1-3. (a) Ano nga mga sitwasyon an nag-iilustrar han leksyon ha duha han mga parabola ni Jesus? (b) Ano nga mga pakiana an kinahanglan naton batunon?

HUNAHUNAA nga ginhangyo ka han usa nga opisyal han gobyerno nga idul-ong hiya ha iya importante nga karadtoon. Kondi mga pipira ka minuto antes mo hiya agion, nadiskobrehan mo nga gutiay na la an gasolina ha imo awto. Kinahanglan magdali-dali ka pagpagasolina. Samtang nagpapagasolina ka, inabot an opisyal. Ginpinamiling ka niya pero waray ka makit-i. Diri na hiya makakahulat, salit nagpadul-ong hiya ha iba. Waray pag-iha binalik ka ngan hinbaroan mo nga ginbayaan ka han opisyal. Ano an imo aabaton?

² Yana hunahunaa nga ikaw an opisyal ngan nagpili ka hin tulo nga lalaki basi mag-asikaso hin importante nga buruhaton. Iginsaysay mo ha ira an imo iginpapabuhat, ngan inuyon hira nga buhaton ito. Kondi pagbalik mo paglabay hin pipira ka panahon, hinbaroan mo nga duha la ha ira an sinugot ha imo sugo. Ngan an waray sumugot naghihimo hin mga pasangil. Ha pagkamatuod, waray ngani hiya magsari pagbuhat hito. Ano an imo aabaton?

³ Ha mga parabola ni Jesus mahitungod han napulo nga “uray” o birhen ngan han mga talanton, naggamit hiya hin puropariho hito nga mga sitwasyon basi iilustrar kon kay ano nga ha panahon han kataposan, an pipira nga dinihogan nga Kristiano magigin matinumanon ngan maaramon kondi an iba diri. * (Mat. 25:1-30) Ginpabug-atan niya an leksyon hito nga mga parabola pinaagi ha pagsiring: “Busa magbantay kamo, kay diri kamo maaram han adlaw, bisan an oras”—karuyag sidngon, an panahon nga ipapadapat na ni Jesus an paghukom han Dios ha kalibotan ni Satanas. (Mat. 25:13) Mahimo naton iaplikar ito nga sagdon yana. Kay ano nga mapulsanon ha aton nga padayon nga magbantay, sugad han igin-aghat ni Jesus?  Hin-o an napamatud-an nga andam ha kaluwasan? Ngan ano an kinahanglan naton buhaton yana basi magpabilin nga mabinantayon?

4. Kay ano nga an pagpabilin nga mabinantayon diri nangangahulogan hin pagbinantay han oras?

⁴ Ha pipira nga buruhaton sugad han pagtrabaho ha pabrika, pagpakonsulta ha doktor, o pagsakay ha panpubliko nga sarakyan, ginkikinahanglan an pagsunod ha eskedyol. Kondi ha iba nga buruhaton sugad han pagparong hin sunog o pagbulig ha mga nabiktima hin kalamidad, an pagbinantay han oras bangin makaulang o peligroso pa ngani. Ha sugad nga mga kahimtang, mas importante gud nga magpokus ha ginbubuhat kay ha pagsunod ha eskedyol. Samtang nagtitikahirani an kataposan hini nga sistema, labi na gud nga importante an pagsumat ha mga tawo mahitungod han ginbubuhat ni Jehova basi maluwas an katawohan. An pagpabilin nga mabinantayon sugad nga mga Kristiano diri nangangahulogan hin pagbinantay han oras. Ha pagkamatuod, may-ada diri maminos lima nga kapulsanan an diri naton paghibaro han eksakto nga adlaw o oras han pag-abot han kataposan.

5. Paonan-o an diri paghibaro han adlaw o oras makakabulig basi makita kon ano gud an aada ha aton kasingkasing?

⁵ Siyahan, an diri naton paghibaro kon san-o maabot an kataposan naghahatag ha aton hin higayon nga ipakita kon ano gud an aada ha aton kasingkasing. Ha pagkamatuod, ginpapasidunggan kita ni Jehova kay gintatagan kita niya hin higayon nga gamiton an aton kagawasan ha pagbuot basi ipakita an aton pagkamaunungon ha iya. Bisan kon karuyag gud naton maluwas ha kataposan hini nga sistema, nag-aalagad kita kan Jehova tungod kay hinigugma naton hiya, diri la tungod kay karuyag naton mabuhi ha waray kataposan. (Basaha an Salmo 37:4.) Nalilipay kita pagbuhat han iya kaburut-on, ngan maaram kita nga gintututdoan kita han Dios kay karuyag niya an pinakamaopay para ha aton. (Isa. 48:17) Diri kita naabat nga mabug-at an iya mga sugo.—1 Juan 5:3.

