayyaana beeta maqidasiyaa yiidi, xomoosiyo wodee gakkiis. Gidoppe attin, i xomoosiyo wode issoti issoti paaciyan kunddidosona; hegaappe denddidaagan, Goday etau immido maataa etappe ekkiis. (Maa. 25:16) Eti bantta kuraaziyan lambbay wurin tigibeenna, eeyya geelaˈotu mala; beegottidi naagibookkona. Qassi azalla ashkkaraadan, kawotettaabaa oottanau bantta goˈˈaa aggibayanau koyibookkona. Gidikkokka, ayyaanan tiyettidaageetu giddoppe daroti ammanettidaageeta gididosona; qassi ola wode metuwankka, bantta Godaayyo oottanau wozanappe koyidosona.

13. Ayyaanan tiyettidaageeti 1914ppe simmin woygi qoppidonaa, ha wodiyan shin eta qofay aybee?

¹³ Wochiyo Keelay 1914ppe simmin, Xoossaa sinttan suure qofay deˈiyo ishantti hidootaa qanxxibeennaagaa qonccissiis. Gujjidikka hagaadan giis: “Nuuni nu koyiyoobay hananaadan koyibookko; yaatiyo gishshau, nuuni Xiqimita, 1914n hanana  giidi naagidobay bala gidiyoogaa akeekido wode, nu qofaara maayettanau Goday ba qofaa laammibeenna gishshau keehippe ufayttida. Nuuni i ba qofaa laammanaadan koyibookko. Nuuni a qofaanne a halchuwaa akeekana koyida.” Ha wodiyan deˈiya, ayyaanan tiyettidaageetikka, hegaadan bantta huuphiyaa kawushshoosona; qassi Xoossaa oosuwaa oottanau wozanappe koyoosona. Eti banttana ayyaanay denttettin haasayoos gookkona; shin ha saˈan Godaa oosuwaa oottanau murttidosona. Ha saˈan deˈanau hidootiya, ‘hara dorssatu’ bagga gidida ‘zaway baynna daro asay,’ naagi uttiyoogaaninne mishettidi oottiyoogan eta leemisuwaa kaallees.—Ajj. 7:9; Yoh. 10:16.

GIIGI UTTIYOOGAA

14. Xoossay ayyaana qumaa giigissanau sunttidoogeeta baxuuxi oyqqiyoogee nuna naagiyoy ayba ogiyaanee?

¹⁴ Ayyaanan tiyettida Kiristtaanetuugaadan, zawi baynna daro asaa bagga gidida, beegotti naagiyaageeti ayyaana qumaa giigissanaadan Xoossay sunttidoogeeta baxuuxi oyqqidosona. Hegee, etikka Xoossaa Qaalaappenne geeshsha ayyaanaappe ayyaanaa lambbaa bantta kuraaziyan tigidosona giyoogaa mala. (Mazamure 119:130; Yohaannisa 16:13 nabbaba.) Hegaappe denddidaagan, eti wolqqaama paacee gakkiyo wodekka minnidi oottiyoogan, Kiristtoosi yiyo wode naagi uttoosona. Leemisuwau, Naaze qasho keettatuppe issuwan, ishatussi koyro deˈiya Geeshsha Maxaafay issuwaa xalla. Yaatiyo gishshau, eti ayyaanaabaa qumaa haraa demmanau woossidosona. Hegaappe simmin takkennan, mati qashettida issi ishay amarida ooratta Wochiyo Keelaa ba arttefishaale gede giddon qottidi ehiidoogaa eti eridosona. Paxa attidaageetuppe issoy, ayyaanan tiyettida Ishaa Ernest Vawuri guyyeppe, “Nuuni he xuufetun deˈiya, minttettiya qofaa hassayanaadan Yihooway maalaaliya ogiyan maaddiis” yaagiis. I gujjidikka hagaadan giis: “Ha wodiyan nuuni ayyaana qumaa metootennan demmoos; shin ubbatoo hegaa nashshiyoo? Yihooway bana ammaniyaageeta, qassi ammanettiya asa gididi deˈiyaageetanne ba masoofiyaappe miyaageeta keehippe anjjiyoogaa ammanettays.”

15, 16. Issi azinaynne machiyaa mishettidi haggaazidoogan ayba anjjo demmidonaa, qassi hegaa mala taarikiyaappe neeni ay tamaarana danddayay?