6. Kon nag-aalagad kita ha Dios tungod han gugma, ano an iya inaabat? Kay ano?

⁶ Ikaduha, an diri naton paghibaro han adlaw o oras naghahatag ha aton hin higayon nga lipayon an kasingkasing ni Jehova. Kon nag-aalagad kita ha iya tungod han gugma—diri tungod hin petsa o tungod la hin balos—nabulig kita kan Jehova nga pamatud-an nga buwaon an iya kaaway nga hi Satanas. (Job 2:4, 5; basaha an Proberbios 27:11.) Maaram kita han ngatanan nga kasakit ngan kabidoan nga ginpahinabo ni Satanas, salit nalilipay kita nga dumapig ha pagmando ni Jehova ngan isalikway an maraot nga pagmando ni Satanas.

7. Kay ano nga karuyag mo gamiton an imo kinabuhi ha pag-alagad ha Dios ngan ha pagbulig ha iba?

⁷ Ikatulo, an aton pag-alagad nga diri naghuhunahuna hin espisipiko nga petsa nag-aaghat ha aton nga padayon nga magsakripisyo. An iba yana nga diri nakilala ha Dios natoo liwat nga diri na mag-iiha an kalibotan. Nahahadlok hira nga may tiarabot nga kalamidad nga magbubungkag han tuna, salit an ira disposisyon: “Pangaon ngan panginom kita, kay buwas mapatay kita.” (1 Kor. 15:32) Kondi kita diri nahahadlok. Ngan diri an aton la kalugaringon an importante ha aton. (Prob. 18:1) Lugod, gin-uuna naton an kaburut-on ni Jehova ngan kinaburut-on nga ginagamit an aton panahon, kusog, ngan mga panag-iya ha pagsangyaw han maopay nga sumat han Ginhadian han Dios. (Mat. 16:24) Nalilipay kita ha pag-alagad ha Dios, labi na ha pagbulig ha iba nga makilala hiya.

8. Ano nga ehemplo ha Biblia an nagpapakita nga kinahanglan bug-os nga sumarig kita kan Jehova ngan ha iya Pulong?

⁸ Ikaupat, an diri naton paghibaro han adlaw o oras nabulig ha aton nga bug-os nga sumarig kan Jehova ngan mangalimbasog gud ha pagsunod han iya Pulong. Tungod kay diri kita hingpit, may tendensya kita nga sumarig ha aton kalugaringon. Hi Pablo nagsagdon ha ngatanan nga Kristiano: “An naghuhunahuna nga natindog hiya magmatngon bangin mapukan hiya.” Bainte-tres mil an nawad-an han pag-uyon ni Jehova antes  gud sumulod ha Tuna nga Iginsaad an katawohan han Dios ha pagpanguna ni Josue. Hi Pablo nagsiring nga “ini nga mga bagay . . . ipinanurat ha pagsagdon ha aton, nga ngada ha aton an kataposan han mga katuigan maabot.”—1 Kor. 10:8, 11, 12.

9. Paonan-o an mga pagsari makakaparig-on han aton pagtoo ngan makakabulig ha aton nga magin mas duok ha Dios?

⁹ Ikalima, tungod kay diri kita maaram kon san-o maabot an kataposan, may higayon kita nga mahibaro hin leksyon ha mga pagsari ngan maparig-on an aton pagtoo. (Basaha an Salmo 119:71.) ‘Magpakalilisang gud nga panahon’ an kataposan nga mga adlaw hini nga sistema. (2 Tim. 3:1-5) Damu ha kalibotan ni Satanas an napupungot ha aton, salit bangin pagtimarauton kita tungod han aton pagtoo. (Juan 15:19; 16:2) Kon magigin mapainubsanon kita ngan magpapagiya ha Dios durante han mga pagsari, magigin mas marig-on an aton pagtoo sugad la nga an metal napupuro pinaagi han kalayo. Diri kita maundang ha pag-alagad; lugod, magigin mas duok kita kan Jehova labaw kay han aton ginlalaoman.—Jak. 1:2-4; 4:8.

10. Ano an hinungdan nga baga hin madagmit la lumabay an panahon?

¹⁰ An kalaksi o kahinay han paglabay han panahon nadepende ha aton. Kon damu an aton ginbubuhat ngan diri kay nagbibinantay la kita han oras, baga hin madagmit gud lumabay an panahon. Ha pariho nga paagi, kon okupado kita ha makalilipay nga buruhaton nga iginsugo ni Jehova, bangin umabot an kataposan hin mas temprano kay han aton ginhuhunahuna. May kalabotan hini, an kadam-an han mga dinihogan nagpakita hin maopay gud nga susbaranan. Hisgotan naton hin madaliay an nahitabo katapos magin Hadi hi Jesus han 1914, ngan aton kitaon kon paonan-o iginpakita han iba nga andam hira samtang an iba diri.

11. Katapos han 1914, kay ano nga an iba nga mga dinihogan naghunahuna nga nadelatar hi Jesus?

¹¹ Hinumdumi an mga parabola ni Jesus mahitungod han mga birhen ngan han mga talanton. Kon maaram an mga birhen o an mga uripon kon san-o maabot an karaslon nga lalaki o an agaron, diri unta hira kinahanglan padayon nga magbantay. Kondi diri hira maaram, salit kinahanglan andam hira pirme. Bisan kon damu na ka tuig nga maaram an mga dinihogan nga an 1914 makatirigamnan nga tuig, diri matin-aw ha ira kon ano an mahitatabo. Han waray mahitabo an ira ginlalaoman, an iba ha ira naghunahuna nga nadelatar hi Jesus. Usa nga brother an ha urhi nagsiring, “An pipira ha amon naghunahuna gud nga makadto na kami ha langit ha siyahan nga semana hito nga Oktubre [1914].”

12. Paonan-o iginpakita han mga dinihogan nga hira matinumanon ngan maaramon?

¹² Sigurado nga nakakapanluya gud an paglinaom nga maabot an kataposan pero waray ito umabot! Dugang pa, an kabugtoan nakaeksperyensya hin pagkontra durante han Girra ha Kalibotan I. Haros napaundang an pagsangyaw nga buruhaton. Sugad hin nanhingaturog an mga dinihogan. Kondi han 1919 may nagpukaw ha ira! Inabot na hi Jesus basi usisahon an ngatanan nga nag-aangkon nga Kristiano. Kondi an iba nga dinihogan waray makapasar ngan nawad-an han pribilehiyo nga magtrabaho para ha Agaron, hi Jesus. (Mat. 25:16) Diri hira mabinantayon; pariho hira han diri maaramon nga mga birhen nga waray magdugang hin lana ha ira lampara. Ngan pariho han hubya nga uripon, diri nira karuyag magsakripisyo para ha Ginhadian. Kondi an kadam-an han mga dinihogan nagpakita nga maunungon gud hira ngan karuyag gud nira mag-alagad ha ira Agaron bisan durante han mga tuig han girra nga makuri an kahimtang.

13. Ano an disposisyon han mga dinihogan katapos han 1914, ngan ano an ira disposisyon yana?

¹³ Katapos han 1914, ini an makatirigamnan nga ginsiring han The Watchtower: “Mga kabugtoan, an iba ha aton nga may husto nga panhunahuna ha Dios diri nasusubo ha bisan hain han Iya mga kahikayan. Diri namon karuyag nga an amon kaburut-on an matuman, salit han hinbaroan  namon nga sayop an amon ginlalaoman ha Oktubre, 1914, nalipay kami nga waray bag-oha han Ginoo an Iya Plano basi masunod an amon karuyag. Diri namon karuyag nga buhaton Niya ito. Karuyag la namon masabtan an Iya mga plano ngan katuyoan.” Ini nga pagkamapainubsanon ngan debosyon ha Dios iginpapakita pa gihapon han mga dinihogan yana. Diri hira nag-aangkon nga an Dios direkta nga nakikigkomunikar ha ira, kondi determinado hira nga tumanon an iginsugo ni Jesus nga buruhaton dinhi ha tuna. Ngan yana an daku nga panon han ‘iba nga mga karnero,’ an mga Kristiano nga may tunan-on nga paglaom, nagsusubad han ira pagin mabinantayon ngan kadasig.—Pah. 7:9; Juan 10:16.

14. Kay ano nga nagpapanalipod ha aton an pagpabilin nga duok ha ginagamit han Dios ha pagtagana hin espirituwal nga pagkaon?

¹⁴ Pariho han dinihogan nga mga Kristiano, an mabinantayon nga mga membro han daku nga panon nagpapabilin nga duok ha matinumanon ngan maaramon nga uripon nga ginagamit han Dios ha pagtagana hin espirituwal nga pagkaon. Sugad nga resulta, hira liwat sugad hin nagdudugang han ira suplay han espirituwal nga lana tikang ha Pulong han Dios ngan ha Iya espiritu. (Basaha an Salmo 119:130; Juan 16:13.) Tungod kay napaparig-on hira hito, iginpapakita liwat nira nga andam hira ha pagbalik han Kristo, ngan nagpapabilin hira nga aktibo bisan ha panahon han magkuri nga pagsari. Pananglitan, ha usa nga kampo nga prisohan han mga Nazi, ha tinikangan an kabugtoan may usa la nga kopya han Biblia. Salit nag-ampo hira para hin dugang nga espirituwal nga pagkaon. Waray pag-iha katapos hito hinbaroan nira nga an usa nga bugto nga bag-o la nga napriso nakapalusot ha kampo hin pipira nga gowa han The Watchtower pinaagi ha pagbutang hito ha sulod han iya artipisyal nga bitiis nga hinimo ha kahoy. Usa han mga nakatalwas amo an dinihogan nga brother nga hi Ernst Wauer, nga ha urhi nagsiring: “Ha urusahon nga paagi, ginbuligan kami ni Jehova nga mamemorya an makaparig-on nga mga punto ha mga artikulo.” Katapos nagsiring hiya: “Yana, masayon gud la an pakakuha hin espirituwal nga pagkaon, kondi pirme ba naton ito gin-aapresyar? Nasarig ako nga hi Jehova may igin-andam nga hura nga bendisyon ha mga nasarig ha iya, nagpapabilin nga maunungon, ngan nakaon ha iya lamesa.”