¹⁵ Hara dorssatikka Godaa oosuwaa oottiyoogan Kiristtoosa ishantta loytti maaddiiddi oosoy daridoogeeta gididosona. (Maa. 25:40) Eti Yesuusi leemisuwan yootido iitanne azalla ashkkaraagaappe dumma ogiyan, bantta goˈˈaa aggibayidi  Kawotettaara gayttidabaa kaseyanau baaxetoosona. Leemisuwau, Joninne Maasaka Keeniyaa biitta biidi CHayna qaalaa haasayiyaageetuyyo sabbakanaadan shoobettido wode, koyro baana danddayennabadan qoppidosona. SHin eti bantta hanotaabaa qoppidi, qassi hegaa xeelliyaagan woossidi, yaa baanau qofaa qachidosona.

¹⁶ Eti oottidoban daro anjjuwaa demmidosona. Eti, “Haggaazoy hagan keehippe ufayssees” yaagidosona. Eti laappun asaa Geeshsha Maxaafaa xannaˈissiyoogaa doommidosona; qassi haggaazuwan keehippe ufayssiya darobaa demmidosona. Eti, “Nuuni ha biitti yaanaadan oottido gishshau ubba gallassi Yihoowa galatoos” yaagidosona. Wurssettay yaanay awude gidikkonne hegee gakkanaashin Xoossaayyo minnidi oottanau murttida daro ishatinne michoti deˈoosona. Giiliyaade Timirtte Keettaappe anjjettidi misoonaawe oosuwaa oottiya shaˈan qoodettiyaageetubaa qoppa. Ha dumma haggaazuwaabaa gujjada eranau, Xiqimita 15, 2001 Wochiyo Keelan (Amaarattuwaa) kiyida, “Nu Wolqqay Danddayiyo Ubbabaa Oottiiddi Deˈoos!” giya huuphe yohuwaa aybissi nabbabikkii? Galla galla misoonaaweti oottiyoobaa qonccissiya he ufayssiya taarikiyaa neeni nabbabiyo wode, neeni Xoossaa sabbanau oottiyo oosuwaa kaseegaappe gujjada oottana danddayiyo ogiyaa qoppa; hegee neeni keehippe ufayttanaadan oottana.

NEENIKKA NAAGA UTTA

17. Gallassaa woy saatiyaa erennaagee anjjo gididoy ayba ogiyaanee?

¹⁷ Ha alamee xayana gallassaa woy saatiyaa nuuni erennaagee gita anjjo. Nuuni he gallassaa woy saatiyaa erenna gishshau hidootaa qanxxiyoogaappe, siiqiya nu Aawaa Yihoowa oosuwaa minnidi oottiyo wode, kaseegaappe aaruwan akko shiiqoos. Nuuni oottanaadan Yesuusi immido oosuwaa minnidi oottiyo gishshaunne qofay shaahettanaadan oottiyaabaappe haakkiyo gishshau, Yihoowayyo oottiyoogan ufayttoos.—Luq. 9:62.

18. Nuuni Xoossaa oosuwaa, ammanettidaageeta gididi ubbatoo oottanau koyiyoy aybissee?

¹⁸ Xoossaa pirdda gallassay keehippe matattiis. Nuuni ubbaykka Yihoowa woy Yesuusa azzanttanau koyokko. Ha wurssetta gallassan oottanaadan eti nuussi boncho oosuwaa immidosona. Eti nunan ammanettiyo gishshau keehippe galatoos!—1 Ximootiyoosa 1:12 nabbaba.

19. Nuuni giigi uttana danddayiyoy ayba ogiyaanee?

¹⁹ Nu hidootay saluwan deˈiyoogaa gidin woy Gannate saˈan deˈiyoogaa gidin, sabbakanaadaaninne erissiyo ashkkara oottanaadan Xoossay immido oosuwaa ammanettidaageeta gididi polanau murttidaageeta gidoos. Yihoowa gallassay yaana wodiyaa woy saatiyaa haˈˈikka erokko; woni nuuni erana koshshii? Nuuni ubbatoo naagi uttana danddayoos. (Maa. 24:36, 44) Nuuni kumetta wozanaappe Yihoowan ammanettikko, qassi a Kawotettaa kaseyikko, yeellatennaagaa ammanettoos.—Roo. 10:11.

[Tohossa qofaa]

[Oyshata]

[Sinttaa 26n deʼiya misiliyaa qonccissuwaa]

Metiya hanotankka ayyaana qumaa koya

[Sinttaa 27n deʼiya misiliyaa qonccissuwaa]

Nuuni ayyaanaabaa oosuwaa minnidi oottiyo wode, wodee eesuwaara wurees