15, 16. Paonan-o ginbendisyonan an kadasig ha ministeryo han usa nga mag-asawa, ngan ano an imo hibabaroan ha sugad hito nga mga eksperyensya?

¹⁵ An iba nga mga karnero bug-os nga nasuporta ha kabugtoan ni Kristo pinaagi han pagpabilin nga okupado ha buruhaton han Agaron.  (Mat. 25:40) Diri pariho ha maraot ngan hubya nga uripon ha parabola ni Jesus, andam hira magsakripisyo ngan mangalimbasog basi unahon an Ginhadian. Pananglitan, han hira Jon ngan Masako gin-imbitar nga bumulig ha pagsangyaw ha mga Intsik ha Kenya, ha siyahan nagruhaduha hira. Kondi katapos mag-ampo ngan mamalandong han ira kahimtang, nagdesisyon hira nga bumalhin didto.

¹⁶ Hura nga ginbendisyonan an ira pangalimbasog. “Makalilipay gud an ministeryo dinhi,” siring nira. Nagkaada hira pito nga Bible study. Ngan damu pa an ira eksayting nga eksperyensya. Hira nagsiring, “Kada adlaw nagpapasalamat kami kan Jehova nga iya igintugot nga mahinganhi kami.” Syempre, damu pa nga kabugtoan an nagpapakita nga determinado hira magin okupado gud ha pag-alagad ha Dios bisan san-o umabot an kataposan. Hunahunaa an yinukot nga naggradwar ha Gilead School ngan nagin mga misyonero, o an mga malipayon nga nagsakripisyo pagbalhin ha iba nga nasud. May hibabaroan ka mahitungod ha pag-alagad ha lugar nga mas daku an panginahanglan pinaagi ha pagbasa han artikulo nga “Malipayon nga Nagsakripisyo Hira ha Pag-alagad—ha Ecuador” ha Hulyo 15, 2012 nga An Barantayan. Samtang ginbabasa mo an ginsiring han kabugtoan nga nag-aalagad ha iba nga nasud, hunahunaa kon paonan-o mo mapapauswag an imo pag-alagad nga maghahatag hin kadayawan ha Dios ngan magriresulta hin dugang nga kalipay ha imo.

17. Paonan-o an diri paghibaro han adlaw o oras bendisyon ha aton?

¹⁷ Matin-aw nga an diri naton paghibaro han espisipiko nga adlaw o oras han pag-abot han kataposan hini nga sistema bendisyon ha aton. Imbes nga manluya o masubo, mas nagigin duok kita kan Jehova, an aton mahigugmaon nga Amay, samtang okupado kita ha pagbuhat han iya kaburut-on. Tungod kay nakapokus kita ha buruhaton nga iginsugo ha aton ni Jesus ngan ginlilikyan an mga ulang, malipayon kita ha pag-alagad kan Jehova.—Luk. 9:62.

18. Kay ano nga karuyag naton magpabilin nga matinumanon ha aton pag-alagad ha Dios?

¹⁸ Hirani na gud an adlaw han paghukom han Dios. Diri naton karuyag nga mapasubo hi Jehova o hi Jesus. Igintapod nira ha aton an birilhon nga mga pribilehiyo ha pag-alagad hinin kataposan nga mga adlaw. Mapasalamaton gud kita nga nasarig hira ha aton!—Basaha an 1 Timoteo 1:12.

19. Paonan-o naton maipapakita nga andam kita?

¹⁹ Ha langit man o ha Paraiso nga tuna an aton paglaom, magin determinado kita nga padayon nga buhaton an sugo han Dios nga magsangyaw ngan manhimo hin mga disipulo. Diri pa gihapon kita maaram han eksakto nga adlaw o oras han pag-abot han adlaw hi Jehova, ngan kinahanglan pa ba naton hibaroan ito? Mahimo kita magin andam hito, ngan ipapakita naton nga andam kita. (Mat. 24:36, 44) Sigurado gud kita nga kon padayon nga sumarig kita hin bug-os kan Jehova ngan unahon an iya Ginhadian, diri gud kita mapapakyas.—Roma 10:11.